1. Baat bakwaabw biiyumvumvw bicy habitaatal kwiisamb ni baat mu mudimw a bukajaady? (Tal cikwaabw cifwaatul.)

 MUTUDY baat ba Yehow, tudiidiil baat musah bwaal tudy bakat Taat iitut a mu diiwul ni bwaal tukaakaam kwambulwiish baat neet bwa kumumanyikobw byaabw. Bakajaady bavul bady ni musangal haloolongobw mudimw a bukajaady. Ki bwa bakwaabw i bikasakan bwa kulong mudimw oow ni musangal. Bwabingany? Bwaal bakwaabw kabiish batamb kuleeb ni balaalang neey kabiish baman kulongweesh bilengel. Bakwaabw bumvumvw bibiih bwa kuy ku cibel kwa muut kabay biibabiikan. Bakwaabw baciiciin neey bady mwa kwiibiihat. Bakwaabw naabw i biibalongweesh bwa kweehuk bilumbw ni baat. Ning mudy biin-kweet aab bakat Yehow bikasakan, i biibakasakeen bwa kudiil baat bakwaabw musah. Ki i bamanyik mudy mudimw oow mwiikal ni buseeb, nook, badiidiil baat musah ha ciibidil. Yehow udy ni musangal muvul hadyobw balong mudimw oow!

2. Biby biikal neey misang yikwaabw mudimw a bukajaady kiish ukusangej bwabiny kabiish bikaam kukooyel mu mikon?

² Misang yikwaabw bikukaakasakeenok bwiibuh kwiikal ni musangal mu mudimw a bukajaady bwaal wiiyumvumvw byeeb mushind oow eeny? Biby biikal naak, kukooyeloh bend mu mikon. Mushind uwiitaatal kuy mukumban udy mwa kuleej neey udy ni kwiihweekesh ni kwiish mukat kwiileej, uleeleej cikwaabw neey kwiish mukat kukokangan ni baat. Muut ning waakaabumw kiish mukat kukokangan ni baat nang-nang hadyey ukaam kwiibalongel bwaal bulengel. Taat iibuh a mu diiwul i mumanyik makab mawutwiitwiilangan naam ni i mukat kukwaakish dyambulwiish diwukaakaam. (Ye. 41:13) Mu ciin-bwaal  eecy, twiiyiiy kukontonon mibel yitaan ha mushind utudy mwa kulwiish meej ma nook, ni mutudy mwa kwiikal ni musangal mu mudimw a bukajaady.

IITAB BWA DIIY DYA MAWEJ DIKUKASHISH

3. I biny byambulwiishil muprofet Jeremih bwa kudiil baat bakwaabw musah?

³ Ha kal, musah a kudy Mawej ukashishil biin mudimw bindiy haakadyobw ni mudimw mukasakan a kulong. Twangat cileejel cya muprofet Jeremih. Waakady mweelakan haakady Yehow mumwaakish mudimw a kudiil baat musah. Jeremih uleebel neey: “Es nacidy mwaan mutofw bwa kwiikal kwiisamb mukacy mwa baat.” (Jer. 1:6) I biny bimwambulwiishil bwa kuhetey mucim mukasakan bwa kudiil baat musah? Uhetel bukash ku may maakady Mawej mumwambil. Uleebel neey: “Mu micim yaam kamwiish mushaal talal, mudy bu mooshooshek mudil ciish naman mwa kwiiyitalaj.” (Jer. 20:8, 9) Ning mwaakady Jeremih ni Teritwaar mukasakan, musah umwaakishilobw bwa kudiil baat umwaakishil bukash bwaakadyey ukaam bwa kukumbaj mudimw oow.

4. Bilondeshel Biin Kolos 1:9, 10, i biny biloolongek hatubaabal Diiy dya Mawej ni tulangiloh?

⁴ Biin Krist baheehetel bukash bukaakaamobw mu May ma Yehow mady mu Bibl. Haakady mupostol Pool ufundil biin mu cisumbw cya Kolos mukand, uleebel neey, kumanyik kujaalal kwiiyiiy kwambulwiish biin kwaabw bwa “kulong myand bu mudy lukat lwa Mawej [Yehow]” ni kutungunuk ni ‘kulong myand yilengel mu mudimw woos mulengel.’ (Bal Biin Kolos 1:9, 10.) Mu mudimw mulengel oow, mudy mudimw a kudiil baat musah mulengel. Nook, hatubaabal Diiy dya Mawej ni tulangiloh, diitabij diitut kudy Yehow dikaakasakan ni twiiyiiy tumvw bwabiny bidy ni buseeb bwa kudiil baat musah a Bukaleng.

