1. Muaj ib txhia xav li cas thaum mus tshaj tawm txoj xov zoo? (Saib daim duab.)

 YEHAUVAS cov tib neeg mus qhia txoj xov zoo rau lwm tus vim lawv hlub lawv Leej Txiv Yehauvas thiab xav kom lwm tus los nrog lawv paub nws. Muaj ib txhia zoo siab mus qhia Vajlugkub tiam sis ib txhia tsis xis. Vim li cas ho muaj li ntawd? Ib txhia txaj muag heev thiab lawv xav tias lawv tsis txawj qhia. Hos ib txhia tsis nyiam mus rau hauv lwm tus lub tsev kom tab kaum lawv. Hos ib txhia xav hais tias nyob tsam ua rau lwm tus chim. Hos ib txhia tsis xav tsim teeb meem. Txawm tias cov kwv tij nkauj muam no hlub Yehauvas heev los lawv xam pom tias tsis yooj yim rau lawv mus qhia txoj xov zoo rau lwm tus uas lawv tsis paub. Tab txawm muaj li ntawd los lawv yeej mus qhia tsis tu ncua. Yehauvas txaus siab heev rau lawv tes hauj lwm!

2. Vim li cas koj yuav tau tsis txhob poob siab thaum nyuaj rau koj mus tshaj tawm?

² Tsis txhob poob siab yog tias nyuaj rau koj mus tshaj tawm. Qhov no qhia tau tias koj yog ib tug neeg txo hwj chim thiab tsis xav kom muaj teeb meem. Tsis tas li ntawd, kuj qhia tias koj tsis nyiam sib cav sib ceg nrog tib neeg. Yeej tsis muaj leej twg xav ua rau lwm tus npau taws tab txawm nws xav ua qhov zoo rau lawv xwb. Koj Leej Txiv uas nyob saum ntuj ceeb tsheej yeej paub tej uas koj xav thiab nws xav pab seb koj yuav ua li cas rau li cas thiaj zoo. (Yaxayas 41:13) Nyob rau hauv zaj kawm no yuav piav txog tsib lub ntsiab los mus pab koj thaum koj pheej xav li hais tas no thiab yuav ua li cas koj thiaj muaj kev zoo siab thaum mus tshaj tawm.

 CIA VAJTSWV TXOJ LUS TXHAWB KOJ

3. Muaj dab tsi pab tau Yelemis qhia txoj xov zoo rau lwm tus?

³ Yav puag thaum ub, Vajtswv tej lus yeej txhawb tau nws cov tub qhe kom ua tau tej yam lawv xav tias lawv ua tsis tau. Cia peb mus tham txog Yelemis tus uas cev Vajtswv lus. Thaum Yehauvas kom nws mus tshaj tawm txoj xov zoo, Yelemis ntxhov siab heev. Yelemis hais tias: “Kuv tsis paub yuav qhia li cas, rau qhov kuv tseem hluas.” (Yelemis 1:6) Ua li dab tsi thiaj pab tau nws muaj lub siab tawv qhawv mus tshaj tawm? Tej lus uas Yehauvas hais rau nws txhawb tau nws heev. Yelemis hais tias: “Koj txojlus kub ib yam li hluavtaws hauv kuv lub siab tuaj. Kuv ua tiag nyiaj, tiamsis kuv tiv tsis taus ntxiv lawm.” (Yelemis 20:8, 9) Txawm tias muaj coob leej ntau tus tsis xav mloog Yelemis qhia los nws tsuas hais raws li Yehauvas qhia rau nws thiab Yehauvas cov lus ntawd txhawb tau Yelemis kom rau siab ntso ua nws tes hauj lwm.

4. Muaj li cas xwb thaum peb nyeem Vajtswv Txoj Lus thiab ua tib zoo xav txog? (Kaulauxais 1:9, 10)

⁴ Vajtswv Txoj Lus txhawb tau cov Khixatias heev. Thaum tus tub txib Povlauj sau nws tsab ntawv mus rau lub koom txoos hauv Kaulauxais, nws hais tias yog lawv kawm seb Yehauvas xav kom lawv ua dab tsi ces lawv yuav “niaj hnub ua tej uas haum Vajtswv siab” thiab “ua tau neeg zoo raws li Vajtswv lub siab nyiam.” (Nyeem Kaulauxais 1:9, 10.) Tej uas haum Vajtswv siab ntawd kuj yog hais txog tshaj tawm txoj xov zoo. Yog li ntawd, thaum peb nyeem Vajtswv Txoj Lus thiab muab ua tib zoo xav ces peb yuav muaj kev ntseeg heev rau Yehauvas thiab peb yuav to taub vim li cas tseem ceeb rau peb mus qhia txog lub Nceeg Vaj.

