Patukuŵalanga Baibulo mpaka tupate mfundo syakamuchisya patukuwungunya mfundo sine. Ana mpaka tutende chamtuli yeleyi?

Alijiganyeje mwakusokoka ngani ja m’Baibulo. Mpaka atende yeleyi mwakupata juŵalembile nganijo, ŵandu ŵaŵalembelaga, soni ndaŵi jiŵalembile. Mpaka atende chenenesoni kupata yindu yayatendekwaga pandaŵijo, yindu yayatendekwaga pa umi wakwe, soni yindu yayatendekwe pasogolo pakwe.

Aganichisyeje mfundo syampaka alijiganye mwakupata kwanga kwa yiwusyo yakuyichisyayi: ‘Ana ŵandu ŵa munganiji yakwayaga chamtuli? Ana ŵalosyaga ndamo syamtuli? Ligongo chichi ngusosekwa kujigalila ndamo syelesi kapena kuŵambala kujigalila ndamosi?’

Akamulichisyeje masengo yindu yalijiganyisyeyo pandaŵi jali mu utumiki kapena pakutenda yindu ni ŵane. Kutenda yeleyi kuchakamuchisya kuti aŵe ŵalunda mpela mwajikusaŵechetela Baibulo kuti, “Mundu jwalijose jwalunda ayisamalile yeleyi.”—Sal. 107:43.

• Mfundo jakamuchisya: Aganichisye mbali jakuti Chipanje Chakusimanikwa m’Maloŵe ga Mlungu jajikusasimanikwa mu msongano wa mkati mwa wiki yajikusati pakutukamuchisya kuti tukamulichisye masengo yindu yatulijiganyisye. Ndaŵi syosope mbali jeleji jikusakola yiwusyo yatukusasosekwa kuliwusya, mfundo syatukusasosekwa kusiganichisya nambosoni yiwulili yatukusasosekwa kuyiganichisya.