1. Sɛ binom rekɛka asɛmpa no akyerɛ nkorɔfo a, wɔtse nka dɛn? (Hwɛ mfonyin no so.)

 YƐYƐ Jehovah n’asomfo, ntsi yɛka asɛmpa no kyerɛ nkorɔfo. Yɛyɛ dɛm osiandɛ yɛdɔ hɛn sor Egya no na yɛpɛ dɛ yɛboa afofor so ma wobohu no. Enuanom pii enyi gye asɛnka edwuma no ho naaso binom wɔ hɔ a, hɔn enyi nngye ho. Ebɛnadze ntsi a? Bi a binom fɛr adze paa anaa wɔtse nka dɛ hɔn nkyerɛkyerɛ nnkɔ yie. Binom so wɔ hɔ a, hɔn enyi nngye ho dɛ wɔbɔkɔ nkorɔfo a wonnyim hɔn hɔn efie. Binom so suro dɛ annhwɛ a na wɔapam hɔn. Binom so wɔ hɔ a, wɔatsetse hɔn dɛ ɔnnsɛ dɛ wɔyɛ biribi a ɔbɛhyɛ nkorɔfo ebufuw. Dɛm enuanom yi dɔ Jehovah paa. Naaso ɔyɛ a, ɔyɛ dzen ma hɔn dɛ wobedzi nkorɔfo a wonnyim hɔn no dase. Iyi nyina mu no, wɔgye to mu dɛ asɛnka edwuma no ho hia paa na wɔtaa dze hɔnho hyɛ mu. Mbɔdzen a wɔbɔ no ma Jehovah n’enyi sɔ hɔn paa!

2. Sɛ w’enyi nngye asɛnka edwuma no ho a, ebɛnadze ntsi na ɔnnsɛ dɛ ema w’abaw mu bu?

² Dza yɛaka ho asɛm yi mma woara so w’enyi nngye asɛnka edwuma no ho anaa? Sɛ dɛm a, mma w’abaw mu mmbu. Sɛ isuro dɛ ebɔkɔ asɛnka a, obotum akyerɛ dɛ ebrɛ woho adze na emmpɛ dɛ etwe afofor adwen ba wo do. Na dɛmara so na emmpɛ dɛ enye afofor bɛgye kyim. Obiara mmpɛ dɛ wɔbɛkasakasa n’enyim, nkanka aber a ɔreyɛ nkorɔfo papa no. Wo sor Egya no nyim wo haw no paa na ɔpɛ dɛ ɔboa wo. (Isa. 41:13) Adzesua yi mu no, yebosusu nyansahyɛ enum bi ho na ɔbɔboa hɛn ma yeedzi ɔhaw a yɛaka ho asɛm yi do. Afei so, ɔbɔboa hɛn ma yeenya enyigye wɔ asɛnka edwuma no mu.

 MA NYANKOPƆN N’ASƐM NHYƐ WO DZEN

3. Ebɛnadze na ɔboaa nkɔnhyɛnyi Jeremiah ma ɔkɔr do kaa asɛm a nna Jehovah dze asoma no no?

³ Ofi tsetse nyina, sɛ Nyankopɔn dze edwuma bi a ɔyɛ dzen hyɛ n’asomfo nsa a, ɔnam ne nsɛm do hyɛ hɔn dzen ma wotum yɛ edwuma no. Ɔwodze ma yɛmfa nkɔnhyɛnyi Jeremiah dɛ nhwɛdo. Aber a Jehovah kaa kyerɛɛ Jeremiah dɛ ɔnkɛka ɔno Jehovah n’asɛm nkyerɛ nkorɔfo no, nna ɔmmpɛ dɛ ɔkɔ. Jeremiah kaa dɛ: “Minnyim kasa: osiandɛ meyɛ abofra.” (Jer. 1:6) Naaso ebɛnadze na ɔboaa no ma onyaa akokodur? Asɛm a Nyankopɔn kaa kyerɛɛ no no na ɔhyɛɛ no dzen. Ekyir yi, Jeremiah kaa dɛ: “Nna ɔyɛ m’akoma mu dɛ ogya a ɔredzɛw a wɔatow mu wɔ me mbiew mu, na mahom do akyɛr na maberɛ.” (Jer. 20:​8, 9) Ɔwɔ mu dɛ nyimpa a Jeremiah kaa asɛm no kyerɛɛ hɔn no enntsie dze, naaso asɛm a nna Jehovah dze asoma no no hyɛɛ no dzen ma ɔkɔr do kae.

