1. Nyi gbɔngbɔn mɛ paradiso lɔ nyiɔ, yí nyi mìɖui mɔ mìawaɔ?

 LE KPƆWƐNYƆNUNU mɛɔ, paradiso ɖeka le nyigban lɔ ji gbɛ ci mɛ amɛ sugbɔ le yí le edɔ nywiwo wakɔ. Eɖɔ koɖo agbetɔ miliɔn nɛniɖe ciwo yí kpɔkpɔ fafa ŋtɔŋtɔ. Mɛ ciwo yí le gbɔngbɔn mɛ paradiso lɔ mɛ yɛ, ɖui mɔ yewodaso le mɛ gbeɖe o. Wogbeji mɔ amɛ sugbɔ avabɔ do yewo nu yí yewoabɔ anɔ enuvevi cɛ mɛ. Nyí yí nyi enu lɔɔ? gbɔngbɔn mɛ paradiso lɔ yɔ! a

2. Nyi yí jiŋ nɔ amɛ kuso gbɔngbɔn mɛ paradiso lɔ nuɔ?

² Enukpacamɛ enyi mɔ, le Satana xexe cɛ ci yí ɖɔ koɖo xomɛveve, enubaɖawawa, yí amɛwo xakɔ wowonɔnɔwo leɔ, Yehowa yɛ wa texwe ɖeka do mɛ, ci mɛ yí amɛwo le fafa koɖo gbenɔju mɛ. (1 Ʒan 5:19; Enyɔ. 12:12) Mìwo Mawu amɛlɔntɔ lɔ kpɔkpɔ lé xexe vwin cɛ dadahɛn nu le agbetɔwo nu do. Vɔ éwɛkɔ yí yi sɛntɔwo le vofamɛ keŋ nɔ woakpɔtɔ asinsin ɛ le jijɔ mɛ. Yi nyɔ lɔ dre gbɔngbɔn mɛ paradiso lɔ mɔ, yɛnyi “bexu” ci mɛ woanɔ vofamɛ le koɖo “agble ci yí xɔ shi sugbɔ ɛnɛ.” (Ezai 4:​6, NWT; 58:11) Yehowa cukɔ shi nɔ mɛ ciwo yí le gbɔngbɔn mɛ paradiso lɔ mɛ yí wotɛnŋ kpɔkɔ jijɔ yí le vofamɛ le ŋkeke vɔvɔɛ gbɔnnugbɔnnu cɛwo mɛ.—Ezai 54:14; 2 Tim. 3:1.

3. Lé Ezai eta 65 vamɛ sasa vayi doɔ?

³ Yehowa to enyɔnuɖɛtɔ Ezai ji yí dre lé mɛ ciwo yí anɔ gbɔngbɔn mɛ paradiso lɔ mɛ ale do. Àtɛnŋ akpɔ lé edri do le Ezai ta 65 mɛ, yí enyɔ cɛwo vamɛ ŋkɔtɔ le exwe 537 D.Y. mɛ. Le egahunnɔtɔ́ mɛɔ, wotashi Ʒuifu ciwo yí trɔ ji mɛ yí woso le hwashigbe mɛ le Babiloni vayi wowo ju mɛ. Yehowa  cushi nɔ yí mɛwo yí kpedo wo nu wovatrɔ yí cu Ʒerusalɛmu jugan ci yí gban sa yí eva nyakpɔkpɔ, yí wotrɔ yí cu gbedoxɔ lɔ yí egbevatrɔ nyi texwe vevi ci amɛwo vanɔ yí vasɛnnɔ Yehowa le, le Izraɛli.—Ezai 51:11; Zak. 8:3.

