1. ¿Imanirtan wakin wawqi panikunaqa yachatsikuyta mantsayan? (Rikäri fötuta).

 NOQANTSIKQA Teytantsik Jehoväta kuyar y reqiyänanta munarmi nunakunata yachatsintsik. Tsënö karpis, wakintsikqa yachatsikuyta mantsapakuntsikmi, peru wakintaqa alläpam gustan. ¿Imanirtan wakintaqa alläpa gustan y wakinkunaqa mantsapakuyan? Wakinqa, yachatsikuyta mana yachayanqantam pensayan. Wakinkunanam mana alli sientikuyan mana invitëkäyaptin wayinkunaman chëta. Wakinkunanam nunakuna qayapäyänanta o cöleratsita mantsayan. Tsënö karpis llapantsikmi Jehovä Diosnintsiktaqa kuyantsik. Peru wakintsikpaqqa, manam fäciltsu mana reqinqantsik nunakunata parlapëqa. Tsënö kaptimpis, Diosnintsik mandamashqantsik kaptinmi seguïdu yachatsikoq yarquntsik. Tsëta ruranqantsikpitaqa, ¡Jehoväqa alläpachi kushikun!

2. Diospita yachatsikuyta mantsapakurqa, ¿imanirtan qelanäkurinkimantsu?

² ¿Mana alliku sientikunki Diospita yachatsikurnin? Tsë pasashuptikiqa ama qelanäkuritsu. Capazchi humildi karnin mantsapakunki y nunakunawan discutita mantsanki. Rasumpa kaqchöqa yanapëta munarmi yachatsita munantsik, tsëmi mana chaskikuyaptinqa gustamantsiktsu. Peru Teyta Diosnintsikqa musyanmi yachatsikurnin tsëkunapa pasanqantsikta, y yanapamënintsiktam munan (Is. 41:13). Këchömi mana mantsapakuypa Diospita kushishqa yachatsikunapaq pitsqa consëjukunata yachakurishun.

 DIOSPA PALABRANMI VALIENTI KANAPAQ YANAPAMÄSHUN

3. ¿Imatan mana mantsapakunampaq Jeremïasta yanaparqan?

³ Unë witsampis Diospa sirweqninkunapaqqa manam fäciltsu karqan mandanqankunata cumpliyänan, peru Diospa Palabranmi mana mantsapakuyänampaq yanaparqan. Diospa willakoqnin Jeremïaspaq parlarishun. Yachatsikunampaq Jehovä mandaptinmi, pëqa mantsapakurnin kënö nirqan: “Noqaqa jövinllaran kallä, manam alli parlëtapis yachätsu” (Jer. 1:6). ¿Imatan Jeremïasta yanaparqan mana mantsapakuypa yachatsikunampaq? Diospa Palabranmi. Tsëmi kënö nirqan: “Nimanqëkikunaqa tullü rurinchö rupëkaq ninanömi [...] karqan, y manam aguantëta ni upälla këta puëdirqätsu” (Jer. 20:8, 9). Nunakuna wiyakuyta mana munayaptinmi, Jeremïaspaqqa yachatsikunan fäciltsu karqan. Peru imata yachatsikunampaq kaqman pensanqanmi yanaparqan mana mantsapakunampaq.

4. Diospa Palabranta leyinqantsik y leyinqantsikman pensanqantsikqa, ¿imanötan yanapamantsik? (Colosensis 1:9, 10).

⁴ Noqantsiktapis Diospa Palabranchö ninqanmi mana mantsapakunapaq yanapamantsik. Colösas cristiänukunaman cartakunqanchömi Pablu nirqan, yachakuyanqanqa Jehovä munanqannö portakuyänampaq y alli kaqkunata rurayänampaq yanapanqanta (leyi Colosensis 1:9, 10). ¿Imanötan allikunata rurantsik? Diospita yachatsikurmi. Rikanqantsiknömi, Bibliata leyinqantsik y leyinqantsikman pensanqantsikqa yanapamantsik, Jehoväman mas markäkunapaq o yärakunapaq y Diospa Gobiernumpita imanir yachatsikunqantsikta maslla entiendinapaq.

