MWAHA WOOSOMIYA 16
NCIPO 64 Nivare Muteko Woohepha Moohakalala
Manannani cinhaleenyu utteeliya wuulalyeerani?
“Munswalele Yehova ntteeliyaka nrima.”—ISAA. 100:2.
ITTHU INHALEEHU WIITTHUCA
Manannani cinhaleehu wuncerera utteeliya wihu wuulalyeerani?
1. Manannani atthu akhwaawe cineecoonaaya wowaalalyeera atthu akhwaawe? (Nwehe ciicammo ilatarato.)
KHAMPA apoovu a Yehova, hiiva ninawaalalyeera atthu akhwaawe, kontha ninawaafenta apaapeehu owiirimu Yehova ni nimpheela waakavihera atthu enci wiira ancuwele. Khweeliini, anamalalyeera enci unawaacivela nteko woolalyeera, masi akinaayo aahaana marikarikko ni unawaarika utteeliya wuulalyeerani. Kontha isiyani? Kontha akhwaawyaayo unawaarikarika wuulumaca waatthuni, awula akhwaawyaayo khaaneekhuluvela. Ni anamalalyeera akhwaawe khaneecoona saana ukela inupa woohilattuliya ni akhwaawyaayo anawoova uhaakheleliya awula woomoliya. Uhiya commo, anamalayeera akhwaawe anaanyema unyakulihana naatthu, hataa ukhalaka wiira ayo ananfenta Yehova, ayo mayaamunnaayo ni mayaanuunwaayo unawaarikela uwaattamela atthu oowa wiira yaalalyeere ihapari comaana. Uhookhalaru commo, ayo aanaacuwela ifayita urinaaya ula nteko woolalyeeroola ni woohihiyerera anaapanka mphantte woola ntekoola, ni Yehova naatteliya!
Nyuuva unawuucivelani ulalyeera? (Nwehe iparaagarafu 1)
2. Wakhalaka wiira khunootteelihani nrima ulalyeera, kontha isiyani nhinlamuliyeenyu ulolovaca?
2 Niireke uhotoko wuurikelani ukhala ootteeliya wuulalyeerani? Wakhala wiira iyo itthwiiyo ihopaca uwiirannyeelani, nhilolovace. Iyo itthwiiyo, pooti uthoonyera wiira nyuuva nkhanle owiiyeviha ni khannopheela wiithoonyihera ni ciicammo, khannopheela unnyakulihanana ntthu. Uhiya commo, khaavo unoncivela waakheleliya pusya, venci-venci napheelaka umpankela ntthuuyo itthu yooreera. Masi, apaapeenyu owiirimu Yehova, anaacuwela wiira iyo itthwiiyo inawuurikelani ni anaapheela wuukaviherani. (Isaa. 41:13) Nhina ula mwahoola ninaahala woona citthu 5 ninlamuliyeehu upanka wiira nikhitiri waanana ayo marikarikwaayo ni wiira nikhale ootteeliya wuulalyeerani.
NHIYE NUULUMO NA NLUKU WUULIPIHANI
3. Isiyani yankavihenre Jeremiya waalalyeera atthu?
3 Ukhuma nenne nokhalayi, Nuulumo na Nluku ninawaalipiha aswalyaawe, yapheelaka uvara nteko muulupale unvahaceriyaaya. Moone ntakihero na porofeeta Jeremiya. Uyo, aari niiwasiwaasi ukati Yehova wanrumilyaawe wiira alalyeere ihapari. Uyo eenre: “Mi akinoorya wuulumaca, kontha miiva nanlelo kimmirawo.” (Jer. 1:6) Isiyani yankavihenre Jeremiya ulipa nrima wiira alalyeere? Itthu Yehova yoolumilyaawe yahonlipiha. Uyo eenre: “Masi Nuulumo ninyu nihokhala toko mooro wanrimani waka, mpaka mmakhuvani waka ni akinkhitiri-tho uhilalya.” (Jer. 20:8, 9) Hataa ukhala wiira Jeremiya aari ncoko woorika ulalyeera, moolumo Yehova yanvahilyaawe wiira alalyeere yahonvaha ikuru wiira avare uyo ntekooyo.
