1. Antoy nalilikna na arum ya agagi no manpupulong ira? (Nengnengen met so litrato.)

 BILANG Tasi nen Jehova, manpupulong tayo ta inar-aro tayoy Ama tayod tawen, tan labay tayon sikatoy nakabat met na arum. Labalabay na dakel ya agagi so manpulong. Pero parad arum, aliwa itan ya mainomay ya gawaen. Akin ey? Say arum et mabapbaing tan anggapoy kompiyansa rad sarili da. Wala ray agagi ya ag-apasal ya onlad abung na arum a too. Ompan natatakot ira ya pampasnokan ira na unabung o mansumpal ed debati so tongtongan. Kanian anggano inar-aro na sarayan agagi si Aman Jehova, ompan mairap dan itongtong so maong a balita ed toon agda kabat. Pero lapud amta da ya importantin maong iyan kimey, seseguroen da ya walay regular ya eskedyul dan manpulong. Seguradon naliliketan si Aman Jehova ed pansasagpot da!

2. No bilang ta wala ray panaon ya agka maliket ed panagpulong, akin et agka dapat nadidismaya?

² Panon to no wala ray panaon ya agka maliket ya manpulong lapud saramay rason ya abitla nen niman? No bilang ta ontan so naliliknam, agka komon nadidismaya. No anggapoy kompiyansam ed sarilim, nayarin pakanengnengan itan ya mapaabeba ka tan iiwasan mo ya walad sikay atension. Tan siempre, anggapo tay too ya labay toy napampasnokan tan sikatoy pansengegan na debati, lalo la no maabig met so intension to. Tandaan mo ya amta nen Aman Jehova iratan ya naliliknam tan labalabay to kan tulongan. (Isa. 41:13) Pantongtongan tayod sayan artikulo so limaran punto no panon tayon nalabanan  iratan ya liknaan, tan no panon tayon magmaliw ya mas maliket ed ministeryo.

ARAL MOY SALITA NA DIOS PIAN OMBISKEG SO LIKNAAN MO

3. Antoy akatulong ed si propetan Jeremias pian makpel ya makapanpulong?

³ Manlapu la nensaman, say mensahe nen Aman Jehova ed saray lingkor to so mamapabiskeg ed sikara pian nagawaan day asainmin da anggano mairap. Ontan so agawad si propetan Jeremias. Sikatoy ingganggan nen Jehova ya manpulong, pero manaalangan ya awaten itan ya asainmin. Kuan to: “Agko amta no panoy pansalita, ta ugaw ak ni.” (Jer. 1:6) Pero panon ton alabanan so panaalangan to? Binmiskeg so liknaan to lapud mensahe o “salita nen Jehova.” Kuan nen Jeremias: “Nagmaliw a singa mandarlang ya apoy ya apukok ed saray pukel ko so salita to, tan agko la napokpokan.” (Jer. 20:8, 9) Anggano mairap so asainmin nen Jeremias, amay mismon mensahe ya ipulong to so nampabiskeg ed sikato ya sumpalen so ipapagawa na Dios.

4. Antoy epekto ed sikatayo no basaen tan dalepdepen tayoy ibabaga na Biblia? (Colosas 1:9, 10)

⁴ Say mensahe ya walad Biblia so manpabiskeg met ed liknaan tayo natan. Nen sinulatan nen apostol Pablo so kongregasyon ed Colosas, imbaga tod sikara ya say “suston kakabatan” so manpakiwas ed sikaran ‘manbilay a manepeg ed si Jehova’ tan tuloytuloy ya ‘manbunga ed kada maabig ya kimey.’ (Basaen so Colosas 1:9, 10.) Maabig ya kimey so pangipupulong tayo ed maong a balita! Kanian no basaen tan dalepdepen tayoy ibabaga na Biblia, ombiskeg so pananisia tayod si Jehova tan mas natalosan tayo no akin ya importantin ipulong tayo so Panarian.