4. Sɛ yɛkenkan Nyankopɔn n’Asɛm no na yɛdwendwen ho a, ɔbɔboa hɛn dɛn? (Colossaefo 1:​9, 10)

⁴ Nyankopɔn n’Asɛm hyɛ Christianfo so dzen. Aber a ɔsomafo Paul kyerɛɛw krataa kɛmaa Colossae asafo no, ɔkaa dɛ sɛ enuanom no nya nokwar nyimdzee a, ɔbɔboa hɔn ma ‘wɔaanantsew dɛ mbrɛ ɔfata wɔ Jehovah n’enyim’ na ‘wɔaakɔ do asow edwuma pa nyina mu aba.’ (Kenkan Colossaefo 1:​9, 10.) Asɛnka edwuma no ka dɛm edwuma pa yi ho. Dɛm ntsi sɛ yɛkenkan Nyankopɔn n’Asɛm no na yɛdwendwen ho a, ɔbɛma gyedzi a yɛwɔ wɔ Jehovah mu no ayɛ kɛse, na yɛbɛtse siantsir a ohia dɛ yɛka Ahendzi ho asɛmpa no ase yie.

5. Sɛ yɛrekenkan anaa yerusua Nyankopɔn n’Asɛm no a, yebesi dɛn enya do mfaso paa?

⁵ Sɛ yɛrekenkan Nyankopɔn n’Asɛm no, anaa yɛrodwendwen dza yeesua no ho a, ɔnnsɛ dɛ yɛdze tu mbirika. Mbom ɔsɛ dɛ yɛto hɛn bo. Iyi bɔboa hɛn ma yeenya do mfaso. Sɛ ekenkan kyerɛwsɛm bi na enntse ase a, mma mmbɔ nntra. Mbom ibotum dze Watch Tower Publications Index anaa Buukuu A Jehovah Adasefo Dze Yɛ Nhwehwɛmu no ahwehwɛ dɛm kyerɛwsɛm no mu akɔ ekyir. Sɛ eto wo bo ara sua adze a, ɔbɛma agye edzi paa dɛ Nyankopɔn n’Asɛm no yɛ nokwar. (1 Thess. 5:21) Sɛ ibenya Nyankopɔn n’Asɛm no mu gyedzi paa a, obekenyan wo ma edze enyigye aaka ho asɛm akyerɛ nkorɔfo.

SIESIE WOHO YIE ANSAANA AKƆ ASƐNKA

6. Ebɛnadze ntsi na ɔsɛ dɛ yesiesie hɛnho yie ansaana yɛakɔ asɛnka?

⁶ Sɛ isiesie woho yie ansaana akɔ asɛnka a, ɔremma wo yamu nnhyehye wo aber a enye nkorɔfo robɔ nkɔmbɔ no. Jesus boaa n’esuafo  no ma wosiesiee hɔnho ansaana ɔrosoma hɔn ma wɔakɛka asɛmpa no. (Luke 10:​1-11) Osiandɛ wɔdze dza Jesus dze kyerɛkyerɛɛ hɔn no yɛɛ edwuma no ntsi, wotumii yɛɛ edwuma a wɔdze hyɛɛ hɔn nsa no yie, na iyi maa hɔn enyi gyee paa.—Luke 10:17.

7. Ebɛnadze na yebotum ayɛ dze esiesie hɛnho ansaana yɛakɔ asɛnka? (Hwɛ mfonyin no so.)

⁷ Ebɛnadze na yebotum ayɛ dze esiesie hɛnho ansaana yɛakɔ asɛnka? Asɛm a yɛpɛ dɛ yɛka no, ɔsɛ dɛ yɛdwendwen ho na yɛdze hɛnankasa hɛn nsɛm ka mbrɛ ɔbɛyɛ a hɔn a yɛka asɛm no kyerɛ hɔn no bɛtse ase. Afei so, ɔsɛ dɛ yɛdwendwen mbrɛ hɔn a yɛrekɛka asɛm no akyerɛ hɔn no besi ayɛ hɔn adze no ho na yehu dza hɛn so yɛbɛyɛ. Sɛ yɛyɛ dɛm a, aber a yeehyia nkorɔfo wɔ asɛnka mu no, yɛremmper hɛnho, mbom yɛbɛserew akyerɛ hɔn na yɛnye hɔn abɔ nkɔmbɔ dɛ hɛn anyɛnkofo.

