1. ¿Por hanja rꞌa yä ku japäbi xä ñhei dä dini rä johya ora po̱ni di predika? (Hyandi ꞌnehe rä foto).

 NUJU̱ di pe̱päbihu̱ rä Zi Dada Jeoba, di po̱nihu̱ di predikahu̱ ngeꞌä di mädihu̱ Jeoba ꞌne di ne gä fatsꞌihu̱ märꞌa yä jäꞌi dä bädi toꞌoꞌä. Ndunthi yä ku xa di ho dä ꞌñuti de rä Noya Äjuä märꞌa yä jäꞌi. Pe märꞌa yä ku japäbi xä ñhei dä senti rä johya ora po̱ni di predika. ¿Por hanja? Ngeꞌä rꞌa yä ku di ntsa o senti ge hingi tsa dä ꞌñudi xä ñho de rä Noya Äjuä. Märꞌa japäbi xä ñhei dä ñäui nuꞌu̱ yä jäꞌi hingi konose. Märꞌa yä ku tsu ge yä jäꞌi dä nkue̱. Gatꞌho nuyu̱ yä ku xa di mädi rä Zi Dada Jeoba. Pe ja ngu di handihu̱, japäbi xä ñhei dä predikabi nuꞌu̱ yä jäꞌi hingi konose. Pe mäske njabu̱, nuyu̱ yä ku o̱tꞌe ntsꞌe̱di po dä bo̱ni dä predika ngeꞌä pädi ge xa mähyoni ge yä jäꞌi dä yꞌo̱de de rä Noya Äjuä. ¿Dä za gi imäjinä hängu rä johya senti rä Zi Dada Jeoba ora handi hanja nuyu̱ yä ku ju̱ rä balo ꞌne po̱ni di predika?

2. ¿Por hanja hindi debe gi desanimä mu̱ jaꞌi xä ñhei gi tini rä johya ora gi po̱ni gi predika?

² Xi nuꞌi, ¿gi senti ja ngu di senti nuꞌu̱ yä ku ya dä mäñhu̱ ꞌne di jaꞌi xä ñhei gi tini rä johya ora gi po̱ni gi predika? Mu̱ hää, ¡ogi desanimä! Mu̱ rꞌabu̱ gi senti ge hingi pädi gi ꞌñudi xä ñho rä Noya Äjuä, signifika ge nuꞌi grä umilde ꞌne ge hingrä ꞌñexmänsu. ꞌNehe, ninꞌa de gekhu̱ hindi ho gä diskutihu̱ ko yä jäꞌi, nixi di hohu̱ dä nkue̱ kongekhu̱ o te dä xikägihu̱. ¿Hänge gi pädi? Koꞌmu̱ rä Zi Dada Jeoba pädi xä ñho te di sentihu̱, Näꞌä ne dä maxkägihu̱ (Is. 41:13). Ha nunä imformäsio di nxadihu̱, ma gä handihu̱ ku̱tꞌa yä konseho nuꞌu̱ ma dä maxkägihu̱ gä täpäbihu̱ näꞌä di sentihu̱ ꞌne njabu̱ gä tinihu̱ rä johya ora di predikahu̱.

 HYOPÄBI DÄ MAXꞌÄꞌI RÄ NOYA ÄJUÄ

3. ¿Te bi matsꞌi Jeremías pa bi gu̱ rä balo ꞌne bi ma bä predikabi yä jäꞌi?

³ Durante nuꞌu̱ yä nthebetho yä je̱ya xä thogi, rä Mäkä Tꞌofo xä matsꞌi ndunthi nuꞌu̱ yä amigo rä Zi Dada Jeoba pa xä kumpli ko näꞌä xä mhändabi dä me̱fi. Geꞌä bi thogi ko rä profeta Jeremías. Nuꞌmu̱ rä Zi Dada Jeoba bi mändabi dä ma dä predika, Jeremías xa bi durämu̱i ꞌne bi ꞌñenä: «¡Oh Zi Dada Jeoba! Pe nuga xa drä bäsjäꞌi ꞌne hindi pädi gä ñä» (Jer. 1:6). ¿Te bi matsꞌi Jeremías pa bi däpäbi näꞌä mi senti? Rä Noya Äjuä bi umbäbi rä tsꞌe̱di. Hänge Jeremías bi ꞌñenä: «Ha mä koraso dä senti ge nuꞌu̱ yä noya ꞌñenä yä tsibi nuꞌu̱ mi zo̱o̱ mbo ha mä ndoyꞌo, ꞌne ya himbi za dä kotꞌätho» (Jer. 20:​8, 9). Jeremías mi tsu ngeꞌä bi mhändabi dä predikabi nuꞌu̱ yä jäꞌi hinte mi ne dä yꞌo̱de ꞌne mi nkue̱tho. Pe nuꞌmu̱ bi hyandi ge xa mi debe dä yꞌo̱de yä jäꞌi näꞌä rä mensaje xki uni Jeoba, geꞌä bi umbäbi rä tsꞌe̱di pa bi ma bä predika.

