1. Yamwe ohaya kala ye uvite ngiini, uuna taya uvithile yalwe miilonga yokuuvitha? (Tala wo ethano.)

 TU LI oshigwana shaJehova ohatu uvithile yalwe, molwaashoka otu hole Tate yetu gwomegulu notwa hala oku ya kwathela ye mu tseye. Aauvithi oyendji ohaya nyanyukilwa lela iilonga yokuuvitha. Ihe yalwe ohaya mono oshidhigu oku yi nyanyukilwa. Omolwashike mbela? Yamwe otashi vulika ye na oohoni unene noye uvite kutya kaye shi aauvithi aawanawa. Yamwe ohaya kala ye uvite inaaya manguluka okuya komagumbo gaantu inaaya ithanwa ko. Yamwe otashi vulika ya kale ya tila okukala inaaya taambiwa ko. Yamwe oya longwa okuyanda okuuvitha yalwe nayi. Nonando aamwatate naamwameme mbaka oye hole Jehova noonkondo, ohaya mono oshidhigu okupopya naantu mboka kaaye shi kombinga yonkundana ombwanawa. Ihe nando ongawo, oye shi kutya iilonga mbyoka oya simana nohaya kutha ombinga aluhe muyo. Jehova iha kala tuu e ya nyanyukilwa!

2. Ngele oho mono oshidhigu okukala wa nyanyukwa sho to uvitha, omolwashike kuu na okuteka omukumo?

² Mbela omathimbo gamwe oho mono oshidhigu okukala wa nyanyukilwa iilonga yokuuvitha molwomaiyuvo ga tya ngawo? Ngele osho, ino teka omukumo. Okukala wu uvite ngawo otashi vulika tashi ulike kutya owa ifupipika noino hala okugandja eitulomo olindji kungoye mwene, notashi ulike wo kutya ino hala okutamanana naantu. Kapu na gumwe a hala okugeyitha yalwe, unene tuu ngele ota kambadhala oku ya ningila uuwanawa. Tate yetu gwomegulu oku shi nawa omashongo agehe ngoka wa taalela nokwa hala oku ku kwathela. (Jes. 41:13) Moshitopolwa shika otatu ka kundathana kombinga yomaetopo gatano gankene tu na okuungaunga nomaiyuvo ga tya ngawo, nonkene tu na okukala twa nyanyukwa sho tatu uvitha.

 OOHAPU DHAKALUNGA NADHI KU NKONDOPALEKE

3. Oshike sha li sha kwathele omuhunganeki Jeremia a uvithile aantu?

³ Nokuli monakuziwa etumwalaka lyaKalunga olya li lya nkondopaleke aapiya ye ya gwanithe po iinakugwanithwa yawo iidhigu. Natu taleni koshiholelwa shomuhunganeki Jeremia. Okwa li ta kakadhala sho Jehova e mu pe oshinakugwanithwa shokuuvitha. Jeremia okwa ti: “Kandi shi okupopya, oshoka ngame omunona.” (Jer. 1:6) Oshike sha li she mu kwathele a kale e na uulaadhi wokuuvitha? Okwa li a nkondopalekwa kwaashoka Kalunga e mu lombwele. Jeremia okwa ti: “Etumwalaka lyoye olya fa omulilo gwa hwama meni lyandje.” (Jer. 20:8, 9) Nonando Jeremia okwa li ha longo moshitopolwa mu na aantu ihaaya pulakene, etumwalaka ndyoka a pewa a uvithe, olye mu nkondopaleke a vule okulonga iilonga mbyoka.

4. Oshike hashi ningwa po, uuna twa lesha Oohapu dhaKalunga nokutedhatedha kudho? (Aakolossa 1:9, 10)

⁴ Aakriste ohaya mono oonkondo okuza mOohapu dhaKalunga. Sho omuyapostoli Paulus a li a nyolele egongalo lyokuKolossa okwa ti kutya aamwahe ngele oya kala ye na ontseyo yashili, otashi ke ya inyengitha ya ‘vule okukala ngashika Omuwa a hala ya kale,’ sho taya tsikile ‘okulonga aluhe shoka she mu opalela.’ (Lesha Aakolossa 1:9, 10.) Iilonga iiwanawa mbyoka oya kwatela mo okuuvitha onkundana ombwanawa. Onkee ano uuna tatu lesha Oohapu dhaKalunga nokutedhatedha kudho, eitaalo lyetu muJehova ohali kolo nohatu shi uvu ko nawa kutya omolwashike sha simana okuuvitha etumwalaka lyUukwaniilwa.