8. Ebɛn kwan do na Christianfo tse dɛ dɛtse awendze a ɔsomafo Paul kaa ho asɛm no?

⁸ Ɔsomafo Paul reka asɛnka edwuma no ho asɛm akyerɛ no nuanom Christianfo no, ɔyɛɛ ntotoho bi. Ɔkaa dɛ: ‘Yɛwɔ akoradze yi wɔ dɛtse awendze mu.’ (2 Cor. 4:7) Ebɛnadze nye dɛm akoradze no? Ɔno nye Ahendzi asɛmpaka edwuma a ɔgye nkorɔfo nkwa no. (2 Cor. 4:1) Na ebɛnadze so nye dɛtse awendze no? Ɔno so gyina hɔ ma Nyankopɔn n’asomfo a wɔka asɛmpa no kyerɛ afofor no. Paul n’aber do no, nna eguadzifo dze ndzɛmba bi a ɔsom bo tse dɛ edziban, nsa na sika hyɛ kutu mu dze tu kwan. Dɛmara na hɛn so, Jehovah dze asɛmpa a ɔsom bo no ahyɛ hɛn nsa dɛ yɛnkɛka nkyerɛ nkorɔfo. Ntsi Jehovah bɔboa hɛn ma yeenya ahoɔdzen na yaakɔ do aka asɛmpa no.

SERƐ JEHOVAH DƐ ƆMMA WO AKOKODUR

9. Sɛ nyimpa ho suro ma yɛtse nka dɛ nkorɔfo rinntsie asɛmpa no a, ebɛnadze na yebotum ayɛ? (Hwɛ mfonyin no so.)

⁹ Ɔtɔ da a, nyimpa ho suro ntsi yɛbɛtse nka dɛ worinntsie hɛn wɔ asɛnka mu. Naaso yebesi dɛn edzi suro a ɔtse dɛm do? Aber a wɔhyɛɛ asomafo no dzendzenndzen dɛ mma wɔnnka asɛmpa no, wɔamma asɛm a wɔkaa kyerɛɛ hɔn no ammbɔ hɔn hu ma woenngyaa asɛmpa no ka. Mbom wɔbɔɔ mpaa serɛɛ Jehovah dɛ ɔmboa hɔn ma ‘wɔmfa akokodur nyina nka n’asɛm.’ Amonmu hɔ ara na Jehovah buaa hɔn mpaabɔ no. (Andw. 4:​18, 29, 31) Hɛn so, ɔtɔ da na sɛ nyimpa ho suro hyɛ hɛn do a, ɔsɛ dɛ yɛserɛ Jehovah dɛ ɔmboa hɛn. Ɔyɛ a serɛ Jehovah dɛ ɔmma ɔdɔ a ewɔ ma nyimpa no nyɛ kɛse  mbrɛ ɔbɛyɛ a irunnsuro dɛ ebɛka asɛmpa no akyerɛ hɔn.

10. Ebɛnadze na Jehovah yɛ dze boa hɛn ma yetum dzi no ho dase? (Isaiah 43:​10-12)

¹⁰ Jehovah eyi hɛn dɛ n’Adasefo, na ɔhyɛ hɛn bɔ dɛ ɔbɔboa hɛn ma yeenya akokodur. (Kenkan Isaiah 43:​10-12.) Akwan ahorow a ɔfa do yɛ dɛm no, hom mma yɛnhwɛ no mu anan pɛ. Odzi kan, Jehovah ama yeehu dɛ aber biara a yɛbɛka asɛmpa no, Jesus ka hɛnho. (Matt. 28:​18-20) Otsia ebien, Jehovah ma abɔfo boa hɛn. (Nyi. 14:6) Otsia ebiasa, Jehovah dze no sunsum krɔnkrɔn no ma hɛn dɛ ɔmboa hɛn ma yɛnkaakaa ndzɛmba a yesua no. (John 14:​25, 26) Otsia anan, Jehovah ama hɛn enuanom a wɔnye hɛn bɔ mu yɛ asɛnka edwuma no. Jehovah taa hɛn ekyir na hɛn nuanom a wɔdɔ hɛn no so boa hɛn, na iyi ma yenya akokodur na yɛkɔ do yɛ asɛnka edwuma no.

