1. Mitu roduuwira sabbakate daafira heddanno woyite mayi macciishshamannonsa? (Misileno lai.)

 YIHOWA manna ikkinoommo daafira iimi Annankenna manna banxeemmo; hakko daafira mannu iso afanno gede kaaꞌlineemmo. Batinye halashshaano sabbakate looso lowo geeshsha baxxanno. Wolootaho kayinni soqqanshonsanni hagiidha qarra ikkitannonsa. Mayira? Mitootu manna ille qase laꞌꞌa waajjitannoreeti; hattono huxuxxi yitannoreeti. Wolootu koyinsinsakkinni manni minira haꞌra waajjitanno. Mitootu kulleemmore mannu macciishshalla giwi yite waajjitanno. Wolootu mannu ledo giwama qorophitannoreeti. Kuri roduuwi Yihowa lowo geeshsha baxxannoha ikkirono, egentinokki mannira dancha duduwo kula qarra ikkitannonsa. Ikkirono insa kuni loosi lowo geeshsha hasiisannoha ikkinota huwattino; hattono ganyite sabbakkanno. Yihowa insa assitannorinni lowo geeshsha hagiidhannoti dihuluullissannote!

2. Soqqanshokkinni hagiirre afiꞌra qarra ikkitinoheha ikkiro hexxo mudha hasiissannohekkihu mayiraati?

² Atino hatto yite hedatto daafira mito woyite soqqanshokkinni hagiirre afiꞌra qarra ikkitinohe? Hatto ikkiro hexxo mudhitooti. Waajjattoha ikkakki umo heeshshi assattoha, mannaho leellama giwattohanna gibbo hasiꞌrattokkiha ikkoottota leellishshannota ikkitara dandiitanno. Hige hakko iso wolootaho danchare assate sharramanna gimbasira hasiꞌranno manchi dino. Iimi Annikki iillanni noohe qarra afanno; hattono hasiisannohere asse kaaꞌlahera hasiꞌranno. (Isa. 41:13) Konni birxichira, togooha qarra ikkanno coye qeeꞌla dandiineemmo gede kaaꞌlitannonketa onte hedonna soqqanshonkenni  roore hagiirre afiꞌra dandiineemmo gara laꞌneemmo.

MAGANU QAALINNI JAWAANTE AFIDHE

3. Masaalaanchu Ermiyaasi wolootaho sabbakanno gede kaaꞌlinosiri maati?

³ Hundi yannara heedhinori Maganu soqqamaanora uyinoonninsa looso umo fushsha qarra ikkitunsa yannara, Maganu Qaali giddo noo sokka jawaante ikkitinonsa. Hanni masaalaanchu Ermiyaasi lawishsha laꞌno. Isi Yihowa sabbakanno gede kulisita hobbi ruxxi yiino. Ermiyaasi, “Ani shiima beetto ikkoommo daafira coyiꞌnanni gara diegennoommo” yiino. (Erm. 1:6) Isi waajja qeeꞌlinohu hiittoonniiti? Maganu Qaalinni jawaante afiꞌrino. Isi togo yiino: “Sokkakki giddoꞌya giirate gede bubbanno. Anino sammi yee diafeemmo.” (Erm. 20:8, 9) Ermiyaasi sabbakanno qoqqowira noo manni macciishshannokkiha ikkirono, isi sabbakanno gede kulloonnisi sokka uyinoonnisi looso loosate jawaante ikkitinosi.

4. Maganu Qaale nabbambe hiinca kaaꞌlitannonkehu hiittoonniiti? (Qolasiyaasi Sokka 1:9, 10)

⁴ Kiristaanu Maganu Qaali giddo noo sokkanni jawaante afiꞌranno. Soqqamaasinchu Phaawuloosi Qolasiyaasi heeꞌranno Kiristaanira borreessino sokkara, halaalu egenno afiꞌra ammanate roduuwisi Yihowara ‘maltino heeshsho heedhanno gedenna, baalunku coyinni dancha guma laaltanno gede kaaꞌlitannonsata coyiꞌrino.’ (Qolasiyaasi Sokka 1:9, 10 nabbawi.) Konni danchu loosi giddo mittu dancha duduwo sabbakate loosooti. Hakko daafira Maganu Qaale nabbambe hiincineemmo woyite, Yihowara noonke ammana kaajjitanno; hattono Maganu Gashshooti sokka mannaho kula lowo geeshsha hasiissannota buunxeemmo.

