1. Sose tano disavenđe pharo te propovedinen? (Dikh i slika.)

 SAR e Jehovaso narodo, amen propovedinaja sose mangaja amare nebesko Dade hem sose mangaja te pomožina e manušenđe te upoznajinen le. But objaviteljija uživinena ki služba. Ama, averenđe tano pharo te arakhen radost ki služba. Sose? Disave tane but lađutne hem mislinena so nane šukar učiteljija. Disavenđe tano nezgodno te đan ko manuša bivićime. A disave šaj darana so o manuša ka uspudinen len. A nesave šaj darana te na khuven ko problemija e manušencar. Iako but mangena e Jehova, akale phralenđe hem phenjenđe tano but pharo te propovedinen e manušenđe kolen na penđarena. Ama, on haljona kobor tano važno te propovedini pe hem redovno ćerena odova. O Jehova tano sigurno but ponosno upro lende!

2. Sose na valjani te obeshrabrine tut ako tano tuće podijekh puti pharo te ove radosno ki služba?

² Da li tano tuće podijekh puti pharo te ove radosno ki služba odolese so osetineja tut ađahar? Ako ja, ma obeshrabrin tut. Odova so nane tut samopouzdanje šaj te mothovi so hijan ponizno hem so na mangeja te privucine pažnja upro tute. Isto ađahar, odova mothovi so na mangeja te svađine tut e manušencar. Niko amendar na mangela avera te uspudinen le, pogotovo ked trudinaja amen te ćera šukaripe averenđe. To nebesko Dad šukar đanela save pharipa isi tut hem mangela te pomožini tut (Is. 41:13). Ko akava članko ka razmotrina panđ predlogija  kola ka pomožinen amen te ova radosna ki služba ako osetinaja amen ađahar.

MUKH E DEVLESO LAFI TE ZORJAĆERI TUT

3. So pomožinđa e Jeremijase te propovedini e manušenđe?

³ O Devel prekalo po Lafi zorjaćerđa pe slugen ked hine len disavo pharo zadatko. Razmislin ando prorok Jeremija. Ov hine but zabrinuto ked o Jehova dinđa le zadatko te propovedini. Ov phenđa: „Me na đanava te vaćerav, sose pana hijum ćhavoro“ (Jer. 1:6). So pomožinđa lese hrabro te propovedini? O lafija kola o Jehova phenđa lese. O Jeremija phenđa: „Oleso lafi hine sar jag koja thabljola, sar jag koja tani phanli ko me kokala. Odolese više našti hine te ćutinav“ (Jer. 20:8, 9). Iako e Jeremijase hine pharo te propovedini odole manušenđe, i poruka koja valjanđa te vaćeri lenđe dinđa le snaga te ispunini po zadatko.

4. So desini pe ked čitinaja e Devleso Lafi hem hor razmislinaja olestar? (Kološanima 1:9, 10)

⁴ O hrišćanija dobinena snaga ando Jehovase lafija kola tane ki Biblija. Ked pisinđa e skupštinaće ko Kolos, o apostol Pavle phenđa e phralenđe so ako šukar đanena so mangela o Devel odova ka podstaknini len te služinen lese hem te ćeren šukar delija. (Čitin Kološanima 1:9, 10.) Ko odola šukar delija tano uključimo hem te propovedini pe i šukar vest. Znači ked čitinaja e Devleso Lafi hem hor razmislinaja olestar, amen zorjaćeraja amari vera hem pošukar haljovaja sose tano važno te propovedina.

5. Sar šaj pana pobuter te pomožini amen odova so čitinaja hem proučinaja e Devleso Lafi?

⁵ Te šaj e Devleso Lafi pana pobuter te pomožini amen, na valjani te siđara đi čitinaja, proučinaja hem hor razmislinaja. Odvojin dovoljno vreme aso odova. Ako đi čitineja pojavini pe disavo stih kova našti te haljove, ma nakh sigate ko aver nego istražin le. Koristin o Indeks ando publikacije hem o Vodič kotar publikacije ando Jehovase svedokija te arakhe o objašnjenje aso odova stih. Ako odvojineja dovoljno vreme te proučine, ka ove pana pouverimo so odova so pisini ko Devleso  Lafi tano ćaće (1. Sol. 5:21). Ked hijan uverimo ko odova, tu ka uživine te vaćere odolestar averenđe.

