1. Ovandu tjiva ve fula vi ohunga nokuzuvarisa ku varwe motjiungura tjokuzuvarisa? (Wina tara kotjiperendero.)

 OTJOVAKARERE va Jehova, tu zuvarisa ku varwe mena rokutja twa suvera Tate wetu womeyuru, nu tu vanga okuvevatera okumutjiwa. Ovazuvarise ovengi tjiri ve yorokera otjiungura tjokuzuvarisa. Posi yokutja, ouzeu ku varwe okukara nondjoroka motjiungura tjokuzuvarisa. Omena raye? Tjiva mape ya ve nohoṋi nu ve muna kutja kavahonge vOmbeibela ovawa. Ovandu tjiva kave fula nawa okuyenda pozonganda zovandu ngunda ave hi ya ṋangerwe. Tjiva mape ya ave munu kutja ovandu mave ve pindikire, nu tjiva va hongwa okuhinokupindikisa varwe. Nandarire kutja ovakambure ovakwetu mba va suvera Jehova tjinene, ouzeu ku wo okuzuvarisa ombuze ombwa kovandu owo mbu ve hi nokutjiwa. Posi ya, owo ve muna ounanḓengu wotjiungura hi nu owo ve zuvarisa aruhe. Tjiri, Jehova u nonyuṋe mu wo.

2. Indu ove povikando tjiva tji u ha kara nenyando motjiungura tjokuzuvarisa, omena raye tji u ha sokuwa momuinyo?

² Hapo povikando tjiva irira ouzeu kove okukara nenyando motjiungura tjokuzuvarisa mena roumune mbwo? Tji pe ri nao, o u momuinyo. Okurimuna kutja kaove omuhonge omuwa wOmbeibela mape ya aku raisa kutja oove omundu omurisusuparise nu ko vanga kutja ovandu ve yandje ombango onyingi kove. Kape nomundu ngu vanga okupindikisa varwe, tjinenenene tji mo vanga okuvetjitira otjiṋa otjiwa. Iho womeyuru u tjiwa omauzeu ngu tuurunga, nu u vanga okukupa ombatero ndji mo  hepa. (Jes. 41:13) Morupa ndwi, matu katara koviṋa vitano mbi mavi yenene okutuvatera okutjinda oumune mbwo nomuano mu matu yenene okukara nenyando motjiungura tjokuzuvarisa.

YANDJERA EMBO RA MUKURU OKUKUYANḒIPARISA

3. Otjikwaye tji tja vatera Jeremia okuzuvarisa ku varwe?

³ Nandarire morukapitaveze, ombuze ya Mukuru ya yanḓiparisa ovakarere ve indu tjaave sokuungura otjiungura otjizeu. Tara kotjihorera tjomuprofete Jeremia. Eye aa tira indu Jehova tje mu pa otjiungura tjokuzuvarisa. Jeremia wa tja: “Ami hi nokutjiwa okuhungira; inga owami okaṱiṱi.” (Jer. 1:6) Otjikwaye tji tje mu vatera okukara nouvanḓe okuzuvarisa? Eye wa yanḓiparisiwa i yOmambo wa Mukuru. Eye wa tja: “Ombuze yoye otji mai sana komuriro mbu mau yaka moukoto wandje. Ami mbi kondja okuiṱizira mu ami, nungwari hi sora okuitjaera.” (Jer. 20:​8, 9) Nandarire kutja Jeremia aa zuvarisa kovandu mbe hi na aave mu puratene, ombuze ndja zuvarisa ye mu pa omasa nga hepa okuungura otjiungura tje.

4. Ouwa waye mbu tu muna indu tji matu lese Embo ra Mukuru nokuripurira ko oukoto? (Ovakolose 1:​9, 10)

⁴ Ovakriste ve muna omayanḓiparisiro ngu mave hepa okuza mEmbo ra Mukuru. Indu omuapostele Paulus tja tjanga kombongo yOvakolose, we ve raera kutja okukurisa ondjiviro yawo maku tjiti kutja ve sore “okuhupa otja kombango yaNdjambi” nu ‘ongarero yawo mai eta ozondjito ngamwa azehe ozombwa.’ (Lesa Ovakolose 1:​9, 10.) Ozondjito ozombwa nḓo maze kamburire mo okuzuvarisa ombuze ombwa. Ku nao, indu tji matu lese Embo ra Mukuru nokuripurira ko oukoto, ongamburiro yetu mu Jehova i kurira ko nu tu zuva nawa ounanḓengu wokuzuvarisa ohunga nOuhona we.