5. Diospa Palabran yanapamänata munarqa, ¿imatataq ruranantsik?

⁵ Diospa Palabran yanapamänata munarqa, manam ras rastsu yachakunantsik o leyinantsik. Bibliata leyikarnin juk textuta mana entiendirqa, ¿imatataq rurankiman? Dejarinëkipa rantinmi, Índice de las publicaciones Watch Tower o Jehoväpa testïgunkuna yachakur ashinapaq neqchö, tsë textupaq entienditsikoqta ashinëki. Alli yachakunëkipaq tiempuykita alli patsätsirqa, Biblia ninqanmanmi maslla confiakunki (1 Tes. 5:21). Y Bibliachö ninqanman mas confiakurqa, mas kushishqam nunakunata yachatsishun.

 YACHATSIKUNËKIPAQ ALLI PREPARAKUY

6. ¿Imanirtan yachatsikunapaqqa alli preparakunantsik?

⁶ Yachatsikunëkipaq alli preparakurqa, manam yachatsikunqëki höra mantsapakunkitsu. Tsënömi Jesuspis qateqninkunata yachatsirqan manaraq yachatsikoq ëwayaptin (Lüc. 10:1-11). Y yachatsinqannö yachatsikushqa karmi, alläpa kushishqa sientikuyarqan (Lüc. 10:17).

7. ¿Imanötan kushishqa yachatsikunapaq preparakushwan? (Rikäri fötuta).

⁷ Yachatsikunapaqqa, ¿imanötan preparakushwan? Kënömi pensanantsik: “¿Kë asuntupaqqa imanötan fäcil-lla entiendiyänampaq parlapärïman? Kë markachöqa kë asuntukunapaqmi masta musyëta munayan, tsëqa ¿imanöraq contestäman tsë asuntupaq tapuyämaptin?”. Tsënö pensarirmi alli preparakunantsik. Tsënöpam, nunakunawan parlanqantsik höraqa tranquïlu, kushishqa y kuyakuywan parlapäshun.

8. ¿Imanirtan Bibliachöqa Cristiänukunapaq nin mitu mankanö kayanqanta?

⁸ Diospita yachatsikunqantsiktam apostol Pabluqa ‘mitu mankachö’ këkaq alläpa väleq cösastawan igualatsirqan (2 Cor. 4:7). ¿Imatan tsë mankachö këkaq alläpa väleq cösasqa? Nunakuna salvakuyänampaq Diospa Gobiernumpita yachatsikunqantsikmi (2 Cor. 4:1). Y mitu mankaqa, ¿imatataq rikätsikun? Alli noticiakunata willakoq Diospa sirweqninkunatam. Pablu kawanqan witsan rantikoqkunaqa mitu mankachömi väleq cösaskunata puritsiyaq; mikuyta, vïnuta, qellëta y maskunata. Tsë väleq cösaskunata makintsikman churamoq cuentam, Diosnintsikqa Gobiernumpita yachatsikunapaq mandamarquntsik. Y tsëta cumplinapaqqa, kikinmi poderninwan yanapamäshun.

VALIENTI KANËKIPAQ JEHOVÄMAN MAÑAKUY

9. Yachatsikuyta mana mantsapakunapaqqa, ¿imatan yanapamäshun? (Rikäri fötuta).

⁹ Höraqa capazchi nunakunata parlapëta mantsashwan o mana chaskikuyänampaq kaqta pensar parlapëta mantsashwan. Tsëqa, ¿imaraq yanapamashwan? Apostolkuna rurayanqanta ruranqantsikmi. Pëkunaqa, nunakuna michäyaptin yachatsikuyta dejariyänampa rantinmi Jehoväman kënö mañakuyarqan:  “Yanapëkayämë mana mantsakur qampa palabrëkipita parlar sïguiyänäpaq”. Jehoväqa jinan höram contestarqan (Hëch. 4:18, 29, 31). Mantsapakurpis, nunakunata kuyarnin yachatsir sïguinapaqmi Jehoväman mañakunantsik.

