1. Vamwe ohava kala ve udite ngahelipi shi na sha nokupopya navamwe moukalele? (Tala yo efano.)

 TU LI oshiwana shaJehova, ohatu udifile ovanhu vakwetu, molwaashi otu hole Tate yetu womeulu notwa hala ve mu shiive. Ovaudifi vahapu ohava hafele lela oilonga yokuudifa. Ashike vamwe ohava mono shidjuu oku i hafela. Omolwashike mbela? Vamwe otashi dulika ve na eehoni neenghono nove udite kutya kave fi ovahongi vawa. Vamwe inava manguluka okuya komaumbo ovanhu inava shivwa. Vamwe ohava kala ve udite kutya ovanhu otava ka kala ve va handukila. Vamwe ova hongwa va henuke okuhandukifa ovanhu vakwao. Nonande ove hole Jehova neenghono, ovamwatate novamwameme ovo ohava mono shidjuu okuudifila onghundana iwa ovanhu ovo vehe shii. Ashike ove shi shii kutya oilonga yokuudifa oya fimanenena, nove shii kutya ova pumbwa okukufa ombinga muyo pandjikilile. Ohashi hafifa neenghono Jehova, ngeenge te va tale tava ningi ngaho.

2. Ngeenge oho mono shidjuu okuhafela oukalele, omolwashike ino pumbwa okuteka omukumo?

² Mbela omafimbo amwe oho mono shidjuu okumona ehafo moukalele omolwokukala u na omaliudo a tya ngaho? Ngeenge osho, ino teka omukumo. Okukala uhe na ondjungu otashi ulike kutya owe lininipika nonokutya ino hala okuyandja elitulemo lihapu kwoove mwene. Otashi ulike yo kutya ino hala okutanguna navamwe. Kape na omunhu ha kala a hala okuhandukifa vamwe, unene tuu ngeenge ota kendabala oku va longela ouwa. Xo womeulu oku shii nawa omashongo, oo wa taalela, nokwa hala oku ku pa ekwafo olo wa pumbwa. (Jes. 41:13) Moshitukulwa eshi, ohatu ka kundafana omaetepo atano e na sha nanghee hatu dulu okuungaunga nomaliudo  a tya ngaho, nanghee hatu dulu okumona ehafo moukalele.

PITIKA EENDJOVO DAKALUNGA DI KU PAMEKE

3. Oshike sha kwafela omuprofeti Jeremia a dule okuudifila ovanhu vakwao?

³ Okudja mefimbo la pita, etumwalaka laKalunga ola kala nokupameka ovapiya vaye, eshi va li ve na oshinakuwanifwa shidjuu osho ve na okuwanifa po. Natu ka taleni koshihopaenenwa shomuprofeti Jeremia. Okwa li ta ongaonga, eshi Jehova a li e mu pa oshinakuwanifwa shokuudifa. Jeremia okwa ti: ‘Ame kandi shii okupopya, osheshi ame omunyasha.’ (Jer. 1:​6, KB-13) Oshike she mu kwafela, opo a kale e na omukumo wokuudifa? Okwa li a pamekwa kEendjovo daKalunga. Okwa ti: “Momutima wange omwa fa mwa xwama omundilo tau xwike wa kwatelelwa momakipa ange.” (Jer. 20:​8, 9, KB-13) Nonande Jeremia okwa li e na oshitukulwa shidjuu, etumwalaka olo a li a pewa a udife ola li le mu pa eenghono odo a li a pumbwa, opo e shi longe.

4. Oshike hashi ningwa po, ngeenge twa lesha Eendjovo daKalunga nokudilonga kudo? (Ovakolossi 1:​9, 10)

⁴ Ovakriste ohava mono eenghono okudja metumwalaka olo li li mEendjovo daKalunga. Eshi omuyapostoli Paulus a li ta shangele eongalo lOvakolossi, okwa ti kutya okumona eshiivo lashili ohashi linyengifa ovamwaxe va “wapalele Jehova” nokutwikila va “imike oiimati moilonga aishe iwa.” (Lesha Ovakolossi 1:​9, 10.) Oilonga oyo iwa oya kwatela mo okuudifa onghundana iwa. Onghee ngeenge hatu lesha Eendjovo daKalunga nokudilonga kudo, ohashi pameke eitavelo letu muJehova nohatu udu ko nawa efimano lokuudifa etumwalaka lOuhamba.