SPREMIN TUT ŠUKAR ASI SLUŽBA

6. Sose valjani šukar te spremina amen asi služba?

⁶ Ako šukar spremineja tut asi služba, verovatno na ka ovel tut bari trema. O Isus pomožinđa pe učenikonđe te spreminen pe angleder so bićhalđa len ki služba (Luka 10:1-11). Odolese so primeninđe odova so o Isus sikavđa len, on šaj hine te ćeren but šukar buća hem osetinđe bari radost (Luka 10:17).

7. Sar šaj te spremina amen asi služba? (Dikh i slika.)

⁷ Sar šaj te spremina amen asi služba? Valjani te razmislina so mangaja te phena hem sar šaj odova te phena amare lafencar. Isto ađahar, šukar tano te razmislina ando duj ili trin prigovorija kola često vaćerena ko amaro područje hem odolestar sar bi odgovorinaja. Palo odova, ked ka vaćera e manušencar, valjani te trudina amen te ova smirime, te asa hem te ova ljubazna premalo lende.

8. Ko kova način tane o hrišćanija sar e phuvjake ćare?

⁸ O apostol Pavle phenđa e phralenđe hem e phenjenđe: „Odova barvalipe isi amen ko phuvjake ćare“ (2. Kor. 4:7). Soj tano odova barvalipe? I poruka ando Devleso Kraljevstvo koja spasini e manušenge životija (2. Kor. 4:1). A soj tane e phuvjake ćare? On predstavinena e Devlese slugen kola vaćerena i šukar vest averenđe. Ko Pavleso vreme, o trgovcija koristinđe e phuvjake ćare te bi ando jekh than ko aver igarena disave vredna buća, sar soj tane i hrana, o vino hem o pare. Isto ađahar, o Jehova koristini amen te igara i šukar vest e manušenđe. Uzi Jehovasi pomoć, isi amen snaga revno te propovedina.

MOLIN TUT ASI HRABROST

9. So ka pomožini amen te pobedina i dar ando manuš? (Dikh i slika.)

⁹ Podijekh puti šaj te ovel amen dar ando manuš ili dar so o manuša na ka mangen te šunen amen. So tegani ka pomožini amen? Razmislin ando odova sar molinđe pe o apostolija ked hine lenđe  naredimo te na propovedinen. Umesto te ćhinaven, on rodinđe e Jehovastar te pomožini len „hem ponodri hrabro te objavinen [oleso] lafi“. O Jehova odmah odgovorinđa ki olengi molitva (Dela 4:18, 29, 31). Ako ponekad hem amen isi amen dar ando manuš, valjani te roda e Jehovastar pomoć. Molin tut e Jehovase te pomožini tut te pobedine ti dar hem te ovel tut mangipe premalo manuša.

10. Sar o Jehova pomožini amen hrabro te propovedina? (Isaija 43:10-12)

¹⁰ O Jehova birinđa amen te ova olese Svedokija hem obećini so ka pomožini amen te ova hrabra. (Čitin Isaija 43:10-12.) Ov odova ćerela ko štar načinija. Sar prvo, o Isus tano amencar ked god propovedinaja (Mat. 28:18-20). Sar dujto, o Jehova dinđa zadatak e anđelenđe te pomožinen amen (Otkr. 14:6). Sar trito, dela amen po sveti duh te pomožini amen te setina amen ko buća kola sikljiljam (Jov. 14:25, 26). Sar štarto, dinđa amen phralen hem phenjen te oven amencar. Uzi olesi pomoć hem uzo amare phralja hem phenja, amen šaj te ova hrabra hem revno te propovedina.

OV PRILAGODLJIVO HEM POZITIVNO

11. Sar šaj te arakhe pana pobuter manušen ki služba? (Dikh i slika.)

¹¹ Da li ponekad hijan obeshrabrimo ked na arakheja bute manušen ćhere? Sose na pućeja tut: „Kaj tane akana o manuša ando mo područje?“ (Dela 16:13). Da li tane možda ki buti ja ko pazari? Ako tano ađahar, da li bi šaj te propovedine e manušenđe ki ulica? Jekh phral kova vićini pe Džošua, phenela: „Hine man pobuter prilike te propovedinav đi phirđum ko pazari hem ko avera thana kuri isi but prodavnice.“ Isto ađahar, ov hem olesi romni, i Bridžet, arakhlje pobuter manušen ćhere ked đelje ki služba raćate ili ki nedelja popodne (Ef. 5:15, 16).

