1. Ti mwawiihai akina aniisoonaaya vaavaa anaalaleeryaaya achu? (Moone tho eruku.)

 NTOKO achu a Yehova, ninnaalaleerya achu akina nthowa nawi ninnamusivela tiithi ahu a wirimu nave ninnachuna waakhaviherya achu akina omusuwela yoowo. Mweeparipari alaleeryi ancipale ennasiveliwano muteko woolaleerya. Wa akina onnakhala woovila ohakalalano muteko woolaleerya. Ntakhara heeni? Nthowa nawi akina annakhala awoova ni wiisoona ohikhala ahusiha aphaama. Akina annoona ohikhala woophwanelela oya mmavaate ehiwompwale. Akina annova wi achu anamunyeenyeya ni yaawo. Akina yaahihusihiwa osepa waakhulana ni achu. Naamwi emusivelaka Yehova anna ni arokora yaala annakhalano makacamiho a oloca vooloca sa michaka saphaama wa achu yaawo ehaasuwenlaaya. Naamwiihiiha awo annasuwela ochuneya waya muteko woolaleerya, nyenya awo annalaleerya moohihiyererya. Yehova onnahakalala vancipale ni yaawo!

2. Wakhala wi hamunahakalala mmuteko woolaleerya, ntakhara heeni hamunaphwanela okhala ooceecheya?

² Apwanne nyuwaano ikwaha ikina munnakhalano nikacamiho na okhala oohakalala mmuteko woolaleerya? Waakhanle wi eyo yoheereya ni nyuwaano muhiceecheye. Mweeparipari, eyo enooniherya wi nyuwaano mwa muchu awiiyeviha nave hamunachuna wiiruuhela ncicimiho naari tho hamunachuna waakhulana ni muchu. Nyenya havo onachuna waanyeenyeiha akina, xaxaxa vaavaa muchu oneereryeiye opaka echu yaphaama ntakhara akina. Atiithi anyu a wirimu annasuwela phameene makacamiho munahoolelaanyu nave annachuna woovahaani nikhavihero nenlo munachunaanyu. (Yes. 41:13) Mwaha yoola, nnahaala othokororya sooleeliherya thanu sa mukhalelo yoowo nnahaalaahu ovootha miyooneelo  seiha ni mukhalelo nnahaalaahu okhalano ohakalalaxa mmuteko woolaleerya.

MWEEMERERYE WI MASU A MULUKU YOOLIPIHEENI

3. Tiheeni yaamukhavihenrye mulipa a miririmu Yeremiya waalaleerya achu akina?

³ Naamwi elukuluku yakhalai, michaka sa Muluku saahaalipiha alapeli awe vaavaa awo yaakhalaayano murici woovila wi yaakhwaniherye. Vano nthokororye yootakiherya ya mulipa a miririmu Yeremiya. Owo aahoovelela vaavaa Yehova aamvaheiye murici woolaleerya. Yeremiya ooloca: “Miyo nlelo ka mwaana, nkinsuwelano oloca.” (Yer. 1:6, PMM) Tiheeni yaamukhavihenrye okhala oolipa murima olaleerya? Owo aaphwanya ikuru Mmasu a Muluku. Owo ooloca: ‘Masu awe yaahikhala ntoko mooro onaverela mmurimani mwaka ni mmakhuvani mwaka, nave kaavela kihinawerya omaala.’ (Yer. 20:8, 9, PMM) Naamwi Yeremiya aarino ekulucu yoovila, muchaka yoowo aakhenleiye wi alaleerye waamvaha olipa murima yoowo aachuneiye wi aakhwaniherye muteko awe.

4. Tiheeni eneereya vaavaa nnaalakhanyaahu Masu a Muluku ni wuupuwelela yaawo? (Akolose 1:9, 10)

⁴ Mmahiku ahu Akristu annaphwanya ikuru orweela Mmasu a Muluku. Vaavaa murummwa Paulo aarepenleiye ekaarata muloko wo Kolose, owo aaloca wa anna wi, wakhala wi aahuseryaxa vooloca sa yookhwela ya Yehova eyo yaahaala waakhaviherya ‘weecaka mmukhalelo woophwanelela wa Yehova’ ni otitelela “ovaha sawiima mmiteko soothene saphaama.” (Mwaalakhanye Akolose 1:9, 10.) Muteko yoola waphaama onaphitaanyerya olaleerya michaka saphaama. Mwawiihiiha, vaavaa nnaalakhanyaahu Masu a Muluku ni wuupuwelela yaawo, nroromelo nahu ninnakhala noolipa nave ninniiwexexa ochuneya waya olaleerya michaka sa Omwene wa akina.

