1. Atthu akina anoonela sai olaleya ihapari sooreera? (Nwehe efootu.)

 NTOKO arumeyi a Yehova, hiyo ninnaalaleerya atthu akina okhala wiira ninnimphenta Tiithi ahu a wiirimu, nave nimphavela waakhaliherya atthu akina omusuwela yena. Anamalaleerya akina, onnaasivela ovara muteko woolaleerya, masi akina vannaaxankiha ophwanya ohakalala ni muteko owo. Mwaha wa xeeni? Woonasa wene, mwaha woowi animoova aahiiso khaniiroromela. Akina annoovelela okela mukintaali mwa mwaneene etthoko ahilattuliwe. Nave akina animoova ohaakheliwa saana mmawaani. Pooti wiira anamalaleerya akina, ahiixuttihiwa ohaakhulana ni atthu akina. Nnaamwi amphentaka vanceene Yehova, anna ni arokora awo, anoona ovila waalaleerya atthu a ilapo sikina. Masi hata vari siiso, awo annisuwela efaita erina aya muteko woolaleerya, nave anniluttuweliwa ovara muteko owo. Tthiri Yehova onnihakalala vanceene!

2. Vakhala wiira vannooxankihani ophwanya ohakalala ni muteko woolaleerya, xeeni muhinreerela anyu okhulumuwa?

² Niireke ikwaha sikina vannooxankihani ophwanya ohakalala ni muteko woolaleerya? Akhala wiira munaakhula aayo, muhikhulumuwe. Woonasa wene, eyo enooniherya wiira munniiyeviha ni khamuniphavela onyakulihana ni mutthu mukina. Ohiya-vo, khuuvo oniphavela othokoreriwa moohiloka, otepexa wene okathi yoole mutthu oniimananiha awe waapakela itthu sooreera atthu akina. Mukupaliki wiira Tiithi anyu a wiirimu onnisuwela moota vanooxankihayani ni oniphavela wookhaliheryani. (Yes. 41:13) Mwaha ola, nnoothokorerya iponto 5 seiyo sinrowa onikhaliherya oxintta woovelela ni moota woophwanya ohakalala ni muteko woolaleerya.

 MWEEMYE WIIRA NUULUMO NA MULUKU NOOLIPIHENI

3. Exeeni yaamukhalihenrye Yeremiya waalaleerya atthu akina?

³ Okhuma khalai, orumeelaka Nuulumo nawe, Yehova onnaalipiha arumeyi awe vaavo aniphavela aya omaleliha yoothanleliwa aya yoovila. Nrowe nthokorerye ntakiheryo na profeta Yeremiya. Yena aahixanka vanceene okathi Yehova aamurumme awe muteko woolaleya. Owo aahimmye so: “Tthiri miyo nkinsuwela olavula; okhala wiira ka mwaana”. (Yer. 1:6, Piipiliya Emakhuwa.) Exeeni yaamukhalihenrye Yeremiya okhala oolipa murima ni olaleerya? Ele Yehova aamulenle awe, yaahimulipiha vanceene. Yeremiya aahimmye so: “Mmurimani mwaka masu anyu yanikhala ntoko moro woviha, wanivarela mpakha mmakhuvani mwaka. Kaniphavela ottipiha n’ikuru saka sothene, kihinawerya”. (Yer. 20:8, 9) Nnaamwi muttetthe athanleliwe awe Yeremiya waari woovila olaleerya, muhupi aakhenle awe waahimukhaliherya okhala oolipa murima ni owerya ovara muteko owo.

4. Exeeni eniiraneya vaavo nimmusoma ahu Biibiliya ni wuupuwelela ele esomme ahu? (aKolosi 1:9, 10)

⁴ Olelo-va, makristau anniphwanya olipa murima aniprisari aya orweela wa Biibiliya. Okathi murummwa Paulo aalepenle awe ekarta anna a muloko wa oKolosi, owo aahaaleela wiira yaahaana osuwela oratteene ele oniphavela awe Yehova. Nto opaka eyo, yaamwaakhaliherya ‘owerya weetta ntoko siniphwanela aya atthu a Yehova’ ni yanwerya ‘okumiherya mihokorokho, avaraka miteko sooreera sa khula enamuna’. (Mmusome aKolosi 1:9, 10.) Miteko iyo sooreera, sinihela muhina olaleerya. Nto vaavo nimmusoma ahu Biibiliya ni wuupuwelela ele esomme ahu, omwaamini wahu Yehova onnilipa ni ninniweha efaita erina aya waalaleerya atthu akina ihapari sa Omwene.