5. Ongiini tatu vulu okumona uuwanawa mokulesha Ombiimbeli noku yi konakona?

⁵ Opo tu mone mo uuwanawa owundji mOohapu dhaKalunga, otu na okuyanda okulesha nokutedhatedha kudho tatu endelele. Shi ninga nethimbo. Ngele owa lesha enyolo ndyoka kuu uvite ko nawa, inoli etha owala ngawo. Pehala lyaashono, longitha embo Watch Tower Publications Index nenge Embo lyokukonga uuyelele lyOonzapo dhaJehova, wu mone uuyelele kombinga yovelise ndjoka. Ngele owa konakona nethimbo, oto ka nkondopaleka einekelo lyoye moshili yomOohapu dhaKalunga. (1 Tes. 5:21) Ngele owa kala wa tompwa lela, oto ka nyanyukilwa okulombwela yalwe shoka wa ilonga.

ILONGEKIDHILA NAWA IILONGA YOKUUVITHA

6. Omolwashike tu na okwiilongekidhila nawa iilonga yokuuvitha?

⁶ Ngele owa ilongekidhile nawa iilonga yokuuvitha otashi vulika wu kale inoo tila, uuna  to popi naantu. Jesus okwa li a kwathele aalongwa ye ya ilongekidhe manga inee ya tuma ya ka uvithe. (Luk. 10:1-11) Molwaashoka aalongwa oya tula miilonga shoka Jesus e ya longa, oya li ya nyanyukilwa noonkondo shoka ya vulu okutompola po. — Luk. 10:17.

7. Ongiini tatu vulu okwiilongekidhila iilonga yokuuvitha? (Tala wo ethano.)

⁷ Ongiini tashi vulika tu ilongekidhile iilonga yokuuvitha? Otwa pumbwa okudhiladhila kombinga yaashoka tatu ka popya, opo nduno tatu shi popi paunshitwe noniitya yetu yene. Otwa pumbwa wo okudhiladhila omikalo dhontumba moka aantu tashi vulika ya ka inyenge nonkene tatu ke ya yamukula. Uuna tatu popi naantu, otatu vulu okukala inaatu tila, tatu imemeha notu na ombili.

8. Omomukalo guni Aakriste ya faathana niiyuma yeloya mbyoka ya popiwa komuyapostoli Paulus methaneko lye?

⁸ Omuyapostoli Paulus okwa li a lombwele aamwahe a ti: “Tse mbaka tu na uuyamba mbuka wopambepo, otwa fa owala iiyuma yeloya.” (2 Kor. 4:7) Uuyamba mboka oshike? Owo iilonga tayi hupitha oomwenyo yokuuvitha etumwalaka lyUukwaniilwa. (2 Kor. 4:1) Iiyuma yeloya oshike? Otayi thaneke aapiya yaKalunga mboka haya uvithile aantu onkundana ombwanawa. Pethimbo lyaPaulus aahalithi oya li haya longitha iiyuma yeloya, ya humbatele mo iinima ngaashi, iikulya, omaviinu niimaliwa. Sha faathana, Jehova okwe tu inekelela etumwalaka lya simana lyokuuvitha onkundana ombwanawa. Kekwatho lyaJehova otatu vulu okukala tu na oonkondo dhokuuvitha etumwalaka ndyoka nuudhiginini.

GALIKANA WU KALE WU NA OMUKUMO

9. Ongiini tatu vulu okusinda uumbanda wokutila aantu nowokwaapulakenwa kaantu? (Tala wo ethano.)

⁹ Omathimbo gamwe otashi vulika tu kale twa tila aantu nenge twa tila kutya pamwe aantu itaye ke tu pulakena. Ongiini tatu vulu okusinda eshongo lya tya ngawo? Natu taleni kegalikano lyaayapostoli sho ya li ya lombwelwa yaa uvithe we. Pehala lyokwiigandja kuumbanda, oya pula Jehova megalikano e ya kwathele ‘okupopya nuulaadhi awuhe oohapu dhe.’ Jehova okwa li a yamukula egalikano lyawo nziya. (Iil. 4:18, 29, 31) Ngele uumbanda wokutila aantu omathimbo gamwe ohawu tu ningitha tu kale twa tila okuuvitha, natse otwa pumbwa okugalikana Jehova e tu kwathele. Pula Jehova e ku kwathele wu koleke ohole yoye yokuhola aantu, opo wu kale inoo tila oku  ya lombwela kombinga yonkundana ombwanawa.