5. Yuav ua li cas peb thiaj li paub tej uas peb nyeem thiab peb kawm hauv phau Vajlugkub zoo zoo?

⁵ Yuav kom Vajtswv Txoj Lus pab tau koj tiag tiag, koj yuav tau tsis txhob nyeem thiab kawm nrawm nroos kom tag xwb. Yog tias koj nyeem ib nqes Vajlugkub twg uas koj tsis nkag siab, tsis txhob cia li kav liam. Mus tshawb nrhiav hauv Yehauvas Cov Tim Khawv Phau Ntawv Tshawb Nrhiav Vajlugkub. Yog koj maj mam ua tib zoo kawm ces koj yuav pom tias tej uas hais nyob hauv phau Vajlugkub yeej muaj tseeb tiag. (1 Thexalaunikes 5:21) Yog koj yim paub hais tias muaj tseeb ces koj yuav yim xav qhia tej uas koj kawm tau ntawd rau lwm tus.

 UA TIB ZOO NPAJ UA NTEJ MUS TSHAJ TAWM

6. Vim li cas peb yuav tau npaj ua ntej mus tshaj tawm txoj xov zoo?

⁶ Yog koj ua tib zoo npaj ua ntej ces koj yuav tsis ntxhov siab thaum mus tshaj tawm es nrog ib tug twg tham. Yexus yeej npaj nws cov thwj tim ua ntej nws cia lawv mus tshaj tawm txoj xov zoo. (Lukas 10:1-11) Vim lawv ua li Yexus qhia rau lawv, lawv thiaj ua tau ntau yam zoo thiab tej no ua rau lawv zoo siab heev.​—Lukas 10:17.

7. Peb yuav npaj li cas thaum mus tshaj tawm txoj xov zoo? (Saib daim duab.)

⁷ Peb yuav npaj li cas ua ntej mus tshaj tawm txoj xov zoo? Peb yuav tau ua tib zoo xav seb peb yuav hais li cas rau li cas peb thiaj hais tau tawm plaws hauv nruab siab tuaj. Peb kuj npaj seb tib neeg yuav hais li cas thiab peb yuav teb lawv li cas. Thaum peb nrog tib neeg tham, nco ntsoov ua ntsej muag luag ntxhi thiab hais lus luag nyav rau lawv.

8. Cov Khixatias zoo li tej tais av hauv Povlauj zaj lus piv txwv li cas?

⁸ Tus tub txib Povlauj qhia rau cov kwv tij nkauj muam Khixatias li no tias: “Peb muaj tej uas muaj nqes no nyob hauv lub tais av.” (2 Kauleethaus 4:7) Tej yam muaj nqes ntawd yog dab tsi? Tej yam ntawd yog mus tshaj tawm txog lub Nceeg Vaj kom cawm tau neeg txoj sia. (2 Kauleethaus 4:1) Ua li lub tais av yog dab tsi? Lub tais av yog Vajtswv cov tib neeg uas mus tshaj tawm txoj xov zoo rau lwm tus. Nyob rau Povlauj tiam, cov neeg lag luam siv tej tais av coj los ntim tej uas muaj nqes xws li zaub mov, cawv, thiab nyiaj xwv lawv thiaj nqa tau ib qho chaw mus rau ib qho chaw. Zoo ib yam li ntawd, Yehauvas kuj siv peb nqa txoj xov zoo mus qhia rau tib neeg. Yog muaj Yehauvas ua tus pab peb ces peb yuav muaj dag muaj zog mus tshaj tawm txoj xov zoo tsis tseg tsis tu.

THOV VAJTSWV KOM MUAJ SIAB TAWV QHAWV

9. Yuav ua li cas peb thiaj tsis ntshai neeg los sis ntshai tsam lawv tsis nyiam? (Saib daim duab.)

⁹ Muaj qee lub sij hawm peb yeej ntshai tib neeg los sis ntshai tsam lawv tsis nyiam. Yuav ua li cas peb thiaj tsis ntshai? Nco ntsoov cov tub txib tej lus thov thaum lwm tus txwv kom lawv tsis txhob qhia txoj xov zoo ntxiv lawm. Lawv tsis ntshai thiab haj tseem qhia txoj xov zoo tsis tseg tsis tu.  Lawv thov kom Yehauvas pab lawv yim huab “muaj lub siab tawv qhia [nws] Txojlus.” Yehauvas yeej teb kiag lawv tej lus thov. (Tes Haujlwm 4:18, 29, 31) Yog hais tias peb ho ntshai mus qhia txoj xov zoo rau tib neeg, peb yuav tau thov Yehauvas pab peb. Thov kom Yehauvas pab peb hlub tshua tib neeg xwv peb thiaj tsis ntshai mus qhia txoj xov zoo rau lawv.

