ບົດຄວາມສຶກສາທີ 16
ເພງທີ 64 ຮ່ວມເຮັດວຽກເກັບກ່ຽວດ້ວຍຄວາມຍິນດີ
ເຮົາຈະມີຄວາມສຸກຫຼາຍຂຶ້ນໄດ້ແນວໃດໃນການປະກາດ?
“ໃຫ້ຮັບໃຊ້ພະເຢໂຫວາຢ່າງມີຄວາມສຸກ.”—ພສ. 100:2
ຈຸດສຳຄັນ
ບົດນີ້ມີຄຳແນະນຳທີ່ຊ່ວຍເຮົາໃຫ້ມີຄວາມສຸກຫຼາຍຂຶ້ນໃນການປະກາດ.
1. ບາງຄົນຮູ້ສຶກແນວໃດທີ່ຕ້ອງໄປປະກາດ? (ເບິ່ງຮູບນຳ)
ເຮົາທີ່ເປັນຜູ້ຮັບໃຊ້ຂອງພະເຢໂຫວາ ເຮົາໄປປະກາດຍ້ອນເຮົາຮັກພະເຢໂຫວາແລະຢາກໃຫ້ຄົນອື່ນຮູ້ຈັກເພິ່ນ. ພີ່ນ້ອງຫຼາຍຄົນມ່ວນຫຼາຍກັບການໄປປະກາດ ແຕ່ບາງຄົນພັດຮູ້ສຶກບໍ່ມ່ວນ. ຍ້ອນຫຍັງ? ຍ້ອນບາງຄົນອາດເປັນຄົນຂີ້ອາຍແລະບໍ່ໝັ້ນໃຈໃນໂຕເອງ. ບາງຄົນອາດຮູ້ສຶກແປກໆທີ່ຈະຕ້ອງໄປເຮືອນຄົນອື່ນໂດຍທີ່ບໍ່ໄດ້ຖືກເຊີນ. ບາງຄົນອາດຢ້ານວ່າຈະບໍ່ມີຄົນຟັງສິ່ງທີ່ເຂົາເຈົ້າປະກາດ ແລະບາງຄົນອາດຖືກສອນວ່າບໍ່ຄວນເຮັດໃຫ້ຄົນອື່ນບໍ່ສະບາຍໃຈ. ເຖິງວ່າພີ່ນ້ອງເຫຼົ່ານີ້ຈະຮັກພະເຢໂຫວາຫຼາຍ ແຕ່ເຂົາເຈົ້າກໍຮູ້ສຶກວ່າການເວົ້າເລື່ອງຂ່າວດີກັບຄົນແປກໜ້າເປັນເລື່ອງທີ່ຍາກຫຼາຍ. ເຖິງຈະເປັນແບບນັ້ນ ພີ່ນ້ອງເຫຼົ່ານີ້ກໍຮູ້ວ່າວຽກນີ້ສຳຄັນຫຼາຍແທ້ໆ ເຂົາເຈົ້າຈຶ່ງໄປປະກາດເປັນປະຈຳ. ເມື່ອເຂົາເຈົ້າເຮັດແບບນີ້ ພະເຢໂຫວາຕ້ອງມີຄວາມສຸກຫຼາຍແທ້ໆ.
ເຈົ້າມີຄວາມສຸກໃນການປະກາດບໍ? (ເບິ່ງຂໍ້ 1)
2. ຖ້າບາງເທື່ອເຈົ້າຮູ້ສຶກວ່າບໍ່ມ່ວນໃນການປະກາດ ເປັນຫຍັງເຈົ້າບໍ່ຄວນທໍ້ໃຈ?