12. Sar šaj te haljova ko so o manuša verujinena ili sostar brininena pe?

¹² Ako ki početka o manuša kase propovedineja nane zainteresujime, probin  te haljove ko so verujinena ili sostar brininena pe. O Džošua hem i Bridžet ko po uvod koristinđe o pućibe kova nalazini pe ki prvo strana ko traktati. Na primer, koristinđe o traktati So mislineja andi Biblija? hem phenđe: „Disave mislinena so i Biblija avela ando Devel, a avera na verujinena ko odova. So tu mislineja?“ Asavko uvod često vodini đi o razgovor.

13. Sose šaj te phena so isi amen uspeh ki služba čak ked o manuša na mangena te šunen amen? (Poslovice 27:11)

¹³ Amaro uspeh ki služba na zavisini ando rezultatija. Sose? Odolese so amen ćeraja odova so o Jehova hem o Isus rodena amendar – svedočinaja olendar (Dela 10:42). Čak hem ked nikasa na vaćeraja ili ked disave na mangena te šunen amen, amen šaj te ova radosna sose đanaja so radujinaja amare nebesko Dade. (Čitin Poslovice 27:11.)

14. Sose šaj te radujina amen ked disavo objavitelj arakhi disave zainteresovano manuše ko područje?

¹⁴ Isto ađahar, šaj te ova radosna ked aver objavitelj arakhi disave zainteresovano osoba ko područje. Ki Stražarsko kula, o propovedibe hine uporedimo sar ked rodela pe jekhe ćhavore kova našaldilo. But đene rodena le ko razna thana. Ked arakhena le, sare isi len razlog te radujinen pe, a na samo i osoba koja arakhlja le. Ko slično način, sare ki skupština pomožinena te ćeren pe učenikija. Sare valjani te pomožinen te šaj te propovedini pe sa e manušenđe ko područje hem ko krajo sare radujinena pe ked jekh osoba počmini te avel ko sastankija.

MA BISTRI SO TO MOTIV TANO O MANGIPE

15. Sar odova so ka primenina o stihija ando Matej 22:37-39 šaj te pomožini amen te barjaćera amari revnost ki služba? (Dikh i slika.)

¹⁵ Amen šaj te barjaćera amari revnost ki služba ađahar so na ka bistra so amaro motiv tano o mangipe premalo Jehova hem premalo manuša. (Čitin Matej 22:37-39.) Šaj samo te zamislina kobor tano o Jehova bahtalo ked dikhela amen so propovedinaja hem kobor o manuša ka oven bahtale ked ka počminen te proučinen  i Biblija! Isto ađahar, ma bistri so okola kola šunena amen hem odlučinena te služinen e Jehovase šaj te oven spasime (Jov. 6:40; 1. Tim. 4:16).

16. Sar šaj te arakha radost ki služba, čak hem ako našti te ikljova ando ćher? Vaćer disave primerija.

¹⁶ So ako sebepi disavo razlog našti te ikljove ando ćher? Tegani dikh so šaj te ćere ko te okolnostija te bi mothoveja mangipe premalo Jehova hem premalo manuša. Đi trajinđa i pandemija andi koronavirus, o Samjuel hem i Dania našti hine te ikljon ando ćher. Ko odova pharo vreme, on redovno svedočinđe prekalo telefoni, pisinđe lila hem vodinđe biblijake kursija prekali video-veza. O Samjuel propovedinđa okolenđe kola hine ki bolnica đi priminđa terapije aso rak. Ov phenela: „O problemija peravena amen ko psihičko, fizičko hem duhovno pogled. Odolese valjani te trudina amen te arakha radost đi služinaja e Jehovase.“ Uzo sa akava, i Dania pelji hem morandilji te ovel ko kreveti trin masek. Palo odova, šov masek valjanđa laće invalidsko kolica. Oj phenela: „Trudinđum man te ćerav sa so šaj ko me okolnostija. Šaj hine te propovedinav e medicinsko sestraće koja posetinđa man hem te vaćerav okolencar kola anđe maje o buća kola hine naručinava.“ Iako o Samjuel hem i Dania našti hine te ćeren sa o buća sar angleder, on ćerđe odova so šaj hem odolese hine radosna.

17. Ked ka koristinen tuće o predlogija ando akava članko?

¹⁷ De sa tutar te primenine akala panđ predlogija ando akava članko. Svako predlog tano sar jekh buti koja đala ko jekh recept. Ked sa odola buća mešinena pe, tegani o habe ka ovel ukusno. Ko slično način, ako primeninaja sa akala predlogija ka ova spremna te borina amen protiv o negativna osećanja hem te arakha radost ki služba.