1. Eaha to vetahi manaˈo i te pororaa i te taata? (A hiˈo atoa i te hohoˈa.)

 EI TAVINI na Iehova, to tatou Metua i te raˈi, e poro tatou ia vetahi ê no to tatou here ia ˈna e hinaaro e tauturu i te taata ia ite o vai o ˈna. Mea rahi te oaoa mau nei i te apiti i taua ohipa ra. No vetahi râ, e ere ïa mea ohie no to ratou mamahu e te manaˈo e ere ratou mea aravihi. E haama vetahi ia haere i ǒ te taata mai tera noa. E taiâ te tahi atu ia ririhia mai ratou. Ua haapiihia vetahi eiaha e imi i te peapea. Noa ˈtu to ratou here rahi ia Iehova, mea fifi roa no teie mau taeae e tuahine ia faaite i te parau apî oaoa i te taata aita ratou i matau. Ua taa râ ia ratou e ohipa faufaa teie, e te apiti tamau nei ratou i te reira. Te oaoa roa nei Iehova.

2. Aita anaˈe oe e oaoa ra i roto i te pororaa i te tahi taime, no te aha eiaha ˈi e toaruaru?

² Tera atoa anei to oe manaˈo i te tahi taime? Mai te peu e, eiaha e toaruaru. Te manaˈo e ere oe mea aravihi, tapao faaite paha ïa mea haehaa oe. Aita oe e hinaaro ra ia faatietiehia oe aore ra ia tupu te aimârôraa. Aita e taata e hinaaro ia ririhia mai o ˈna, ia hamani maitai iho â râ oia ia vetahi ê. Ua ite maitai to oe Metua i te raˈi i to oe mau huru aau e te hinaaro ra oia e tauturu ia oe. (Isa. 41:13) E faaite teie tumu parau e pae manaˈo tauturu e nafea ia haavî i taua mau huru aau ra e ia oaoa noa i roto i te pororaa.

 A VAIIHO I TE PARAU A TE ATUA IA FAAITOITO IA OE

3. Na te aha i tauturu ia Ieremia ia poro?

³ I te roaraa o te tau, ua faaitoito te poroi a te Atua i ta ˈna mau tavini ia rave faahope roa i ta ratou ohipa, mai te peropheta Ieremia. Ua taiâ o ˈna i to Iehova faaueraa ia ˈna e poro. Teie ta ˈna i parau: “Aita vau i ite i te paraparau, e tamarii noa hoi au.” (Ier. 1:6) Eaha tei tauturu ia ˈna ia noaa mai te itoito? Te poroi ïa no ǒ mai i te Atua. Ua parau Ieremia: “Ua riro ta ˈna parau mai te auahi ura tei opanihia i roto i to ˈu mau ivi, e ua rohirohi au i te tapea noa i te reira i roto ia ˈu.” (Ier. 20:8, 9) Noa ˈtu te fifi o ta ˈna hopoia, ua itoitohia oia maoti te poroi tei faauehia ia ˈna ia poro.

4. Eaha te tupu ia taio e ia feruriruri tatou i te Parau a te Atua? (Kolosa 1:9, 10)

⁴ E itoitohia te mau Kerisetiano maoti te poroi o te Parau a te Atua. I roto i ta ˈna rata i te amuiraa no Kolosa, ua parau te aposetolo Paulo e tauturu te noaaraa mai te ite mau i to ˈna mau taeae “ia au to [ra]tou haerea ia Iehova . . . a faatupu noa ˈi [ra]tou i te hotu na roto i te mau ohipa maitatai atoa.” (A taio i te Kolosa 1:9, 10.) O te pororaa i te parau apî oaoa hoê o taua mau ohipa maitatai ra. No reira, ia taio e ia feruriruri tatou i te Parau a te Atua, e puaihia to tatou faaroo ia Iehova e e taa ˈtu â ia tatou te faufaaraa ia poro i te poroi o ta ˈna Faatereraa arii.

5. E nafea ia faufaahia ˈtu â tatou i te taioraa e te haapiiraa i te Bibilia?

⁵ Ia faufaahia tatou i te Parau a te Atua, eiaha tatou e rave ru noa i ta tatou taioraa, haapiiraa e feruriruriraa. Ia taio oe i te tahi irava aita oe e taa maitai ra, eiaha e tuu atu i te hiti. A imi râ i te tatararaa o taua irava ra i roto i te Index des publications des Témoins de Jéhovah aore ra te Maimiraa Bibilia no te mau Ite no Iehova. A rave i te taime ia haapii oe, e papu atu â ïa ia oe e parau mau iho â te Parau a te Atua. (Tes. 1, 5:21) Ia papu atu â ia oe te reira, e oaoa ˈtu â oe i te faaite ia vetahi ê i ta oe i haapii mai.

A FAAINEINE MAITAI NO TE PORORAA

6. No te aha e faaineine maitai ai no te pororaa?

⁶ A faaineine maitai ia oe no te  poro⁠raa. Eita ïa oe e taiâ ia paraparau ia vetahi ê. Ua tauturu Iesu i ta ˈna mau pǐpǐ ia faaineine ia ratou hou a tono ai ia ratou e poro. (Luka 10:1-11) No te mea ua faaohipa ratou i ta Iesu i haapii atu, ua ite roa te mau pǐpǐ i te oaoa i roto i ta ratou i nehenehe e rave.—Luka 10:17.