YƐ NSESA NA NYA NKORƆFO HO ADWEN PA

11. Sɛ enam asɛnka mu a, ibesi dɛn enya nkorɔfo pii aka asɛm no akyerɛ hɔn? (Hwɛ mfonyin no so.)

¹¹ Sɛ enam asɛnka mu na nntaa nnto nkorɔfo wɔ fie a, ɔma w’abaw mu bu anaa? Ɔno dze bisa woho dɛ: ‘Hɔn a mannkɔto hɔn wɔ fie no, henfa na wɔwɔ sesei?’ (Andw. 16:13) ‘Wɔwɔ edwuma mu anaa worikedzi gua?’ Sɛ dɛm na ɔtse dze a, ebɛnadze ntsi na inndzi nkorɔfo a ihyia hɔn wɔ kwan ho no dase? Onua bi a wɔfrɛ no Joshua ka dɛ: “Sɛ menam beebi a wodzi gua anaa beebi a nyimpa pii wɔ a, ɔyɛ a minya nkorɔfo dzi hɔn dase.” Afei so, sɛ ɔnye ne yer Bridget reyɛ efiefi asɛnka edwuma no ewimbir ewimbir anaa Kwesida ewiaber a, wɔto nkorɔfo pii wɔ fie.—Eph. 5:​15, 16.

12. Yebesi dɛn ehu dza nkorɔfo gye dzi nye dza hɔn enyi gye ho?

¹² Sɛ nkorɔfo a ihyia hɔn wɔ asɛnka mu no enyi nngye asɛmpa no ho a, ɔyɛ a fa w’enyi to famu hwɛ dɛ ibohu asɔr a wɔkɔ nye dza hɔn enyi gye ho. Sɛ Joshua na Bridget pɛ dɛ wodzi nkorɔfo dase a, wɔdze asɛmbisa a ɔda nkrataaba a yɛdze kɔ asɛnka no bi do no hyɛ nkɔmbɔ ase. Dɛ nhwɛdo no, sɛ wɔdze krataaba a wɔato dzin Ibu Bible no Dɛ Ɔyɛ Nwoma Bɛn? no reyɛ edwuma a, wɔka dɛ: “Nyimpa binom hu Bible no dɛ ofi Nyankopɔn hɔ, binom so nnhu no dɛm. Woara so ɛ, ihu Bible no dɛn?” Mpɛn pii no, asɛmbisa a ɔtse dɛm no bue hokwan ma yɛnye nkorɔfo bɔ nkɔmbɔ.

13. Sɛ nkorɔfo nntsie asɛmpa a yɛka kyerɛ hɔn no mpo a, ebɛnadze ntsi na ɔno nnkyerɛ dɛ yɛnnyɛ asɛnka edwuma no yie? (Mbɛbusɛm 27:11)

 ¹³ Sɛ nkorɔfo nntsie asɛmpa a yɛka no a, ɔno nnkyerɛ dɛ yɛnnyɛ asɛnka edwuma no yie. Ebɛnadze ntsi na yɛreka dɛm? Osiandɛ dza Jehovah na ne Ba no pɛ dɛ yɛyɛ ara na yɛreyɛ no. Ɔno nye dɛ yebedzi nkorɔfo dase. (Andw. 10:42) Dɛm ntsi sɛ yeennya obi annka asɛm no annkyerɛ no anaa sɛ nkorɔfo enntsie hɛn mpo a, ɔsɛ dɛ hɛn enyi gye osiandɛ yenyim dɛ yɛreyɛ dza ɔsɔ hɛn sor Egya no enyi.—Kenkan Mbɛbusɛm 27:11.

14. Sɛ onua bi nya obi a n’enyi gye asɛmpa no ho wɔ asɛnka mu a, ebɛnadze ntsi na ɔsɛ dɛ hɛn nyina enyi gye?

¹⁴ Sɛ onua bi nya obi a n’enyi gye asɛmpa no ho wɔ asɛnka mu a, ɔsɛ dɛ hɛn enyi gye. Ɔweɔn-Aban bi yɛɛ ntotoho bi. Ɔkaa dɛ asɛnka edwuma a yɛyɛ no akɛyɛ tse dɛ abofra bi ayew na nkorɔfo rokɔhwehwɛ no. Sɛ ɔba no dɛm a, nkorɔfo pii na wɔtsew hɔnho gu mu kɔhwehwɛ abofra no, na wɔhwehwɛ no wɔ mbea ahorow pii so. Sɛ wohu abofra no a, nnyɛ obi a ohun no no nkotsee na n’enyi gye, mbom obiara a ɔka ho bi ma wɔkɔhwehwɛɛ no no so enyi gye. Dɛmara so na obiara a ɔwɔ asafo no mu no boa ma yɛyɛ esuafoyɛ edwuma no. Hɛn nyina na yɛbɔ mu yɛ asaasesin no mu edwuma, na sɛ obi hyɛ ase dɛ ɔreba asafo nhyiamu a, hɛn nyina enyi gye.

