1. ¿Kenijkatsa kiyolmatij se keskij toikniuaj kema tlajtolmoyauaj? (Nojkia xikita tlaixkopinkayotl).

 JEHOVÁ itlajtoltemakauaj titlajtolmoyauaj pampa tikikneliaj Jehová uan pampa tijnekij maseualmej ma kiixmatikaj. Maske sekij toikniuaj tlauel kinpaktia tlajtolmoyauasej, amo nochi kiampa kinpano. ¿Kenke amo nochi sanse kiyolmatij? Pampa sekij pinauaj uan moiljuiaj amo kuali tlajtolmoyauaj. Sekij amo kuali kiyolmatij kipaxalotij se akajya tlaj amo kinnotstok. Sekij majmauij pampa moiljuiaj amo kintlakakilisej. Uan sekij amo kinekij mokamaijixnamikisej ininuaya sekinok. Nochi ni toikniuaj tlauel kiikneliaj Jehová, pero kimatij ouij kinkamanaljuisej tlen Biblia katli amo kinixmatij. Maske kiampa kiyolmatij, nochipa kichiuaj kampeka tlajtolmoyauasej pampa kimatij tlauel ipati kichiuasej ni tekitl. ¡Jehová tlauel yolpaki pampa kiampa kichiuaj!

2. ¿Kenke amo kinamiki timokuesos tlaj tijmati ouij titlajtolmoyauas?

² ¿Nojkia mitspano kej toikniuaj katli tikijtojkej? Tlaj  kiampa mitspano, amo ximotekipacho. Uelis kiampa tijyolmati pampa amo timoueyimati. O uelis amo tijneki san ta ma mitsitakaj yon timokamaijixnamikis ininuaya maseualmej. Nochi tijnekij tikinpaleuisej maseualmej, yeka amo techpaktia kema amo techtlakakiliaj. Motata Jehová kimati tlake tikixnamiki kema titlajtolmoyaua uan kineki mitspaleuis (Is. 41:13). Ipan ni tlamachtili tikitasej makuili tlamantli tlen techpaleuis ayokmo kiampa ma tijyolmatikaj uan más ma tiyolpakikaj kema titlajtolmoyauaj.

TOTEOTSIJ ITLAJTOL MITSMAKAS CHIKAUALISTLI

3. ¿Tlake kipaleuik Jeremías nojua ma tlajtolmoyaua?

³ Miak xiuitl toTeotsij iTlajtol kinpaleuijtok itekipanojkauaj kema kinmakakej se tekitl tlen ouij. Ma timoiljuikaj ipan teokamanalojketl Jeremías. Kema Jehová kiiljuik ma tlajtolmoyauati, majmajki uan kiijtok: “Axuelis nikamatis para ta pampa tlauel nikonetelpokatl” (Jer. 1:6). ¿Tlake kipaleuik ayokmo majmauis? ToTeotsij iTlajtol kimakak chikaualistli. Ya kiijtok: “Motlajtol eltok [ . . . ] keja se tlitl tlen kitlatia noomiyouaj. Uan yonke nijchiua kampeka para nikijiyouis uan axnikinkamauis tlakamej, axniueli” (Jer. 20:8, 9). Jeremías amo kitlakakiliyayaj kampa tlajtolmoyauayaya, pero tlen toTeotsij kiiljuijtoya ma kinmatilti maseualmej, kimakak chikaualistli para uelis kichiuas nopa tekitl.

4. ¿Kenijkatsa techpaleuia kema timomachtiaj uan timoyoliljuiaj ipan toTeotsij iTlajtol? (Colosenses 1:9, 10).

⁴ Tojuantij nojkia tlauel techyolchikaua tlen Biblia tlamachtia. Kema apóstol Pablo kintlajkuiljuilik toikniuaj tlen Colosas, kiniljuik toTeotsij iTlajtol ueliskia kinyololinis kuali ma monejnemiltikaj uan ma kinchiuilikaj sekinok tlen kuali (xijpoua Colosenses 1:9, 10). Uan kema titlajtolmoyauaj, kiampa tijchiuaj. Kej tikitaj, kema timomachtiaj toTeotsij iTlajtol uan timoyoliljuiaj, más timotemachiaj ipan Jehová uan tijkuamachiliaj kenke tlauel ipati titlajtolmoyauasej.

