1. Paradizo mi tipo utie ang’o, man ukwayu wabed ku lembakeca mi timo ang’o?

 IWI NG’OM keni, paradizo moko unuti m’upong’ ku dhanu ma gibetimo tic dupa ma beco. Wend dhanune utie milion swa man gibekwo ku kwiyocwiny mandha. Ju ma dong’ gin’i paradizone gikeco nia gibiweke tak de ngo, man gibemito nia dhanu mange ma wendgi lee de gidikiri kugi i kabedo maeno ma segi. I andha, paradizo mi tipo a utie ang’o?

2. Lembang’o ma wang’u ijo i kum paradizo mi tipo?

² Etie lembe ma wang’u ijo nia Yehova uyiko kabedo mi kwiyocwiny ma lee i die ng’om ma Sitani unyotho kud adegi, ku timo ma reco man peko. (1 Yoh. 5:19; Nyu. 12:12) Mungu mwa ma jamer ubeneno peko ceke ma ng’om maeni ubenyayu i kum dhanu, man ebegwokowa wek kara wakwo ma ber i thenge mi tipo. Lembe pare ukoro nia paradizo mi tipo utie “kapondo” man “podho ma jukwoyo pi i wie.” (Isa. 4:6; 58:11) Nikum mugisa pa Yehova, dhanu ma gibekwo i iye gicopo nyego ku peko mi kajik ceng’ maeni.—Isa. 54:14; 2 Tim. 3:1.

3. Isaya thek 65 ugam upong’o nenedi con?

³ Nikadhu kud i bang’ jabila Isaya, Yehova ukoro kite ma kwo bibedo ko ni dhanu ma gibikwo i paradizo mi tipo. Lembe m’ekorone nwang’ere i Isaya thek 65 m’ugam upong’o  wang’ ma kwong’a con i oro 537 W.N.Y. I oro maeno, jugonyo Juyahudi ma giloko cwinygi kud i ng’eca i Babeli man gidok i ng’om ma thugi. Yehova umiyo igi mugisa man ekonyogi kara gidwok adhura mi Yeruzalem m’ukeunyothere udok leng’ kendo, man kara gidwok hekalu m’i iye udok kendo ni kabedo ma dit mi thier mandha i Israel.—Isa. 51:11; Zek. 8:3.

4. Isaya thek 65 ubepong’o nenedi tin?

⁴ Lembila pa Isaya ucaku pong’o wang’ mir arionde i oro 1919 N.N.Y. kinde ma Yehova ugonyo jutic pare mi rundi ma tin kud i ng’eca mi Babeli ma dit. I ng’eye, paradizo mi tipo ucaku medere nimew i wang’ ng’om zoo. Nenedi? Jurwey rwonglembe mi Ker ma weg amora gicaku the cokiri dupa man giponjo nicego nying tipo. Jumaco ku jumamon ma gikegibino weg rop man jutim lemsasa “[gironyo] ng’atu ma nyen m’ucwiyere nimakere ku yeny pa Mungu.” (Efe. 4:24) I andha, mugisa ma pol ma Isaya uweco pigi bipong’o i zoone i ng’om ma nyen m’ubebino. Ento kadok kawoni de wabenwang’u mugisa dupa. Dong’ wakenenu nia paradizo mi tipo uketho wabenwang’u bero ma kani man nia pirang’o wacikara ngo niwok kud i iye.

BERO MA WANWANG’U I PARADIZO MI TIPO

5. Calu ma Isaya 65:13 ung’olo, wabenwang’u bero ma kani i paradizo mi tipo?

⁵ Watie ku yotkum ma cuu man wabenwang’u yom. Lembila pa Isaya ubenyutho tung’ tung’ ma lee m’utie i kind kwo mi dhanu ma gin’i paradizo mi tipo ku mi ju ma gimbe i iye. (Som Isaya 65:13.) Yehova ubepong’o cuu mandha yeny mi jutic pare i thenge mi tipo. Watie ku tipo pare ma leng’, Lembe pare Biblia, ku cam mange mi tipo wek kara ‘wacam, . . . wamadhi, . . . [man wabed kud] anyong’a.’ (Nen lembe m’uyenyo rombo kude i Lembanyutha 22:17.) Ento lembe mi dhanu ma gimbe i paradizo mi tipo ukoc bor dit; ‘kec ubenegogi . . . , rieu ubenegogi . . . , [man] lewic de ubenegogi.’ Yeny migi mi tipo ubepong’o ngo acel de.—Amo. 8:11.

