1. Tera aia namakin tabeman ni kawaraia aomata n te mwakuri ni minita? (Nora naba te taamnei.)

 NGKAI ana aomata Iehova ngaira, ti uarongorongo nakoia aomata ibukina bwa ti tangira Tamara are i karawa ao ti kani buokiia raora n aomata bwa a na kinaa. A bati taan uarongorongo aika rangi ni kimwareirei n te mwakuri n uarongorongo. Ma a noria tabemwaang bwa e kangaanga rekeni kimwareireia iai. Bukin tera? Tabeman a rangi ni mamaamaa ao a namakinna bwa a aki tau iai. Tabeman a namakinna bwa a aki riai ni kawari mwengaia aomata ngkana a aki kaoaki. Tabeman a kona ni maaka ae a na aki butimwaeaki. Tabeman a reireinaki bwa a na aki kakauntaeka ma tabemwaang. N aki ongea tangiran Iehova ae bati irouia taari aikai ma a noria bwa e kangaanga irouia tataekinan te rongorongo ae raoiroi nakoia aomata aika a aki kinaia. Ma a ataia ae kakawaki te mwakuri aei ao a katoatai n uataboia. Ai kukureira Iehova irouia!

2. Bukin tera bwa ko aki riai ni kabwaraa nanom ngkana e kangaanga iroum karekeani kimwareireim n te mwakuri ni minita?

² E kangaanga iroum n tabetai karekeani kimwareireim n te mwakuri ni minita ibukin aeka n namakin akanne? Ngkana ngaia anne, tai kabwaraa nanom. Namakinan ae ko aki tau e kona n oti iai ae ko nanorinano n rawa ni kani kabotoko i mataia aomata, ao ko aki naba kani kauntaeka ma ngaiia. Ao akea temanna ae tangiria ni kan ribaaki, moarara riki ngkana e kataia ni karaoa ae raoiroi ibukia tabemwaang. E atai raoi kangaanga aika ko boo ma ngaai Tamam are i karawa ao e tangiria n anganiko te ibuobuoki are ko kainnanoia. (Ita. 41:13) N te kaongora aei, ao ti na rinanoi reirei n ibuobuoki aika nimaua ibukin  arora ni kabokorakora ma namakin aikai ao arora ni karikirakea te kimwareirei n te mwakuri ni minita.

KARIAIA ANA TAEKA TE ATUA BWA E NA KAKORAKORAKO

3. Tera are e buoka te burabeti are Ieremia n uarongorongo nakoia aomata?

³ N taai naba ake rimoa ao a a tia ni kakorakoraaki ana toro te Atua n ana rongorongo, ngke a karaoa mwiokoaia ae kangaanga. Iangoa ana katoto te burabeti are Ieremia. E raraoma ngke e anganaki mwiokoana iroun Iehova bwa e na uarongorongo. E taku Ieremia: “I babanga n taetae bwa bon te teei ngai.” (Ier. 1:6) E kangaa n tokanikai i aon namakinan ae e aki tau? E karekea korakorana man te baere e taekinna te Atua nakoina. E taku Ieremia: “Ai aron te ai ae ura ae kainaki i nanon riiu, ao I a kua n tautaua.” (Ier. 20:8, 9) E ngae ngke e kangaanga te uarongorongo n te aono are e mena iai Ieremia, ma e karekea te korakora are kainnanoia ibukini kakororaoani mwiokoana, man te rongorongo are e anganaki bwa e na tataekinna.

4. Tera ae e na riki ngkana ti wareka Ana Taeka te Atua ao ni kananoa ara iango i aona? (I-Korote 1:9, 10)

⁴ A karekea korakoraia Kristian man te rongorongo are n Ana Taeka te Atua. Ngke e koroboki te abotoro Bauro nakon te ekaretia i Korote ao e taekinna bwa karekean te atatai ae eti, e na kairiia taari bwa a na “nakonako n te aro ae tau i matan Iehova” ngkai a teimatoa “ni karikiuaa ni mwakuri nako aika raraoi.” (Wareka I-Korote 1:9, 10.) A irekereke mwakuri aika raraoi akanne ma tataekinan te rongorongo ae raoiroi. Ngaia are ngkana ti wareka Ana Taeka te Atua ao ni kananoa ara iango i aona, e a kakorakoraaki onimakinan Iehova iroura ao ti a ota riki ni kakawakin tibwaan te rongorongo ibukin te Tautaeka n Uea.

