1. Huaquin huauquipanicuna predicangapaj llujshishpaca ¿imashinata sintirin? (Fotota ricupangui).

 JEHOVATA sirvijcunaca Jehová Diosta juyaimanda y gentecuna paita rijsichun munaimandami predicapanchi. Ashtaca huauquipanicunaca predicanataca ninandami gushtan. Pero huaquingunaca predicanataca na ashta gushtanllu. ¿Imamandata shina nipanchi? Porque huaquinguna gentecunahuan parlanata manllaimanda o predicaitaca na ushashachu nishpa pensaimandami na ashta gushtan. Cutin huaquingunaca gentecuna paicunapa huasiman na invitashca cajpita predicangapaj huasiman rina tucushcamandami ashata nali sintirin. Cutin huaquingunaca, predicangapaj chayajpi nali chasquihuangachu nishpami manllan. Y huaquingunaca gentecunata culirachiringa nishpami manllan. Cai tucui huauquipanicuna Jehová Diosta ninanda juyashpapash na rijsishca gentecunaman predicana cashcamandami paicunapaca difícil can. Cai huauquipanicuna predicacionbi participana ninan importante cashcata yachaimandami predicashpa catin. Cai huauquipanicuna shina esforzarishcamandaca, de seguromi Jehová Diosca ninanda cushijun.

2. Predicanata manllashpaca ¿imamandata na desanimarina capangui?

² ¿Predicangapaj llujshinataca manllapanguichu? Shina cashpaca ama desanimaripanguichu. Talvez quiquinda alicachishpa ricuchun na munaimanda y gentecunahuan culirarinata manllaimandami shina sintiripangui. Pero shina sintirishpaca humilde cashcatami ricuchijupangui. Ayudangapaj munajpira nali tratachunga na munapanchichu. Jehová Diosca cashna situaciongunata charijtaca yachaimandami ayudangapaj munan (Is. 41:13). Cai temapica predicacionbi manllaicunata mishangapaj y predicanata  ninanda gushtangapaj, imata rurana cashcatami 5 razongunapi yachajupashun.

BIBLIAMI SHINLLI TUCUCHUN AYUDAN

3. Predicashpa catichunga, Jeremías runagutaca ¿imata ayudarca?

³ Ashtaca huatacunatami Bibliaca Jehová Diosta sirvijcuna imapash difícil situaciongunata chimbapurana cajpica ayudajushca. Cunanga profeta Jeremiashuan ima pasashcata ricupashun. Jehová Diosca Jeremías runagutaca predicachunmi mandarca. Chaimi paica manllaimanda cashna nirca: “Ñucaca chairalla huambrami capani, rimanatapash nara ali yachanichu” nircami (Jer. 1:6). Manllajujpica, profeta Jeremiastaca ¿imata ayudarca? Taita Diospa shimimi paitaca ayudarca. Chaimandami Jeremiasca: “Ucu tullucamanmi cambaj Shimica, nina rupajunshna ñucapica tiajurca. Ñuca shungupilla charisha yajushpapash, napacha usharcanichu” nircami (Jer. 20:​8, 9). Jeremías predicana pushtupi predicanaca na facilchu carca. Pero Jeremías runagutaca Jehová Dios imata predicachun mandashcata yaipi charinami predicashpa catingapaj fuerzata charichun ayudarca.

4. Bibliata liina y liishcapi pensarinaca ¿imashinata ayudan? (Colosenses 1:​9, 10).

⁴ Bibliaca tucui cristianocunatallatami ninanda ayudan. Colosas llactamanda huauquipanicunaman shuj cartata apóstol Pablo escribijushpaca, Bibliapa yachachishcacunami ‘Jehová Dios munashcashna aliguta causachun’ y “ali ruraicunatapash” rurashpa causachun ayudan nircami (Colosenses 1:​9, 10​ta liipangui). Ali ruraicunata rurangapaca, ali villaigucunatami predicana capanchi. Shinaca Bibliata liishpa y liishcapi pensarishpaca, Jehová Diospimi ashtahuan confiaita ushapanchi. Shinallata, Jehovapa Gobiernomanda imamanda predicajushcatapashmi ashtahuan intindi ushapanchi.

