1. Mi ṭhenkhat chu rawngbâwlnaa mi dangte an va biak hmasak hian engtin nge an awm? (Milem en bawk rawh.)

 JEHOVA mite kan nih angin, kan Pa vâna mi kan hmangaih avâng leh kan vêngte chu amah hre tûra ṭanpui kan duh avângin thu kan hril a. Thuchhuahtu tam tak chuan thu hrilh rawngbâwlnaa tel chu nuam an ti hle a. Mahse, ṭhenkhat chuan nuam an ti lo a ni. Engvângin nge? Mi ṭhenkhat chu mi zakzum tak niin, inrintâwkna an nei lo va. Mi ṭhenkhat chuan sâwm lohva mi ina kal chu nuam an ti lovin, an lo duh loh an hlau a ni. Ṭhenkhat dang leh chu an naupan têt aṭangin mi dangte nêna inhnial buai lo tûra zirtîr an ni bawk. Chûng unaute chuan Jehova hmangaih hle mah se, hmêl hriat loh hnêna chanchin ṭha hrilh chu harsa an ti a ni. Mahse, he thu hrilh rawngbâwlna pawimawhzia an hriat avângin rawngbâwlnaah an tel ziah a ni. Jehova chu a va lâwm dâwn tak êm!

2. Rawngbâwlnaa chhuah chu nuam i ti lo a nih pawhin, engvângin nge i lunghnual loh vang?

² Chutianga i awm avângin rawngbâwlnaah nuam tih loh châng i nei em? I nei a nih chuan, lunghnual suh. Inrintâwkna i tlâkchhamna chuan inngaitlâwm takin mite ngaihsakna lâk i duh lohzia leh mite nêna inhnial i duh lohzia a lantîr thei a ni. Tu ma hnâwl nih kan duh lo va, mi dangte tâna thil ṭha tih kan tum hian a ni lehzual a ni. I Pa vâna mi chuan i hmachhawn harsatnate chu a hria a, i mamawh anga ṭanpui che a duh a ni. (Is. 41:13) He thuziakah hian, chutiang rilru put hmangte hneh theih dân leh rawngbâwlnaa hlimna neih theih dân rawtna panga sawiho a ni ang.

 PATHIAN THU CHUAN TICHAK CHE RAWH SE

3. Engin nge zâwlnei Jeremia chu mi dangte hnêna thu hril tûra ṭanpui?

³ Hmân lai aṭang tawhin Pathian chhiahhlawh rinawmte chuan an chanvo khirh tak hlen tûrin, Pathian thuchahte aṭangin chakna an hmu a. Entîr nân, zâwlnei Jeremia chungchâng hi lo ngaihtuah ta ila. Jehova’n thu hril tûra chanvo a pêk khân a hreh hle a. Jeremia chuan: “Thu ka sawi thiam lo, ka naupang si,” a ti a ni. (Jer. 1:6) Engtin nge inrintâwkna a tlâkchhamna chu a hneh theih? Ani chuan Pathian thu aṭangin chakna a hmu a. “Ka ruh chhûnga mei kâng inkhung ta ang mai hian . . . , Ka pai hle hle zo lo,” tiin a sawi a ni. (Jer. 20:8, 9) A thu hrilhna biala mite chu tawh khirh tak tak ni mah se, a puan tûr thuchah chuan chu hna chu thawk tûra a mamawh chakna a pe a ni.

4. Pathian Thu kan chhiar a, kan chhût ngunna chu engtin nge kan hlâwkpui? (Kolossa 1:9, 10)

⁴ Kristiante pawhin Pathian Thua thuchahte aṭangin chakna an hmu a. Tirhkoh Paula’n Kolossa kohhrana mite hnêna lehkha a thawn khân, a unaute chu hriatna dik tak chuan an ‘hnathawh tinrênga lo rah’ chhunzawm zêla, ‘Lalpa zui tlâka awm’ tûrin a chêttîr ang tih a hrilh a ni. (Kolossa 1:9, 10 chhiar rawh.) Chu hnathawhah chuan chanchin ṭha hrilh pawh a tel a. Chuvângin, Pathian Thu kan chhiar a, kan chhût ngun hian Jehova kan rinna a nghet lehzualin, Lalram thuchah hrilh a pawimawhzia kan hre thiam lehzual a ni.