5. Ti na kangaa ni kakabwaiaaki n ara wareware n te Baibara ao n ara ukeuke iai?

⁵ Ngkana ti na kakabwaiaaki man Ana Taeka te Atua, ti aki riai ni katawea ara wareware, ara ukeuke, ao kananoan ara iango. Kabongana am tai ae bati. Ngkana ko nora te kibu teuana ae e kangaanga otam iai, tai tarariaoia. Ma kamanena te Watch Tower Publications Index ke te Research Guide for Jehovah’s Witnesses ni kakaaea kabwarabwaraan te kibu anne. Ngkana ko kabongana am tai n ukeuke, ane e na kakorakoraaki iroum onimakinan ae e koaua Ana Taeka te Atua. (1Tet. 5:21) Ngkana ko a onimakinna riki, ane ko na kimwareirei riki n tibwaa te bae ko a tia n reiakinna ma tabemwaang.

 KATAURAOI RAOI IBUKIN TE MWAKURI NI MINITA

6. Bukin tera ngkai ti riai ni katauraoi raoi ibukin te mwakuri ni minita?

⁶ Ngkana ko katauraoi raoi ibukin te mwakuri ni minita, ko na namakina te aki nakonnano ngkana ko taetae nakoia aomata. E buokiia Iesu taan rimwina bwa a na tauraoi imwain ae e kanakoia n te mwakuri ni minita. (Ruka 10:1-11) Ibukina bwa a maiuakini baike e reiakinia Iesu, a a kona taan rimwina n namakina te kimwareirei ni baike a kona ni kakororaoi.—Ruka 10:17.

7. Ti na kangaa ni katauraoira ibukin te mwakuri ni minita? (Nora naba te taamnei.)

⁷ Ti na kangaa ni katauraoira ibukin te mwakuri ni minita? Ti riai n iangoia bwa ti na kangaa n taekina te koaua n te aro ae anainano n oin ara taeka. E ibuobuoki naba ngkana ti iangoi uoua ke tenua aroia aomata n te aono anne ao n iangoia bwa tera arora ni kaekaia. Ao ngkana ti a kawariia aomata, ti kona ni kataia n taetae ma te aki nakonnano, te wingare, ao ni kaota te kan iraorao.

8. N te aro raa ae a riki iai Kristian bwa kaanga mwangko aika taano n aron are taekinaki n ana kaikonaki te abotoro Bauro?

⁸ E kabotaua mwiokoara ae te mwakuri n uarongorongo te abotoro Bauro ngke e kangai: “Ma iai iroura te bwai ae kakawaki i nanoni mwangko aika taano.” (2Kor. 4:7) Tera te bwai ae kakawaki aei? Bon te mwakuri ni kakamaiu ae tataekinan te rongorongo ibukin te Tautaeka n Uea. (2Kor. 4:1) Tera mwangko aika taano? A tei ibukia ana toro te Atua aika a tataekina te rongorongo ae raoiroi nakoia aomata. N ana bong Bauro ao a kamanenai kaatibu aika karaoaki man te bokaboka taan iokinibwai bwa nneni baika kakawaki, n aron te amwarake, te wain, ao te mwane. N aron naba anne, e onimakinira Iehova n te rongorongo ae kakawaki ae taekan te rongorongo ae raoiroi. Man ana ibuobuoki Iehova, ti a kona ni karekea te korakora are ti kainnanoia n tataekina te rongorongo ma te kakaonimaki.

TATARO IBUKIN TE NINIKORIA

9. Ti na kangaa n tokanikai i aoni maakakia aomata ke maakakin ae ti na ribaaki? (Nora naba te taamnei.)

⁹ N tabetai ti kona ni maakuia aomata ke ni maaka ae ti na ribaaki. Ti na kangaa n tokanikai i aon te kangaanga anne? Iangoa aia tataro abotoro ngke a tuangaki bwa a na aki uarongorongo. N oneani mwin are a na maaku, a bubutiia Iehova bwa e na buokiia n “teimatoa n taekina  [ana] taeka ma te ninikoria ae bati.” E waekoa Iehova ni kaekaa aia tataro. (Mwa. 4:18, 29, 31) Ngkana ti rotaki ni maakakia aomata n tabetai, ti riai naba n tataroa ana ibuobuoki Iehova. Bubutiia Iehova buokam bwa e na buokiko ni katokanikaia tangiraia aomata nakoni maakakia.

