1. ?Ngue ti yɛ aniaan wie’m be diman aklunjɔɛ jasin fɛ’n i bolɛ’n nun-ɔn? (An nian foto’n wie.)

 E MƆ e ti Zoova i sufuɛ’n e bo jasin fɛ’n, afin e klo e Si Ɲanmiɛn yɛ e kunndɛ kɛ é úka e wiengu mun naan be si i. Aniaan kpanngban be klo jasin fɛ’n i bolɛ kpa. Sanngɛ wie’m be diman aklunjɔɛ kpa jasin fɛ’n i bolɛ’n nun. ?Ngue ti-ɔ? Yɛle kɛ aniaan wie’m be kloman kɛ bé kɔ́ sran kun mɔ w’a yiaman be’n i awlo lɔ. Aniaan wie’m be liɛ’n, be se be wun kɛ be nga bé wá bó jasin fɛ’n bé klé be’n, be su sɔman ndɛ nga bé wá kán’n nun. Wie mun ekun be liɛ’n wafa nga be tali be’n ti’n, be kunndɛman kɛ bé yó like wie m’ɔ́ ló sran’m be ngasi-ɔ. Aniaan sɔ’m be klo Zoova kpa. Sanngɛ kɛ ɔ ko yo naan b’a bo jasin fɛ’n b’a kle sran wie mɔ be simɛn i’n, ɔ ti kekle man be. Ɔ nin i sɔ ngba’n, be bo jasin fɛ’n titi, afin be wun i wlɛ kɛ junman sɔ’n ti cinnjin. E si kɛ be ɲin mɔ be mian’n ɔ jɔ Zoova klun.

2. ?Sɛ a diman aklunjɔɛ kpa jasin fɛ’n i bolɛ nun’n, ngue ti yɛ ɔ fataman kɛ ɔ sa sin bubu wɔ-ɔ?

² ?Ɔ kusu kɛ ɔ ko yo naan w’a di aklunjɔɛ jasin fɛ’n i bolɛ’n nun’n, ɔ ti kekle man wɔ? ?Ɔ wun yo wɔ kɛ aniaan nga e kannin be ndɛ lɛ’n be sa? Sɛ ɔ ti sɔ’n, nán ɔ sa sin bubu wɔ. Kɛ a lafiman ɔ wun su dan’n, i sɔ’n kle kɛ a ti wun ase kanfuɛ, a kunndɛman kɛ sran’m be fa be ɲin be sie wɔ su dan, yɛ a kunndɛman kɛ a nin sran wie bé sí akplowa. I yo, e si kɛ sran fi kunndɛman kɛ ɔ́ ló i wiengu’m be ngasi. I li sɛ e kunndɛ kɛ é yó sran’m be ye naan i sɔ’n lo be ngasi’n, yɛ e sa sin kwla bubu e kpa’n niɔn. Ɔ Si Ɲanmiɛn wun wafa nga ɔ wun yo wɔ’n i wlɛ, yɛ ɔ kunndɛ kɛ ɔ́ úka wɔ. (Eza. 41:13) Like suanlɛ nga nun’n, é wá wún like nnun mɔ e kwla yo naan y’a di aklunjɔɛ kpa jasin fɛ’n i bolɛ nun’n.

 ƝANMIƐN NDƐ’N KWLA WLA Ɔ FANNGAN

3. ?Ngue yɛ ɔ ukali Zeremin naan w’a kan Ɲanmiɛn ndɛ’n w’a kle i wiengu mun-ɔn?

³ Kɛ ɔ fɛ i laa lele andɛ’n, Ɲanmiɛn i nuan ndɛ’n wlali i sufuɛ nga be mannin be junman mɔ i dilɛ’n yoli kekle mannin be’n be fanngan. I wie yɛle Zeremin m’ɔ ti Ɲanmiɛn nuan ijɔfuɛ’n i liɛ’n. Kɛ Zoova kpɛli i kɛ ɔ yo i nuan ijɔfuɛ’n, i klun titili i. Ɔ seli kɛ: “N siman ijɔ, afin n te yo bakan.” (Zer. 1:6) ?Sanngɛ ngue yɛ ɔ ukɛli i naan w’a kwla di junman sɔ’n niɔn? Ndɛ nga Zoova kan kleli i’n, ɔ wlɛli i fanngan. Ɔ seli kɛ: “I nuan ndɛ’n yoli kɛ sin dan wie sa min awlɛn’n nun lɔ, ɔ yoli kɛ sin dan wie sa min owie’m be nun lɔ. Ɔ maan n tran-ɔn, ɔ tranman.” (Zer. 20:​8, 9) Be ng’ɔ fata kɛ Zeremin kan ndɛ kle be’n, be ɲin su ti kekle. Sanngɛ ndɛ ng’ɔ fata kɛ Zeremin kan kle be’n, i su akunndan bulɛ’n ukɛli i.