5. Ongahelipi hatu dulu okumona ouwa muhapu mokulesha nokukonakona Ombiibeli?

⁵ Opo tu mone ouwa muhapu mEendjovo daKalunga, otwa pumbwa okuhenuka okulesha, okukonakona nokudilonga hatu endelele. Shi ninga nefimbo. Ngeenge owa lesha omushangwa oo udjuu okuuda ko, ino u lipwililikila. Ponhele yaasho, longifa embo Elongifwambo lokukonga omauyelele moishangomwa yEendombwedi daJehova, ile o-Watch Tower Publications Index, opo u mone eyelifo li na sha novelishe oyo. Ngeenge owa longifa efimbo lihapu mokukonakona, oto ka kala u na oushili kutya osho Ombiibeli ya popya oshoshili. (1 Tes. 5:21) Ngeenge owa kala wa tomhwa,  oto ka hafela okulombwela vamwe kombinga yaasho we lihonga.

LILONGEKIDILA NAWA OUKALELE

6. Omolwashike twa pumbwa okulilongekidila nawa oukalele?

⁶ Ngeenge owe lilongekidile nawa oukalele, oto ka kala u udite wa manguluka, ngeenge to popi navamwe. Jesus okwa li a kwafela ovahongwa vaye ve lilongekide, ofimbo ine va tuma moukalele. (Luk. 10:​1-11) Molwaashi ova li va tula moilonga osho Jesus e va honga, ova li va dula okuninga oinima ihapu iwa, naasho osha li she va etela ehafo linene. — Luk. 10:17.

7. Ongahelipi hatu dulu okulilongekidila oukalele? (Tala yo efano.)

⁷ Ongahelipi hatu dulu okulilongekidila oukalele? Otwa pumbwa okudiladila kwaasho hatu ka popya noku shi yelifa monghedi i li paushitwe, hatu longifa oitya yetu vene. Otashi ke tu kwafela yo, ngeenge otwa diladila keenghedi dimwe omo ovanhu tave ke linyenga nanghee hatu ke va nyamukula. Opo nee eshi hatu popi novanhu, ohatu ka kala twa ngungumana, hatu limemesha notu na omhepo youkaume.

8. Omonghedi ilipi Ovakriste va faafanifwa noitoo yedu oyo ya popiwa mefaneko lomuyapostoli Paulus?

⁸ Omuyapostoli Paulus okwa lombwela ovamwaxe, a ti: “Nonande otwa fa oitoo yedu, otwa humbata emona olo.” (2 Kor. 4:7) Emona olo oshike? Olo oilonga yokuxupifa eemwenyo yokuudifa etumwalaka lOuhamba. (2 Kor. 4:1) Oitoo yedu oshike? Otai faneke ovapiya vaKalunga, ovo hava udifile ovanhu vakwao onghundana iwa. Pefimbo laPaulus, ovashingifi ova li hava longifa oitoo yedu, opo va humbatele mo oinima yongushu, ngaashi oikulya, omaviinyu noimaliwa. Sha faafana, Jehova okwe tu lineekelela etumwalaka la fimana longhundana iwa. Kekwafo laJehova, ohatu dulu okukala tu na eenghono odo da pumbiwa, opo tu twikile okuudifa noudiinini.

ILIKANA U PEWE OULADI

9. Ongahelipi hatu dulu okufinda oumbada wokutila ovanhu? (Tala yo efano.)

⁹ Omafimbo amwe, otashi dulika tu kale twa tila ovanhu. Ongahelipi hatu dulu okufinda eshongo olo? Natu ka taleni keilikano lovayapostoli, eshi va li va kunghililwa vaha udife. Ponhele yokukala va tila ovanhu, ova li va  pula Jehova e va kwafele “va twikile okupopya eendjovo [daye] nouladi.” Jehova okwa li a nyamukula eilikano olo mepakumo leisho. (Oil. 4:​18, 29, 31) Ngeenge otwa kwatwa koumbada wokutila ovanhu, nafye otwa pumbwa okwiilikana kuJehova e tu kwafele. Pula Jehova e ku kwafele u kulike ohole yoye yokuhola ovanhu, opo u kale ino tila, eshi to va lombwele kombinga yonghundana iwa.