4. ¿Te di lograhu̱ ora di hetihu̱ ꞌne di nxadihu̱ rä Mäkä Tꞌofo? (Colosenses 1:​9, 10).

⁴ Mäpaya, nuju̱ ꞌnehe di hänihu̱ rä tsꞌe̱di de nuꞌu̱ yä noya rä Zi Dada Jeoba hutsꞌi ha rä Mäkä Tꞌofo. Nuꞌmu̱ rä apostol Pablo bi yꞌopäbi nꞌa rä karta nuꞌu̱ yä kristianu mi ꞌmu̱i ha Colosas, bi xipäbi te ma xä logra mu̱ nuꞌu̱ xä sigi xä yꞌo̱tꞌe ntsꞌe̱di po dä hñäni näꞌä rä mfädi ehe de rä Zi Dada Jeoba. Rä apostol Pablo bi ꞌñembäbi: «Pa njabu̱ gi portahu̱ ngu to̱ꞌmi rä Zi Dada Jeoba ꞌne gi pe̱fihu̱ näꞌä di hoꞌä, mientra gi jahu̱ näꞌä rä ꞌme̱fi bri nkargoꞌihu̱» (hñeti Colosenses 1:​9, 10, TNM). Mäpaya, Jeoba ꞌnehe xä nkargogihu̱ gä uñhu̱ ntꞌo̱de de rä Noya. Hänge entremäs di hetihu̱ ꞌne di nxadihu̱ rä Mäkä Tꞌofo, geꞌä faxkägihu̱ gä japäbihu̱ dä te näꞌä rä komfiansa di pe̱ꞌspäbihu̱ rä Zi Dada Jeoba ꞌne faxkägihu̱ gä ntiendehu̱ xä ñho por hanja xa mähyoni gä utihu̱ märꞌa yä jäꞌi de rä Tsꞌu̱tꞌhui.

5. ¿Te dä hogi gi pe̱fi pa mänꞌa gi benefisia de näꞌä udi rä Mäkä Tꞌofo?

⁵ Mu̱ di nehu̱ gä benefisiahu̱ xä ñho de näꞌä udi rä Mäkä Tꞌofo, hindi debe gä he̱tihu̱ de gä so̱ni. Ora di tinihu̱ nꞌa rä testo näꞌä hindi ntiendehu̱, mähyoni gä ꞌuekehu̱ rä tiempo pa gä imbestigahu̱ te di signifika näꞌä testoꞌä. Pa geꞌä, dä hogi gä usahu̱ rä Índice de las publicaciones Watch Tower o rä Guía de estudio para los testigos de Jehová habu̱ dä za gä imbestigahu̱ mä nꞌa tu̱i de näꞌä testoꞌä. Mu̱ gi ꞌueke rä tiempo pa gi hñudi gi nxadi rä Mäkä Tꞌofo ꞌne hingi heti  de gä so̱ni, gi nuhmä ge mänꞌa ma dä te ri komfiansa po rä Noya Äjuä (1 Tes. 5:21). Entremäs gi mꞌu̱i kombensido ge mäjuäni näꞌä udi rä Mäkä Tꞌofo, mänꞌa ma gi tini rä johya ora gi xipäbi märꞌa yä jäꞌi de näꞌä xkä pädi.

ÑHOKI XÄ ÑHO ÄNTE DE GI PO̱NI GI PREDIKA

6. ¿Por hanja xa mähyoni gä ñhokihu̱ xä ñho ko näꞌä imformäsio ma gä usahu̱ änte de gä po̱nihu̱ gä predikahu̱?

