1. Ano an inaabat han iba ha pakiistorya ha mga tawo ha ministeryo? (Kitaa liwat an piktyur.)

 SUGAD nga katawohan ni Jehova, nagsasangyaw kita kay hinigugma naton an aton langitnon nga Amay ngan karuyag naton nga buligan hira nga makilala hiya. Damu nga magwarali an nag-i-enjoy gud ha pagsangyaw nga buruhaton. Pero an iba nakukurian nga ma-enjoy ito. Kay ano? Kay an iba bangin naaawod gud ngan waray kompyansa. An pipira diri komportable nga kumadto ha mga balay kon diri hira imbitado. An iba bangin nahahadlok nga diri karawaton. An iba gintutdoan nga likyan nga makapasubo ha iba. Bisan kon hinigugma gud hini nga kabugtoan hi Jehova, nakukurian hira pagsangyaw han maopay nga sumat ha mga diri nira kilala. Pero maaram hira nga importante gud ini nga buruhaton, ngan regular nga nakikigbahin hira hito. Sigurado gud nga nalilipay hi Jehova ha ira!

2. Kon nakukurian ka nga mag-enjoy ha ministeryo, kay ano nga diri ka dapat manluya?

² Nakukurian ka ba usahay nga ma-enjoy an ministeryo tungod hito nga mga pag-abat? Kon amo, ayaw panluya. An imo kakulang hin kompyansa mahimo magpasabot nga mapainubsanon ka ngan diri mo karuyag an sobra nga atensyon. Iginpapakita liwat hito nga diri mo karuyag nga makigdiskusyon ha iba. Waray naruruyag nga isalikway, labi na kon para ha kaopayan han iba an iya ginbubuhat. An imo langitnon nga Amay maaram gud han imo mga inaabat ngan karuyag niya nga ihatag ha imo an bulig nga imo kinahanglan. (Isa. 41:13) Hini nga artikulo,  aton hihisgotan an lima nga suhestyon kon paonan-o naton aatubangon an sugad nga mga pag-abat ngan kon paonan-o kukultibaron an kalipay ha ministeryo.

TUGUTI NGA PARIG-UNON KA HAN PULONG HAN DIOS

3. Ano an nakabulig kan propeta Jeremias ha pagsangyaw ha iba?

³ Tikang pa hadto, an mensahe tikang ha Dios nagpaparig-on ha iya mga surugoon kon may toka hira nga makuri buhaton. Pansina an ehemplo ni propeta Jeremias. Nabaraka hiya han ginsugo hiya ni Jehova nga magsangyaw. Nagsiring hi Jeremias: “Diri ako maaram magyakan, kay usa la ako nga bata.” (Jer. 1:6) Ano an nakabulig ha iya nga magkaada kompyansa? Naparig-on hiya han pulong han Dios. Hiya nagsiring: “Nagin sugad ito hin naglalaga nga kalayo nga nakapriso ha akon mga tul-an, ngan ginkakapoy na ako ha pagpinugong hito.” (Jer. 20:​8, 9) Bisan kon makuri an teritoryo ni Jeremias, an mensahe nga iginhatag ha iya nga isamwak naghatag hin kusog nga iya ginkikinahanglan basi matuman an buruhaton.

4. Ano an nahitatabo kon ginbabasa naton an Pulong han Dios ngan ginpapamalandong ito? (Colosas 1:​9, 10)

⁴ An mga Kristiano napaparig-on han mensahe tikang ha Pulong han Dios. Han hi Pablo nagsusurat ha kongregasyon han Colosas, hiya nagsiring nga an pagkuha hin husto nga kahibaro mag-aaghat ha iya kabugtoan nga ‘maglakat nga takos kan Jehova’ samtang padayon hira nga ‘namumunga ha tagsa nga maopay nga buhat.’ (Basaha an Colosas 1:​9, 10.) Ito nga maopay nga buhat nag-uupod han pagsangyaw han maopay nga sumat. Salit kon ginbabasa naton an Pulong han Dios ngan ginpapamalandong ito nagigin marig-on an aton pagtoo kan Jehova ngan mas nasasabtan naton kon kay ano nga importante gud an pagsangyaw han mensahe han Ginhadian.

