1. Boha do pakkilalaan ni piga-piga donganta tikki marbarita na uli? (Ida gambar.)

 BOASA olo hita marbarita na uli? Ala holong do rohatta tu Jahowa jala lomo do rohatta asa ditanda akka halak Ibana. Godang do naposo ni Jahowa na marlas ni roha marbarita na uli. Alai adong piga-piga sian nasida na so pola las rohana marbarita na uli. Alana adong na parila, jala makkilala dang malo nasida mangajari. Na asing, mabiar manuktuki jabu ni halak na so ditanda. Adong do na mabiar so tung dimuruki halak ibana. Asing ni i, adong do na mulai sian dakdanak nungnga diajari natua-tuana asa unang marsoal dohot halak na asing. Nang pe holong hian roha ni nasida tu Jahowa, maol do dihilala nasida marbarita tu halak na so ditanda. Alai diboto nasida do na massai rikkot ulaon on. Jala toktong do nasida taratur marbarita na uli. Massai las do roha ni Jahowa mangida nasida.

2. Boasa dang pola metmet rohamuna molo maol dihilala hamu marbarita na uli?

² Boha molo hamu? Hea do dihilala hamu songon i? Molo hea, unang ma metmet rohamuna. Molo dang malo dihilala hamu mangajari akka halak, on patuduhon na serep do rohamuna, jala dang lomo rohamuna asa holan hamu na diparrohahon akka halak. On pe patuduhon, dang olo hamu marsoal dohot halak na asing. Memang dang adong sian hita na las rohana ditolak, tarlumobi molo tabahen na denggan tu nasida. Jadi pos ma rohamuna, diboto Jahowa do songon dia pakkilalaanmuna i jala diurupi Ibana do hamu. (Jes. 41:13) Alani i,  di artikel on lao tabahas ma lima cara na boi taulahon asa unang torus songon i pakkilalaatta jala asa las rohatta tikki marbarita.

RIMANGI MA HATA NI DEBATA

3. Aha do na diulahon si Jeremia asa boi barani marbarita?

³ Mulai sian najolo, godang do naposo ni Debata na mangulahon tugas na maol. Alai alani Hata ni Debata, gabe dipatogu do nasida jala marhasil mangulahon i. Contohna Panurirang Jeremia. Holsoan do ibana tikki disuru Jahowa ibana lao marbarita. Didok ibana, “Dang malo au makkatai, ai poso dope au.” (Jer. 1:6) Aha do na diulahon si Jeremia asa boi barani? Dirimangi ibana do Hata ni Debata. Didok ibana, “Alai di rohakku gabe songon api na marsigorgor ma hata i, na tarhurung di bagasan holi-holikku, loja do au manaon i, jala dang tartaon au be i.” (Jer. 20:​8, 9) Jadi nang pe maol tugas ni si Jeremia, alai gabe barani do ibana mangulahon tugasna i ala mangarimangi Hata ni Debata.

4. Aha do manfaatna molo tajaha Bibel jala tarimangi i? (Kolosse 1:​9, 10)

⁴ Hita pe boi do margogo alani Hata ni Debata. Tikki dibahen Apostel Paulus surat tu huria di Kolosse didok ibana do, parbinotoan na bagas taringot tu lomo ni roha ni Debata boi mangonjar roha ni akka donganna asa “marpangalaho hombar tu lomo ni roha ni Jahowa huhut mangulahon akka ulaon na denggan”. (Jaha Kolosse 1:​9, 10.) Ulaon na denggan na dimaksud si Paulus disi, termasuk ma i ulaon marbarita na uli. Jadi molo tajaha Bibel jala tarimangi i, gabe lam togu ma haporseaotta tu Jahowa. Jala gabe lam taattusi ma na massai penting do paboahon barita na uli taringot Harajaonna.

5. Songon dia do asa dapotta manfaat tikki manjaha Bibel?

⁵ Asa boi dihilala hamu manfaat ni Hata ni Debata, unang ma asal sae dijaha hamu i. Alai bahen hamu ma tikki lao manjaha, mamparsiajari, jala mangarimangi i. Molo adong na maol diattusi hamu tikki manjaha Bibel, unang ma dilewati hamu i. Gariada pakke ma Indeks Publikasi Menara Pengawal manang Tudutudu na Dipangke Sitindangi Ni Jahowa Laho Marsiajar, lao mangalului lapatanna. Molo dibahen hamu tikkimuna lao mangariset, gabe pos ma rohamuna na tutu do na didok Bibel i. (1 Tes. 5:21) Jala molo pos rohamuna tu na didok Bibel i, gabe semangat ma hamu paboahon i tu akka halak.