⁶ Mu̱ änte de gi po̱ni gi predika, gi ñhoki xä ñho ko näꞌä imformäsio ma gi usa, gi nuhmä ge geꞌä ma dä maxꞌäꞌi pa hingi ntsu gi ñäui yä zi jäꞌi. Nuꞌmu̱ rä Hesu bi mꞌu̱kua ha rä Xiꞌmhai, änte de dä me̱hni nuꞌu̱ yä de̱ni dä predika, mꞌe̱tꞌo bi xipäbi te mi debe dä me̱fi ꞌne te mi debe dä mää (Luc. 10:​1-11). Koꞌmu̱ nuꞌu̱ bi me̱fi näꞌä bi ꞌñuti rä Hesu, nuꞌu̱ xa bi senti ndunthi rä johya ora bi hyandi gatꞌho näꞌä bi logra (Luc. 10:17).

7. ¿Te dä za gä pe̱fihu̱ änte de gä po̱nihu̱ gä predikahu̱? (Hyandi ꞌnehe rä foto).

⁷ Änte de gä po̱nihu̱ gä predikahu̱, mähyoni gä benihu̱ xä ñho te ma gä xipäbihu̱ yä zi jäꞌi, nsinke gä hetihu̱ ha nꞌa rä he̱ꞌmi näꞌä ma gä xipäbihu̱. Koꞌmu̱ ya di pädihu̱ te mä territorio ma gä maha, mähyoni gä benihu̱ yoho o hñuu yä forma hanja thädi yä jäꞌi, ꞌne gä benihu̱ dende änte te ma gä xipäbihu̱. Njabu̱, hingä ma gä ntsuhu̱ ndunthi ora di predikabihu̱ yä jäꞌi ꞌne ma dä za gä zofohu̱ ko rä ñhojäꞌi ꞌne ko nꞌa rä thede.

8. ¿Por hanja rä Mäkä Tꞌofo enä ge nuꞌu̱ pe̱päbi rä Zi Dada Jeoba ꞌñenä nuꞌu̱ yä xo̱ni de gä domhi?

⁸ Rä apostol Pablo bi ꞌñembäbi nuꞌu̱ yä kristianu de näꞌä tiempoꞌä: «Di pe̱ꞌtsihu̱ nunä tesoro ha yä xo̱ni de gä domhi» (2 Cor. 4:​7, TNM). Pe, ¿te me̱ꞌä näꞌä rä tesoro bi mää rä apostol Pablo? Geꞌä näꞌä rä mensaje di hätsꞌihu̱ de rä Tsꞌu̱tꞌhui Äjuä. Nunä mensaje dä za dä ñämbäbi yä bida yä jäꞌi (2 Cor. 4:1). Pe, ¿ndaꞌu̱ nuꞌu̱ yä xo̱ni de gä domhi? Nuju̱ di pe̱päbihu̱ rä Zi Dada Jeoba ngeꞌä di häꞌtsuäbihu̱ yä jäꞌi yä hogä notisia. Ha yä pa nuꞌu̱ yä mu̱di kristianu, yä comerciante mi hätsꞌi ha yä xo̱ni de gä domhi yä tꞌo̱tꞌe nuꞌu̱ mi ja ndunthi rä muui; ngu yä ñhuni, yä binu, o yä bojä. Mäpaya, rä Zi Dada Jeoba ꞌnehe xä nkargogihu̱ nꞌa rä tꞌo̱tꞌe näꞌä xa ja ndunthi rä muui: ¡Xä nkargohihu̱ gä häꞌtsuäbihu̱ yä jäꞌi, nuꞌu̱ yä hogä notisia de rä Tsꞌu̱tꞌhui! Ko rä mfatsꞌi rä Zi Dada Jeoba, dä za gä ju̱hu̱ rä balo pa gä uñhu̱ ntꞌo̱de nuꞌu̱ yä hogä notisia, mäske rꞌabu̱ jakägihu̱ xä ñhei.

 XATUÄBI JEOBA ꞌNE YꞌAPÄBI DÄ RꞌAꞌI RÄ BALO

9. ¿Te dä za gä pe̱fihu̱ pa gä täpäbihu̱ rä ntsu? (Hyandi ꞌnehe rä foto).