5. Ninrowa ottottela sai muraarelo yoosoma ahu ya Biibiliya?

⁵ Wiira muttottele muraarelo Nuulumo na Muluku, muhisomeke ni wuupuwelela mwaakuveyasaka. Musyakeke osoma mwaatteliwe ene miteko. Vakhala wiira munisoma mpantta onoovilani wiiwexexa, muhituphe. Ohiya-vo, mmurumeele Índice das Publicações da Torre de Vigia aahiiso Eliivuru Enaakhaliherya Anamoona a Yehova Otokosa Myaha Sikumiheriwe, wiira mphwanye otthokiheriwa waya eversiikulu eyo. Vakhala wiira munimwiivaha okathi wiira musomeke ni ephoole, omuroromela wanyu Biibiliya onoolipa.  (1 aTes. 5:21) Vakhala wiira munookupaliki, munoohakalalaka vanceene ni ophavela waaleela atthu akina itthu mwiixuntte anyu.

MWIILOKIHERYEKE SAANA

6. Xeeni ninreerela ahu wiilokiherya saana nihinatthi orowa muteko woolaleerya?

⁶ Akhala wiira munimwiilokiherya saana muhinatthi orowa muteko woolaleerya, vanimookhweelakani ovaanela ni atthu. Yesu aanaakhaliherya awiixutti awe wiilokiherya ohinatthi waaruma muteko woolaleerya. (Luka 10:1-11) Awo yaahivarihela muteko itthu sootheene yiixuttihiwe aya ni Yesu. Mwaha waivaavo, awo yaahihakalala vanceene ni itthu sootheene yaawenrye aya opaka. — Luka 10:17.

7. Ninrowa wiilokiherya sai wiira nalaleerye? (Nwehe efootu.)

⁷ Ninrowa wiilokiherya sai wiira nalaleerye? Nihaana wuupuwela etthu nikhanle ahu oolavula ni otthokiherya mwa enamuna yooloka nirumeelaka moolumo ahu. Ti vooloka wuupuwelela miyoonelo soovirikana sa atthu a muttetthe ahu, ni wuupuwelela vahinatthi moota nikhanle ahu owaakhula. Nto waphiya okathi wiira nimulaleerye mutthu owo, nihaana okhala oomaaleleya, ootheya-theya ni okhala atthu oopatthaneya.

8. Mwa enamuna xeeni makristau anlikana aya ni mwaapu wa oloko?

⁸ Murummwa Paulo, aahaaleela anna ni arokora wiira: “Nookhalana muhakhu ola ori mmwaapuni wa oloko”. (2 aKor. 4:7) Masi muhakhu xeeni owo? Muteko woolaleya voohimya sa Omwene wa Muluku ni onoopola ikumi sa atthu. (2 aKor. 4:1) Onitaphulela exeeni mwaapu wa oloko? Onitaphulela arumeyi a Muluku yaawo anaalaleerya atthu akina ihapari sooreera. Okathi wa Paulo, alipa anakoso yaanirumeela mwaapu wiira ateexe aahiiso opweha itthu sa efaita ntoko eyoolya, eviinyu ni musurukhu. Moolikanasa, hiyo na mwaapu wa oloko maana Yehova onninrumeela wiira nikuxe etthu ya faita yuulupale siri ihapari sooreera. Nikhaliheriwaka ni Yehova, hiyo nnoowerya okhalana ikuru wiira nihihiye olaleerya ihapari iyo moororomeleya.

MUNVEKELEKE YEHOVA WIIRA OOVAHEENI OPIXA MURIMA

9. Ninrowa oxintta sai owoova atthu aahiiso woova ohaakheliwa saana? (Nwehe efootu.)

⁹ Ikwaha sikina, hiyo pooti owoovaka atthu aahiiso woova ohaakheliwa saana. Ninrowa owerya sai oxintta muxankiho owo? Nwehe nivekelo yaapanke aya arummwa okathi yaaleeliwe  aya wiira ahitthikele olaleerya. Ohiya oxinttiwa ni woova, awo yaahinvekela Yehova wiira aakhaliherye ‘olaleya moolumo a Muluku, ahoovaka etthu’. Nto Yehova aahaakhula nivekelo nlo moowaakuveya. (Mit. 4:18, 29, 31) Vakhala wiira munniwoova atthu okathi munlaleerya anyu, munvekeleke Yehova wiira ookhaliheryeni. Munvekeleke Yehova wiira waaphenta wanyu atthu okhaleke wuulupale ovikana owoova atthu.