2 ບາງເທື່ອເຈົ້າຮູ້ສຶກວ່າບໍ່ມ່ວນໃນການໄປປະກາດບໍ ຍ້ອນຮູ້ສຶກຄືກັບທີ່ໄດ້ເວົ້າມານັ້ນ? ຖ້າແມ່ນ ກໍຢ່າຟ້າວທໍ້ໃຈ. ການທີ່ເຈົ້າບໍ່ໝັ້ນໃຈໃນໂຕເອງອາດເປັນຍ້ອນເຈົ້າເປັນຄົນຖ່ອມແລະບໍ່ຢາກໃຫ້ຄົນອື່ນສົນໃຈເຈົ້າຫຼາຍເກີນໄປ ແລະເຈົ້າບໍ່ຢາກຜິດຖຽງກັບໃຜ. ທີ່ຈິງ ເຮົາບໍ່ຢາກຖືກໃຜປະຕິເສດ ໂດຍສະເພາະຕອນທີ່ເຮົາພະຍາຍາມເຮັດດີກັບຄົນອື່ນ. ພະເຢໂຫວາຮູ້ດີວ່າເຈົ້າກຳລັງເຈິກັບເລື່ອງທີ່ຍາກໆຫຍັງແດ່ ແລະເພິ່ນຢາກຊ່ວຍເຈົ້າແທ້ໆ. (ອຊຢ. 41:13) ໃນບົດນີ້ ເຮົາຈະເບິ່ງຄຳແນະນຳ 5 ຢ່າງທີ່ຊ່ວຍເຮົາໃຫ້ຮູ້ວິທີຮັບມືກັບຄວາມຮູ້ສຶກທີ່ບໍ່ດີ ແລະເຮົາຈະເບິ່ງນຳວ່າເຮົາຈະມີຄວາມສຸກຫຼາຍຂຶ້ນໄດ້ແນວໃດໃນການປະກາດ.
ໃຫ້ຄຳພີໄບເບິນຊ່ວຍເຈົ້າໃຫ້ມີກຳລັງໃຈ
3. ອັນໃດຊ່ວຍຜູ້ພະຍາກອນເຢເຣມີຢາໃຫ້ປະກາດກັບຄົນອື່ນໄດ້?
3 ໃນສະໄໝກ່ອນ ຄຳເວົ້າຂອງພະເຢໂຫວາຊ່ວຍຜູ້ຮັບໃຊ້ຂອງເພິ່ນໃຫ້ມີກຳລັງໃຈທີ່ຈະເຮັດວຽກມອບໝາຍທີ່ຍາກໆໃຫ້ສຳເລັດ. ໃຫ້ເຮົາມາເບິ່ງເລື່ອງຂອງຜູ້ພະຍາກອນເຢເຣມີຢາ. ຕອນທີ່ພະເຢໂຫວາມອບໝາຍໃຫ້ໄປປະກາດ ລາວຮູ້ສຶກບໍ່ໝັ້ນໃຈ ລາວຈຶ່ງເວົ້າວ່າ: “ລູກບໍ່ຮູ້ຈັກຊິເວົ້າ ຍ້ອນລູກເປັນພຽງແຕ່ເດັກນ້ອຍ.” (ຢຣມ. 1:6) ອັນໃດຊ່ວຍເຢເຣມີຢາໃຫ້ໝັ້ນໃຈຫຼາຍຂຶ້ນ? ສິ່ງທີ່ຊ່ວຍລາວແມ່ນຄຳເວົ້າຂອງພະເຢໂຫວາ. ລາວເວົ້າວ່າ: “ຄຳເວົ້າຂອງພະອົງເຜົາໄໝ້ຢູ່ໃນໃຈຂອງລູກຄືກັບໄຟ ມັນເປັນຄືກັບໄຟຢູ່ໃນກະດູກຂອງລູກ. ລູກອົດເວົ້າບໍ່ໄດ້ແລ້ວ.” (ຢຣມ. 20:8, 9) ເຖິງວ່າເຢເຣມີຢາຕ້ອງປະກາດໃນເຂດທີ່ຄົນບໍ່ສົນໃຈຟັງ ແຕ່ເລື່ອງທີ່ລາວປະກາດກໍຊ່ວຍລາວໃຫ້ມີກຳລັງໃຈທີ່ຈະເຮັດວຽກນີ້ຕໍ່ໆໄປ.