5. Engtin nge Bible chhiarna leh zirna chu kan hlâwkpui lehzual theih?

⁵ Pathian Thu hlâwkpui tak zet tûr chuan, hmanhmawh taka chhiar te, zir te leh, chhût ngunte chu kan pumpelh tûr a ni. Hun pêk a ngai a. Bible i chhiar hunah, hriatthiam harsa i tih laite chu kân mai suh. Chu aiin, chu Bible châng hrilhfiahna hre tûrin Watch Tower Publications Index, a nih loh leh Jehova Thuhretute Tâna Zir Bingna Hmanrua chu hmang ang che. Hun pea i zir chuan Pathian Thu dikzia i rinna a nghet lehzual ang a. (1 Thes. 5:21) I rinna a ngheh poh leh mi dangte hnêna i thu zirte hrilh chu nuam i ti lehzual ang.

RAWNGBAWLNA ATAN ṬHA TAKIN INBUATSAIH RAWH

6. Engvângin nge rawngbâwlna atân ṭha taka kan inbuatsaih ang?

⁶ Rawngbâwlna atâna ṭha taka i inbuatsaih chuan mi dangte i biak hunah nuam  i ti lehzual ngei ang. Isua chuan a zirtîrte chu rawngbâwl tûra a tirh chhuah hmain inbuatsaih tûrin a ṭanpui a. (Lk. 10:1-11) Isua zirtîrnate an zawm avângin thil ṭha tam tak an ti thei a, hlimna nasa tak an nei a ni.—Lk. 10:17.

7. Engtin nge rawngbâwlna atâna kan inbuatsaih theih? (Milem en bawk rawh.)

⁷ Engtin nge rawngbâwlna atân i inbuatsaih theih? Mahni îrâwm chhuaka thutak thiam taka sawi dân kan ngaihtuah a ngai a. Thu hrilhna biala mite chhân lêt dân tlângpui pahnih emaw, pathum emaw leh chûng dinhmuna kan chhân lêt theih dânte ngaihtuahna chuan min ṭanpui thei a. Tichuan, mite kan biak hunah dam tak leh nui hmêl puin, nêlawm tak nih kan tum thei a ni.

8. Eng kawngin nge tirhkoh Paula entîrnaah Kristiante chu hlum bêl ang an nih?

⁸ Tirhkoh Paula chuan thu hrilh rawngbâwlnaa kan chanvo chungchângah: “Chu ro chu hlum bêlahte kan vawng a ni,” tia sawiin entîr nei ṭawngkam a hmang a. (2 Kor. 4:7) Chu ro chu eng nge ni? Chu chu nun chhanhimtu Lalram thuchah puan chhuahna hna a ni. (2 Kor. 4:1) A nih leh, hlum bêl chu eng nge ni? Mi dangte hnêna chanchin ṭha thlentu Pathian chhiahhlawhte an ni. Paula hun lai chuan, sumdâwngte chuan ei tûr te, uain te leh, pawisate ang chi thil hlu takte ken nân hlum bêl an hmang ṭhîn a. Chutiang bawkin, Jehova chuan chanchin ṭha thuchah hlu tak chu min kawltîr a. A ṭanpuinain chu thuchah chu rinawm taka puang chhuak tûrin kan mamawh chakna kan nei thei a ni.

HUAISENNA NEI TURIN ṬAWNGṬAI RAWH

9. Engtin nge mihring hlauhna emaw, hnâwl nih hlauhna emaw chu kan hneh theih? (Milem en bawk rawh.)

⁹ A châng chuan mihring hlauhna emaw, hnâwl nih hlauhna emaw kan nei thei a. Engtin nge chutiang hlauhna chu kan hneh theih? Thu hril lo tûra thu pêk an nih laia tirhkohte ṭawngṭaina kha han ngaihtuah teh. Anni chuan hlauh ahnêkin, Jehova hnênah ‘huai taka a thu hril tûrin’ ṭanpuina an dîl a. Jehova chuan an ṭawngṭaina chu a chhânsak nghâl a ni. (Tirh. 4:18, 29, 31) Mihring hlauhna kan neih chuan ṭawngṭaiin Jehova ṭanpuina kan dîl ve tûr a ni. Jehova hnênah mite i hmangaihnain mihring i hlauhna hneh tûra ṭanpui tûr chein dîl ang che.

