1. Abatebezi abamu behurra bata ha kubaza n’abantu omu buheereza? (Rora ekisisani.)

 NK’ABANTU ba Yahwe, tutebeza abantu abandi habwokuba tugonza Isiitwe ow’omu iguru kandi tugonza n’okukonyera abandi kumumanya. Abatebezi baingi begondeza omu mulimo gunu baitu abandi kibagumira kugwegondezaamu. Habwaki? Habwokuba abamu baine ensoni kandi abandi tibeikiririzaamu. Abandi batiina kugenda omu maka g’abantu bataraaliziibwe. Kandi abandi batiina ngu abantu tibarukwija kubahuliiriza. Abamu nibatiina kubiihiza abantu. N’obukiraaba ngu ab’oruganda na banyaanya itwe bagonza Yahwe, kibagumira kugambira abantu ababatamanyire amakuru amarungi. Baitu nabwo bakimanyire ngu omulimo gunu mukuru kandi balengaho kugwejumbiramu butoosa. Kandi mali kinu nikisemeza Yahwe!

2. Kakuba obwire obumu oba otarukwegondeza omu buheereza, habwaki otasemeriire kuhwamu amaani?

² Obwire obumu naiwe kikugumira kutunga okusemererwa omu buheereza habw’enyehurra ezibaziibweho eruguru? Obukiraaba nukwo kiri, otahwamu amaani. Eki nikyoleka ngu oli mwedundaazi kandi torukugonza kweyoleka. Ekindi, kyoleka ngu torukugonza kuteera empaka. Kandi busaho muntu arukugonza abandi kwanga kumuhuliiriza kukira muno obwarukuba nalengaho kubakorra ebirungi. So ow’omu iguru namanya emitalibaine ey’orukutangatangana kandi nagonza kukukonyera. (Is. 41:13) Omu kicweka kinu nitwija kubazaaho ebintu bitaano  ebirakukonyera kurwanisa enyehurra egi, n’omulingo osobora kwongera kutunga okusemererwa omu buheereza.

IKIRIZA EKIGAMBO KYA RUHANGA KIKUGUMYE

3. Kiki ekyakonyiire nabbi Yeremiya kutebeza abandi?

³ Kurugira kimu omu kasumi aka kara obutumwa obuli omu Kigambo kya Ruhanga busoboire kugumya abaheereza be obubatunga obujunanizibwa obw’amaani. Tekerezaaho ekyokurorraho kya nabbi Yaremiya. Akahurra atiinire Yahwe obuyamuhaire obujunanizibwa obw’okutebeza. Akagamba ati: “Timanyire okugamba: baitu ndi mwana omuto.” (Yer. 1:6) Kiki ekyamukonyiire kutunga obumanzi obw’okutebeza? Akatekerezaaho ebigambo Yahwe ebiyamugambiire. Yeremiya akagamba ati: “Nubwo haroho omu mutima gwange omurro ogurukwokya, gubohirwe omu magufa gange, njwahire okugugumisiriza.” (Yer. 20:​8, 9) N’obukiraaba ngu abantu Yeremiya akaba natebeza tibaakuhuliiriize, obutumwa obuyahairwe bukamwekambisa kutebeza.

4. Kiki ekibaho obutusoma Ekigambo kya Ruhanga kandi tukakyecumiitirizaaho? (Abakolosai 1:​9, 10)

⁴ Abakaristaayo batunga amaani kuruga omu bigambo bya Yahwe ebirukusangwa omu Baibuli. Obwakaba nahandiikira Abakristaayo ab’omu kitebe kya Kolosai, omukwenda Paulo akagamba ngu kakuba beyongera kwega hali Yahwe, kyakubakonyiire kugenda “kurungi nkokukisemeriire” Yahwe kandi bagumizeemu kwana “ebyana omu mulimo gwona omurungi.” (Soma Abakolosai 1:​9, 10.) Omulimo ogu omurungi gutwarramu kutebeza amakuru amarungi. Nahabweki obutusoma Ekigambo kya Ruhanga, tukecumiitirizaaho ebitusomere, kigumya okwikiriza kwaitu kandi tweyongera kwetegereza ensonga habwaki kikuru kutebeza ha Bukama bwe.

