1. ¿Xi runi sentir caadxi ora riguni predicarcaʼ? (Biiyaʼ imagen ca).

 LAANU, ca xpinni Jehová, runi predicarnu purtiʼ nadxiinu Bixhózenu ni nuu guibáʼ ne racaláʼdxinu gunibiáʼ binni laabe. Nabé riuulaʼdxiʼ stale hermanu guni predicar, peru nuu tu laa raca ni nagana para laa. ¿Xiñee yaʼ? Zándaca natuícabe o runi sentírcabe qué gánnacabe gusiidicabe. Ne nuu tu laa qué runi sentir galán chiganna binni pa qué ñuni invitárcabe laa. Nuu xcaadxi ridxibi guiládxicabe laacaʼ. Ne xcaadxi qué riná cheʼ para cadi tindenécabe laacaʼ. Guirácabe nabé nadxiicabe Jehová, peru raca nagana para laacabe gusiidicabe binni ni qué runibiáʼcabe de ca noticia galán. Neca zacá rúnicabe stipa gúnicabe ni purtiʼ nánnacabe pabiáʼ risaca ni. ¡Nanna pabiáʼ riechené Jehová laacabe yaʼ!

2. ¿Xiñee cadi naquiiñeʼ guireeluʼ gana pa raca nagana para lii guni predicarluʼ?

² ¿Ñee laaca raca nagana para lii guni predicarluʼ la? Pa huayácaluʼ ni la? cadi guireeluʼ gana. Pa runi sentirluʼ qué gánnaluʼ gusiidiluʼ o ridxíbiluʼ, nga rusihuinni nácaluʼ ti binni humilde ne qué racaláʼdxiluʼ guʼyaʼ xcaadxi binni ni cayúniluʼ. Laaca rusihuínniluʼ qué racaláʼdxiluʼ gápaluʼ pleitu né binni. Guirutiʼ riuulaʼdxiʼ gucaanácabe laa, jmaruʼ si ora ni racalaʼdxiʼ nga gacané xcaadxi. Nanna Bixhózenu ni nuu guibáʼ xi runi sentirnu ne racaláʼdxibe gacanebe  laanu (Is. 41:13). Lu artículo riʼ zadúʼyanu gaayuʼ sugerencia ni zacané laanu guni sentirnu jma galán ne chuʼnu jma nayecheʼ ora guni predicarnu.

ZÁPALUʼ STIPA RA GÚʼNDALUʼ STIIDXAʼ DIOS

3. ¿Xii nga ni bidii stipa Jeremías para ganda guni predicar?

³ Lu ca iza ni maʼ gudiʼdiʼ ca, nabé huayacané Stiidxaʼ Dios ca xpinni ora ricaacaʼ xiixa dxiiñaʼ nabé nagana. Guidúʼyanu ni bizaaca profeta Jeremías. Ora biseendaʼ Jehová laabe chiguni predicarbe, bidxíbibe ne guniʼbe: «Qué gannaʼ diaʼ guiniéʼ. Nahuiineruáʼ» (Jer. 1:6). ¿Xi gucané laabe para maʼ cadi guidxíbibe yaʼ? Bidii Stiidxaʼ Dios laabe stipa. Laabe guniʼbe: «Beeda gaca stiidxabe casi ti bele [ . . . ] ni daguyoo ndaaniʼ ca dxita ladeʼ; maʼ qué ñanda diʼ nucueezaʼ ni ne maʼ qué ñanda ñuneʼ huantar ni» (Jer. 20:​8, 9). Nagana ra chiguni predicar Jeremías, peru mensaje ni chitídxibe ca binni que nga ni bidii stipa laabe para guni cumplirbe dxiiñaʼ que.

4. ¿Xi rizaaca ora ridúʼndanu Stiidxaʼ Dios ne riníʼ íquenu ni nani? (Colosenses 1:​9, 10).

⁴ Laanu, ca xpinni Cristu, laaca rápanu stipa ora ridúʼndanu mensaje ni zeeda lu Stiidxaʼ Dios. Ora bicaa apóstol Pablo ra nuu ca xpinni Cristu de Colosas, gúdxibe laacaʼ pa guiziidiʼ chaahuicaʼ de Dios zabánicaʼ «casi nabani ca binni ni runi xhiiñaʼ Jehová» ne zúnicaʼ «ni jneza» (biindaʼ Colosenses 1:​9, 10). Ne ti modo zanda gusihuínninu rúninu ni jneza nga ra guni predicarnu. Casi maʼ bidúʼyanu, ora ridúʼndanu Stiidxaʼ Dios ne riníʼ íquenu ni nani la? riguidxi fe ni nápanu Jehová ne riene chaahuinu xiñee nabé risaca guinínenu xcaadxi de Reinu stiʼ Dios.

