1. Bangi abapushaa naminyi pabitale kulungula bangi mukundu wi buwa? (Tala dingi kifuatulo.)

 BU BIATUDI muilo wa Yehowa, atulungula bangi mukandu wi buwa muanda tui bafule Nshetu e muiyilu, na atukumiina kukuasha ba nkungishanyi neetu bafikie mu kumuiwuka. Balungudi be bungi ba mukandu wi buwa, mbafule mudimo wa bulungudi bikile. Anka bua bangi, ta mbakambe kufula mudimo wa kulungula mukandu wi buwa nya. Buakinyi? Muanda bangi abapushaa buufu na kuimona bu bashi balongieshi be buwa. Bangi namu abibakalakashaa pa kuenda ku nshibo ya muntu shi mumuitanyine. Bangi namu abatshiinaa’shi tala bakebabinga. Bangi abapushaa moo wa kushaala mu mmanyi na bangi bantu. Bangi namu sunga mbiabadi bafule Yehowa ngofu, abapushaa bukopo bua kuifubuila kui bantu benyi bua kuibalungula mukandu wi buwa. Sunga mbiabia, abauku muulo wa uno mudimo, na dingi abeukitaa nsaa yooso. Bino abisankisha Yehowa ngofu.

2. Su ingi nsaa abikuelelaa bukopo bua kuikala na muloo mu bulungudi, buakinyi t’abitungu’shi otshobolokie?

² Noobe namu ingi nsaa opushaa bukopo bua kupeta muloo mu mudimo wa bulungudi pa muanda wa ino nkalakashi su? Su bi biabia, totshobolokanga. Kukutua koobe kua kuiata na muulo akulesha’shi opelaa bantu bakamba kutuula binangu koodi, na kupela kutuelakana mu bilumbu. Ta kui muntu su ngumune akumiina’shi ba mubingie nya, bikishekisha nsaa y’ekitshisha bua kukitshiina bangi mianda i buwa. Nshobe e muiyilu auku yaya nkalakashi yokuete ofumankana nayo kalolo. Na akumiina nkupa bukuashi boodi nabo lukalo. (Yesh. 41:13) Mu uno muisambo, atukataluula mianda itaano ya mushindo oodi mulombene kukambila yaaya nkalakashi na bia kuikala na muloo mu bulungudi.

TADIILA EYI DI’EFILE MUKULU DIKUNYINGISHE

3. Nkinyi kibakuashiishe mutemuki Yelemiya bua kulungula bangi mukandu wi buwa?

³ Sunga mu mafuku a kala, mukandu aufiki kui Yehowa ubaadi  aunyingisha bafubi baaye nsaa ibabidi abibelela bukopo bua kulombasha mudimo wi bukopo. Tubande kuata kileshesho kia mutemuki Yelemiya, baadi eekoko nsaa ibabamupeele mudimo wa kulungula mukandu wi buwa kui Yehowa. Yelemiya bambile’shi: “Ntanguku kuakula’mi, nki muana mukinga ngofu.” (Yel. 1:6) Nkinyi kibaadi kimukuashe buadia kuikala n’eshimba dinyingie dia kulungula mukandu wi buwa? Baadi mupete bukome muiyi di’Efile Mukulu. Bambile’shi: ‘Adikala munda mwande buu kaalo akatembe, keedimbile mu mbidi yande; anka paantopo kwi kashima, kushii kwobesha.’ (Yel. 20:​8, 9) Sunga, Yelemiya baadi na terituare e bukopo, mukandu ubabamupeele ubaadi umunyingishe aye nabane, na ao nkumupa bukome bu baadi nabo lukalo bua kikuta mudimo.

4. Nkinyi akikitshikaa nsaa y’atubadika Eyi di’Efile Mukulu na kunangushena ku dianka? (Bena Kolose 1:​9, 10)

⁴ Bena Nkidishitu abapetaa kunyingishibua kuabadi nako lukalo akufiki mu Bible Eyi dia Yehowa. Nsaa ibaadi Mpoolo mutumibua afundila bena Kolose mukanda, bambile’shi, kupeta kiukilo kia binyibinyi, akutakula bakuetu buabadia “kutambuka mu mushindo aukumiina Yehowa” bu biakuete kutungunuka na “kupa bikuba mu mufubo ooso wibuwa.” (Badika Bena Kolose 1:​9, 10.) Mu ino mifubo yooso i buwa, mui mpaa na mudimo wa kulungula mukandu wi buwa. Nsaa yatubadika Eyi di’Efile Mukulu na kunangushena ku dianka, lukumiino luetu mui Yehowa alunyiisha kunyinga na atuuku bi muulo wa kulungula mukandu wi buwa kalolo.

