1. Молан южыштлан таныклаш огеш келше? (Тыгак сӱретым ончыза.)

 ИЕГОВАН служитлышыже семын ме кавасе Ачанам йӧратена да мемнан тудын нерген весе-влаклан каласкалымына шуэш. Уверзе-влак гыч шукыштлан таныклаш чот келша. Но южыштлан тиде пешыжак шуко куаным огеш кондо. Молан? Иктышт чот вожылыт да шкеныштым сай туныктышылан огыт шотло. Весышт шонат: «Айдеме мыйым ӱжын огыл гын, кузе мый тудын дек мием?» Еҥ-влак колышташ огыт тӱҥал але вурсаш тӱҥалыт манын, иктажше лӱдеш. Тыгай-влакат улыт, кӧ нунын дене религий нерген ӱчашаш тӱҥалыт манын лӱдеш. Чыла нине иза-ака-влак Иеговам чот йӧратат. Но палыдыме еҥ-влак дене Библий нерген мутланаш нунылан йӧсӧ. Туге гынат нуно умылат, мыняр чот тиде паша кӱлешан да сандене тиде пашаште эре тыршат. Иегова нунын дене чот кугешна.

2. Служымаш тыланда куаным огеш кондо гын, молан кидым волтыман огыл?

² А тыланда служымаш куаным конда мо? Южгунам огеш кондо гын, киддам ида волто. Шке моштымашлан ӱшаныдымаш ӱҥышӧ улмыдам ончыктен кертеш. Тыгак те ӱчашаш ода йӧрате да шке дек шуко вниманийым ода вучо манын, тиде ончыктен кертеш. Мутат уке, куаным огеш кондо, кунам еҥ-влаклан сайым каласкалымына шуэш, а нуно мемнам вурсат да огыт колышт. Кавасе Ача тендан шижмашдам умыла да тыланда полшаш сӧра (Ис. 41:13). Тиде статьяште ме ончен лектына вич йӧным, кузе тиде уда шижмашым сеҥаш да служымашым йӧратен налаш.

 ЮМЫН МУТШЫЛАН ТЕНДАМ ПЕҤГЫДЕМДАШ ПУЫЗА

3. Йӧсӧ территорийыште таныклаш Иеремия пророклан мо полшен?

³ Ожно жапыштат Иегова служитлышыже-влаклан проста огыл заданий-влакым пуэн. Нине заданий-влакым шукташ нунылан мо полшен? Нунылан Юмын мутшо-влак вийым пуэныт. Иеремиян примержым ончалына. Иегова тудлан таныклаш кӱштен. Но Иеремия шонен, пуйто тидлан йӧрышӧ огыл. Тудо каласен: «Мый ойлен ом мошто, вет мый пеш самырык улам» (Иер. 1:6). Шке моштымашлан ӱшаныдымыжым сеҥаш тудлан мо полшен? Юмын Мутшо. Иеремия каласен: «Тудо луыштем тул семын лийын, да мый тудым кӧргыштем кучен ноенам» (Иер. 20:8, 9). Чын, Иеремия йӧсӧ территорийыште таныклышаш ыле. Но Иегован ӱшанен пуымо уверже тудым вияным да лӱддымым ыштен.

4. Юмын Мутшым лудмаш да лудмо нерген шонкалымаш могай пайдам кондат? (Колоссян-влаклан 1:9, 10).

⁴ Юмын Мутшо гыч увер икымше христиан-влакланат вийым пуэн. Колоссышто лийше погынымашлан апостол Павелын каласымыж дене келшышын, Иегован эрыкше нерген шукырак пален налын, иза-влак тӱрлӧ порым ыштен кертыныт да тыге Иегован служитлышыже лиймыштым ончыктеныт. (Колоссян-влаклан 1:9, 10 лудын лекса.) Тыгай порым ыштымаш-влак гыч иктыже — поро уверым каласкалымаш. Кунам ме Юмын Мутшым шымлена да лудмо нерген шонкалена, тунам Иеговалан ӱшанымашна эше чотрак пеҥгыдемеш да ме сайрак умылена, мыняр чот Юмын Кугыжанышыже нерген еҥ-влаклан каласкалаш кӱлеш.