10. Yehova onnikhaliherya sai wiira nihihiye okhala Anamoona awe? (Yesaya 43:10-12)

¹⁰ Yehova oonithanla wiira nikhale Anamoona awe, ni oonileiherya wiira onoonivaha olipa murima. (Mmusome Yesaya 43:10-12.) Nnoothokorerya iponto 4 sa moota Yehova onnikhaliherya awe mwa enamuna eyo. Yoopacerya, Yesu onikhala ni hiyo okathi ninlaleerya ahu ihapari sooreera. (Math. 28:18-20) Ya nenli, Yehova onniruma malaikha wiira anikhaliherye okathi ninvara ahu muteko woolaleerya. (Wiis. 14:6) Ya neeraru, Yehova onninivaha munepa woowaarya wiira onikhaliheryeke wuupuwelela itthu niixuntte ahu. (Yoh. 14:25, 26) Ya neexexe, nookhalana anna ni arokora annikhaliherya okathi woolaleerya. Nikhaliheriwaka ni Yehova vamosa ni anna ni arokora, hiyo nookhalana itthu sinceene nimpirisari ahu wiira nikhale oolipa murima ni ohihiya olaleerya.

MWIIXAAKUVIHEKE NI MUKHALANEKE MOONELO WOOLOKA

11. Munrowa owerya sai waaphwanya atthu okathi woolaleerya? (Nwehe efootu.)

¹¹ Niireke munikhulumuwa okathi munaaphwanya anyu atthu vakhaani aahiiso muhinaaphwanya anyu mmawaani? Mwiikoheke so: ‘Atthu a muttetthe aka okathi ola ari woowi?’ (Mit. 16:13) ‘Kiireke anivara muteko aahiiso aronwe omerkaatu?’ Vakhala wiira eyo enimwiiraneya, niireke mwanwerya olaleerya mapuro oowaatta atthu? Munna mmosa oniitthaniwa Joshua, ohimmye so: “Kihoonelela olaleerya okathi kineetta aka omerkaatu aahiiso mapuro oowaattiwa”. Owo ni mwaarawe oniitthaniwa Bridget, annaaphwanya atthu mmawaani okathi anaaxukurya aya ohiyu aahiiso Ettiminku othana. — aEef. 5:15, 16.

12. Ninrowa owerya sai osuwela etthu mutthu enimuxankiha ni etthu onikupali awe?

¹² Mwasuwela wiira mutthu munlavulana anyu khonisiveliwa ni ele enihimya anyu,  mphaveleke osuwela etthu enimuxankiha ni etthu onikupali awe. Joshua ni Bridget, annirumeela nikoho niri ohoolo wa efolyeeto wiira apacerihe ovaanela. Mwa ntakiheryo, arumeelaka efolyeeto eni: Nyuwo Munimoonela Sai Biibiliya? awosa ahimyanse so: “Atthu akina anuupuwela wiira Biibiliya eliivuru ya Muluku, masi akina annaanyiherya voohimya sa mwaha owo. Ankhi nyunwo moonelo anyu tuuvi?” Okhala wene, ovaanela mwa enamuna eyo onnikhumela saana.

13. Xeeni ninreerela ahu osiveliwaka ni muteko ahu woolaleerya hata atthu akina ahiphavelaka oniwiriyana? (Miruku 27:11)

¹³ Etthu eniiriha muteko ahu woolaleerya okhumela saana, khahiyo atthu awo owiriyana aahiiso nnaari. Mwaha wa xeeni? Mwaha woowi, hiyo nimpaka ele Yehova ni mwanawe Yesu anirumme aya wiira nipakeke, ori olaleerya. (Mit. 10:42) Hata nihaaphwanyaka atthu oovaanelana aahiiso akhoottaka ele enihimya ahu, hiyo ninnihakalala okhala wiira ninnisuwela wiira nimmuhakalaliha Tiithi ihu a wiirimu. — Musome Miruku 27:11.

