1. Gurhi bahubiri baguma na baguma baciyumva lugenda okuganiza abantu omu mahubiri? (Olole n’enfoto.)

 RHULI bantu ba Yehova, rhunahubiri abandi bulya rhuba rhuzigire Larha wirhu w’omu mpingu rhunaba rhulonzize rhubarhabale lyo bahikira aha bamumanya. Bahubiri banji banashagalukire kobinali omukolo gw’amahubiri. Cikone abandi banabe n’amazibu g’okugushagalukira. Bulya gurhi? Baguma na baguma baba ba nshonyi bwenene barhanacilangalira. Abandi barhaciyumva bwinja okuja emw’abantu barhabalalisire. Abandi banayobohe oku abantu barhabayegereze. Baguma na baguma bayigirizibwe okukayaka akadali. Ciru akaba abo bene wirhu na bali birhu baba bazigire Yehova bwenene, banabone oku kuli kuzibu kuli bo okuyegera abantu barhamanyiri lyo babaganirira omwanzi mwinja. Ciru akaba ntyo, baba bahugûsirwe kunganaci ogo mukoko guba gwa bulagirire, bananacihangane okugujira ngasi mango. Yehova anabashagalukire bwenene!

2. Akaba onabone oku kuli kuzibu okushagalukira omukolo gw’amahubiri, bulya gurhi orhashinganini ovunike omurhima?

² Ka hali amango obona oku kuli kuzibu kuli we okuba n’omwishingo omu mukolo gw’amahubiri enyanya z’okuciyumva ak’abo bene wirhu? Erhi akaba onaciyumve ntyo, orhavunikaga omurhima. Okurhacilangalira kwawe kwanayerekana oku oli mwirhohye, n’enyanya z’oko orhalonza okucisegezako obwenge orhanalonza okuja kadali haguma n’abandi. Na ntaye osima agayise abandi, bwenene erhi akaba ali alonza okubajirira aminja. Sho w’omu mpingu amanyire bwinja amazibu oli walwisa analonzize akuhe oburhabale olagirireko. (Iz. 41:13) Mw’eci cigabi, rhwaganirira bintu birhanu byakakurhabala olwise entanya  za ntyo n’okukurhabala obe n’omwishingo omu mukolo gw’amahubiri.

OLEKE AKANWA KA MUNGU KAKUZIBUHYE

3. Bici byarhabire omulebi Yeremiya ly’ahubiri abandi?

³ Kurhenga mîra, omwanzi kurhenga emwa Nnâmahanga gwazibuhize abakozi bage amango bakag’iba bagwerhe omukolo muzibu gw’okuhikiriza. Rhuganirire olwiganyo lw’omulebi Yeremiya. Arhindire erhi Yehova amuha omukolo gw’okuhubiri. Yeremiya aderha ntya: “Ntishiderha, ndi mwana!” (Yer. 1:6) Gurhi ahimiremwo okurhacilangalira kwage? Ahâbwa emisi kugerera ebi Nnâmahanga amubwiraga. Aderha ntya: “Omu murhima gwani, kwo yali nka ngulumira ya muliro bayigalire omu kavuha. Ntako ntajiraga nti nagurhanga ci ntahashaga.” (Yer. 20:8, 9) Ciru akaba Yeremiya akag’ihubiri omu eneo nzibu, omwanzi ahâbagwa ayalagaze gwamuha emisi al’ilagirireko ly’ajira ogo mukolo.

4. Malehe gahi rhuba nago omu kusoma Akanwa ka Nnâmahanga n’okukarhanyako bwenene? (Abakolosi 1:9, 10)

⁴ Abakristu banahâbwe emisi kugerera omwanzi guba omu Kanwa ka Mungu. Erhi ayandikira ecigamba c’e Kolosi, entumwa Paolo yaderha oku okuba n’obumanye burhagwerhi magosa kwakashumize bene wabo ‘babe n’olugendo lushinganine Nyakasane [Yehova, NWT]’ amango bagendekire ‘bayâna amalehe omu ngasi bijiro binja.’ (Osome Abakolosi 1:9, 10.) Ebyo bijiro binja bihiziremwo omukolo gw’okuhubiri omwanzi mwinja. Erhi rhusoma Akanwa ka Mungu n’okukarhanyako bwenene, obuyemere bwirhu muli Yehova bunazibuhe na kandi rhunabone n’obwalagale obulagirire bw’okuhubiri omwanzi mwinja.

