1. Kodi athu amo-iwa kanavwa avi kaganizela vyolaleela uthenga wapama? (Onani teto ithuzithuzi.)

 MONGA athu a Yehova, ninolaleela chifukwa ninomukonda Babi-u waudimu ndipo ninofuna atandiza afwi-u ira kamuiziwe Mulungu. Ofalisa anjinji kanoomeliwa chito yolaleela. Koma amo-iwa katinasangalala ka-indanga chito inela. Chifukwa n’ni? Amo-iwa kanonyaswa koma teto kanovikaikela. Amo-iwa teto vinowarucha dowa m’manyumba mwa athu ka-anaitaniwe. Amo-iwa kanoova ira athu katinaawachela ndipo amo-i teto kanoova ira vyevyo kanaongeathu vinokoza kumudwi-a afwiwa. Ngakale ira abali na arongolala kanomukonda vinjinji Yehova, vinowarucha ambeela onga na athu vya uthenga wapama. Komave, aliwa thawi detene kano-indana chitwela chifukwa kanoiziwa ira chiyofuneya vinjinji. Yehova unosangalala vinjinji na vyevi.

2. Ngati kamunasangalala na chito yolaleela, chifukwa n’ni kamunafuneya fooka?

² Kodi nyo teto thawi dimo-i kamunasangalala na chito yolaleela? Ngati chi eno, kamutatile murima. Ngati munavikaikela, unoyo nguumboni oyi muli ovievi-a ndipo kamunafuna ira athu kaganizelenga vinjinji vya nyo koma teto kamunafuna kangana na athu. Ndipo kavili unoyo unafuna kumudwi-a amo-iwa makamaka vevo unaesaesa liye panga vyapama. Babinyu waudimu unoiziwa pama mavuto anayo munagumanananyo ndipo unofunechecha utandizani. (Yes. 41:13) Mukhanila ninoona vyongo 5 vyevyo vinautandizeni ira mumali-e mantha koma teto vyevyo munapangenyo ira musangalalenga muutumiki.

 MULOLENGA IRA MAWU A MULUNGU KAULIMBIKISENGANI

3. Chin’ni yamutandizile Mneneri Yeremiya ira alaleelenga?

³ Ambeela wale, Mawu a Mulungu kookala kalimbikisanga atumikae ira kawande inda chito dorucha. Isazo vakhanila ngu Mneneri Yeremiya. Liye ookaana mantha Mulungu angamurumile ira adowe alaleele. Yeremiya aongile ira: “Miyo kandinanda onga chifukwa ndili mwana.” (Yer. 1:6) Ndiye kodi liye apangile n’ni ira a-iye vikaikela? Oofwanya kopolo kumela m’Mawu a Mulungu. Liye aongile ira: “Mawae kali ngati mulo unoyo uli m’makuvani mwanga, ndipo ndoogoma noviruni-a ira kandiwonge.” (Yer. 20:8, 9) Ngakale ira Yeremiya oolaleela mugawo lorucha, uthenga unoyo alaleela liye woomuva-a kopolo doi a-inde chito inela.

4. Kodi chin’ni inaireya nawelenganga Mawu a Mulungu koma teto aganizela modii-a? (Akolose 1:9, 10)

⁴ Akiristu kanofwanya kopolo kumela m’Mawu a Mulungu. Mukalata ineyo mtumwi Paulo alembele liye Akiristu awu Kolose, aongile ira: ‘iziwa vyongo molondola unokoza limbikisa abalayayo ira kakale na ikalelo yogwilizana na vyevyo Yehova unafuna liye’ koma teto ira ‘kapitilize bala vipaso vachito iliyetene yapama.’ (Welengani Akolose 1:9, 10.) Chito yapama inela inotangani-avo laleela uthenga wapama. Eno nawelenganga Mawu a Mulungu koma teto aganizela modii-a ninowambeela muroromela vinjinji Yehova koma teto ninowambeela ona ira awandela amo-iwa uthenga wapama kofuneya vinjinji.

