1. Сар осетинена пе несаве кеда ваљани те проповединен е јаверенге? (Дикх хем и слика.)

 САР е Јеховаскоро народо, амен проповединаја е јаверенге адалеске со мангаја амаре небесно Даде хем адалеске со мангаја те поможина е јаверенге те запознајнен ле. Бут објавителија чаче уживинена џикоте тане ки служба, ама е јаверенге тано пхаро те уживинен ко адава. Соске? Несаве шај тане лаџутне хем мислинена кај нане шукар учителија. Несаве на осетинена пе шукар те џан ко е манушенгере кхера ако нане каниме. Несаве шај дарана кај о мануша нане те манген те шунен лен. А несаве шај сине воспитиме те избегинен те авен ко конфликт е јаверенцар. Иако бут мангена е Јехова, акале пхраленге хем пхењенге бут тано пхаро те почминен те керен лафи околенцар со на пенџарена лен. Сепак, ола хаљовена кобор тано важно те проповединел пе хем адалеске редовно учествујнена ки служба. О Јехова сигурно бут радујнела пе башо адава!

2. Ако туке пхаро те ове радосно ки служба, соске на ваљани те обесхрабрине тут?

² Дали некогаш туке пхаро те ове радосно ки служба адалеске со осетинеа тут аѓаар? Ако тано аѓаар, ма обесхрабрин тут. Адава со нане тут самодоверба шај те овел знако кај сиан понизно хем кај на мангеа те привлечине внимание ки туте. Исто аѓаар, адава сикавела кај на мангеа те распрајне тут е јаверенцар. Хем никој на мангела те нервиринел е јаверен, посебно ако мангела те керел ленге шукарипе. Тло небесно Дад свесно тано саве предизвикија иси тут хем мангела те дел тут и помош со ваљани туке (Иса. 41:13). Ки акаја статија, ка дикха панџ предлогија башо адава сар те икљова ко крајо асавке чувствонцар хем сар те овел амен радост ки служба.

 МУКХ Е ДЕВЛЕСКОРО ЛАФИ ТЕ КЕРЕЛ ТУТ ЗОРАЛО

3. Со поможинѓа е пророкоске е Еремијаске те проповединел е јаверенге?

³ Чак ко пурано време, о хабери таро Девел дела сине сила лескере слугенге кеда ваљани сине те керен несави пхари задача. Размислин башо е Еремијаскоро пример. Ов сине бут секиримо кеда о Јехова денѓа ле задача те проповединел. О Еремија вакерѓа: „Ме на џанава те керав лафи, соске панда сиум чхаво“ (Ерем. 1:6). Со поможинѓа леске храбро те проповединел? Ов добинѓа сила таро адава со о Девел вакерѓа леске. О Еремија вакерѓа: „Лескоро лафи сине сар јекх јаг со тхабљола, пханли ко мле кокала, хем нашти сине више те ќутинав“ (Ерем. 20:8, 9). Иако е Еремија сине ле пхаро подрачје, ама о хабери со ваљани сине те вакерел ле денѓа ле сила која со ваљанѓа леске те шај те керел пли задача.

4. Со случинела пе кеда читинаја е Девлескоро Лафи хем кеда размислинаја башо адава со читинаја? (Колошања 1:9, 10).

⁴ О христијања добинена сила таро о хабери со аракхљовела ко е Девлескоро Лафи. О апостол Павле поттикнинѓа е пхрален таро Колоси те трудинен пе са пошукар те запознајнен е Девле. Адава ка поможинел ленге сине те живинен аѓаар сар со мангела о Јехова џикоте понадари да анена плоди ки секоја шукар бути. (Читин Колошања 1:9, 10.) Ки акаја шукар бути сине вклучимо те проповединел пе о шукар хабери. Адалеске, кеда читинаја е Девлескоро Лафи хем кеда размислинаја башо адава со читинаја, амари вера ко Јехова овела панда позорали хем панда пошукар хаљоваја кобор тано важно те проповедина о хабери башо Царство.

5. Сар шај те овел амен најбари корист таро читибе хем проучибе и Библија?

⁵ Кеда читинаја, проучинаја хем размислинаја башо е Девлескоро Лафи, на ваљани те кера ле адава сигате ако мангаја те овел амен целосно корист лестар. Адалеске, одвојн туке време. Ако аракхеа стихо кова со на хаљовеа ле, ма накхав ле само. Наместо адава, користин о Индекс башо Публикацие таро е Јеховаскере сведокија или несави јавер публикација истражибаске те шај те аракхе објаснување башо адава стихо. Ако одвојнеа туке време кеда проучинеа, ка ове панда поуверимо кај адава со вакерела и Библија тано точно (1. Сол. 5:21). Кобор поуверимо ка ове, добором повише ка уживине те вакере е јаверенге башо адава со сиклиљан.

 СПРЕМИН ТУТ ШУКАР БАШИ СЛУЖБА

6. Соске ваљани шукар те спремина амен баши служба?

