ALATIKE AKO 16
KATIKO 64 Tou Kau Fakafiafia Ki Te Taʼukai
Ke Lahi Age Tou Fiafia ʼi Te Faifakamafola
“Kotou tauhi fakafiafia kia Sehova.”—PES. 100:2.
TE MANATU TAFITO
ʼE vakaʼi ʼi te alatike ʼaeni he ʼu faʼahi ʼe feala ke tou fai ke tou fiafia lahi age ʼi te faifakamafola.
1. ʼE feafeaʼi ʼihi moka tonu ke natou palalau ki te hahaʼi ʼi te faifakamafola? (Vakaʼi mo te pāki.)
KO TATOU ʼae ʼe tauhi kia Sehova, tatatou Tamai ʼae ʼi selo, ʼe tou faifakamafola he ʼe tou ʼoʼofa ia te ia pea ʼe tou fia tokoni ki totatou tatau ke ina iloʼi ia Sehova. Tokolahi ʼi te kau faifakamafola ʼe natou fiafia ʼi te fai ʼo te gaue ʼaia. Kae ki ʼihi, ʼe faigataʼa hanatou fiafia. Kotea tona tupuʼaga? ʼE lagi natou umiuminoa peʼe natou manatu ʼe mole natou faʼa popoto lelei ʼi te akoʼi ʼo te hahaʼi. ʼE lagi mole leleiʼia e ʼihi te olo feia ki he ʼapi ʼo he tahi kae neʼe mole fakaafe natou. ʼE matataku ʼihi naʼa mole tali leleiʼi natou. Pea neʼe akoʼi ki ʼihi ke ʼaua naʼa fihi mo te hahaʼi. Logo la ʼe ʼoʼofa te ʼu tehina mo tuagaʼane ʼaia ia Sehova, kae ʼe faigataʼa kia natou hanatou palalau mo ni hahaʼi ʼe mole natou feiloʼiʼaki. Kae logo la te faʼahi ʼaia, ʼe natou kau tuʼumaʼu ki te faifakamafola he ʼe natou iloʼi tona maʼuhiga. ʼE mahino ia ʼe fiafia lahi ia Sehova kia natou!
2. He koʼe ʼe mole tonu ke ke lotovaivai moka ʼe faigataʼa hau fiafia ʼi te faifakamafola?
2 ʼE faigataʼa koa hau maʼu te fiafia ʼi te faifakamafola ʼuhi ko te ʼu faʼahi ʼae neʼe tou palalau ki ai? Kapau koia, ʼaua naʼa ke lotovaivai. Kapau ʼe kei ke tuʼania, ʼe ha ai tau agavaivai, he ʼe mole ke loto ke tokagaʼi koe. ʼE toe ha ai tau mole loto ke ke fihi mo te hahaʼi. Pea ʼe moʼoni, ʼe mole tou leleiʼia moka fakatalitali koviʼi tatou, tafito la moka ʼe tou fia tokoni ki te hahaʼi. ʼE iloʼi lelei e tau Tamai ʼae ʼi selo te meʼa ʼae ʼe ke logoʼi, pea ʼe ina fia foaki atu te tokoni ʼae ʼe ʼaoga atu. (Esa. 41:13) ʼI te alatike ʼaeni, ʼe tou vakaʼi anai faʼahi ʼe nima ʼe feala ke tou fai ke tou tauʼi te ʼu meʼa ʼaia ʼe tou logoʼi pea ke tou fiafia lahi age ʼi te faifakamafola.
KE KE LILIU ʼO MALOHI ʼAKI TE FOLAFOLA ʼA TE ʼATUA
3. Kotea ʼae neʼe tokoni ki te polofeta ko Selemia ke lotomalohi ʼo faifakamafola?
3 ʼI te temi muʼa, moka neʼe foaki e Sehova he gaue faigataʼa ki ʼana kaugana mo ina kole age ke natou tala he logo, neʼe natou malolohi ʼuhi ko te logo ʼaia. Tou vakaʼi te faʼifaʼitaki ʼo te polofeta ko Selemia. ʼI te kole age e Sehova ke alu ʼo faifakamafola, kia ia neʼe mole ina lavaʼi. Neʼe ina ui fenei: “ ʼE mole au poto ʼi te palalau ki te hahaʼi, he ʼe kei au tamasiʼi.” (Sel. 1:6) Kotea ʼae neʼe tokoni kia ia ke lotomalohi ʼo faifakamafola? Neʼe malohi ʼuhi ko te folafola ʼa te ʼAtua. Neʼe ui fenei e Selemia: “Neʼe liliu tana folafola ʼi toku loto ohage ko he afi kakaha, neʼe hage ko he afi kakaha ʼi ʼoku hui, pea neʼe mole kei lava hona taʼofi.” (Sel. 20:8, 9) Logo la te mole fia logo ʼa te hahaʼi, kae neʼe malohi ia Selemia ʼo faifakamafola ʼaki te logo ʼaia mai te ʼAtua.