4. ເຮົາຈະໄດ້ຮັບປະໂຫຍດຫຍັງເມື່ອອ່ານຄຳພີໄບເບິນແລະຄິດຕຶກຕອງ? (ໂກໂລຊາຍ 1:9, 10)
4 ເຮົາກໍໄດ້ກຳລັງໃຈຈາກຄຳເວົ້າຂອງພະເຢໂຫວາທີ່ຢູ່ໃນຄຳພີໄບເບິນຄືກັນ. ຕອນທີ່ໂປໂລຂຽນຈົດໝາຍໄປຫາພີ່ນ້ອງຢູ່ເມືອງໂກໂລຊາຍ ລາວເວົ້າວ່າ ຄວາມຮູ້ທີ່ຖືກຕ້ອງຈະກະຕຸ້ນພີ່ນ້ອງຢູ່ເມືອງໂກໂລຊາຍໃຫ້ “ເກີດຜົນດີໃນທຸກສິ່ງທີ່ [ເຂົາເຈົ້າ] ເຮັດ” ແລະການເຮັດແບບນີ້ຈະຊ່ວຍເຂົາເຈົ້າໃຫ້ “ໃຊ້ຊີວິດໃຫ້ສົມກັບການເປັນຜູ້ຮັບໃຊ້ພະເຢໂຫວາ.” (ອ່ານໂກໂລຊາຍ 1:9, 10) ຜົນດີທີ່ໂປໂລເວົ້າເຖິງລວມເຖິງການປະກາດຂ່າວດີນຳ. ດັ່ງນັ້ນ ເມື່ອເຮົາອ່ານຄຳພີໄບເບິນແລະຄິດຕຶກຕອງ ເຮົາກໍແຮ່ງຈະມີຄວາມເຊື່ອໃນພະເຢໂຫວາແລະເຂົ້າໃຈຫຼາຍຂຶ້ນວ່າເປັນຫຍັງຈຶ່ງເປັນເລື່ອງສຳຄັນຫຼາຍທີ່ຈະຕ້ອງປະກາດຂ່າວດີໃຫ້ຄົນອື່ນຮູ້.
5. ເຮົາຕ້ອງເຮັດຫຍັງເພື່ອຈະໄດ້ຮັບປະໂຫຍດຫຼາຍທີ່ສຸດຈາກການອ່ານແລະສຶກສາຄົ້ນຄວ້າຄຳພີໄບເບິນ?
5 ເຮົາຈະໄດ້ຮັບປະໂຫຍດຫຼາຍທີ່ສຸດຈາກຄຳພີໄບເບິນເມື່ອເຮົາໃຊ້ເວລາອ່ານ ສຶກສາຄົ້ນຄວ້າ ແລະຄິດຕຶກຕອງ. ເຮົາຕ້ອງບໍ່ເຮັດແບບຟ້າວໆ. ຖ້າເຮົາເຈິຂໍ້ຄຳພີທີ່ເຂົ້າໃຈຍາກ ຢ່າຂ້າມຂໍ້ນັ້ນໂດຍທີ່ບໍ່ໄດ້ຄົ້ນຄວ້າ. ໃຫ້ໃຊ້ຄູ່ມືຄົ້ນຄວ້າສຳລັບພະຍານພະເຢໂຫວາຫຼືປຶ້ມອື່ນໆຂອງອົງການເພື່ອຄົ້ນຄວ້າກ່ຽວກັບຂໍ້ນັ້ນ. ຖ້າເຈົ້າໃຊ້ເວລາອ່ານແລະສຶກສາຄົ້ນຄວ້າຄຳພີໄບເບິນ ເຈົ້າກໍຈະໝັ້ນໃຈຫຼາຍຂຶ້ນວ່າສິ່ງທີ່ຂຽນໄວ້ໃນຄຳພີໄບເບິນເປັນຄວາມຈິງ. (1ທຊ. 5:21) ແຮ່ງເຈົ້າໝັ້ນໃຈຫຼາຍຂຶ້ນ ເຈົ້າກໍແຮ່ງຈະມີຄວາມສຸກເມື່ອລົມເລື່ອງຄຳພີໄບເບິນກັບຄົນອື່ນ.
ກຽມໂຕດີໆກ່ອນໄປປະກາດ
6. ເປັນຫຍັງເຮົາຕ້ອງກຽມໂຕດີໆກ່ອນໄປປະກາດ?