⁹ Rꞌabu̱ di tsuhu̱ gä po̱nihu̱ gä predikahu̱, ngeꞌä di tsuhu̱ ge yä jäꞌi hindä yꞌo̱de o ge te dä xikägihu̱. ¿Te dä za gä pe̱fihu̱ pa gä täpäbihu̱ näꞌä rä ntsu? Ma gä handihu̱ te bi me̱fi yä apostol nuꞌmu̱ bi mhändabi ge ya hindä predika. En lugar de xä ntsu ꞌne xä hye̱gi de xä predika, nuꞌu̱ bi xatuäbi rä Zi Dada Jeoba ꞌne bi ꞌñembäbi: «Faxkähe pa hingä ntsuhe gä ñähe de ri mäkä noya». Rä Zi Dada Jeoba himbi fayabi ꞌne bi matsꞌi (Hech. 4:​18, 29, 31). Ora di tsuhu̱ gä po̱nihu̱ gä predikahu̱, mähyoni gä xatuäbihu̱ rä Zi Dada Jeoba ꞌne gä apäbihu̱ rä mfatsꞌi. Hää, mähyoni gä apäbihu̱ rä Zi Dada Jeoba ge dä maxkägihu̱ pa njabu̱ näꞌä rä mhäte po mä mikꞌeihu̱ mänꞌa dä ze̱di ke näꞌä rä ntsu di sentihu̱.

10. ¿Te mä mfatsꞌi rꞌakägihu̱ rä Zi Dada Jeoba pa gä kumplihu̱ ko näꞌä rä ꞌme̱fi xä nkargogihu̱? (Isaías 43:​10-12).

¹⁰ Rä Zi Dada Jeoba xä zonkägihu̱ pa yä Testigogihu̱, ꞌne prometegihu̱ ge ma dä maxkägihu̱ pa gä täpäbihu̱ rä ntsu (hñeti Isaías 43:​10-12). Ma gä handihu̱ ho̱nse̱ goho yä forma de hanja rä Zi Dada Jeoba faxkägihu̱: 1) Hindi mporta habu̱ di po̱nihu̱ di predikahu̱, rä Hesu ꞌmu̱i kongekhu̱ (Mat. 28:​18-20). 2) Rä Zi Dada Jeoba xä hñutsꞌi yä e̱nxe̱ pa dä maxkägihu̱ (Apoc. 14:6). 3) Jeoba rꞌakägihu̱ rä espiritu santo pa dä maxkägihu̱ gä benihu̱ näꞌä xtä pädihu̱ de rä Mäkä Tꞌofo ꞌne geꞌä gä utihu̱ yä jäꞌi (Juan 14:​25, 26). ꞌNe 4) rä Zi Dada Jeoba hingi mändagihu̱ gä po̱nise̱hu̱ gä predikahu̱, sino ke rꞌakägihu̱ yä ku ꞌne yä nju pa dä kompañägihu̱. Ko rä mfatsꞌi rä Zi Dada Jeoba ꞌne rä mfatsꞌi gatꞌho yä ku, di pe̱ꞌtsihu̱ gatꞌho näꞌä di jakägihu̱ mꞌe̱di pa gä täpäbihu̱ rä ntsu ꞌne gä po̱nihu̱ gä predikahu̱.

PREDIKA HABU̱ DÄ ZA GI TINI YÄ JÄꞌI ꞌNE OGI ꞌME̱DI RÄ JOHYA

11. ¿Te dä za gi pe̱fi pa mänꞌa gi tini yä jäꞌi? (Hyandi ꞌnehe rä foto).

¹¹ ¿Gi desanimä ora gi tso̱ni ha rä territorio ꞌne hingi tini yä jäꞌi ha yä nguu? Nuꞌmu̱ dä hogi gi ñꞌanise̱: «¿Por hanja hingi ꞌmu̱i yä jäꞌi ha yä nguu? ¿Xä ma rä ꞌme̱fi o bi ma dä hä yä mändado? ¿Dä hogi gä ma gä predika ha nuꞌu̱ yä calle habu̱ thogi yä jäꞌi?» (Hech. 16:13). Nꞌa rä zi ku rä thuhu Joshua enä: «Nuga xä za xtä predikabi yä jäꞌi ora di pa ha yä mercado,  ha yä de̱nda ꞌne ha yä estacionamiento». Rä zi ku Joshua ꞌne rä ꞌme̱hñä, mää ge mänꞌa xä dini yä jäꞌi ha yä nguu ora pa bi tso̱ni nuꞌmu̱ ya dä ndee, ꞌne de gä ndomingo mꞌe̱fa de ndemäpa (Efes. 5:​15, 16).