4. ?Kɛ e kanngan Ɲanmiɛn Ndɛ’n nun mɔ e bu su akunndan kpa’n, i bo’n gua sɛ? (Kolɔsufuɛ Mun 1:​9, 10)

⁴ Ɲanmiɛn nuan ndɛ’n wla Klisifuɛ’m be fanngan wie andɛ. Kɛ Pɔlu klɛ́ Klisifuɛ nga be o Kolɔsu lɔ’n be fluwa’n, ɔ seli be kɛ sɛ be ‘si Ɲanmiɛn i klun sa’n kpa’n’ be “nzuɛn’n mánmán Zoova,” yɛ bé yó ‘sa kpakpa kɔ́ be ɲrun.’ (An kanngan Kolɔsufuɛ Mun 1:​9, 10 nun.) Sa kpakpa sɔ’m be nun kun yɛle jasin fɛ’n i bolɛ. Kɛ e kanngan Ɲanmiɛn Ndɛ’n nun mɔ e bu su akunndan’n e lafi Ɲanmiɛn su kpa. Yɛ e wun sa nga ti yɛ ɔ ti cinnjin kɛ e bo Ɲanmiɛn Sielɛ’n i jasin fɛ’n.

5. ?Ngue yɛ é yó naan y’a ɲan Biblu’n nun like suanlɛ’n i su ye-ɔ?

⁵ Sɛ e kunndɛ kɛ é ɲán Ɲanmiɛn Ndɛ’n i su ye kpa’n, kɛ é kánngan nun’n, annzɛ kɛ é súan nun like’n yɛ kɛ é bú i nun ndɛ’n i su akunndan’n, ɔ fataman kɛ e kpli. Sɛ a tɔ ndɛ wie su naan a wunmɛn i wlɛ’n nán se kɛ á tú trɛ́ i. Fa Zoova i Lalofuɛ’m be like kunndɛlɛ fluwa’n, annzɛ e fluwa uflɛ mɔ e fa kunndɛ like’n (Index des publications Watch Tower) naan nian wafa nga be yiyili ndɛ sɔ’n nun’n. Kɛ á súan Biblu’n nun like’n, sɛ a kpliman’n á wún i wlɛ kɛ i nun ndɛ’n ti nanwlɛ. (1 Tes. 5:21) Yɛ i sɔ’n yó maan á kúnndɛ kpa kɛ á kɛ́n i nun ndɛ’n klé sran uflɛ.

KWLAA NAAN W’A WƆ JASIN FƐ’N I BOLƐ’N SIESIE Ɔ WUN KPA

6. ?Ngue ti yɛ kwlaa naan y’a wɔ jasin fɛ’n i bolɛ’n, ɔ fata kɛ e siesie e wun kpa-ɔ?

⁶ Sɛ a siesie ɔ wun kpa kwlaa naan w’a wɔ jasin fɛ’n i bolɛ’n, kɛ á kán ndɛ klé sran  mun’n, ɔ klun su titiman wɔ dan. Zezi ukɛli i sɔnnzɔnfuɛ mun naan b’a siesie be wun kwlaa naan b’a wɔ jasin fɛ’n i bolɛ. (Lik. 10:​1-11) Kɛ mɔ be niannin like nga Zezi kleli be’n su’n ti’n, be dili aklunjɔɛ kpa junman sɔ’n i dilɛ’n nun.—Lik. 10:17.

7. ?Wafa sɛ yɛ e kwla siesie e wun naan y’a wɔ jasin fɛ’n i bolɛ-ɔ? (An nian foto’n wie.)

⁷ ?Wafa sɛ yɛ e kwla siesie e wun naan y’a wɔ jasin fɛ’n i bolɛ-ɔ? Maan e bu ndɛ nga é wá kán’n, ɔ nin wafa nga e kwla kan ndɛ sɔ’n i akunndan. Asa’n maan e bu ndɛ nga sran’m be kwla kan’n i akunndan, yɛ wafa nga e kwla tɛ be su’n maan e bu i akunndan e sie. Yɛ kɛ e ko to sran mun’n, maan e gua e wla ase, e srisri kanngan, yɛ e nin be koko yalɛ kɛ sran kun nin i janvuɛ sa.