5. Qullaawa Maxaafa nabbambenna xiinxalline roore horo afiꞌra dandiineemmohu hiittoonniiti?

⁵ Maganu Qaalinni roore horo afiꞌrate, Qullaawa Maxaafa nabbambeemmo woyite, xiinxallineemmo woyitenna hiincineemmo woyite gawa gawa assa dihasiissannonke. Kuri coyibba assate yanna gaaꞌme. Huwatate qarrissanno hedo heedhuro agurtine saꞌinoonte. Hatteentenni tenne hedo daafira xawishsha afiꞌrate, Yihowa Farciꞌraasineta Xiinxallote Kaaꞌlitanno Borro horoonsidhe. Yanna gaaꞌmitine xiinxallitinanniha ikkiro, Maganu Qaali halaale ikkasi albinni roore addaxxitinanni. (1 Tes. 5:21) Maganu Qaali halaale ikkasi albinni roore buuxxiniro rossinoonnire mannaho kula roore baxissannoꞌne.

 SOQQANSHOTE DANCHA GEDE QIXXAABBE

6. Soqqanshote dancha gede qixxaawa hasiissannonkehu mayiraati?

⁶ Soqqanshote dancha gede qixxaambeemmoha ikkiro, manna hasaawinseemmo woyite hakkeya diwaajjineemmo. Yesuusi rosaanosi soqqanshote soyansara albaanni, balaxxe qixxaabbanno gede kaaꞌlinonsa. (Luq. 10:1-11) Insa Yesuusi rosiisinonsare assitino daafira dancha gede soqqantino hattono lowo hagiirre afidhino.—Luq. 10:17.

7. Soqqanshote qixxaawa dandiineemmohu hiittoonniiti? (Misileno lai.)

⁷ Soqqanshote qixxaawa dandiineemmohu hiittoonniiti? Kulleemmo halaale uminke yaattonni dancha gede assine xawinse kula dandiineemmo gara heda hasiissannonke. Qoleno qoqqowinkera heeꞌranno manni macciishsha giwe coyiꞌrannoha lame woy sase coye hedanna dawaro mayine qolleemmoro rosiisiꞌra hasiissannonke. Hakkiinni manna wodanaaꞌminenna faasiinqe hasaawisate woꞌnaalleemmo.

8. Kiristaanu soqqamaasinchu Phaawuloosi lawishshunni kulinohu doru uduunni gede ikkinohu ma garinniiti?

⁸ Soqqamaasinchu Phaawuloosi ammanate roduuwisira, “Kuni miinji doru uduunnichi giddo no” yiino. (2 Qor. 4:7) Kuni miinji maati? Sabbankeemmote heeshsho gatissannote Maganu Gashshooti sokkaati. (2 Qor. 4:1) Doru uduunnichi maatiyya? Wolootaho dancha duduwo kultannore Maganu soqqamaanooti. Phaawuloosi yannara daddalaasine lowo waaga afiꞌrino uduunnicho yaano sagale, woyinete xajjenna woxe bayichunni bayicho adhite hadhannohu dorunni loonsoonni uduunnichira worteeti. Hatteente gede Yihowa lowo waaga afiꞌrinoha dancha duduwo duduwate looso eeggo uyinonke. Yihowa kaaꞌlonni tenne sokka ammanamme kulate hasiissannonke jawaante afiꞌra dandiineemmo.

WORBUULLE IKKATE YIHOWA HUUCCIDHE

9. Manna waajja qeeꞌla dandiineemmohu hiittoonniiti? (Misileno lai.)

⁹ Mito woyite manna waajjineemmoha ikkara dandaanno. Manna waajja qeeꞌla dandiineemmohu hiittoonniiti? Hanni sabbakkannokki gede hajanjinsata soqqamaasine mayite huuccidhinoro laꞌno. Insa waajjite agurantenni, “Soqqamaanokki qaalekki waajjitukkinni jawaatte kultanno gede assi” yite Yihowa kaaꞌlannonsa gede huuccidhino. Yihowano huuccattonsara bayichonkonni dawaro qolino.  (Soq. 4:18, 29, 31) Ninkeno mito woyite manna waajjineemmoha ikkiro, kaaꞌlannonke gede Yihowa huucciꞌra hasiissannonke. Manna waajjitinikkinni dancha duduwo kulate, mannaho nooꞌne baxilli lexxanno gede kaaꞌlaꞌnera Yihowa huuccidhe.