10. Yehauvas pab kom peb ua tau nws cov Tim Khawv li cas? (Yaxayas 43:10-12)

¹⁰ Yehauvas tau xaiv peb los ua nws cov Tim Khawv thiab nws yeej cog lus tias nws yuav pab kom peb ua tau lub siab tawv qhawv. (Nyeem Yaxayas 43:10-12.) Cia peb mus saib plaub yam uas nws tau ua li no. Qhov ib, Yexus yeej nrog nraim peb thaum peb mus tshaj tawm txoj xov zoo. (Mathais 28:18-20) Qhov ob, Yehauvas siv nws cov tub txib saum ntuj los pab peb. (Tshwmsim 14:6) Qhov peb, Yehauvas muab nws lub hwj huam dawb huv los pab kom peb nco tau tej yam uas peb tau kawm tag los lawm. (Yauhas 14:25, 26) Qhov plaub, Yehauvas kuj pub kom muaj cov kwv tij nkauj muam los pab peb mus tshaj tawm. Yog muaj Yehauvas thiab cov kwv tij nkauj muam pab peb lawm ces peb yeej muaj lub siab tawv qhawv ua txhua yam thiab mus tshaj tawm tau txoj xov zoo.

YOOG RAWS LI COV TIB NEEG THIAB XAV TXOG QHOV ZOO

11. Thaum mus tshaj tawm txoj xov zoo, koj yuav ua li cas koj thiaj nrhiav tau tib neeg? (Saib daim duab.)

¹¹ Thaum tsis pom tib neeg nyob hauv tsev, tej zaum yuav ua rau koj qaug zog heev. Koj yuav tau ua tib zoo xav li no: ‘Cov tib neeg uas nyob rau hauv kuv koog dua twg tag lawm?’ (Tes Haujlwm 16:13) ‘Puas yog lawv mus ua hauj lwm los yog kav kiab kav khw lawm?’ Yog tias muaj li no tiag, koj puas mus qhia tau Vajlugkub tom tej kev? Muaj ib tug kwv tij npe hu ua Ntsosuam (Joshua) hais tias, “Thaum kuv mus tom kiab tom khw los sis tej qho chaw uas tib neeg coob coob, kuv kuj nrhiav txoj hau kev kom tau qhia Vajlugkub rau tib neeg.” Nws thiab nws poj niam nkawd kuj nrhiav tau tib neeg nyob tsev thaum nkawd mus qhia rau yav lig lig thiab Hnub 7 (Sunday) tom qab tav su dua.​—Efexus 5:15, 16.

12. Yuav ua li cas peb thiaj paub tias tib neeg ntseeg li cas thiab xav paub txog dab tsi?

 ¹² Yog tias muaj ib tug twg tsis nyiam qhov uas koj mus qhia rau nws, nug seb nws ntseeg li cas los sis nws ho muaj kev txhawj xeeb txog dab tsi. Ntsosuam thiab nws tus poj niam nkawd siv daim ntawv tseb Koj Xav Li Cas Txog Phau Vajlugkub? thiab hais tias: “Muaj ib txhia tib neeg hais tias phau Vajlugkub yog Vajtswv sau tiam sis lwm cov tib neeg kuj tsis xav li ntawd. Ua li koj ho xav li cas?” Yog nug li ntawd ces yuav ua rau lwm tus xav nrog peb tham.

13. Vim li cas peb ho ua tau zoo tab txawm tsis muaj neeg kam mloog? (Pajlug 27:11)

¹³ Txawm tib neeg tsis xav mloog txoj xov zoo uas peb qhia los peb twb ua tau raws li peb lub hom phiaj lawm. Nco ntsoov tias peb lub hom phiaj yog ua raws li Yehauvas thiab nws tus Tub nkawd xav kom peb ua uas yog mus ua tim khawv. (Tes Haujlwm 10:42) Txawm peb tsis tau nrog leej twg tham los sis lawv ho tsis mloog tej uas peb qhia los peb yeej muaj kev zoo siab vim peb paub tias peb ua haum peb Leej Txiv uas nyob saum ntuj siab.​—Nyeem Pajlug 27:11.

