1. Aweyi ateleki akaka bemonanga muna salu kia umbangi? (Tala mpe foto.)

 WAU vo tu nkangu a Yave, tusilanga umbangi kwa akaka kadi tuzolanga Se dieto dia zulu ye tuzolele sadisa akaka banzaya. Ateleki ayingi beyangalelanga e salu kia samuna e nsangu zambote. Kansi, akaka bemonanga vo diampasi mu yangalela e salu kiaki. Ekuma? Akaka akwa nsoni ye ke bekuyibundanga vuvu ko. Vo i akaka ke bezolanga kwenda mu nzo zangani ko. Akaka wonga bemonanga wa levolwa muna salu kia umbangi. Akaka balongwa vo ke bafwete vanga diambu ko dilenda twasa e ntantani. Kana una vo bezolanga Yave, diampasi dikalanga kwa mpangi zazi mu samuna e nsangu zambote kwa wantu ke bazeye ko. Kansi wau vo bazeye o mfunu wa salu kiaki, besamunanga e nsangu zambote lumbu ke lumbu. Kieleka, Yave otoma yangalelanga mpangi zazi.

2. Avo diampasi dikalanga kwa ngeye mu kala ye kiese muna salu kia umbangi, ekuma kufwete yoyela ko?

² Mu kuma kia mambu mama, nga ezak’e ntangwa diampasi mpe dikalanga kwa ngeye mu kala ye kiese muna salu kia umbangi? Avo i wau, kuyoyi ko. Olembi kuyibunda e vuvu kiasaka disonganga vo u nlembami ye kuzolele tunta sungididi kwa ngeye kibeni ko ngatu tantana yo wantu. Ke vena muntu ko ozolanga mengwa, musungula vava kesianga e ngolo za vanga o wete kwa akaka. Se diaku dia zulu otomene zaya e mpasi zaku, una omonanga ye ozolele kusadisa. (Yes. 41:13)  Mu longi diadi tulongoka mambu tanu malenda kutusadisa mu zizidila ngindu zazi yo kala ye kiese muna salu kia umbangi.

YAMBULA E DIAMBU DIA NZAMBI DIAKUMIKA

3. Nki kiasadisa Yeremiya wa ngunza mu sila umbangi kwa akaka?

³ Tuka kuna nz’ankulu, e nsangu zitukanga kwa Nzambi zikumikanga selo yandi vava bevewanga kiyekwa kiampasi muna lungisa. Kasikil’owu, badika e nona kia Yeremiya wa ngunza. Vava Yave kamvana e kiyekwa kia sila umbangi, Yeremiya wamona wonga. Wavova vo: “Kizeye vova ko, kadi i nleke kwame.” (Yer. 1:6) Nki kiansadisa mu kala ye unkabu? Wavua o nkuma muna diambu kavoveswa kwa Nzambi. Yeremiya wavova vo: “E diambu diaku dikitukidi nze tiya twanyuyi tuzikamene muna visi yame, ngioyele wau nswekele dio.” (Yer. 20:8, 9) Kana una vo Yeremiya mu zunga kiampasi kasadila, e nsangu katumwa mu samuna, zamvana o nkuma kavuanga o mfunu muna lungisa e salu kiaki.

4. Nkia diambu divangamanga vava tutanganga yo badika e Diambu dia Nzambi? (Kolosai 1:9, 10)

⁴ Akristu bevuanga o nkuma muna nsangu zina muna Bibila. Vava kasonekena e nkutakani a Kolosai, Paulu wa ntumwa wavova vo o vua zayi waludi diadi fila mpangi zandi mu ‘kangalela muna mpila ifwene kuna kwa Yave’ yo kwamanana “yima e mbongo muna mavangu mawonso mambote.” (Tanga Kolosai 1:9, 10.) Mavangu mama mambote, i salu kia samuna e nsangu zambote. Muna kuma kiaki, vava tutanganga e Diambu dia Nzambi yo badika muna mana tutanganga, o lukwikilu lweto muna Yave lukumamanga ye tubakulanga o mfunu wa samuna e nsangu zambote za Kintinu.