10. Yihowa isi daafira farciꞌneemmo woyite loosonke umo fushshineemmo gede kaaꞌlannonkehu hiittoonniiti? (Isayaasi 43:10-12)

¹⁰ Yihowa Farciꞌraasinesi asse shoominonke; hattono worbuulle ikkineemmo gede kaaꞌlannonketa kule qaale eino. (Isayaasi 43:10-12 nabbawi.) Hanni isi ninke kaaꞌlannota shoole doogga laꞌno. Umihunni, dancha duduwo dudumbeemmo woyite woꞌmanka woyite Yesuusi ledonke heeꞌranno. (Mat. 28:18-20) Layinkihunni, Yihowa kaaꞌlitannonke gede sokkaasine shoomino. (Aju. 14:6) Sayikkihunni, Yihowa ronsoommore qaangeemmo gede kaaꞌlannonkeha qullaawa ayyaanasi aannonke. (Yoh. 14:25, 26) Shoolkihunni, Yihowa ledonke soqqantannore ammanate roduuwanke uyinonke. Yihowanna ammanate roduuwinke kaaꞌlitannonke daafira worbimmatenni soqqanshonke umo fushsha dandiineemmo.

MANNU HASATTO BALAXISIISSE HATTONO DANCHA DANCHARE HEDDE

11. Soqqammeemmo woyite lowo manninni xaada dandiineemmohu hiittoonniiti? (Misileno lai.)

¹¹ Soqqamatto woyite manna mine hoogittoro hexxo mudhatto? Ateneeto togo yite xaꞌmi: ‘Soqqanshote qoqqowiꞌyara heeꞌranno manni xa mama nookka?’ (Soq. 16:13) ‘Loosoho haꞌrinonso dikko haꞌrinokka?’ Hatto ikkiro rooru manninni xaadate doogote sabbaka dandaatto? Jooshuwa yinanni rodii togo yiino: “Dikkotenna makeenna uurrinsanniwa haꞌranni sabbakate faro afiꞌroommo.” Qoleno isinna minaamasi Birigeeti hawarro hawarro hattono sambata barri widoonni qaensa marte rooru manninni xaada dandiitino.—Efe. 5:15, 16.

12. Mannu mayyee ammanannoro woy huluullannonsa coyi maatiro afa dandiineemmohu hiittoonniiti?

¹² Mannu kulleemmo sokka macciishsha hasiꞌrannokkiha ikkiro, mayyee ammanannoro woy huluullannonsa coye maatiro afate woꞌnaallo. Jooshuwanna Birigeeti tiraaktete aanaanni noo xaꞌmo xaꞌme hanafanno. Lawishshaho insa, Qullaawu Maxaafi Mayi Maxaafaati Yaatto? yitanno tiraakte horoonsiꞌre togo yee xaꞌmanno: “Mitu manni Maganu Qaaleeti  yaanno mitu kayinni wolere yaanno. Ati tennera mayyaatto?” Togoo xaꞌmuwa duucha woyite mannu ledo hasaawate faro fantanno.

13. Mannu macciishsha giwiro nafa, soqqanshonke qiniitinonkehu gede assine laꞌneemmohu mayiraati? (Lawishsha 27:11)

¹³ Soqqanshonkenni qiniinonke yineemmohu dancha guma afiꞌnoommo daafira calla diꞌꞌikkino. Mayira? Korkaatuno Yihowanna Beettisi assinammora hasidhannore assinoommo yaano mannaho farciꞌnoommo. (Soq. 10:42) Soqqansho fulle hasaawinseemmo manninni xaada hoongummoro woy mannu kulleemmo sokka macciishshe adha giwiro nafa, iimi Annanke hagiirsiinsoommota anfoommo daafira hagiidha dandiineemmo.—Lawishsha 27:11 nabbawi.