5. Omomuano uṋe mu matu yenene okumuna ouwa mokulesa nokukonḓonona Ombeibela?

⁵ Kutja tu mune ouwa okuza mEmbo ra Mukuru, eṱe katu sokuhakahana okulesa, okukonḓonona, nokuripurira ko oukoto. Indu tji wa lese etjangwa ndu hi nokuzuva nawa, o resa nao. Nungwari, kondja okurihonga ovingi ohunga nezeva ndo mokuungurisa o-Watch Tower Publications Index poo Okambo komakonḓononeno kOvahongonone vaJehova. Indu ove tji u hi nokuhakahana okumana omakonḓononeno woye wOmbeibela, ove mo kurisa ongamburiro yoye mEmbo ra Mukuru. (1 Tes. 5:21) Otja ongamburiro yoye pu mai kurire ko, ove mo kara nondjoroka okuraera varwe oviṋa mbi we rihongo.

 RIRONGERA NAWA KOTJIUNGURA TJOKUZUVARISA

6. Omena raye tji matu sokurirongerisa nawa kotjiungura tjokuzuvarisa?

⁶ Indu tji we rirongerisa nawa kotjiungura tjokuzuvarisa, ove mape ya o ha tira tjinene indu tji mo hungire ku novandu. Jesus aa rongerisa ovahongewa ve ngunda ave hi ya ya motjiungura tjokuzuvarisa. (Luk. 10:​1-11) Mena rokutja owo aave ṱakamisa oviṋa Jesus mbye ve hongo, owo va yenena okutjita oviṋa oviwa ovingi nu iho tje ve pa ondjoroka.—Luk. 10:17.

7. Matu yenene vi okurirongerisa kotjiungura tjokuzuvarisa? (Wina tara kotjiperendero.)

⁷ Matu yenene vi okurirongerisa kotjiungura tjokuzuvarisa? Eṱe matu hepa okuripurira koviṋa mbi matu vanga okuhungira nu okuzambo atu hungire momambo wetu oveni. Nu wina onawa okuripurira koviṋa tjiva ovandu mbi mape ya ave hungire nokutja omomuano uṋe mu matu yenene okuvezira. Ku nao, indu tji matu hungire ku novandu, kamaatu uruma, matu meṱameṱa, nokuhungira ku na wo momuano omuwa.

8. Omomuano uṋe Ovakriste mu ve ri tjimuna ovitjuma vyomunoko mbya tamunwa i yomuapostele Paulus?

⁸ Omuapostele Paulus wa raera ovakambure ovakwao kutja: “Eṱe mbu tu notjihuze hi mu eṱe oveni, tu ri tjimuna ovitjuma vyomunoko.” (2 Kor. 4:7) Otjihuze hi otjikeṋa? Otjiungura tjokuzuvarisa ombuze ombwa yOuhona tji tji yama ovandu. (2 Kor. 4:1) Ovitjuma vyomunoko vi kuramena po ye? Ovyo vi kuramena po ovakarere va Mukuru mbe zuvarisa ombuze ombwa ku varwe. Moruveze Paulus ndwa hupire, ovarandise aave ungurisa ovitjuma vyomunoko okutjindira mo oviṋa tjimuna ovikurya, omavinu, novimariva. Momuano tjingewo, Jehova we tu pa otjiungura otjinanḓengu tjokuzuvarisa ombuze ombwa. Jehova ma yenene okutupa omasa ngu matu hepa okukayenda komurungu okuzuvarisa.

KUMBA KUTJA U KARE NOUVANḒE

9. Ovikwaye mbi mavi tu vatere kutja atu ha tira ovandu nokupirukirwa? (Wina tara kotjiperendero.)

⁹ Povikando tjiva, eṱe tu tira ovandu poo tu tira okupirukirwa. Matu yenene vi okutuurunga ouzeu mbwo? Tara kongumbiro yovaapostele ndji va kumba indu tji va tjaerwa okuzuvarisa. Owo kaave tira, nu kave isire okuzuvarisa. Nungwari va ningira Jehova okuvevatera “okuhungira omambo [we] nouvanḓe auhe.” Jehova  wa hakahana okuzira ongumbiro yawo. (Oviung. 4:​18, 29, 31) Indu povikando tjiva tji tu tira ovandu, eṱe matu sokukumba ku Jehova kutja me tu vatere. Ningira Jehova kutja me ku vatere okukurisa orusuvero rwoye kovandu kutja o ha tira okuveraera ohunga nombuze ombwa.

