1. Ere kaka jomoko nenoga wuoyo gi ji e tij lendo? (Ne picha bende.)

 KAKA jotich Jehova, walendo ne ji nikech wahero Wuonwa manie polo kendo nikech wadwaro konyo ji mondo ging’e Jehova. Thoth jolendo mor ahinya tiyo tijni. Jomoko to yudoga ka tij lendo ok morgi. Nikech ang’o? Nitie joma onyuolore ma luor-luor kendo gineno ni ok gin jopuonj molony. Moko be luorga dhi e ute joma gikia. To moko luorga ni ibiro kwedgi. Jomoko to ok dwarga ywaruok gi ji. Kata obedo ni owete gi nyimine kaka mago ohero Jehova, giyudoga ka teknegi lendo ne joma ok ging’eyo. Kata kamano, pod ging’eyo ni ma en wach maduong’ ahinya kendo gitimo duto ma ginyalo mondo gilend ma ok gibare. En adier ni Jehova mor kodgi ahinya!

2. Ka po ni samoro ok iyud mor e tij lendo, ang’o momiyo chunyi ok onego onyosre?

² Dibed ni in be samoro ok iyud mor e tij lendo nikech weche kaka mago? Ka en kamano, to chunyi kik nyosre. Mano nyiso ni ibolori kendo ok idwar genori iwuon, to bende onyiso ni ok idwar ywari gi ji. To e wi mano, onge ng’ama diher ni okwede, to ahinya-ahinya sama otimo ne jomamoko maber. Wuonwa manie polo ong’eyo maber pek mikaloe kendo odwaro konyi. (Isa. 41:13) E sulani, wadwaro nono weche moko abich ma nyalo konyowa loyo pek ma kamago kendo bedo mamor e tij lendo.

 YIE MONDO WACH NYASAYE OTEGI

3. En ang’o ma nokonyo janabi Jeremia mondo olend ne jomamoko?

³ Kata mana e kinde machon, Wach Nyasaye notego jotich Nyasaye ma ne neno ni gin gi migawo moro ma teknegi chopo. Wane ane ranyisi mar janabi Jeremia. Noluor timo migawo ma Jehova nomiye mar lendo. Jeremia nowacho kama: “Ok ang’eyo wuoyo, nimar pod an mana rawera.” (Jer. 1:6) Ere kaka noloyo luoro ma ne en-gono? Noyudo teko kowuok kuom Wach Nyasaye. Jeremia nowacho kama: “E chunya wachne nochalo gi mach ma wang’o chokena, ne ok anyal geng’e.” (Jer. 20:8, 9) Kata obedo ni joma Jeremia ne dhi lendonegi ne gin joma wigi ne tek, ote ma nomiye ni olandnegi notege kendo nokonye timo tijno gi chir.

4. Ere kaka somo Wach Nyasaye kendo paro matut kuom gik ma wasomo nyalo konyowa? (Jo-Kolosai 1:9, 10)

⁴ Jokristo nyalo yudo teko mar dhi nyime lendo kokalo kuom Wach Nyasaye ma yudore e Muma. Ka nondiko ne kanyakla ma ne ni Kolosai, jaote Paulo nowacho ni bedo gi ng’eyo e wi Jehova ne dhi miyo owetene ‘owuoth e yo mowinjore e wang’ Jehova’ kendo gidhi nyime “nyago olemo e tije mabeyo duto.” (Som Jo-Kolosai 1:9, 10.) Tije mabeyogo noriwo lando wach maber mar Pinyruoth. Omiyo, ka wasomo Wach Nyasaye kendo waparo matut kuom gik ma wasomo, wabedo gi yie motegno kuom Jehova kendo waneno gimomiyo dwarore ahinya ni wadhi nyime lando wach maber mar Pinyruoth.

5. Ang’o minyalo timo mondo iyud ber kuom gik misomo e Muma kod gik mipuonjori?

⁵ Mondo wayud ber sama wasomo Wach Nyasaye, ok onego wasome ka warikni. Bende, onego wakaw thuolowa mondo wapar matut kendo nono puonj ma wayudo kuom gik ma wasomo. Ka iromo gi ndiko moro ma ok iwinj tiende malong’o, kik ikale akala kamano. Kar mano, ti gi bug Fahirisi kata Buk Makonyo Joneno mag Jehova e Timo Nonro mondo okonyi winjo tiend ndikono maber. Kikawo thuoloni mondo ipuonjri e yo matut, to ibiro bedo gadier e wi puonj mag Muma. (1 The. 5:21) Kaka imedo bedo gadier e wi puonjgo, e kaka ibiro medo bedo gi siso mar nyisogi jomamoko.