4. Isiyani ineerannya nasomaka Ibiibiliya ni noopuwela itthu insomeehu? (Akolosu 1:9, 10.)
4 Ilelo ciicammo, makristau anawaakhela ikuru cimpheelaaya avarelaka nteko Ibiibiliya. Ukati Paulu antikhenlyaawe iwarakha nloko no Kolosu, uyo ahowiirela mayaamunna wiira yahaana yiitthucaka venci itthu impheelaawe Yehova, iyo yanhala waakavihera weetta ni mananna omaana a Yehova ni wiimiha mihokorokho mmitekoni motheene comaana. (Nsome Akolosu 1:9, 10. a) Nnyo miteko comaanannyo, unhela nhina nteko woolalyeera ihapari comaana. Vano, nasomaka Ibiibiliya ni nuupuwelaka itthu insomeehu, umwaamini wihu Yehova unaatepa ulipa ni ninawiiweeha nlattuni ikhanlyaaya itthu yofayita waalalyeera atthu Umwene wa Nluku.
5. Manannani ninhaleehu ukumihera ifayita usoma wihu Ibiibiliya?
5 Wiira nkumihere ifayita Nuulumo na Nluku, nsome ni muupuwele itthu insomeenyu woohaakuvyaaca. Nhisome mwaakuvyaacaka. Wakhalaka wiira nnaasoma iverusu imoca ni woohiiweeha, nhihiyerere ciicammo, uhiya commo, nvarele nteko Índice das Publicações da Torre de Vigia ou o Guia de Pesquisa para Testemunhas de Jeová wiira mphwanye utaphuleliya waya iyo iveerisikulwiiyo. Mwakumihaka ukati wiira nsome woohaakuvyaaca, kontha iyo itthwiiyo inaahala wuukaviherani wuncerera ukhuluvela winyu wiira Ibiibiliya inhimya ikhweeli. (1 Atesal. 5:21) Ukati untepeenyu ukhuluvela wiira Ibiibiliya inhimya ikhweeli, unaahala utepa wuutteelani nrima ni upheela waahimeerya akhwiinyu itthu nneetthuceenyu.
MWIITTHENKACE SAANA NHINARWA WUULALYEERANI
6. Kontha isiyani ninlamuliyeehu wiitthenkaca nihinarwaa wuulalyeerani?
6 Nyuuva mweetthenkacaka saana nhinarwa wuulalyeerani, khunhala wuurikelani uwuulumana atthwaayo. Yesu, ahaatthenkaca attharyaawe hinaaruma wuulalyeerani. (Luka 10:1-11) Ayo, yaheettela citthu cotheene Yesu caawiitthucihilyaawe. Phimaana, ayo yahotteeliya venci nlattu wo citthu cotheene caakhitinryaaya upanka.—Luka 10:17.
7. Manannani ninlamuliyeehu wiitthenkaca nihinarwaa wuulalyeerani? (Nwehe ciicammo ilatarato.)
7 Ninhala wiitthenkaca cani? Hiiva nihaana wuupuwela isiyani ninrweehu wuuluma ni nimananna owuuluma wiira nuulume khampa cinoolumaceehu khula nihuku. Ciicammo, ikhanle itthu yofayita wuupuwela citthu piili awula tthaaru comananna cinaakhulaaya atthu oncoko unkhaleehu ni ukhalana mmuru itthu inhaleehu waakhula wo khula itthu. Vano, waphiyaka ukati woomuulumana ntthu, khaninhala woova, ninaahala uthyaa ni ukhala ntthu oopatthanannya.