 DENGGAN MA PERSIAPPON

6. Boasa ikkon persiapan hita andorang so marbarita?

⁶ Molo denggan dibahen hamu persiapan andorang so marbarita, gabe dang taroktokon be hamu tikki makkatai dohot halak na asing. Najolo diurupi Jesus do akka siseanna asa mambahen persiapan andorang so lao nasida marbarita. (Luk. 10:​1-11) Ala diulahon nasida akka na diajarhon Jesus, boi ma dapot ni nasida akka hasil na denggan. Jala las situtu ma roha ni nasida alani i.—Luk. 10:17.

7. Songon dia do hita boi mampersiappon diritta andorang so marbarita? (Ida gambar.)

⁷ Songon dia do hita boi mampersiappon diritta andorang so marbarita? Tapikkirhon ma aha na lao tadok jala songon dia hita paboahon i mamakke hatatta sandiri. Asing ni i, tapikkirhon ma hira-hira aha do annon tanggapan ni akka halak jala songon dia hita mangalusi nasida. Dung i tikki makkatai hita tu nasida, berupaya ma hita asa tenang, senyum, jala ramah tu nasida.

8. Boasa dipatudos si Paulus halak Kristen songon hudon na sian tano liat?

⁸ Didok Apostel Paulus do, “Nang pe hami songon hudon na sian tano liat, alai dilehon do tu hami tugas na badia na songon arta i.” (2 Kor. 4:7) Aha do arta i? Tugas lao paboahon barita na uli taringot Harajaon na boi paluahon ngolu ni akka halak. (2 Kor. 4:1) Aha do hudon na sian tano liat i? On manggombarhon naposo ni Debata na pasahatton barita na uli i. Najolo di jaman ni si Paulus, dipakke akka partiga-tiga do hudon na sian tano liat tikki naeng mangirim akka barang na arga, songon sipanganon, anggur, dohot hepeng. Dos songon i ma, dipakke Jahowa do hita lao pasahatton barita na massai penting. Pos do roha ni Jahowa tu hita. Jadi pasti lehonon ni Jahowa do gogo tu hita asa boi toktong marbarita na uli.

MARTANGIANG MA ASA BARANI

9. Songon dia do carana mangatasi biar ni rohatta tu halak? (Ida gambar.)

⁹ Sipata mabiar do hita tu halak tikki marbarita. Songon dia ma hita mangatasi perasaan sisongon i? Taingot ma contoh ni akka apostel. Nang pe diorai nasida marbarita, dang gabe mabiar nasida. Gariada martangiang do nasida tu Jahowa asa ‘toktong barani paboahon hatana’. Pittor dialusi Jahowa do tangiang ni nasida. (Ul. 4:​18, 29, 31) Jadi molo mabiar hita tu halak, boi do tong hita  martangiang tu Jahowa. Tapangido ma asa lam bagas holongta tu akka halak. On mangurupi hita asa dang mabiar tikki marbarita.

10. Songon dia do Jahowa mangurupi hita lao marbarita na uli? (Jesaya 43:​10-12)

¹⁰ Nungnga dipillit Jahowa hita gabe Saksina jala marjanji do Ibana mangurupi hita asa barani. (Jaha Jesaya 43:​10-12.) Adong opat carana. Na parjolo, sai didongani Jesus do hita manang didia pe hita marbarita. (Mat. 28:​18-20) Na paduahon, disuru Jahowa do suru-suruanna lao mangurupi hita. (Pgk. 14:6) Na patoluhon, dilehon Jahowa do tondi parbadiana lao mangurupi hita mangingot akka naung taparsiajari. (Joh. 14:​25, 26) Na paopatton, dilehon Jahowa do akka dongan sahaporseaon lao mandongani hita. Takkas ma marhite bantuan ni Jahowa dohot akka dongan, boi ma hita barani jala toktong marbarita.

BAHEN MA PENYESUAIAN JALA TOKTONG MARPIKKIRAN POSITIF

11. Di tikki sadihari do boi juppangmuna godang halak? (Ida gambar.)

¹¹ Hea do moru las ni rohamuna ala dang juppangmuna akka halak di jabu? Molo hea, coba ma pikkirhon on: ‘Tudia do nuaeng akka halak di daerah on?’ (Ul. 16:13) ‘Na lao do nasida karejo manang lao marbalanja?’ Molo songon i do situasina, boi do hamu marbarita di dalan. Tabahas ma jo pengalaman ni sahalak donganta na margoar si Joshua. Didok ibana, “Marbarita do au tikki di mall dohot di inganan na rame, alana boi do juppangku godang halak disi.” Godang do tong halak di jabu na boi dijuppangi si Joshua dohot istrina si Bridget dung botari manang di ari Minggu arian.—Eps. 5:​15, 16.