5. Aweyi tulenda vuila e nluta vava tutanganga yo longoka e Bibila?

⁵ Muna vua e nluta muna mana tutanganga muna Diambu dia Nzambi, tufwete venga e fu kia tanga, longoka yo badika mu nzaki. Vaula ntangwa yafwana. Avo tangidi e sono kina kutomene bakula ko, kuvioki ko. Sadila Índice das Publicações da Torre de Vigia yovo Nkanda wa Vavulwila wa Mbangi za Yave muna solola e nsansa yambote ya tini kiokio. Avo otomene sadila e ntangwa ekolo olongokanga, e vuvu kiaku muna ludi kia Diambu dia Nzambi kikumama. (1 Tes. 5:21) Avo una kikilu ye ziku mu mana olongokanga, okala mpe ye kiese kiayingi muna zayisa mo kwa akaka.

 TOMA KUBAMA MU KUMA KIA SALU KIA UMBANGI

6. Ekuma tufwete toma kubamenanga vitila twenda muna salu kia umbangi?

⁶ Avo otomene kubama vitila wenda muna salu kia umbangi, okala wavuvama vava omokena yo wantu. Yesu wasadisa alongoki andi mu teka kubama vitila kabatuma muna salu kia umbangi. (Luka 10:1-11) Wau vo basadila mana Yesu kabalonga, alongoki bakala ye kiese muna mana balenda lungisa.—Luka 10:17.

7. Aweyi tufwete kubamena vitila twenda muna salu kia umbangi? (Tala mpe foto.)

⁷ Aweyi tufwete kubamena vitila twenda muna salu kia umbangi? Diambote mu teka yindula mana tuvova yo vovela mo mu mvovo mia yeto kibeni. Diambote mpe mu yindula una wantu mu zunga kieto balenda badikila e nsangu zeto yo zaya una tulenda vanina e mvutu muna konso diambu. I bosi, vava tufinama muntu tulenda kala twavuvama, seva yo songa ngemba.

8. Mu nkia mpila Akristu benena se yinzu yatûma ina Paulu wa ntumwa kayika?

⁸ Paulu wa ntumwa wayika e nona isonganga e mbebe eto muna salu kia samuna e nsangu zambote vava kavova vo: “Oyeto tuna yo lusalu lwalu muna yinzu yatûma.” (2 Kor. 4:7) Nki i lusalu lwalu? I salu kia samuna e nsangu za Kintinu kivuluzanga e mioyo mia wantu. (2 Kor. 4:1) Nki i yinzu yatûma? E yinzu yatûma, i selo ya Nzambi ana besamunanga e nsangu zambote kwa akaka. Muna lumbu ya Paulu, akiti mvungu miatûma basadilanga muna natina lekwa yamfunu nze madia, vinyu ye nzimbu. Diau dimosi mpe, Yave watuvana e kiyekwa kia samuna e nsangu zambote. Muna lusadisu lwa Yave, tulenda vua nkuma tuvuidi o mfunu muna samuna e nsangu zambote una ufwene.

LOMBANGA UNKABU MUNA SAMBU

9. Aweyi tulenda sundila wonga wa siwa kitantu yovo bembolwa kwa wantu? (Tala mpe foto.)

⁹ Ezak’e ntangwa, tulenda mona wonga wa siwa kitantu yovo bembolwa kwa wantu. Aweyi tulenda sundila wonga wau? Badika e sambu kia antumwa vava bakanikinua vo bayambula samuna e nsangu zambote. Vana fulu kia mona wonga, balomba lusadisu lwa  Yave kimana ‘bazindalala vovela diambu diandi kuna unkabu wawonso.’ Yave wavana e mvutu za sambu kiau vana vau. (Mav. 4:18, 29, 31) Avo ezak’e ntangwa wonga wa wantu tumonanga, tufwete mpe lomba lusadisu lwa Yave muna sambu. Lomba kwa Yave kawokesa o zola kwaku kuna kwa wantu kimana walembi kala yo wonga wa kubasamunuina e nsangu zambote.

