1. ¿Maijancunaca predicacionman llujshishpaca ima shinataj sintirincuna? (Fotomantapish parlapai).

 ÑUCANCHIJCA Jehová Diosta cꞌuyashcamantami huillanchij. Achca huauqui panicunaca Diosmanta huillanataca achcatami munancuna. Shinapish shujtajcunapajca Diosmanta huillashpa purinaca sinchimi can. ¿Imamanta? Maijan huauqui panicunaca achca pingaitami charincuna. Shinallataj mana alli yachachijcuna cashcatami yuyancuna. Cutin shujtajcunaca “gentecunaca ñucanchijta mana rijsishcamantami mana alli chasquingacuna” nishpami sustarincuna. Shujtajcunacarin “gentecunataca mana molestanachu canchij” nishpami yuyancuna. Cai huauqui panicunaca Jehová Diostaca achcatami cꞌuyancuna. Pero paicunapajca mana rijsishca gentecunaman huillanaca sinchimi can. Sinchi cajpipish Diosmanta huillashpa catingapajmi esforzarishpa catincuna. Paicunapaj esfuerzocunata ricushpaca Jehová Diosca cushillami sintirin.

2. ¿Diosmanta cushicushpa huillana cambajca sinchi cajpica imamantataj mana desanimarina cangui?

² ¿Diosmanta cushicushpa huillanaca cambajpishchu sinchi can? Chashna sintirishpaca mana desanimarinachu cangui. Huaquinpica humilde cashcamantami predicacionman llujshinata manchanchij. Tal vez “gentecunaca ñuca jatun tucushca cashcata yuyachunca mana munanichu” nishpachari yuyangui. Shinallataj gentecunahuan mana pꞌiñanacusha nishcamantachari chashna sintiringui. Gentecunata ayudasha nishca jahua mana alli tratachunca pipish mana munanchu. Predicacujpi jarcaicunahuan chꞌimbapurai tucushcataca Yayitu Diosca allimi yachan. Chaimantami cantaca ayudasha nin (Isaías 41:13). Cai yachaipica jarcaicunata mishashpa, cushicushpa huillashpa catingapajca pichca yuyaicunatami yachashun.

 DIOSPAJ SHIMI CANTA SINCHIYACHICHUN SAQUI

3. ¿Jeremiasca ima shinataj mana manchashpa huillai tucurca?

³ Jehová Diosca ñaupa tiempopi paita sirvijcunaman imata rurachun mingashpaca sumaj shimicunahuanmi sinchiyachij carca. Profeta Jeremiaspi yuyashun. Jehová Dios ñucamanta huillagri nishpa mandajpica paica achca manchaitami charirca. Jeremiasca: “Ñucaca alli rimanallatapish manaraj yachaj huambramari cani” nirca (Jeremías 1:6). Pero Jeremiasca ¿ima shinataj manchaitaca misharca? Jehová Diosmi alaja shimicunahuan paitaca sinchiyachirca. Chaimi Jeremiasca: “Jehová Diostaca cambaj shimica ñuca shungupica, tullucama nina rupachij shinami tucurca. Ñuca shungullapi charisha yuyashpapish manataj upajlla saquiri tucurcanichu” nirca (Jeremías 20:​8, 9). Jeremías causashca punllacunapi Diosmanta huillanaca sinchimi carca. Pero Jehová Diospaj nishcacunata yuyaipi charishcamantami paica mana manchashpa huillai tucurca.

4. ¿Bibliataca imamantataj estudiana canchij? (Colosenses 1:​9, 10).

⁴ Ñucanchijpish Bibliata liyishpami Diosmanta huillashpa catingapajca animota japinchij. Apóstol Pabloca Colosaspi caj huauqui panicunataca: ‘Diosmanta yachanami paita cushichichun, shinallataj alli ruraicunata rurachun ayudanga’ nircami (Colosenses 1:​9, 10-ta liyipai). Caipica alli ruraicuna nishpaca predicacionmantapishmi parlacun. Shinashpaca Bibliata liyishpa, chaipi nishcacunapi yuyashpaca ñucanchij fetami sinchiyachishun. Ashtahuanpish alli huillaicunata huillana imamanta valishca cashcatami intindishun.