5. ¿Tlake techpaleuis kuali ma timomachtikaj Biblia?

⁵ Tlaj tijneki ma mitspaleui toTeotsij iTlajtol, amo ximoisiuilti kema titlapouas, timomachtis uan timoyoliljuis. Uan, ¿tlake uelis tijchiuas tlaj tijpantis se texto tlen amo tijkuamachilia? Amo san kiampa xijkaua uan xijtemo tlake kiijtosneki ipan Índice de las publicaciones Watch Tower o ipan Tlen ika momachtiaj Jehová itlajtoltemakauaj. Tlaj kuali  timomachtia, nojua tlauel timotemachis ipan toTeotsij iTlajtol (1 Tes. 5:21). Uan tlaj más timotemachia ipan Biblia, más mitspaktis tikinpouilis sekinok tlen Biblia kiijtoua.

ACHTOUI KUALI XIMOKUALCHIJCHIUA

6. ¿Kenke moneki kuali timokualchijchiuasej kema titlajtolmoyauatij?

⁶ Tlaj achtoui kuali timokualchijchiuas, amo timajmauis kema tikamanaltis ininuaya maseualmej. Jesús kinkualchijchijki itokilijkauaj uan teipa kintitlanki ma tlajtolmoyauatij (Luc. 10:1-11). Uan pampa kichijkej tlen Jesús kinmachtik, tlauel yolpajkej pampa kuali kiski ininteki (Luc. 10:17).

7. ¿Kenijkatsa uelis timokualchijchiuasej para titlajtolmoyauatij? (Nojkia xikita tlaixkopinkayotl).

⁷ Kema timokualchijchiuasej para titlajtolmoyauatij ma timoiljuikaj kenijkatsa tikixtomasej ika totlajtol nopa tlamachtili tlen melauak. Kualtiaskia ma timoiljuikaj kenijkatsa technankiliaj se keskij maseualmej kema titlajtolmoyauaj uan kenijkatsa uelis tikinnankilisej. Tlaj kiampa tijchiuasej, techpaleuis amo timajmauisej, tiixuetskasej uan kuali tikinnojnotsasej.

8. ¿Kenke Cristo itokilijkauaj elij kej sokichachapali?

⁸ Apóstol Pablo kitekiuik se neskayotl tlen kinextia tlake tekitl tijchiuaj kema titlajtolmoyauaj, ya kiijtok: “Tijpiaj iricojyo Toteko ipan ni totlakayo tlen axkipia chikaualistli. Tiitstokej keja sokichachapali” (2 Cor. 4:7). ¿Tlake eli “iricojyo Toteko”? Eli nopa kuali tlamachtili tlen iTlanauatijkayo Dios, tlen uelis kichiuas ma momanauikaj maseualmej (2 Cor. 4:1). ¿Uan tlake eli nopa sokichachapali? Tielij nochi Jehová itekipanojkauaj katli tijmoyauaj nopa kuali tlamachtili. Kema itstoya Pablo, tlanamakanij kiuikayayaj tlamantli tlen tlauel ipati ipan sokichachapali, kej tlakualistli, vino o tomij. Nama Jehová nojkia techmakatok se tlamantli tlen tlauel ipati: nopa kuali tlamachtili tlen iTlanauatijkayo. Uan ueli tijmoyauaj ni kuali tlamachtili, pampa ya techpaleuia.

XIKILJUI TOTEOTSIJ MA MITSPALEUI AMO TIMAJMAUIS

9. ¿Tlake techpaleuis amo ma timajmauikaj kema titlajtolmoyauaj? (Nojkia xikita tlaixkopinkayotl).

