1. ?Wanem filing we samfala oli gat long wok blong prij? (Mo tu, yu luk pija.)

 YUMI ol man blong Jehova, yumi prij long ol narafala from we yumi lavem Papa blong yumi long heven, mo yumi wantem halpem ol neba blong yumi blong oli save hem. Plante pablisa oli glad long wok blong prij. Be sam narafala oli traehad be oli no rili glad. ?From wanem? Maet samfala oli sem mo oli ting se oli no ol gudfala tija. Sam narafala oli fraet blong go long haos blong ol man we oli no invaetem olgeta. Samfala, oli fraet se ol man bambae oli kros long olgeta. Mo sam narafala bakegen, oli fraet se bambae oli talem sam samting we i mekem man i harem nogud from. Nating se ol brata mo sista ya oli lavem Jehova tumas, be oli fraet blong talemaot gud nius long ol man we oli no save olgeta. Nating se i olsem, oli joen oltaem long wok ya from oli luksave se i impoten. !Mo i sua se Jehova i glad tumas long olgeta!

2. ?From wanem yu no mas harem nogud sipos samtaem yu no glad long wok blong prij?

² ?Samtaem, yu tu yu gat ol filing olsem long wok blong prij? Sipos yes, yu no mas harem nogud. Ol filing olsem oli soemaot se yu gat tingting daon, mo yu no wantem pulum ol man blong oli lukluk yu nomo. Mo tu, oli soemaot se yu no wantem rao wetem ol man. Mo i no gat wan long yumi we i wantem mekem narafala i kros, speseli taem yumi traem blong mekem wan gudfala samting blong givhan long olgeta. Jehova i kasem  save long ol filing blong yumi, mo i wantem halpem yumi. (Aes. 41:13) Long stadi ya, bambae yumi tokbaot faef samting we i save givhan long yumi blong winim ol filing ya, mo glad long wok blong prij.

LETEM TOK BLONG GOD I MEKEM TINGTING BLONG YU I STRONG

3. ?Wanem i givhan long profet Jeremaea blong i gat strong tingting blong prij?

³ Bifo finis i kam, Tok blong God i stap mekem tingting blong ol man blong hem i strong, taem oli kasem wan wok we i had blong finisim. Wan eksampol, hemia blong profet Jeremaea. Taem Jehova i askem hem blong prij, hem i wari mo i talem se: “Mi mi no save olsem wanem blong toktok, from we mi mi wan yang boe nomo.” (Jer. 1:6) ?Be wanem i givhan long hem blong hem i gat strong tingting blong prij? Hemia Tok blong God. Hem i talem se: “Tok ya i kam olsem faea we i stap bonem ol bun blong mi, mo mi taed finis blong holemtaet tok ya insaed long mi.” (Jer. 20:​8, 9) Nating se Jeremaea i gat wan teritori we i had, be mesej we Jehova i givim long hem blong i go talemaot, hemia nao i mekem tingting blong hem i strong blong mekem wok ya.

4. ?Wanem i hapen taem yumi ridim Baebol mo yumi tingting dip long hem? (Kolosi 1:​9, 10)

⁴ Tok blong God nao i stap mekem tingting blong ol Kristin i kam strong. Taem aposol Pol i raetem leta i go long kongregesen long Kolosi, hem i talem se sipos oli traehad blong save Jehova moa, bambae oli naf blong “karem frut long evri gudfala wok” we oli mekem, mo bambae oli gohed blong “wokbaot stret olsem we Jehova i wantem.” (Ridim Kolosi 1:​9, 10.) Gudfala wok ya, hemia i minim wok blong talemaot gud nius. Taswe, taem yumi ridim Baebol mo tingting dip long hem, yumi bilif strong moa long Jehova mo yumi luksave se i impoten blong talemaot mesej blong Kingdom.

5. ?Yumi mas mekem wanem sipos yumi wantem se Tok blong God i givhan moa long yumi?

⁵ Blong Tok blong God i givhan moa long yumi, yumi mas tekem taem blong ridim, stadi, mo tingting dip long hem. Sipos yu no kasemsave save long wan vas we yu ridim, i nogud yu lego. Be i gud yu yusum Watch Tower Publications Index o Buk Blong Mekem Risej blong traem faenem moa save long saed blong vas ya. Sipos yu tekem taem blong stadi, bambae yu bilif strong moa se samting we Baebol i talem, i tru. (1 Tes. 5:21) Mo hemia bambae  i pulum yu, blong yu wantem talemaot ol samting we yu lanem long ol narafala.

RERE GUD FROM WOK BLONG PRIJ

6. ?From wanem yumi mas rere gud from wok blong prij?

⁶ Sipos yu rere gud from wok blong prij, bambae yu no fraet blong prij long ol man. Jisas i halpem ol disaepol blong hem blong oli rere gud bifo we hem i sanem olgeta blong go prij. (Luk 10:​1-11) Taem ol disaepol oli folem gud ol advaes we Jisas i talem, oli naf blong mekem plante gudfala wok mo hemia i mekem oli glad tumas.—Luk 10:17.