5. I biny biwudy mwa kulong bwa kubal ni kwiilongel kwiibuh kwa Bibl kukwambulwiish?

⁵ Bwa Diiy dya Mawej kwiitwambulwiishedy, bikaam kulek kuy lubil-lubil hatubaabal, eecy hatuloolong ni hatulaalangiloh. Kuyoh bend lwang-lwang. Uw mubal verseh kuy mumumvw bilengel, kulong waamuhit. Ki udy mwa kukal mudimw ni Index des Publications de Watch Tower eecy ni Mukanda wa makebulula wa Bantemu ba Yehowa bwa kuhet dyumvwiij dya verseh aay. Uw wangat diib divul bwa kwiilongel, wiiyiiy kujaadik neey cileeleeb Bibl i cya biin-biin. (1 Tes. 5:21) Uw mujaadik bilengel menmen myand yiwudy mulong, wiiyiiy kwiikal ni musangal a kwiiyambil bakwaabw.

 IILONGOLOL BILENGEL BWA MUDIMW A BUKAJAADY

6. Bwabiny bikaam twiilongolol bilengel bwa mudimw a bukajaady?

⁶ Uw mwiilongolol bilengel bwa mudimw a bukajaady, wiiyiiy kwiiyumvw mwiilekelel bwa kwiisamb ni bakwaabw. Yeez wambulwiishil biiyij bindiy bwa kwiilongololobw bilengel kuuhal kwa kwiibatumey mu mudimw a bukajaady. (Luuk 10:​1-11) Bu mwaakadyobw bakooyel ku byaakady Yeez mwiibalongweesh, biiyij bumvwiil musangal iimwiin weeh bwa myand yaakadyobw mwa kuman bwa kulong.—Luuk 10:17.

7. I mushind kaay utudy mwa kwiilongolol bwa mudimw a bukajaady? (Tal cikwaabw cifwaatul.)

⁷ I mushind kaay utudy mwa kwiilongolol bwa mudimw a bukajaady? Bikaam tulangil ha bitukaakaam kuleeb ni twiibileeb mu mushind utudyaakal twiisamb koosook ni mu may miitut. Bidy cikwaabw ni buseeb bwa kulangiloh kuuhal kwa diib ha mishind yibidy eecy yisat yidyaakal biin mu Teritwaar iitut biitwaalabul ni mushind utudy mwa kwiibaalabul. Nook, hatwiisaasamb ni baat tudy mwa kuteet bwa kwiikal biilekelel, tumweemweetok, ni twiibangat bu balund neet.

8. I mu mushind kaay udy biin Krist bafwaanakan ni manying ma bulab mady mu cileejel cya mupostol Pool?

⁸ Mupostol Pool utwaadil cileejel cya mudimw utudy nend mu mudimw a kudiil baat musah haleebeley neey: “Tudy ni bihak eeby mu manying ma bulab.” (2 Kor. 4:7, NWT) Bihak eeby i bingany? I mudimw a kudiil baat musah a Bukaleng ukuukuuloh baat. (2 Kor. 4:1) Manying ma bulab i biny? Maleeleej biin mudimw ba Mawej badiidiil baat bakwaabw musah mulengel. Mu ciisang cya Pool, bangend-a-mushing baakady bangacil biit bya buseeb bu mudy byaakudy, maal ni makut mu manying. Bya mushind aakaabumw, Yehow i mwiitwaakish musah mulengel a buseeb wiitut kudiil baat. Ku dyambulwiish dya Yehow, tudy mwa kuhet bukash butukaakaam bwiitut kudiil baat musah ni lulamat.

SAMBIL BWA KUHET MUCIM MUKASAKAN

9. I mushind kaay utudy mwa kuman kuciin kwa baat? (Tal cikwaabw cifwaatul.)

⁹ Misang yikwaabw, tudy mwa kuciin baat. I mushind kaay utudy mwa kuman lutat oolw? Tukontononaay diisambil dyaakady bapostol balong haakadyobw biibalekesh bwa kudiil baat musah. Hamut a kuciinobw, balombel  Yehow bwa iibambulwiish ‘bwa kutungunukobw ni kwambil baat Diiy [dindiy] ni mucim mukasakan.’ Musang aakaabumw, Yehow waalabwiil diisambil dyaababw. (Yil. 4:18, 29, 31) Tut biikal misang yikwaabw tuciin baat, bikaam tusambil Yehow bwa iitwambulwiish. Lomb Yehow bwa akashish lukat luwudy naalw bwa baat. Nook, kwaakwiiyoh bend kumvw mooy bwa kwiibadiil musah mulengel.