5. Nni nikumihevo hai mphurelo mu waalakhanya wahu ni omuhuserya Piipiliya?

⁵ Wi niphwanye mphurelo wa Masu a Muluku, nnaphwanela osepa ochimakiha waalakhanya wahu, ohuserya, ni wuupuwelela. Mu elukuluku ya ohuserya musepe waakuviha. Wakhala wi mohaalakhanya makupa yaawo muhiniiwexexaanyu, muhivirele. Moohiyana ni yeeyo, mumpharihele Índice das Publicações da Torre de Vigia naari Yoohoolela ya Otholathola ya Anamoona a Yehova wi mphwanye yooleeliherya vooloca sa eversikulu yeeyo. Wakhala wi nyuwaano munnakumiha elukuluku wi muhuserye, munahaala olipiha ororomela wanyu wi yeeyo Piipiliya onaloceiye ti yeeparipari. (1 Ate. 5:21) Wakhala wi nyuwaano moolekecheya ni yeeyo, munahaala osiveliwaxa waaleela akina sa yeeyo muhusenryaanyu.

 MWIIREHERERYE PHAAMA NTAKHARA MUTEKO WOOLALEERYA

6. Ntakhara heeni nnaphwanelaahu wiirehererya phaama vaavaa nnayaahu mmuteko woolaleerya?

⁶ Wakhala wi mohiirehererya phaama muhaakumve oya mmuteko woolaleerya, onamukhala wookhweyaxa oloca ni achu. Yesu aahaakhaviherya oohuserya awe wiirehererya phaama ahaakumve waarumiha mmuteko woolaleerya. (Luka 10:1-11) Woona wi oohuserya yaahipharihela muteko soothene seiyo Yesu aahusinheiye, awo yaahihakalalaxa ntakhara soothene yaaweryaaya opaka.—Luka 10:17.

7. Ti mwawiihai nnahaalaahu wiirehererya ntakhara muteko woolaleerya? (Moone tho eruku.)

⁷ Nni niirehererye hai ntakhara muteko woolaleerya? Nnaphwanela wuupuwelela yeeyo nnayaahu oloca, nave nloce ni masu ahu mmukhalelo wooyariwano. Nave tho ti woochuneya wuupuwelela miyoonelo miili naari miraru seiyo siri sawunlaana mu ekulucu ahu, wi nikhaleno mmuupuwelo mukhalelo wa waakhula mwaha ti mwaha. Voocharela vaavaa nnaphiyaahu wi nloce ni achu, nnaphwanela okhala oomaaleleya, oohakalala, ni okhala oothamwene.

8. Mmukhalelo taani Akristu aryaaya ntoko ipiya sa oloko enalociwa mu niphwanaphwaniho na murummwa Paulo?

⁸ Murummwa Paulo aahiloca wa anna vooloca sa muteko woolaleerya ariki: “Nto nookhalano muhakhu ola mu ipiya sa oloko.” (2 Ako. 4:7) Muhakhu taani yoowo? Ori muteko woolaleerya onavuluxa ikumi, nave onaloca vooloca sa Omwene wa Muluku. (2 Ako. 4:1) Ipiya sa oloko tiheeni? Enaweemelela alapeli a Muluku yaawo enalaleerya michaka saphaama wa akina. Mu elukuluku ya Paulo alipa aanakoso yaanapharihela ipiya sa oloko wi eteexe ichu sasisapo ntoko yoolya, eviinyu, ni ikhorowa. Mmukhalelo woolikana, hiyaano nri ntoko ipiya sa oloko, nave Yehova onnanipharihela wi nikuxe ichu sasisapo michaka saphaama. Nnikhaviheryo na Yehova, hiyaano ninnakhalano ikuru wi ntitelele olaleerya moororomeleya.

MVEKELE MVEKAKA OLIPA MURIMA

9. Nni nivoothe hai owoova achu naari okhoociwa? (Moone tho eruku.)

⁹ Ikwaha ikina nnanwerya owoova achu naari woova waakaahiwa. Nni nivoothe hai nikacamiho nenla? Muthokororye yootakiherya ya nivekelo na arummwa vaavaa yaaleeliwaaya wi ehiye olaleerya. Ohiya okhala awoova, awo yaahimveka Yehova wi aakhaviherye ‘otitelela oloca masu awe moolipa murima.’ Mwawaakuveya Yehova aahaakhula nivekelo naya. (Saw. 4:18, 29, 31) Wakhala wi owoova achu onnanivolowela mmuteko woolaleerya, nnaphwanela tho ovekela nivekaka  nikhaviheryo na Yehova. Mumveke Yehova wi osivela yoowo muryaanyuno ntakhara achu okhale otokweene opwaha owoova wanyu achu.