5. Nitusobora tuta kugasirwa omu kwesomesa Ekigambo kya Ruhanga?

⁵ Kusobora kugasirwa omu Kigambo kya Ruhanga, osemeriire kwetantara kukisoma n’okukyecumiitirizaaho noyanguhiriza. Osemeriire kutunga obwire oburukumara obworukuba n’oyesomesa. Obworaaba nosoma kandi okatangatangana ekyahandiikirwe baitu okalemwa kukyetegereza otakirabaho. Oihireho n’osobora kukozesa Watch Tower Publications Index rundi Ekitabu Ekikonyera Abakaiso ba Yahwe Kuseruliiriza kulengaho kukyetegereza kurungi. Kukozesa obwire oburukumara obworukuba noyesomesa nikiija kukukonyera kweyongera kwesiga Ekigambo kya  Ruhanga. (1 Bas. 5:21) Obworayeyongera kukigumya ngu kihikire, noija kwegondeza omu kugambiraho abandi ebyoyegere.

TEEKANIZA KURUNGI OTAKAGENZERE OMU BUHEEREZA

6. Habwaki tusemeriire kutekaniza kurungi tutakagenzere omu buheereza?

⁶ Kakuba oteekaniza kurungi otakagenzere omu buheereza, nikiija kukukonyera kwikara otekaine obworukuba nobaza n’abantu. Yesu akakonyera abegeswa be kwetekaniza atakabasindikire omu buheereza. (Luk. 10:​1-11) Kandi habwokuba bakateeka omu nkora Yesu ebyakaba abegeseze, bakatunga okusemererwa habw’ebibaasoboire kuhikiriza.—Luk. 10:17.

7. Nitusobora kwetekaniza tuta tutakagenzere omu buheereza? (Rora ekisisani.)

⁷ Nitusobora tuta kwetekaniza kurungi tutakagenzere omu buheereza? Tusemeriire kutekerezaaho ebiturukugenda kubaza nukwo tubibaze omu bigambo byaitu kandi omu mulingo ogwa buli kiro. Ekindi, nikiija kutukonyera kakuba tutekerezaaho omulingo abantu basobora kwetwaza n’omulingo tusobora kubagarukamu. Hanyuma obuturahikirra abantu nitusobora kulengaho kubaza nabo omu mulingo ogw’obunywani, tuteekaine, kandi twine akaseko.

8. Abakristaayo bali nk’ebibindi ebiibumba omukwenda Paulo ebiyabalizeeho omu mulingo ki?

⁸ Omukwenda Paulo akabazaaho obujunanizibwa bwaitu omu kutebeza obuyagambire ati: “Tunyina ekyobuguda kinu omu bibindi ebiibumba.” (2 Kol. 4:7) Ky’obuguuda ki ekyakaba nabazaaho? Nugwo omulimo ogw’okutebeza ha Bukama bwa Ruhanga ogurukujuna obwomeezi. (2 Kol. 4:1) Kandi ebibindi ebiibumba nibyo biha? Nibikiikirra abantu ba Ruhanga abagambira abandi amakuru amarungi. Omu kasumi ka Paulo, abasuubuzi baakozesaaga ebibindi ebiibumba kutwarramu ebintu eby’omuhendo nk’ebyokulya, eviini, na sente. Omu mulingo nugwo gumu, Yahwe atuhaire obujunanizibwa obw’omuhendo obw’okutebeza amakuru amarungi. Habw’obukonyezi bwa Yahwe nitusobora kutunga amaani agaturukwetaaga kugumizaamu nitutebeza obutumwa bunu.

SABA YAHWE AKUHE OBUMANZI

9. Nitusobora tuta kuleka kutiina abantu? (Rora ekisisani.)

⁹ Obwire obumu nitusobora kutiina ngu abantu  tibarukwija kutuhuliiriza. Kiki ekisobora kutukonyera? Tekerezaaho esaara abakwenda eibaasabire obubaabatangire kutebeza. Omu kiikaro ky’okutiina, bakasaba Yahwe abakonyere “okugamba ekigambo [kye] nobumanzi.” Kandi ahonaaho Yahwe akagarukamu esaara yabo. (Eng. 4:​18, 29, 31) Naitwe kakuba obwire obumu tutiina abantu, tusemeriire kusaba Yahwe atuhe obumanzi. Saba Yahwe akukonyere oleke kutiina abantu nukwo obatebeze.