4. Lé Ezai eta 65 vamɛ le egbɛ mɛ doɔ?

⁴ Ezai nyɔnuɖɛ lɔ vamɛ zevetɔ le 1919 K.H. mɛ. Hwehunnɔnuɔ, Yehowa mɛ ciwo yi li gbɛ vavo ɖo woso le hwashigbe mɛ le Babiloni gangan lɔ mɛ. So hwehunnɔnuɔ, gbɔngbɔn mɛ paradiso lɔ tɔ ji yí tɔ kekeke do nyigban lɔ ji keŋ akpe do xexe lɔ keŋkeŋ mɛ. Fyɔɖuxu ŋɛnywidratɔ ciwo mɛ ezo le vaɖo hamɛ sugbɔwo yí gbesɛnnɔ ku nywiwo le gbɔngbɔn mɛ. Ŋsu koɖo nyɔnu ciwo yí nyi xomɛvetɔwo sa yí gbewanɔ nu shigbe elanwo nɛ “[vasɔ] jɔjɔmɛ yoyutɔ sɔ́ dó shigbe awu ɛnɛ. Jɔjɔmɛ yoyutɔ cɛtɔ [sɔgbe koɖo Mawu dro.]” (Efe. 4:​24, Ezoɖuɖu Yoyu Wema) Le nyɔnɔnwi mɛɔ, shicu sugbɔ ciwo nu Ezai xo nuxu so avamɛ ŋtɔŋtɔ le xexe yoyu lɔ mɛ le esɔ mɛ. Vɔ le kakacɛ mɛ can ɔ, enu sugbɔ mɛ yí mìkpɔkpɔ nyɔna so le gbɔngbɔn mɛ paradiso lɔ mɛ. Ecɛyɛ mìakpɔ lé gbɔngbɔn mɛ paradiso lɔ kan mìwo ɖekaɖeka do koɖo enu ci yí taɖo mìdeɖo aso le mɛ gbeɖe o.

LÉ MƐ CIWO YÍ LE GBƆNGBƆN MƐ PARADISO LƆ MƐ LE DO

5. Shigbe lé Ezai 65:13 nui ɖɛ nɛɔ, nyi mìkpɔkpɔ le gbɔngbɔn mɛ paradiso lɔ mɛɔ?

⁵ Ŋɖuɖu sun wo yí eshi sun wo. Ezai nyɔnuɖɛ lɔ dre vovototo gangan ci yí le gblamɛ nɔ lé agbe lɔ le do nɔ mɛ ciwo yí le gbɔngbɔn mɛ paradiso lɔ mɛ koɖo mɛ ciwo yí dele mɛ o. (Hlɛn Ezai 65:​13, NWT.) Yehowa nanɔ ŋɖekpokpui ci yi sɛntɔwo aʒan le gbɔngbɔn mɛ keŋ nɔ woate gogui. Mìɖo yi gbɔngbɔn kɔkɔɛ, yi Nyɔ lɔ koɖo gbɔngbɔnmɛŋɖuɖu sugbɔ ciwo yí ana, “[mìaɖu] nu, . . . anu nu, . . . [yí] eji ajɔ mì.” (Sɔ sɔ koɖo Enyɔdasɛ 22:17.) Vɔ le gaxoxo ɖekɛ lɔ mɛɔ, mɛ ciwo yí dele gbɔngbɔn mɛ paradiso lɔ mɛɔ, “shive a ci [wo]. . . , shikɔ a ci [wo] . . . , [yí] eŋ akpɛn [wo.]” Wodekpɔ gbɔngbɔn mɛ ʒan wowotɔwo gbɔ o.—Amosu 8:11.

6. Lé Ʒoɛli 2:​21-24 dre enu ciwo Yehowa nanɔ mì doɔ, yí lé mìtɛnŋ ɖunɔ le nɔ wo doɔ?

⁶ Le enyɔnuɖɛ Ʒoɛli tɔ mɛɔ, ézan enuvevi ciwo mìʒan le agbe mɛ, shigbe jinuku, vɛn koɖo olivumi yí sɔ dasɛ mɔ, Yehowa sɔ xomɛvu yí nanɔ enu ciwo yí ʒan yi mɛwo, gbɔngbɔnmɛŋɖuɖuwo can le mɛ. (Ʒoɛli 2:​21-24) Éwanɔ ecɛ to Bibla, mìwo Bibla nuplawemawo, mìwo siti ɛntɛnɛti, mìwo bɔbɔwo, takpekpewo koɖo takpekpeganwo ji. Mìatɛnŋ aɖunɔ gbɔngbɔnmɛŋɖuɖu cɛwo ŋkeŋke, yí ecɛ adɔ yí ŋɖuɖu asun mì, eshi asun mì yí mìakla le gbɔngbɔn mɛ.