5. Kodi ninapange avi ira nipindulenga vinjinji nawelenganga koma teto funjeda Baibulo?

⁵ Ira nipindulenga vinjinji na Mawu a Mulungu, ninafuneya afunjeda, pewa welenga motamanga koma teto ganizela vyevyo ninawelenga iyo. Niviva-enga thawi yokwakwanela. Nafwanya lemba loi kaninalivwechecha kanikedenga li-iya. M’malomwiwa ni-indi-edenga chito Watch Tower Publications Index kapena Buku la Mboni da Yehova Lofufuzela Khani ira niiziwe mwemo kalifotokozeleathu lembalo. Nakalanga na thawi yokwakwanela vofunjeda, ninoza niambeele roromela vinjinji ira Mawu a Mulungu mbolondola. (1 Ates. 5:21) Ndipo naaroromelanga vinjinji pavevo teto ninasangalala iyo awandela athu amo-iwa vyevyo nifunjedile iyo.

 MUKOZEELENGA PAMA UTUMIKI

6. Chifukwa n’ni ninafuneya kozeela pama vyevyo ninaonge iyo volaleela?

⁶ Nakozeela pama utumiki vinakala vyo-orucha ira nionge na athu. Yesu oowatandiza ofunjedae ira kakozeelenga a-anaarume ira kadowe kalaleele. (Luka 10:1-11) Voi koo-indi-eda chito vyevyo Yesu aafunji-ile liye, ofunjedayo koosangalala vinjinji chifukwa ya vyevyo kakwakwani-ileathu panga.​ — Luka 10:17.

7. Kodi ninakozeele avi vyevyo ninaonge iyo muutumiki? (Onani teto ithuzithuzi.)

⁷ Kodi ninakozeele avi utumiki? Ninafuneya ganizela mwemo ninafotokozele iyo makundo a choonadi mo-inda murima m’mawu ewuewu. Ninopanga pama teto ganizela vyongo viili kapena taaru vyevyo athu a mugawo li-u kanaomeliwanaathu onga ira nikozeele mwemo ninaasomedele iyo. Ndiye naonganga na athu murimi-u unokala m’malo, ninokoza onganga niteyanga koma teto kala omasuwa.

8. Kodi Akiristu kanafwanafwana avi na viwiya vya teya vyevyo Paulo aviromolile liye?

⁸ Mtumwi Paulo oofotokoza vya udindwi-u va chito yolaleela, vevo aongile liye ira: “Nikaana chuma inela muviwiya vya teya.” (2 Akor. 4:7) Kodi chuma inela chin’ni? Chi chito yolaleela vya Umwene ineyo ili yovulumucha miyoyo. (2 Akor. 4:1) Nanga viwiya vya teya chin’ni? Vinaimelela atumiki a Mulungu anayo kanawandela amo-iwa uthenga wapama. Muthawi ya Paulo, athu oguli-a vyongo koo-indi-eda chito misuwo da teya votukula vyongo vyofuneya monga yodja, vinyu koma teto ndalama. Mofwanafwana na vyevi, Yehova univa-a uthenga wapama unoyo uli wantengo wavadimu. Motandiziwa na Yehova, ninokoza fwanya kopolo dedo ninafuneya iyo ira nipitilize laleela uthenga wapama mororomeleya.

NIPEMPELENGA WA YEHOVA IRA NIKALE OLIMBA MURIMA

9. Kodi ninapange avi ira kaniovenga athu kapena teto ova ira katinavuruwana uthengi-u? (Onani teto ithuzithuzi.)

⁹ Thawi dimo-i ninokoza ovanga athu koma teto ova ira kanokoonda uthengi-u. Kodi ninalimbane avi na vuto leli? Kaganizelani pempelo lelo atumwi kapelekileathu kangalamuliwe ira ka-iye laleela. M’malo  moova koma teto iya, aliwa koomuvepa Yehova ira aatandize ira ‘kapitilize onga mawaye molimba murima.’ Yehova oosomeda pempelo liwa thawi ineyo. (Vyo. 4:18, 29, 31) Na-iyene thawi dimo-i naambeela ova athu, ninafuneya pempelanga wa Yehova ira anitandize. Mumuvepenga ira autandizeni ira muwakondenga vinjinji athu ira kamuovenga awandela uthenga wapama.