8. ?Wafa sɛ yɛ Klisifuɛ’m be ti kɛ sɛ mɔ fa yɛ be fa wuli’n sa-ɔ?

⁸ Akoto Pɔlu seli i niaan Klisifuɛ mun kɛ: “Kannzɛ e ti kɛ sɛ mɔ fa yɛ be fa wuli’n sa’n, sanngɛ like kpa o e nun.” (2 Kor. 4:7) ?Like kpa sɔ’n yɛle benin? Yɛle Ɲanmiɛn Sielɛ’n i jasin fɛ bolɛ junman m’ɔ de sran’n. (2 Kor. 4:1) ?Yɛ ngue yɛle sɛ mɔ fa yɛ be fa wuli’n? Yɛle Ɲanmiɛn i sufuɛ mɔ be bo jasin fɛ’n be kle be wiengu mun’n. Pɔlu blɛ su’n, kɛ aata difuɛ’m bé tú ajalɛ’n, be fa be ninnge kpakpa kɛ aliɛ annzɛ duvɛn annzɛ sika sa’n, be guɛ i sɛ mɔ fa yɛ be fa wuli’n be nun. I wafa kunngba’n Zoova fali jasin fɛ bolɛ junman m’ɔ ti like cinnjin kpa’n wlali e sa nun. Zoova fanngan nun’n e kwla ɲan wunmiɛn naan y’a bo jasin fɛ’n titi.

SRƐ ƝANMIƐN NAAN Ɔ WLA Ɔ YAKPA

9. ?Sɛ jasin fɛ bolɛ’n ti’n srɛ kun e’n, ngue yɛ ɔ fata kɛ e yo-ɔ? (An nian foto’n wie.)

⁹ Kɛ mɔ be kwla tanndan e ɲrun jasin fɛ’n i bolɛ’n nun’n ti’n, srɛ kwla kun e. ?I lɛ nun’n, ngue yɛ ɔ fata kɛ e yo-ɔ? Kɛ be seli akoto’m be kɛ nán be bo jasin fɛ’n kun’n, srɛlɛ nga be srɛli Ɲanmiɛn’n, maan e fa e ɲin e sie su. B’a seman kɛ srɛ kun be naan bé yáci jasin fɛ’n i bolɛ. Sanngɛ be srɛli Zoova kɛ ɔ uka be naan b’a “kan [Ɲanmiɛn] ndɛ’n yakpa su titi.” Zoova ka lɛ tɛli be srɛlɛ’n su. (Yol. 4:​18, 29, 31) Sɛ jasin fɛ bolɛ’n ti’n srɛ kun e’n, maan e srɛ Zoova kɛ ɔ uka e. Maan e srɛ Zoova kɛ ɔ uka e naan e klo sran mun kpa. I liɛ’n, srɛ su kunman e, é bó jasin fɛ’n é klé be.

10. ?Wafa sɛ yɛ Zoova uka e naan y’a kwla bo jasin fɛ’n niɔn? (Ezai 43:​10-12)

 ¹⁰ Zoova kpali e kɛ e yo i Lalofuɛ, yɛ ɔ tali e nda kɛ ɔ́ úka e naan y’a kwla di junman ng’ɔ fa mannin e’n. (An kanngan Ezai 43:​10-12 nun.) Maan e fa e ɲin e sie i like nnan m’ɔ yo be’n be su. I klikli’n yɛle kɛ, blɛ kwlaa nga e bo jasin fɛ’n, Zezi nin e o nun. (Mat. 28:​18-20) I nɲɔn su’n yɛle kɛ, Zoova fa anzi mun uka e. (Ngl. 14:6) I nsan su’n yɛle kɛ, Zoova fɛ i wawɛ’n man e naan e wla kpɛn ninnge nga e suannin be’n be su. (Zan 14:​25, 26) I nnan su’n yɛle kɛ, Zoova sin e niaan’m be lika suan e bo jasin fɛ’n i bolɛ’n nun. Kɛ mɔ Zoova nin e niaan’m be suan e bo’n ti’n, é ɲán wunmiɛn é bó jasin fɛ’n titi.

BU BE NGA E BO JASIN’N E KLE BE’N BE AKUNNDAN

11. ?Ngue yɛ é yó naan y’a bo jasin fɛ’n y’a kle sran kpanngban-ɔn? (An nian foto’n wie.)