5. Mmushindo kinyi ulombene kuitukuasha mianda y’atuibadikila na y’atuilongiela mu Bible?

⁵ Bua’shi Eyi di’Efile Mukulu dikale na muulo ukata kuatudi, abitungu tulekie kuidibaka, kuilongiela, na kunangushena lubilolubilo. Abitungu kuiatshila nsaa. Su bopete kifundue ki bukopo kupusha, tue kitumbanga. Pa mutue pa kuitumba, fubisha Index des publications des Témoins de Jéhovah na Mukanda aukwasha Batemwe ba Yehowa bwa kukimbuula myanda, bua kuuka mushindo wabadi bapatuule yawa verse. Su buata nsaa i bungi ya kuilongiela, onyiisha kushinkamisha bia binyibinyi bia Muiyi di’Efile Mukulu. (1 Te. 5:21) P’onyiisha kushinkamisha, onyiisha kusankila kulungula bangi yaya mianda y’olongo.

ELUMBUULE KALOLO BUA KUENDA MU BULUNGUDI

6. Buakinyi abitungu kuilumbuula kalolo kumpala kua kuenda mu bulungudi?

⁶ Su bu’elumbuula kalolo bua kuenda mu bulungudi, wekala na muloo wi bungi wa kulungula bangi mukandu wi buwa. Yesu baadi mukuashe balongi baaye buabadia kuilumbuula kumpala  kuadia kuibatuma mu mudimo wa bulungudi. (Luk. 10:​1-11) Pa muanda wa’shi babaadi batumikile yaya mianda ibabebalunguile kui Yesu, balongi babaadi na muloo wi bungi wa kulombasha wawa mudimo.—Luk. 10:17.

7. Tui kuilumbuula naminyi bua kuenda mu mudimo wa bulungudi? (Tala dingi kifuatulo.)

⁷ Tui kuilumbuula naminyi kumpala kua kuenda mu bulungudi? Abitungu tunangushene kalolo ku bi’atukakula na nkebiakula mu bishima bietu atue banabene bu bi’atuakulaa pa kiubishi. Abitukuasha dingi, p’atunangushena kumpala mianda ibidi sunga isatu yabakambaa kuakula kui bantu ba mu terituare eetu na kulamiina mu binangu mushindo watudi balombene kualuula ku muanda ooso wawa. Nsaa y’atukiebe kuakula na bantu, abitungu tuikitshishe bua kuikala b’eshinkie, be na mpala ya tusepo, na kuibamona bu bakuuku.

8. Mu mushindo kinyi muabapuandikisha bena Nkidishitu na bipulu bia nsenga bu abiakula Mpoolo mutumibua?

⁸ Mpoolo mutumiibua bapuandikishe mudimo watudi nao wa kulungula mukandu wi buwa, pa bakuile’shi: “Tui na dino ebue dia muulo mu bipulu bia nsenga.” (2 Ko. 4:7) Dino ebue nkinyi? Nyi mudimo wa kulungula mukandu wi buwa bua kupaasha miuwa. (2 Ko. 4:1) Bipulu bia nsenga namu nkinyi? Bipulu bia nsenga abilesha bafubi ba Efile Mukulu abatuadila bangi mukandu wi buwa. Mu mafuku a Mpoolo, ba nsunga babaadi abafubisha bipulu bia nsenga bua kutuala bintu bi buwa bu bidibua, maalua a nfinyo, na makuta. Mu mushindo umune, Yehowa mmuitupe kintu ki na muulo ukata, kuamba’shi mukandu wi buwa. Ku bukuashi Yehowa, tui kupeta bukome buatudi nabo lukalo buatudia kulungula bantu mukandu wi buwa na lulamato looso.

TEKA BUA KUIKALA N’ESHIMBA DINYINGIE

9. Tui kukambila moo wa bantu sunga wa kubingibua naminyi? (Tala dingi kifuatulo.)

⁹ Ingi nsaa tui kuikala na moo wa bantu, sunga moo wa kubingibua mu bulungudi. Tui kukambila luno lukalakashi naminyi? Tutaluuleyi luteko lubabakitshine kui batumibua, nsaa i baabadi abebapelasha kulungula mukandu wi buwa. Pa mutue pa kupusha moo na kuleka kulungula mukandu wi buwa, babatekiele Yehowa bua’shi ebakuashe “batungunukie na kuakula eyi [diaye] n’eshimba dinyingie.” Yehowa be baluluile ku luteko nka paapa ku’shi kunyengakana. (Bik. 4:​18, 29, 31) Su ingi nsaa tuapusha moo wa bantu, abitungu n’atue namu tutekie Yehowa bukuashi. Teka Yehowa bua’shi onyingishe kifulo  kiobe bua bantu. Su bokitshi biabia, tuebatshiinyi dimo nya, we balungula mukandu wi buwa.