7. ?Olsem wanem blong rere from wok blong prij? (Mo tu, yu luk pija.)

⁷ ?Olsem wanem blong rere from wok blong prij? Yumi mas tingbaot samting we yumi wantem talem, mo olsem wanem blong talem long wan fasin we i klia. Mo tu, i gud yumi tingting rere long ol toktok we bambae yumi talem sipos man i agensem yumi o i traem blokem yumi. Biaen, taem yumi mitim ol man, yumi save smael mo toktok kaen long olgeta.

8. ?Olsem wanem ol Kristin oli olsem ol graonpot?

⁸ Aposol Pol i tokbaot wok blong prij we yumi mekem, i se: ‘Yumi ya we yumi stap holem spesel wok ya, yumi olsem ol graonpot we i gat ol gudgudfala samting insaed long olgeta.’ (2 Kor. 4:7) ?Wanem spesel wok ya? Hemia wok blong talemaot mesej blong Kingdom we i save sevem laef blong ol man. (2 Kor. 4:1) ?Wanem ya ol graonpot? Hemia i minim ol man blong God we oli stap talemaot gud nius long ol narafala. Long taem blong Pol, ol bisnesman oli yusum ol jag we oli wokem long klei blong karem ol gudgudfala samting olsem kakae, waen, mo mane. Long sem fasin, Jehova i givim wan impoten mesej long yumi, hemia gud nius. Wetem help blong Jehova, yumi save gat strong tingting blong gohed blong prij.

PREA BLONG YUMI NO FRAET

9. ?Yumi save mekem wanem blong yumi winim fasin ya blong fraet long man? (Mo tu, yu luk pija.)

⁹ Wanwan taem, maet yumi fraet se bambae ol man oli kros long yumi. ?Be yumi save mekem wanem blong winim fraet ya? Tingbaot prea we ol aposol oli mekem taem oli givim oda blong oli no moa prij. Olgeta oli no fraet, be oli askem long Jehova blong i ‘givim strong tingting long olgeta, blong oli gohed blong talemaot tok blong hem.’ Kwiktaem  nomo Jehova i ansarem prea blong olgeta. (Wok 4:​18, 29, 31) Yumi tu, sipos samtaem yumi fraet long man, yumi mas prea mo askem long Jehova blong i givhan long yumi, blong yumi lavem moa ol man. Olsem nao, bambae yumi no fraet blong talemaot gud nius long olgeta.

10. ?Jehova i givhan long yumi olsem wanem blong yumi gohed blong prij? (Aesea 43:​10-12)

¹⁰ Jehova nao i jusum yumi blong yumi kam ol Witnes blong hem, mo hem i promes blong givhan long yumi blong yumi no fraet. (Ridim Aesea 43:​10-12.) Hemia fo samting we hem i mekem blong givhan long yumi. Faswan, Jisas i stap wetem yumi nomata weples yumi prij long hem. (Mat. 28:​18-20) Nambatu, Jehova i putumap ol enjel blong oli halpem yumi. (Rev. 14:6) Nambatri, Jehova i givim tabu spirit blong givhan long yumi blong tingbaot ol samting we yumi bin lanem. (Jon 14:​25, 26) Namba fo, Jehova i givim ol brata mo sista blong yumi save joen wetem olgeta long wok blong prij. Wetem help blong Jehova mo ol brata mo sista, bambae yumi no fraet mo yumi gohed blong prij.

RERE BLONG MEKEM SAM JENIS MO GAT STRET TINGTING

11. ?Olsem wanem yu save faenem plante moa man taem yu prij? (Mo tu, yu luk pija.)

¹¹ ?Yu yu harem nogud taem yu luk se i gat sam man nomo oli stap long haos? Sipos yes, i gud yu askem yu wan se: ‘?Ol man blong teritori blong mi oli stap wea naoia?’ (Wok 16:13) ‘?Oli stap long wok o oli go soping?’ Sipos yes, yu save faenem plante moa man taem yu prij long rod. Wan brata we nem blong hem Joshua i talem se: “Mi tekem evri janis blong prij, taem mi stap wokbaot blong go soping, mo long ol pablik ples.” Hem mo waef blong hem Bridget, tufala i luk se tufala i faenem plante moa man tu taem tufala i prij long ol sapa, mo long ol Sande aftenun.—Efes. 5:​15, 16.

12. ?Yumi save mekem wanem blong faenemaot bilif blong man o samting we hem i stap tingbaot?