10. Engtin nge Jehova’n a Thuhretute kan nih anga kan chanvo chu hlen tûra min ṭanpui? (Isaia 43:10-12)

 ¹⁰ Jehova chuan a Thuhretute ni tûrin min ruat a, huaisenna nei tûra min ṭanpui a tiam a ni. (Isaia 43:10-12 chhiar rawh.) Chutianga min ṭanpui dân kawng li chu i lo ngaihtuahho vang u. Pakhatna, Isua chuan chanchin ṭha kan hrilh hun apiangin min awmpui a. (Mt. 28:18-20) Pahnihna, Jehova chuan min ṭanpui tûrin a vântirhkohte a ruat a ni. (Thup. 14:6) Pathumna, Jehova chuan kan thil zirte hre chhuak tûra min ṭanpuitu atân a thlarau thianghlim min pe a. (Joh. 14:25, 26) Palina, Jehova chuan kan thawhpui tûr unaute min pe bawk. A ṭanpuina leh hmangaihna nei tak kan unaute ṭanpuinain thu hrilh rawngbâwlnaa hlawhtling tûra kan mamawh engkim kan nei thei a ni.

INSIAMREM THEI TAK NI LA, THLIR DAN DIK NEI RAWH

11. Engtin nge rawngbâwlnaa i chhuah hunah mi tam lehzuala i hmuh theih? (Milem en bawk rawh.)

¹¹ Ina mi i hmuh mang meuh lo hian i lunghnual em? Heti hian inzâwt rawh: ‘Ka thu hrilhna biala mite hi tûnah khawiah nge an awm ang?’ (Tirh. 16:13) ‘Hnathawhna hmunah nge, dâwr hmunah?’ tiin. Chutiang a nih chuan kawtthlêrahte thu hrilin, mite tam lehzual i hmu thei ang em? Unau Joshua-a chuan: “Dâwr in lian tak takah leh mipui tamna hmuna ka kal hian thu hrilh theihna hun remchâng ka nei a ni,” tiin a sawi. A nupui Bridget-i nên chuan Chawlhnî chawhnu lam pawh tiamin, thim hlima thu hrila an chhuah hian inah mi an hmu tam lehzual bawk a ni.—Eph. 5:15, 16.

12. Engtin nge mite thurin leh an ngaihven zâwng chu kan hriat theih?

¹² Mite chuan i thusawi an ngaihven lo a nih chuan, an thurinte leh an ngaihven zâwngte chu hriat tum ang che. Unau Joshua-a leh Unaunu Bridget-i te chuan mite an biak hunah tract phêk hma lama târ lan zawhnate chu an hmang a. Entîr nân, Engtin Nge Bible I Thlîr tih tract chu hmangin heti hian an sawi a ni: “Mi ṭhenkhat chuan Bible hi Pathian aṭanga chhuak lehkhabu angin an thlîr a, mi dangte chuan chutiang chuan an thlîr lo. Nang, engtin nge i ngaih ve?” tiin. Chu chuan tîtî theihna hun remchâng a neihtîr ṭhîn a ni.

13. Engvângin nge mite’n kan thu hrilh an ngaihthlâk loh hunah pawh kan rawngbâwlna chu hlawhtling anga kan thlîr theih? (Thufingte 27:11)

 ¹³ Mite’n kan thu hrilh an ngaithla duh lo a nih pawhin, kan rawngbâwlna chu a hlawhtling tho a ni. Engvângin nge? Jehova leh a Fapain thu hril tûra thu min pêk chu kan zawm vâng a ni. (Tirh. 10:42) Thu hrilh tûr tu mah kan hmu lo emaw, tu mahin an ngaithla duh lo emaw a nih hunah pawh kan Pa vâna mi kan tilâwm tih kan hriat avângin kan hlim thei a ni.—Thufingte 27:11 chhiar rawh.