10. Jehova ohe tu kwathele ngiini tu vule okugandja uunzapo kombinga ye? (Jesaja 43:10-12)

¹⁰ Jehova okwe tu hogolola tu kale Oonzapo dhe nokwe tu uvanekela oku tu kwathela, tu kale tu na omukumo. (Lesha Jesaja 43:10-12.) Natu ka taleni owala komikalo ne moka tatu vulu oku shi ninga. Gwotango, Jesus oha kala pamwe natse, uuna tatu uvitha onkundana ombwanawa. (Mat. 28:18-20) Omutiyali, Jehova okwa langeka po aayengeli ye tu kwathele. (Eh. 14:6) Omutitatu, Jehova okwe tu pa ombepo ye ondjapuki yi li omukwathi, yi tu dhimbulukithe shoka twa ilonga. (Joh. 14:25, 26) Omutine, Jehova okwe tu pa aamwatate naamwameme okulonga pamwe natse. Kekwatho lyaJehova nokeyambidhidho lyuumwayinathana wetu wopahole, otu na kehe shimwe twa pumbwa, opo tu pondole.

KALA HO TIFUKA NOKUKALA WU NA ETALOKO LI LI PANDJELE

11. Ongiini tatu vulu okumona mo aantu oyendji, uuna tu li muukalele? (Tala wo ethano.)

¹¹ Mbela oho kala wa teka omukumo ngele omomagumbo owala omashona wa adha aantu? Ipula ngeyi: ‘Mbela aantu yomoshitopolwa shetu ohaya kala peni ethimbo ndino?’ (Iil. 16:13) ‘Mbela oye li kiilonga nenge oya ya koositola?’ Ngele osho shi li ngawo, mbela ito vulu okumona aantu oyendji mokugandja uunzapo mepandaanda? Omumwatate gwedhina Joshua okwa ti: “Ohandi mono ompito yokuuvitha uuna tandi endaenda momahala goositola nomoopaakinga dhaayehe.” Ye nomukulukadhi gwe, Bridget, ohaya adha wo aantu momagumbo, uuna ye ya dhengele komatango lela nosho wo omutenya mOsoondaha. — Ef. 5:15, 16.

12. Ongiini tatu vulu okumona shoka aantu ya itaala nenge taya ipula nasho?

¹² Ngele aantu kaye na naanaa ohokwe metumwalaka, kambadhala okumona kutya oshike ya itaala nenge taya ipula nasho. Joshua naBridget ohaya longitha epulo ndyoka li li kombanda yokafo hoka taya longitha, uuna taya popi naantu. Pashiholelwa, uuna taya longitha okafo, Ombiimbeli owe yi tala ko ngiini?, ohaya ti: “Aantu yamwe oya tala ko Ombiimbeli yi li embo lya za kuKalunga, ihe yamwe hasho naanaa ye yi tala ko ngawo. Ngoye oto ti ngiini?” Shoka olundji ohashi ningitha omuntu a kale e na ohokwe yokupulakena.

13. Omolwashike hatu pondola nokuli nuuna aantu itaaya pulakene? (Omayeletumbulo 27:11)

 ¹³ Okupondola kwetu miilonga yokuuvitha inaku ikolelela kiizemo mbyoka hatu mono. Omolwashike mbela? Omolwaashoka otwa ninga shoka Jehova nOmwana ya hala tu ninge, ano twa gandja uunzapo. (Iil. 10:42) Nokuli nuuna inaatu mona ngoka tatu popi naye, nenge etumwalaka lyetu inaali pulakenwa, otatu vulu okukala twa nyanyukwa, molwaashoka otu shi kutya otwa nyanyudha Tate yetu gwomegulu. — Lesha Omayeletumbulo 27:11.