5. Bibliata ali ali intindichunga ¿imata ruranata ayudanga?

⁵ Bibliata ali ali intindingapaca, alimandami liina y estudiana capanchi. Shinallata aliguta pensarina capanchi. Por ejemplo, Bibliata liijushpa y shuj textota na ashta ali intindishpaca ¿imatata ruraita ushapangui? Bibliata liijushpa y shuj textota na intindishpa, chaipi quidanapa randica Índice de las publicaciones Watch Tower nishcapi o Bibliamanda ashtahuan ali intindingapaj informacionguna nishcapipash mascapangui. Na intindi ushashca textota ali intindingapaca cai informaciongunapi mascapangui. Shinaca Bibliata ali ali estudiangapaj tiempota llujchishpaca, Bibliapa yachachishcacunapica ashtahuanmi confiashpa catipangui (1 Tes. 5:21). Bibliapa  yachachishcacunapi ashtahuan confiashpaca, shujcunaman Bibliamanda parlanataca ashtahuanmi gushtapangui.

PREDICANGAPACA ALI PREPARARISHPA RIPANGUI

6. ¿Imamandata predicangapaj nara rishpallata aliguta prepararina capanchi?

⁶ Predicangapaj ali prepararishpaca, gentecunahuanga tranquilomi parlaita ushapangui. Jesusca paipa discipulocunata predicachun nara cachashpallatami ali yachachirca (Luc. 10:​1-11). Jesuspa discipulocuna, Jesuspa yachachishcacunata tucuita pactachimandami ali predicashpa huaquin cosascunata ali ruraita usharca. Chaimandami paicunaca cushillapacha carca (Luc. 10:17).

7. Predicangapaca ¿imashinata prepararita ushapanchi? (Fotota ricupangui).

⁷ Predicangapaca ¿imashinata aliguta prepararita ushapanchi? Bibliamanda fácil intindichingapaca imacunatallata nita ushashcapi pensarita ushapanchi. Shinallata predicacionbi cajpi pipash shuj shuj tapuicunata rurajpi, imacunatalla nishpa contestanataca nara predicangapaj llujshishpallatami aliguta pensarishpa ali prepararishpa llujshina capanchi. Shina rurashpaca predicanajushpaca cushilla tranquilomi parlaita ushapashun.

8. Jehovata sirvijcunaca ¿imamandata alpa mangagushna can?

⁸ Apóstol Pabloca huauquipanicunataca: “Alpa mangagushna cashpapashmi, cai alipacha valishca obrata charipanchi” nircami (2 Cor. 4:7). Pero cai alipacha valishca obraca ¿imata can? Jehovapa Gobiernomanda ali villaicunami can. Ali villaigucunami gentecunapa causaitaca salvan (2 Cor. 4:1). Alpa mangagushna nishpaca ¿picunamandata parlajun? Alpa mangagucunashna nishpaca Jehovata tucui sirvijcunamandami parlajun. Shinaca Jehovata tucui sirvijcunallatami gentecunamanga ali villaigucunata predicanajupanchi. Apóstol Pablopa tiempocunapica negociashpa trabajajcunaca micunata, vinota, culquita o shuj valishca cosascunataca chai alpa mangacunapimi apan carca. Cunan punllacunapica Jehová Diosca shuj valishca obrata rurachunmi ñucanchimanga mingashca. Cai obraca ali villaigucunami can. Ali villaigucunata predicachun Jehová Dios fuerzata carajpimi predicashpa catita ushapashun.

AMA MANLLANGAPACA, JEHOVÁ DIOSPA AYUDATA MAÑAPAI

9. Ama manllangapaca ¿imatata ruraita ushapanchi? (Fotota ricupangui).

⁹ Huaquinbica gentecuna ñucanchita na aliguman chasquinatami manllapanchi. Shina manllajujpica  ¿imata ayudanga? Apostolcunapa ejemplota yarinami ayudanga. Apostolcunataca ama predicachunmi prohibirca. Pero paicunaca manllaimanda predicanata saquinapa randica Jehová Diostaca “na manllashpa quiquinba shimita predicashpa” catingapaj ayudahuai nishpami mañarca. Shina mañajpica Jehová Diosca ñapashmi ayudarca (Hech. 4:​18, 29, 31). Ñucanchicunapash gentecunata manllajushpaca Jehová Diospa ayudatami mañana capanchi. Shinaca gentecunata juyaimanda ali villaigucunata na manllashpa villachingapami Jehová Diostaca ayudahuai nishpa mañaita ushapanchi.

