1. Kii i yé paradis i mbuu, mambe makidik di nlama yoñ?

 NGIM paradis i yé len hana ’isi, i i yé nyonok ni bôt ba ba pégi i boñ mam malam. Didun di bôt di nyééne mu, di niñik ikété bañga nsañ. I bôt ba ba ngwés bé pam mu kekikel. Ba naña ki ngandak bôt ipe i lo i yén mu ni bo. Imbe i paradis? Paradis i mbuu! a

2. Kii i yé hélha jam mu i paradis i mbuu?

² Hélha jam i yé le, Yéhôva a mpam i bot loñge homa hogbe i het bagwélél bé ba niñ ikété nsañ ni adna, tolakii ba niñ i béba nkoñ ’isi u Satan. (1 Yôhanes 5:19; Masoola 12:12) Nyambe wés nu gwéha a ntehe lelaa nkoñ ’isi unu u nwéés bôt ba binam ni mandutu, jon a nhôla bagwélél bé i bana pôla i gwélél nye ikété nwee ni maséé. Bañga yé i nhégha i paradis i mbuu ini ni “homa bôt ba nsolbene” ni “wom u u gwé ngandak malép.” (Yésaya 4:6; 58:11) Ni mahôla ma Yéhôva, i bet ba niñ munu paradis ini ba nkon bé yom yo ki yo woñi, ba niñ ki ikété maséé.​—Yésaya 54:14; 2 Timôtéô 3:1.

3. Bimbe biyônôl bi bisu kaat Yésaya pes 65 i bi bana?

³ Yéhôva a bi gwélél mpôdôl Yésaya inyu toñol lelaa  i bôt ba yé i paradis i mbuu ba ga niñ. U nla léba i ndoñi i i kaat Yésaya pes 65, biyônôl bi bisu bi mam ma, bi bé i nwii 537 B.N.Y. Hala a bé i ngéda bon ba Lôk Yuda, ba ba bi tam béba yap, ba bi pam minkôm i Babilôn, ba témb i loñ yap. Yéhôva a bi sayap bagwélél bé, a hôla bo i tiimba oñ tison i Yérusalem i i bi yila lipan, ba tiimba yak oñ témpel.​—Yésaya 51:11; Sakaria 8:3.

4. Lelaa kaat Yésaya pes 65 i nyon len?

⁴ Biyônôl bipe bi mbañ i, bi bé i nwii 1919 N.Y., i ngéda Yéhôva a bi kobol bagwélél bé minkôm mi Babilôn Nunkeñi. Ibôdôl ha nyen paradis i mbuu i bi bôdôl keñep ni nkoñ ’isi wonsôna. Batéé likalô ba makénd ba bi bôdôl bot makoda, ba hôlga bôt i hôlôs bilem bi bikristen. Hala a bi boñ le i bôt ba bé gwés bisañ i ngéda kôba, ba niñik kiki binuga, ba bi bôdôl “haba . . . mut yondo nu a bi héga inoñnaga ni sômbôl i Nyambe.” (Éfésô 4:24) Maliga ma yé le, ngandak bisai Yésaya a bi sima bi ga yon i mbok yondo. Ndi to nano, di nkôs ngandak bisai. Di tehe lelaa di niñ mu i paradis i mbuu i, ni inyuki di nlama bé pam mu kekikel.

KII I BET BA YÉ I PARADIS I MBUU BA NÔGDA

5. Kiki kaat Yésaya 65:13 i bi bôn, bimbe bisai di nkôs i paradis i mbuu len?

⁵ Mbôô ni le ba nje loñge. Mbañ Yésaya i ñunda maselna ma yé ipôla i bet ba yé i paradis i mbuu ni bôt bape ba nkoñ ’isi. (Añ Yésaya 65:13.) Yéhôva a ntibil yônôs ngôñ i bagwélél bé. Di gwé mbuu mpubi wé, Bañga yé le Bibel, ni ngandak bikaat ntôñ u mpémés inyu boñ le di “je, . . . di nyo, . . . [di] kon maséé.” (Hégha ni Masoola 22:17.) Maselna ni hala, i bet ba ta bé i paradis i mbuu ba yé “njal . . . , nyus i gwé bo . . . , ba nwo [yak] nyuu.” Ba nyi bé to njee a yé Nyambe.​—Amôs 8:11.

6. Inoñnaga ni kaat Yôel 2:​21-24, mambe makébla ma mbuu di nkôs, kii di nla boñ inyu boñ le ma bane bés nseñ?

⁶ Mbañ i Yôel i ngwélél gwom bi yéne bés nseñ kiki bo kôn, wai, lôñni môô ma ôlivé inyu unda le Yéhôva a nti litén jé ngandak bijek bi mbuu ni mam mape momasôna ba gwé ngôñ inyu bana hémle ngui. (Yôel 2:​21-24) Kiki hihéga, a nti bés Bibel, bikaat bi ntôñ, site internet yés, makoda ma sonde, makoda ma makiiña ni ma ndôn. Di gwé pôla i je loñge hiki kel, jon di yé mbôô.

