1. მუშენ უჭირს ნამთინეს ხიოლით ქადაგება? (ქოძირით სურათ).

 ᲩᲥᲘ მთელ მსოფლიოს ფქადაგენთ სახიოლო ამბეს, მუშენდა მიჸორა ზეციერ მუმა დო მოკონა, არძას გუვოჩინებაფუათ თინა. ბრელშა მანგარ დიდ ხიოლ მოუღ ქადაგებას, მარა ნამთინეს უჭირს, ხიოლ ქოძირას თე საქმეს. მუ შილებე რდასჷ თეშ მიზეზ? ნამთინე ჩქინ და დო ჯიმა მანგარ მორდებუან რე დო ფიქრენს, ნამდა შხვეფშა ჯგირო ვეგნაჩინე ორაგადე. ნამთინეშო მანგარ ძნელ რე, უჩინებ კოჩის ჸუდეს ქადირთას დო მუდგარენშე ეჩუას. ნამთინე თის ნერვიანენს, მუშ მეულათ მიდგაინ ვა გაღიზიანას. ნამთინე ხოლო თეშ რე რდილ, ნამდა ირნერო ურიდანს დუდის შხვეფწკუმა უთანხმოებეფს, ათეშენ უჭირს მსახურება, მუშენდა ოშქურ, მიდგაინქ ბიბლიურ საკითხეფშე ნირზ ვა დუჭყას. მართალ რე, თე ძვირფას და დო ჯიმალეფს მანგარო უჸორა იეჰოვა, მარა უჭირა უჩინებუეფწკუმა სახიოლო ამბეშენ ჩიება. თეშ უმკუჯინუო, იშენით დუდის უნძალა დო ქადაგენა, მუშენდა არჩქილენა, მუსხით მნიშვნელოვან რე თე საქმე. წერმიდგინით, მუჭო უხარენს გურს იეჰოვას თეშ ძირაფა!

2. ხიოლით ქადაგება ქოიჭირან-და, მუშენ ოკო ვეგიტახათ გურ?

² თქვა ხოლო ხომ ვა გინაფლენთ მინშა თაშ დუდის დო ხომ ვაიჭირა ხიოლით ქადაგება? თაშ ქორენ-და, გურქ ვა გოიტირხან! ჯგირ მაქადაგებელ ვა რეთინ ქოფიქრენთ-და, თენა ნიშნენს, ნამდა თანდაბალ რეთჷ დო ვა გოკონა, ყურადღებაშ ცენტრის რდათჷ. თინა ხოლო ვა რე გლახა, ნამდა შხვეფწკუმა ნირზ ვა გოკონა. ვართ თინა რე გასაკვირ, ვა გოკოდან, მიდგაინ გაღიზიანათ, მუშენდა თქვან მიზან თენა ვარინ, თინეფშა ჯგირ ამბეშ მეღალა რე. რჯერდან, იეჰოვას ჯგირო  არჩქილე, მუს გინაფლენთ დო მთელ გურით ოკო, ქიმგეხვარან (ეს. 41:13). თე სტატიას გუვარჩიენთ ხუთ რჩევას, მუჭო გივორჯგინათ ჟიშე გიმოკოროცხილ სირთულეეფს დო მუ მიმეხვარებუნა, ხიოლით იფქადაგათ.

ᲦᲝᲠᲝᲜᲗᲘᲨ ᲡᲘᲢᲧᲕᲐᲗ ᲒᲔᲛᲐᲜᲒᲐᲠᲘᲗ

3. მუქ მეხვარ წინასწარმეტყველ იერემიას, შხვეფს უქადაგუკო?