5. Antoy gawaen tayo pian talagan minabang tayo ed pambasa tan panaral tayoy Biblia?

⁵ Pian talagan minabang tayo ed pambasa tan panaral tayoy Biblia, agtayo dapat manaapuran manbasa, manaral, tan mandalepdep. Singa bilang, antoy gawaen mo no walay nabasam ya teksto ya agmo masyadon natalosan? Imbes ya bastam labat ya ibaliwala, marakep no i-research mo itan ya bersikulo diad Giya ed Pan-research na Saray Tasi nen Jehova o diad Watchtower Publications Index. No aliwan inapura so panag-aral mo tan seseguradoen mon natatalosan moy babasaen mo, mas magmaliw kan kombinsido ya talagan tua so ibabaga na Biblia. (1 Tes. 5:21) No diman ka mas kombinsido, mas maliket mon ibagad arum iray nanaaralan mo.

 MANPARAAN KAN MAONG ANTIS KAN MANPULONG

6. Akin et importante ya manparaan tayon maong antis tayon manpulong?

⁶ No manparaan kan maong antis kan manpulong, mas walay kompiyansam ya mitongtong ed saray totoo. Imparaan ya maong nen Jesus iray disipulo to antis to ran ibaki ya manpulong. (Luc. 10:1-11) Inyaplika da iramay imbangat nen Jesus ed sikara, kanian dakel so agawaan da tan malikeliket ira.​—Luc. 10:17.

7. Panon tayon manparaan antis tayon manpulong? (Nengnengen met so litrato.)

⁷ Panon tayon manparaan antis tayon manpulong? Isip mon maong no antoy ibagam tan no panon mo itan ya ibaga diad dilin salitam. Isip mo met iray mabetbet ya reaksion na saray totoo ed teritorya yo, tan iplanom la no antoy iyebat mo no ontan so reaksion na katongtong mo. Tan no mitongtong ka, relaks ka labat, imisan mo ra, tan magmaliw kan makaaro.

8. Akin et inkompara nen apostol Pablo iray Kristiano ed pananginan ya gawad pitek?

⁸ Oniay imbaga nen apostol Pablo: “Walaan kami na sayan kayamanan ed saray pananginan a gawad pitek.” (2 Cor. 4:7) Anto iyan “kayamanan”? Ontutukoy itan ed kimey tayo ya ipulong so mensahe na Panarian. (2 Cor. 4:1) Sayan mensahe so makapangiliktar ed bilay na totoo. Anto balet iramay “pananginan a gawad pitek”? Ontutukoy itan ed saray lingkor na Dios ya mangipupulong ed maong a balita. Nen panaon nen Pablo, uusaren na saray negosyante iray pananginan ya gawad pitek pian pankargaan na kuarta o saray mablin produkto da, singa saray naakan tan alak. Ontan tayo met. Uusaren itayo nen Jehova pian nipulong so mabmablin mensahe na Panarian. Kanian seguradon tulongan to tayo pian makpel tayon nipulong itan!

IPIKASIM ED SI JEHOVA YA IKDAN TO KAY PAKPEL

9. Antoy gawaen tayo pian nalabanan tayoy takot ed too? (Nengnengen met so litrato.)

⁹ No maminsan, natatakot tayon manpulong ta iisipen tayo ya ompan wala ray onkontra tan ag-ondengel. Antoy makatulong pian nalabanan tayoy takot tayo? Makaaral tayo ed ginawa na saray apostol nen binawalan da ran manpulong. Imbes ya manpadaeg ira ed takot ed too, nampikasi ira ed si Jehova. Kuan da: “Ikdan mo komon na pakpel iray ariripen  mo pian nitultuloy min niyabawag so salitam.” Inebatan ya tampol nen Jehova so pikakasi ra. (Gawa 4:18, 29, 31) Kanian no bilang ta makalikna kay takot ed too, manpikasi kan tampol ed si Jehova. Ibagam ed sikato ya tulongan to kan manpokus ed panangarom ed totoo, aliwan diad takot ya naliliknam.