14. Xeeni ninhakalala ahu vaavo munna aahiiso murokora onimphwanya awe mutthu onisiveliwa ekeekhai?

¹⁴ Ninnihakalala vanceene vaavo munna onimphwanya awe mutthu onisiveliwa ekeekhai okathi woolaleerya. Erevista ya Owehaweha yoolikanyiha muteko woolaleerya ni muteko wa omphavelasa mwaana orimenle. Nave atthu anceene, anniirela mpantta muteko owo wa omphavelasa mwaana mapuro oovirikana. Nuumala mwaana owo ophwanyiwa, atthu ootheene annihakalala ohiya paahi ole omphwanye. Moolikanasa, atthu ootheene a mmulokoni annikhaliherya muteko owo woolaleerya ni owerya omaliha muttetthe athanleliwe aya. Nave vaavo mutthu onipacerya awe orowela mithukumano, atthu ootheene annihakalala.

MULIPIHEKE OMPHENTA WANYU YEHOVA NI ATTHU

15. Yoolepa ya Matheyo 22:37-39, enrowa onikhaliherya sai wuncererya ohakalala wahu ni muteko woolaleerya? (Nwehe efootu ya vakaapani.)

¹⁵ Hiyo nnoowerya wuncererya ohakalala wahu ni muteko woolaleerya nuupuwelelaka moota nnimphenta ahu Yehova ni atthu. (Mmusome Matheyo 22:37-39.) Nkuupuwelani moota Yehova onihakalala awe okathi onniweha awe nivaraka muteko woolaleerya ni moota atthu akina anrowa aya ohakalala yapacerya omusoma Biibiliya! Nuupuweleleke woopoliwa wahu ni naapixeryeke murima ale  anaakhulela muhupi ninlaleya ahu mwa enamuna yooloka. — Yoh. 6:40; 1 Tim. 4:16.

16. Ninrowa ophwanya sai ohakalala ni muteko woolaleerya hata nihikhumaka owaani? Nvahe ntakiheryo.

¹⁶ Ankhi vakhala wiira yookhala enookhoottiheryani okhuma owaani? Vakhala wiira ti siiso, muupuweleke etthu mukhanle anyu oopaka wiira mooniherye omphenta wanyu Yehova ni atthu. Okathi wa oretta wa koronaviiru, Samuel ni Dania, khiyaawerya okhuma owaani. Okathi owo wootheene wooxankiha, awo yaanilaleerya amurumeelaka telefoni, alepaka ikarta ni wiiriha soosoma sa Biibiliya amurumeelaka Zoom. Okathi ole Samuel iira olooliwaka oretta wa Kanser, nto aanirumeela okathi owo aarowa awe ospitaali wiira aalaleerye atthu akina. Owo onihimya so: “Mixankiho pooti onikhulumulaka mwa muthinto wa weerutthuni, mmuupuweloni ni waataana wahu ni Yehova. Ti maana aya, vari aya wa efaita yuulupale ophwanya ohakalala ni muteko nninvarela ahu Yehova”. Nave okathi owo, Dania aahiviriha miyeeri miraru owereiwaka. Nuumala-vo, owo aahiviriha miyeeri 6 eettaka ni ekhatera ya maroota. Owo onihimya so: “Okathi ole wootheene kaarina aka muxankiho, miyo kaaniimananiha opaka ele eniwerya aka. Miyo kaanimulaleerya nfrimeera aarwa okixukurya owaani ni kaanivaanela ni atthu akina yaawo yaaruuha eyoolya. Nave kaanivaanela kimurumeelaka telefoni ni muthiyana aavara ospitaali aatokosa oretta aka”. Mwaha wa makhalelo aya ale ooxankiha, Samuel ni Dania, khiyaawerya onvarela muteko Yehova ntoko yaapaka aya khalai. Hata vari siiso, awo yaanipaka ele yaawerya aya ni yaanihakalala ni mareeliho yaaphwanya aya.

17. Munrowa ottottela sai muraarelo iponto nithokorerye ahu mwaha ola?

¹⁷ Mmananiheke ovarihela muteko iponto nithokorenrye ahu mwaha ola. Khula eponto niixuntte ahu, enlikana ni itthu ninrumeela ahu naaphavelaka osiviha eyoolya. Okathi ninrumeela ahu itthu sootheene simprisari wiira nisivihe eyoolya, eyo ennikhala yootepa osiva! Navarihela muteko iponto iyo niixuntte ahu, nnookhala oolikana ene wiira nixintte woova nave nnoophwanya ohakalala ni muteko woolaleerya.