³ ღორონთიშ სიტყვა ულირს ხოლო ამანგარენდჷ იეჰოვაშ მსახურეფს, მუჟამსით უჭირდეს მეღებულ დავალებაშ შესრულება. მაგალთო, მუჟამსით იეჰოვაქ იერემიას ქადაგება დავალ, დუდშე წინასწარმეტყველ ფიქრენდჷ, ნამდა ვეგშალედ თე საქმე, ათეშენ ვარიას იჩიებუდ. თიქ იეჰოვას უწუ: „მუჭო იფჩუა?! დიო ხოლო ბაღანა ბოშ ვორექ“ (იერ. 1:6). მუქ მეხვარ თის, გაბედულო იქადაგუკო? თინა იეჰოვაშ სიტყვაქ გამანგარ. დეკვირით, მუ თქუ იერემიაქ: „ძვალეფს ხვილირ დაჩხირცალო ქუმმანტუ თიქ გურს; ქიმვოშურდჷ თიშ ალახვილუას“ (იერ. 20:8, 9). მართალ რე, იერემიას ბრელ ვა ურჩქილედ, მარა ცნობა, ნამდგაშ გაცხადებაქ თის დევალ, არზენდჷ ძალეფს თე საქმეშ გაგრძელებერო.

4. მუ შედეგ მოჸუნს, მუჟამსით ბკითხულენთ დო ფიფქრენთ ღორონთიშ სიტყვაშე? (კოლ. 1:9, 10).

⁴ ღორონთიშ სიტყვას ჩქინ გამანგარება ხოლო შეულებ. კოლოსელეფშა მეჭარილ წერილს პავლე მოციქულქ თქუ, ნამდა იეჰოვაშ გურშენ საფუძვლიან რჩქინა მეხვარებუდ და დო ჯიმალეფს, ირნერ ჯგირ საქმეს ნაყოფ გემკიღესკო დო თეშნერო, იეჰოვაშ ღირსო იცხოვრესკო (წეკითხით კოლოსელეფიშ 1:9, 10). პავლეშ მოშინაფილ ჯგირ საქმეშა სახიოლო ამბეშ ქადაგება ხოლო მიშურს. თაშ ნამდა, ღორონთიშ სიტყვაშ კითხირ დო თიშე ფიქრ მიმანგარენა იეჰოვაშ მიმართ რწმენას დო უჯგუშო მოძირანა, მუშენ რე მნიშვნელოვან ქადაგება.

5. მუ ოკო ვაკეთათ, ნამდა ღორონთიშ სიტყვაქ გუმამანგარან?

⁵ ღორონთიშ სიტყვაქ გუმამანგარანინ, გინორულერო ოკო ვებკითხათ თინა, გურგედვალირო ოკო გეგმიბრკვიათ დო დეფიფქრათ. ბრელ დროქ დეგესაჭირანინ ხოლო, მიკოსურებულო ვაკეთათ თენა. ნამდგაინ ბიბლიურ მუხლიშ გაგებაქ გაიჭირდეს-და, უცფას ვეგნორთათ შხვაშა. თეშ მანგიორო, გეგმირინეთ „გინაჯინალ კოშკიშ პუბლიკაციეფიშ საძიებელ“ ვარდა „იეჰოვაშ მოწმეეფიშ ორკვიებელ სახემძღვანელო“ დო ქოძირით, მუჭო რე ენწყუმილ თე მუხლ. ღორონთიშ სიტყვაშ გიმორკვიებას დროს გეგმურთუნთ-და, უმოსო დერწმუნებუთ, ნამდა თინა ჭეშმარიტება რე, დო მუთ უმოს დარწმუნებულ იჸით თეშა, თით უმოს ხიოლით გეგნოჩანთ შხვეფს ნაგურეფუს (1 თეს. 5:21).

 ᲯᲒᲘᲠᲝ ᲛᲔᲛᲖᲐᲓᲘᲗ

6. მუშენ ოკო მივემზადათ ჯგირო მსახურებაშო?