10. E kangaa Iehova ni buokira ni kakororaoa mwiokoara ae taani Kakoaua ibukina? (Itaia 43:10-12)

¹⁰ E a tia Iehova ni mwiokoira bwa taani Kakoaua ibukina, ao e berita bwa e na buokira ni kaninikoriaira. (Wareka Itaia 43:10-12.) Iangoi aanga aika aua aika e karaoa iai anne. Te moan, e memena iroura Iesu n taai ake ti tataekina iai te rongorongo ae raoiroi. (Mat. 28:18-20) Te kauoua, e a tia Iehova ni mwiokoiia anera bwa a na buokira. (TeKao. 14:6) Te katenua, e a tia Iehova n anganira taamneina ae raoiroi bwa te tia ibuobuoki ni kauringira baike ti reiakin. (Ioa. 14:25, 26) Te kaaua, e a tia Iehova ni katauraoiia taari n te onimaki bwa a na buokira. Man ana ibuobuoki Iehova ao aia boutoka taari aika tatangira, a a reke baika ti kainnanoi bwa ti aonga n ninikoria ao n teimatoa n uarongorongo.

TAURAOI NI KANGARAOIKO AO BWAINA TE IANGO AE RIAI

11. Ko na kangaa ni kuneia aomata aika bati n te mwakuri ni minita? (Nora naba te taamnei.)

¹¹ E bwara nanom ngkana ko noria bwa tii tabeman aomata aika reke n aia auti? E aera ko aki titirakiniko aei: ‘A mena ia ngkai aomata aika n au aono aei?’ (Mwa. 16:13) ‘A mena n te tabo ni mwakuri ke a nako ni boobwai?’ Ngkana e riki anne, ko kona ni karekeia riki aomata n te uarongorongo i rarikin te kawai? E taku te tari te mwaane ae Joshua, “E reke au tai n uarongorongo ngke I nakonako i nanon taabo ni boobwai ao nneni baao ni mwamwananga.” E kuneia riki aomata aika bati n aia auti teuaei ma buuna ae Bridget ngke a kawariia aomata n te moantairiki ao ni bwakantaain naba te Taabati.—IEbe. 5:15, 16.

12. Ti na kangaa n ataa aia koaua aomata ke te bwai ae a tabeaianga iai?

¹² Ngkana a aki kaota te kan ongora aomata, kataia n iangoia bwa tera aia koaua ke tera ae a tabeaianga iai. A kamanena te titiraki are ni moan te turaeki Joshua ao Bridget ni maroro iai ma aomata. N te katoto, ngke a kamanena te turaeki ae Tera Aron Iangoan te Baibara  Iroum? ao a taekina ae kangai: “Tabeman aomata a iangoa te Baibara bwa te boki mairoun te Atua ao tabeman a iangoia bwa tiaki. Tera ngkoe am iango?” N angiin te tai e kona ni kairiri aei nakon te maroro.

13. Bukin tera ngkai ti kona n iangoia bwa e nakoraoi ara mwakuri ni minita e ngae ngkana a aki kan ongora aomata? (Taeka N Rabakau 27:11)

¹³ E aki boto nakoraoin ara mwakuri ni minita i aoni uaan ara mwakuri. Bukin tera? Ibukina bwa ti a tia ni karaoa te bae e tangiria Iehova ao Natina bwa ti na karaoia, ae ti kaotioti ibukina. (Mwa. 10:42) E ngae ngkana akea temanna ae ti maroro ma ngaia ke ngkana e aki butimwaeaki ara rongorongo, ma ti kona ni kimwareirei ibukina bwa ti ataia ae ti kakukureia Tamara are i karawa.—Wareka Taeka N Rabakau 27:11.