10. Jehova ohe tu kwafele ngahelipi tu kale Eendombwedi daye? (Jesaja 43:​10-12)

¹⁰ Jehova okwe tu hoolola tu ninge Eendombwedi daye, nokwa udaneka kutya ote ke tu kwafela tu kale ovaladi. (Lesha Jesaja 43:​10-12.) Natu ka taleni keenghedi nhee omo he shi ningi. Yotete, Jesus oha kala pamwe nafye, ngeenge hatu udifa onghundana iwa. (Mat. 28:​18-20) Onhivali, Jehova okwa nangeka po ovaengeli ve tu kwafele. (Eh. 14:6) Onhinhatu, Jehova okwe tu pa omhepo yaye iyapuki i tu kwafele tu dimbuluke oinima oyo twe lihonga. (Joh. 14:​25, 26) Onhine, Jehova okwe tu pa ovamwatate novamwameme va longe pamwe nafye. Kekwafo laJehova nosho yo lovamwatate novamwameme, otu na ashishe osho twa pumbwa, opo tu dule okukala ovaladi nokutwikila okuudifa.

KALA HO TIFUKA NOKUKALA U NA ETALEKO LIWA

11. Ongahelipi to dulu okumona ovanhu vahapu, ngeenge u li moukalele? (Tala yo efano.)

¹¹ Mbela oho kala wa teka omukumo, ngeenge owa hange ashike ovanhu vanini momaumbo? Lipula kutya: ‘Ovanhu vomoshitukulwa shetu ove li peni paife?’ (Oil. 16:13) ‘Mbela ove li koilonga, ile keefitola?’ Ngeenge osho shi li ngaho, mbela ito dulu okumona ovanhu vahapu mokuudifila mepandavanda? Omumwatate umwe wedina Joshua okwa ti: “Ohandi mono eemhito dokuudifa, ngeenge handi ende peefitola, ile peenhele dimwe vali odo de lipyakidila.” Ye nomukulukadi waye, Bridget, ohava hange ovanhu vahapu momaumbo, ngeenge tava udifa komatango nosho yo mOsoondaxa omutenya. — Ef. 5:​15, 16.

12. Ongahelipi hatu dulu okumona kutya ovanhu ova itavela shike, ile otave lipula nashike?

¹² Ngeenge potete omunhu oo wa popya naye ita ulike ohokwe metumwalaka loye, kendabala okushiiva kutya okwa itavela shike,  ile kutya ote lipula nashike. Joshua naBridget ohava longifa epulo olo li li kombada yokafo, ngeenge tava hovele eenghundafana novanhu. Pashihopaenenwa, ngeenge tava longifa okafo Owa tala ko ngahelipi Ombibeli?, ohava ti: “Ovanhu vamwe ova tala ko Ombiibeli i li embo la dja kuKalunga, vamwe hasho ve i tala ko ngaho. Ove oto ti ngahelipi?” Luhapu, osho ohashi twala meenghundafana.

13. Omolwashike twa pondola, ngeenge hatu udifa, nonande ovanhu inava pwilikina? (Omayeletumbulo 27:11)

¹³ Nonande ovanhu itava pwilikine, eshi hatu va udifile, natango otwa hanga elalakano letu. Omolwashike mbela? Omolwaashi otwa ninga osho Jehova nOmona va hala tu longe, twa yandja oundombwedi. (Oil. 10:42) Nonande inatu popya nomunhu, ile etumwalaka letu inali tambulwa ko, ohatu dulu okukala twa hafa, molwaashi otu shii kutya otwa hafifa Tate yetu womeulu. — Lesha Omayeletumbulo 27:11.

14. Omolwashike hatu dulu okukala twa hafa, ngeenge omuudifi umwe okwa mono omunhu oo ta ulike ohokwe moshitukulwa shetu?