5. Библийым лудмаш да шымлымаш мыланна шукырак пайдам кондышт манын, мом ышташ?

⁵ Юмын Мутшо мыланна шукырак пайдам кондыжо манын, тудым вашкыде лудаш, шымлаш да лудмо нерген шонкалаш кӱлеш. Лудмо годым умылыдымо почеламутым вашлийыда гын, тудым эртен ида кай, чарныза. «Индекс публикаций Сторожевой башни» але «Путеводитель по публикациям Свидетелей Иеговы» полшымо дене умылтарымашым кычалза. Вашкыде шымлымылан кӧра те эше чотрак ӱшанен налыда: мом Юмын Мутшо ойла, тиде чын (1 Фес. 5:21). Мыняр чотрак те тидлан ӱшанеда, тынар чотрак тендан кумылда лиеш еҥ-влакым Библий дене палымым ышташ.

 ТАНЫКЛЫМЫЛАН САЙЫН ЯМДЫЛАЛТСА

6. Молан таныклымылан сайын ямдылалташ кӱлеш?

⁶ Таныклымылан сайын ямдылалтыда гын, шагалрак тургыжланаш тӱҥалыда да тыланда еҥ-влак дене мутланаш куштылгырак лиеш. Иисус тунемшыже-влакым таныклаш колтымо деч ончыч нунылан таныклымашлан ямдылалташ полшен (Лук. 10:1—11). Нуно ойлымыжо почеш ыштеныт. Тидлан кӧра служымаш моткоч сай лектышым конден, да тунемше-влак чот куаненыт (Лук. 10:17).

7. Кузе таныклымылан ямдылалташ? (Тыгак сӱретым ончыза.)

⁷ Кузе таныклымылан ямдылалташ? Мом ойлаш да кузе тидым шке мут дене каласаш, шоналтыза. Тыгак шоналтыза, ойлымыланда еҥ-влакын могай реакцийышт лийын кертеш? Кажне тӱрлӧ реакций годым мом те вашештеда, шонкален налза. Вара таныклыме годым тыланда лыпланаш, шыргыжаш да поро лияш гына кодеш.

8. Молан апостол Павел христиан-влакым шун ате-влак дене таҥастарен?

⁸ Апостол Павел иза-ака-влаклан возен: «Тиде поянлык мемнан шун атыште уло» (2 Кор. 4:7). Тиде поянлык мо тыгай? Мемнан шергакан служымашна (2 Кор. 4:1). Вет Юмын Кугыжаныш нерген уверым каласкален, ме еҥ-влакын илышыштым утарена. Шун ате-влак кӧм ончыктат? Юмын служитлышыже-влакым. Молан Павел тыгай таҥастарымашым конден? Тудын жапыштыже сатучо-влак корнышто шергакан сатум, мутлан кочкышым, йошкар аракам да оксам, шун атыште кученыт. Тидын семынак Иегова мыланна шергакан поро уверым ӱшанен пуэн. Тудын полшымыж дене ме поро уверым каласкалымаш заданийым шуктен кертына.

ЛӰДДЫМЫЛЫК НЕРГЕН КУМАЛЗА

9. Еҥ-влак дене мутланаш лӱдына гын, мом ышташ? (Тыгак сӱретым ончыза.)

