1. Pablisa haida be haroro gaukara ai ma haida idia hereva henia totona, edia hemami be edena bamona? (Laulau itaia danu.)

 ITA BE iseda guba Tamana, Iehova, ita lalokau henia dainai ma haida ita haroro henia, bona ita ura idia ita durua Iehova idia dibaia totona. Pablisa momo be haroro gaukara idia moalelaia. To haida be idia hekwarahi haroro gaukara idia moalelaia totona. Dahaka dainai? Idia hemarai bona idia laloa idia be hadibaia taudia namodia lasi. Haida be edia hemami ia namo lasi taunimanima edia ruma dekenai idia lao totona. Haida be taunimanima ese do idia badu henidia dainai idia gari. Bona ma haida be idia ura lasi taunimanima idia habadua. Unai tadikaka bona taihu be Iehova idia lalokau henia bada, to idia hekwarahi idia diba lasi taudia dekenai sivarai namona idia harorolaia totona. To, idia laloparara unai gaukara be mai anina bada, unai dainai nega ibounai idia haroro. Iehova be idia dekenai ia moale bada!

2. Bema nega haida haroro gaukara oi moalelaia lasi, dahaka dainai oi lalomanoka lasi be namo?

² Nega haida unai bamona hemami dainai haroro gaukara oi moalelaia lasi, a? Bema oibe, oi lalomanoka lasi. Reana unai bamona hemami ese ia hahedinaraia oi manau bona oi ura lasi sibona oi abia isi. Danu, ia hahedinaraia oi ura lasi ma haida  ida oi hepapahuahu. Iseda guba Tamana be iseda hemami ia diba bona ia ura ita ia durua. (Isa. 41:13) Inai atikol ai, ita abia hemami ita hanaia diba daladia faiv, bona haroro gaukara ita moalelaia daladia do ita herevalaia.

DIRAVA ENA HEREVA ESE OI IA HAGOADAIA BE NAMO

3. Dahaka ese peroveta tauna Ieremia ia durua ma haida ia haroro henia totona?

³ Idaunegai, Dirava ena hesiai taudia be gaukara badana ta idia karaia neganai, ena hereva ese idia ia hagoadaia. Hegeregere, peroveta tauna Ieremia mani ita laloa. Iehova ese ia dekenai haroro gaukara ena maduna ia henia neganai, ia lalometau. Ieremia ia gwau: “Lau be hereva dalana lau diba lasi, badina lau be mero matamata sibona.” (Ier. 1:6) Dahaka ese Ieremia ia durua mai gari lasi ida ia haroro totona? Dirava ese ia dekenai ia gwauraia herevana dainai goada ia abia. Ieremia ia gwau: “Iena hereva be lahi bamona ia araia noho. Egu turia ia araia noho danu. Bona lau koua diba lasi.” (Ier. 20:8, 9) Ena be Ieremia be teritori aukana dekenai ia haroro, to do ia harorolaia sivaraina ese goada ia henia unai gaukara ia karaia totona.

4. Dirava ena Hereva ita duahia bona laloa dobu neganai, dahaka do ia vara? (Kolose 1:9, 10)

⁴ Keristani taudia be Baibel amo goada idia abia. Aposetolo Paulo be Kolose kongrigeisen ia tore henia neganai, tadikaka ia hamaorodia, ‘Iehova ena dala hegeregerena ai do idia raka,’ ‘gaukara namodia ibounai lalonai huahua do idia havaraia noho’ totona. (Kolose 1:9, 10 duahia.) Unai gaukara namona ta be sivarai namona harorolaia gaukarana. Dirava ena Hereva ita duahia bona laloa dobu neganai, Iehova dekenai iseda abidadama ia hagoadaia bona ita laloparara Basileia sivaraina ita harorolaia be mai anina bada.

5. Edena dala ai Baibel duahia bona stadilaia karana ese ita do ia durua?

⁵ Dirava ena Hereva ese ita ia durua totona, ita duahia, stadilaia bona laloa dobu namonamo, ita haragaharaga lasi. Bona nega ita atoa be namo. Bema Baibel oi duahia lalonai siri ta oi lalopararalaia lasi, namo lasi unai oi laloa maragi. To Watch Tower Publications Index eiava Iehova Ena Witnes Taudia Edia Stadi Indeks oi gaukaralaia, unai siri ena anina oi tahua totona. Bema emu stadi totona nega oi atoa, Dirava ena Hereva dekenai emu abidadama do oi hagoadaia. (1 Tes. 5:21) Unai amo  mai moale ida oi dibaia gaudia be ma haida dekenai do oi hadibaia.

HARORO GAUKARA TOTONA OI HEGAEGAE NAMONAMO

6. Dahaka dainai haroro gaukara totona ita hegaegae be namo?

⁶ Bema haroro gaukara totona oi hegaegae namonamo, do oi gari lasi ma haida oi hereva henia totona. Iesu be ena hahediba taudia ia hegaegaelaia guna, bena gabeai haroro gaukara totona ia siaidia. (Luka 10:1-11) Iesu ese ia hadibaia gaudia idia badinaia dainai, gau namodia momo idia karaia bona idia moale.—Luka 10:17.