Mwiitthenkace saana nhinaaya urwaa wuulalyeerani (Nwehe iparaagarafu 7)
8. Manannani makristau cinlikanacaaya ni myaapu cooloko apostolu Paulu cuulumilyaawe?
8 Apostolu Paulu, ahowiirela mayamunna co: “Nihaana ula nhakhuula uheliye mmwaapuni wooloko.” (2 Akor. 4:7) Masi, nhakhu unaaciya va isiyani? Ukhanle nteko woolalyeera unoopola ukumi ni wuuluma Umwene wa Nluku. (2 Akor. 4:1) Vano, mwaapu cooloko cinaaciyannya va, cikhanle isiyani? Akhanle aswali a Nluku anaalalyeera ihapari comaana akhunanaya. Ukati waapostolu Paulu, anamatumiha yanvarela nteko ijaaru yooloko wiira ahele citthu cofayita cinene, toko iyoolya, iviinyu ni nsurukhu. Inanna imocaaru, hiiva nikhanle ijaaru cooloko, Yehova naanivarela nteko wiira nilalyeere moolumo ofayita cinene, cikhanle ihapari comaana. Nikaviheriyaka ni Yehova, hiiva nihaana ikuru impheeleehu yoohihiyerera ulalyeera ihapari comaana.
NLOMPE NLEPELAKA ULIPA NRIMA
9. Manannani ninhaleehu uhiya umoova pinaatamu awula atthu ahintthuna wiiwelela ihapari comaana? (Nwehe ciicammo ilatarato.)
9 Ikwaha cikhwaawe, pooti wanwooveehu atthu awula woova uthanyiya. Vano, ninhala waanana cani ayo marikarikwaayo? Moone mananna maapostolu yaalompilyaaya ukati weereliyaaya ahilayeere-tho. Uhiya woova ulalyeera, ayo yahonlompa Yehova yanlepelaka wiira aakavihere ‘uhihiyerera ulalyeera moolumwaawe, alipaka nrima.’ Ni Yehova, ahaakhula ayo mavekelwaayo woohipica. (Mite. 4:18, 29, 31) Waakhala wiira uwoova apinaatamu, unaawiirihani woova ulalyeera. Munlompe Yehova wiira ookavihereni wiira nifento nrineenyu naatthu nitepe ukhala nuulupale upwaha umoova winyu pinaatamu.
Nlompe nlepelaka ulipa nrima (Nwehe iparaagarafu 9)
10. Manannani Yehova cinnikaviheraawe ukhala masaahityaawe? (Isaiya 43:10-12.)
10 Yehova honithanla wiira nikhale masaahityaawe ni uyo naanikhuluveliha wiira naahala unikavihera ulipa nrima. (Nsome Isaiya 43:10-12. b) Ninaahala woona citthu 4 cinhala unikavihera ulipa nrima. Yoopacera, Yesu, ri ni hiiva ukati unlalyeereehu ihapari comaana. (Mat. 28:18-20) Yonayeeli, Yehova, horuma malayikha wiira akavihere uyo ntekooyo. (Apoka. 14:6) Yoneeraru, Yehova, naanivaha nnepa wowaarya wiira nuupuwele citthu nineetthuceehu. (Joau 14:25, 26) Yoneecese, hi nihaana mayamunneehu annikavihera ukati unlalyeereehu. Nikaviheriyaka ni Yehova ni nimayamunneehu, hi nihaana citthu cotheene cimpheeleehu para ulipa nrima ni uhihiyerera ulalyeera.
NKHALANE MOOPUWELELO OMAANA NI OWAAKUVYA
11. Manannani nnohaleenyu waaphwanya atthu mwarwaaka wuulalyeerani? (Nwehe ciicammo ilatarato.)
11 Nyuuva atthunaka nnaalolovaca nlattu wowaaphwanya atthu vakaani awula uhaaphwanya atthu mmawannyaya. Mwiikohe co: ‘Atthu oncoko unkhalaaka ari vayi ula ukatyuula?’ (Mite. 16:13) ‘Kiireke arweele mmamitekoni waya awula upacari?’ Wakhala wiira hiryaaya, niireke mwanhala waaphwanya atthu mwalalyeera mmaphironi? Munna mmoca neehaniya Joshua, heera: “Kihoonenela ukati woolalyeera, ukati kineettakacaaka upacari ni mapuro anviraviraaya atthu enci.” Uyo ni amwaarawe Bridget, anaaphwanya atthu mmawannyaya ucoocilo awula itominku uthana.—Efesu 5:15, 16.