5. Gurhi rhwakayungukamwo bwenene kugerera okusoma n’okuyiga Ebibliya?

⁵ Lyo rhuyunguka bwenene n’Akanwa ka Mungu, rhushinganine rhucihe akasanzi k’okukasoma, okukayiga, n’okukarhanyako bwenene. Erhi wakasoma olwandiko orhahugûsirwi bwinja, orhalugeragako duba-duba. Ahali h’okujira ntyo, okolese e Index des Publications des Témoins de Jéhovah, erhi ecitabu Musaada wa Kutafuta Habari kwa Ajili ya Mashahidi wa Yehova ly’obona amahugûlo lugenda olo lwandiko. Erhi wakaciha akasanzi amango oli wayiga, wanayemezibwa bwenene oku Akanwa ka Nnâmahanga kaba k’okuli. (1 Ts. 5:21) Oku wagendekera wayemezibwa ntyo n’obwalagale, ko wanagendekera washagalukira okuganirira abandi ebi wayizire.

 OKACIRHEGANYA BWINJA EMBERE OJE OMU MAHUBIRI

6. Bulya gurhi rhushinganine rhucirheganye bwinja embere z’okuja omu mukolo gw’amahubiri?

⁶ Erhi wakacirheganya bwinja embere oje omu mahubiri, orhakaciyumva oyobohire bwenene okuganira n’abandi. Yezu arhabire abanafunzi bage bacirheganye embere baje omu mukolo gw’amahubiri. (Lk. 10:1-11) Bulya abanafunzi bakolesize ebi Yezu abayigirizagya, babire n’obuhashe bw’okuhikiriza binji omu mukolo gw’amahubiri n’oko kwabalerhera mwishingo munji.—Lk. 10:17.

7. Gurhi rhwakacirheganyamwo embere rhuje omu mahubiri? (Olole n’enfoto.)

⁷ Gurhi rhwakacirheganyamwo embere rhuje omu mukolo gw’amahubiri? Rhushinganine rhurhanye lugenda gurhi rhwakaganirira abandi okuli omu nderho zirhu rhwene. Kandi, kwanaba kwinja rhurhanye oku mazibu malebe rhulug’irhimanana nago omu eneo yirhu n’okurhanya gurhi rhwakalwisa ngasi mazibu erhi rhwakarhimanana nago. Buzinda amango rhukola rhwaganiza abantu, rhwanacihangana rhube ba kurhulirira, ba kumwemwerhwa, na ba kujira obwîra.

8. Omu njira nci Abakristu babamwo nka birugu by’ibumba biganirirwe omu lwiganyo lwa Paolo?

⁸ Lugenda omukolo gw’amahubiri, entumwa Paolo yabwizire bene wabo na bali babo ntya: “Obwo buhirhi omu mibiri y’obudaka [birugu by’ibumba, NWT] rhubugwasize.” (2 Kr. 4:7) Obwo buhirhi byo bici? Guli mukolo guyokola obuzine gw’okuyalagaza omwanzi mwinja gw’Obwami. (2 Kr. 4:1) Ebyo birugu by’ibumba byo bici? Bishushanyize abakozi ba Nnâmahanga bayalagaliza abandi omwanzi mwinja. Omu nsiku za Paolo, abarhimbuzi bakag’ikolesa orhubindi rhw’ibunda lyo bahêkamwo ebintu by’obulagirire nk’ebiryo, idivayi, n’ensaranga. Ko n’oko, nirhu Yehova arhuhîre olukengwa lw’okuhêka omwanzi mwinja gw’obulagirire bwenene. Kugerera oburhabale bwa Yehova, rhwanaba n’emisi rhulagirireko lyo rhugendekera rhwayalagaza ogo mwanzi n’obwishwekerezi.

OHÛNE YEHOVA OBURHWALI

9. Gurhi rhwakahimamwo oboba bwa bene bantu? (Olole n’enfoto.)

⁹ Hali amango rhwakayoboha bene bantu. Gurhi rhwakahimamwo ago mazibu? Orhanye okw’isala entumwa zajiraga amango babahanzagya okuhubiri. Ahali h’okugogomerwa  n’oboba, bahûna Yehova abarhabale babe n’“obuhashe bw’okuyigiriza akanwa kage buzira bwoba.” Yehova ashuza isala lyabo ho n’aho. (Ebj. 4:18, 29, 31) Erhi akaba hali amango rhuyoboha bene bantu, nirhu rhushinganine rhuhûne Yehova oburhabale. Ohûne Yehova akurhabale ozibuhye obuzigire bwawe oku bantu ly’orhakag’iyoboha okubaganirira omwanzi mwinja.