7. Nyi yí na “[mìvonɔ] le ji mɛɔ”? (Ezai 65:14)

⁷ Woakpɔ jijɔ yí enu ajeŋ nɔ wo. Mawu mɛwo atɛnŋ “ado jijɔ xwa” ɖo ŋciwo Yehowa wanɔ nɔ wo jeŋ nɔ wo sugbɔ. (Hlɛn Ezai 65:14 NWT.) Nyɔnɔnwi doŋsɛn-amɛwo, gbeɖu fakɔnnamɛ ciwo yí le Mawu nyɔ lɔ mɛ koɖo mɔkpɔkpɔ sɛnŋ ci Kristo tafɛnvɔnsa lɔ na mì dɔ yí “[mìvo] le ji mɛ.” Nuxuxoxo so enu ŋtɔ́wo nu koɖo mìwo nɔviŋsu koɖo mìwo nɔvinyɔnu gbɔngbɔn mɛ tɔwo na yí mìkpɔnɔ jijɔ ŋtɔŋtɔ!—Eha. 34:8; 133:​1-3.

8. Enuvevi amɛve ciwo yí le gbɔngbɔn mɛ paradiso lɔ mɛɔ?

⁸ Lɔnlɔn koɖo gbenɔju ci yí le Yehowa mɛwo mɛ nyi enuvevitɔ amɛve ci yí danasɛ gbɔngbɔn mɛ paradiso lɔ. “Lɔnlɔn [cɛ ci] yí sɔ [mì] xoca” na mìkpɔnɔ lé xexe yoyu lɔ mɛ avanɔ do le susu mɛ. Le nɔtɔxuɔ, Yehowa sɛntɔwo alɔnnɔ wowonɔnɔwo haan yí  egbe agbele eju nɔ wo sɔwu egbɛ. (Kol. 3:14) Kristotɔ nɔvinyɔnu ɖeka dre enu ciwo ekpɔ so Yehowa mɛwo nu hwenu edo go wo ŋkɔtɔ. Énu mɔ: “Ŋdenya le nyɛ koɖo anyi xomu awɛ akpɔ jijɔ o. Ŋkɔtɔ ci yí ŋkpɔ yí amɛwo lɔnkɔ wowonɔnɔwo nyɔnɔnwitɔ yí nyi hwenu ŋdo go koɖo Yehowa Kunuɖetɔwo.” Mɛɖekpokpui ci yí ji mɔ yeakpɔ jijɔ nyɔnɔnwitɔ yí avo ɖo akpɔtɔ anɔ mìwo gbɔngbɔn mɛ paradiso lɔ mɛ. Nɔ xexe cɛ kpɔkpɔ Yehowa mɛwo do ɖe can ɔ, woɖo ŋkɔ nywiwo yí nyi amɛnywiwo le ŋmɛ nɔ Yehowa koɖo mɛ ciwo pleŋ yí le yí xomu lɔ mɛ.—Ezai 65:15.

9. Nyi Ezai 65:​16, 17 nu ɖɛ so enu ciwo yí donɔ vevisese nɔ mì le agbe mɛ gbɛ nuɔ?

⁹ Woavoŋ yí ale fafa mɛ. Ezai 65:14 nu mɔ, mɛ ciwo yí aɖui yí anɔ azɔge nɔ gbɔngbɔn mɛ paradiso lɔɔ, ‘woado axwa ɖo wowo jiwo le vevi sekɔ, woafankwi ɖo wogbɔjɔ le wowoɖekiwo mɛ.’ Vɔ ŋciwo yí na yi Mawu mɛwo se vevi yí kpekɔ efun ɖe? Le vɔvɔnuɔ, “[woaŋlɔbe enu ŋtɔ́wo yí] woawla do [Mawu] ŋkuviwo.” (Hlɛn Ezai 65:​16, 17, NWT.) Yehowa aɖe mìwo cukaɖawo si nɔ mì yí le yiyimɛɔ, enu ciwo yí donɔ vevisese nɔ mì abu le susu mɛ nɔ mì keŋkeŋ yí mìdagbe kpɔ wo kpɔ o.

10. Nyi yí taɖo èkpɔɛ mɔ shicu yí enyi mɔ mìanɔ eju koɖo nɔviŋsu koɖo nɔvinyɔnu Kristotɔwoɔ? (Kpɔ foto lɔ hɛnnɛ.)

¹⁰ Kakacɛ can ɔ, susu mɛ fanɔ nɔ mì, nɔ mìyi mìwo bɔbɔwo, ɖo le nɔɔ, mìvonɔŋ yì ŋlɔnnɔbe xaxa ciwo mìdokɔ go le xexe cɛ mɛ. Mìgbekpenɔdo mìwo nɔviŋsu koɖo nɔvinyɔnuwo nu yí wovonɔ le wowoɖekiwo mɛ ci mìdanasɛ lɔnlɔn, jijɔ, fafa, xomɛvuwawa koɖo xomɛfafa nɔ wo, ɖo jijɔ cɛwo le Mawu gbɔngbɔn lɔ kusɛnsɛn mɛ. (Gal. 5:​22, 23) Shicu enyi nɔ mì mɔ mìle Mawu habɔbɔ cɛ mɛ! Mɛ ciwo yí akpɔtɔ anɔ gbɔngbɔn mɛ paradiso cɛ mɛ ávakpɔ Mawu gbeɖu ci yí nyi mɔ “yeawa jeŋkwi yoyu koɖo nyigban yoyu” avamɛ keŋkeŋ.