10. Panon itayon tutulongan nen Jehova pian nagawaan tayoy kimey tayo bilang Tasi to? (Isaias 43:​10-12)

¹⁰ Si Jehova ya mismo so anuro ed sikatayo bilang Tasi to, tan imbaga to ya tulongan to tayon manpakpel. (Basaen so Isaias 43:10-12.) Panon to itan ya gagawaen? Pantongtongan tayoy apatiran paraan. Unona, kaiba tayoy Jesus kada no ipulong tayoy maong a balita. (Mat. 28:18-20) Komadua, ibabaki nen Jehova iray anghel ya ontulong ed sikatayo. (Apo. 14:6) Komatlo, iikdan itayo nen Jehova na masanton espiritu to ya mangipanonot ed saray naaralan tayo. (Juan 14:25, 26) Tan komapat, uusaren nen Jehova iray agagi ya onsuporta ed sikatayo diad panagpulong. On, anggapoy nepeg tayon takotan ta wadtan si Jehova tan saray maar-aron agagi ya ontulong ed sikatayo.

MAN-ADJUST TAN MANSIANSIAN POSITIBO

11. Antoy gawaen mo pian mas dakel so napulongan mo? (Nengnengen met so litrato.)

¹¹ Wala ray panaon ya nadidismaya tayo ta ngalngali anggapoy nakatongtong tayo no manpupulong tayo ed kaabungan. No ontan, antoy marakep ya gawaen? Tepetan moy sarilim: ‘Kulaan kasi na saray totoo?’ (Gawa 16:13) ‘Wala ra kasid trabaho o mititindaan ira?’ No bilang ta ontan, ompan sarag yoy man-street witnessing pian mas dakel so nakatongtong yo. Oniay imbaga na sakey ya brother, si Joshua: “Sinalik so manpulong diad saray lakoan tan diad paradaan. Balibali ta dakel so apulongan ko.” Imbaga to met ya mas dakel so nasasabi dad kaabungan na asawa ton si Bridget no say pampulong da et no mansirunget la tan no kada ngarem na Simba.—Efe. 5:15, 16.

12. Panon tayon naamtaan no antoy papanisiaan o pampapagaan na saray totoo ed teritorya tayo?

¹² No diad gapo et ag-interesado so katongtong mo, salim so mantepet pian naamtaan mo no antoy papanisiaan o pampapagaan to. Ontan so gagawaen nen Joshua tan Bridget.  Uusaren da imay tepet ya walad arap na saray tracts tayo. Singa bilang, no uusaren da may Antoy Pangipapasen Mod Biblia? oniay introduksion da: “Panisiaan na arum ya say Biblia et nanlapud Dios, pero say arum andi. Sikayo ey, antoy nibaga yo ey?” Alikas da ya lapud satan ya paraan, mas labay na totoo so mitongtong.

13. Akin et maliket tayo nin siansia ed ministeryo anggano ag-ondengel iray totoo ed teritorya tayo? (Proverbio 27:11)

¹³ Anggano ag-ondengel iray totoo, maliket tayo nin siansia diad ministeryo. Akin ey? On ta amta tayon gagawaen tayoy ipapagawa nen Jehova tan say Anak to​—say pangipulong ed maong a balita. (Gawa 10:42) Kanian anggano anggapoy akatongtong tayo o anggapoy dinmengel ed mensahe tayo, maliket tayo nin siansia ta amta tayon napapaliket tayoy Aman Jehova.​—Basaen so Proverbio 27:11.