12. ¿Te dä za gä pe̱fihu̱ ora di handihu̱ ge yä jäꞌi kasi hingi ho dä yꞌo̱de ora di predikabihu̱?

¹² Mu̱ yä jäꞌi kasi hingi ho dä yꞌo̱de ora di predikabihu̱, mähyoni gä pädihu̱ te kamfri o te tupäbi yä mu̱i. Joshua ꞌne rä zi ꞌme̱hñä usa nuꞌu̱ yä noya ehe ha rä mu̱di nxii de yä tratado. Por ejemplo, ora usa rä tratado ¿Te gi mbeni de rä Mäkä Tꞌofo? nuꞌu̱ yä ku embäbi yä zi jäꞌi: «Rꞌa yä jäꞌi kamfri ge rä Mäkä Tꞌofo bi ehe de Äjuä, pe märꞌaa hinä. Xi nuꞌäge, ¿te gi mbeni?». Njabu̱, nuyu̱ yä zi ku xä logra xä mplatika ko ndunthi yä jäꞌi.

13. ¿Ndaꞌä mänꞌa xa mähyoni ora di predikahu̱ ꞌne te di debe gä sentihu̱? (Proverbios 27:11).

¹³ Ora di predikahu̱, mänꞌa xa mähyoni näꞌä di mbeni rä Zi Dada Jeoba ꞌne rä Tꞌu̱ (Hech. 10:42). Hänge mu̱ hindi tinihu̱ yä jäꞌi ha yä nguu o yä jäꞌi hingi ne dä yꞌo̱de, mähyoni gä johyahu̱ ngeꞌä rä Zi Dada Jeoba handi ge ya di kumplihu̱ ko näꞌä rä ꞌme̱fi xä nkargogihu̱ (hñeti Proverbios 27:11).

14. ¿Por hanja di debe gä sentihu̱ rä johya mu̱ nꞌa rä ku bi dini nꞌa rä zi jäꞌi näꞌä bi ho bi yꞌo̱de?

¹⁴ Ora di po̱nihu̱ gä predikahu̱, dä za gä sentihu̱ ꞌnehe ndunthi rä johya ora märꞌa yä publicador bi dini nꞌa rä zi jäꞌi näꞌä bi ho bi yꞌo̱de. Rä revista Yꞌo̱dehu̱ xä mää ge nunä mäkä ꞌme̱fi di jahu̱ ꞌñenä ora yä jäꞌi honi nꞌa rä zi bätsi näꞌä xä ꞌme̱di. Ora por fin bi thini näꞌä zi bätsi, hingä ho̱nse̱ bi johya näꞌä jäꞌi toꞌo bi dini, sino ke gatꞌho di johya ngeꞌä gatꞌho bi mfatsꞌi. Njabu̱ ꞌnehe ora di po̱nihu̱ di predikahu̱: Gatꞌho di mfatsꞌihu̱ pa gä barkahu̱ yä territorio ꞌne gatꞌho di johyahu̱ ora toꞌo bi dini nꞌa rä zi jäꞌi näꞌä bi ne bi yꞌo̱de. ꞌNehe gatꞌho di johyahu̱ ora nꞌa rä zi jäꞌi fu̱di ntini ha yä mhuntsꞌi.

BENI GE DI PREDIKAHU̱ NGEꞌÄ DI MÄDIHU̱ JEOBA ꞌNE MÄ MIKꞌEIHU̱

15. ¿Te mä nꞌa ma dä maxkägihu̱ gä sentihu̱ rä johya ora di predikahu̱? (Mateo 22:​37-39; hyandi rä kꞌoi).