10. Yahwe atukonyera ata kuhikiriza obujunanizibwa bwaitu nk’Abakaiso be? (Isaya 43:​10-12)

¹⁰ Yahwe atukomere kuba Bakaiso be kandi naraganiza kutuha obumanzi. (Soma Isaya 43:​10-12.) Leka tubazeeho emiringo ena ey’arukukikoramu. Ogw’okubanza, akozesa Yesu kutwebembera obutuba nitutebeza amakuru amarungi. (Mat. 28:​18-20) Ogwakabiri, Yahwe ahaire bamalaika obujunanizibwa obw’okutukonyera. (Kus. 14:6) Ogwakasatu, atuha omwoyo ogurukwera okugutukonyera kwijuka ebintu ebitusemeriire kubaza. (Yoh. 14:​25, 26) Ogwakana, Yahwe atuhaire ab’oruganda na banyaanya itwe kutebeza hamu naitwe. Habw’obukonyezi bwa Yahwe n’obusagiki bw’ab’oruganda na banyaanya itwe, nitusobora kuba bamanzi kandi tukagumizaamu nitutebeza.

HINDURAMU KANDI OBE N’ENTEKEREZA ENUNGI

11. Nitusobora tuta kutunga abantu ab’okubaza nabo obuturukuba tuli omu buheereza? (Rora ekisisani.)

¹¹ Ohurra ohoirwemu amaani obwosanga abantu batali omuka? Wekaguze: ‘Abantu ab’omu kicweka kinu bali nkaha saaha zinu?’ (Eng. 16:13) ‘Bali ha mirimo rundi bagenzere omu katale?’ Obukiraaba nukwo kiri, n’osobora kulengaho kubaza n’abantu kuraba omu kutebeza ha rubaju rw’omuhanda? Ow’oruganda arukwetwa Joshua n’agamba ati: “Ntungire omugisa ogw’okubaza n’abantu obundukuba nindubata omu biikaro ebibarukutundiramu ebintu n’omu biikaro ebirumu abantu baingi.” Kandi uwe na mukazi we Bridget, basoboire kusanga abantu abarukukira obwingi omuka obubatebeza omu bwire obwa rwebagyo rundi Sande nyamusana.—Bef. 5:​15, 16.

12. Nitusobora tuta kumanya abantu ebibarukwikiririzaamu rundi ebirukuberaliikiriza?

¹² Kakuba omuntu ow’orukubaza nauwe aba atarukugonza kuhuliiriza, lengaho kumanya ebintu ebyarukwikiririzaamu rundi ebirukumweraliikiriza.  Joshua na Bridget bakozesa ekikaguzo ekiri ha kutandika kwa turakiti kubaza n’abantu. Ekyokurorraho, obubaba nibakozesa turakiti enyakwine omutwe Baibuli ogitwara ota?, bagamba bati: “Abantu abamu barora Baibuli nk’ekitabu ekiruga hali Ruhanga baitu abamu tinukwo bagirora. Iwe notekereza ki?” Eki kibakonyera kutandika kubaza n’omuntu.

13. Habwaki twikara tusemeriirwe abantu n’obubanga kutuhuliiriza? (Enfumo 27:11)

¹³ Kuba basinguzi omu buheereza tikisigikirra ha birungi ebirugamu. Habwaki? Habwokuba tuba tuhikiriize Yahwe n’Omwana we ekibarukugonza tukole kandi eki nikyo kuha obwakaiso. (Eng. 10:42) N’obututatunga bantu ab’okubaza nabo rundi n’obubanga kutuhuliiriza, nitusobora kusemererwa nitukimanya ngu nitusiimwa Isiitwe ow’omu iguru.—Soma Enfumo 27:11.