5. ¿Xi zanda gúninu para gacané Stiidxaʼ Dios laanu?

⁵ Para ganda gacané Stiidxaʼ Dios laanu, cadi nagueenda nagueenda guidúʼndanu, guni estudiarnu ne guiníʼ íquenu ni nani. ¿Xi zanda gúniluʼ pa málasi cadi cayéneluʼ xiixa textu yaʼ? Biʼniʼ stipa guiéneluʼ ni, zanda guyúbiluʼ xi riníʼ versículo ca lu Índice de las publicaciones Watch Tower o lu Ca tema ni huabee ca testigu stiʼ Jiobá. Pa cueeluʼ tiempu para guni estudiarluʼ la? jma zápaluʼ confianza Stiidxaʼ Dios (1 Tes. 5:21). Ne ra gápaluʼ jma confianza ni zeeda lu Biblia, jma nayecheʼ ziuuluʼ ora gábiluʼ xcaadxi guiráʼ ni caziidiluʼ.

 GUCA PREPARAR CHAAHUIʼ ANTE CHIGUNI PREDICARLUʼ

6. ¿Xiñee risaca gaca preparar chaahuiluʼ ante chiguni predicarluʼ?

⁶ Pa gaca preparar chaahuiluʼ ante chiguni predicarluʼ, jma ziuuluʼ tranquilu ora guiníʼneluʼ binni. Jesús la?biʼniʼ preparar ca discípulo stiʼ ante guseendabe laacaʼ chiguni predicarcaʼ (Luc. 10:​1-11). Ne cumu yenándacabe ni bisiidiʼ Jesús laacabe la? guyuucabe nayecheʼ pur guiráʼ ni bíʼnicabe (Luc. 10:17).

7. ¿Ximodo zanda gaca prepararnu ante chiguni predicarnu? (Biiyaʼ imagen ca.)

⁷ ¿Ximodo zanda gaca prepararnu ante chiguni predicarnu yaʼ? Galán guiníʼ íquenu ximodo gudiʼnu mensaje ni zeeda lu Biblia binni ne gúninu ni modo ca rininu. Laaca galán guiníʼ íquenu xi zanda gúninu pa guiníʼ o guni ca binni de lu territorio stinu xiixa. Pa gúninu ca ni maʼ bizéʼtenu riʼ, ziuʼnu tranquilu ora maʼ canínenu binni, zuxídxinu ne zácanu nachaʼhuiʼ.

8. ¿Xiñee zeeda gaca ca xpinni Cristu casi guisu de yu?

⁸ Biquiiñeʼ apóstol Pablo ti ejemplu para bisiene dxiiñaʼ ni rúninu lu predicación. Laabe guniʼbe: «Nápadu tesoro riʼ ndaaniʼ guisu de yu» (2 Cor. 4:7). Peru ¿xii nga tesoro ca yaʼ? Laani nga guni predicarnu mensaje stiʼ Reinu, ti dxiiñaʼ ni rulá xquendanabani binni (2 Cor. 4:1). ¿Xii nga ca guisu de yu ca yaʼ? Ca guisu de yu ca nga ca xpinni Dios, ca ni runi predicar ca noticia galán. Ca dxi bibani Pablo, ca binni napa negocio riguucaʼ cosa risaca ndaaniʼ guisu de yu, casi guendaró, vinu o bueltu. Ca dxi riʼ laaca maʼ bidii Jehová laanu ti cosa nabé risaca: laani nga mensaje stiʼ ca noticia galán. Zudii Jehová laanu stipa ni caquíñenu para ganda guinínenu binni de mensaje ca.

GUNABAʼ DIOS GUDII LII VALOR

9. ¿Xi zanda gacané laanu para cadi guidxíbinu binni? (Biiyaʼ imagen ca).

⁹ Nuu biaje zándaca zadxíbinu binni. ¿Xi zanda gacané laanu cadi guidxíbinu yaʼ? Guiníʼ íquenu oración ni biʼniʼ ca apóstol ora gúdxicabe laacaʼ gusaana de guni predicarcaʼ. Lugar de nidxíbicabe ne ñúnicabe ni nacaʼ, gunábacabe Jehová gacané laacabe para cadi gusaana  de gusiidicabe «né valor». Ne laa nagueendaca bicabi laacabe (Hech. 4:​18, 29, 31). Ora guzulú guidxíbinu binni, guinábanu Jehová gacané laanu. Ya, guinábanu laabe gacanebe laanu para cadi guidxíbinu binni pur guendarannaxhii ni nápanu laacaʼ.