 IKRI MABER NE TIJ LENDO

6. Ang’o momiyo onego waikre maber ne tij lendo?

⁶ Ka iikori maber ne tij lendo, ibiro yudo ka yotni wuoyo gi jomamoko. Yesu nokonyo jolupne mondo giikre ka ne pok oorogi e tij lendo. (Luka 10:1-11) Jolup Yesu noyudo nyak kod mor e tij lendo nikech ne gitiyo gi paro ma Yesu nomiyogi.—Luka 10:17.

7. Ere kaka wanyalo ikore ne tij lendo? (Ne picha bende.)

⁷ Ere kaka wanyalo ikore ne tij lendo? Dwarore ni wapar kaka wanyalo lero ne jomamoko adiera ka watiyo gi wechewa wawegi. Wanyalo paro bende gik ma ji nyalo wachonwa sama walendonegi kod kaka wanyalo dwokogi. Kae to sama wawuoyo gi ji, wawuo ka wakuwe mos, wabuonji, kendo wanyis ni wadewogi.

8. En yo mane mipimogo Jokristo gi gik mochue gi lowo e ranyisi ma Paulo notiyogo?

⁸ Jaote Paulo nowuoyo e wi ting’ ma wan-go mar lando wach maber ka nowacho kama: “Wan gi mwandu makendeni e gik mochue gi lowo.” (2 Kor. 4:7) Mwandu makendeno en ang’o? En tij reso ngima ji ka walandonegi wach maber mar Pinyruoth. (2 Kor. 4:1) To gik mochue gi lowo gin ang’o? Gin jotich Nyasaye ma lando ne jomamoko wach maber. E kinde Paulo, joma timo ohala ne ting’oga mwandugi ma ne gigeno kaka chiemo, divai, kata pesa e agulni ma nochue gi lowo. Wan bende, Jehova osemiyowa wach monego walandi ma en mwandu mogen ahinya. Ka Jehova okonyowa, wabiro bedo gi teko kod chir mar lando wachno ne ji.

LEM MONDO JEHOVA OMIYI CHIR

9. Ang’o ma nyalo konyowa mondo kik waluor joma wadhi lendonegi? (Ne picha bende.)

⁹ Seche moko wanyalo bedo maluor lendo nikech ji kwedo wach ma walandonegi. Ang’o ma nyalo konyowa loyo pekno? Wane ane kaka lamo nokonyo joote ka nokwergi ni kik gilendi. Kar mondo giwe luoro ologi, ne gikwayo Jehova mondo okonygi “dhi nyime hulo [wachne] gi chir duto.” Jehova nodwoko lamogino gikanyono. (Tich 4:18, 29, 31) Ka po ni seche moko wawinjo ka waluoro joma wadhi lendonegi, wan bende onego walem mondo Jehova okonywa. Kwa Jehova mondo okonyi  loyo luoro mar dhano kendo okonyi tego hero miherogo joweteni.

10. Ere kaka Jehova konyowa chopo migawo ma wan-go mar lando wach maber? (Isaya 43:10-12)

¹⁰ Jehova e ma oseyierowa mondo wabed Joneno mage kendo osingo ni obiro konyowa bedo gi chir. (Som Isaya 43:10-12.) Ne ane yore moko ang’wen motimogo kamano. Mokwongo, Yesu ni kodwa kamoro amora ma walandoe wach maber. (Mat. 28:18-20) Mar ariyo, Jehova osemiyowa malaike mondo okonywa. (Fwe. 14:6) Mar adek, Jehova osemiyowa rohone maler mondo okonywa paro gik ma wasepuonjore. (Joh. 14:25, 26) Mar ang’wen, Jehova osemiyowa owete gi nyimine ma wanyalo lendogo. Nikech Jehova kaachiel gi owetewa gi nyiminewa konyowa, mano jiwowa mondo wadhi nyime lendo gi chir.

TIM LOKRUOK KA LUWORE GI CHAL MAR ALWORA KENDO IBED GI PARO MOWINJORE

11. Ere kaka inyalo yudo joma inyalo lendonegi? (Ne picha bende.)

¹¹ Be iwinjoga ka chunyi nyosore sama iyudo ka ji onge e utegi? Nyalo bedo maber kipenjori kama: ‘En kanye ma ji yudoree sani e alworawa?’ (Tich 16:13) ‘Dibed ni gin e tich koso gin e chiro?’ Ka po ni mano e gima timore, donge inyalo temo lendo e wang’ yore kata e dukni? Owadwa moro miluongo ni Joshua wacho kama: “Aseyudo thuolo mar lendo ne ji sama awuotho ka an e chiro kata e dukni.” En gi Bridget jaode, giseyudo thuolo mar lendo ne ji mang’eny e seche mag odhiambo kod chieng’ Jumapil e seche mag odiechieng’.—Efe. 5:15, 16.