10. Aweyi Yave kekutusadisilanga mu kala se Mbangi zandi? (Yesaya 43:10-12)

¹⁰ Yave okutusolanga twakala Mbangi zandi ye osianga nsilu vo okutusadisa mu kala yo unkabu. (Tanga Yesaya 43:10-12.) Tala mpila yá kekutusadisilanga. Yantete, Yesu okalanga yeto konso ntangwa tusamunanga e nsangu zambote. (Mat. 28:18-20) Yazole, Yave otumanga mbasi zandi muna kutusadisa. (Lus. 14:6) Yatatu, Yave okutuvananga mwand’andi avelela muna kutusungamesa mana tulongokanga. (Yoa. 14:25, 26) Yanyá, Yave watuvana mpangi kimana twasalanga yau entwadi. Muna lusadisu lwa Yave ye lwa mpangi zeto, tukalanga ye unkabu yo kwamanana samuna e nsangu zambote.

KALA YE NGINDU ZASIKILA YO VANGA E NSOBANI

11. Aweyi olenda wananena yo wantu ayingi muna salu kia umbangi? (Tala mpe foto.)

¹¹ Nga oyoyanga kele vo kuwananene yo wantu ayingi ko muna nzo zau? Ekuma olembi kukiyuvulwila: ‘Mu ntangwa yayi, o wantu mu zunga kiame akweyi betoma kalanga?’ (Mav. 16:13) ‘Nga ku salu yovo ku zandu bekalanga? Avo i wau, nga olenda sila umbangi muna mabala-bala? Mpangi mosi una ye nkumbu Joshua wavova vo: “Iyangalelanga sila umbangi muna mazandu ye fulu ibakilwanga makalu.” Yandi yo nkaz’andi Bridget, besololanga wantu ayingi muna nzo zau vava besilanga umbangi muna fuku musungula kina kia lumingu muna nkokela.—Efe. 5:15, 16.

12. Aweyi tulenda zayila mana bekwikilanga o wantu yovo mana mekubatokanesanga?

¹² Avo wantu ke besonganga luzolo lwambote ko muna nsangu zambote, vava zaya mana bekwikilanga yovo mana mekubatokanesanga. Mpangi Joshua yo Bridget muna yantika mokena yo wantu besadilanga e kiuvu kina muna tratados zeto. Kasikil’owu, vava  besadilanga e tratado, Aweyi obadikilanga e Bibila? Bevovanga vo: “Akaka bebadikilanga e Bibila vo i nkanda watuka kwa Nzambi, kansi akaka ke bekwikilanga dio ko. Ongeye azeyi i ngindu zaku?” Nkumbu miayingi e ndekwa zazi zifilanga wantu mu kwamanana mokena yeto.

13. E kuma tulenda vovela vo tulungisanga e kani dieto muna salu kia umbangi kana nkutu vo wantu ke batuwidi ko? (Ngana 27:11)

¹³ Kana nkutu vo wantu ke batuwidi ko muna salu kia umbangi, tulungisanga e kani dieto. Ekuma? Kadi e kani dieto i vanga dina Yave yo Yesu bazolele vo twavanga, i sia vo, sila wantu umbangi. (Mav. 10:42) Kana nkutu vo ke tumokene yo muntu ko yovo wantu babembwele e nsangu zeto, tulenda kala ye kiese kadi tuzeye wo vo tuyangidikidi Se dieto dia zulu.—Tanga Ngana 27:11.