5. Paonan-o kita magpapahimulos gud ha aton pagbasa ngan pag-aram ha Biblia?

⁵ Basi makapahimulos gud tikang ha Pulong han Dios, diri ta dapat apurahon an aton pagbasa, pag-aram, ngan pagpamalandong. Ayaw pagdali-dali. Kon may nabasa ka nga teksto nga nakukurian ka pagsabot, ayaw ito laktawi. Lugod, bilnga an esplikasyon hito nga bersikulo ha Watch Tower Publications Index o ha Tulong sa Pag-aaral ng mga Saksi ni Jehova. Kon diri ka nagdadagmit ha imo pag-aram, mapaparig-on mo an imo pagsarig nga tinuod gud an Pulong han Dios. (1 Tes. 5:21) Kon mas kombinsido ka, mas mai-enjoy mo nga isangyaw an imo nahibabaroan.

 MANGANDAM HIN MAOPAY PARA HA MINISTERYO

6. Kay ano nga dapat kita mangandam hin maopay para ha ministeryo?

⁶ Kon nangangandam ka hin maopay para ha ministeryo posible gud nga magin mas komportable ka ha pakiistorya ha iba. Ginbuligan ni Jesus an iya mga disipulo nga mangandam antes hira sugoon ha pagsangyaw. (Luc. 10:​1-11) Tungod kay gin-aplikar han mga disipulo an igintutdo ha ira ni Jesus, nagin malipayon gud hira ha ira mga nahimo.—Luc. 10:17.

7. Paonan-o kita mahimo mangandam para ha ministeryo? (Kitaa liwat an piktyur.)

⁷ Paonan-o kita mahimo mangandam para ha ministeryo? Kinahanglan naton hunahunaon kon paonan-o naton epektibo nga maisasaysay an kamatuoran ha aton kalugaringon nga mga pulong. Makakabulig liwat nga hunahunaon an duha o tulo nga komon nga reaksyon hadton makakaistorya ha teritoryo ngan kon paonan-o kita mabaton ha tagsa nga sitwasyon. Ngan kon nakikiistorya kita ha mga tawo, puydi kita mangalimbasog nga magin relaks, humiyom, ngan magin makisangkayon.

8. Ha ano nga paagi an mga Kristiano pariho han mga surudlan nga hinimo ha lapok nga gin-unabi ha ilustrasyon ni apostol Pablo?

⁸ Igin-ilustrar ni apostol Pablo an aton papel ha pagsangyaw nga buruhaton han hiya nagsiring: “May-ada kami hini nga bahandi ha mga surudlan nga hinimo ha lapok.” (2 Cor. 4:7) Ano ini nga bahandi? Ito an nagtatalwas hin kinabuhi nga buruhaton nga amo an pagsangyaw han mensahe han Ginhadian. (2 Cor. 4:1) Ano ini nga mga surudlan nga hinimo ha lapok? Nagrirepresentar ito han mga surugoon han Dios nga nagsasangyaw han maopay nga sumat. Ha panahon ni Pablo, gin-gamit han mga negosyante an mga tibod nga hinimo ha lapok basi butangan han importante nga mga butang sugad han pagkaon, bino, ngan kwarta kon nagbibiyahe. Sugad man, gintataporan kita ni Jehova han importante nga mensahe han maopay nga sumat. Ha bulig ni Jehova, magkakaada kita hin kusog nga ginkikinahanglan basi maipadayon naton an pagsangyaw.

PAG-AMPO NGA MAGKAADA KAISOG

9. Paonan-o naton malalamposan an kahadlok ha tawo o an kahadlok nga isalikway? (Kitaa liwat an piktyur.)

⁹ Usahay, bangin kita mahadlok ha tawo  o mahadlok nga isalikway. Paonan-o naton ito malalamposan? Pansina an pag-ampo han mga apostol han gindid-an hira nga magsangyaw. Imbes nga magpadara ha kahadlok, naghangyo hira hin bulig kan Jehova nga “padayon nga igyakan nga may bug-os nga kaisog an [iya] pulong.” Ginbaton dayon ni Jehova an ira pag-ampo. (Buh. 4:​18, 29, 31) Kon usahay naaapektohan kita han kahadlok ha tawo, kinahanglan liwat nga mag-ampo kita para han bulig ni Jehova. Pangaro kan Jehova hin bulig nga maparig-on an imo gugma ha mga tawo basi diri ka mahadlok ha pagsangyaw ha ira.