5. ¿Bibliapi nishcacunata alli intindingapajca imatataj rurana canchij?

⁵ Diospaj Shimipi nishcacunata alli intindingapajca mana jahua jahuallachu estudiana canchij. Por ejemplo, Bibliata liyicushpaca shuj versota mana intindishpaca ¿imatataj rurana canchij? Shujtaj versoman pasanapaj randica mana intindishca versota alli intindingapajca Índice de las publicaciones Watch Tower, mana cashpaca Guía de estudio para los testigos de Jehová nishca publicacioncunapi chai verso ima nisha nishcata investigai pudinchij. Diospaj Shimita estudiangapaj tiempota surcushpaca chaipi nishcacuna ciertotaj cashcatami seguros cashun (1 Tesalonicenses 5:21). Bibliapi nishcacuna mana llulla cashcata seguro cashpaca cushicushpami shujtajcunamanpish yachachishun.

 PREDICACIONMAN LLUJSHINGAPAJ PREPARARI

6. ¿Predicacionman llujshingapajca imamantataj alli allichirina canchij?

⁶ Predicacionman llujshingapaj alli prepararishpaca ashtahuan tranquilomi huillai tucungui. Jesusca paita catijcunata huillanaman manaraj cachashpaca ima shina huillana cashcatami alli yachachirca (Lucas 10:​1-11). Paicunaca Jesuspaj yachachishcacunata pajtachishpaca cushicushpami achca gentecunaman huillai tucurcacuna (Lucas 10:17).

7. ¿Predicacionman llujshingapajca ima shinataj preparari tucunchij? (Fotomantapish parlapai).

⁷ ¿Predicacionman llujshingapajca ima shinataj prepararina canchij? Chaipajca ñucanchij propio shimicunahuan ima shina huillanatami yuyana canchij. Shinallataj gentecuna jarcaicunata churajpi imata ninatami repasana canchij. Chashnami paicunahuan parlacushpaca tranquilo, cushi ñahuihuan parlai tucushun.

8. ¿Ñucanchijca imamantataj allpa puñucuna shina canchij?

⁸ Apóstol Pabloca: “Ñucanchijca allpa puñucuna shinalla cashpapish cai valishca obratami charinchij” nircami (2 Corintios 4:7). ¿Chai valishca obraca imataj can? Diospaj Reinomanta huillanami chai valishca obraca can. Diosmanta huillashpami shujtaj gentecunapish quishpirichun ayudanchij (2 Corintios 4:1). Cutin, ñucanchijcunaca allpa puñucuna shinami canchij. ¿Imamanta? Pablo causashca punllacunapica gentecunaca valishca cosascunatami allpa puñucunapi apajcuna carca. Por ejemplo, micunacunata, vinota, cullquitami allpa puñucunapi apajcuna carca. Caimantaca ¿imatataj yachanchij? Ñucanchijca valishca cosascunata apaj puñucuna shinami alli huillaicunataca gentecunaman yachachinchij. Jehová Dios ayudajpimi tucui shunguhuan huillashpa catingapaj fuerzasta charinchij.

MANA MANCHASHPA HUILLANGAPAJ DIOSTA MAÑAI

9. ¿Mana manchashpa huillangapajca imatataj rurana canchij? (Fotomantapish parlapai).

⁹ Huaquinpica “gentecunaca rimangacunami” nishpami huillanata manchashcanchij. Pero ¿ama manchangapajca imatataj rurana canchij? Autoridadcuna ama huillachun jarcasha nijpi apostolcuna imata rurashcatami yuyarina canchij. Paicunaca ama manchangapajca Jehová Diostami, “mana manchashpa cambaj shimimanta huillashpa catichun ayudahuai”  nishpa mañarcacuna. Yaya Diosca paicunapaj mañaitaca chai ratomi cutichirca (Hechos 4:​18, 29, 31). Ñucanchijpish manchaita charishpaca Jehová Diostami mañana canchij. Chashnami gentecunata manchanapaj randica paicunapish quishpirichun huillashpa catishun.