14. Bukin tera ngkai ti kona ni kimwareirei ngkana iai temanna te tia uarongorongo ae kunea te aomata ae kan ongora n te aono teuana?

¹⁴ Ti kona naba ni kimwareirei ngkana iai temanna te tia uarongorongo ae kunea te aomata ae kan ongora n te aono teuana. E kabotauaki ara mwakuri n Te Taua-n-Tantani ma kakaaean te teei ae bua. A bati aika ibuobuoki ni kakaaea n te tabo teuana ma teuana. Ngkana e kuneaki te teei anne, ao tiaki tii te aomata are e kunea ae e kimwareirei ma bon aomata ni kabane. N aron naba anne, a buoka karekeaia taan rimwin Iesu kaain te ekaretia ni kabane. A kainnanoaki bwa a na uarongorongo nakoia aomata ni kabane n te aono, ao a bane ni kimwareirei ngkana iai temanna ae boou ae e a moana kaakaean te taromauri.

KAATUUA AM IANGO I AON TANGIRAN IEHOVA AO RAOM N AOMATA

15. E na kangaa maiuakinani Mataio 22:37-39 ni buoka karikirakean ingaingara ibukin te mwakuri ni minita? (Nora naba te taamnei.)

¹⁵ Ti kona ni karikirakea ingaingara ibukin te mwakuri n uarongorongo ngkana ti kaatuua ara iango i aon tangiran Iehova ao raora n aomata. (Wareka Mataio 22:37-39.) Kataamneia aroni kukurein Iehova ngkana e norira ni karaoa te mwakuri aei, ao aroni kukureia aomata ngkana a a moana aia reirei n te Baibara! Iangoa naba te kakamaiu ae e mena imwaia naake a butimwaea ara rongorongo.—Ioa. 6:40; 1Tim. 4:16.

16. Ti na kangaa ni karekea kimwareireira n ara mwakuri ni minita ngkana ti a aki kona ni kitana mwengara? Taekini katoto.

¹⁶ Ko a aki kona ni kitana mwengam i aani  bukina tabeua? Ngkana eng, ao kaatuua am iango i aon te bae ko kona ni karaoia ni kaota iai tangiran Iehova ao raom n aomata. N tain te aoraki ae te COVID-19 ao a aikoa kona ni kitana mwengaia Samuel ao Dania. I nanon taai aika kangaanga akanne, a katoatai n uarongorongo rinanon te tareboon, a korei reeta, ao a kairi reirei n te Baibara i aon te Zoom. E uarongorongo Samuel nakoia ake e kaitiboo ma ngaia n te kiriniki are e kakarekei iai ana bwainnaoraki ibukin te kaentia. E taku teuaei: “A taonakinako ara iango, rabwatara, ao ara onimaki n taiani kangaanga. Ti riai ni karekea kimwareireira n ara beku iroun Iehova.” Irarikini kangaanga akanne, e a manga bwaka Dania ao e a aki kona ni kitana ana kainiwene i nanon tenua namwakaina. Imwina e a kainnanoa ana kaintekateka ae kokokaki i nanon onoua namwakaina. E taku neiei: “I kataia ni karaoi bwaai ni kabane n aron au konaa. I a kona n uarongorongo nakon te neeti are e kakawarai, ao I maroro nakoia naake a ninikiri bwaai n te auti. E reke naba au tai ni maroro ma te aine temanna ae mwakuri n te onnaoraki.” E tiatianaki aia mwakuri Samuel ao Dania ni baike a riki nakoia, ma a karaoa are a konaa ao ni karekea kimwareireia iai.

17. Ko na kangaa ni kakabwaiaaki riki man reirei n ibuobuoki aika n te kaongora aei?

¹⁷ A na nakoraoi riki reirei n ibuobuoki aika katauraoaki n te kaongora aei ngkana a maiuakinaki ni kabane. Reirei n ibuobuoki nako kaanga ai aron te rengarenga ae kabonganaaki n te kuuka. Ngkana a bane ni bwaka taian rengarenga n te kuuka, e na boni kangkang te amwarake. Mani maiuakinan reirei n ibuobuoki ni kabane, ti na bon tauraoi raoi ni kaaitarai namakin aika aki raraoi ao ni karekea te kimwareirei ae bati n te mwakuri ni minita.