10. ¿Ximodo racané Jehová laanu para gúninu dxiiñaʼ ni nápanu casi testigu stiʼ Jehová? (Isaías 43:​10-12).

¹⁰ Jehová nga biʼniʼ laanu ca Testigu stiʼ (biindaʼ Isaías 43:​10-12). Ne cayuni prometerbe zacanebe laanu gácanu nadxibalú. Guidúʼyanu tapa modo racanebe laanu gúninu ni. Primé, nuu Jesús gaxha de laanu ora maʼ cayuni predicarnu ca noticia galán (Mat. 28:​18-20). Guiropa, maʼ gudxi Jehová ca ángel ca gacanecaʼ laanu (Apoc. 14:6). Guionna, rudii Jehová laanu espíritu santu stiʼ, racané espíritu ca laanu guietenaláʼdxinu ni maʼ bizíʼdinu (Juan 14:​25, 26). Ne guidapa, rudii Jehová laanu stale hermanu ne hermana ni cayuninenu dxiiñaʼ tobi si. Cumu cayacané Jehová ne ca hermanu laanu la? nga zacané laanu maʼ cadi guidxíbinu.

BIYUBI XCAADXI MODO GUNI PREDICARLUʼ NE CADI GUIREELUʼ GANA

11. ¿Xi zanda gúniluʼ para guidxélaluʼ jma binni ora guni predicarluʼ? (Biiyaʼ imagen ca).

¹¹ ¿Ñee rireeluʼ gana ora qué ridxélaluʼ binni ra lidxi la? Pa zacá ni, guníʼ ique ndiʼ: «¿Paraa nuu binni ora riaaʼ ra lidxi? ¿Cayúnicabe dxiiñaʼ, zisícabe o canagutoocabe la?» (Hech. 16:13). Pa qué guinni binni ra lidxi, galán guiníʼ íqueluʼ guni predicarluʼ ndaaniʼ calle. Sicaríʼ guníʼ ti hermanu láʼ Joshua: «Ruyubeʼ guneʼ predicar laga ziaaʼ luguiaa, ndaaniʼ tienda naroʼbaʼ ne ca lugar ra nuu stale binni». Laabe ne Bridget, xheelabe, jma ridxélacabe binni ora riguni predicárcabe huadxí ne ca domingu despué de galaa dxi (Efes. 5:​15, 16).

12. ¿Xi zanda gacané laanu gánnanu xi runi cré ne xi riuulaʼdxiʼ binni?

¹² Pa qué chuulaʼdxiʼ binni mensaje ni zinenu la? guyúbinu gánnanu xi runi crécabe ne xi naguu xizaa laacabe. Joshua ne Bridget riquiiñecaʼ pregunta ni zeeda lu ca tratadu para gúnicaʼ introducción  sticaʼ. Ora riquiiñecabe tratadu Xi riníʼ íqueluʼ de Biblia, riníʼcabe: «Nuu caadxi binni runi cré zeeda Biblia de Dios, ne xcaadxi coʼ. Lii yaʼ, ¿xi riníʼ íqueluʼ? Nga racané laacabe guzulú guiniʼnécabe binni jma nagueenda.

13. ¿Xiñee zanda chuʼnu nayecheʼ ora guni predicarnu neca guirutiʼ gucaadiaga laanu? (Proverbios 27:11).

¹³ Pa gucaadiaga binni laanu o pa coʼ, riuʼnu nayecheʼ guni predicarnu. ¿Xiñee yaʼ? Purtiʼ ni jma risaca nga gúninu ni rinabaʼ Jehová ne Xiiñiʼ laanu: gudiʼnu ti testimonio (Hech. 10:42). Nga runi, cadi chuʼnu xizaa pa qué guinínenu tuuxa o pa guiladxi laanu ora guni predicarnu. Zanda chuʼnu tranquilu purtiʼ nánnanu cusiéchenu Bixhózenu ni nuu guibáʼ (biindaʼ Proverbios 27:11).

14. ¿Ximodo runi sentirnu ora ridxela ti publicador tuuxa ni racalaʼdxiʼ guiziidiʼ jma de Jehová, ne xiñee?