10. ¿Jehová Diosca paimanta huillachunca ima shinataj ñucanchijtaca ayudan? (Isaías 43:​10-12).

¹⁰ Jehová Diosca paimanta huillachunmi munan. Chaimantami testigo de Jehovacuna canchij (Isaías 43:​10-12-ta liyipai). Pero ¿mana manchashpa huillachunca Jehová Diosca ima shinataj ayudan? Chuscu yuyaicunata ricushun. Puntapica, alli huillaicunata huillacujpica Jesusmi ñucanchijtaca ayudan (Mateo 28:​18-20). Ishquipica, Jehová Diosca ñucanchijta ayudachunca angelcunatami churashca (Apocalipsis 14:6). Quimsapica, Jehová Diosca espíritu santota cushpami imallata yachashcata yuyarichun ayudan (Juan 14:​25, 26). Y chuscupica, Jehová Diosca ñucanchijta ayudachunca huauqui panicunatami cushca. Jehová Diospaj ayudahuan, huauqui panicunapaj ayudahuanmi mana manchashpa huillai tucushun.

GENTECUNAPI YUYASHPA CUSHICUSHPA HUILLAI

11. ¿Ashtahuan gentecunaman huillangapajca imatataj rurai tucunchij? (Fotomantapish parlapai).

¹¹ ¿Huasin huasin huillacushpa casi pihuan mana parlashcamantachu desanimaringui? Cashna sintirishpaca “¿gentecunaca maipishi canga?” nishpa yuyai. ¿Paicunaca trabajopichu canga? ¿Feriamanchu rirshcanga? (Hechos 16:13). Chashna cajpica chai gentecunaman ima shina huillanata yuyai. Por ejemplo, huauqui Joshuaca: “Mercadocunapi, parqueaderocunapimi ashtahuan gentecunaman parlai tucushcani” nircami. Shinallataj cai huauquipish, paipaj huarmipish tutayacujpi, domingo chishi ladopish huillashpami ashtahuan gentecunahuan parlai tucushcacuna (Efesios 5:​15, 16).

12. ¿Gentecuna imata yachasha nishcata yachangapajca imatataj rurana canchij?

¹² Gentecuna Diosmanta yachana munaita mana tanto charijpica ¿imatataj rurana canchij? Paicuna imapi crijcuna cashcata, imacunallamanta sustarijcuna cashcatami yuyana canchij. Huauqui Joshua, paipaj huarmipish tratado pꞌangacunapi tiyaj tapuicunata  rurashpami huillancuna. Por ejemplo, ¿Bibliaca imataj can? nishca tratadohuan huillacushpaca: “Maijan gentecunaca Bibliaca Diospaj Shimi cashcatami crincuna. Cutin shujtajcunaca chaitaca mana crincunachu. ¿Quiquinca imatataj yuyangui?” nishpami huillancuna. Chashna huillashcamantami paicunaca achca gentecunahuan parlai tucushcacuna.

13. ¿Gentecuna mana uyasha nijpipish imamantataj mana desanimarina canchij? (Proverbios 27:11).

¹³ Jehová Diospish, Jesuspish, alli huillaicunata huillachunmi mandashca (Hechos 10:42). Chaimantami Diosmanta huillacujpi gentecuna mana uyasha nijpica mana desanimarina canchij. Ashtahuanpish ñucanchijman mingashcata pajtachicushcamanta, Jehová Diospaj shunguta cushichicushcamantami cushilla sintirina canchij (Proverbios 27:​11-ta liyipai).

14. ¿Shuj huauqui o pani Diosmanta yachana munaita charij gentecunata tarijpica ima shinataj sintirinchij? ¿Imamantataj chashna sintirinchij?