⁹ Kemantika uelis timajmauij pampa timoiljuiaj maseualmej amo kuali techtlakakilisej. ¿Tlake techpaleuis tlaj kiampa techpano?  Ma timoiljuikaj ipan nopa tlamaijtoli tlen kichijkej apóstoles kema kiniljuijkej ayokmo ma tlajtolmoyauakaj. Inijuantij amo kikajkej majmajtli ma kintsakuili uan kiiljuijkej Jehová ma kinpaleui nojua tlajtolmoyauasej uan amo majmauisej, uan ya nima kinnankilik (Hech. 4:18, 29, 31). Kema timajmauisej, ma tijtlajtlanikaj Jehová ma techpaleui. Uan ma tikiljuikaj ma techpaleui más tikiniknelisej maseualmej, kiampa amo timajmauisej kema titlajtolmoyauasej.

10. ¿Ika tlake tlamantli Jehová techpaleuia ma tielikaj itestigos? (Isaías 43:10-12).

¹⁰ Jehová techkajtok ma tielikaj itestigos (xijpoua Isaías 43:10-12). Uan kiijtojtok techpaleuis amo ma timajmauikaj. Ma tikitakaj naui tlamantli tlen ika techpaleuia. Se, Jesús itstok touaya kema titlajtolmoyauaj (Mat. 28:18-20). Ome, Jehová kinnauatijtok iángeles ma techpaleuikaj (Apoc. 14:6). Eyi, techmaka ichikaualis uan nopa kichiua ma tikilnamikikaj tlen timomachtijtokej (Juan 14:25, 26). Uan naui, techmakatok toikniuaj para ininuaya ma titlajtolmoyauakaj. Ika Jehová itlapaleuil uan ika toikniuaj, kuali tijchiuasej toteki uan amo timajmauisej.

XIJPATLA KEJ TITLAJTOLMOYAUA UAN XIMOILJUI KEJ KINAMIKI

11. ¿Tlake uelis tijchiuasej para tikinpantisej más maseualmej? (Nojkia xikita tlaixkopinkayotl).

¹¹ ¿Timoyolkokoua pampa amo tikinpantia maseualmej ininchaj? Tlaj kiampa mitspano, ximotlajtlani: “¿Kanke itstokej? ¿Tekitij o yajtokej tlakouaj?” (Hech. 16:13). Uelis titlajtolmoyauas ojtipa. Se toikni katli itoka Joshua, kiijtoua: “Tlauel nechpaleuijtok kema nitlajtolmoyaua kampa tlanamakaj uan kampa panoj miakej maseualmej”. Ya uan isiua Bridget kinpantiaj más maseualmej ininchaj kema kinpaxalouaj ika tiotlak uan domingos kema ya panok tlajkotona (Efes. 5:15, 16).

12. ¿Kenijkatsa uelis tijmatisej tlake kineltokaj uan tlake kinekij kimatisej maseualmej?

¹² Tlaj maseualmej amo kinekij techtlakakilisej kema titlajtolmoyauaj, ma tikitakaj tlake kineltokaj uan tlake kintekipachoua. Joshua uan Bridget kitekiuiaj nopa tlajtlanili tlen uala ipan pilamatsitsij tlen tijtekiuiaj kema titlajtolmoyauaj. Se neskayotl, kema temakaj  pilamatsi ¿Tlake timoiljuia ijkuilijtok ipan Biblia?, kiijtouaj: “Sekij maseualmej kineltokaj Biblia eli toTeotsij iTlajtol uan sekij amo. Uan ta, ¿tlake timoiljuia?”. Nopa kinpaleuijtok ma kamanaltikaj ininuaya maseualmej.

13. ¿Kenke tijchiuaj se kuali tekitl kema titlajtolmoyauaj maske amo aka techtlakakilia? (Proverbios 27:11).

¹³ Tlaj amo miakej mitstlakakilijkej kema titlajtolmoyajki, amo kiijtosneki amo kuali tijchijki moteki. ¿Kenke? Pampa tlen más ipati eli titlajtolmoyauasej kej Jehová uan Jesús techiljuiaj (Hech. 10:42). Uajka amo tlauel ma timotekipachokaj tlaj amo tikinpantiaj maseualmej o amo kinekij techtlakakilisej. Jehová nochipa yolpaktos touaya pampa tijchiuaj kampeka titlajtolmoyauasej (xijpoua Proverbios 27:11).