10. Paonan-o kita ginbubuligan ni Jehova basi matuman an aton papel sugad nga iya mga Saksi? (Isaias 43:​10-12)

¹⁰ Ginpili kita ni Jehova nga magin iya mga Saksi, ngan nagsasaad hiya nga bubuligan kita nga magin maisugon. (Basaha an Isaias 43:​10-12.) Pansina an upat la han mga paagi nga ginbubuhat niya ito. Siyahan, kaupod naton hi Jesus hain man kita nagsasangyaw. (Mat. 28:​18-20) Ikaduha, nagtoka hi Jehova hin mga anghel basi buligan kita. (Pah. 14:6) Ikatulo, iginhatag ni Jehova ha aton an iya baraan nga espiritu sugad nga parabulig nga magpapahinumdom ha aton han mga butang nga aton nahibaroan. (Juan 14:​25, 26) Ikaupat, nagtagana hi Jehova hin kabugtoan nga magigin kaupod naton. Pinaagi han bulig ni Jehova ngan han suporta han aton mahigugmaon nga kabugtoan, may-ada kita han ngatanan nga ginkikinahanglan basi magin malampuson.

MAGIN MAPAUYON-UYON NGAN MAGKAADA HUSTO NGA PANHUNAHUNA

11. Ha ministeryo, ano an aton mahihimo basi mas damu nga tawo an aton makaistorya? (Kitaa liwat an piktyur.)

¹¹ Nawawara ba an imo kadasig kon gutiay la nga mga tawo an imo nakakaistorya ha mga balay? Kay ano nga diri mo pakianhan an imo kalugaringon: ‘Hain yana an mga tawo ha amon teritoryo?’ (Buh. 16:13) ‘Adto ba hira ha trabaho o nagsa-shopping?’ Kon ito an sitwasyon, puydi mo ba makaistorya an mas damu nga tawo ha pagsangyaw ha kalsada? An brother nga hi Joshua nagsiring, “Nagkaada ako hin mga oportunidad nga makasangyaw samtang naglalakat ha mga mall ngan ha mga panpubliko nga parkingan.” Hiya ngan an iya asawa nga hi Bridget, nakakasangyaw liwat hin mas damu nga tawo ha mga balay kon nabisita hira  temprano ha gab-i pati na ha Domingo nga kulop.—Efe. 5:​15, 16.

12. Paonan-o naton mahibabaroan kon ano an gintotoohan han mga tawo o an ira nababarak-an?

¹² Kon an mga tawo diri interesado ha mensahe, paningkamot nga mahibaroan kon ano an ira gintotoohan o ira ginkakabarak-an. Ginagamit nira Joshua ngan Bridget an pakiana nga aada ha kobre han usa nga tract sugad nga introduksyon. Pananglitan, kon ginagamit nira an tract nga Ano an Imo Panhunahuna ha Biblia? Nasiring hira: “An iba nga tawo naghuhunahuna nga an Biblia usa nga libro tikang ha Dios, an iba naman nagruruhaduha. Ikaw, ano an imo opinyon?” Agsob nga nagriresulta ini hin pakiistorya.

13. Kay ano nga makakasiring kita nga an aton ministeryo malampuson bisan kon an mga tawo diri namamati? (Proberbios 27:11)

¹³ An kalamposan han aton ministeryo diri nakadepende ha mga resulta han aton pagsangyaw. Kay ano? Kay ginbubuhat na naton an karuyag ni Jehova ngan han iya Anak nga buhaton naton—an pagpamatuod. (Buh. 10:42) Bisan kon waray kita nakakaistorya o waray namamati ha aton mensahe, mahimo kita magin malipayon kay maaram kita nga napapalipay naton an aton langitnon nga Amay.—Basaha an Proberbios 27:11.