⁶ Ако шукар спреминеа тут баши служба, веројатно нане те овел тут добором трема кеда ка кере е јаверенцар лафи. О Исус поможинѓа пле учениконге те спреминен пе англедер те бичхалел лен те џан ки служба (Лука 10:11-11). Адалеске со применинѓе е Исусескере советија, ола шај сине те керен бут шукар буќа ки служба хем адалеске сине бут радосна (Лука 10:17).

7. Сар шај те спремина амен баши служба? (Дикх хем и слика.)

⁷ Сар шај те спремина амен баши служба? Ваљани те размислина со мангаја те вакера хем сар шај те вакера адава ко јекх природно начин, амаре лафенцар. Исто аѓаар, шај те размислина ко кола трин вообичаена начинија шај те реагиринен о мануша хем сар шај те одговорина ки секоја ситуација посебно. Тегани, кеда ка кера е манушенцар лафи, шај те пробина те опуштина амен, те аса хем те ова природна.

8. Ки сави смисла о христијања тане сар о пхувјале чаре кола со спомнинѓа лен о апостол Павле?

⁸ О апостол Павле јекхе споредбаја сикавѓа сави улога иси амен ки проповедничко задача кеда вакерѓа: „Адава барвалипе иси амен ко пхувјале чаре“ (2. Кор. 4:7). Кова тано адава барвалипе? Адава тано о проповедибе башо Царство кова со спасинела животија (2. Кор. 4:1). Сој тане о пхувјале чаре? Ола претставинена е Девлескере слуген кола со ингарена о шукар хабери е јаверенге. Ко време е Павлескоро, о трговција користинена сине чаре тари глина те шај ки ленде те ингарен вредна буќа, сар на пример хајбе, мол хем паре. Слично, о Јехова денѓа амен и најскапоцено бути — о шукар хабери. Адалеске со о Јехова поможинела амен, шај те добина и сила со ваљани аменге те шај понадари да верно те проповедина.

МОЛИН ТУТ БАШИ ХРАБРОСТ

9. Сар шај те победина и дар таро мануш или и дар кај нане те манген те шунен амен? (Дикх хем и слика.)

⁹ Понекогаш, шај те овел амен дар таро мануш, или дара кај о мануша нане те манген те шунен амен. Сар шај те победина и дар? Размислин баши е апостоленгири молитва кеда нарединѓе ленге те на проповединен. Ола на дарандиле хем на чхинавѓе те проповединен. Наместо адава, молинѓе е Јехова  те поможинел ленге понадари да храбро те вакерен лескоро лафи. О Јехова одма одговоринѓа ки ленгири молитва (Апо 4:18, 29, 31). Ако понекогаш иси амен дар таро мануш, амен да ваљани те молина е Јехова те поможинел аменге. Молин е Јехова те поможинел туке те манге е манушен те шај те победине и дар.

10. Сар поможинела амен о Јехова те шај те кера амари задача сар лескере сведокија? (Исаија 43:10-12).

¹⁰ О Јехова биринѓа амен те ова лескере сведокија хем ов ветинела аменге кај ка поможинел амен те ова храбра. (Читин Исаија 43:10-12.) Размислин само башо штар начинија сар керела адава. Прво, о Исус тано аменцар секогаш кеда проповединаја о шукар хабери (Матеј 28:18-20). Дујто, о Јехова поможинела амен преку о ангелија (Отк. 14:6). Трито, о Јехова дела амен пли сила сар помошнико, те шај те сетина амен ко буќа со сиклилем лен (Јован 14:25, 26). Штарто, о Јехова денѓа амен пхраља хем пхења те шај заедно ленцар те џа ки служба. Адалеске со иси амен е Јеховаскири помош хем и поддршка е пхраленгири хем е пхењенгири, иси амен са со ваљани аменге те шај те ова успешна ки служба.

ОВ ПРИЛАГОДЛИВО ХЕМ АЧХОВ ПОЗИТИВНО

11. Џикоте сиан ки служба, сар шај те аракхе повише манушен? (Дикх хем и слика.)

¹¹ Дали сиан обесхрабримо кеда на аракхеа повише манушен кхере? Шај те пуче тут: „Коте тане ко моменти о мануша таро мло подрачје со иси ман?“ (Апо. 16:13). „Дали тане ки бути или иклиле те пазаринен?“ Ако адава тано аѓаар, шај ли те аракхе повише манушен ако сведочинеа ки улица? Јекх пхрал со викинела пе Џошуа вакерела: „Сине ман прилика те керав лафи е манушенцар ко трговска центрија хем ко јавера прометна тхана коте со иси мануша“. Исто аѓаар, ов хем лескири ромни и Бриџит аракхле повише манушен кхере само со почминела те раќол хем недела палоручко (Еф. 5:15, 16).

12. Сар шај те џана ко со верујнена о мануша или башо со секиринена пе?