14. Mittu halashshaanchi soqqanshonke qoqqowi giddo hasatto noosi mancho afanno woyite hagiidhineemmohu mayiraati?

¹⁴ Mittu halashshaanchi soqqanshonke qoqqowi giddo hasatto noosi mancho afanno woyite ninkeno hagiidha dandiineemmo. Mitte Agarooshshu Shaera ninke loonseemmo looso baino qaaqqo hasanno manni ledo heewisiinsoonni. Batinyu manni duucha basera konne qaaqqo hasino. Baino qaaqqo anfanni woyite afino mancho calla ikkikkinni baalunku mitteenni hagiidhanno. Hatteente gede manna rosaano assate loosino mittimmatenni loonsanniho. Baalanti halashshaano qoqqowoho mitteenni soqqantino daafira, mittu manchi gambooshshe daa hanafanno woyite baalunku hagiidhitanno.

YIHOWARANNA MANNAHO NOOꞌNE BAXILLE ILLACHISHSHE

15. Maatewoosi 22:37-39 noo amaale loosu aana hosiisa albinni roore diinaggaambe soqqammeemmo gede kaaꞌlitannonkehu hiittoonniiti? ( noo misileno lai.)

¹⁵ Yihowaranna mannaho noonke baxille illachinshe albinni roore diinaggaambe soqqama dandiineemmo. (Maatewoosi 22:37-39 nabbawi.) Hanni Yihowa konne looso loonsanna laꞌꞌanno woyitenna mannu Qullaawa Maxaafa xiinxalla hanafanna laꞌꞌanno woyite mageeshshi geeshsha hagiidhannoro hedi! Kulleemmonsa sokka macciishshe adhanno manni albillitte afiꞌranno gatono hedi.—Yoh. 6:40; 1 Xim. 4:16.

16. Mininni fula dandiineemmokkiha ikkiro, soqqanshonkenni hagiirre afiꞌra dandiineemmohu hiittoonniiti? Lawishsha kuli.

¹⁶ Mininni fula qarra ikkitannohe gede assanno  coyi tuncu yiinohe? Hatto ikkiro, Yihowaranna mannaho noohe baxille leellishate maa assa dandaattoro hedi. Koroonu fayya yannara Saamueelinna Daaniya mininni fula didandiino. Hattenne qarru yannara insa ganye silketenninna borrote sokka borreesse farciꞌrino; hattono Zuumetenni Qullaawa Maxaafa xiinxallisino. Saamueeli kaanserete dhibbi amadeennasi akimete minira haꞌri yannara hakko xagisiꞌranni noo mannira farciꞌrino. Isi togo yiino: “Iillinonke qarri lowo geya yaandeemmo gede, wolqa baꞌneemmo gedenna ammananke fonqolantanno gede assino. Yihowara soqqamme hagiirraamma ikka hasiissinonke.” Hatte mereero Daaniya hedeweelcho ubbe sasu agani geeshsha goxxe keeshshitino. Hakkiinni ise 6 agani geeshsha bisu xeꞌne noonsari ofoltanno gaarera ofoltino. Ise togo yitino: “Danduummare baala assate woꞌnaaloomma. Towaattannoe akimootira farciꞌroomma, hattono mito uduunne mininkera massanno mannira farciꞌroomma. Qoleno akimete mine loossannotera mitte manchora silketenni dancha gede farciꞌroomma.” Saamueelinna Daaniya iillinonsa qarrinni kainohunni assa hasiꞌranno geeshshire assa didandiino; kayinni assa dandaannore asse hagiirre afiꞌrino.

17. Konni birxichira kulloonnire assite roore horo afiꞌra dandaattohu hiittoonniiti?

¹⁷ Konni birxichira kulloonni hedo dancha gede kaaꞌlitannohu baalanta mitteenni harunsinirooti. Mitte mittenti hedo sagale qishate horoonsiꞌnannihu addi addi coyi gedeeti. Sagale qishate hasiisannore baalankare horoonsiꞌnanniha ikkiro, sagale coommitanno. Hatteente gede baalanta hedo loosu aana hosiinseemmoha ikkiro, gara ikkitinokki hedo gargadhanna soqqanshonkenni roore hagiirre afiꞌra dandiineemmo.