12. Aha do na boi taulahon lao mamboto aha na dipikkirhon akka halak manang na dihaporseai nasida?

¹² Boha molo di daerahmuna godang halak dang berminat tu barita na uli? Molo songon i situasina, berupaya ma hamu mamboto aha na dihaporseai nasida manang na dipikkirhon nasida. Taida ma muse contoh ni si Joshua dohot si Bridget nakkin. Dipakke nasida do sukkun-sukkun na adong di halaman parjolo ni risalahta lao mamukka pakkataion. Contohna dipakke nasida do risalah Songon dia do Pandapotmuna taringot Bibel? Didok nasida do, “Piga-piga halak mandok Hata ni Debata do Bibel i. Na deba nai mandok dang songon i.  Boha molo hamu?” Sukkun-sukkun sisongon i biasana boi do mamukka pakkataion.

13. Boasa tadok na marhasil hita marbarita nang pe dang adong halak na manangihon? (Poda 27:11)

¹³ Nang pe dang olo akka halak manangihon hita tikki marbarita, alai nga marhasil hita disi. Alana nungnga taulahon be paretta ni Jahowa dohot Jesus lao paboahon taringot nasida. (Ul. 10:42) Jadi nang pe dang adong halak na boi tajuppangi manang ditolak barita na tapasahat, boi do hita marlas ni roha. Ala taboto nungnga tabahen las roha ni Jahowa.—Jaha Poda 27:11.

14. Boasa dohot hita marlas ni roha molo adong dapot ni donganta halak na berminat?

¹⁴ Dohot do hita marlas ni roha molo adong dapot ni donganta halak na berminat. Di Joujou Paboahon, dipatudos do ulaon marbarita songon mangalului dakdanak na mago. Godang do halak na mangalului dakdanak i sian sada inganan tu inganan na asing. Tikki dapot dakdanak i, dang holan halak na mandapotton dakdanak i na marlas ni roha. Alai sude na mangalului dakdanak i, dohot do marlas ni roha. Dos songon i ma hita, songon sada tim do hita tikki mangurupi akka halak gabe sisean ni Jesus. Sude do hita di huria marbarita na uli. Jala tikki adong halak na berminat ro tu parpunguan, marlas ni roha do hita sude.

INGOT MA HOLONGMUNA TU JAHOWA DOHOT TU AKKA HALAK

15. Aha do manfaatna molo taingot Mateus 22:​37-39 tikki marbarita na uli? (Ida gambar sampul.)

¹⁵ Molo taingot holongta tu Jahowa dohot tu akka halak, boi do lam tamba las ni rohatta marbarita na uli. (Jaha Mateus 22:​37-39.) Bayakkon ma sadia las roha ni Jahowa mangida hita marbarita na uli jala sadia las roha ni akka halak tikki mulai marsiajar Bibel nasida. Bayakkon ma muse boi nasida mangolu salelengna ala dijalo nasida barita na tapasahat.—Joh. 6:40; 1 Tim. 4:16.

16. Boha do carana asa toktong marlas ni roha hita tikki marbarita, nang pe dang boi kaluar sian jabu? Paboa ma contohna.

¹⁶ Boha do molo dang boi hamu kaluar sian jabu lao marbarita? Molo songon i situasimuna, ulahon ma nasa na tarbahen hamu lao patuduhon holongmuna tu Jahowa dohot tu akka halak. On ma na diulahon si Samuel dohot istrina si Dania saleleng pandemi  COVID-19. Dang boi nasida kaluar sian jabuna. Nang pe maol situasina, alai taratur do nasida marbarita marhite telepon dohot surat, jala manguluhon parsiajaran Bibel marhite Zoom. Marsahit kanker do si Samuel. Tikki marubat ibana tu klinik, marbarita do ibana tu akka halak na disi. Didok ibana, “Saleleng situasi na maol on, olo do holsoan hami, loja, jala diuji do haporseaonnami tu Jahowa. Jadi ikkon dilului hami do boha carana asa las rohanami manomba Jahowa.” Dang sae dope masalah ni si Samuel, adong muse masalah na asing. Madabu ma si Dania, jala dang boi meret ibana sian podoman saleleng tolu bulan. Dung i, ikkon markursi roda ma ibana saleleng onom bulan. Alai didok si Dania, “Hubahen do nasa na tarbahen au lao marbarita. Misalna, marbarita ma au tu perawat na mangunjungi au jala makkata-hatai ma au tu halak na manaruhon paket tu jabunami. Makkata-hatai do tong au marhite telepon dohot sahalak borua na karejo di perusahaan na manjual alat kesehatan.” Memang dang godang be na boi diulahon si Samuel dohot si Dania. Alai dibahen nasida do nasa na tarbahen nasida lao marbarita, jala marlas ni roha do nasida.

17. Dung tabahas artikel on, aha do na gabe tekadmuna?

¹⁷ Berupaya ma hita mangulahon sude saran na dipaboa di artikel on. Ganup saran i dipatudos do songon bumbu lao mangalloppa. Molo tapadomu akka bumbu, gabe tabo ma dai ni sipanganon i. Dos songon i ma molo taulahon sude saran on, gabe boi ma lam semangat hita jala lam marlas ni roha di ulaon marbarita.