4. Kotea ʼae ʼe hoko moka tou lau mo metitasio ki te Folafola ʼa te ʼAtua? (Kolose 1:9, 10)
4 ʼE maʼu e te kau Kilisitiano te malohi mai te logo ʼae ʼe tuʼu ʼi te Folafola ʼa te ʼAtua. ʼI te faitohi ʼa te apositolo ko Paulo ki te kokelekasio ʼo Kolose, neʼe ina ui ai, kapau ʼe maʼu ʼe ʼona tehina te ʼatamai malama totonu, pea ʼe uga ai natou ke natou “fai te ʼu meʼa ʼae ʼe tuha mo natou ʼae ʼe atolasio kia Sehova” pea mo hoko atu tanatou fai “te ʼu gaue lelei fuli.” (Lau ia Kolose 1:9, 10.) ʼE kau ki te ʼu gaue lelei ʼaia te fakamafola ʼo te logo lelei. Koia ka tou lau mo metitasio ki te Folafola ʼa te ʼAtua, ʼe malohi ai tatatou tui kia Sehova pea ʼe tou mahino lelei age ai ki te maʼuhiga ʼo te tala ʼo te logo ʼo te Puleʼaga.
5. Kotea ʼae ka tou fai ke tou maʼu he ʼu fua lelei mai tatatou lau mo ako ia te Tohi-Tapu?
5 Ke tou maʼu moʼoni he ʼu fua lelei mai te Folafola ʼa te ʼAtua, ʼe tou toʼo anai he temi moʼo lau, mo ako pea mo metitasio. ʼAua naʼa ke fai fakavilivili te ʼu faʼahi ʼaia. Ka faigataʼa hau mahino ki he vaega Tohi-Tapu neʼe ke lau, ʼaua naʼa ke fakalaka ai. Kae fai hau ʼu fekumi ʼi te Kumiʼaga Tohi ʼa Te Kau Fakamoʼoni ʼa Sehova ke ke maʼu he fakamahino ʼo ʼuhiga mo te vaega ʼaia. Kapau ʼe ke toʼo hou temi feʼauga moka ke ako, ʼe malohi ai anai tau tui ʼae ko te Folafola ʼa te ʼAtua ʼe moʼoni. (1 Tes. 5:21) Ka toe malohi age tau tui, pea ʼe toe lahi age tau fia palalau ki ʼihi ʼo ʼuhiga mo te ʼu meʼa ʼae neʼe ke ako.
TEUTEU LELEI ʼI MUʼA ʼO TAU ALU ʼO FAIFAKAMAFOLA
6. He koʼe ʼe tonu ke tou teuteu lelei ʼi muʼa ʼo tatatou olo ʼo faifakamafola?
6 Kapau ʼe ke teuteu lelei ʼi muʼa ʼo tau alu ʼo faifakamafola, ʼe mole ke tuʼania anai ʼi te palalau ki te hahaʼi. Neʼe tokoni ia Sesu ki ʼana tisipulo ke natou teuteu lelei ʼi muʼa ʼo tanatou olo ʼo faifakamafola. (Luka 10:1-11) Pea ʼi tanatou mulimuli ki te ʼu meʼa ʼae neʼe ui age e Sesu, neʼe natou fiafia lahi ʼi te ʼu gaue ʼae neʼe natou lava fakahoko.—Luka 10:17.
7. ʼE feafeaʼi hatatou teuteu lelei ʼi muʼa ʼo tatatou olo ʼo faifakamafola? (Vakaʼi mo te pāki.)
7 ʼE feafeaʼi hatatou teuteu lelei? ʼE feala ke tou fakakaukauʼi he faʼahi ʼe tou fia palalau ki ai, pea ʼe feafeaʼi hatatou vaevae mo he tahi ka tou felaveʼi anai mo ia. ʼE tou toe fakakaukauʼi anai he ʼu palalau ʼe feala ke fai mai e te hahaʼi pea mo feafeaʼi hatatou tali ki ai. Pea ka tou palalau ki te hahaʼi, ʼe tou faiga ke tou malimali pea mo aga fakakaumeʼa mo natou.