11. Sɔ koɖo Ezai 65:​18, 19 ɖe, lé gbɔngbɔn mɛ paradiso ci Yehowa ɖo, ɖo akan mì doɔ?

¹¹ Enu jeŋ nɔ wo yi eji jɔkɔ wo. Ezai vadre enu ci yí taɖo mìɖo “ale jijɔ mɛ” le gbɔngbɔn mɛ paradiso lɔ mɛ. Yehowa ŋtɔ yi ɖo texwe cɛ le kpɔwɛnyɔnunu mɛ. (Hlɛn Ezai 65:​18, 19.) Dekpaca mì mɔ Yehowa zanzan mì nɔ mìakpedo mɛbuwo nu nɔ woato le xexe cɛ habɔbɔwo ciwo yí dekplakɔ nyɔnɔnwi kuso Mawu nu o, yí mìakpedo wo nu nɔ woava gbɔngbɔn mɛ paradiso nyakpɔkpɔ cɛ mɛ! Ci mìvale nyɔnɔnwi lɔ mɛɔ, shicu ciwo mìxɔkɔ jɔkɔ ji  nɔ mì yí mì jinɔ veviɖe mɔ mìaxo nuxu so nu nɔ mɛbuwo.—Ʒer. 31:12.

12. Lé gbeɖu ciwo nu woxo nuxu so le Ezai 65:​20-24 wa nɔ eoɔ, yí nyi yí taɖoɔ?

¹² Gbesɔ kpe niɔ, mɔkpɔkpɔ ci mìɖo ci mìle gbɔngbɔn mɛ paradiso lɔ mɛ jɔkɔ eji nɔ mì yi gbejenɔŋ nɔ mì. Bu tamɛ kpɔ so enu ciwo pleŋ mìakpɔ le Mawu xexe yoyu lɔ mɛ ɖa! Bibla ɖo gbe mɔ: “Evi ɖe da so ejugan hunnɔ mɛ ci yí wo ji yí a nɔ̀ agbe nanɔ ŋkeke ɖewo kpoŋ o. . . . Evi ɖeka ɖeka a dɔnji, yí amɛ shinshinwo a gbe dɔnji doji.” “[Mìacu] axwe [yí anɔ mɛ yí mìado] vɛnkusɛnsɛnwo do boji [yí] á ɖu vɛn kusɛnsɛn” lɔwo. ‘Mìdagbe do egbla gbali o’ ɖo mìanyi mɛ ciwo yí “[Yehowa] cushi nɔ.” Éɖo gbe nɔ mì mɔ mìakpɔ jijɔ le mìwo gbe mɛ yí anɔ vofamɛ yí mìwo gbe aɖo ta. “Gbɔxwe wo a byɔ [ŋɖeɔ,]” ánya enu ci yí wu do mɛɖekamɛɖeka, ána “enu ci yí ʒan enu lagbu ɖeka ɖeka.”—Ezai 65:​20-24 Eha. 145:16.

13. Lé Ezai 65:25 dre trɔtrɔ ciwo amɛwo wanɔ le wowo gbe mɛ gbɔxwe yí vasɛnnɔ Yehowaɔ?

¹³ Wole fafa koɖo vofamɛ. Toto Mawu gbɔngbɔn lɔ kpekpedonu mɛɔ, amɛ sugbɔ ciwo yí wanɔ enudakpuwo yí venɔ xomɛwo sa vatrɔ wowo gbenɔnɔ. (Hlɛn Ezai 65:25.) Woje agbla veviɖe keŋ yí trɔ wowo dɛn ciwo wowunɔ sa wo. (Rɔm. 12:2; Efe. 4:​22-24) Nyɔnɔnwi enyi mɔ Mawu mɛwo kpɔtɔ nyi nuvɔnmɛwo, eyi taɖo mìakpɔtɔ awanɔ afɛnwo. Ele ahan gan, Yehowa bɔbɔ “agbetɔwo pleŋ” ciwo yí luin doju yí woalɔn wowonɔnɔwo, yí ale fafa koɖo egbenɔju ŋtɔŋtɔ mɛ. (Titu 2:11) Mawu ŋsɛnwopleŋtɔ ɖekɛ yí atɛnŋ awa enu cɛ!