10. Predicashpa catingapaca ¿ima ayudacunatata charipanchi? (Isaías 43:​10-12).

¹⁰ Jehová Diosca ñucanchicunataca paipa testigocuna cachunmi agllashca. Ashtahuanbash ama manllachun ayudasha nishpapashmi prometishca (Isaías 43:​10-12​ta liipangui). Jehová Dios imashina ayudan cashcataca chuscu yuyaicunapi ricupashun. 1) Jesusmi ñucanchi ali villaicunata predicanajujpica ayudajun (Mat. 28:​18-20). 2) Jehová Diosca angelcuna ñucanchicunata ayudachunmi mingashca (Apoc. 14:6). 3) Jehová Diosca ñucanchicuna imata yachajushcata yarichunmi paipa espíritu santota carashca (Juan 14:​25, 26). 4) ñucanchicunata predicacionman cumbachunga, huauquipanicunatami Jehová Diosca carashca. Jehová Diospa ayudahuan y huauquipanicunapa ayudahuanmi, manllaicunata mishashpa predicashpa catita ushapanchi.

IMA HORARIOPI CASHPAPASH CUSHIJUSHPA PREDICAPAI

11. Ashtahuan predicangapaca ¿imacunatallata ruraita ushapangui? (Fotota ricupangui).

¹¹ Gentecunata huasipi na tarishpaca cashna pensaripai: “Cunan horasca ¿maipishi can? ¿Trabajopi o randingapachu llujshishcanga?” (Hech. 16:13). Shina cajpica ñangunapi pimanbash predicangapaj esforzaripangui. Por ejemplo, Joshua huauquiguca cashnami nin: “Plazacunapi cashpa y shuj shuj pushtucunapi cashpami predicangapaj siempre aprovechani” ninmi. Huauquiguca, paipa huarmigu Bridgethuanga, chishi horas y domingo chaupi punlla jipami predicangapaca llujshirca. Chaita ruranami gentecunata huasipi tarichun ayudarca (Efes. 5:​15, 16).

12. Gentecuna imata yachangapaj munashcata o imapi crishcata yachangapaca ¿imatata rurana capanchi?

¹² Gentecunaman predicajpi na ashta uyangapaj munajta sintishpaca imapi crishcata o  imamanda preocuparijushcata yachangapami esforzarita ushapanchi. Por ejemplo, Joshua y Bridget cusahuarmigucunaca, gentecunahuan parlai callaringapaca tratadocunapa tapuicunata nishpami parlai callarin. Por ejemplo, Bibliamandaca ¿imatata yuyapangui? nishca tratadomanda parlagrijushpaca, cashnami nin: “Huaquingunaca, Bibliaca Taita Diospa shimimi can nishpami crin. Cutin shujcunaca na chashnallata yuyanllu. Pero quiquinga ¿imatata yuyapangui?” nishpami tapun. Chashna ruraimandami, cai cusahuarmigucunaca ashtaca gentecunahuan parlaita ushashca.

13. Gentecuna na uyajpipash ¿imamandata predicashpa catina capanchi? (Proverbios 27:11).

¹³ Gentecuna na uyajpipash Jehová Diospa y Jesuspa mandashcata pactachinajushcamandami cushilla sintiripanchi (Hech. 10:42). Shinaca, pimanbash na predicaita ushashpa o ñucanchita na aliguman chasquijpipash na yapata preocuparinachu capanchi. Caita rurashpaca Jehová Diostami cushichinajupanchi (Proverbios 27:11​ta liipangui).