10. Mmushindo kinyi awitukuashaa Yehowa buatudia kulombasha mudimo wetu wa bu Tumonyi tuaye? (Yeeshaya 43:​10-12)

¹⁰ Yehowa mmuitutuule bu Tumonyi tuaye, na etulaa’shi etukuasha buatudia kuikala n’eshimba dinyingie. (Badika Yeeshaya 43:​10-12.) Tubande kutala penda mishindo inanka y’ebikitaa. Wa kumpala, Yesu e neetu nsaa yoso yatulungula mukandu wi buwa. (Mat. 28:​18-20) Wa kabidi, Yehowa mmutuule ba mikeyilu buabadia kuitukuasha. (Kbf. 14:6) Wa kasatu, Yehowa mmuitupe kikudi kiaye akitukuasha bua kutentekiesha mianda yatulongo. (Yo. 14:​25, 26) Wa kananka, Yehowa mmuitupe bakuetu balume na bakashi batukuete kufuba nabo pamune. Ku bukuashi bua Yehowa na bakuetu ba kifulo ba mu nsenga ishima, tui na kioso akitungu buatudia kutungunuka na kulungula mukandu wi buwa.

EUBIDISHENE NA NSHALELO A BANTU NA WEKALE NA MMUENENO A MIANDA E BUWA

11. Poodi mu bulungudi, we kupeta bantu be bungi naminyi ku mashibo aabo? (Tala dingi kifuatulo.)

¹¹ Otshobolokaa nsaa yosangana bantu bapeela ku mashibo kuabo su? Eyipushe obe nabene’shi: ‘Bantu ba mu terituare ande, be kunyi na ino nsaa?’ (Bik. 16:13) ‘Be ku midimo su be ku kisalue?’ Su bi biabia, we kupeta bantu be bungi mu kilayi bua kuibalungula mukandu wi buwa su? Mukuetu mulume abetanyinaa bu Joshua amba’shi: “Naadi mupete mishindo i bungi ya kulungula mukandu wi buwa, pa naadi nende na kutemba mu kisalue, na mu ma mbalo abatudilaa miotoka.” Aye na mukashi aaye Bridget, abapetaa bantu ku mashibo aabo pabalukiila ku kiolua ngofu, sunga mu dia Lubingo kunyima kua midi.—Ef. 5:​15, 16.

12. Mmushindo kinyi oodi mulombene kuuka mianda y’abakumiinaa kui bantu sunga y’abauku mu bulungudi?

¹² Su bantu bamueneka bu bash’abakumiinaa mukandu wi buwa, ekitshishe bua kuuka mianda yabadi bakumiine sunga y’abauku. Joshua na Bridget abafubishaa nkonko i ku trakte bua kubanga muisambo na bantu. Bu kileshesho, pabafubishaa trakte amba’shi, Omonaa Bible bu mukanda kinyi? abamba’shi: “Bangi bantu babaadi baluule’shi, atumonaa Bible bu mukanda aufiki kui Efile Mukulu, anka bangi namu ta bauku bi bungi. Obe namu we na mmueneno kinyi?” Bino bibaadi abitukuasha bua kutentekiesha na bantu.

13. Buakinyi atuikalaa na muloo nsaa y’atulungula mukandu wi buwa sunga bantu bapela kuteemesha? (Nkindji 27:11)

 ¹³ Sunga bantu t’abetuteemesha nsaa y’atuibalungula mukandu wi buwa, atue atutungunuka nka na kulombasha kepatshila ketu. Buakinyi? Muanda tukuete kukita mudimo wabadi betupe kui Yehowa na Yesu wabakumiina’shi tukite, kuamba’shi, kutuula bu kamonyi. (Bik. 10:42) Sunga tuakutua kupeta muntu su ngumune, sunga bapela kuteemesha mukandu wetu, abitungu tutungukie nka na kuikala na muloo, muanda atuuku’shi tubasankisha Nshetu e muiyilu.—Badika Nkindji 27:11.