⁶ მსახურებაშო წინასწარ მემზადებუთ-და, ბრელს ვენერვიანენთ დო უმოს თავისფალო ქეჩიებუთ შხვეფს. იესოქ მამზად მუშ მოწაფეეფ, ონდო ოქადაგებშა გუტენდჷ (ლუკ. 10:1—11). თინეფქ გეგმირინუეს იესოშე ნაგურეფ, მუდგაშ ჭყოლოფათ შეიალებუეს ჯგირო შეასრულესკო მუნეფიშ დავალება დო მსახურებაშე გახარებულეფქ დირთეს (ლუკ. 10:17).

7. მუჭო მივემზადათ მსახურებაშო? (ქოძირით სურათ).

⁷ მუჭო მივემზადათ მსახურებაშო? ოკო დეფიფქრათ, მუშ რაგად მოკონა პიროვნებაშა დო მუჭო გინოფჩათ ორაგადე ჯგირო ჩქინ სიტყვეფით. ჯგირ იჸუაფ, დეფიფქრათ მუსხირენ ვარიანტშე ხოლო, მუ შილებე მიწუან ჩქინ ტერიტორიას მახორუეფქ დო ჩქი მუჭო უპასუხენთ თითოულ შემთხვევას. თეშ უკულ ოკო ვეცადათ, გოძიცებულო, გემუანო დო თავისფალო ვეჩუათ.

8. მუ გაგებათ მოგენა ქრისტიანეფ „თიხაშ ჭკუდის“?

⁸ პავლე მოციქულქ კორინთელ და დო ჯიმალეფს მეჭარ: „თე განძ ჩქი თიხაშ ჭკუდის მიღუნა“ (2 კორ. 4:7). მუ რე განძ, ნამდგაშეთ პავლე იჩიებუდ? თენა რე სახიოლო ამბეშ ქადაგებაშ საქმე, ნამდგას რსხება მოუღ ხალხშა (2 კორ. 4:1). მუ იგულისხმებ „თიხაშ ჭკუდის“? ღორონთიშ მსახურეფ, მით შხვეფს უცხადენა სამეფოშ ცნობას. პავლეშ დროს ვაჭარეფ თიხაშ ჭკუდის თიცალ მნიშვნელოვან მუდგარენეფიშ გინაღალარო ირინუანდეს, მუნერით რდჷ ოჭკუმალ, ღვინ დო ფარა. თეშნერო, იეჰოვაქ ჩქი ხოლო მუმანდეს ძვირფას ცნობაშ გაცხადება, დო თიშ მოხვარათ ირიათო მაღვენუნა ძალეფ, ნამდა ართგურო გუვაგრძელათ თე ცნობაშ გაცხადება.

ᲘᲚᲝᲪᲘᲗ ᲒᲐᲑᲔᲓᲣᲚᲔᲑᲐᲨᲝ

9. მუ მიმეხვარებუნა, გივორჯგინათ კოჩიშ შიშის? (ქოძირით სურათ).

⁹ მინშა შილებე კოჩიშ შიშიქ გებჭოფან. მუ მიმეხვარებუნა, გივორჯგინათ თე სირთულეს? გუვარჩუათ, მუ აკეთეს მოციქულეფქ, მუჟამსით ქადაგება უვარიეს. თინეფქ ვეიაჸუნეს შიშის დო ვემუტებუნა ქადაგება. თეშ მანგიორო, ლოცვას იეჰოვას თხუეს, ქიმეხვარუკო, გაბედულო ქიჩუესკო თიშ სიტყვა. ღორონთიქ ხეთეშე ქუპასუხ თინეფიშ ლოცვას (საქ. 4:18, 29, 31). კოჩიშ შიშიშ გურშენ მინშა ქადაგება ქომჭირან-და, ჩქი ხოლო მოციქულეფცალო ოკო მიფქცუათ — ლოცვას ქოფთხუათ იეჰოვას, ქიმმეხვარან, ადამიანეფიშ ჸოროფათ გივორჯგინათ შიშის.