⁹ Еҥ-влак мыланна удам каласат але ыштат манын шонымо верч ме нунын дене южгунам мутланаш лӱдына. Тиде лӱдмашым сеҥаш мыланна мо полша? Шарналтыза, мо нерген апостол-влак кумалыныт, кунам нунылан таныклаш чареныт. Нуно лӱдмашыштлан шкем авалташ пуэн огытыл. А тидын олмеш Иеговам йодыныт:  «Тарзет-влаклан Тыйын шомакетым лӱдде ойлаш вийым пу». Юмо кумалмыштлан вашмутым вигак пуэн (Ап. паш. 4:18, 29, 31). Южгунам еҥ-влак деч лӱдмаш мыланна таныклаш мешая. Еҥ-влакым йӧратымым кушташлан мыланна Иегова деч полышым йодаш кӱлеш. Тиде йӧратымаш чыла лӱдмашым сеҥаш полша.

10. Кузе Иегова мыланна тудын Таныкше лияш полша? (Исайя 43:10—12).

¹⁰ Иегова мыланна тудын Таныкше лияш чапым пуэн да тудо мыланна лӱддымӧ лияш полшаш сӧра. (Исайя 43:10—12 лудын лекса.) Ончалына ныл йӧным, кузе тудо тидым ышта. Икымше, поро уверым таныклыме годым ме шкетын огынал — мемнан дене пырля Иисус (Матф. 28:18—20). Кокымшо, Иегова мыланна полшашлан суксо-влакым колта (Почм. 14:6). Кумшо, Иегова мыланна святой шӱлышым пуа, кудыжо шарныктен кертеш, мом ме уже палена (Иоан. 14:25, 26). Нылымше, таныклымаште пырля тыршашлан Иегова иза-ака-влакым пуэн. Иегован да иза-ака-влакын полшымышт дене ме чылажымат ыштен кертына.

ЛЫВЫРГЕ ЛИЙЗА ДА КИДЫМ ИДА ВОЛТО

11. Таныклымына годым еҥ-влак мӧҥгыштышт уке улыт гын, мом ышташ? (Тыгак сӱретым ончыза.)

¹¹ Мом те шижыда, кунам еҥ-влак дек мӧҥгышкышт толыда, а нуно уке улыт? Кидда вола мо? Тунам шке деч йодса: «Кушто кызыт нине еҥ-влак улыт? Можыч нуно эше пашаште улыт але кевытыш каеныт?» (Ап. паш. 16:13). Тыгай годым уремыште таныклаш лиеш. Тушто те участок дене таҥастарымаште шукырак еҥым вашлийыда. Джо́шуа лӱман иза ойла: «Мыланем сатулымо рӱдерыште да парковкышто таныклаш келша». Тудо да Бри́джит ватыже участокыш кастене да рушарнян кечывалым мияш тыршат. Тыгай жапыште еҥ-влак чӱчкыдын мӧҥгыштӧ улыт. Сандене нунын дене мутланаш йӧн лийын кертеш (Еф. 5:15, 16).

12. Поро увер еҥ-влаклан оҥай огыл гын, мом ышташ лиеш?

¹² Поро увер еҥ-влаклан оҥай огыл гын, умылаш тыршыза, мо́лан нуно ӱшанат але мо нуным тургыжландара. Теве мом Джошуа ден Бриджит ыштат. Нуно буклетна-влакыште икымше страницыште печатлыме  йодыш гыч мутланымашым тӱҥалыт. Мутлан, «Мо тыгай Библий?» буклетым кучылтын, нуно ойлат: «Южышт шонат: Библий — тиде Юмын Мутшо. Весышт тидлан огыт ӱшане. А мом те шонеда?» Тидлан кӧра чӱчкыдын сай мутланымаш лектеш.

13. Еҥ-влак мемнам огыт колышт гынат, молан ме куаным она йомдаре? (Притчи 27:11).

¹³ Таныклымына годым еҥ-влак мемнам огыт колышт гынат, ме цельышкына шуына. Тӱҥжӧ — Иегован да Эргыжын йодмыштым шуктена, а нуно мемнан деч таныклымым вучат (Ап. паш. 10:42). Икте денат мутланымаш огеш лек гын, ме куаным она йомдаре. Вет ме палена: кавасе Ачанам куандарена. (Притчи 27:11 лудын лекса.)