¹² Ако о мануша каске со проповединеа на сикавена баро интерес, пробин те дознајне ко со верујнена или башо со секиринена пе.  О Џошуа хем и Бриџит сар увод користинена о пучибе со аракхљола ки прво страна таро трактатија. На пример, кеда користинена о трактати Сар дикхеа ки Библија?, ола вакерена: „Несаве мануша верујнена кај и Библија тани таро Девел, ама јавера на верујнена ко адава. Со мислинена тумен?“ Бут пути аѓаар почминена разговор.

13. Соске шај те вакера кај иси амен успех ки служба, чак кеда о мануша на мангена те шунен амен? (Изреки 27:11).

¹³ Амаро успех ки служба на зависинела таро резултатија. Соске? Адалеске со керѓем адава со о Јехова хем лескоро чхаво очекујнена амендар — сведочинѓем е јаверенге (Апо. 10:42). Чак ако на аракхаја некас касаја со шај те кера лафи, или чак ако некој на мангела те шунел о хабери со проповединаја ле, амен шај те ова радосна адалеске со џанаја кај радујнаја амаре небесно Даде. (Читин Изреки 27:11.)

14. Соске шај те радујна амен кеда о јавера ка аракхен ко подрачје некас со интересинела пе башо чачипе?

¹⁴ Амен исто аѓаар радујнаја амен кеда о јавера ка аракхен ко подрачје некој со интересинела пе башо чачипе. Ки Стражарско кула о проповедибе сине споредимо родибаја чхаве со нашавдило. Бут џене тане вклучиме ко родибе хем проверинена ко различна тхана. Кеда ка аракхен е тикне, сарине радујнена пе, на само окова со аракхља ле. Слично, сарине таро собрание тане вклучиме те керен пе неве ученикија е Исусескере. Сарине таро собрание тане потребна те шај те обработинел пе о подрачје хем сарине радујнена пе кеда несаво нево ка почминел те авел ко состанокија.

КОНЦЕНТРИРИН ТУТ КО ТЛО МАНГИПЕ СПРЕМА О ЈЕХОВА ХЕМ СПРЕМА ТЛО ПАШУТНО

15. Сар адава со ка применина о лафија таро Матеј 22:37-39 шај те поможинел аменге те ова панда порадосна ки служба? (Дикх хем и слика тари насловно страна.)

¹⁵ Шај те бајрара амари радост ки служба аѓаар со никогаш нане те бистра кај о проповедибе тано о најшукар начин те сикава амаро мангипе спрема о Јехова хем спрема амаре пашутне. (Читин Матеј 22:37-39.) Замислин само кобор радујнела пе о Јехова кеда дикхела кај проповединаја хем кобор тане радосна о мануша кеда почминена те проучинен и Библија. Ма те бистра исто аѓаар кај окола со шунена о хабери хем одлучинена  те служинен е Јеховаске, иси лен прилика вечно те живинен (Јован 6:40; 1. Тим. 4:16).

16. Сар шај те ова радосна ки служба кеда нашти те икљова кхералдан? Вакер примерија.

¹⁶ Дали тари несави причина нашти те икљове таро тло кхер? Ако адава тано аѓаар, тегани концентририн тут ко адава со шај те кере те шај те сикаве мангипе спрема о Јехова хем спрема тло пашутно. Џикоте трајнела сине и пандемија КОВИД-19, о Семјуел хем и Данија нашти сине те икљовен таро пло кхер. Ко адава пхаро време, ола редовно сведочинена сине преку телефони, пишинена сине писмија хем водинена сине библиска курсија преку Зум. О Семјуел сведочинела сине е манушенге ки болница коте со приминела сине терапија башо рако. Ов вакерела: „О пхарипа лена амари емоционално, физичко хем духовно сила. Ваљани те аракха радост ки амари служба башо Јехова“. Панда попхаро сине адава со и Данија пели хем нашти сине трин масек те уштел таро кревети. Пало адава, ваљани сине те овел ки инвалидско количка шов масек. Ој вакерела: „Пробинава сине те керав са со шај ко мле околностија. Шај сине те сведочинав е медицинско сестраке со посетинела ман сине хем керава сине лафи околенцар со анена манге сине буќа кхере. Исто аѓаар, преку телефони сине ман шуже разговорија јекхе џувљаја која со керела сине бути ки јекх медицинско фирма“. Иако о Семјуел хем и Данија нашти сине више те керен сар со керена сине англедер, ола керена сине адава со шај хем адалеске сине радосна.

17. Сар шај те овел тут најбари корист таро предлогија со дикхлем лен ки акаја статија?

¹⁷ Те шај те овел тут целосно корист таро акала панџ предлогија со дикхлем лен ки акаја статија, пробин те применине секова јекх лендар. Секова предлог тано сар јекх состојка ки јекх рецепта. Кеда са о состојке тари јекх рецепта ка чхивен пе заедно тегани ка овен тут вкусна резултатија. Ако применинаја са о предлогија, тегани полокхе ка шај те икљова ко крајо е негативно чувствонцар хем ка ова порадосна ки служба.