10. მუჭო მოხვარუნა იეჰოვა, დუვამოწმათ თიშ გურშენ? (ეს. 43:10—12).

 ¹⁰ იეჰოვაქ მუშ მოწმეეფო გიშაბგორეს დო მოპირუნა, ნამდა ქიმმეხვარებუნა, მიღუდან გაბედულება (წეკითხით ესაიაშ 43:10—12). გუვარჩუათ ოთხ საშვალება, მუდგათ იეჰოვა ასრულენს თე დუნაპირებუს. პირველ, თინა იესოშ საშვალებათ მოხვარუნა. სოდგა ვა ფქადაგენდათინ, ღორონთიშ სქუა ირო ჩქინწკუმა რე (მათ. 28:18—20). მაჟია, იეჰოვას ანგელოზეფ აფჷ გერნაფილ ჩქინ მახვარებელო (გამოცხ. 14:6). მასმა, თინა მარზენა წმინდა შურს, ნამუთ საჭირო დროს გუმოშინანა თი აზრეფს, მუთ ღორონთიშ სიტყვაშე დიბგურეთ (იოან. 14:25, 26). დო მანთხა, პჸუნა და დო ჯიმალეფ, მიდგაწკუმა ართო ფქადაგენთ სახიოლო ამბეს. იეჰოვაშ მოხვარათ დო და დო ჯიმალეფიშ ელარნათ, მართალო მუთუნ ვა მორკუნა, ნამდა ვორდათ გაბედულეფ დო ვემვოტუათ ქადაგება.

ᲥᲣᲓᲣᲮᲣᲯᲔᲗ ᲡᲘᲢᲣᲐᲪᲘᲐᲡ ᲓᲝ ᲒᲘᲦᲣᲓᲐᲜ ᲡᲬᲝᲠ ᲒᲐᲜᲬᲧᲝᲑᲐ

11. მუ ოკო ვაკეთათ, ქადაგებაშ დროს უმოს ადამიანს ქეშეფხვადათინ? (ქოძირით სურათ).

¹¹ გურ ხომ ვაიტირხუნა, მუჟამსით ქადაგებაშ დროს ბრელ ვარხვადუნა? ჯგირ იჸუაფ, ჩქინ დუდის ქობკითხათ: სო შილებე რდასჷ ჩქიმ უბანს მახორუ ხალხ თეცალ დროს? (საქ. 16:13). ხომ ვა მუშენა ვარდა ოჸიდირალეფშა ხომ ვა რენა ულირ? თაშ ქორენ-და, შილებე ქუჩას ქადაგებაშ დროს უმოსო ქეშეხვადათ ხალხის. ართ ჯიმა, ჯოშუა იჩიებ: „უმოს ადამიანწკუმა ქადაგებაშ საშვალებაქ მუმაჩ სავაჭრო ცენტრეფს დო ბრელ ხალხ იშაყარუნ ფერ ადგილეფს გილულაშ დროს“. თე ჯიმაშო დო მუშ მეუღლე ბრიჯიტშო უბანს ქადაგებაქ უმოს შედეგიანქ იჸუ, მუჟამსით ხალხის ონჯუა პერიოდის ვარდა ჟეშხა ნაონდღერს აკითხანდეს (ეფეს. 5:15, 16).

12. მუჭო შემლებუნა გებგათ, მუ წანსჷ ვარდა მუ აწუხენს ხალხის?

¹² მუჟამსით ბრელ გირაგადუნა, ნამდა ვაინტერეს, მუდგას თქვა იჩიებუთ, ქეცადით, ქიგეგათ, მუ წანა თინეფს დო მუ აწუხენა. ჯოშუა დო ბრიჯიტ ხშირას ირინუანა ბუკლეტის გალე გეჭარუნ თი კითხვას. მაგალთო, მუჟამსით ოკონა, მიარზუან ბუკლეტ „მუ რე თქვანო ბიბლია?“, ურაგადუნა: „ნამთინეშ აზრით ბიბლია ღორონთიშ სიტყვა რე, ნამთინე ხოლო ვა ფიქრენს თაშ. თქვა მუს თქუანთ?“. ხშირას თეს საინტერესო ჩიება მაჸუნუ.