14. Lé Ezai 65:25 vamɛ do nɔviŋsu ɖeka ji doɔ?

¹⁴ Amɛwo atɛnŋ atrɔ mɛ ciŋmɛ wonyi nyɔnɔnwia? Kpɔ kpɔwɛ cɛ ɖa. Ðajɛvi jajɛ ɖeka ɖo exwe 20, woli do gakpa mɛ zenɛniɖe, énɔnɔ agbedɔndɔn yí wanɔ xomɛvevenuwo haan. Woli do gakpa mɛ ɖo éfinɔ ehun, gbannɔ ehɔn nɔ amɛwo yí gbedonɔ nubuwo shi. Énɔnɔ gbesɔsɔ gashiagamɛ yí awa evu koɖo mɛɖekpokpui. Ŋkɔtɔ ci ese Bibla mɛ nyɔnɔnwi lɔ yí tɔ Yehowa Kunuɖetɔwo bɔbɔwo yiyiɔ, évakando ji mɔ ye gbe vaɖo eta yí yele gbɔngbɔn mɛ paradiso lɔ mɛ. Le yi goduɔ, éwa ʒinʒindoshimɛ yí vanyi Kunuɖetɔ. Ébunɔ tamɛ blaŋblaŋ so lé Ezai 65:25 sɔgbe koɖo yi nɔnɔmɛ do. Étrɔ yi gbenɔnɔ keŋkeŋ yí degbewanɔ nu shigbe janŋta hannɛ o yí asɛn tamɛ do amɛwo o. Évale shigbe lɛngbɔ nɛ yí vanyi amɛfafa.

15. Nyi yí taɖo mìji mɔ mìayɔ mɛbuwo nɔ woavabɔ do mì nu le gbɔngbɔn mɛ paradiso lɔ mɛɔ, yí lé mìawɛ doɔ?

¹⁵ Enyɔ cɛwo yí wosɔ tɔ Ezai 65:13 ji ke: “Enyɔ ci Axwetɔ Yehowa nu ke.” Yí wovanu le vɔvɔnu nɔ kpukpui 25 tɔ lɔ mɔ: “Yehowa yí nui.” Yi nyɔwo vanɔmɛ tɛgbɛɛ. (Ezai 55:​10, 11) Gbɔngbɔn mɛ paradiso lɔ li vɔ. Yehowa wa nɔviwo habɔbɔ lɔ yí eto akpo xesexese. Le Yehowa mɛwo mɛɔ, mìatɛnŋ akpɔ fafa yí ale vofamɛ le xexe cɛ ci mɛ yí tamɛsɛnsɛn le. (Eha. 72:7) Susu cɛwo yí dɔ, mìji mɔ mìakpedo amɛ sugbɔ nu le mìakpeji do nɔ woavabɔ do mì nu nɔ mìanɔ nɔvi Kristotɔwo habɔbɔ lɔ mɛ. Mìatɛnŋ awa ecɛ nɔ mìsɔ susu ɖo enukplaviwowawadɔ lɔ ji.—Mat. 28:​19, 20.

LÉ MÌADƆN MƐBUWO VA GBƆNGBƆN MƐ PARADISO LƆ MƐ DO

16. Nyi yí atɛnŋ adɔn amɛwo va gbɔngbɔn mɛ paradiso lɔ mɛɔ?

¹⁶ Amɛɖekamɛɖeka le mì mɛ ɖo edɔ vevi ɖe awa yí awɛ yí gbɔngbɔn mɛ paradiso lɔ adrodroɔ mɛbuwo. Mìatɛnŋ awa edɔ cɛ nɔ mìsran Yehowa. Deʒinnɔ amɛwo ji mɔ wo  le va ye habɔbɔ lɔ mɛ o. Ewaɖeɔ, ésɔ xomɛvu yí “dɔn” amɛwo va yiɖeki gbɔ. (Ʒan 6:44; Ʒer. 31:3) Nɔ ejinywitɔwo kpla nu so Yehowa lɔnlɔn koɖo yi nɔnɔmɛ nywiwo nuɔ, mɛɖe denunɔ nɔ wo gbɔxwe wotenɔgogui o. Lé jijɔ nywi ciwo yí le mì shi koɖo mìwo gbenɔnɔ nywiwo atɛnŋ adɔn amɛwo va gbɔngbɔn mɛ paradiso lɔ mɛ doɔ?