14. Akin et maliket tayo no walay agi ya akalmoy interesado?

¹⁴ No walay agi ya akalmoy interesado, maliket tayo met. Inkompara na Panag-bantayan so kimey tayo ed pananap na nababalang ya ugaw. Di ba no walay nababalang ya ugaw, dakel so ontulong ya mananap ed sikato. Laen dan amin so posiblin lugar ya nakar to. Insan no aromog da la, seguradon maliket iran amin anggano saksakey labat so aktual ya akalmo ed sikato. Ontan met so kimey ya panagpulong tan panagbangat. Walay nitutulong tayon amin pian napulongan iray totoo ed teritorya na kongregasyon tayo. Kanian malikeliket tayo no walay anggan sakey ya interesado ya onatendi ed aral.

NONOT MON LANANG SO PANANGAROM ED SI JEHOVA TAN ED TOTOO

15. Panon ya makatulong imay nabasad Mateo 22:37-39 pian mas maliket tayod panagpulong? (Nengnengen met so litrato.)

¹⁵ Mas maliket tayon manpulong no lanang tayon sankanonot ya sakey itan ya paraan pian nipanengneng tayo ya inar-aro tayoy Jehova tan saray totoo. (Basaen so Mateo 22:​37-39.) Isip mo pay liket ya nalilikna nen Jehova kada no nanenengneng to tayon manpupulong. Isip mo met so epekto ed bilay na saray totoo no naamtaan da iray katuaan ed Biblia. No dengelen day mensahe tayo tan manlingkor met irad si Jehova, natan ni labat et magmaliw la ran maliket. Tan diad arapen  et nawalaan iray bilay ya andi anggaan!​—Juan 6:40; 1 Tim. 4:16.

16. Anto ray gawaen tayo pian makapanpulong tayo nin siansia anggano agtayo makaalis ed abung? Mangiter na alimbawa.

¹⁶ Kasin lapud situasyon mo et agka makaalis ed abung? No ontan so situasyon mo, manpokus ka ed saray sarag mon gawaen pian nipanengneng mo nin siansiay panangarom ed si Jehova tan ed saray totoo. Ontan so ginawa nen Samuel tan Dania. Nen COVID-19 pandemic, ag-ira makaalis ed abung. Pero anggano mairap so situasyon da, regular iran manpupulong panamegley na telepono, manggagawa ray sulat, tan mangiyaaral iray Biblia diad Zoom. Pupulongan met nen Samuel iramay nakakabansag to diad clinic no eskedyul toy manpatambal parad cancer to. Kuan to: “No wala ray mairap ya dadalanen tayo, agtayo naiwasan so manpaga, apektado met so laman tayo, tan nasubok so pananisia tayo. Kanian manisip tayoy paraan pian mansiansia tayon maliket ed panaglingkor tayo.” Anta mairap la lanti situasyon nen Samuel tan Dania, wala ni agawad si Dania ya lapud satan et taloy bulan ya wala labat ed dukolan. Insan anem bulan lamet ya kaukolan toy man-wheelchair. Pero oniay imbaga to: “Sasamboten koy amin ya pankanawnawan makapanpulong ak. Nen walay nurse ya linmad abung, pinulongan ko. Kada no walay man-deliver ed abung mi, pupulongan ko met ira. Aminpigak met ya apulongan diad telepono so sakey ya bii ya mantratrabaho ed kompanya ya manlalakoy gamit ed panagpatambal.” Anggano aliwa lan singa dati so nagagawaan nen Samuel tan Dania diad ministeryo, ginawa da nin siansia so anggaay nayarian da kanian maliket ira.

17. Antoy gawaen tayo pian minabang tayon maong ed saray apantongtongan tayon punto?

¹⁷ Marakep no iyaplika tayon amin imay limaran punto ya apantongtongan tayod sayan artikulo. Kada punto et singa rekado ed sakey ya putahe. No paniibaen tayo irayan rekado, seguradon mananam so luto tayo. On, no iyaplika tayo iray punton apantongtongan tayo, ombiskeg so liknaan tayo tan mas maliket tayon manpulong!