13. მუშენ შემლებუნა ფთქუათ, ნამდა მითინქ ვა მომრჩქილუანინ ხოლო მიზანშა მენჭირნაფილ მაფუნა? (იგავ. 27:11).

 ¹³ თიმწკუმა ხოლო, მუჟამსით ქადაგებაშ დროს ადამიანეფ ვამრჩქილენა, მიზანშა იშენით მენჭირნაფილ მაფუნა. მუშენ იფჩიებუთ თეს? მუშენდა ჩქი გუვაკეთით თინა, მუთ იეჰოვაქ დო იესოქ დუმავალეს — ქიმეფრთით დო ქუქადაგით (საქ. 10:42). გოკონ-და, მითინქ ვა დოფხვადან ჸუდეს ვარდა დოფხვადან, მარა ვა მომრჩქილუანინ ხოლო, ჩქი იშენით მიღუნა ხიოლიშ მიზეზ, მუშენდა მიჩქუნა, ნამდა ზეციერ მუმას გურს უხარენთ (წეკითხით იგავეფიშ 27:11).

14. მუშენ მოხიოლუნა, მუჟამსით ჩქინ თანაქრისტიანიშ უბანს მიდგაინ ინტერესის გიმირჩქინანს?

¹⁴ ხიოლ თიშ გურშენ ხოლო შემლებუნა მიღუდან, ნამდა ჩქინ თანაქრისტიანიშ უბანს მიდგაინ ინტერესის გიმირჩქინანს. „გინაჯინალ კოშკიშ“ ართ სტატიას თენა შედარებულ რდჷ დინაფილ ბაღანაშ გორუაწკუმა. შილებე ბრელ კოჩ გორუნდას ბაღანას, მინ ართ მხარეშა მეურს ოგორშა დო მინ — მაჟიაშა. მუჟამსით ქიმიოგორუანა, ხვალე ბაღანა ძირუნ თის ვარინ, არძას ართნერო ოხიოლ თე ამბე. თეშნერო, ქადაგებაშ დროს არძა ბგორუნთ თიცალ ადამიანს, მით ჭეშმარიტებაშ შარას ქიგიოდირთუ. არძაქ, თაშ ქოფთქუათინ, ოკო გიფაფჩათ მთელ კრებაშ ტერიტორიას თეცალეფიშ ოგორალო დო მუჟამსით მიდგაინ ახალ ქუმურს კრებაშა, არძას მოხიოლუდან (იოან. 6:40; 1 ტიმ. 4:16).

ᲛᲗᲔᲚ ᲧᲣᲠᲐᲓᲦᲔᲑᲐ ᲘᲔᲰᲝᲕᲐᲨ ᲓᲝ ᲐᲓᲐᲛᲘᲐᲜᲔᲤᲘᲨ ᲸᲝᲠᲝᲤᲐᲨᲐ ᲒᲔᲒᲜᲘᲦᲘᲗ

15. მუჭო მიმეხვარებუნა მათეშ 22:37—39-ს ინოჭარილ, უმოს ხიოლით დო მონდომათ იფქადაგათ? (ქოძირით სურათ გალენ გვერდის).

¹⁵ იეჰოვაშ დო ადამიანეფიშ ჸოროფა მიმეხვარებუნა, უმოს მონდომათ დო ხიოლით იფქადაგათ (წეკითხით მათეშ 22:37—39). წერმიდგინით, მუჭო ოხიოლ იეჰოვას, მუჟამსით თიშ დავალებას ვასრულენთ ვარდა მუნერ ბედნერეფ იჸუაფუნა თი ადამიანეფ, მით ბიბლიაშ გურაფას ქიდიჭყანა. დეფიქრით თიშე ხოლო, ნამდა თინეფ, მით ქუმომრჩქილუანა დო ჭეშმარიტებაშ შარას ქიგიოდირთუნა, მარადიულ სიცოცხლეს მიღენა (იოან. 6:40; 1 ტიმ. 4:16).