10. Jehova u tu vatera vi okurira Ovahongonone ve? (Jesaja 43:​10-12)

¹⁰ Jehova we tu toorora kutja tu rire Ovahongonone ve, nu eye wa kwizika kutja me tu vatere okurira ozombanḓe. (Lesa Jesaja 43:​10-12.) Tara komiano vine eye me tjita nao. Omuano omutenga, Jesus aruhe u kara pu na eṱe indu tji matu zuvarisa ombuze ombwa. (Mat. 28:​18-20) Omuano outjavari, Jehova wa zika ovaengeli okutuvatera. (Omavan. 14:6) Omuano outjatatu, Jehova we tu pa ombepo ye ondjapuke ndji tu vatera okuzemburuka oviṋa mbi twe rihonga. (Joh. 14:​25, 26) Omuano outjaine, Jehova we tu pa ovakambure ovakwetu okupita pamwe na eṱe motjiungura tjokuzuvarisa. Nombatero ya Jehova novakambure ovakwetu, eṱe tu noviṋa avihe mbi matu hepa okurira ozombanḓe nokukayenda komurungu okuzuvarisa.

OKURUNDURURA OMUANO WETU WOKUZUVARISA NOKUKARA NOUMUNE OUWA

11. Indu tji u ri motjiungura tjokuzuvarisa, omomuano uṋe mu mo yenene okuhakaena ku novandu ovengi? (Wina tara kotjiperendero.)

¹¹ Hapo ove u fula navi indu tji u hi ya vazere ovandu ovengi ponganda? Ripura omuini kutja: ‘Hapo ovandu ovengi momaturiro mu mbi zuvarisa nai ve ri pi?’ (Oviung. 16:13) ‘Hapo va i koviungura poo va i kozostora?’ Indu tji pe ri nao, hapo mo yenene okuhakaena ku novandu ovengi mokuzuvarisa momivanda? Omurumendu omukambure wena Joshua wa tja: “Ami mbi zuvarisa ngunda ame kawondja motuveze twomarandero notuveze pu pe novandu ovengi.” Eye nomukazendu we Bridget, ve hakaena ku novandu ovengi pozonganda indu tji mave zuvarisa mapeta nu wina Osondaha ometaha.—Ef. 5:​15, 16.

12. Omomuano uṋe mu matu yenene okutjiwa kutja ovandu ve kambura mu ye poo ovikwaye mbi ve rikenda na vyo?

¹² Indu ovandu tji ve hi nonḓero mombuze ndji matu zuvarisa, tara kutja ovikwaye mu ve kambura mo nu ovikwaye mbi ve rikenda na vyo. Joshua na Bridget ve ungurisa epuriro ndi  ri kombanda yokambapira indu tji mave hungire ku novandu. Otjotjihorera, mokuungurisa okambapira nga Ombeibela u i vara vi?, owo ve tja: “Ovandu tjiva ve vara Ombeibela otjEmbo ra Mukuru, posi ya varwe katjinene nao. Ove u noumune uṋe?” Otjiṋa hi potuingi tji tjita kutja owo ve kare nehungi ku novandu.

13. Ongwaye tji matu yenene okutja tu nondoṋeno motjiungura tjokuzuvarisa nandarire ovandu tji ve hi nokupuratena? (Omiano 27:11)

¹³ Nandarire kutja ovandu ku matu zuvarisa kave nokupuratena, eṱe twa yenenisa ondando yetu. Omena raye tji matu tja nao? Mena rokutja twa zuvarisa, nu iho otjiṋa Jehova nOmuna we tji ve vanga kutja tu tjite. (Oviung. 10:42) Nandarire kutja katu hungirire ku nomundu, poo ovandu kave nokuvanga okupuratena kombuze yetu, eṱe matu yenene okukara nenyando mena rokutja matu tjiwa kutja matu yorokisa Tate wetu womeyuru.—Lesa Omiano 27:11.

14. Ongwaye tji matu yenene okukara nenyando indu omuzuvarise warwe tja munu omundu ngu nonḓero momaturiro mu tu zuvarisa?