10. Bilondeshel Yeshaay 43:10-12, i mushind kaay udy Yehow wiitwambulwiish bwa kukumbaj mudimw iitut a kujaadikil baat bakwaabw myand yimutaatal?

¹⁰ Yehow waakady mwiitunoonomw bwiitut kwiikal Baatemw bindiy, ni wiitulaalay bwa kwiitwambulwiish bwiitut kwiikal ni mucim mukasakan. (Bal Yeshaay 43:10-12.) Tukontononaay mishind yinaay yiloolongey nook. Bwaal bwa kuuhal, Yeez wiikaakal teng neet misang yoos yitudiidiil baat musah mulengel. (Mat. 28:18-20) Bwiibiidy, Yehow i musungul banjel bwa kwiitwambulwiishebw. (Yis. 14:6) Bwaal bwiisaat, Yehow wiitwaakaakish spirit indiy mujilang bwa kwiitwambulwiish bwa kuvuluk myand yitudy balong. (Jah 14:25, 26) Bwaal bwiinaay, Yehow i mwiitwaakish biin-kweet baan-balum ni baan-bakaj bwiitut kukal naab mudimw oow haakaabumw. Ku dyambulwiish dya Yehow ni dya biin-kweet bady biitukat, tudy ni byoos bitukaakaam bwiitut kutungunuk ni kudiil baat musah.

MANYIK BIKAAKAAM BAAT NI IIKAL UTAL MYAND MU MUSHIND MULENGEL

11. I mushind kaay uwudy mwa kuhet baat bavul hawudy mu mudimw a kudiil baat musah? (Tal cikwaabw cifwaatul.)

¹¹ Wiiyumvumvok mukooyel mu mikon hawusaasangan teng baat bakeeh ku bibel byaababw eeny? Bwabiny kwiish mwa kwiiyihanguj neey: ‘Baat ba mu Teritwaar a mim i bay kweeh diib eedy?’ (Yil. 16:13) ‘I bay ku mudimw eecy i bay mu cisal?’ Biby biikal naak, udy mwa kuhetok baat bavul hawuloolong mudimw a bukajaady mu njil eeny? Mwiin-kweet mukwaabw dindiy Joshua uleeleeb neey: “Nahetel mishind ya kudiil baat musah hanahiihicil mu cisal ni byaab bidy mashiny miimanakan.” Yiy ni mukaj indiy Bridget, i bahet baat bavul ku bibel byaababw hadyobw biibakumbul ku maakawul ni mu dyaaluming mu meeb ma habwiih ni ku maakawul.—Ef. 5:15, 16.

12. I mushind kaay utudy mwa kumanyik myand yidy baat biitabij ni yidy yiibatond?

 ¹² Uw mutal neey baat kabiish batum meej bikasakan ku musah uwiibadiidiil, kaam bwa kumanyik myand yidyobw biitabij ni yidy yiibatond. Joshua ni Bridget bakaakal mudimw ni diijooj didy hamut Trakt hadyobw batwaadij kwiisamb ni baat. Cileejel, hadyobw bakal mudimw ni Trakt wa neey I mushind kaay uwudyaakal utal Bibl? Baleeleeb neey: “Baat bakwaabw bataatal Bibl bu mukand a Mawej ki bakwaabw naabw baleelek. Ki uw ulaalang bicy?” Kulong nook, kwambambulwiish bua kutang mwiisamb.

13. Bilondeshel Tusumw 27:11, i mushind kaay utudy mwa kwiikal ni musangal mu mudimw iitut a bukajaady ning baat kabay biitukun mat?

¹³ Musangal iitut bwa mudimw a bukajaady kiish mwiimanyin teng ha bihet bituheehet. Bwabingany? Bwaal tuloolong cidy Yehow ni mwaan indiy bakaam bwiitut kulong—bwa kudiil baat musah. (Yil. 10:42) Ning tut katuy bahet baat ba kwiisamb naab eecy baat kabay biitukun mat, tudy ni musangal bwaal tusaasangej Taat iitut a mu diiwul.—Bal Tusumw 27:11.