6 ຖ້າເຈົ້າກຽມໂຕດີໆກ່ອນໄປປະກາດ ເຈົ້າກໍຈະຮູ້ສຶກບໍ່ກັງວົນຫຼາຍເມື່ອເວົ້າກັບຄົນອື່ນ. ພະເຢຊູຊ່ວຍພວກລູກສິດຂອງເພິ່ນໃຫ້ກຽມໂຕດີໆກ່ອນເພິ່ນຈະສົ່ງເຂົາເຈົ້າອອກໄປປະກາດ. (ລກ. 10:1-11) ເມື່ອເຂົາເຈົ້າເຮັດຕາມຄຳແນະນຳຂອງພະເຢຊູ ເຂົາເຈົ້າກໍສາມາດເຮັດສິ່ງດີໆຫຼາຍຢ່າງໄດ້ສຳເລັດ ແລະສິ່ງເຫຼົ່ານັ້ນເຮັດໃຫ້ເຂົາເຈົ້າມີຄວາມສຸກຫຼາຍ.—ລກ. 10:17
7. ເຮົາຈະກຽມໂຕແນວໃດສຳລັບການປະກາດ? (ເບິ່ງຮູບນຳ)
7 ເຮົາຈະກຽມໂຕແນວໃດສຳລັບການປະກາດ? ໃຫ້ເຮົາຄິດວ່າຈະອະທິບາຍຄວາມຈິງໃນຄຳພີໄບເບິນແບບເປັນທຳມະຊາດແລະເປັນຄຳເວົ້າຂອງເຮົາເອງໄດ້ແນວໃດ ແລະໃຫ້ຄິດເຖິງ 2 ຫຼື 3 ຢ່າງທີ່ຄົນໃນເຂດຂອງເຮົາມັກເວົ້າ ແລ້ວໃຫ້ຄິດວ່າເຮົາຈະຕອບເຂົາເຈົ້າແນວໃດ. ຕອນທີ່ໄປປະກາດ ໃຫ້ເວົ້າແບບເປັນກັນເອງ ຜ່ອນຄາຍ ແລະຍິ້ມພ້ອມ.
ກຽມໂຕດີໆກ່ອນໄປປະກາດ (ເບິ່ງຂໍ້ 7)
8. ໃນຕົວຢ່າງປຽບທຽບຂອງໂປໂລ ເຮົາເປັນຄືກັບເຄື່ອງໃຊ້ທີ່ເປັນດິນແນວໃດ?
8 ໂປໂລສົມທຽບໜ້າທີ່ຂອງເຮົາໃນການປະກາດວ່າ “ພວກເຮົາກໍເປັນຄືເຄື່ອງໃຊ້ທີ່ເປັນດິນທີ່ໃສ່ເຄື່ອງມີຄ່າໄວ້.” (2ກຣ. 4:7) ເຄື່ອງມີຄ່ານີ້ແມ່ນຫຍັງ? ແມ່ນການປະກາດຂ່າວດີເລື່ອງການປົກຄອງຂອງພະເຈົ້າ ເຊິ່ງເປັນວຽກທີ່ຊ່ວຍຊີວິດຄົນ. (2ກຣ. 4:1) ເຄື່ອງໃຊ້ທີ່ເປັນດິນແມ່ນຫຍັງ? ແມ່ນຜູ້ຮັບໃຊ້ຂອງພະເຢໂຫວາທີ່ບອກຂ່າວດີໃຫ້ຄົນອື່ນຮູ້. ໃນສະໄໝຂອງໂປໂລ ພໍ່ຄ້າຈະໃຊ້ໄຫດິນເພື່ອຂົນສົ່ງສິ່ງທີ່ມີຄ່າ ເຊັ່ນ: ຂອງກິນ ເຫຼົ້າແວງ ແລະເງິນ. ຄ້າຍຄືກັນ ພະເຢໂຫວາມອບໝາຍເຮົາໃຫ້ປະກາດຂ່າວດີທີ່ມີຄ່າໃຫ້ຄົນອື່ນຮູ້. ເມື່ອພະເຢໂຫວາຊ່ວຍເຮົາ ເຮົາກໍຈະມີກຳລັງເພື່ອຈະປະກາດຕໍ່ໆໄປຢ່າງສັດຊື່.
ອະທິດຖານຂໍໃຫ້ມີຄວາມກ້າ
9. ເຮົາຈະເອົາຊະນະການຢ້ານຄົນຫຼືການຢ້ານວ່າຈະບໍ່ມີໃຜຟັງເຮົາໄດ້ແນວໃດ? (ເບິ່ງຮູບນຳ)
9 ບາງເທື່ອເຮົາອາດຮູ້ສຶກຢ້ານຄົນ ຫຼືອາດຢ້ານວ່າຈະບໍ່ມີໃຜຟັງເຮົາ. ເຮົາຈະເອົາຊະນະຄວາມຢ້ານແບບນີ້ໄດ້ແນວໃດ? ໃຫ້ເຮົາເບິ່ງຄຳອະທິດຖານຂອງພວກອັກຄະສາວົກຕອນທີ່ເຂົາເຈົ້າຖືກຫ້າມບໍ່ໃຫ້ປະກາດ. ເຂົາເຈົ້າບໍ່ໄດ້ຢ້ານຈົນເຊົາປະກາດ ແຕ່ເຂົາເຈົ້າອະທິດຖານຂໍໃຫ້ພະເຢໂຫວາຊ່ວຍເຂົາເຈົ້າໃຫ້ “ກ້າປະກາດຄຳສອນຂອງ [ເພິ່ນ] ຕໍ່ໆໄປ” ແລະພະເຢໂຫວາກໍຕອບຄຳອະທິດຖານຂອງເຂົາເຈົ້າທັນທີ. (ກຈກ. 4:18, 29, 31) ຖ້າບາງເທື່ອເຮົາຢ້ານຄົນຈົນບໍ່ກ້າປະກາດ ເຮົາກໍຄວນອະທິດຖານຄືກັນເພື່ອຂໍໃຫ້ພະເຢໂຫວາຊ່ວຍ. ຂໍໃຫ້ເພິ່ນຊ່ວຍເຈົ້າໃຫ້ຮັກຄົນອື່ນຫຼາຍໆເພື່ອເຈົ້າຈະບໍ່ຢ້ານແລະກ້າປະກາດຂ່າວດີກັບເຂົາເຈົ້າ.