16. მუ ოკო ვაკეთათ, ნამდა მსახურებაქ ხიოლ ქუმომღან, თიმწკუმა ხოლო, მუჟამსით ჸუდეს ვორეთ მილახვილირ? (ქიმიჸუნით მაგალით).

¹⁶ თიცალ მდგომარეობა ხომ ვაიღუნა, ნამდა ჸუდეშე გიმულა ვეშეილებუნა? თაშ ქორენ-და, გურ ვეგიტახათ დო ნამ შეილებუნან  თინა გაკეთით, ნამდა იეჰოვაშ დო ადამიანეფიშ მიმართ ჸოროფა გეგმირჩქინათ. მაგალთო, ართ ჩილ დო ქომონჯის, სამუელს დო დანიას, პანდემიაშ დროს ჸუდეშე ვეგმართედ. თე რთულ პერიოდის თინეფ ნამ შეულებუდესინ თის ორთუდეს — ირიათო ქადაგენდეს ტელეფონით, წერილეფით დო ატარენდეს ბიბლიაშ გურაფეფს ზუმით. სამუელ კიბოშ ომკურნალებერ პროცედურეფშა გილეშ საავადმყოფოშა დო ოცადუდ, თე სიტუაცია ქადაგებაშო გეგმირინუკო. თინა იჩიებ: „სირთულეეფქ შილებე ქუდგორაგუას ემოციურო, ფიზიკურო დო სულიერო, ათეშენ, იეჰოვაშ მსახურებაქ ოკო მომღან ხიოლ, თენა გუმორზინუანა“. ირფელს თიქ ხოლო ქიგიაძინ, ნამდა დანიაქ თეშ დელახ, სუმ თუთას დონჯირელო რდჷ. გიშელუნ უკულ ხოლო, ამშვ თუთას კალიასკაშ უმშო ვეგლართედ. თინა იჩიებ: „ვოცადუდ, ნამ შემლებუდუნ ირფელ გუვაკეთიკო. მაგალთო, უქადაგუდ ექთანს, ნამუთ აშო გილეშ ჩქიმდა ჸუდეშა დო კურიერეფს ხოლო, მიდგას მუდგარენეფ მოუღუდეს ჩქინდა. მუსხირენშა ჯგირ ჩიება მიღუდ ტელეფონით ართ ოსურწკუმა ხოლო, ნამუთ სამედიცინო კომპანიას მუშენდჷ“. მუჭოთ ვორწყეთ, სამუელ დო დანიას ულირზმა ვაკეთებედეს, მარა ნამ შეულებუდესინ თის ორთუდეს დო თეს ხიოლ მოუღუდ თინეფშა.

17. მუ შემთხვევას მომღანა თე სტატიას გარჩიებულ რჩევეფ ჯგირ შედეგის?

¹⁷ თე სტატიას გარჩიებულ რჩევეფ თიმ შემთხვევას მომღან ჯგირ შედეგის, მუჟამსით თინეფს ართათ გეგმიბრინუანთ. შემლებუნა თე რჩევეფ ოჭკუმალიშ რეცეპტის მოჩამილ თითოულ ინგრედიენტის შევადარათ. ოჭკუმალ თიმწკუმა გიშურს გემუან, მუჟამსით არძა ინგრედიენტ აღვენუ. თეშნერო, თე არძა რჩევაშ გიმორნაფა ქიმმეხვარებუნა, გივორჯგინათ უარყოფით გრძნობეფს დო უმოს ხიოლით იფქადაგათ.