6. Giragora pa Yoel 2:21-24 ukoro ang’o iwi cam mwa mi tipo, man camne miyo iwa bero ma kani?

⁶ Jabila Yoel utiyo ku piny ma pigi tek i kwo ma calu nying cam, pigulok man mo i lembila pare, pi ninyutho nia Yehova pong’o cuu mandha yeny mi dhanu pare, eno ke kadok i thenge mi tipo. (Yoe. 2:21-24) Ebetimo kumeno nikadhu kud i Biblia, girasoma mwa m’ujengiri iwi Biblia, kusika mwa mir Internet man bende nikadhu kud i coko, coko ma dongo mi twodiri man mir adhura. Ecopere iwa nicamu cam mi tipo kubang’ ceng’, uketho watie ku yotkum ma cuu man wabenwang’u yom.

7. Ang’o ma miyo iwa “anyong’a mir adunde”? (Isaya 65:14)

⁷ Watie jumutoro man weg anyong’a. Dhanu pa Mungu gicopo ‘wer kud anyong’a’ pilembe adundegi udhir ku foyofoc. (Som Isaya 65:14.) Lemandha ma tielo yiyoyic man lembang’ola ma juko cwiny ma nwang’ere i Lembe pa Mungu man i genogen mwa m’ujengere iwi lam mi jamgony ma Kristu uthiero, miyo iwa “anyong’a mir adunde.” Niweco iwi lembe maeno kud umego ku nyimego mwa mi tipo ketho wabedo jumutoro ma lee dit!—Zab. 34:8; 133:1-3.

8. Piny ario ma kani ma pigi tek lee ma nwang’iri i paradizo mi tipo?

⁸ Mer man bedo i acel ma n’i kind dhanu pa Yehova utie piny ario ma pigi tek lee ma nwang’iri i paradizo mi tipo. Gikonyowa  nineno kite ma kwo bibedo ko i ng’om ma nyen, kaka ma jutic pa Yehova gibikwo i iye ku mer man i acel nisagu ma kawoni. (Kol. 3:14) Nyamegwa moko ukoro gin m’ewok eneno i kind dhanu pa Yehova kinde m’erombo kugi wang’ ma kwong’a, eyero kumae: “Nwang’u ang’eyo ngo ayi mi kwo kud anyong’a kadok i ot para. Wang’ ma kwong’a m’aneno mer ma ku timo ubino i kind Jumulembe pa Yehova.” Ng’atu moko ci m’ubemito ebed jamutoro man won anyong’a mandha, ucikere nikwo i paradizo mwa mi tipo. Ng’om maeni romo yero gin moko ci ku nying’ Jumulembe pa Yehova, ento i wang’ Yehova ku ju ceke m’ubewore, gitie ku nying’ ma ber.—Isa. 65:15.

9. Isaya 65:16, 17 ung’olo lembang’o pi masendi?

⁹ Wabewinjara ma ber man ma kumwa poto. Isaya 65:14 uyero nia ju ma ging’iyo nibedo woko mi paradizo mi tipo, ‘gibewak nikum can mir adunde man gibegoyo nduru nikum ang’abacwiny.’ Ka dong’ piny ceke m’uketho dhanu pa Mungu gibeneno can man gibesendiri e ke? M’umbe jiji, ‘wijo biwil i kumgi man gibibedo akana i wang’ Mungu.’ (Som Isaya 65:16, 17.) Yehova bikabu peko mwa ceke, man nok nok wiwa biwil magwei i kumgi.

10. Pirang’o etie mugisa ma lee nidikara kud umego ku nyimego mwa ma Jukristu? (Nen bende cal.)

¹⁰ Kadok kawoni de wawinjara ma ber saa ma wan’i coko pilembe kuca wiwa wil i kum masendi ma wabekadhu kud i igi i ng’om maeni. Waketho umego ku nyimego mwa bende giwinjiri ma ber i paradizo mi tipo nwang’u wabenyutho mer, anyong’a, kwiyocwiny, berocwiny man molcwiny, ma ceke utie nying tipo pa Mungu. (Gal. 5:22, 23) Etie iwa mugisa ma lee nibedo i dilo pa Yehova! Dhanu ceke ma gibemediri nibedo i paradizo mi tipo gibineno kite ma lembang’ola pa Yehova mi “polo ma nyen ku ng’om ma nyen” bipong’o ko i zoone.