8. He koʼe neʼe fakata e te apositolo ko Paulo te kau Kilisitiano ki ni ipu kele?
8 Neʼe fakaʼaogaʼi e te apositolo ko Paulo he fakata moʼo palalau ki tatatou kau ki te gaue faifakamafola. Neʼe ina ui fenei: “ ʼE matou maʼu te koloa ʼaia ʼi he ʼu ipu kele.” (2 Ko. 4:7) Kotea te koloa ʼaia? ʼE ko te fakamafola ʼo te logo ʼo te Puleʼaga, ʼae ʼe haofaki ai te maʼuli. (2 Ko. 4:1) Pea ko ai te ʼu ipu kele? ʼE ko te ʼu kaugana ʼa te ʼAtua ʼae ʼe natou tala te logo lelei ki ʼanatou tatau. ʼI te temi ʼo Paulo, neʼe fakaʼaogaʼi e te kau faifakatau koloa ni ipu kele moʼo fafaʼo ki ai ni meʼa maʼuhiga, ohage la ko te meʼa kai, mo te vino pea mo te paʼaga. ʼO toe feia pe, neʼe foaki mai e Sehova he logo maʼuhiga, ʼae ko te logo lelei. ʼAki tana tokoni, ʼe tou maʼu ai te malohi ʼae ʼe ʼaoga moʼo hoko atu tatatou tala te logo ʼaia ki te hahaʼi.
FAIKOLE KE KE MAʼU TE LOTOTOʼA
9. ʼE feafeaʼi hatatou tauʼi tatatou mataku ʼae naʼa mole tali leleiʼi tatou e te hahaʼi? (Vakaʼi mo te pāki.)
9 ʼE feala pe ʼi ʼihi temi ke tou matataku naʼa mole tali leleiʼi tatou e te hahaʼi. ʼE feafeaʼi tatatou tauʼi te mataku ʼaia? Tokagaʼi te faikole ʼae neʼe fai e te kau apositolo ʼi te fakatotonu age ʼae ke tuku tanatou faifakamafola. Neʼe mole natou matataku pea neʼe mole tuku tanatou faifakamafola. Kae neʼe natou kole kia Sehova ke tokoni age “ke natou haga palalau ki [tana] folafola ʼaki he lototoʼa.” Pea neʼe tali atu aipe e Sehova ia tanatou faikole. (Gaue 4:18, 29, 31) Kapau ʼi ʼihi temi ʼe tou tuʼania ai, tou toe kole mo tatou ke tokoni mai ia Sehova. Kole kia Sehova ke ina fakamalohiʼi tou ʼofa ki te hahaʼi ke mole ke mataku ai ʼi te tala kia natou te logo lelei.
10. ʼE tokoni feafeaʼi mai ia Sehova ke tou liliu ko hana ʼu Fakamoʼoni? (Esaia 43:10-12)
10 Neʼe filifili tatou e Sehova ko ʼana Fakamoʼoni, pea ʼe ina fakapapau mai ʼe tokoni mai anai ke tou lototoʼa. (Lau ia Esaia 43:10-12.) Tou vakaʼi aluʼaga ʼe fa ʼe ina foaki mai ai te lototoʼa. ʼUluaki ʼe nofo ia Sesu mo tatou moka tou fakamafola te logo lelei. (Mat. 28:18-20) Lua, neʼe hinoʼi e Sehova ni kau ʼaselo ke natou tokoni mai kia tatou. (Fkha. 14:6) Tolu, ʼe ina foaki mai tona laumalie maʼoniʼoni ohage ko he tokoni, ke ina fakamanatuʼi mai te ʼu meʼa ʼae neʼe tou ako. (Soa. 14:25, 26) Fa, ʼe foaki mai e Sehova te ʼu tehina mo tuagaʼane ke tou kauga gaue. Koia, ʼaki te tokoni ʼa Sehova pea mo ʼae ʼo totatou famili fakalaumalie fonu ʼi te ʼofa, ʼe tou maʼu ai ia meʼa fuli ke tou lototoʼa pea mo hoko atu te faifakamafola.