ອະທິດຖານຂໍໃຫ້ມີຄວາມກ້າ (ເບິ່ງຂໍ້ 9)
10. ພະເຢໂຫວາຊ່ວຍເຮົາແນວໃດໃຫ້ເຮັດໜ້າທີ່ເປັນພະຍານຂອງເພິ່ນ? (ເອຊາຢາ 43:10-12)
10 ພະເຢໂຫວາເລືອກເຮົາໃຫ້ເປັນພະຍານຂອງເພິ່ນ ແລະເພິ່ນສັນຍາວ່າຈະຊ່ວຍເຮົາໃຫ້ມີຄວາມກ້າ. (ອ່ານເອຊາຢາ 43:10-12) ໃຫ້ເຮົາເບິ່ງ 4 ວິທີທີ່ສະແດງວ່າພະເຢໂຫວາເຮັດແບບນັ້ນ. ວິທີທຳອິດ ພະເຢຊູຢູ່ກັບເຮົາສະເໝີບໍ່ວ່າເຮົາຈະປະກາດຢູ່ໃສ. (ມທ. 28:18-20) ວິທີທີ 2 ພະເຢໂຫວາໃຫ້ທູດສະຫວັນມາຊ່ວຍເຮົາ. (ພນມ. 14:6) ວິທີທີ 3 ພະເຢໂຫວາໃຫ້ພະລັງບໍລິສຸດກັບເຮົາເພື່ອຊ່ວຍເຮົາໃຫ້ຈື່ສິ່ງທີ່ເຮົາເຄີຍຮຽນ. (ຢຮ. 14:25, 26) ວິທີທີ 4 ພະເຢໂຫວາໃຫ້ເຮົາມີພີ່ນ້ອງໄປປະກາດກັບເຮົາ. ເຫັນໄດ້ແຈ້ງວ່າ ດ້ວຍຄວາມຊ່ວຍເຫຼືອຈາກພະເຢໂຫວາແລະພີ່ນ້ອງທີ່ຮັກເຮົາ ເຮົາມີທຸກສິ່ງທີ່ຈຳເປັນທີ່ຈະຊ່ວຍເຮົາໃຫ້ກ້າປະກາດຕໍ່ໆໄປ.
ພ້ອມທີ່ຈະປັບປ່ຽນແລະມີຄວາມຄິດທີ່ຖືກຕ້ອງ
11. ຕອນທີ່ໄປປະກາດ ເຈົ້າຈະເຈິຄົນຫຼາຍຂຶ້ນໄດ້ແນວໃດ? (ເບິ່ງຮູບນຳ)
11 ຕອນທີ່ເຈົ້າໄປປະກາດແລະບໍ່ເຈິຄົນຢູ່ເຮືອນປານໃດ ເຈົ້າຮູ້ສຶກທໍ້ໃຈບໍ? ຖ້າແມ່ນ ໃຫ້ຖາມໂຕເອງວ່າ: ‘ຕອນນີ້ຄົນໃນເຂດຂອງຂ້ອຍຢູ່ໃສ?’ (ກຈກ. 16:13) ‘ເຂົາເຈົ້າອອກໄປເຮັດວຽກຫຼືອອກໄປຊື້ເຄື່ອງບໍ?’ ຖ້າເປັນແບບນັ້ນ ເຈົ້າຈະເຈິຄົນຫຼາຍກວ່າບໍຖ້າໄປປະກາດຕາມບ່ອນສາທາລະນະ? ພີ່ນ້ອງຊາຍຊື່ໂຈຊົວເວົ້າວ່າ: “ຂ້ອຍມີໂອກາດປະກາດກັບຄົນຫຼາຍກວ່າ ຕອນໄປເລາະຮ້ານສັບພະສິນຄ້າຫຼືບ່ອນທີ່ມີຄົນຫຼາຍໆ.” ໂຈຊົວກັບບຣິດເຈັດເມຍຂອງລາວເຈິຫຼາຍຄົນຢູ່ເຮືອນເມື່ອເຂົາເຈົ້າໄປປະກາດຕອນແລງຫຼືວັນທິດຕອນສວາຍ.—ອຟຊ. 5:15, 16
ປ່ຽນເວລາແລະບ່ອນປະກາດ (ເບິ່ງຂໍ້ 11)
12. ເຮົາຈະຮູ້ໄດ້ແນວໃດວ່າຄົນທີ່ເຮົາລົມນຳເຊື່ອຫຍັງຫຼືເປັນຫ່ວງເລື່ອງໃດ?