14. Huauquipanicuna, Jehovata sirvingapaj munaj personata tarijpica ¿imashinata sintiripanchi?

¹⁴ Huauquipanicuna Jehová Diosmanda yachajungapaj munaj personata tarishcata uyashpaca ñucanchipashmi ninanda cushijupanchi. Por ejemplo, La Atalaya revistaca gentecunaman predicanataca chingashca shuj huahuaguta mascajunshnami comparan. Chai chingashca huahuagutaca ashtacacunami shuj shuj pushtucunapi mascan. Huahuaguta tarishpaca, huahuaguta tarishca personallaca na cushijunllu. Ashtahuanbash tucuicunallatami cushijun. Shina cuendallatami, tucuicunallata shujllashna tandajushpa predicapanchi. Tucui huauquipanicunapa ayudahuanmi tucui territoriota predicaita ushapanchi. Shinallata pipash tandanajuicunaman ri callarijpica tucuicunallatami cushijupanchi.

JEHOVÁ DIOSTA Y GENTECUNATA JUYAPASHUNCHI

15. Mateo 22:​37-39​pi nishcashnaca, cushijushpa predicachunga ¿imata ayudanga? ( fotota ricupangui).

¹⁵ Jehová Diosta y gentecunata juyashpallami predicanataca ashtahuan gushtapashun (Mateo 22:​37-39​ta liipangui). Predicanajujta ricushpa Jehová Dios ninanda cushijunata, shinallata gentecuna Bibliamanda yachajui callarishpa, cushilla sintirinatami yaipi charina capangui Shinallata Bibliapa yachachishcacunata aliguman chasquijcuna salvarinataca, na cunganachu capangui (Juan 6:40; 1 Tim. 4:16).

16. Huasimanda na llujshi ushashpapash ¿imashinata cushijushpa predicai ushapanchi? Shuj ejemplomanda parlapai.

 ¹⁶ Huasimanda na llujshi ushashpaca ¿imatata ruraita ushapangui? Jehová Diosta y shujcunata ninanda juyashcata ricuchingapaj tucui usharishcaguta rurapangui. Por ejemplo, COVID-19 pandemia ungui tiaj tiempopica, Samuel y Dania cusahuarmigucunaca huasipilla quidana tucurca. Paicunaca COVID-19 unguimandami, telefonopi cayashpa o cartacunata rurashpa predican carca. Shinallata Zoom nishcapi conectarishpami Bibliamanda yachachin carca. Samuel huauquiguca cáncer unguita charimandami clinicaman atindiringapaj rin carca. Chaipimi ashtahuan predicaita usharca. Huauquiguca ninmi: “Problemacunaca ñucanchitaca ninandami shaijuchin. Pero Jehová Diosta sirvinami ñucanchitaca ninanda cushichita ushan”. Llaquicunata charishca jahuapash paipa huarmigupashmi urmashpa llaqui aparca. Chaimandami paniguca quimsa quillacunata camamanda jataritaca na usharca. Chai jipaca 6 quillacunatami silla de ruedasta utilizana tucurca. Paniguca ninmi: “Ñuca usharishcaguta rurangapami esforzarircani. Ñucata visitangapaj shamuj enfermeramanmi predicaita usharcani. Shinallata huasiman imapash cosasgucunata jatungapaj shamuj gentecunamanbashmi predicaita usharcani. Jambicunata jatuj shuj empresapi trabajaj shuj huarmigumanbashmi telefonopi predicaita usharcani”. Samuel y Dania cusahuarmigucunaca ashtaca cosascunatami na rurai usharca. Pero paicuna usharishcaguta rurashcamanda cushilla sintirirca.

17. Cai temapi yachajushcacunata pactachinaca ¿imashinata ayudanga?

¹⁷ Cai temapi yachajushcacunata tucuita pactachingapami munapanchi. Por ejemplo, mishquilla micunata yanungapaca ¿imata minishtirin? Shuj shuj cosascunata churashpa yanunami minishtirin. Shina cuendallatami cai temapi yachajushcacunata pactachingapaj esforzarishpaca, imapash llaquicuna o problemacuna ricurijpipash ama desanimarichun y cushijushpa predicashpa catichunmi ayudanga.