¹⁴ Huauqui panicuna gentecunaman Bibliamanta yachachijpipish cushillami sintirinchij. ¿Imamanta? Caitaca “Huillaj” revistapica shuj alaja ejemplota churashpami yachachirca. Huillana obraca chingarishca huahuata mashcacushca shinami can. Huahuata taringapajca achca gentecunami chꞌican chꞌican ladocunapi ordenpi mashcashpa rin. Huahua ricurijpica huahuata tarij runallaca mana cushicunchu. Ashtahuanpish tucuicunami cushicuncuna. ¿Caimantaca imatataj yachanchij? Alli shungu gentecunata taringapajca tucuicunami shuj shinalla ordenpi trabajanchij. Pero maijan huauqui o pani alli shunguta charij gentecunata tarijpica tucuicunami cushicunchij. Tandanacuicunaman ri callarijpicarin ashtahuanmi cushicunchij.

CꞌUYAITA RICUCHI

15. ¿Cushicushpa huillangapajca imatataj rurana canchij? (Mateo 22:​37-39; fototapish ricui).

¹⁵ Cushicushpa huillangapajca Jehová Diosta, gentecunatapish cꞌuyashcamanta huillacushcatami yuyarina canchij (Mateo 22:​37-39-ta liyipai). Ñucanchijcuna tucui shunguhuan huillacushcata ricushpaca Yayitu Jehová Diosca cushillami sintirin. Ashtahuancarin gentecunaca Bibliamanta yachai callarishpaca cushi causaitami chari tucungacuna. Chashnami paicunapish quishpiri tucungacuna (Juan 6:40; 1 Timoteo 4:16).

16. ¿Huasimanta mana llujshi tucushpaca cushicushpa huillangapajca imatataj rurana canchij? (Shuj ejemplota churashpa parlai).

 ¹⁶ Predicacionman ringapaj huasimanta mana llujshi tucushpaca ¿imatataj rurana canchij? Huasimanta mana llujshi tucushpapish ñucanchij rurai pudishcallatami rurashpa catina canchij. Chashnami Jehová Diosta, gentecunatapish cꞌuyashcata ricuchishun. COVID-19 pandemia punllacunapica huauqui Samuel y paipaj huarmi Daniaca huasimantaca mana llujshi tucurcacunachu. Chashnapish paicunaca telefonopi cayashpa, cartacunata quillcashpa, Zoom programata utilizashpami Diosmanta yachachishpa catircacuna. Shinallataj Samuelca cáncer ungüita charishcamantami hospitalman rina carca. Paica chaiman rishpaca Diosmanta huillangapajmi aprovechaj carca. Samuelca: “Llaquicunata charishpaca shaicushca, llaquillami sintiri tucunchij. Pero Diosmanta huillashpami animota japi tucunchij” nircami. Shinallataj Daniaca urmashcamantami quimsa quillacunata camapi pasarca. Chai qꞌuipaca seis quillacunatami silla de ruedasta utilizana carca. Paica: “Diosmanta huillangapajmi esforzarishpa catircani. Chaimi ñucata visitaj enfermeraman, ñucanchij randishca cosascunata huasipi saquinaman rijcunamanpish huillarcani. Ashtahuancarin telefonopi cayashpami shuj empresapi trabajaj huarmiman huillarcani” nircami. Caipi ricushca shinaca cai huauqui panica achca llaquicunata charishpapish Diosmanta huillashpa catingapajmi esforzarircacuna. Chaita rurashcamantami paicunaca cushilla carcacuna.

17. ¿Cushicushpa huillangapajca imatataj rurana canchij?

¹⁷ Caipi yuyashun. Shuj mishqui micunata preparangapajca tucui minishtishca ingredientecunatami churana canchij ¿nachu? Shuj ingrediente faltajpica micunaca manachari mishqui llujshinga. Chashna layallatajmi cushicushpa huillangapajca cai yachaipi tucui imalla yachashcata pajtachina canchij. Chashnami manchaita saquishpa cushicushpa huillashpa catishun.