12 ຖ້າຄົນທີ່ເຮົາລົມນຳບໍ່ສົນໃຈເລື່ອງທີ່ເຮົາປະກາດປານໃດ ໃຫ້ລອງຖາມເຂົາເຈົ້າເບິ່ງວ່າເຂົາເຈົ້າເຊື່ອຫຍັງຫຼືເປັນຫ່ວງເລື່ອງໃດ. ໂຈຊົວກັບບຣິດເຈັດໃຊ້ຄຳຖາມທີ່ຢູ່ທາງໜ້າແຜ່ນພັບເພື່ອເລີ່ມລົມກັບຄົນອື່ນ. ເຮົາກໍສາມາດໃຊ້ຄຳຖາມທີ່ຢູ່ທາງໜ້າແຜ່ນພັບອັນໃດອັນໜຶ່ງເພື່ອຈະຮູ້ວ່າຄົນເຊື່ອແນວໃດ. ເມື່ອຖາມຄຳຖາມທີ່ຢູ່ທາງໜ້າແຜ່ນພັບ ເຮົາກໍຈະຮູ້ວ່າຄົນຄິດແນວໃດກ່ຽວກັບເລື່ອງຕ່າງໆ. ຫຼາຍເທື່ອການເຮັດແບບນີ້ຊ່ວຍເຮົາໃຫ້ເລີ່ມລົມກັບເຂົາເຈົ້າໄດ້.
13. ເຖິງວ່າຄົນຈະບໍ່ຟັງເຮົາ ແຕ່ເປັນຫຍັງຈຶ່ງຖືວ່າເຮົາປະສົບຄວາມສຳເລັດໃນວຽກປະກາດ? (ສຸພາສິດ 27:11)
13 ຄວາມສຳເລັດໃນວຽກປະກາດບໍ່ໄດ້ຂຶ້ນຢູ່ກັບວ່າຄົນຟັງເຮົາຫຼາຍສ່ຳໃດ. ຍ້ອນຫຍັງ? ຍ້ອນເຮົາໄດ້ເຮັດຕາມສິ່ງທີ່ພະເຢໂຫວາແລະພະເຢຊູບອກແລ້ວ ນັ້ນກໍຄືເຮົາໄດ້ປະກາດຂ່າວດີ. (ກຈກ. 10:42) ເຖິງວ່າເຮົາຈະບໍ່ເຈິຄົນທີ່ຈະລົມນຳໄດ້ຫຼືບໍ່ມີໃຜຟັງເຮົາ ແຕ່ເຮົາກໍມີຄວາມສຸກຍ້ອນເຮົາຮູ້ວ່າເຮົາກຳລັງເຮັດສິ່ງທີ່ພະເຢໂຫວາພໍໃຈ.—ອ່ານສຸພາສິດ 27:11
14. ເປັນຫຍັງເຮົາທຸກຄົນມີຄວາມສຸກເມື່ອພີ່ນ້ອງຜູ້ໃດຜູ້ໜຶ່ງເຈິຄົນທີ່ສົນໃຈຄວາມຈິງ?