¹⁴ Ohatu dulu yo okukala twa hafa, ngeenge omuudifi mukwetu okwa mono omunhu a ulika ohokwe moshitukulwa shetu. Oshungonangelo oya faafanifa oilonga yetu nokukonga okaana ka kana. Vahapu ohave ka kongo moshitukulwa noshitukulwa. Ngeenge okaana oka monika, keshe umwe oo a li te ka kongo ota ka kala a hafa, ndele haye oo ashike e ka mona. Sha faafana, eongalo alishe ola kwatelwa mo moilonga yokuninga ovanhu ovahongwa. Aveshe meongalo ova pumbiwa, opo va udifile ovanhu aveshe moshitukulwa, naaveshe ohava kala va hafa, ngeenge omunhu mupe okwa hovele okuuya kokwoongala.

YANDJA ELITULEMO KOHOLE YOYE YOKUHOLA JEHOVA NOVANHU VAKWENI

15. Ongahelipi okutula moilonga Mateus 22:​37-39 taku tu kwafele tu wede ko kondjungu yetu moukalele? (Tala yo efano yoshifo.)

¹⁵ Ohatu dulu okuweda ko kondjungu yetu yokuudifa mokuyandja elitulemo kohole yetu yokuhola Jehova novanhu vakwetu. (Lesha Mateus 22:​37-39.) Diladila kunghee Jehova ha kala a hafa, ngeenge e wete hatu longo oilonga oyo, nanghee ovanhu tava kala va hafa, ngeenge ova hovele okukonakona Ombiibeli. Dimbuluka yo kutya ovo hava pwilikine ketumwalaka letu nokutokola okulongela Jehova,  otava dulu oku ka kala nomwenyo fiyo alushe. — Joh. 6:40; 1 Tim. 4:16.

16. Ongahelipi hatu dulu okumona ehafo moukalele wetu, ngeenge ihatu dulu okudja mo momaumbo etu? Yandja oihopaenenwa.

¹⁶ Mbela iho dulu okudja mo meumbo omolwetomheno lonhumba? Ngeenge osho, yandja elitulemo kwaasho to dulu okuninga, opo u ulike kutya ou hole Jehova nosho yo ovanhu vakweni. Pefimbo lomukifi wekomba woko-COVID-19, Samuel naDania kava li tava dulu okudja mo meumbo lavo. Momukokomoko wefimbo olo la li lidjuu, ova li hava udifa tava longifa eengodi pandjikilile, tava shange eenhumwafo nokuninga omakonakonombiibeli tava longifa o-Zoom. Samuel okwa li a udifila ovanhu kokapangelo oko a li ta pangwa okankela. Okwa ti: “Ngeenge hatu piti meenghalo didjuu, ohatu kala tu udite twa wililwa, twa loloka, neitavelo letu ohali kala tali yelekwa. Otwa pumbwa okumona ehafo moilonga yetu oyo hatu longele Jehova.” Momukokomoko woiningwanima oyo, Dania okwa li e lidenga po, noka li ta dulu okudja mo mombete yaye oule weemwedi nhatu. Okwa li a pumbwa okukala mokatemba oule weemwedi hamano. Okwa ti: “Onda kendabala okuninga keshe osho eenghalo dange tadi pitike nge ndi ninge. Onda li nda dula okuudifila omupangi, oo a li e uya okutalela nge po, nokupopya novanhu ovo va li hava eta oinima peumbo. Onda li yo nda hafela eenghundafana nomukainhu umwe, okupitila mongodi, oo ha longo mokaambani yomiti.” Nonande eenghalo daSamuel naDania oda li da ngabeka omalipyakidilo avo, ova li va ninga ngaashi tava dulu, naasho osha li she va etela ehafo.

17. Ongahelipi to dulu okumona ouwa muhapu momaetepo oo a etwa moshitukulwa eshi?

¹⁷ Kendabala okutula moilonga omaetepo aeshe atano oo a popiwa moshitukulwa eshi. Keshe eetepo ola fa oshinyenyepeki osho hashi longifwa, ngeenge twa hala okuteleka oshikulya shonhumba. Ngeenge oinyenyepeki aishe oya lumbakanifwa mumwe, opo u dule okuteleka oikulya oyo, oto ka teleka eendja tadi tokola elaka. Ngeenge otwa tula moilonga omaetepo aeshe oo, ohatu ka dula okuungaunga nomupondo nomaliudo oo mai, nokumona ehafo linene moukalele.