¹¹ ?Kɛ a bo jasin fɛ’n mɔ a toman sran sunman be awlo’n, i sɔ’n bubu ɔ sa sin? A kwla usa ɔ wun kɛ: ‘?Dɔ nga su’n nin yɛ be wo-ɔ?’ (Yol. 16:13) ‘?Be o be junman su lɔ, annzɛ kusu gua bo lɔ?’ Sɛ ɔ ti sɔ’n a kwla bo jasin fɛ’n akpɔ nuan. Be flɛ aniaan kun kɛ Zosua. Ɔ seli kɛ: “Min liɛ nga n yo’n, yɛle kɛ n bo jasin fɛ’n gua’m be bo nin lika nga sran kpanngban be o lɛ’n.” Ɔ nin i yi be sieli i nzɔliɛ kɛ, kɛ be bo jasin fɛ’n nnɔsua wia nun’n, annzɛ mɔnnɛn cɛn nnɔsua’n be to sran kpanngban.—Efɛ. 5:​15, 16.

12. ?É yó sɛ naan y’a si like nga sran’m be lafi su annzɛ like ng’ɔ ti be cinnjin’n?

¹² Sɛ sran’m be sieman be su ɔ nuan bo’n, kunndɛ like nga be lafi su’n, annzɛ like ng’ɔ ti be cinnjin’n. Kɛ Zosua nin i yi bé bó jasin fɛ’n, kosan ng’ɔ o e fluwa nɲa’m be su’n, yɛ be fa usa sran mun-ɔn. I wie yɛle kɛ, be fa e fluwa nɲa nga be flɛ i kɛ ?A bu Biblu’n i sɛ? kpɛkun be usa sran’n kɛ: “Sran kpanngban be lafi su kɛ Biblu’n fin Ɲanmiɛn, sanngɛ wie’m be lafiman su sɔ. ?Yɛ ɔ li? ?A bu i sɛ?” Kɛ be yo sɔ’n, kpɛ sunman’n be kwla bo jasin fɛ’n be kle sran’n.

13. ?Kannzɛ e boli jasin fɛ’n naan sran’m b’a sɔman nun’n, ngue ti yɛ e kwla se kɛ e yoli e liɛ ng’ɔ fata kɛ e yo’n niɔn? (Ɲanndra Mun 27:11)

¹³ Kannzɛ e boli jasin fɛ’n naan sran’m b’a sɔman nun’n, sanngɛ e dili e junman  liɛ’n. Yɛle kɛ e yoli like nga Zoova nin Zezi be kunndɛ kɛ e yo’n. (Yol. 10:42) Kannzɛ bɔbɔ e ɲanman sran naan y’a bo jasin fɛ’n y’a kle i’n, annzɛ kusu be sɔman e ndɛ’n nun’n, sanngɛ e klun jɔ. Afin e si kɛ junman mɔ e dili’n ɔ jɔ e Si Ɲanmiɛn i klun.—An kanngan Ɲanndra Mun 27:11 nun.

14. ?Kɛ aniaan kun ɲan sran kun mɔ Ɲanmiɛn ndɛ’n lo i kpa’n, ngue ti yɛ ɔ fata kɛ e klun jɔ-ɔ?

¹⁴ Sɛ aniaan kun ɲannin sran kun mɔ Ɲanmiɛn ndɛ’n lo i kpa’n jasin fɛ’n i bolɛ nun’n, i sɔ’n yo e fɛ wie. Sasafuɛ Tranwlɛ’n kun fali junman nga e di’n sunnzunnin ba kun mɔ w’a mlin’n i kunndɛlɛ. Kɛ bakan kun mlin’n, sran kpanngban be kunndɛ i lika fanunfanun nun. Yɛ kɛ be ko wun i’n, sran kwlaa klun jɔ. Nán sran ng’ɔ wunnin i’n i kunngba yɛ i kun jɔ-ɔ. I wafa kunngba’n asɔnun’n nunfuɛ’m be kwlaa be di junman likawlɛ naan b’a kwla ɲan sran kun naan w’a kaci Zezi i sɔnnzɔnfuɛ. Kɛ mɔ asɔnun’n nunfuɛ’m be kwlaa yɛ be bo jasin fɛ’n, i ti yɛ e kwla bo jasin’n e jasin bowlɛ’n wunmuan’n nun-ɔn. Yɛ kɛ sran kun bo aɲia’m be bo tranlɛ bo’n, e kwlaa e klun jɔ.

KLO ZOOVA YƐ KLO Ɔ WIENGU MUN

15. ?Wafa sɛ yɛ ndɛ ng’ɔ o Matie 22:​37-39 nun’n i su nantilɛ’n kwla uka e naan y’a bo jasin fɛ’n juejue su-ɔ? (An nian foto ng’ɔ o fluwa’n i bui’n su’n wie.)