14. Engvângin nge thuchhuahtu dangin rawngbâwlna biala tuina nei tu emaw an hmuh hian kan lâwm theih?

¹⁴ Thuchhuahtu dangte’n rawngbâwlna biala tuina nei tu emaw an hmuh hian kan lâwm hle thei bawk. Vênnainsâng chuan kan rawngbâwlna hna chu naupang bo zawnna nên a tehkhin a. Mi tam tak chu naupang bo zawnnaah telin, hmun tinah an zawng a. An zawn hmuh chuan a hmutu chauh ni lovin, a zawnnaa tel zawng zawngte chu an lâwm hle a ni. Chutiang bawkin, zirtîr siam rawngbâwlna hna chu a huhova thawh a ni a. Thu hrilh rawngbâwlna bial fang chhuak tûr chuan kohhrana mi tinte chu mamawh an ni a, inkhâwmnaa mi thar pakhat a rawn tel hian kan vaiin kan hlim a ni.

JEHOVA LEH VENGTE I HMANGAIHNA CHU NGAIHTUAH TLAT RAWH

15. Engtin nge Matthaia 22:37-39-na nunpuina chuan rawngbâwlnaa phûrna nei lehzual tûra min ṭanpui theih? (A kâwma milem en bawk rawh.)

¹⁵ Jehova leh vêngte kan hmangaihna kan ngaihtuah tlat chuan thu hrilh rawngbâwlnaah phûrna kan nei lehzual thei a. (Matthaia 22:37-39 chhiar rawh.) Jehova’n a hna min pêk kan thawk tih a hmuh huna a hlim dân tûr leh, mite’n Bible an zir ṭan huna an hlim dân tûrte chu han mitthla teh! Kan thuchah chhâng lêttute chhandam an nih dân tûr pawh ngaihtuah bawk ang che.—Joh. 6:40; 1 Tim. 4:16.

16. Engtin nge pâwn chhuak thei lova kan awm hunah pawh, rawngbâwlnaah hlimna kan hmuh theih? Entîrna pe rawh.

¹⁶ Chhan eng emaw avângin pâwn chhuak thei lovin i awm tawh em? Chutianga i awm chuan, Jehova leh i vêngte chunga hmangaihna lantîr tûra i tihtheihte chu ngaihven ang che. COVID-19 hripui lên lai khân, Unau Samuel-a leh Unaunu Dania-i te chu  pâwn chhuak thei lovin an awm a. Chûng hun hrehawm tak kârah pawh telephone hmanga thu hrilhnaahte leh lehkhathawn ziaka thu hrilhnaahte tel ziahin, Zoom hmangin Bible zirpuinate an nei ṭhîn a ni. Unau Samuel-a chuan a cancer natna enkawl tûra damdawi ina a kal hian a mi tawhte chu thu a hrilh ṭhîn a. Ani chuan: “Kan harsatna tawhte chuan rilru lam, taksa lam leh, thlarau lamah min tichau thei a. Chuvângin, Jehova rawngbâwlna aṭangin hlimna kan neih a ngai,” tiin a sawi a ni. Chutih hun lai chuan unaunu Dania-i chu a tlûk sual avângin thla thum vêl lai khum betin a awm a. Tichuan, thla ruk vêl chu wheelchair a hman a ngai a ni. Ani chuan: “Ka dinhmun azirin ka tihtheih zawng zawng tih ka tum a. Min rawn tlawhtu nurse hnênah leh thil min rawn petute hnênah thu hrilh theihna ka nei a ni. Damdawi company-a thawk hmeichhe pakhat chu phone hmanga tîtîpui theihna ka nei bawk,” tiin a sawi. Unau Samuel-a leh Unaunu Dania-i te chu tûn hma angin thawk thei tawh lo mah se, an tihtheihte tiin hlimna an hmu a ni.

17. Engtin nge he thuziaka rawtnate chu kan hlâwkpui lehzual theih?

¹⁷ He thuziaka târ lan rawtna pangate chu nunpui tum rawh. Rawtna tinte chu ei tûr siamnaa hman bâwl hlo ang an ni a. Chûng bâwl hlo zawng zawngte chu chawhpawlh a nih chuan ei tûr tui takah a chhuak ang. Chutiang bawkin, kan sawiho tâk rawtna zawng zawngte kan nunpui chuan a thim zâwnga ngaihtuahnate kan do theiin, rawngbâwlnaah hlimna kan nei lehzual ang.