14. Айдемым, кудыжо чыным пален налнеже, ме огыл, а иктаж-кӧ весе муэш гын, молан ме куанен кертына?

¹⁴ Айдемым, кудыжо чыным пален налнеже, ме огыл, а иктаж-кӧ весе муэш гын, ме тыгак куанен кертына. «Орол башньыште» мемнан пашана йомшо йочам кычалме дене таҥастаралтын. Кычалмаште шуко еҥ вийым пышта. Нуно кажне районым тӱткын тергат. Кунам йочам муыт, йочам мушо айдеме гына огыл, а чыланат куанат. Тыгакак тунемшым ямдылымаш паша — тиде уло командын пашаже. Погынымаште кажныже вийым пышта. Погынымашын территорийыштыже чыла еҥлан таныклашлан мыланна кажне уверзын полшымыжо чотак кӱлешан. Ме чыланат куанена, кунам вашлиймашыш у айдеме толеш.

ИЕГОВАМ ДА ЕҤ-ВЛАКЫМ ЙӦРАТЫЗА

15. Кузе Матфейын 22:37—39 гыч принцип мыланна служымаш деч шукырак куаным налаш полша? (Тыгак журнал комышто сӱретым ончыза.)

¹⁵ Иеговам да лишылна-влакым йӧратымаш икымше верыште лиеш гын, служымаш мыланна шукырак куаным кондаш тӱҥалеш. (Матфейын 22:37—39 лудын лекса.) Шоналтыза гына, кузе Иегова куана, кунам мемнам служымаште ужеш! Мыняр шуко куаным налыт еҥ-влак, кунам Библийым шымлаш тӱҥалыт! А эше шкаланда шарныктыза: кӧ увернам колыштеш да Иеговалан служитлаш шонен пышта, курымеш илен кертеш (Иоан. 6:40; 1 Тим. 4:16).

16. Пӧрт гыч лектын она керт гынат, служитлымаште куаным муашлан мом ыштен кертына? Пример-влакым кондыза.

¹⁶ Очыни, те иктаж-могай амаллан кӧра  пӧрт гыч лектын ода керт. Тиде тыге гын, те садак Иегова деке да лишыл деке йӧратымашым ончыктен кертыда. Ковид пандемий годым Самве́л ден Да́ния пӧрт гыч лектын кертын огытыл. Ту жапыште нуно чӱчкыдын телефон дене таныкленыт, серыш-влакым возеныт да зум гоч Библий шымлымашым эртареныт. Самвел рак деч больницыште эмлалтын да кӧм тушто вашлийын, нунылан таныклен. Тудо ойла: «Нелылык верч эмоциональный, физический да духовный шотышто вийым йомдараш огыл манын, мыланна Иеговалан служитлымылан куанаш кӱлеш». Тыгак Дания камвозын да кум тылзе койкышто киен. Тидын деч вара тудо пел ий инвалид кресле дене гына коштын кертын. Тудо манеш: «Мый шонаш тыршенам, мом мый ыштен кертам. Мый декем толшо медсестралан таныкленам да доставщик-влак дене мутланенам. А эше мыйын ик медицин фирме гыч ӱдырамаш дене телефон дене сай мутланымаш-влак лийыныт». Самвел ден Дания ончычсо семынак ыштен кертын огытыл, сандене нуно ыштен кертмым ышташ тыршеныт да тидлан куаненыт.

17. Тиде статья гыч каҥаш-влак мыланна шукырак пайдам кондышт манын, мом ыштыман?

¹⁷ Тиде статьяште палемдыме чыла вич каҥашым кучылташ тыршыза. Тидым рецепт дене таҥастараш лиеш. Кочкыш тамле лекше манын, ик ингридиент нергенат мондаш огеш кӱл. Тиде статья гыч чыла каҥашым кучылтына гын, тиде мыланна уда шижмаш дене кучедалаш полша да служитлымаш мыланна шукырак куаным кондаш тӱҥалеш.