12. Ere kaka wanyalo fwenyo gik ma ji oyiego kata ma morogi?

¹² Ka ng’at milendone ok orwako wach milandone, tem ane nono gik moyiego kata ma nyalo more. Joshua gi Bridget ne tiyoga gi penjo ma yudore e nyim trakt e chako wuoyo gi ji. Kuom ranyisi, ka gitiyo gi trakt ma wiye wacho ni In gi Paro Mane Kuom Muma?, giwachoga kama: “Jomoko neno ni Muma en buk mowuok kuom Nyasaye, jomoko to ok nene kamano. In to inene nade?” Mano miyogiga thuolo mar goyo mbaka gi ji.

13. Ang’o momiyo wanyalo wacho ni pod wan gi nyak e tij lendo kata ka ji ok orwako wach ma walandonegi? (Ngeche 27:11)

 ¹³ Kata ka ji ok orwako wach ma walando, mano ok nyis ni koro waonge nyak e tij lendo. Nikech ang’o? En nikech wasetimo gima Jehova gi Yesu Wuode dwaro ni watim, tiende ni chiwo neno. (Tich 10:42) Kata obedo ni seche moko ok wayud joma wanyalo lendonegi kata ji ok rwak wach ma walandonegi, pod onego wabed mamor nikech watimo gima moro Wuonwa manie polo.—Som Ngeche 27:11.

14. Ang’o momiyo onego wabed mamor sama jalendo machielo oyudo ng’at morwako wach e alworawa?

¹⁴ Wanyalo bedo mamor sama jalendo machielo oyudo ng’at ma orwako wach e alworawa. Ohinga mar Jarito moro nopimo tijwa mar lendo gi manyo nyathi molal. Ji mang’eny nyalo konyo e manyo nyathino, ka gia kamoro ka gidhi kama chielo. Gikone koseyud nyathino, ji duto ma ne manye bedo mamor, to ok mana ng’at moyudeno kende. E yo ma kamano bende, tij lendo en tich minywakone. Ji duto dwarore ni olendi mondo watiek alwora momiwa, kendo waduto wabedoga mamor sama ng’at morwako wach ochako biro e chokruok.

KET PACHI KUOM HERA MIHEROGO JEHOVA KOD JOWETENI

15. Ere kaka tiyo gi weche ma yudore e Mathayo 22:37-39 nyalo miyo wabed mamor e tijwa mar lendo? (Ne picha bende.)

¹⁵ Wanyalo bedo mamor e tijwa mar lendo ka waketo pachwa kuom hera ma waherogo Jehova kod jowetewa. (Som Mathayo 22:37-39.) Temie paro kaka Jehova mor sama oneno ka walendo kendo koneno kaka ji mor sama gichako puonjore Muma! Temie paro bende kaka joma walendonegi morwako wach biro reso ngimagi!—Joh. 6:40; 1 Tim. 4:16.

16. Ere kaka wanyalo bedo mamor e tijwa mar lendo kata ka po ni ok wanyal wuok e ot? Chiw ane ranyisi.

¹⁶ Dibed ni ok inyal wuok e ot nikech weche moko? Ka en kamano, to ket pachi kuom gik minyalo timo mondo inyis ni ihero Jehova kod jomamoko. E kinde tuo mar korona, Samuel kod Dania ne ok nyal wuok e odgi. E kinde matekno duto, ne gitimo kinda mondo gilend ka gitiyo gi  simu, ndiko barupe, kendo tayo jopuonjre Muma ka gitiyo gi Zoom. Samuel nolendo ne joma noromogo e osiptal ma noyudoe thieth mar kansa. Owacho kama: “Chandruok nyalo miyowa parruok, onyalo miyo wawinj ka waol e chunywa, kendo samoro onyalo miyo winjruokwa gi Jehova odog chien. Kata kamano, pod dwarore ni wabed mamor e tij Jehova.” E kindego, Dania nobedo matuo kendo ne ok onyal wuok e otanda kuom dweche adek. Bende, koro ne dwarore ni oti gi wheelchair kuom dweche auchiel. Owacho kama: “Natimo duto ma nanyalo ka luwore gi chal ma ne antie. Nalendoga ne nas ma ne rita kendo nalendo ne joma ne kelonaga gik moko e ot. Bende, nayudo thuolo mar lendo ne miyo moro ma ne tiyo e osiptal machielo e yor simu.” Nikech chal ma Samuel gi Dania ne nitie, ne ok ginyal timo mathoth. Kata kamano, ne gibedo mamor nikech ne gitimo duto ma ne ginyalo.

17. En ang’o minyalo timo mondo paro duto mochiw e sulani okonyi e yo maber moloyo?

¹⁷ Paro mochiw e sulani nyalo konyo ng’ato e yo maber moloyo e tij lendo kotiyo kodgi giduto. Moro ka moro kuom paro mochiwgi inyalo pim gi gik mopogore opogore mitedogo chiemo mondo obed mamit. Sama oriw gigo kanyachiel, chiemono medo bedo mamit. Kamano bende, ka watiyo gi paro duto momiwa, wabiro bedo mamor e tij lendo kata bed ni waromo gi pek moko, kendo wabiro siko ka wamor e tijno.