10. Kodi Yehova unanitandiza avi kwakwaneli-eda udindwi-u monga Mboni dae? (Yesaya 43:10-12)

¹⁰ Yehova unisakula ira nikale Mboni dae ndipo unilonjeza ira unerenga nitandiza ira nikale olimba murima. (Welengani Yesaya 43:10-12.) Tiyemoni nione ndila 4 da mwemo unanitandizela liye. Yowambeela, Yesu unokalecha na iyo nalaleelanga uthenga wapama. (Mat. 28:18-20) Yanambili, Yehova uruma angelo ira kanitandizenga. (Chiv. 14:6) Yanaralu, Yehova univa-a zimu owela unoyo unanitandiza umbuwela vyevyo nafunjedile iyo. (Yoh. 14:25, 26) Ya 4, Yehova univa-a abali na arongola anayo ninadowana iyo muutumiki. Motandiziwa na abali na arongoli-u, nikaana iliyetene ineyo inanitandize inda chito inela.

MUKALENGA NA MAGANIZO OFWANELELA KOMA TETO MUKALENGA OKOZEYA CHENJA

11. Kodi ninapange avi ira nifwanyenga athu anjinji muutumiki? (Onani teto ithuzithuzi.)

¹¹ Kodi munofooka akala ira kamunafwanya athu m’mavande? Ngati chi eno, muvifukenga ira: ‘Kodi panopa athu mwina kali waani?’ (Vyo. 16:13) ‘Kodi kali uchito kapena wogula vyongo?’ Vyera eno, mwina munokoza fwanya athu volaleela musewu. M’bali m’mo-iwa zina lae Joshua aongile ira, “Ndinofwanya mwayi wolaleela ndaendanga m’mashopu koma teto m’malo oimecha magalimoto.” Liye na iyanae Bridget, kanofwanya teto athu anjinji m’manyumba mwiwa kavolowa muutumiki chigawo yaumazulo koma teto Lamulungu mutana.​ — Aife. 5:15, 16.

12. Kodi ninaiziwe avi vyevyo athu kanaroromelaathu koma teto vyevyo vinaapangi-a ira kakaena nkhawa?

¹² Ngati athu katinapanga chidwi na uthengi-u, muesaesenga ganizela vyevyo kanaroromelaathu kapena teto vyevyo vinapangi-a ira kakaena nkhawa. Joshua na  Bridget kanoomeliwa indi-eda chito fuso lelo linakala vatakuru lowambeela la ipepala ineyo kanagawelaathu. Mwaisazo, kagawelanga ipepala yoi Kodi Baibulo Munoliroromela? Aliwa kanaongecha ira: “Athu amo-iwa kanaona ira Baibulo ti buku lokumela wa Mulungu koma amo-iwa katinaona eno. Nyo maganizwinyu mboi avi?” Vyevi vinopangi-a ira kaambeele kambilana.

13. Chifukwa n’ni ninafuneya sangalalangave ngakale athu kakoonde vuruwana uthengi-u? (Miyambo 27:11)

¹³ Athu kavuruwana uthengi-u kaninaonge ira vyongo viniendela pama muutumiki. Chifukwa n’ni ninaonga eno? Ninaonga eno chifukwa ninakalecha ningapangile vyevyo Yehova koma teto Mwanae kanafunaathu ira nipangenga, vyevyo vili pangela umboni. (Vyo. 10:42) Ngakale kanifwanye athu oyi nialaleele kapena kalivo unoyo uvuruwanile uthengi-u, ninokalave osangalala chifukwa ninoiziwa ira nimusangalasa Babi-u waudimu.​— Welengani Miyambo 27:11.