14. ¿Tlake tijyolmatij kema se toikni kipantia se akajya katli kineki momachtis Biblia uan kenke kiampa tijyolmatij?

¹⁴ Nochi tiyolpakij kema se toikni kipantia se akajya katli kineki momachtis Biblia. Tlen Tematiltia kiijtoua tlen tijchiuaj eli sanse kej kema kitemouaj se okichpil katli mokuapolojtok. Miakej kampa ueli kitemojtinemij. Uan kema kipantiaj, nochi yolpakij uan amo san katli kipantik. Nojkia kiampa pano kema titlajtolmoyauaj, pampa nochi timopaleuiaj, yeka ueli titlajtolmoyauaj ipan miak altepemej, uan nochi tlauel tiyolpakij kema se akajya peua yaui tlanechikoli.

XIKIKNELI JEHOVÁ UAN MASEUALMEJ

15. ¿Tlake techpaleuis tlauel tijnekisej titlajtolmoyauasej? (Mateo 22:37-39; nojkia xikita tlaixkopinkayotl).

¹⁵ Nojua tlauel techpaktis titlajtolmoyauasej tlaj timoiljuisej titlajtolmoyauaj pampa tikikneliaj Jehová uan tikinikneliaj maseualmej (xijpoua Mateo 22:37-39). Ximoiljui kenijkatsa Jehová tlauel yolpaki kema techita titlajtolmoyauaj uan kenijkatsa yolpakisej maseualmej katli peuasej momachtisej Biblia. Uan xikilnamiki, katli kitekipanosej Jehová, momanauisej (Juan 6:40; 1 Tim. 4:16).

16. ¿Kenijkatsa uelis tiyolpakisej kema titlajtolmoyauaj maske amo ueli tikisaj tochaj? Xikijto se neskayotl.

¹⁶ ¿Uan tlaj amo ueli tikisa mochaj? Uajka ximosentlali tijchiuas nochi tlen tiueli para tijnextis tikiknelia Jehová uan maseualmej. Kema momoyajtoya COVID-19, Samuel  uan Dania monejki mokauasej ininchaj. Ipan nopa tonali tlajtolmoyauayayaj ika teléfono, kiijkuilouayayaj cartas uan tlamachtiyayaj ipan Zoom. Nojkia, Samuel tlajtolmoyauayaya ipan clínica kampa kipajtiyayaj pampa kipixtoya cáncer. Ya kiijtoua: “Tlaouijkayotl uelis kichiuas ma tisiauikaj, ma timoiljuikaj tlen amo kinamiki uan ayokmo kuali ma titlaneltokakaj. Yeka moneki tijtekipanosej Jehová, pampa nopa kichiua ma tiyolpakikaj”. Uan kema kiixnamiktoyaj ni kuesoli, Dania uetski uan monejki amo tleno kichiuas eyi metstli. Teipa monejki kitekiuis silla de ruedas tlajko xiuitl. Ya kiijtoua: “Nijchijki kampeka nijchiuas tlen niueliyaya. Uelki nikamanalti iuaya se enfermera katli nechpajtiyaya, uan nojkia ininuaya tlanamakanij katli ualayaya nochaj. Nojkia uelki nikamanalti ika teléfono iuaya se siuatl katli tekiti ininuaya tepajtianij”. Maske Samuel uan Dania kipiayayaj tlaouijkayotl, tlauel yolpakiyayaj pampa kichiuayayaj nochi tlen ueliyayaj.

17. ¿Tlake moneki tijchiuasej tlaj tijnekij ma techpaleui tlen tikitakej ipan ni tlamachtili?

¹⁷ Tlauel techpaleuis tlaj tijchiuasej nochi tlen nikaj timomachtijkej. Sejse tlamantli tlen nikaj tikitakej eli kej tlen motekiuia kema kichijchiuaj se tlakualistli. Kema kimanelouaj nochi nopa tlamantli, ajuiyak mokaua nopa tlakualistli. Tlaj tijchiuasej nochi tlen nikaj tikitakej, techpaleuis amo ma timoiljuikaj tlen amo kinamiki uan tiyolpakisej kema titlajtolmoyauasej.