7. E nafea ia faaineine no te pororaa? (A hiˈo atoa i te hohoˈa.)

⁷ E nafea ia faaineine no te pororaa? Mea faufaa ia feruri i ta tatou e parau e i ta tatou huru paraparau. Mea maitai atoa ia feruri e piti aore ra e toru huru o te taata i roto i te tuhaa fenua e e nahea tatou i mua i te tupuraa tataitahi. E ia paraparau tatou i te taata, ma te mǎrû ïa e ma te mata ataata e te au noa.

8. E au te mau Kerisetiano i te farii repo ta Paulo i faahiti. A faataa.

⁸ Ua parau te aposetolo Paulo i to ˈna mau taeae e tuahine Kerisetiano: “Te vai nei taua taoˈa ra ia tatou mai te mea ra e tei roto i te farii repo.” (Kor. 2, 4:7) Eaha teie taoˈa? O te ohipa pororaa ïa i te poroi o te Faatereraa arii o te faaora i te taata. (Kor. 2, 4:1) E te farii repo? O te mau tavini ïa a te Atua, o te faaite ra i te parau apî oaoa ia vetahi ê. I tera ra tau, e tuu na te feia hoo taoˈa i roto i te mau farii araea i te mau mea faufaa, mai te maa, te uaina e te moni. Ua horoa atoa mai Iehova i te poroi faufaa o te parau apî oaoa. Maoti ta ˈna tauturu, e itoitohia tatou ia tamau i te poro i taua poroi ra.

A PURE NO TE ANI I TE ITOITO

9. Eaha te rave ia mǎtaˈu tatou i te taata aore ra ia ririhia mai? (A hiˈo atoa i te hohoˈa.)

⁹ I te tahi taime, e mǎtaˈu tatou i te taata aore ra ia ririhia mai. E nafea ïa tatou? I to ratou opaniraahia ia poro, aita te mau aposetolo i mǎtaˈu e i faaea i te poro. Ua pure râ ratou ia Iehova ia tauturu ia ratou “ia faaite i [ta ˈna] parau ma te mǎtaˈu ore.” Ua pahono oioi Iehova i ta ratou pure. (Ohi. 4:18, 29, 31) Ia taiâ tatou i te poro no te mǎtaˈu i te taata, mea tano ia pure atoa tatou ia Iehova ia tauturu mai. A ani ia ˈna ia haapuai i to oe here no te taata, a ore atu ai oe e mǎtaˈu ia faaite atu i te parau apî oaoa.

10. E nafea Iehova e tauturu mai ai ia poro ei Ite no ˈna? (Isaia 43:10-12)

 ¹⁰ Ua maiti Iehova ia tatou ei Ite no ˈna, e ua fafau oia e horoa mai i te itoito. (A taio i te Isaia 43:10-12.) E hiˈo mai tatou e maha ravea e na reira ˈi oia. A tahi, tei pihai iho Iesu ia tatou i te mau taime atoa e poro ai tatou i te parau apî oaoa. (Mat. 28:18-20) A piti, te faaohipa ra Iehova i ta ˈna mau melahi no te tauturu mai. (Apo. 14:6) A toru, ua horoa mai Iehova i to ˈna varua moˈa no te tauturu mai ia haamanaˈo tatou i ta tatou i haapii mai. (Ioa. 14:25, 26) A maha, ua horoa mai Iehova i te taeae e te tuahine no te apiti ia tatou. Maoti ta Iehova tauturu e ta te fetii taeae here, e itoitohia tatou ia tamau i te poro.

EI HURU AU NOA TO OE E TE FERURIRAA MAITAI

11. E nafea outou e farerei atu â ˈi i te taata i roto i te pororaa? (A hiˈo atoa i te hohoˈa.)

¹¹ E toaruaru anei oe aita anaˈe i rahi te taata i roto i te tuhaa fenua? A ui ïa: ‘Teihea roa te taata i teie hora?’ (Ohi. 16:​13) ‘Tei te ohipa anei aore ra tei te fare toa?’ Mai te peu e, e farerei atu â paha oe i te taata i roto i te pororaa na te aroâ. Teie ta taeae Joshua e parau ra: “Ua nehenehe au e poro a hahaere ai na roto i te mau vahi tapearaa pereoo e na te mau vahi taata.” Oia atoa, ua farerei atu â raua Bridget, ta ˈna vahine i te taata i ǒ ratou a poro ai raua i te ahiahi e i te mau Tapati i te taperaa mahana.—Eph. 5:15, 16.