11. Nimakere kud Isaya 65:18, 19, paradizo mi tipo ma Yehova ucwiyo uketho wabewinjara nenedi?

¹¹ Adundewa ubethukini ku foyofoc man kud anyong’a. I ng’eye Isaya unyutho thelembe m’uketho watie ku “mutoro [man] kud anyong’a” i paradizo mi tipo. Eyero nia Yehova re m’ucwiyo kabedo maeno. (Som Isaya 65:18, 19.) Pieno etie lembe ma kakare nia etii kudwa pi nikonyo dhanu mange giwok kud i dilo ceke mi ng’om maeni m’ubewingo wigi, kara gimond i paradizo ma leng’ mi tipo! Watie kud anyong’a pi mugisa ceke ma wabenwang’u  pilembe wan’i lemandha, man eno ubecwaluwa ninyutho pigi ni jumange.—Yer. 31:12.

12. Lembang’ola ma jukoro pigi i Isaya 65:20-24 uketho ibewinjiri nenedi, man pirang’o?

¹² Adundewa ubethukini bende ku foyofoc man kud anyong’a nikum genogen ma watie ko pilembe wan’i paradizo mi tipo. Kepar ndhu pi gin ceke ma wabineno man ma wabitimo i ng’om ma nyen pa Mungu! Biblia ung’olo kumae: “Mukere moko mbe . . . ma bikwo pi nindo ma nok kende, kadi ng’atu m’utii ma bidaru ngo rundi mi kwo pare.” ‘Wabigiero udi man wabibedo i igi, wabipidho podho mir ulok man wabicamu nying’gi.’ ‘Wabimulara ngo ku tic mi mananu’ pilembe ‘Yehova bipoko mugisa i wiwa.’ Eng’olo nia wabikwo ku bedomoth man nia kwo mwa bibedo ku thelembe m’atira. ‘Ma fodi walwong’o ngo,’ ebing’eyo yeny pa ng’atuman man ‘ebiyeng’o gin ceke ma kwo.’—Isa. 65:20-24, NWT; Zab. 145:16.

13. Isaya 65:25 ukoro ang’o iwi alokaloka ma dhanu gitimo kinde ma gicaku timo ni Yehova?

¹³ Watie museme man weg kwiyocwiny. Ku kony mi tipo pa Mungu, ju dupa ma gilar gibino ku timo ma reco gitimo alokaloka ma yerere ngo i kwo migi. (Som Isaya 65:25.) Gituc nibimo wi kura ma reco ma gibino ko. (Rum. 12:2; Efe. 4:22-24) I andha re, fodi asu dhanu pa Mungu gitie ku dubalaga, uketho kosa ubemedere nivuth iwa. Ento Yehova udiko “kwond dhanu ceke” ku jamtwic ma codere ngo mi mer man kwiyocwiny. (Tito 2:11) Etie udu ma Mungu ma jategokpo kende re ma copo timo!

14. Wec ma n’i Isaya 65:25 unen kamaleng’ i kwo p’umego moko nenedi?

¹⁴ Nyo andha dhanu gicopo loko timo migi? Wakewec iwi lapor pa jalawobi moko ma jugam jutwiyo ku oro 20 ma re i ng’eye judok jugonyo. Ebino won tarwang’ man jarop ma lee. Jugam jutwiye pi kwo mi muthukari, pi kwo ma juturo ko dhugola man pi kosa mange ma dongo. Ebino ayika ninyayu ali i dhu ng’atu moko ci. Kinde m’ewinjo lemandha mi Biblia wang’ ma kwong’a man ecaku cidho i coko mi Jumulembe pa Yehova, eyiyo andhandha nia enwang’u piny moko ma pire tek lee i kwo, niwacu paradizo mi tipo. I ng’ey m’elimo batizo pi nidoko Jamulembe pa Yehova, saa ceke ebed eparu pi kite ma lembe ma nwang’ere i Isaya 65:25 utuc nipong’o ko i kwo pare. Ewilo kura pare mi kwinyo ma calu p’umvor, man edoko mol calu urombo.