14. Ongiini tatu vulu okukala twa nyanyukwa, uuna omuuvithi gulwe a mono omuntu e na ohokwe moshitopolwa?

¹⁴ Otatu vulu okukala twa nyanyukwa, uuna omuuvithi gulwe a mono moshitopolwa omuntu e na ohokwe. Oshungolangelo oya yelekanitha iilonga yetu nokukonga okanona ka kana. Aantu oyendji ohaya kala taye ka kongo miitopolwa yi ili noyi ili. Uuna ka monika, kehe gumwe oha kala a nyanyukwa, ihe haamboka owala ye ka mona. Sha faathana, kehe gumwe megongalo oha kwathele mokuninga aantu aalongwa aape yaJesus. Ayehe megongalo oya pumbwa okukwathela mokuuvithila aantu ayehe moshitopolwa, naayehe ohaya kala ya nyanyukwa uuna omuntu omupe a tameke okukala he ya kokugongala.

GANDJA EITULOMO KOHOLE YOYE YOKUHOLA JEHOVA NOSHO WO YALWE

15. Ongiini okutula miilonga Mateus 22:37-39, taku tu kwathele tu kale tu na lela uulaadhi miilonga yokuuvitha? (Tala wo ethano .)

¹⁵ Otatu vulu okukala tu na uulaadhi owundji mokugandja eitulomo kiilonga yokuuvitha, kohole yetu yokuhola Jehova nosho wo yalwe. (Lesha Mateus 22:37-39.) Dhiladhila owala kunkene Jehova ha kala a nyanyukwa, uuna e wete tatu longo iilonga mbyoka, nonkene aantu haya kala ya nyanyukwa, uuna ya tameke okukonakona Ombiimbeli. Dhiladhila wo kombinga yehupitho ndyoka mboka ya pulakena ketumwalaka lyetu ya tegelela oku ka mona. — Joh. 6:40; 1 Tim. 4:16.

16. Ongiini tatu vulu okukala twa nyanyukilwa iilonga yokuuvitha nuuna inaatu vulu okupita mo momagumbo getu? Gandja iiholelwa.

¹⁶ Mbela iho vulu okuza mo megumbo omolwomangambeko gontumba? Ngele osho, gandja eitulomo kwaashoka to vulu okuninga wu ulike kutya owu hole Jehova nosho wo aantu yalwe. Pethimbo lyomukithi gwekomba, gwo-COVID-19, Samuel naDania, oya li ihaaya  vulu okuza mo megumbo lyawo. Momukokomoko gwethimbo ndyoka edhigu, oya kala aluhe haya gandja uunzapo okupitila mongodhi, haya nyola oontumwafo nohaya ningi omakonakonombiimbeli okupitila mo-zoom. Samuel okwa li ha gandja uunzapo kwaamboka ha tsakanene nayo kokapangelo hoka a li ha ka pangwa okankela. Okwa ti: “Omaupyakadhi oga li ge tu gwilila po, pamadhiladhilo, palutu nopambepo. Otwa li twa pumbwa okukala twa nyanyukwa sho tatu longele Jehova.” Shimwe ishewe, Dania okwa li a ihata po, e ta kala uule woomwedhi ndatu megumbo. Okwa li a kala mokatemba uule woomwedhi hamano. Okwa ti: “Onda li nda ningi kehe shoka onkalo yandje tayi pitika ndi ninge. Onda li nda uvithile omupangi ngoka a li he ya okupanga ndje, nonda popi naantu mboka ya li haya etele ndje iinima pegumbo. Onda li wo nda kundathana pangodhi nagumwe ngoka a li ha longele ehangano lyopaunamiti.” Nonando Samuel naDania kaya li taya vulu okuninga oshindji ngaashi nale, oya li ya ningi ngaashi taya vulu, noya vulu okukala ya nyanyukwa.

17. Ongiini to vulu okumona mo lela uuwanawa momaetopo ngoka ge li moshitopolwa shika?

¹⁷ Omaetopo ngoka ga popiwa moshitopolwa shika, ohaga longo nawa ngele owa kambadhala oku ga longitha agehe. Eetopo kehe olya fa iitowaleki mbyoka hayi tulwa miikulya. Ngele iitowaleki ayihe mbyoka ya pumbiwa miikulya yontumba oya tulwa mo, iikulya otayi ka kala iiwanawa. Ngele otwa tula miilonga omaetopo agehe ngoka, otatu ka vula okuungaunga nomaiyuvo omawinayi e tatu kala twa nyanyukilwa iilonga yokuuvitha.