10. Yehova onanikhaviherya hai waakhwaniherya murici ahu ntoko anamoona awe? (Yesaya 43:10-12)

¹⁰ Yehova oonthanla wi nikhale Anamoona awe, nave ooniroromeliha onikhaviherya okhala oolipa murima. (Mwaalakhanye Yesaya 43:10-12.) Nnahaala woona mikhalelo mixexe seiyo owo onanikhaviheryeiyeno weerano yeeyo. Yoopacerya, ilukuluku soothene Yesu onakhala ni hiyaano vaavaa nnalaleeryaahu. (Mat. 28:18-20) Yanaawiili, Yehova ohaathanla Ankelo wi enikhaviherye. (Wup. 14:6) Yaneeraru, Yehova oonivaha munepa awe waweela ntoko mukhaviheryi wi onikhaviheryeke wuupuwelaka ichu seiho nihusenryaahu. (Yoh. 14:25, 26) Yaneexexe, Yehova oonivaha anna ni arokora wi enikhaviheryeke mmuteko woolaleerya. Nnikhaviheryo na Yehova vamoha nnikhaviheryo na anna oosivela, nookhalano soothene seiho nnachunaahu wi nikhumelele phaama.

MUKHALE AWAAKUVEYA NAVE THO MUKHALENO MOONELO WOOPHWANELELA

11. Vaavaa munakhalaanyu mmuteko woolaleerya, muni nwerye hai waaphwanya achu ancipale? (Moone tho eruku.)

¹¹ Apwanne munnaceecheya vaavaa muhinaaphwanyaanyu achu vaate vaya? Mwiikohe: ‘Vano achu a mu ekulucu aka ari woowi?’ (Saw. 16:13) ‘Eri omutekoni naari omusika?’ Waakhanle wi nthowa nene tinenlo, apwanne mwaanwerya waaphwanya achu ancipale mulaleeryaka mmuxewe? Munna mmoha awiichaniwa Yosuwa ooloca: “Kaahiphwanya ikari wi kilaleerye vaavaa keeceecaaka mmapuro onatumihiwamo ni mmapuro oneemexiwamo ikaaro.” Owo ni amwaarawe Prixita, yaanaaphwanya tho achu ancipale mmavaate mwaya vaavaa yaaxekuryaaya oxekuwa ni Namurunku othana.—Aef. 5:15, 16.

12. Nni nsuwele hai wa yeeyo achu aneemereryaaya naari wa yeeyo anuukhuwaayano?

¹² Wakhala wi mohoona wi achu hanooniherya nchuno wa yeeyo munalocaanyu, mweererye osuwela yeeyo aneemereryaaya ni yeeyo anuukhuwaayano. Wi etannye nchuno na achu, Yosuwa ni Prixita annapharihela nikoho nnaphwanyeya ohoolo wa etrataatu, mu mapaceryiho aya. Ntoko yootakiherya epharihelaka etrataatu Munamoona hai Piipiliya? awo aaloca: “Achu akina anoona wi Piipiliya liivru a Muluku, nyenya akina annakhwa minikwa vooloca sa yeeyo. Tuuvi ori moonelo anyu?” Wiiliwiili, eyo enneeriha wi ovaanela otitelele.

13. Ntakhara heeni nnanwerya woonaka phaama wi muteko woolaleerya onnakhumelela phaama, naamwi achu akina ehichunaka owiriyana? (Masiposipo 27:11)

¹³ Okhumelela wahu phaama honarweela  waakhanle wi achu ennawiriyana naari hooye. Ntakhara heeni? Nthowa nawi nnapaka yeeyo Yehova ni mwanawe Yesu, anachunaaya wi neere—ovaha onamoona wawaakhwanela. (Saw. 10:42) Naamwi nihaaphwanyaka achu wi nloceno naari vaavaa achu anakhoocaaya michaka sahu, nnaphwanela okhala oohakalala nthowa nawi noosuwela wi ninnamuhakalaliha Tiithi ahu a wirimu.—Mwaalakhanye Masiposipo 27:11.