15. Pirang’o wabemito wakony dhanu mange de gibin gidikiri kudwa i paradizo mi tipo, man wacopo timo lembuno nenedi?

¹⁵ Giragora pa Isaya 65:13 (NWT) ucaku ku wec ma e: “Rwoth Ubimo ma Malu ngbir Yehova uwacu kumae.” Verse mi 25 uthum ku wec ma nia “Yehova wacu.” Wec pare ke pong’o kwa. (Isa. 55:10, 11) Kawoni dong’ paradizo mi tipo unuti. Yehova ucwiyo juruot mir umego ku nyimego ma gitie segi andhandha. I kind dhanu pare, wacopo bedo ku kwiyocwiny man museme i kadhiri moko i ng’om ma rac maeni. (Zab. 72:7) Pi thelembe maeno, wabemito wakony dhanu ma wendgi lee gidikiri ku juruot mwa mi Jukristu. Wacopo timo kumeno nwang’u wabemiyara zoo i tic mi ketho dhanu udok julub.—Mat. 28:19, 20.

TEL DHANU MANGE DE GIMOND I PARADIZO MI TIPO

16. Ang’o ma telo dhanu i paradizo mi tipo?

¹⁶ Ng’atuman m’i kindwa utie ku rwom ma pire tek mi ketho paradizo mi tipo  utel dhanu mange. Wacopo pong’o rwom maeno nwang’u wabelubo lapor pa Yehova. Ediyo ngo dhanu adiya kara gimond i dilo pare. Ento ‘etelogi’ ku yoo i bang’e. (Yoh. 6:44; Yer. 31:3) Ka ju m’adundegi tie ayika gibeponjo lembe iwi kite pare ma beco, gicoro i vute yot yot. Dong’ wacopo timo ang’o kara kura man timo mwa ma beco utel dhanu mange de gimond i paradizo mi tipo?

17. Wacopo telo dhanu mange nenedi i paradizo mi tipo?

¹⁷ Yo acel ma wacopo telo ko dhanu mange i paradizo mi tipo utie nikwo ma ber man ku mer ku juyic wadwa. Kinde ma dhanu mange gibino wang’ ma kwong’a i coko mwa, wabemito gin bende giwok giwinjiri calu dhanu ma gi juyic ungo ma copere gigam gicidho i coko i cokiri m’i Korintho ma con man giwok giwacu kumae: “Andhandha Mungu n’i kindwu.” (1 Kor. 14:24, 25; Zek. 8:23) Pieno, wacikara nimedara nitiyo ku juk ma nia ‘wabed ku kwiyocwiny i kindwa.’—1 Thes. 5:13.

18. Ang’o ma romo telo dhanu i dilo mwa?

¹⁸ Ukwayu saa ceke wabed waii nineno umego ku nyimego mwa calu Yehova. Wacopo timo kumeno nwang’u wabeketho wiwa zoo i kum kite migi ma beco kakare niketho wiwa i kum ng’ico migi ma wang’eyo de nia nindo moko bithum. Dong’ wayiku lembe ceke m’uwok i kindwa ku mer ma nwang’u ‘wabebedo ber ng’atuman ku wadi man ku wadi, nwang’u watie ku cwiny mi ngisi, man ayika niweko lembe m’i kindwa.’ (Efe. 4:32) E paradizo mi tipo bitelo dhanu ceke ma gimaru nia jukwo kugi kumeno. b

 MEDIRI NIBEDO I PARADIZO MI TIPO

19. (a) Calu ma sanduku ma thiwiye tie “ Gikegiwok kud i iye, ento i ng’eye gidwogo kendo i iye” unyutho, jumoko giyero ang’o i ng’ey ma gidwogo i paradizo mi tipo? (b) Ukwayu wabed ku lembakeca ma kani? (Nen bende cal.)

¹⁹ Wamaru paradizo mwa mi tipo lee mandha! Edoko leng’ nisagu zoo, man epong’ ku jutic pa Yehova nisagu m’i wang’e zoo. Wek wamedara ninyutho foyofoc ni Yehova rondo ku rondo pi paradizo mi tipo m’ecwiyo iwa. Ng’atu moko ci m’ubemito enwang’ yom, ebed kud anyong’a, ebed ma kume poto man museme, ucikere nimondo i paradizo mi tipo man kud eweke ki! Re wacikara nibedo ku wang’wa, pilembe Sitani ubeyenyo yore ceke m’ewodh kowa kud i iye. (1 Pet. 5:8; Nyu. 12:9) Kud wawek ire kare nyanok de. Dong’ wek wan ceke wagwok leng’o man kwiyocwiny mi paradizo mi tipo.