14. Habwaki tusemererwa omutebezi obw’atunga omuntu ow’arukugonza kwega Baibuli kandi akaija omu nsorrokano?

¹⁴ Tusemerererwa omutebezi ondi obwatunga omuntu ow’arukugonza kwega Baibuli. Omunaara gw’Omulinzi gukalengesaniza omulimo gwaitu ogwokutebeza n’okuserra omwana ow’abuzire. Abantu baingi bagenda omu biikaro ebirukwahukana kuserra omwana ogu. Kandi obubamuzoora omuntu ow’amuzoire tali nuwe asemererwa wenka baitu boona abejumbiire omu kumuserra. Omu mulingo nugwo gumu, itwena twejumbira omu mulimo ogw’okufoora abantu abegeswa, tuteekamu amaani kutebeza omu kiikaro kyaitu kandi tusemererwa omuntu obw’atandika kwija omu nsorrokano.

TEEKA OMUTIMA HA KUGONZA OKWOINIIRE YAHWE N’ABATAAHI

15. Kuteeka omu nkora obuhabuzi obuli omu Matayo 22:​37-39 nikisobora kita kutukonyera kwongera ha bwekambi bwaitu omu buheereza? (Rora kyesweko.)

¹⁵ Nitusobora kweyongera kwegondeza omu mulimo ogw’okutebeza kakuba tuteeka omutima ha kugonza okutwiniire Yahwe n’abataahi. (Soma Matayo 22:​37-39.) Tekerezaaho omulingo Yahwe ayehurra obw’arora nitwekamba kutebeza n’omulingo abantu basemererwa obututandika kwega nabo Baibuli. Ekindi, tekerezaaho ekisembo eky’obwomeezi obutahwaho abantu abahuliiriza obutumwa bwaitu ekibaratunga.—Yoh. 6:40; 1 Tim. 4:16.

16. Nitusobora tuta kutunga okusemererwa omu kukora ekiturukusobora n’obukiraaba ngu titusobora kuruga omuka? Bazaaho ebyokurorraho.

 ¹⁶ Haroho ensonga ey’erukukulemesa kuruga omuka? Obukiraaba nukwo kiri, teeka omuntima ha mulingo osobora kwoleka ngu nogonza Yahwe hamu n’abataahi. Omu kasumi ak’oburwaire bwa Korona, Samuel na Dania bakaba batasobora kuruga omuka. Omu kasumi ako akagumire, baatebezaaga nibakozesa esimu, nibahandiika amabbaruha kandi nibegesa abeegi ba Baibuli nibakozesa Zoom. Samuel akatebeza abantu abayatangatanaga obuyabaga agenzere kutunga obujanjabi bw’ekookoro. N’agamba ati: “Obututunga ebizibu, tweraliikirra, tujwaha kandi kitugumira kwejumbira omu bintu eby’omwoyo. Tusemeriire kulengaho kutunga okusemererwa omu kuheereza Yahwe.” Omu kasumi nuko kamu, Dania akagwa hansi kandi akamara ha kitabu emyezi esatu. Kandi eki kikamwetaagisa kugendera omu kagaali kumara emyezi mukaaga. Dania n’agamba ati: “Nkalengaho kukora ekinkaba ninsobora kusigikirra ha nyikara yange. Nkasobora kutebeza naasi ayaijaga kunjanjaba kandi natebezaaga abantu abandeteraga muka ebintu ebinabaga nguzire. Ekindi, nabazaaga n’omukazi ha simu ow’akaba nakora ha irwarro kandi nimmutebeza.” Enyikara ya Samuel na Dania ekaba etarukubasobozesa kukora bingi omu buheereza, baitu bakakora ekibaali nibasobora kandi baatunga okusemererwa.

17. N’osobora ota kugasirwa omu bwijwire omu magezi agatuhairwe omu kicweka kinu?

¹⁷ Kusobora kugasirwa, lengaho kuteeka omu nkora amagezi eg’emiringo etaano agabaziibweho omu kicweka kinu. Buli kintu ekibaziibweho kiri nk’ekirungo. Kandi kakuba oteraniza hamu ebirungo byona, nubwo ocumba ebyokulya ebinuzire. Obuturateeka omu nkora amagezi agatuhairwe omu kicweka kinu, nitwija kwetantara kuhwamu amaani kandi tutunge okusemererwa omu buheereza bwaitu.