¹⁵ Ora di benihu̱ ge di predikahu̱ ngeꞌä di mädihu̱ rä Zi Dada Jeoba ꞌne mä mikꞌeihu̱, geꞌä japi dä te näꞌä rä johya di sentihu̱ (hñeti Mateo 22:​37-39, TNM). Imäjinä hängu rä johya di senti rä Zi Dada Jeoba ora handi ge di predikahu̱, ꞌne hängu rä johya ma dä senti nuꞌu̱  yä zi jäꞌi ora dä mu̱di dä nxadi rä Mäkä Tꞌofo. ꞌNehe, beni ge nuyu̱ ma dä salba yä bida mu̱ dä me̱fi näꞌä di mända rä Mäkä Tꞌofo (Juan 6:40; 1 Tim. 4:16).

16. ¿Te dä za gä pe̱fihu̱ mu̱ hingi tsa gä po̱nihu̱ gä predikahu̱? Mää te bi me̱fi rꞌa yä zi ku.

¹⁶ Pe, ¿xiꞌmu̱ hingi tsa gi po̱ni gi predika? Hyandi te dä za gi pe̱fi pa gi sigi gi ꞌñuti rä Zi Dada Jeoba ge gi mädi ꞌne ge gi mädi yä jäꞌi. Samuel ꞌne Dania, nuni nꞌa rä medinthäti nuꞌu̱ himbi za bi bo̱ni ꞌnehe de yä nguu durante rä COVID-19. Pe mäske himi tsa dä bo̱ni, nuyu̱ yä zi ku bi sigi bi predika por telefono, bi yꞌofo yä karta, ꞌne bi uni yä curso de rä Mäkä Tꞌofo por zoom. Rä zi ku Samuel ꞌnehe mi predika ha näꞌä rä clínica habu̱ mi ñꞌo̱the de rä cáncer. Nuni zi ku enä: «Yä xuñha ꞌne yä ñheni, jakägihu̱ dä zabigihu̱, gä tumämu̱ihu̱ ꞌne tege mä tsꞌe̱dihu̱. Hänge xa di ja mꞌe̱di hingä he̱gihu̱ de gä pe̱päbihu̱ rä Zi Dada Jeoba, ngeꞌä geꞌä rꞌakägihu̱ rä johya». Mꞌe̱fa, rä zi nju Dania bi dagi ꞌne himbi za bi nangi de rä fidi po hñu nzänä, ꞌne po rꞌato nzänä bi usa nꞌa rä silla de gä rueda. Rä zi nju Dania enä: «Xa dä o̱tꞌe ntsꞌe̱di po gä pe̱fi näꞌä mi tsa. Bi za dä predikabi nꞌa rä emfermera näꞌä mi tso̱ngägi ꞌne ndi predikabi nuꞌu̱ yä jäꞌi mi tso̱ni te mi pa. ꞌNehe, bi za dä ñäꞌmee por telefono nꞌa rä ꞌme̱hñä näꞌä mi mpe̱fi ha nꞌa rä däta de̱nda». Mäske rä zi ku Samuel ꞌne Dania bi ñheni ꞌne himi tsa dä bo̱ni dä predika, nuyu̱ yä zi ku bi yꞌo̱tꞌe ntsꞌe̱di po dä probecha nuꞌu̱ yä oportunida mi pe̱ꞌtsi de dä ungä ntꞌo̱de de rä Noya Äjuä, ꞌne geꞌä bi umbäbi ndunthi rä johya.

17. ¿Te di debe gä pe̱fihu̱ ko nuya ku̱tꞌa yä konseho dä handihu̱ ꞌne por hanja?

¹⁷ Dä handihu̱ ku̱tꞌa yä konseho nuꞌu̱ ma dä maxkägihu̱ gä tinihu̱ rä johya ora di predikahu̱. Ora di pe̱fihu̱ nuya yä konseho, hindi debe dä mꞌe̱di ninꞌa de gehya. ꞌÑenä ora sikägihu̱ gä hokihu̱ nꞌa rä komida ꞌne sikägihu̱ te gatꞌho di debe dä me̱ui. Hindi debe dä mꞌe̱di nꞌinꞌa de nuꞌu̱ yä ntsotsꞌi, pa njabu̱ dä bo̱ni xä ñho ꞌne dä ku̱ki. Hää, mu̱ gä pe̱fihu̱ nuya ku̱tꞌa yä konseho dä pädihu̱, geꞌä ma dä maxkägihu̱ gä täpäbihu̱ rä ntsu, yä dumu̱i, ꞌne geꞌä ma dä maxkägihu̱ pa gä tinihu̱ rä johya ora di predikahu̱.