Mwaakakhanihe ukati ni ciicammo nipuro nnolalyeereenyu (Nwehe iparaagarafu 11)
12. Manannani nnohaleenyu ucuwelela itthu ntthuuyo inaaminnyaawe ni inonhela iwasiwaasi?
12 Nyuuva mwacuwelaka wiira ntthu nnomuulumaneenyu khanwacera venci itthu nnohaleenyu uhimya, mmananihe ucuwela itthu inkupalyaawe ni inonhela iwasiwaasi. Joshua ni Bridget anaavarela nteko nikoho nimphwanyannya mmafoliyetuni. Wootakihera, avarelaka nteko ifolyetu Nyuuva nnoonela cani Ibiibiliya? Ayo aheera: “Atthu akhwaawe anawaamini wiira Ibiibiliya ikhanle Nuulumo na Nluku masi akhwaawe anawaanyihacera. Nyuuva nnoonela cani?” Iyo inaakavihera umoopana mwaha woociva ntthuuyo.
13. Nlattuni hiiva ninlamuliyeehu woona unikhumela saana nteko woolalyeera, hataa atthwaayo ahiniiwelelaka? (Miruku 27:11.)
13 Ntekweehu woolalyeera khunnikhumela saana nlattu wowiiweleliya awula mena. Kontha isiyani? Kontha hiiva nimpanka itthu Yehova ni mwanawe Yesu, impheelaawe wiira nivare ni ninawaalalyeera atthu otheene. (Mite. 10:42) Hataa nihaaphwanyaka atthu oopheela uwuulumana, awula atthwaayo khantthuna unuulumana, hiiva pooti wantteeliyeehu kontha ninaacuwela wiira ninawaatteeliha nrima Apaapeehu owiirimu.—Nsome Miruku 27:11. c
14. Kontha isiyani unaanitteela nrima nlattu munna awula nuunu amphwanyaka ntthu inoncivela ikhweeli wuulalyeerani?
14 Hiiva ciicammo ninaakhala ootteeliya munneehu awula nuunwiihu amphwanyaka ntthu nopheela wiitthuca Moolumo a Nluku wuulalyeerani. Ukhalenla naalattaniha nteko woolalyeera nuumwaavya mwaana rimenle. Atthu enci anaavara nteko wonrweela ni womwaavya mapuro oovirikana. Ni aphwanyiyaka uyo mwaanooyo, atthu otheene ankhala ootteeliya, kahi paahi ule mphwanyile. Inanna imocaaru, atthu otheene wanlokoni anaakavihera nteko woolalyeera ni ulalyeera ncoko wotheene unkhalaaya, ni atthu otheene anaatteeliya yamoonaka ntthu apaceraka woona mikutthaano co Masaahiti a Yehova.
NWEHEEHE NIFENTO NIRINEENYU NI YEHOVA NI NAATTHU
15. Manannani weettela itthu inhimyaaya Matewus 22:37-39 inhalaaya unikavihera upheela wihu ulalyeera? (Nwehe ciicammo yo wakaapani.)
15 Hiiva pooti wuncerera upheela wihu ulalyeera, noopuwelaka mananna ninonfenteehu Yehova ni atthu akhwaawe. (Nsome Matewus 22:37-39. d) Muupuwele mananna Yehova cinkhalaaya ootteeliya anoonaka navaraka nteko woolalyeera ni atthu mananna anhalaaya ukhala ootteeliya yapaceraka usoma Ibiibiliya! Muupuwele ciicammo woopoliya ni mwaaweherere ale anaakhula saana naahimeryaka ihapari comaana.—Joau 6:40; 1 Tim. 4:16.
Ninaahala utteeliya wuulalyeerani naweheehaka nifento nirineehu ni Yehova ni naatthu (Nwehe iparaagarafu 15)