14 ພວກເຮົາທຸກຄົນມີຄວາມສຸກເມື່ອພີ່ນ້ອງຜູ້ໃດຜູ້ໜຶ່ງໄປປະກາດແລະເຈິຄົນທີ່ສົນໃຈຄວາມຈິງ. ຫໍສັງເກດການສົມທຽບວຽກປະກາດທີ່ເຮົາເຮັດວ່າເປັນຄືກັບການຊອກຫາເດັກນ້ອຍທີ່ເສຍ. ທຸກຄົນທີ່ຊອກຫາເດັກນ້ອຍຕ້ອງເຮັດວຽກເປັນທີມເພື່ອຊ່ວຍກັນຊອກຫາຢູ່ຫຼາຍບ່ອນ. ເມື່ອເຈິເດັກນ້ອຍແລ້ວທຸກຄົນກໍດີໃຈຫຼາຍ ບໍ່ແມ່ນແຕ່ຜູ້ທີ່ຊອກເຫັນເທົ່ານັ້ນ. ຄ້າຍຄືກັນ ວຽກຊ່ວຍຄົນໃຫ້ເປັນລູກສິດກໍເປັນວຽກທີ່ເຮົາຕ້ອງເຮັດນຳກັນເປັນທີມ. ເຮົາທຸກຄົນຕ້ອງຊ່ວຍກັນໄປຊອກຫາຄົນໃນເຂດ ແລະເມື່ອມີຄົນໃໝ່ເລີ່ມມາປະຊຸມ ເຮົາທຸກຄົນກໍມີຄວາມສຸກນຳກັນ.
ຄິດເຖິງຄວາມຮັກທີ່ເຈົ້າມີຕໍ່ພະເຢໂຫວາແລະຕໍ່ຄົນອື່ນ
15. ເຮົາຈະກະຕືລືລົ້ນໃນວຽກປະກາດຫຼາຍຂຶ້ນໄດ້ແນວໃດ? (ມັດທາຍ 22:37-39) (ເບິ່ງຮູບໜ້າປົກນຳ)
15 ເຮົາຈະກະຕືລືລົ້ນໃນວຽກປະກາດຫຼາຍຂຶ້ນໂດຍຄິດເຖິງຄວາມຮັກທີ່ເຮົາມີຕໍ່ພະເຢໂຫວາແລະຕໍ່ຄົນອື່ນ. (ອ່ານມັດທາຍ 22:37-39) ໃຫ້ນຶກພາບວ່າພະເຢໂຫວາຈະມີຄວາມສຸກຫຼາຍສ່ຳໃດທີ່ເຫັນເຮົາເຮັດວຽກທີ່ເພິ່ນມອບໝາຍໃຫ້ເຮົາເຮັດ ແລະຄົນທີ່ເລີ່ມຮຽນຄຳພີໄບເບິນກໍມີຄວາມສຸກ! ໃຫ້ຈື່ໄວ້ວ່າຄົນທີ່ຟັງສິ່ງທີ່ເຮົາປະກາດແລະຕັດສິນໃຈຮັບໃຊ້ພະເຢໂຫວາ ເຂົາເຈົ້າຈະມີໂອກາດໄດ້ຊີວິດຕະຫຼອດໄປ.—ຢຮ. 6:40; 1ຕມ. 4:16
ການຄິດເຖິງຄວາມຮັກທີ່ເຮົາມີຕໍ່ພະເຢໂຫວາແລະຕໍ່ຄົນອື່ນຈະຊ່ວຍເຮົາໃຫ້ມີຄວາມສຸກຫຼາຍຂຶ້ນໃນການປະກາດ (ເບິ່ງຂໍ້ 15)
16. ເຮົາຈະມີຄວາມສຸກກັບການປະກາດແນວໃດເຖິງວ່າຕ້ອງຢູ່ແຕ່ໃນເຮືອນ? ຂໍໃຫ້ຍົກຕົວຢ່າງ.