¹⁴ Eṱe wina matu yenene okukara nenyando indu omuzuvarise warwe tja munu omundu ngu nonḓero momaturiro mu tu zuvarisa. Okambo kOruhungu ka sasaneka otjiungura tjetu kokupaha omuatje ngwa pandjara. Ovandu ovengi ve kara norupa mokumupaha motuveze pekepeke. Indu omuatje tja munika, kaingwi ngwe mu munu ngu kara nondjoroka uriri, posi ya ovandu avehe ve kara nenyando. Momuano tjingewo, ovandu avehe mombongo ve vatera notjiungura tjokukaisa po ovandu ovahongewa va Jesus. Eṱe tu hepa ovandu avehe mombongo okuvatera okuzuvarisa kovandu avehe momaturiro mu tu zuvarisa. Nu avehe mombongo ve kara nenyando indu omundu omupe tja utu okuya kozombongarero zombongo.

RIPURIRA KORUSUVERO RWOYE KU JEHOVA NA KOVANDU

15. Mateus 22:​37-39 mari tu vatere vi okukurisa onḓero yetu motjiungura tjokuzuvarisa? (Wina tara kotjiperendero.)

¹⁵ Eṱe matu yenene okukurisa onḓero yetu motjiungura tjokuzuvarisa mokuripurira korusuvero rwetu ku Jehova na kovandu. (Lesa Mateus 22:​37-39.) Ripurira komuano Jehova mu ma kara nenyando indu tji me tu munu amatu ungura otjiungura ho, nomuano ovandu mu mave kara nenyando indu tji mave utu okurihonga Ombeibela. Wina zemburuka  kutja imba mbe puratena kombuze yetu nave tye okukarera Jehova mave yenene okukahupa nga aruhe.—Joh. 6:40; 1 Tim. 4:16.

16. Matu yenene vi okukara nenyando motjiungura tjokuzuvarisa indu tji tu hi nokuyenena okuza po pozoyetu? Yandja ovihorera.

¹⁶ Hapo ove ko yenene okuza po poyoye mena repu kaaṋi? Tji pe ri nao, ripurira ku imbi mbi mo yenene okutjita kutja u raise orusuvero rwoye ku Jehova na kovandu. Moruveze rwomutjise wo-COVID-19, Samuel na Dania kaave yenene okuza po poyawo. Moruveze oruzeu ndwo, owo aruhe aave zuvarisa mongoze, aave tjanga otutuu, nokurihonga Ombeibela ku novandu okupitira mo-Zoom. Samuel aa zuvarisa ku imba mbaave hakaenene poklinika, eye pa pangwa omutjise wokangera. Eye wa tja: “Indu tji tu ri moruveze oruzeu, eṱe mape ya atu rikende, atu rimunu okuurwa, nu nandarire ongamburiro yetu ai rorwa. Eṱe tu hepa okukara nenyando motjiungura tja Jehova.” Ngunda ave ri mouzeu mbwo, Dania wa wira pehi nu wa kara mombete oure womieze vitatu. Kombunda yanao, eye wa kara mokatemba oure womieze hamboumwe. Eye wa tja: “Ami ee kondjo okuungura avihe otja pu me yenene. Ami ee yenene okuzuvarisa konesa ndji yekundjivarura, nee hungire ku na imba mbe yekuherura oviṋa ponganda. Ami wina mba kara nomahungi omawa ku nomukazendu mongoze ngwa ungura ponganda ndji randisa omiti vyokupanga.” Nandarire kutja Samuel na Dania kaave yenene okuungura imbi mbyaave ungura rukuru, owo va kondja okutjita imbi mbi mave yenene nu iho tje ve etera enyando.

17. Mo yenene vi okumuna ouwa okuza moviṋa vitano mbya tamunwa morupa ndwi?

¹⁷ Oviṋa vitano mbi twa hungirire ko morupa ndwi mavi yenene okuungura nawa indu tji wa ungurisa avihe pamwe. Ondunge aihe i ri tjimuna otjitjatise movikurya. Indu ovitjatise avihe tji vya tuwa mumwe movikurya, ovikurya mbyo mavi tjata nawa. Okuṱakamisa oviṋa vitano mbyo mavi tu vatere kutja tu kare noumune ouwa, nokukara nenyando motjiungura tjokuzuvarisa.