14. Kay ano nga mahimo kita magin malipayon kon an iba nga magwarali makabiling hin interesado ha teritoryo?

¹⁴ Mahimo liwat kita magin malipayon kon an iba nga magwarali nakakabiling hin interesado ha teritoryo. An aton buruhaton iginpariho han An Barantayan ha pagbiling hin nawawara nga bata. Damu an nabulig pagbiling ha iya, ngan ginbibiling hiya ha ngatanan nga lugar. Kon nakita na an bata, an ngatanan may rason nga malipay, diri la an nakabiling ha iya. Ha pariho nga paagi, an panhimo hin disipulo nga buruhaton burubligay. An ngatanan kinahanglan bumulig ha pagkobre han teritoryo, ngan nalilipay an ngatanan kon may bag-ohan nga naatender ha mga katirok.

PAGPOKUS HA IMO GUGMA KAN JEHOVA NGAN HA IMO IGKASI-TAWO

15. Paonan-o an Mateo 22:​37-39 makakabulig ha aton nga madugangan an aton kadasig para ha ministeryo? (Kitaa liwat an piktyur.)

¹⁵ Mahimo madugangan an aton kadasig ha pagsangyaw nga buruhaton pinaagi ha pagpokus ha aton gugma kan Jehova ngan ha aton igkasi-tawo. (Basaha an Mateo 22:​37-39.) Hunahunaa  la an kalipay ni Jehova kon nakikita kita niya nga ginbubuhat ini nga buruhaton ngan kon ano kamalipayon an mga tawo kon nag-aaram na hira han Biblia! Hunahunaa liwat an katalwasan nga maieksperyensyahan hadton namamati han aton mensahe.—Juan 6:40; 1 Tim. 4:16.

16. Paonan-o kita mahimo magin malipayon ha aton ministeryo bisan kon aada na la kita ha aton balay? Paghatag hin mga ehemplo.

¹⁶ Aada ka na la ba ha iyo balay tungod han pipira nga rason? Kon oo, pagpokus ha kon ano an imo mahihimo ha pagpakita han imo gugma kan Jehova ngan ha imo igkasi-tawo. Ha panahon han COVID-19 nga pandemya, hira Samuel ngan Dania nakada na la ha ira balay. Hito nga makuri nga panahon, regular hira nga nagsasangyaw ha telepono, naghihimo hin mga surat, ngan nagdudumara hin mga pag-aram ha Biblia ha Zoom. Hi Samuel nagsasangyaw ha iya mga nakikilala ha clinic diin hiya nagpapatambal han kanser. Hiya nagsiring: “Kon naatubang kita hin makuri nga mga sitwasyon, bangin kita mabaraka ngan makapoy, ngan matestingan an aton pagtoo. Dapat kami maningkamot nga magin malipayon ha amon pag-alagad kan Jehova.” Hito nga panahon, nagkasakit hi Dania ngan naghinigda na la ha sulod hin tulo ka bulan. Katapos, kinahanglan niya mag-wheelchair ha sulod hin unom ka bulan. Siring niya: “Naningkamot gud ako nga buhaton an ngatanan nga igintutugot han akon kahimtang. Nakasangyaw ako ha usa nga nars nga nabisita, ngan nakakaistorya ko an mga nagdi-deliver ha balay. Nagkaada liwat ako mag-opay nga pakiistorya pinaagi ha telepono ha usa babaye ha medical company.” Tungod han kahimtang nira Samuel ngan Dania, nalimitahan an ira buruhaton. Pero ginbuhat nira an ira mahihimo ngan nagin malipayon hira.

17. Paonan-o ka mas makakapahimulos ha mga suhestyon hini nga artikulo?

¹⁷ An mga suhestyon hini nga artikulo magigin mapulsanon gud la kon iaaplikar ito ngatanan. An tagsa nga suhestyon maipapariho ha ingredient nga ginagamit ha usa nga recipe. Kon an ngatanan nga ingredient ha recipe pagtarampuhon magkakaada ka marasa nga pagkaon. Pinaagi ha pag-aplikar han ngatanan nga suhestyon magigin mas andam kita pag-atubang ha negatibo nga mga pag-abat ngan magigin mas malipayon ha ministeryo.