¹⁵ Sɛ a klo Zoova nin ɔ wiengu mun’n, i sɔ’n yó maan á bó jasin fɛ’n juejue su. (An kanngan Matie 22:​37-39 nun.) Kɛ Zoova wun kɛ a di junman ng’ɔ fa mannin ɔ’n, aklunjɔɛ ng’ɔ di’n bu i akunndan nian. Yɛ kɛ sran’m be ko bo Biblu’n nun like suanlɛ bo’n, aklunjɔɛ nga bé wá dí’n bu i akunndan wie nian. Asa’n maan ɔ wla kpɛn su kɛ be nga be sɔ e ndɛ’n nun klanman mɔ be su Zoova’n, be kwla ɲan nguan m’ɔ leman awieliɛ’n.—Zan 6:40; 1 Tim. 4:16.

16. ?Sɛ sa wie ti’n e o awlo lɔ naan e kwlá fiteman’n, é yó sɛ naan y’a di aklunjɔɛ jasin fɛ’n i bolɛ’n nun? An fa sa wie mun yiyi nun.

¹⁶ Sɛ sa wie ti’n a o awlo lɔ naan a kwlá fiteman’n, fa ɔ ɲin sie i like nga a kwla yo naan w’a kle kɛ a klo Zoova nin ɔ wiengu mun’n i su. Koronavirisi blɛ’n nun’n, aniaan kun mɔ be flɛ i Samiɛli’n nin i yi Dania be o be awlo lɔ, be kwlá fiteman. Blɛ kekle sɔ’n nun’n, be boli jasin fɛ’n telefɔnun nun, be klɛli lɛtri, yɛ be kleli sran’m be Biblu’n nun like Zumun su. Kɛ mɔ Samiɛli  le kanseli’n ti’n ɔ kɔ dɔɔtrɔ ko yo i wun ayre. Kɛ ɔ yo sɔ’n, ɔ bo jasin fɛ’n kle be ng’ɔ to be lɔ’n. Aniaan’n seli kɛ: “Kɛ sa kekle wie o ɔ su’n, ɔ wla bo ɔ wun, ɔ wun kpajaman wɔ, yɛ Ɲanmiɛn sulɛ’n kwla yo kekle. Kɛ ɔ ko yo sɔ’n maan e yo like kwlaa nga e kwla yo naan y’a di aklunjɔɛ Zoova i sulɛ’n nun’n.” Blɛ kunngba sɔ’n nun’n Dania tɔli. I sɔ’n ti’n lele m’ɔ́ fá dí anglo nsan’n ɔ lɛ i bɛ’n su, ɔ kwlá jasoman. I sin’n ɔ trannin bubuwafuɛ’m be bia’n nun lele anglo nsiɛn. Ɔ seli kɛ: “N yoli n liɛ kwlaa nga n kwla yo naan m’an bo jasin fɛ’n. N bo jasin’n n kle dɔɔtrɔ bla ng’ɔ ba min osu nianlɛ’n. Yɛ n bo n kle be nga be fa ninnge mun blɛ e awlo lɔ’n. Asa’n n boli jasin fɛ’n telefɔnun nun n kleli bla kun m’ɔ yo ninnge nga dɔɔtrɔ’m be fa di junman’n be atɛ’n.” Samiɛli nin Dania be kwlá yoman ninnge mun kɛ laa’n sa kun. Sanngɛ be yoli be liɛ nga be kwlɛ i yo’n. Yɛ i sɔ mɔ be yoli’n ti’n, be dili aklunjɔɛ.

17. ?É yó sɛ naan y’a ɲan afɔtuɛ nga be o like suanlɛ nga nun’n be su ye?

¹⁷ Maan e mian e ɲin e nanti afɔtuɛ kwlaa nga be o like suanlɛ nga nun’n be su. Afɔtuɛ sɔ’m be ti kɛ ninnge tɛkɛtɛkɛ kwlaa nga be fa tɔn tro’n be sa. Kɛ e fa ninnge kwlaa sɔ mun e tɔn tro’n, yɛ tro’n yo fɛ-ɔ. I wafa kunngba’n, sɛ e nanti afɔtuɛ kwlaa sɔ’m be su’n, é ɲán wunmiɛn é bó jasin fɛ’n, yɛ é dí aklunjɔɛ kpa jasin fɛ’n i bolɛ’n nun.