14. Ntakhara heeni nnaphwanelaahu okhala oohakalala vaavaa munna onamphwanyeiye muchu oonihenrye nchuno mu ekulucu ahu?

¹⁴ Hiyaano tho ninnahakalalaxa vaavaa munna onamphwanyeiye muchu oonihenrye nchuno mmuteko woolaleerya. Mulipeleli oolikanyiha muteko woolaleerya ni omwaavya mwaana orimeenle. Achu ancipale annavoloweliwa mmuteko wa omwaavya nave annamwaavya mmapuro oohiyanahiyana. Voocharela, vaavaa mwaana onaphwanyiweiye, achu oothene annatepa ohakalala, ohiya pahiru muchu yoowo omphwannye. Mmukhalelo mmohamoha oothene mmulokoni annakhaviherya mu waapaka oohuserya avyaani a Yesu. Oothene toochuneya wi yaakhwaniherye olaleerya mu ekulucu nave tho oothene annahakalala vaavaa muchu muvyaani onapaceryeiye othukumana.

MUTIKITHERYEYE MU OMUSIVELA WANYU YEHOVA NI ACHU

15. Ti mwawiihai ompharihela Mateyu 22:37-39 onanwerya onikhaviherya waaceererya olucuwa wahu mmuteko woolaleerya? (Moone tho ya ekaapa.)

¹⁵ Nnanwerya waaceererya olucuwa wahu mmuteko woolaleerya moorweela wa otikitheryeya mu omusivela wahu Yehova ni achu. (Mwaalakhanye Mateyu 22:37-39.) Mwaanyiherye ohakalala otokweene Yehova onakhaleiyeno vaavaa onanooneiye nlapaka mmuteko woolaleerya nave tho mukhalelo achu anahaalaaya okhala oohakalala mu opacerya omuhuserya Piipiliya. Muupuwele tho wi yaale anawiriyana michaka sahu nave elakelela omurumeela Yehova ananwerya okhala okhala wookhala.—Yoh. 6:40; 1 Tim. 4:16.

16. Nni niwerye hai ophwanya ohakalala mmuteko ahu woolaleerya naamwi vaavaa nihinaweryaahu okhumavo vaate? Mvahe yootakiherya.

¹⁶ Apwanne nyuwaano muri vaate vanyu ni mathowa makina? Waakhanle wi ti hiiha, muupuwele yeeyo munaphwanelaanyu weera wi mooniherye omusivela wanyu Yehova ni achu. Variyari va epahu ya Koronaviru, Samuwele ni Tania hiyaawerya okhumela vaate. Variyari va elukuluku yoothene yeela yoovila, awo wiiliwiili yaanalaleerya orweela mu telefoni, orepa ikarata nave tho  yaaneeciha soohuserya sa Piipiliya orweela mu Zuum. Samuwele aahipharihela ekari ya ovaha onamoona wa achu yaawo aawasuwenleiye oxipitale, weiwo aakheleiyewo oloola wa ereca awe ya kanser. Owo ooloca: “Makacamiho ananwerya onceecheiha mmuupuweloni, omwiilini ni makupa oomunepani. Wa nthowa na yeeyo, ti woochuneya ophwanya ohakalala mmuteko ahu wa Yehova.” Variyari va elukuluku yeeyo, Tania aahithoowa nave amaliha miyeeri miraru ari va ekaama. Voocharela, owo aahichuna nikhaviheryo na ekatera ya marota mu miyeeri mithanu nammoha. Owo ooloca: “Koheererya opaka soothene mwawiiwanana ni mikhalelo saka. Kaanawerya omulaleerya enfermeera yoowo aarwa wi akivarerye nave tho kaanavaanela ni achu akina yaawo yaaveleela ichu owaani. Kaahikhalano tho ovaanela waphaama ni muthiyana mmoha orweela mu telefoni yoowo aalapa mu emperesa ya akhaca eekumi.” Mikhalelo sa Samuwele ni Tania sookwatelela muteko aya, naamwiihiiha awo aapaka yeeyo yaaweryaaya nave aaphwanya ohakalala va weerano yeeyo.

17. Ti mwawiihai nyuwaano munahaalaanyu ophwanyavo mphurelo wa sooleeliherya sa mwaha yoola?

¹⁷ Mweererye opharihela sooleeliherya soothene seiya thanu silociwe mmwaha yoola. Yooleeliherya ti yooleeliherya eri ntoko echu yoosiviha. Vaavaa soosiviha seiya inaakanyeryiwaaya vamoha, yookhumeleleene ori woona osiva. Moorweela wa opharihela sooleeliherya seiha, nnanwerya okhala ooreheryeyaxa ovootha miyoonelo sooheseya ni ophwanya ohakalalaxa mmuteko woolaleerya.