MA ƆDƆ A EWƆ MA JEHOVAH NYE WO NYƐNKO NYIMPA NO NYƐ KƐSE

15. Sɛ yɛdze asɛm a ɔwɔ Matthew 22:​37-39 no yɛ edwuma a, obesi dɛn aboa hɛn ma enyigye a yɛdze yɛ asɛnka edwuma no aayɛ kɛse? (Hwɛ mfonyin no so.)

¹⁵ Sɛ ɔdɔ a yɛwɔ ma Jehovah nye hɛn nyɛnko nyimpa no yɛ kɛse a, ɔbɛma enyigye a yɛdze yɛ asɛnka edwuma no so ayɛ kɛse. (Kenkan Matthew 22:​37-39.) Sɛ Jehovah hu dɛ yɛreyɛ asɛnka edwuma no a, ɔma n’enyi gye paa. Afei so, sɛ nkorɔfo hyɛ ase dɛ worusua Bible no a, ɔma hɔn so hɔn enyi gye! Bio so, kaa dɛ hɔn a wotsie asɛm a yɛka no na wɔbɔsom Jehovah no, wobotum enya onnyiewiei nkwa.—John 6:40; 1 Tim. 4:16.

16. Sɛ tsebea bi ntsi yɛaka fie a, ebɛnadze na yebotum ayɛ ama yeenya enyigye wɔ asɛnka edwuma no mu? Ma ho nhwɛdo.

¹⁶ Mpanyinyɛ, yarba, anaa biribi fofor bi ntsi nntum nnkɔ beebiara anaa? Sɛ dɛm a, hwehwɛ biribi a ibotum ayɛ dze akyerɛ dɛ edɔ Jehovah nye wo nyɛnko nyimpa. Aber a COVID-19 yarba no bae no, nna Samuel na Dania nntum  nnkɔ beebiara. Mber a nna no mu yɛ dzen yi nyina mu no, nna wɔtaa yɛ tɛlefon do adasedzi, wɔkyerɛɛw nkrataa, na wɔyɛɛ Bible adzesua wɔ Zoom do. Nna Samuel enya cancer, ntsi sɛ ɔkɔ ayarsabea a, nna ɔdze hokwan no dzi hɔn a ohyia hɔn no dase. Ɔkaa dɛ: “Sɛ yehyia ɔhaw a, otum ma yɛyɛ basaa, yɛtse nka dɛ yɛaberɛ, na otum so sɔ hɛn gyedzi hwɛ. Sɛ ɔba no dɛm a, ɔsɛ dɛ yɛhwehwɛ ndzɛmba a yebotum ayɛ ama hɛn enyi agye wɔ Jehovah no som mu.” Iyi nyina mu no, Dania so kɔbɔɔ famu ma ɔkaa mpa mu abosoom ebiasa. Ɔno ekyir no, ɔtsenaa ebubuafo egua mu abosoom esia. Dania so kaa dɛ: “Mobɔɔ mbɔdzen yɛɛ dza mubotum biara wɔ tsebea a nna makɔ mu no mu. Mutumii kaa asɛmpa no kyerɛɛ nɛɛse bi a nna ɔhwɛ me nye hɔn a nna wɔdze ndzɛmba brɛ hɛn wɔ fie no. Afei so, menye basia bi bɔɔ nkɔmbɔ kamakama wɔ tɛlefon do. Nna ɔnye edwumakuw bi a wɔtontɔn ndzɛmba a wɔdze dzi dwuma wɔ ayarsa mu no yɛ edwuma.” Ɔwɔ mu dɛ tsebea a nna Samuel na Dania wɔ mu no mma wonntum nnyɛ pii dze, naaso wɔyɛɛ dza wobotum biara dze kaa asɛmpa no na iyi maa hɔn enyi gyee paa.

17. Ibesi dɛn enya nyansahyɛ a yeesusu ho wɔ adzesua yi mu no do mfaso kɛse?

¹⁷ Sɛ yɛdze nyansahyɛ ahorow a wɔaka ho asɛm wɔ adzesua yi mu no nyina yɛ edwuma a, yebenya do mfaso paa. Nyansahyɛ ahorow yi tse dɛ ndzɛmba ahorow bi a wɔdze yɛ edziban. Sɛ edze ndzɛmba no nyina bɔ mu yɛ edziban no a, ɔbɛma wɔayɛ dɛw. Sɛ yɛdze nyansahyɛ a yeesusu ho yi yɛ edwuma a, ɔbɔboa hɛn ma yeedzi ɔhaw biara a yehyia wɔ asɛnka mu no do, na yebenya enyigye kɛse wɔ asɛnka edwuma no mu.