10. Gurhi Yehova arhurhabalamwo lyo rhuhikiriza omukolo arhuhîre gw’okuba Bahamirizi bage? (Izaya 43:10-12)

¹⁰ Yehova acishozire rhwe lyo rhuba Bahamirizi bage, anarhulaganyize oku arhurhabala rhube n’oburhwali. (Osome Izaya 43:10-12.) Rhuganirire njira ini zone omu njira ajiramwo ntyo. Burhangiriza, Yezu aba haguma na nirhu ngasi hoshi rhuhubiri omwanzi mwinja. (Mt. 28:18-20) Bwa kabirhi, Yehova ahizireho bamalahika lyo barhurhabala. (Maf. 14:6) Bwa kasharhu, Yehova arhuhîre iroho lyage litagatifu nka murhabazi lyo likarhukengeza ebintu rhwayizire. (Yn. 14:25, 26) Bwa kani, Yehova arhuhîre bene wirhu na bali birhu lyo barhulunga okuboko. Kugerera oburhabale bwa Yehova n’omulala gwirhu gugwerhe obuzigire, rhujira ngasi kantu rhulagirireko lyo rhuba n’oburhwali n’okugendekera rhwahubiri.

OKACIPATANISA N’AKANGA ONAGENDEKERE WABA N’ENTANYA NYINJA

11. Amango rhuli omu mukolo gw’amahubiri, gurhi rhwakajira lyo rhupata bantu banji? (Olole n’enfoto.)

¹¹ K’onaciyumve ovunisire omurhima amango orharhimanyiri bantu banji aha kâ? Wanacidosa ntya: ‘Ngahi abantu b’omu eneo yani bakaba bali muli gano mango?’ (Ebj. 16:13) ‘Ka banaba bali ebwa kazi erhi bajire e cibuye?’ Erhi akaba ntyo kobiri, ka wanapata bantu banji omu kujira amahubiri g’omw’ibarabara? Mwene wirhu muguma ohamagalwa Joshua adesire ntya: “Nabire n’obulyo bunji bw’okuhubiri omu kulambagirira ahantu baguliza ebintu n’aha zindi nafasi z’abantu banji.” Ye na mukage, Bridget, kandi babire n’obulyo bw’okuganiza bantu banji omu kubalambagirira aha mwababwe omu nsa z’ebijingo na ngasi Lw’Iyinga enyuma z’emidi.—Ef. 5:15, 16.

12. Gurhi rhwakamanyamwo ebi abantu bayemire erhi ebi bali barhanyako?

¹² Erhi akaba abantu barhasimisibwi bwenene n’omwanzi gwirhu, olonze okumanya ebi baba bayemire erhi ebi bali barhanyako.  Joshua na mukage Bridget banakolese idoso liba oku bukurasa bwa burhanzi bw’etrakte lyo barhondeza enganîro. Kwa lwiganyo, omu kukolesa etrakte Gurhi ogerereza okubiyerekire Ebibliya? banaderhe ntya: “Bantu baguma na baguma banabone Ebibliya nka citabu kurhenga emwa Nnâmahanga, abandi barhabona ntyo bujayo. Gurhi wehe oyibona?” Kanji-kanji oko kunarhume bagendekeza enganîro.

13. Bulya gurhi rhwanabona oku rhuhikirizize omuhigo gwirhu omu mukolo gw’amahubiri ciru akaba abantu barharhuyumvirhizizi? (Emigani 27:11)

¹³ Ciru akaba abantu barhayumvirhizizi omwanzi gwirhu, rhunabe rhuhikirizize omuhigo gwirhu. Bulya gurhi? Bulya rhunabe rhwahikirizize ebi Yehova n’Omugala balonzize rhujire, ko kuderha kuhâna obuhamirizi. (Ebj. 10:42) Ciru n’amango rhurhapatiri omuntu yeshi-yeshi rhwaganiza erhi amango abantu balahire omwanzi gwirhu, rhwanaba n’omwishingo bulya rhumanyire oku rhushagalusize Larha wirhu w’omu mpingu.—Osome Emigani 27:11.