14. Chifukwa n’ni ninasangalala ofalisa m’mo-i afwanya muthu wachidwi muutumiki?

¹⁴ Ninosangalala teto ofalisa m’mo-i afwanya muthu wachidwi muutumiki. Sanja ya Olonda imo-iwa yooerekezela chitwi-u yolaleela nosaela mwana unoyo udimeelile. Athu anjinji kanokoza indana chito yomusaela m’malo o-iyana-iyana. Mwanoyo afwanyeya, m’malo moi muthu unoyo umufwanyileyo akale osangalala ekave athu etene anayo kanokalecha osangalala. Mofwanafwana na vyevi, chito yolaleela ninai-inda ngati gulu. Uliwetene mupingo uno-indana chito yosaela athu ndipo uliwetene unosangalala muthu m’mo-i aambeela sonkana.

MUMUKONDENGA VINJINJI YEHOVA KOMA TETO AFWINYU

15. Kodi lemba la Mateyu 22:37-​39, linanitandize avi ira niikondenga vinjinji chito yolaleela? (Onani teto yavatakuru lowambeela.)

¹⁵ Mukonda Yehova koma teto afwi-u unonipangi-a ira nikondenga vinjinji chito yolaleela. (Welengani Mateyu 22:37-39.) Kaganizelani mwemo Yehova unasangalalela liye aniona ni-indanga chitwela koma teto mwemo athu kanasangalalelaathu kaambeela funjeda Baibulo. Muumbuwelenga teto ira athu anayo kanavuruwana uthengola nowambeela tumikela Yehova, kanoza kavulumuwe.​ — Yoh. 6:40; 1 Tim. 4:16.

16. Kodi ninapange avi ira nisangalalenga na utumiki-u ngakale kaninavenyavo vande? Pelekani isazo.

 ¹⁶ Kodi kamunawande venyavo vande va vifukwa vimo-i? Ngati chi eno, ganizelani vyevyo munapangenyo ira mutonyi-ede ira munomukonda Yehova koma teto athu. Va thawi ya mulili wa COVID-19, Samuel na Dania katavenyavo vande. Va thawi yorucha yetene inela, aliwa koolaleela vo-indi-eda chito foni, makalata koma teto koopangi-a maphuzilo a Baibulo va Zoom. Samuel oolaleela teto athu anayo agumanana liye adowa uchipatala wewo awachela liye mirombwe da khansa. Liye aongile ira: “Mavuto kanopangi-a ira nikaena nkhawa, nigomenga koma teto iroromelo yi-u ifooke. Eno ninafuneya esaesa ira nisangalalenga votumikela Yehova.” Vevo vyevi vyaireyaathu, Dania oogwa ndipo ookala angali ogonati wa medi taaru. Vanduli va medi 6 liye aenda va njinga ya athu orangala. Liye aongile ira: “Ndooesaesa panga vyetene vyevyo ndawande miyo. Ndoolaleela wa dokotala unoyo anditandiza koma teto athu o-iyana-iyana anayo kazana vyongo wani-u. Ndoolaleela teto va foni wa muzimai m’mo-iwa unoyo a-inda chito dachipatala.” Ngakale ira Samuel na Dania katawanda panga vinjinji ngati wale, kooesaesa panga vyevyo kawandeathu ndipo koosangalala.

17. Kodi ninapange avi ira nipindulenga vinjinji na makundo anayo nikambilanile iyo mukhanila?

¹⁷ Munopanga pama indi-eda chito makundo 5 etene anala anayo nikambilanile iyo mukhanila. Likundo lililetene lili ngati vyongo vyevyo nina-indi-eda iyo chito ira niphiye yodja. Vyetene vyatangani-iwa pama ninophiya yodja yooma vinjinji. Eno na-indi-edanga chito makundo etene anala, ninoza niwande limbana na mavuto ofooki-a nosangalalanga na chito yolaleela.