7. Edena dala ai haroro gaukara totona ita hegaegae diba? (Laulau itaia danu.)

⁷ Edena dala ai haroro gaukara totona ita hegaegae diba? Namona be hereva momokani do ita gwauraia dalana ita lalohadailaia bona iseda herevahereva dalanai ita gwauraia. Bona teritori ai momo ese idia laloa bada gaudia, bona idia do ita hereva henia dalana ita laloa. Bena taunimanima ita hereva henia neganai, do ita gari lasi, kiri toana ita hahedinaraia bona tura namona ta bamona do ita hereva.

8. Edena dala ai Keristani taudia be aposetolo Paulo ena haheitalai ese ia herevalaia hodu bamona?

⁸ Aposetolo Paulo ese ena Keristani tadikaka bona taihu ia hamaoroa: “Ai dekenai inai dava bada gauna be hodu lalonai ia noho.” (2 Kor. 4:7) Unai dava bada gauna be dahaka? Ia be Basileia sivaraina, taunimanima hamauria gaukarana. (2 Kor. 4:1) Bona unai hodu be dahaka? Unai be Dirava ena hesiai taudia ia laulaulaia, idia be ma haida dekenai sivarai namona idia harorolaia. Paulo ena nega ai, hoihoi taudia be hodu idia gaukaralaia mai anina bada gaudia, hegeregere aniani, wain bona moni idia udaia bena idia abia lao. Unai hegeregerena, Iehova ese ita dekenai mai anina bada sivarai namona ia henia. Iehova ena heduru amo mai goada ida unai sivarai namona ita harorolaia noho diba.

GOADA ABIA TOTONA OI GURIGURI

9. Edena dala ai taunimanima gari henia karana ita hanaia diba? (Laulau itaia danu.)

⁹ Nega haida haroro gaukara ai, taunimanima dekenai do ita gari. Edena dala ai unai manoka gauna ita hanaia diba? Aposetolo taudia idia oda henia do idia guriguri lasi neganai, idia gwauraia guriguri mani ita laloa.  Iehova idia noia idia do ia durua, ‘mai gari lasi ida ena hereva idia harorolaia’ totona. Karaharaga, Iehova ese edia guriguri ia haerelaia. (Kara 4:18, 29, 31) Bema nega haida taunimanima ita gari henia, namona be ita danu ese Iehova ena heduru totona ita guriguri. Iehova oi noia taunimanima dekenai emu lalokau ia habadaia, unai amo idia dekenai sivarai namona oi harorolaia diba.

10. Edena dala ai Iehova ese ita ia durua ena Witnes taudia ai ita lao totona? (Isaia 43:10-12)

¹⁰ Iehova ese ita ia abia hidi ena Witnes taudia ai ita lao, bona ia gwauhamata ita dekenai goada do ia henia. (Isaia 43:10-12 duahia.) Mani ita ia hagoadaia daladia foa ita laloa. Ginigunana be, sivarai namona ita harorolaia neganai, Iesu be ita ida ia noho. (Mat. 28:18-20) Iharuana be, Iehova ese aneru ia abia hidi ita idia durua totona. (Apok. 14:6) Ihatoina be, Iehova ese ena lauma helaga amo ita ia durua ita dibaia gaudia ita laloatao totona. (Ioa. 14:25, 26) Ihahanina be, Iehova ese tadikaka bona taihu ia henia ita idia bamoa totona. Iehova bona tadikaka taihu edia heduru amo goada do ita abia sivarai namona do ita harorolaia noho.

HAIDA EDIA NOHO DALANA LALOA BONA LALOHADAI MAORONA ABIA

11. Emu haroro gaukara ai, edena dala ai taunimanima momo oi davaria diba? (Laulau itaia danu.)

¹¹ Taunimanima be edia ruma ai oi davaria lasi neganai, oi lalohisihisi, a? Sibona oi nanadaia: ‘Egu teritori ai idia noho taudia be edeseniai do lau davaria?’ (Kara 16:13) ‘Idia be gaukara gabunai eiava sitoa dekenai idia noho, a?’ Bema unai bamona, oi laloa dala haroro amo taunimanima momo do oi davaria, a? Tadikaka ta ladana, Joshua ia gwau: “Sitoa bona pablik gabudiai lau loaloa neganai, dala ia kehoa ma haida lau haroro henia.” Ia bona ena adavana, Bridget, idia itaia adorahi kahanai eiava Sunday adorahi ai idia haroro neganai, momo be edia ruma dekenai idia davaridia.—Efe. 5:15, 16.