12. E nafea tatou e ite ai eaha ta te taata tiaturiraa aore ra haapeapearaa?

¹² Ia ore te taata e anaanatae roa mai i te poroi, a tamata i te taa eaha ta ratou tiaturiraa aore ra haapeapearaa. Ei omuaraa parau, e faaohipa Joshua raua Bridget i te uiraa i te api matamua o te hoê api parau. Ia faaohipa raua i te api parau Eaha te Bibilia no oe? teie ta raua e parau: “No te tahi mau taata, e parau na te Atua te Bibilia. No te tahi atu, e ere ïa. Eaha to oe manaˈo?” Pinepine e tupu te aparauraa.

13. No te aha e raea ˈi ta tatou fa noa ˈtu eita te taata e farii mai? (Maseli 27:11)

 ¹³ Noa ˈtu eita te taata e faaroo mai ia poro tatou, ua raea râ ta tatou fa. Inaha, ua rave tatou i ta Iehova e ta Iesu i faaue mai, oia hoi e poro. (Ohi. 10:42) Aita anaˈe tatou i farerei i te taata aore ra aita te poroi i fariihia, e oaoa tatou no te mea te oaoa ra to tatou Metua i te raˈi.—A taio i te Maseli 27:11.

14. No te aha mea oaoa ˈi ia farerei i te hoê taata tei anaanatae i te poroi?

¹⁴ Mea oaoa atoa ia farerei te hoê taata tei anaanatae i te poroi. Ua faaau Te Pare Tiairaa i ta tatou ohipa pororaa i te paimiraa i te hoê tamarii tei moˈe. Mea rahi te paimi haere ia ˈna na tera e tera vahi. E ia itehia mai oia, o ratou pauroa te oaoa, eiaha noa râ te taata na ˈna i ite mai. O te taatoaraa o te amuiraa atoa te apiti i te ohipa faariroraa i te taata ei pǐpǐ, a poro ai na tera e tera tuhaa fenua. E ia haere mai te tahi taata i te putuputuraa, o ratou pauroa te oaoa.

A TIATONU I TO OE HERE NO IEHOVA E NO TE TAATA TUPU

15. E rahi atu â to tatou aau tae no te pororaa ma te faaohipa i te Mataio 22:37-39, e nafea? (A hiˈo atoa i te hohoˈa i te )

¹⁵ E rahi atu â to tatou aau tae no te pororaa ma te tiatonu i to tatou here no Iehova e no te taata tupu. (A taio i te Mataio 22:37-39.) A feruri na i to Iehova oaoa rahi a ite mai ai ia tatou ia poro, e te oaoa rahi o te mau taata a haamata ˈi ratou i te haapii i te Bibilia! A haamanaˈo atoa e nehenehe te feia o te faaroo i ta tatou poroi e o te faaoti e haamori ia Iehova e fanaˈo i te ora mure ore.—Ioa. 6:40; Tim. 1, 4:16.

16. E nafea tatou e ite ai i te oaoa i roto i te pororaa ia mau tatou i te fare? A horoa i te hiˈoraa.

¹⁶ Eita paha oe e nehenehe e faarue i to oe fare no te tahi tumu. A tiatonu ïa i tei maraa ia oe no te faaite i to oe here no Iehova e no te taata tupu. I te roaraa o te maˈi parare COVID-19, ua mau Samuel raua Dania i ǒ raua. Noa ˈtu râ, aita raua i faaea i te poro na roto i te niuniu  paraparau, i te papai i te rata, e i te faatere i te haapiiraa Bibilia na roto i te reni aparauraa Zoom. Ua poro Samuel i te feia ta ˈna i farerei i te fare maˈi no ta ˈna mau rapaauraa i te mariri ai taata. Te na ô ra oia: “Ia û tatou i te ati, e hepohepo roa tatou, e rohirohi roa, e tamatahia atoa to tatou faaroo. Mea faufaa ia ite tatou i te oaoa i roto i ta tatou taviniraa ia Iehova.” E o Dania, ua topa ïa, a tarava noa ˈtu ai i nia i te roˈi e toru avaˈe. Faaohipa ˈtura oia i te hoê parahiraa turairai e ono avaˈe. Te na ô ra oia: “Ua faaitoito vau i te rave i tei maraa ia ˈu. Ua poro vau i te hoê tuati maˈi tei haere mai e hiˈo ia ˈu, e ua paraparau i tei afai mai i te mau mea ta ˈu i faaau. Ua fanaˈo atoa vau i te hoê aparauraa au maitai na roto i te niuniu paraparau e te hoê vahine rave ohipa no te hoê taiete e hoo i te mau taihaa no te feia maˈi.” Ua iti mai ta Samuel raua Dania i nehenehe e rave i roto i te pororaa, ua rave râ raua i tei maraa ia raua e ua oaoa raua.

17. E nafea oe e faufaahia ˈi i na manaˈo tauturu o teie tumu parau?

¹⁷ A tamata i te faaohipa i na manaˈo tauturu e pae tei faahitihia i roto i teie tumu parau. E au tera mau manaˈo tauturu i te mau mea atoa e faaohipahia no te faaineine i te hoê maa au roa. Hoê â huru, ia faaohipa tatou i te taatoaraa o te mau manaˈo tauturu, e ineine maitai aˈe tatou no te tinai i te mau manaˈo tano ore e no te oaoa ˈtu â i roto i te pororaa.