14. Bulya gurhi rhwanashagaluka erhi owundi muhubiri akapata omuntu osimisibwe omu eneo?

¹⁴ Kandi rhwanaba n’omwishingo erhi owundi muhubiri akapata omuntu osimisibwe omu eneo yirhu. Ilabiro ly’Akalalizi lyashushanyize omukolo gwirhu n’omukolo gw’okulonza omwana ohezire. Bantu banji banacilunge omu mukolo gw’okulonza oyo mwana omu eneo nguma oku yindi. Erhi oyo mwana abonekana, ngasi muntu anashagaluke, ci arhali owamubonaga yene. Ko n’oko, ngasi muntu omu cigamba anarhabale okujira abanafunzi bahyahya. Rhweshi rhuba ba bulagirire lyo rhuyusa e eneo yoshi, na kandi rhweshi rhunashagaluke erhi omuntu muhyahya arhondera okuyisha oku ntimanano.

OSEGEZE OBWENGE OKU BUZIGIRE BWAWE KULI YEHOVA N’OKU MULUNGU

15. Gurhi rhwakashagalukiramwo bwenene omukolo gw’amahubiri? (Mateyo 22:37-39) (Olole n’enfoto eri oku cijalada.)

¹⁵ Rhwanashagalukira bwenene omukolo gw’amahubiri omu kukengera ensiku zoshi oku omukolo gw’amahubiri yo njira nyinja bwenene y’okuyerekana obuzigire bwirhu kuli Yehova n’oku mulungu wirhu. (Osome Mateyo 22:37-39.) Orhanye kunganaci Yehova ashagaluka erhi abona rhuli rhwajira ogo mukolo na kunganaci abantu bashagaluka erhi barhondera okuyiga Ebibliya! Kandi, orhanye oku bucire  abantu bayemera omwanzi gwirhu bayish’iba nabo.—Yn. 6:40; 1 Tm. 4:16.

16. Gurhi rhwakabamwo n’omwishingo omu mukolo gw’amahubiri amango rhurhagwerhi obuhashe bw’okurhenga aha kâ? Ohâne enyiganyo.

¹⁶ K’orhagwerhi obuhashe bw’okurhenga aha kâ enyanya za mazibu malebe? Akaba ntyo kobiri, osegeze obwenge kw’ebi wakajira ly’oyerekana obuzigire bwawe kuli Yehova n’oku mulungu wawe. Omu mango gw’obulwalwa bw’okuyahukira bw’e COVID-19, Samuel na mukage Dania barhagwerhe obuhashe bw’okurhenga aha mwababwe. Muli ago mango mazibu, bakahubiri ngasi mango kugerera etelefone, omu kuyandika amaruba n’okulongoza amafunzo g’Ebibliya kugerera Zoom. Samuel akahubiri abantu akag’irhimanana nabo oku hopitali amango akag’igend’ibukwa endwala yage y’akansere. Adesire ntya: “Amazibu ganarhurhamye obukengere, omubiri, n’omu hali y’ekiroho. Rhulagirire oku kuba n’omwishingo omu mukolo gwa Yehova.” Muli ako kasanzi kazibu, Dania ahirima anabêra omu ncingo myezi isharhu. Enyuma z’aho ajira myezi ndarhu omu cirhi c’ebirema. Adesire ntya: “Nacihanganyire okujira ngasi ebi akanga kani kampashisize okujira. Nabire n’obuhashe bw’okuhubiri munganga wandambagiriraga n’okuganira n’abakag’irhulerhera ebintu aha kâ. Kandi najira enganîro nyinja kugerera etelefone na mukazi muguma wakag’ikola omu kompanyi nguma eguza ebikolanwa by’ecinganga.” Akanga ka Samuel na Dania karhumire barhajira binji omu mukolo gwabo, cikone bajira ebi bakanahashire banaba n’omwishingo omu kujira ntyo.

17. Gurhi rhwakayungukamwo bwenene n’amahano gali mw’eci cigabi?

¹⁷ Amahano rhuhâbirwe mw’eci cigabi ganakola bwinja erhi rhwakagakolesa goshi haguma. Ngasi ihano liri nka nnungo y’okuheba omu biryo bilebe lyo binuna. Erhi rhwakaheba ennungo zoshi zishinganine mw’ebyo biryo, rhwanaba n’amalehe minja. Erhi rhwakakolesa ago mahano goshi, rhwanaba n’ebi rhulagirireko byoshi lyo rhulwisa entanya mbi n’okuba n’omwishingo omu mukolo gwirhu gw’amahubiri.