17. Lé mìawɛ adɔn amɛwo va gbɔngbɔn mɛ paradiso lɔ mɛɔ?

¹⁷ Emɔ ɖeka ci ji mìatɛnŋ ato yí adɔn mɛbuwo va gbɔngbɔn mɛ paradiso lɔ mɛ yí nyi mɔ, mìasɔ lɔnlɔn koɖo xomɛvu awanɔ nu ɖaɖa mìwo kpena xɔsetɔwo gbɔ. Nɔ amɛyoyuwo vakɔ mìwo hamɛ bɔbɔwoɔ, mìji mɔ woanu enyɔ ɖekɛ ŋmɛ ci hanwo yí jimaxɔsetɔ ciwo yí va bɔbɔ le Korɛnti vayi sa nu. Wonu mɔ: “Mawu le míwo domɛ nyɔnɔnwitɔ.” (1 Kor. 14:​24, 25; Zak. 8:23) Eyi taɖo mìɖo atekpɔ yí awakɔ do nukplamu ci yí nyi mɔ, “mí nɔ agbe le fafa mɛ koɖo míwonɔnɔwo” ji.—1 Tɛs. 5:​13, Ezoɖuɖu Yoyu Wema.

18. Nyi yí atɛnŋ adɔn amɛwo va mìwo habɔbɔ lɔ mɛɔ?

¹⁸ Mìɖo atekpɔ gashiagamɛ yí akpɔnɔ mìwo nɔviŋsu koɖo nɔvinyɔnu Kristotɔwo shigbe lé hanci Yehowa kpɔnɔ wo nɛ. Mìwɛni ahan, ci mìsɔ susu ɖonɔ wowo nɔnɔmɛ nywiwo ji yí denyi wowo fɛnwo ji o, ɖo le yiyimɛɔ, wodagbevaɖo afɛn ɖe o. Mìatɛnŋ asɔ lɔnlɔn sɔ kpɔ cukaɖa ɖekpokpui ci yí ava gblamɛ nɔ mì gbɔ nɔ “mì lɔn mìwonɔnɔwo yí sɔ agɔjeje ke mìwonɔnɔwo” gashiagamɛ. (Efe. 4:32) Eyi gbɔngbɔn mɛ paradiso lɔ adrodroɔ mɛ ciwo yí jinɔ mɔ wo le wa nu ɖaɖa yewo gbɔ ahan. b

 NƆ GBƆNGBƆN MƐ PARADISO LƆ MƐ

19. (a) Shigbe lé dakavi ci yí nyi “ Woso yí Gbetrɔgbɔ,” dasɛ yi nɛ ɖe, nyi mɛɖewo nu, ci wotrɔ yí gbɔ va gbɔngbɔn mɛ paradiso lɔ mɛ goduɔ? (b) Nyi mìaɖui awaɔ? (Kpɔ foto lɔ hɛnnɛ.)

¹⁹ Mìwo gbɔngbɔn mɛ paradiso lɔ jeŋ nɔ mì sugbɔ! Évanya kpɔkpɔ vyɛ yɛ sɔwu sa yí amɛ sugbɔ vakanfukɔ Yehowa yɛ sɔwu sa. Mína nɔ gbɔngbɔn mɛ paradiso ci Yehowa wa nɔ mì ajeŋ nɔ mì keke asɔyi mavɔ mavɔ. Mɛɖekpokpui ci yí daji mɔ shikɔ aci ye o, xodu aɖɔ ye, yeanɔ fafamɛ yí anɔ vofamɛɔ, ɖo ava gbɔngbɔn mɛ Paradiso lɔ mɛ yí ŋgbeso le mɛ gbeɖe o! Vɔ mìɖo akpɔ mìwoɖekiwo ji, ɖo Satana wakɔ ŋɖekpokpui ci ji ekpe keŋ aɖe mì so le mɛ. (1 Piɛ 5:8; Enyɔ. 12:9) Mìdalɔn nɔ aɖuji kpɔ o. Mína nɔ mìaje agbla veviɖe aglɔn eta nɔ gbɔngbɔn mɛ paradiso lɔ ci yí nyakpɔkpɔ, le kɔkɔɛɖe ci mɛ fafa le.