MULIMULI KI TE ALUʼAGA ʼO TE HAHAʼI MO KE TAUPAU HE MANATU ʼE LELEI
11. Kotea ʼae ʼe ke lava fai ke ke felaveʼi ai mo ni hahaʼi moka ke faifakamafola? (Vakaʼi mo te pāki.)
11 ʼE ke lotovaivai koa he ʼe mole lahi ni hahaʼi ʼe ke maʼu atu ʼi ʼonatou ʼapi? ʼE lelei ke ke fai te fehuʼi ʼaeni: “ ʼE ʼifea koa te hahaʼi ʼi te hola ʼaeni?” (Gaue 16:13) “ ʼE natou gaue koa peʼe kua olo koa ʼo faifakatau?” Kapau ko ia, ʼe lagi ke felaveʼi anai mo ni hahaʼi mo kapau ʼe ke faifagonogono faigamalie ʼi te ala. ʼE ui e te tehina ko Joshua: “ ʼE lahi te ʼu faigamalie ke au faifakamafola ai moka au alu ʼo haʼele ʼi te ʼu fale koloa pea mo te ʼu koga meʼa ʼae ʼe hahaʼi ai.” Pea ko ia mo tona ʼohoana ko Bridget ʼe lahi age tanā maʼu ni hahaʼi moka nā faifakamafola ʼi te ʼu afiafi mo te ʼu ʼAhotapu hili hoʼata.—Efe. 5:15, 16.
12. ʼE feafeaʼi hatatou iloʼi te meʼa ʼae ʼe tui ki ai te hahaʼi peʼe ko te ʼu faʼahi ʼae ʼe natou tuʼania ki ai?
12 Kapau ʼe mole fia logo te hahaʼi ki te logo lelei, faiga ke ke iloʼi pe kotea ʼae ʼe natou tui ki ai peʼe ko ʼanatou tuʼania. Moʼo kamata he faipalalau, ʼe fakaʼaogaʼi e Joshua mo Briget ia te fehuʼi ʼae ʼe tuʼu ʼi he pepa lotu. Ohage la, ka nā fakaʼaogaʼi te pepa lotu Kotea Takotou Manatu ʼo ʼUhiga Mo Te Tohi-Tapu? ʼe nā ui fenei ki he tahi: “ ʼE manatu ʼihi ko te Tohi-Tapu ko he tohi mai te ʼAtua, kae mole manatu feia e ʼihi atu. Kae kotea la tau manatu ki ai?” ʼI te agamahani, ʼe hoko ai he faipalalau.
13. He koʼe ʼe tou fiafia tatau aipe pe mole fia logo mai te hahaʼi? (Taʼaga Lea 27:11)
13 Tatau aipe pe mole fia logo mai te hahaʼi, kae ʼe tou fiafia pe ʼi tatatou fakahoko tatatou gaue. Kotea tona tupuʼaga? He ʼe tou fakahoko te gaue ʼae ʼe kole mai e Sehova mo tona ʼAlo ke tou fai, ia te faifakamafola. (Gaue 10:42) Maʼia pe mole tou maʼu he tahi ke tou palalau mo ia peʼe mole fia logo te hahaʼi ki ai, kae ʼe tou fiafia pe tatou he ʼe tou iloʼi ʼe tou fakafiafiaʼi tatatou Tamai ʼae ʼi selo.—Lau ia Taʼaga Lea 27:11.
14. He koʼe ʼe tou toe fiafia moka maʼu e he tehina peʼe ko he tuagaʼane he tahi ʼe ina fia iloʼi te moʼoni?
14 ʼE feala hatatou toe fiafia moka maʼu e he tehina peʼe ko he tuagaʼane he tahi ʼe ina fia iloʼi te moʼoni. ʼE fakatatau ʼi Te Tule Leʼo ia te gaue faifakamafola ki te kumi ʼo he kiʼi tamasiʼi. Tokolahi ʼe natou kau ki ai, ʼo natou olo ki te potu fuli. Pea ka maʼu te kiʼi tamasiʼi, ʼe natou fiafia fuli, kae mole gata pe kia ia ʼae neʼe ina maʼu. ʼO feia pe, ʼe tou tokoni fuli ki te gaue ʼae ko te fai ʼo ni tisipulo. ʼE tou kau fuli ki te faifakamafola, ʼo tou palalau ki te hahaʼi ʼo te telituale, pea ʼe tou fiafia fuli moka kamata kau he tahi ki ʼatatou fono.
KE KE ʼOFA TAFITO KIA SEHOVA PEA MO TOU TATAU
15. ʼE tokoni feafeaʼi mai ia Mateo 22:37-39 ke lahi age totatou fiafia ʼi te faifakamafola? (Vakaʼi mo te pāki.)