14. Buakinyi atusankaa su ungi mulungudi bapete muntu bakumiina mukandu wi buwa mu terituare?

¹⁴ Tui kuikala dingi na muloo nsaa ayipete bangi balungudi bantu abakumiina mukandu wi buwa mu terituare. Kitenta kia Mulami akipuandikisha uno mudimo wa kulungula mukandu wi buwa, na bantu abikimbi muana mushimine. Be bungi abende mu nkamukimba, abende mu ma mbalo elekeenelekeene bua kumukimba. Nsaa y’abamupete, bantu booso abekela na muloo, kushi nka penda yawa bamumono. Mu mushindo umune, bua kuikasha muntu bu mulongi mupia a Yesu, abitungu kuikitshisha kua bantu be bungi. Abitungu’shi atue booso tupudishe terituare. Na atuikala na muloo apabanga muntu mupia kutuela mu bisangilo.

TUULA BINANGU BIOBE KU KIFULO KIOBE BUA YEHOWA NA BUA BA NKUNGISHANYI NOOBE

15. Kutumikila mayi e mu Mateo 22:​37-39, kui kuitukuasha bua kutamisha muloo wetu bua mudimo wa bulungudi naminyi? (Tala dingi ki ku kipusu.)

¹⁵ Tui kutamisha muloo wetu wa kulungula mukandu wi buwa, p’atutuulu binangu bietu ku kifulo kietu bua Yehowa na kifulo kietu bua ba nkungishanyi neetu. (Badika Mateo 22:​37-39.) Banda kupuandikisha muloo aupushaa Yehowa nsaa y’etumuno atukitshi mudimo wa kulungula mukandu wi buwa, na muloo aupushaa bantu nsaa yababanga kulonga Bible! Na onangushene pabitale kipandilo akitengiela baaba booso abakumiina mukandu wetu.—Yo. 6:40; 1 Ti. 4:16.

16. Tui kupeta muloo mu mudimo wa bulungudi naminyi p’atushaala ku nshibo kuetu kushi kutuuka? Tuusha kileshesho.

¹⁶ Toodi mushaale namu ku nshibo koobe kushi kutuuka bua kabingilo kampanda su? Su bi biabia, tuula binangu ku kiodi mulombene kukita bua kulesha kifulo kiobe bua Yehowa na kifulo kiobe bua bantu noobe. Mu kipungo kia COVID-19, Samuel na Dania babaadi bashaale  ku nshibo kuabo kushi kutuuka. Mu kiakia kipungo ki bukopo, babaadi abalungula mukandu wi buwa nsaa yooso ku telefone, kufunda mikanda, na kulonga na bantu Bible ku bukuashi bua Zoom. Samuel baadi alungula mukandu wi buwa kui booso babaadi afumankana nabo ku lupitaalo kubaabadi abamubuku cancer. Amba’shi: “Kino kipungo ki bukopo kibaadi kitukalakashe mu binangu, ku mbidi, mpaa na mu kikudi. Tubaadi bakumiine kuikala na muloo mu mudimo wetu bua Yehowa.” Munkatshi mua ino nkalakashi yooso, Dania baadi mupone na baadi mulaale nka ku lusala munda mua mieshi isatu kushi kutuuka. Kunyima batekiele nkuasa a bishetshi mubaadi mushaale munda mua mieshi isamombo. Akula’shi: “Naadi n’ekitshisha bua kukita kioso akitungu muyile nshalelo anaadi naye. Naadi nalungula mukandu wi buwa kui munganga baadi etutembela, na kui booso babaadi abetutuadila bintu ku nshibo. Naadi mutentekieshe mpaa na ungi mukata a ku lupitaalo namulungula mukandu wi buwa ku telefone.” Nshalelo a Samuel na Dania baadi mupeeleshe mudimo wabo, anka babaadi abakitshi muyile ngobesha yabo na kupeta muloo mu biabia bibaabadi abakitshi.

17. Ino mianda i mu uno muisambo i nkukuasha mushindo kinyi?

¹⁷ Tuikitshisheyi bua kutumikila ino mianda yooso itaano yabadi bateemune mu uno muisambo. Muanda ooso wa ku ino mianda itaano, wi nka bu kitobuanga kiabadi beele mu biakudia, nsaa y’abasanga bino bitobuanga bioso pamune, abitusha kintu kimune ki muenyi ngofu. Nsaa y’atutumikila ino mianda yooso, atupete bintu bilombane bia kunyingiila tuinyongoshi na atupete muloo wi bungi mu mudimo wa bulungudi.