10. Yachatsikunapaq Jehovä mandamanqantsikta cumplinapaqqa, ¿imakunatan yanapamäshun? (Isaïas 43:10-12).

¹⁰ Testïgunkuna kanapaqmi Jehoväqa akramarquntsik (leyi Isaïas 43:10-12). Y yanapamänapaqmi änimantsik, tsëmi valienti këta puëdishun. Imanö yanapamanqantsikta chuskullata rikärishun. Juk, yachatsikunqantsik hörakunam noqantsikwan Jesus këkan (Mat. 28:18-20). Ishkë, Jehoväqa angelkunatam yanapamänantsikpaq churashqa (Apoc. 14:6). Kima, Jehoväqa yachakunqantsikta yarpänapaqmi santu espïritunwan yanapamantsik (Juan 14:25, 26). Y chusku, wawqi panintsikkunatam churamushqa yanapamänapaq. Wawqi panikuna y Jehovä yanapamashqam valienti kashun, y tsënöpam mana mantsapakur nunakunata yachatsirnin sïguishun.

TARINQËKI HÖRACHÖ YACHATSIKUY Y AMA QELANÄKURITSU

11. ¿Imatataq rurankiman nunakunata mas tarinëkipaq? (Rikäri fötuta).

¹¹ Nunakunata wayinkunachö mana tarirqa, ¿qelanäkurinkiku? Tsëqa, kënömi pensanëki: “Kë hörakunaqa nunakuna, ¿mëchötan këkäyan? ¿Trabajëkäyanku o rantipakuykäyanku?” (Hëch. 16:13). Tsëqa, ¿manatsuraq cällikunachö yachatsikuyta puëdinkiman? Tsëtam Joshua jutiyoq wawqi entienditsikun. Kënömi nin: “Noqaqa mercädukunachö pureqkunata y paradërukunachö këkaqkunatam masqa parlapëta puëdirqö”. Wawqi Joshua y warmimpis, nunakunataqa wayinkunachö tariyashqa tardikunapa y domingu tardikunapam (Efes. 5:15, 16).

12. ¿Imanötan musyashwan nunakuna imaman creiyanqanta o imapaq yarpachakuyanqanta?

¹² ¿Y imatataq rurashun parlapëkanqantsik tëmapita nunakuna parlëta mana munayaptin? Tsëqa imaman creiyanqanta o imapaq yarpachakuyanqantam musyëta procuranantsik. Joshuawan warmin Bridgetqa tratädu jananchö këkaq tapukuykunawanmi  yachatsikur qallayan. Kënömi rurayan: Qampaqqa, ¿imatan Biblia? neq tratädupa tapukuyninta rikäratsirmi kënö niyan: “Wakin nunakunaqa creiyan Bibliaqa Diospa Palabran kanqantam, peru wakinqa manam. Y qamqa, ¿ima ninkitan?”. Tsënö tapuriyaptinmi nunakunaqa parlakur qallëkuyan.

13. ¿Nunakunata parlapëta mana puëdir o mana wiyakuyaptinqa qelanäkurishwanku? (Proverbius 27:11).

¹³ ¿Nunakunata mana tarir o mana wiyamashqaqa qelanäkurishwanku? Manam. Masqa välin yachatsikunantsikpaq Jehoväwan Jesus mandamanqantsikta cumplinqantsikmi (Hëch. 10:42). Tsëmi nunakunata parlapëta mana puëdir o mana wiyakuyaptimpis, alläpaqa yarpachakunantsiktsu. Jehovä mandamanqantsikta ruranqantsikpitam masqa kushikunantsik (leyi Proverbius 27:11).

14. ¿Imanötan sientikuntsik juk wawqi o juk pani Diospita yachakuyta munaq nunata taririptin, y imanirtan tsënöqa kushikuntsik?