14. Ekuma tufwete kadilanga ye kiese avo mpangi eto osolwele muntu osongele luzolo lwambote muna zunga?

¹⁴ Tulenda mpe kala ye kiese avo mpangi eto osolwele muntu osongele luzolo lwambote muna zunga. Eyingidilu diatezanesa e salu kieto ye salu kia vava mwana ovididi. Ndonga bekuyivananga muna vava mwana ovididi ye bemwangananga muna zunga yawonso. Avo mwana osolokele, ke ndiona kaka ko unsolwele omonanga kiese, kansi yau awonso bemonanga kiese. Diau dimosi mpe, e salu kia kitula wantu se alongoki i salu kia ndonga. Yeto awonso tusilanga umbangi muna zunga kiawonso ye tuyangalelanga avo muntu mosi oyantikidi lungana yeto muna tukutakanu.

SIAMISA O ZOLA KWAKU MUNA YAVE YO WANTU

15. Aweyi tulenda wokesela e kiese kieto muna salu kia umbangi? (Matai 22:37-39) (Tala mpe foto dia fukwa.)

¹⁵ Tulenda wokesa e kiese kieto muna salu kia umbangi muna sungamenanga vo e salu kia umbangi kikutuvananga e lau dia songa o zola kweto muna Yave yo wantu. (Tanga Matai 22:37-39.) Ekwe e kiese kekalanga kiau o Yave vava kekutumonanga muna salu kia umbangi! O wantu mpe kiese kiayingi bekala kiau avo bayantikidi longoka e Bibila. Sungamena mpe vo awana betambulwilanga e nsangu tusamunanga yo baka e nzengo za sadila Yave, balenda zinga yakwele mvu.—Yoa. 6:40; 1 Tim. 4:16.

16. Aweyi tulenda kadila ye kiese muna salu kia umbangi kele vo ke tuvaikanga mu nzo ko? Yika e nona.

 ¹⁶ Nga kulendanga vaika mu nzo ko mu kuma kia kimbevo? Avo i wau, vanga mana olenda muna siamisa o zola kwaku muna Yave yo wantu. Muna kolo kia vuku kia COVID-19, mpangi Samuel yo nkaz’andi Dania ke bavaikanga mu nzo au ko. Muna kolo kiakina kiampasi, basilanga umbangi muna telefone, muna nkanda ye balonganga Bibila kwa wantu muna Zoom. Mpangi Samuel wasilanga umbangi kwa wantu ana kawanananga yau kuna lupitalu vava kawukisanga kimbevo kia câncer. Wavova vo: “Muna ntangw’ampasi, tulenda bakama ntelamw’a moyo, yoya ye lukwikilu lweto lulenda tontwa. Kansi, tulenda solola kiese muna salu kia Yave.” Muna kolo kiokio, mpangi Dania wayela ye kalendanga katuka va mfulu ko mu ngonde tatu. Diavava nkutu vo kakangalela mu kalu dia makoka mu ngonde sambanu. Wavova vo: “Yasianga e sungididi kia vanga mana yalendanga. Yasilanga umbangi kwa mfelemi ona watukingulanga ye awana batutwasilanga e lekwa muna nzo. Yamokenanga mpe muna telefone yo nsadi a nzo ya tekela nlongo.” E mpasi bawanana zau mpangi Samuel yo Dania zakulula e salu kiau, kansi basianga e sungididi kia vanga mana balendanga ye ediadi kiese kiayingi diabatwasila.

17. Aweyi olenda vuila nluta muna ndekwa ziyikilu mu longi diadi?

¹⁷ E ndekwa ziyikilu mu longi diadi avo zitomene sadilwa zilenda twasa e nluta. E ndekwa zazi zina nze mungwa, ndungu, niaza, lunsangu ye lekwa yankaka ikudikilanga o ntomo muna madia. Avo lekwa yayi yawonso isilu muna madia, ntomo kikilu omona. Avo tusadidi ndekwa zazi zawonso, tulenda sunda e ngindu zambi ye tusolola kiese kiayingi muna salu kia umbangi.