16. Manannani ulalyeera unhalaaya unitteeliha nrima hataa nihikhumaka wapuwani? Ntakihere.
16 Vano, wakhalaka wiira ihaavo itthu nwiirihana uhikhuma wapuwani? Wakhala wiira inaawiirannyeela iyo, muupuwele itthu nyuuva nnolamuliyeenyu upanka wiira mmoonihere nifento ninyu Yehova ni atthu akhwaawe. Ukati woretta yo COVID-19, Samuel ni Dania, khayaakhumile uwannyaya. Ukati wotheene uyo woorikooyo, ayo yanlalyeera yanvarelaka nteko telefooni, yantikhaka iwarakha ni yansomiha Ibiibiliya anvarelaka nteko Videoconferência. Samuel Uyo ukatyuuyo anwacera irettaawe yo cancro, ukati waarwaawe usipitaali, anaalalyeera atthu otheene yaakhitiryaawe. Uyo neera: “Marikariko, pooti unooceehaca mmoopuweleloni, mwiirutthuni ni nhina mminepani wihu. Phimaana, ikhanle itthu yofayita cinene unitteeliha nrima nteko ninonvareleehu Yehova.” Uyo ukatyuuyo Dania ahowerennya myeeri miraru. Uhoolo waya, uyo aheetta nkhaterani yo maroota myeeri 6. Uyo neera: “Mi kaheekurumica upanka ile inkhitiryaaka hataa kiwerennyaka. Mi kanaalalyeera anfermera yaawa ukiweha mananna ciryaaka ni macervente. Mi kanwoopanaka myaha co mbiibiliyani kinvarelaka nteko telefooni athiyana yaakiwacera.” Nlattu wo marikariko Samuel ni Dania, khankhitiri upanka citthu toko caapankaaya khalayi, uhookhalaru commo, ayo yahopanka yaakhitinryaaya ni yahokhala ootteeliya nlattu wowaakhumela saana ntekwaaya woolalyeera.
17. Manannani nnohaleenyu ukumihera ifayita miruku co ula mwahoola?
17 Mmananihe weettela miruku 5 cihimiye nhina ula mwahoola. Wokhula nruku unlikanaca ni citthu cinheliya mmathapani wiira acive. Natakaniheraka citthu cotheene, khweeliini mathapaayo anaaciva! Neettelaka miruku cotheene, ninhala ukhala owiitthenkaceene wiira naanane moopuwelelo oohiloka ni ninaahala utteeliya venci ni ntekweehu woolalyeera.
MANANNANI NNYA MIRUKUNNYA CINHALAAYA WUUKAVIHERA UKHALA OOTTEELIYA WUULALYEERANI?
-
Ukumiha ukati wiira niitthenkace
-
Nilompaka nilepelaka ulipa nrima
-
Niweheehaka nifento nirineehu ni Yehova ni naatthu
NCIPO 80 Mweererye, ni Moone Wira Yehova Tooloka
[Mawehero]
a Akolosu 1:9 Hataa phimaana, ukhuma nihuku niiwaleehu iyo, khanihiile wuulompelani ni ulepela wiira ntepe ucuwela ikhweeli nhina itthu impheelaawe, nthoonyeraka ucuwelaca ni wiiweeha myaha coominepani, 10 wiira nkhalane meettelo oophwanela uhoolo wa Yehova, wiira muntteelihe nrima ratta-raatta, ukati uhinhiyeenyu wiimiha mihokorokho nhina miteko comaana cotheene ni wuncerera ucuwela ikhweeli ya Nluku.
b Isaiya 43:10 Nyuuva nkhanle masaahityaaka, neera Yehova, Iyee, nantekwaaka nthanlalyaaka, wiira nyuuva nkicuwele ni nkaamini, Ni ncuweleehe wiira thimivano. Kihinatthi ukhala khaarivo-tho Nluku ni kakhaleru khanakhumelela-tho nkina. 11 Miiva Yehova, ni kaahikhale mi khaawo moopoli. 12 Miiva kiholalyaa, kihoopola ni kiholalyeera nnyo waaryeenyu nhinakhalana Nluku nkhwaawe. Yehova neera coo: Nyuuva nnokhala masaahityaaka, ni miiva Kinluku.
c Miruku 27:11 Ukhalane ankhili, mwanaka, wankitteelihaa nrima, wiira kimwaakhule ule nkiveehaca.
d Matewus 22:37 Woomwaakhula, eerale co: Unfente Yehova, Nlukwaa ninrimaa wotheene, niiroohwaa yotheene ni nimuupuwelelwaa otheene. 38 Nna nlamulo nna phinuulupale ni phiri noopacera. 39 Nonayeeli ninlikana ni nno, thinna: Unfente nkhunanaa toko cineefentaa.