¹⁴ Diospita yachakuyta munaq nunata juk wawqi o juk pani taririptinqa, llapantsikmi kushikunantsik. Täpakoq revistam parlarqan juk oqrakashqa wamrata mëtsikaq nunakuna mëtsëpa ashiyanqanta, peru juk taririptinqa llapankuna kushikuyanqanta. Tsënömi noqantsikpis Diospita yachakuyta munaqkunata mëtsëpa ashintsik, peru juk wawqi o juk pani taririptinqa alläpam kushikuntsik. Y reunionkunaman shamur qallëkuptinnäqa masran kushikuntsik.

JEHOVÄTA Y NUNA MAYINTSIKTA KUYAR YACHATSIKUSHUN

15. ¿Imaraq yanapamäshun kushishqa yachatsikunapaq? (Mateu 22:37-39; rikäri jana qaranchö këkaq fötuta).

¹⁵ Jehoväta y nuna mayintsikta kuyarqa, kushishqam yachatsikushun (leyi Mateu 22:37-39). Pensari, ¡Jehoväqa alläpachi kushikun yachatsikoqta rikämarnintsik! ¡Bibliapita yachakuyta qallaq nunakunapis alläpachi kushikuyanqa! Ama qonqashuntsu Jehoväpa sirweqnin tikraqkunaqa salvakuyänampaq kaqta (Juan 6:40; 1 Tim. 4:16).

16. Wayin wayin yachatsikuyta mana puëdirpis, ¿imanö yachatsikurtan kushishqa sientikushwan? Pasakunqanwan willakaramuy.

¹⁶ Y yachatsikunëkipaq wayipita yarquyta mana puëdirqa, ¿imatataq rurankiman? Jehoväta y nuna mayikita kuyanqëkitam tukuynöpa  rikätsikunkiman. Këllaman pensarishun: COVID-19 qeshya kanqan witsanmi, Samuelwan warmin Dania wayillachö quedakuyarqan. Y tsë tiempuchöqa telëfunullapa, cartallapa y Zoomllapam nunakunata Bibliapita yachatsiyarqan. Y Samuelqa cancer qeshyayoq karmi, clïnicata ëwarnin tsëchö atiendikoq nunakunata Bibliapita parlaparqan. Samuelmi kënö nin: “Problëmakunapa pasarqa, alläpa utishqam o pishipashqam sientikuntsik, alläpam yarpachakuntsik y Diospa kaqkunata ruranampis manam fäciltsu. Tsëmi kushishqa kanantsikpaq Jehovä yanapamänata wanantsik”. Tsënö këkäyaptinmi, warmin Daniaqa ishkirirqan y kima killapam cämachö kakurqan. Y tsëpitanam joqta killapa sïlla de ruëdallachö kakurqan. Daniam kënö nin: “Llapan puëdinqämannömi Diospita yachatsikurqä. Wayïman visitamaq enfermërata y rantipakunqäkunata apamoq nunakunatam Bibliapita parlaparqä. Tsënöllam salor asuntupaq cösaskunata rantikur emprësachö trabajaq warmitapis telëfunupa Bibliapita parlaparqä”. Samuelwan Daniaqa imëka mana allikunapam pasayarqan, peru llapan puëdiyanqanmannö Diospita yachatsikushqa karmi kushishqa sientikuyarqan.

17. ¿Këchö yachakunqantsik yanapashunëkipaqqa wakin wakinllataku ruranëki?

¹⁷ Kushishqa yachatsikunëkipaqqa yanapashunki këchö yachakunqantsikta pitsqanta ruranqëkim, peru wakinllata ruraptikiqa manam yanapashunkitsu. Imanömi cocinanqantsik mikuy mishki yarqunampaq llapan wananqantaraq winanantsik, tsënöllam kushishqa yachatsikunapaq, nunakuna mana wiyakuptin mana llakikunapaq y mana mantsapakunapaqqa, këchö yachakunqantsikta llapanta ruranantsik.