16 ເຈົ້າຕ້ອງຢູ່ແຕ່ໃນເຮືອນຍ້ອນເຫດຜົນບາງຢ່າງບໍ? ຖ້າແມ່ນ ໃຫ້ຄິດເຖິງສິ່ງທີ່ເຈົ້າເຮັດໄດ້ເພື່ອສະແດງວ່າເຈົ້າຮັກພະເຢໂຫວາແລະຮັກຄົນອື່ນ. ຕອນທີ່ພະຍາດໂຄວິດ-19 ລະບາດ ຊາມູເອນກັບດາເນຍເມຍຂອງລາວຕ້ອງຢູ່ແຕ່ໃນເຮືອນ. ຕອນນັ້ນມັນຍາກຫຼາຍສຳລັບເຂົາເຈົ້າ ແຕ່ເຂົາເຈົ້າກໍຍັງປະກາດເປັນປະຈຳທາງໂທລະສັບ ທາງຈົດໝາຍ ແລະສຶກສາກັບຫຼາຍຄົນທາງຊູມ. ຊາມູເອນປະກາດກັບຄົນທີ່ລາວເຈິຢູ່ຄລີນິກທີ່ລາວໄປປົວມະເຮັງ. ລາວເວົ້າວ່າ: “ເມື່ອເຈິຄວາມຍາກລຳບາກ ເຮົາອາດຮູ້ສຶກກັງວົນ ເມື່ອຍ ແລະຄວາມເຊື່ອຂອງເຮົາກໍອາດຖືກທົດສອບ. ແຕ່ເຮົາຕ້ອງພະຍາຍາມຊອກວິທີທີ່ຈະມີຄວາມສຸກໃນການຮັບໃຊ້ພະເຢໂຫວາ.” ຕອນທີ່ເຈິກັບເລື່ອງທັງໝົດນີ້ ດາເນຍພັດມາລົ້ມແລະຕ້ອງນອນຢູ່ຕຽງລຸກໄປໃສບໍ່ໄດ້ 3 ເດືອນ. ຫຼັງຈາກນັ້ນ ລາວກໍຕ້ອງນັ່ງຢູ່ລໍ້ຍູ້ອີກ 6 ເດືອນ. ເຖິງຈະເປັນແນວນັ້ນ ດາເນຍເວົ້າວ່າ: “ຂ້ອຍພະຍາຍາມເຮັດສຸດຄວາມສາມາດເທົ່າທີ່ຂ້ອຍເຮັດໄດ້. ຂ້ອຍປະກາດກັບນາງພະຍາບານທີ່ມາຢາມ ລົມກັບຄົນທີ່ມາສົ່ງເຄື່ອງຢູ່ເຮືອນ ແລະຂ້ອຍຍັງປະກາດທາງໂທລະສັບກັບຕົວແທນບໍລິສັດທີ່ຂາຍອຸປະກອນທາງການແພດນຳ.” ເຖິງວ່າສະພາບການຂອງຊາມູເອນກັບດາເນຍເຮັດໃຫ້ເຂົາເຈົ້າເຮັດຫຍັງບໍ່ໄດ້ຫຼາຍຄືກັບທີ່ຜ່ານມາ ແຕ່ເຂົາເຈົ້າກໍຍັງເຮັດທຸກສິ່ງທີ່ເຮັດໄດ້ແລະມີຄວາມສຸກກັບການເຮັດແບບນັ້ນ.
17. ເຮົາຈະເຮັດແນວໃດເພື່ອຈະໄດ້ຮັບປະໂຫຍດຫຼາຍທີ່ສຸດຈາກຄຳແນະນຳໃນບົດນີ້?
17 ເຮົາຈະໄດ້ຮັບປະໂຫຍດຫຼາຍທີ່ສຸດຖ້າເຮົາເຮັດຕາມຄຳແນະນຳທັງຫ້າຢ່າງທີ່ເວົ້າເຖິງໃນບົດນີ້. ຄຳແນະນຳແຕ່ລະຢ່າງເປັນຄືກັບສ່ວນປະກອບທີ່ໃຊ້ເຮັດຂອງກິນ. ເມື່ອເອົາສ່ວນປະກອບທັງໝົດມາໃສ່ລວມກັນ ເຮົາກໍຈະໄດ້ຂອງກິນທີ່ແຊບໆ. ຄ້າຍຄືກັນ ເມື່ອເຮົາເຮັດຕາມຄຳແນະນຳທັງຫ້າຢ່າງ ເຮົາກໍຈະຮັບມືກັບຄວາມຮູ້ສຶກໃນແງ່ລົບໄດ້ດີຂຶ້ນ ແລະມີຄວາມສຸກຫຼາຍຂຶ້ນໃນການປະກາດ.
ການເຮັດຕາມຄຳແນະນຳຕໍ່ໄປນີ້ຈະຊ່ວຍເຈົ້າແນວໃດໃຫ້ມີຄວາມສຸກໃນການປະກາດ?
-
ໃຊ້ເວລາກຽມໂຕດີໆກ່ອນໄປປະກາດ
-
ອະທິດຖານຂໍໃຫ້ມີຄວາມກ້າ
-
ຄິດເຖິງຄວາມຮັກທີ່ເຈົ້າມີຕໍ່ພະເຢໂຫວາແລະຕໍ່ຄົນອື່ນ
ເພງທີ 80 “ລອງຊີມແລ້ວຈະຮູ້ວ່າພະເຢໂຫວາດີ”