14. Vim li cas peb ho zoo siab thaum muaj ib tug tshaj tawm nrhiav tau ib tug uas nyiam Vajlugkub?

¹⁴ Peb kuj zoo siab heev thaum muaj ib tug uas mus tshaj tawm qhia tau rau ib tug uas nyiam. Nyob rau hauv Phau Tsom Faj muab qhov no piv rau cov uas mus nrhiav tus me nyuam uas poob zoo lawm. Muaj coob leej ntau tus yeej chib lig kaws mus nrhiav rau qhov txhia chaw. Thaum nrhiav tau tus me nyuam mas txhua leej txhua tus puav leej zoo siab, tsis yog tus uas nrhiav tau ntawd thiaj zoo siab xwb. Zoo ib yam li ntawd, txhua tus uas nyob hauv lub koom txoos yeej sib pab nroos pab tus uas kawm Vajlugkub kom tau nws los ua Yexus ib tug thwj tim. Yog li ntawd, txhua tus uas nyob hauv lub koom txoos yuav tau sib koom siab mus tshaj tawm rau txhua tus hauv lawv thaj tsam, thiab txhua tus yuav zoo siab thaum muaj ib tug tshiab tuaj kev sib txoos.

HLUB YEHAUVAS THIAB KWV TIJ ZEJ ZOG

15. Yog peb coj raws li Mathais 22:37-39, yuav pab tau kom peb muaj kev zoo siab li cas thaum mus tshaj tawm txoj xov zoo? (Saib daim duab ntawm )

¹⁵ Peb yuav muaj kev zoo siab mus qhia txoj xov zoo dua yog peb xav txog Yehauvas thiab  cov kwv tij zej zog. (Nyeem Mathais 22:37-39.) Thaum Yehauvas pom peb ua nws tes hauj lwm, ntshe nws yuav zoo siab heev. Thaum tib neeg kawm Vajlugkub tej zaum lawv yuav zoo siab kawg. Nco ntsoov tias yog lawv mloog txoj xov zoo uas peb qhia thiab kam teev tiam Yehauvas ces lawv yuav tau nyob mus ib txhis.​—Yauhas 6:40; 1 Timautes 4:16.

16. Piav seb peb muaj taus kev zoo siab li cas thaum peb tawm tsis tau hauv tsev mus rau qhov twg.

¹⁶ Yog tias koj nyob tsev xwb tawm tsis tau mus qhov twg ces ua tib zoo xav seb koj yuav ua li cas qhia koj txoj kev hlub rau Yehauvas thiab cov kwv tij zej zog. Thaum muaj tus kab mob khaus viv-19 (COVID-19), Xamuas (Samuel) thiab nws tus poj niam nyob tsev xwb tawm tsis tau mus qhov twg. Nyob rau ncua sij hawm ntawd, nkawd hu xov tooj mus qhia Vajlugkub, sau ntawv rau tib neeg, thiab kawm Vajlugkub nrog lwm tus saum huab saum cua. Xamuas qhia Vajlugkub rau cov neeg uas nws ntsib ntawm qhov chaw kuaj mob. Nws hais tias: “Thaum peb raug kev nyuaj siab mas peb yeej txhawj xeeb, sab, thiab sim peb txoj kev ntseeg kawg nkaus li. Peb yuav tau nrhiav seb peb yuav ua li cas peb thiaj muaj kev zoo siab ua Yehauvas tes hauj lwm.” Tsis tas li ntawd, nws tus poj niam txawm ntog thiab sawv tsis taus saum txaj tau peb lub hlis thiab yuav tau zaum hauv laub rau lub hlis. Nws tus poj niam qhia tias: “Kuv ua npaum li kuv ua tau los mus qhia txoj xov zoo. Kuv thiaj li qhia Vajlugkub rau tus neeg tu mob, cov uas xa khoom tuaj rau ntawm wb tsev, thiab kuv kuj qhia Vajlugkub rau ib tug poj niam uas muag khoom rau cov neeg muaj mob hauv xov tooj.” Txawm tias Xamuas thiab nws tus poj niam nkawd ua tsis tau npaum li yav tag los lawm, nkawd haj tseem ua npaum li nkawd ua tau mas nkawd muaj kev zoo siab kawg.

17. Yuav ua li cas tej uas peb kawm hauv zaj no thiaj pab tau peb?

¹⁷ Yog li ntawd, peb yuav tau muab tsib yam uas peb tau kawm hauv zaj no coj los siv rau hauv peb lub neej. Txhua qhov uas hais tas no zoo ib yam li cov tshuaj rau qaib. Thaum koj muab coj los sib xyaws mas qab kawg li. Yog peb siv tag nrho raws li zaj kawm no hais ces peb yuav xav rau qhov zoo thiab peb yuav zoo siab hlo mus tshaj tawm txoj xov zoo.