12. Edena dala ai taunimanima ese idia abia dae bona laloa bada gaudia ita dibaia?

¹² Bema ta be oi harorolaia sivaraina ia laloa bada lasi, namona be ia abia dae eiava laloa bada gaudia oi laloa. Joshua bona Bridget be  pepapepa ena vairanai ia noho henanadai idia gaukaralaia taunimanima idia hereva henia totona. Hegeregere, inai pepapepa Baibel be Edena Bamona Oi Laloa? idia gaukaralaia neganai, idia gwau: “Haida idia laloa Baibel be Dirava ena Hereva, to haida be unai bamona idia laloa lasi. Emu lalohadai be dahaka?” Nega momo unai dala amo herevahereva karana idia hamatamaia.

13. Dahaka dainai ita gwau diba iseda haroro gaukara ita hagugurua, ena be taunimanima idia kamonai lasi? (Aonega Herevadia 27:11)

¹³ Ena be ita harorolaia sivaraina idia kamonai lasi, to gau badana be iseda tahua gauna ita hagugurua. Dahaka dainai? Badina Iehova bona ena Natuna idia ura haroro gaukara ita karaia. (Kara 10:42) Ena be haroro gaukara ai ta ita davaria lasi, eiava sivarai namona idia dadaraia, to ita moale badina ita diba iseda guba Tamana ita hamoalea.—Aonega Herevadia 27:11 duahia.

14. Pablisa ta be kamonai tauna ta ia davaria neganai, dahaka dainai ita moale?

¹⁴ Danu, pablisa ta be iseda teritori ai, kamonai tauna ia davaria neganai ita moale. Gima Kohorona ia gwau, iseda gaukara be ia boio natuna ta ita tahua bamona. Momo ese gabu ibounai dekenai ia idia tahua. Natuna idia davaria neganai, ia davaria tauna sibona do ia moale lasi, to ibounai do idia moale. Unai hegeregerena, kongrigeisen ai ibounai idia gaukara goada ta be hahediba tauna ai idia halaoa totona. Pablisa ibounai be teritori ai idia haroro be namo, bona kamonai tauna ta be hebou ia mai matamaia neganai, ita ibounai ita moale.

IEHOVA BONA EMU DEKENA TAUNA LALOKAU HENIA

15. Mataio 22:37-39 ese edena dala ai ita ia durua, iseda ura haroro gaukara totona ita habadaia? (Laulau itaia danu.)

¹⁵ Bema Iehova bona iseda dekena tauna ita lalokau henia, iseda ura haroro gaukara dekenai do ita habadaia. (Mataio 22:37-39 duahia.) Mani oi laloa haroro gaukara ita karaia neganai, Iehova ia moale, bona taunimanima be Baibel idia stadilaia neganai, idia moale danu! Bona laloatao, taunimanima be ita harorolaia sivaraina idia abia dae neganai, do idia roho mauri diba.—Ioa. 6:40; 1 Tim. 4:16.

16. Edena dala ai iseda haroro gaukara ita moalelaia diba, ena be ruma dekenai sibona ita noho? Haheitalai haida gwauraia.

¹⁶ Badina haida dainai oi be ruma dekenai  sibona oi noho, a? Bema oi be unai bamona, oi karaia gauna sibona oi laloa, unai amo oi hahedinaraia Iehova bona emu dekena tauna oi lalokau henia. COVID-19 gorerena dainai, Samuel bona Dania be ruma dekenai sibona idia noho. Bona unai hekwakwanai negana lalonai, hanaihanai telefon amo idia haroro, revareva idia torea bona Zoom amo Baibel stadi idia karaia. Samuel be ena kensa gorere dainai, ia lao henia hospital dekenai ia hedavari henia taudia ia haroro henia. Ia gwau: “Hekwakwanai badana ta ita davaria neganai, ita lalohekwarahi, ita hesiku bona iseda abidadama ia manoka diba. Unai dainai Iehova ena hesiai gaukara dekenai moale ita tahua be namo.” Unai hekwakwanai ia vara lalonai, Dania be ia moru bona hua toi lalonai bedi dekenai ia hekure sibona. Unai murinai, wilsea dekenai ia helai. Ia gwau: “Egu noho dalana hegeregerena, lau karaia diba gaudia lau karaia. Ai ia vadivadi henia nesi ta bona ruma dekenai gau haida idia mailaia taudia lau haroro henia. Danu, medikol kohudia ia hoihoilaia hahinena ta ida, telefon amo ai herevahereva.” Samuel bona Dania be edia noho dalana dainai, guna bamona edia haroro dalana idia badinaia diba lasi, to idia karaia diba gaudia idia karaia bona idia moale.

17. Inai atikol ese ia gwauraia dala faiv ita badinaia neganai, dahaka namo do ita davaria?

¹⁷ Inai atikol ese ia gwauraia dala faiv ita badinaia neganai, namo do ita davaria. Unai dala ta ta be nanadu ta lalonai oi nadua aniani idauidau bamona. Unai aniani ibounai oi nadua hebou neganai, ena mamina be do ia namo herea. Unai hegeregerena, bema unai dala faiv ita badinaia, lalohadai maorodia do ita abia bona iseda haroro gaukara do ita moalelaia.