14. Bwabiny tudy mwa kwiikal ni musangal hady kajaady mukwaabw uhet muut a kulongweesh Bibl mu Teritwaar?

¹⁴ Cikwaabw, tudy mwa kusangal hady kajaady mukwaabw uhet muut udy mukat myand ya biin-biin mu Teritwaar. Cibumb cya Muteetekel cifwanyikijil mudimw iitut ni kuy kakaam mwaan mujimban. Baat bavul bayaay kakaam mwaan oow, bay ook ni ook. Hadyobw bahet mwaan kiish teng muut—udy mumuhet usaasangal—ki i baat boos. Bya mushind aakaabumw, baat boos ba mu cisumbw bambambulwiish baat bwa bashaal biiyij bahyaabahy ba Krist. Bikaam tut boos biin mu cisumbw twambulwiish bwa kudiil baat ba mu Teriwaar woos musah, ni boos basaasangal hady muut muhyaamuhy utang kutweel mu bisangil.

IIMANYIN HA LUKAT LUWUDY NAALW BWA YEHOW NI BWA MUUT NEEB

15. I mushind kaay udy kukooyel ku may mady mu Matewus 22:37-39 kwiitwambulwiish bwa kwiikal ni musangal muvul mu mudimw a bukajaady? (Tal cikwaabw ha cizubw.)

¹⁵ Tudy mwa kuvudij mudimw iitut a kudiil baat musah, tut biimanyin ha lukat lutudy naalw bwa Yehow ni bwa muut neet. (Bal Matewus 22:37-39.) Lang ket bwa mudy Yehow umvw musangal hadyey wiitutal tulong mudimw oow ni bwa musangal wiikal nend baat hadyobw batang kulong Bibl! Lang cikwaabw  bwa mwiikalobw mwa kukuuloh boos bakuukun mat ku musah iitut.—Jah 6:40; 1 Tim. 4:16.

16. I mushind kaay utudy mwa kuhet musangal mu mudimw a bukajaady tut katuy ni mushind a kuy katal baat ku bibel byaababw? Twaal bileejel.

¹⁶ Kwiish ni mushind a kwaaluk ku cibel kwiibuh bwa tubingil kaahand eeny? Biby biikal naak, tum meej miibuh ku biwudy mwa kulong bwa kuleej muwudy mukat Yehow ni muut neeb. Mu cihuh cya COVID-19, Samuel ni Dania kabaakadyoh bend ni mushind a kuhatuk ku cibel kwaababw. Mu ciisang cikasakan aacy, baakady ni ciibidil cya kudiil baat musah ku Telefon, kwiibafundil mikand ni kulombol malong ma Bibl ku Zum. Samuel waakady udiil baat baakadyey uhetangan naabw ku hopital musah haakadyobw bamondah lubeel lwa Kanseer. Uleeleeb neey: “Makab miitukookooyesh mu lungeny, ku nyeet ni mu spirit. Bikaam tuhetel musangal mu mudimw utukaakadil Yehow.” Mu ciisang cikasakan aacy, Dania ubeelel kay ni mushind a kujuuk mu bulaal mukacy mwa suuny yisat. Cikwaabw, waakady ki wendel mu kakal ka balemen mukacy mwa suuny yisambombw. Uleeleeb neey: “Naakady niikashishomw bwa kulong myand yoos yinaakady mwa kulong bilondeshel shikacil a mim. Naakady ni mushind a kudiil mungang waakady wiiy uutaal musah ni naakady niisamb ni boos baakady biiy baayaakish biit ku cibel. Cikwaabw naakady niisamb bilengel ku Telefon ni maam waakady ukal mudimw ku hopital.” Ning mwaakady Samuel ni Dania kabay ni mushind a kulong myand bu mwaakadyobw biiyilong kuuhal, balongel cyoos cyaakadyobw bakumban bwa kulong ni bahetel musangal.

17. I mushind kaay udy myand yitudy balong mu ciin-bwaal eecy mwa kukwambulwiish bikasakan?

¹⁷ Myand yitaan yitubaatal mu ciin-bwal eecy, yiitwambambulwiish teng tut biiyikooyel yoos. Bwaal boos budy bu ciit cikaakalobw naacy mudimw bwa kwiihik cyaakudy kaahand. Hadyobw basambakaj ciit cyoos ciihiihikobw naacy cyaakudy eecy, biiyiiy bahatul cyaakudy cisheem menmen. Tut bakooyel myand yoos eey, twiiyiiy kwiikal biihang bilengel bwa kuful meej ma kwiital bu katuy bakumban ni twiiyiiy tuhet musangal muvul mu mudimw a bukajaady.