¹⁴ Laaca riechenenu xcaadxi publicador ora ridxélacaʼ tuuxa ni racalaʼdxiʼ guiziidiʼ jma de Jehová. Ruchaaga Torre stiʼ ni rapa dxiiñaʼ ni rúninu casi ora nuyúbinu ti xcuidihuiiniʼ ni biniti. Stale nga tu cuyubi laabe, ne guiráʼ ladu cuyúbicabe laabe. Ne ora ridxela tuuxa laabe, cadi laa si riuu nayecheʼ, sínuque riecheʼ guirácabe. Zaqueca nga laanu, rúninu dxiiñaʼ tobi si para gúninu discípulo. Guiranu zanda gacanenu ca binni ni nabeza lu territorio stinu, ne guiranu riéchenu ora ruzulú tuuxa rié reunión.

GUNNAXHII JEHOVÁ NE PRÓJIMO STILUʼ

15. ¿Xi zanda gacané laanu chuʼnu jma nayecheʼ ora guni predicarnu? (Mateo 22:​37-39; biiyaʼ imagen ni zeeda).

¹⁵ Pa nadxiinu Jehová ne prójimo stinu la? ziuʼnu jma nayecheʼ ora guni predicarnu (biindaʼ Mateo 22:​37-39). Guníʼ iqueʼ pabiáʼ nayecheʼ riuu Jehová ora guʼyaʼ laanu cayuni predicarnu, ne pabiáʼ nayecheʼ zuni sentir ca binni ni guzulú guni estudiar Biblia. Nuu sti cosa ni cadi naquiiñeʼ guiaandaʼ lii, ca binni ni guni aceptar mensaje stiʼ Biblia la? zalacaʼ (Juan 6:40; 1 Tim. 4:16).

16. ¿Xi zanda gacané laanu chuʼnu nayecheʼ ora gúninu xhiiñaʼ Jehová neca qué ganda guireʼnu de ra lídxinu? Bizeeteʼ ti ejemplu.

¹⁶ ¿Pa qué randa rireeluʼ de ra lídxiluʼ  la? Biʼniʼ ni nuu lu naluʼ para gusihuínniluʼ nadxiiluʼ Jehová ne prójimo stiluʼ. Lu pandemia stiʼ COVID-19, qué ñanda niree Samuel ne Dania de ndaaniʼ lídxicaʼ. Lu tiempu nagana ca, biʼniʼ predicárcabe pur teléfono, bicaacabe carta ne bidiicabe estudiu pur Zoom. Laaca biʼniʼ predicar Samuel ndaaniʼ clínica ra biʼniʼ tendércabe laa dxi napa cáncer. Laabe guniʼbe: «Ora ridídinu lu guendanagaga la? ridxáganu, riuʼnu xizaa ne ridiʼdiʼ fe stinu lu prueba. Nga runi nabé risaca chuʼnu nayecheʼ ra gúninu ni ná Jehová». Peru cadi nga si, ti dxi biaba Dania ne gudixhe ni laabe chonna beeu. Despué guribe lu ti silla de rueda xhoopaʼ beeu. Laabe guniʼbe: «Bineʼ biaʼ ni zanda si guneʼ pur modo nuaaʼ que. Bineʼ predicar enfermera ni rapa naa ne laaca gunieniáʼ ca ni redasaana cosa ra lidxeʼ. Ne pur teléfono gunieniáʼ ti gunaa ni runi dxiiñaʼ ndaaniʼ ti empresa ra rutoocabe medicina». Dxandíʼ nga huaxiéʼ si ni zanda guni Samuel ne Dania pur ni cazaacacaʼ, peru bíʼnicabe biaʼ nuu lu nácabe, ne nabé nayecheʼ guyuucabe.

17. ¿Pora nga jma zacané ca sugerencia ni bizéʼtenu lu artículo riʼ laanu?

¹⁷ Biʼniʼ stipa chinándaluʼ guiráʼ sugerencia ni bizéʼtenu lu artículo riʼ, nabé zacané ca ni lii. Zeeda gaca cada tobi de laacani casi ca ingrediente stiʼ ti guendaró. Ora rusaʼnu ca ingrediente stiʼ ti guendaró la? riree ni nanixe. Zaqueca nga laanu, pa chinándanu ca sugerencia ni bizéʼtenu lu artículo riʼ, qué zadxíbinu guinínenu binni ne ziuʼnu jma nayecheʼ ora guni predicarnu.