¹² Sipos yu luk se ol man oli intres smol, i gud yu traem faenemaot bilif blong olgeta mo samting we oli stap tingbaot. Joshua mo Bridget i yusum kwestin we i stap long fored blong wan traket blong statem wan storian. Eksampol, tufala i yusum traket ya ?Wanem  Tingting Blong Yu Long Baebol? mo talem se: “Sam man oli luk Baebol se hem i Tok blong God, mo sam narafala nogat. ?Be wanem tingting blong yu?” Sipos yu mekem olsem tufala, bambae yu luk se yu gat wan gudfala storian.

13. ?From wanem yumi glad long wok blong prij, nating se ol man oli no wantem lesin? (Ol Proveb 27:11)

¹³ Yumi save glad long wok blong prij, nating se ol man oli no wantem lesin long yumi. ?From wanem? Hemia from we yumi mekem samting we Jehova mo boe blong hem i wantem yumi blong mekem, hemia blong prij. (Wok 10:42) Taswe, nating se yumi no prij long wan man o yumi faenem ol man be oli no wantem lesin, be yumi save glad yet from yumi save se yumi mekem Jehova i glad.—Ridim Ol Proveb 27:11.

14. ?From wanem yumi glad taem wan narafala pablisa i faenem wan man long teritori we i intres?

¹⁴ Yumi save glad tu taem wan narafala pablisa i faenem wan man long teritori we i intres. Wan Wajtaoa i tokbaot wok blong prij we yumi mekem, se i sem mak olsem wok blong lukaotem wan pikinini we i lus. Plante man oli go long ol defdefren eria blong lukaotem hem, be taem wan long olgeta i faenem pikinini ya evri wan oli glad wetem hem. Hemia i sem mak long wok blong pulum ol man i kam disaepol. Evriwan oli go long ol defdefren teritori, mo evriwan oli glad taem wan niuwan i stat blong kam long ol miting long Haos Kingdom.

TINGBAOT LAV WE YU GAT LONG JEHOVA MO OL NEBA BLONG YU

15. Sipos yumi folem advaes blong Matiu 22:​37-39, ?olsem wanem hemia bambae i halpem yumi blong glad moa long wok blong prij? (Mo tu, yu luk pija long pej.)

¹⁵ Taem yumi tingbaot moa lav we yumi gat long Jehova mo ol neba blong yumi, bambae yumi glad moa blong prij. (Ridim Matiu 22:​37-39.) !Traem tingbaot, Jehova i mas glad tumas taem hem i luk we yumi mekem wok ya, mo i luk olsem wanem ol man oli glad taem oli stat blong stadi Baebol! Mo yumi mas tingbaot tu se ol man we oli lesin long yumi mo oli jusum blong wosipim Jehova, bambae oli laef olwe.—Jon 6:40; 1 Tim. 4:16.

16. ?Olsem wanem yumi save glad long wok blong prij, nating se yumi no save aot long haos? Talem sam eksampol.

¹⁶ ?Yu yu fesem sam problem we i mekem se yu no save kamaot long haos? Sipos yes, tingbaot nomo samting we yu naf blong mekem,  blong soemaot se yu lavem Jehova mo ol neba blong yu. Long taem blong COVID-19 pandemik, Samuel mo Dania, tufala i no save aot long haos. Long ol taem ya oltaem tufala i prij long telefon, raetem leta mo mekem ol Baebol stadi long Zoom. Mo taem Samuel i go long klinik blong kasem tritmen from kansa, hem i prij long ol man we hem i mitim olgeta long ples ya. Hem i talem se: “Taem yumi fesem ol hadtaem, hemia i traem bilif blong yumi, i mekem yumi wari, mo yumi taed. Taswe, yumi mas traehad blong stap glad long wok blong Jehova.” Long sem taem ya, Dania i foldaon mo i no moa save kamaot long bed blong tri manis. Biaen, hem i yusum wiljea blong sikis manis. Hem i talem se: “Mi mekem bes blong mi blong mekem samting we mi naf blong mekem. Mi prij long wan nes we i stap visitim mi, mo mi prij long olgeta we oli stap karem ol samting i kam long haos blong mitufala. Mo tu, mi storian gud wetem wan woman long telefon we i wok long wan kampani blong meresin.” Nating se Samuel mo Dania i fesem ol trabol we i mekem se tufala i no naf blong mekem plante samting, be tufala i mekem samting we tufala i naf blong mekem, mo tufala i gohed blong stap glad.

17. ?Wanem frut i save kamaot sipos yumi folem gud ol faef samting ya we yumi tokbaot long stadi ya?

¹⁷ Ol faef samting we yumi tokbaot long stadi ya oli joen gud tugeta. Ol wanwan samting ya oli olsem ol defdefren samting we yumi yusum blong mekem wan kakae. Taem yu yusum evri samting ya, bambae tes blong kakae ya i nambawan. Long sem fasin, sipos yumi folem gud ol faef samting ya evriwan, bambae yumi naf blong winim ol nogud filing we yumi gat, mo yumi save glad moa long wok blong prij.