15 ʼE lahi age totatou fiafia ʼi te faifakamafola moka tou ʼofa tafito kia Sehova pea mo totatou tatau. (Lau ia Mateo 22:37-39.) Fakakaukauʼi age muʼa te toe fiafia lahi ʼa Sehova ʼi tana sio mai ʼae ʼe tou fakahoko te gaue pea mo te fiafia ʼa te hahaʼi moka natou kamata ako te Tohi-Tapu. Pea ke tou toe manatuʼi foki ko natou ʼae ʼe fakalogo ki tatatou logo pea mo filifili ke natou tauhi kia Sehova, ʼe feala ke natou maʼu te maʼuli heʼe gata.—Soa. 6:40; 1 Tim. 4:16.
16. Ka tou nofo punupunu ʼi totatou loto fale, ʼe feafeaʼi hatatou maʼu te fiafia ʼi te faifakamafola? Tuku mai he faʼifaʼitaki.
16 ʼE ke nofo punupunu koa ʼi tou ʼapi? Kapau ko ia, tokagaʼi tafito te meʼa ʼae ʼe feala ke ke fai moʼo fakaha tou ʼofa kia Sehova pea mo tou tatau. Lolotoga te taʼi mahaki COVID-19, neʼe nofo punupunu ia Samuel mo Dania ʼi tonā ʼapi. ʼI te temi faigataʼa ʼaia, neʼe nā kau tuʼumaʼu ki te faifakamafola ʼaki te telefoni, mo te faitohi pea neʼe nā fai tanā ʼu ako ʼi te Neti. Pea neʼe faifakamafola ia Samuel ki te hahaʼi ʼae neʼe felaveʼi mo ia ʼi te fale mahaki ʼae neʼe faitoʼo ai ʼuhi ko tona kosea. ʼE ina ui fenei: “Moka tou tau mo ni aluʼaga faigataʼa ʼe feala ke tou tuʼania ʼaupito, mo gaʼegaʼe, pea ʼe ʼahiʼahiʼi ai tatatou tui. Koia, ʼe tonu ai ke tou maʼu te fiafia ʼi tatatou tauhi ʼae kia Sehova.” Pea ko Dania neʼe toka, ʼo maʼua ai ke takoto ia mahina ʼe tolu. Hili ki ai, neʼe heka ʼi tona saliote ia mahina ʼe ono. ʼE ina ui: “Neʼe au faiga ke au fai ia meʼa fuli ʼae ʼe au lavaʼi ʼo mulimuli ki toku aluʼaga. Neʼe au faifakamafola ki he fafine afilimie neʼe haʼu ki fale, pea kia natou ʼae neʼe ʼomai ʼo tuku mai ni meʼa neʼe ʼaoga kia maua. Neʼe au toe faipalalau ʼi te telefoni mo he fafine ʼe gaue ʼi he fale ʼe fakatau ai te ʼu faitoʼo.” Logo la neʼe mole kei lahi te ʼu gaue neʼe lava fai e Samuel mo Dania ohage ko te temi muʼa, kae neʼe nā fai pe te meʼa ʼae neʼe nā lavaʼi pea neʼe nā fiafia ai.
17. Kotea ʼae ʼe tonu ke tou fai ke fua lelei kia tatou te ʼu tokoni ʼae neʼe tuku mai ʼi te alatike ʼaeni?
17 Faiga ʼo mulimuli ki te ʼu tokoni ʼe nima ʼae neʼe tuku atu ʼi te alatike ʼaeni. ʼE hage pe ko te ʼu meʼa ʼae ʼe fakaʼaogaʼi moʼo teuteu ʼaki he meʼa kai. Ka tou fakatahiʼi fuli te ʼu meʼa ʼaia, pea ʼe kano lelei anai te meʼa kai. ʼO toe feia aipe, ka tou mulimuli ki te ʼu tokoni fuli ʼaia, pea ʼe feala anai ke tou tauʼi te ʼu manatu fakalotovaivai pea ke toe lahi age totatou fiafia ʼi te faifakamafola.
ʼE TOKONI FEAFEAʼI ATU KE LAHI AGE TOU FIAFIA ʼI TE FAIFAKAMAFOLA MOKA
-
ke teuteu lelei ʼi muʼa ʼo tau faifakamafola?
-
ke faikole ke ke maʼu te lototoʼa?
-
ke ʼofa tafito kia Sehova mo tou tatau?
KATIKO 80 “ ʼAhiʼahi Pea Mo Vakaʼi Ko Sehova ʼe Agalelei”