7. Kii i mboñ le di bana ‘miñem mi mi yé mbôô’? (Yésaya 65:14)

⁷ Maséé ni mahak. Bagwélél ba Djob ba nla toi “leñ diléla” inyule miñem nwap mi ntinde bo i ti Yéhôva mayéga. (Añ Yésaya 65:14.) Biniigana bi Bibel bi bi ntina makénd, mimbônga mi Bañga i Nyambe ni botñem yés i i nset bé, bi nhôla bés i bana ‘miñem mi mi yé mbôô.’ Kinje maséé di nôgda i ngéda di nkwel ni lôk kéé yés i bôda ni i bôlôm mu bisai di nkôs!​—Tjémbi 34:8; 133:​1-3.

8. Mambe mam ma tôbôtôbô ima ma yé kiki yimbne i paradis i mbuu?

⁸ Bilem bi tôbôtôbô biba bi ñunda toi le di yé i paradis i mbuu: gwéha ni adna. I gwéha ini i i “ñat toi bôt” i nhôla bés i hégda lelaa niñ y’a ba i mbok  yondo, i het bagwélél ba Yéhôva ba ga kônde gwéhna, ba niñ ki ikété adna iloo i yom di ntehe len. (Kôlôsé 3:14) Sita yada i nkal bés i yom a bi nôgda i ngéda a bi boma bagwélél ba Yéhôva inyu ngélé bisu: “Me bé bé maséé to ndék, to ikété lihaa jem. Ngélé bisu le me tehe bôt ba ngwéhna toi, i bé Mbôgi Yéhôva.” Ibale mut a ngwés toi ba maséé, a jôp i paradis yés i mbuu. To nkoñ ’isi u nyoñ bagwélél ba Yéhôva lelaa, ba gwé jôl lilam i mis ma Yéhôva ni i mis ma i bet bobasôna ba ngwélél nye ’isi ni i ngii.​—Yésaya 65:15.

9. Kii kaat Yésaya 65:​16, 17 i mbôn inyu mam ma nlona bés njôghe ni mandutu i len ini?

⁹ Nwee ni hogbe. Yésaya 65:14 a nkal le, i bet ba mpohol i yén haa ni paradis i mbuu ba ga ‘bégél inyule ba nok njôghe i ñem, ba ga ee inyule miñem mi nsiida bo.’ I mam ma nlona bagwélél ba Djob njôghe ni njiiha m’a ke hee? Bibel i ntimbhe le i mam ma ma ga ‘hôiba, ma ga nyoi i mis ma Nyambe.’ (Añ Yésaya 65:​16, 17.) Yéhôva a ga mélés mandutu més, kayéle ngim ngéda i ga pam le di ga hoñol ha bé to mo.

10. Inyuki u ntehe hala kiki bisai i ba ntôñ ni lôk kéé i bôda ni i bôlôm? (Béñge yak titii.)

¹⁰ Yak i len ini, makoda ma yé ma hôgbaha bés i ngéda mandutu ma béba nkoñ ’isi ini ma nwéés bés. Di nkônde boñ le paradis yés i mbuu i ba loñge homa hogbe, i ngéda di nhôlôs bilem bi litam li mbuu kiki bo gwéha, maséé, nsañ, loñgeñem, ni ñem nlam. (Galatia 5:​22, 23) Kinje bisai bikeñi di gwé i ba ikété ntôñ u Djob! I bet ba nyén ikété paradis i mbuu ba ga tehe biyônôl bi mbañ i Nyambe ini le, a’ hek “ngii yondo ni hisi hi yondo.”

11. Inoñnaga ni kaat Yésaya 65:​18, 19, lelaa i paradis i mbuu Yéhôva a nhek i nhôla bés?

¹¹ Mayéga ni makénd. Yésaya a nke ni bisu i unda manjom ma ma ntinde bés i ‘kon maséé ni i leñ diléla’ mu i paradis i mbuu. Yéhôva nyen a nhek i paradis i mbuu i. (Añ Yésaya 65:​18, 19.) Jon hala a nhélés bé bés i tehe le Yéhôva a ngwélél bés inyu hôla bôt i pam i minlôñ mi béba nkoñ ’isi ini inyu jôp i paradis i mbuu! Kinje maséé di nok i tehe bisai di nkôs inyule di yé maliga, hala a ntinde bés i añle bôt bape hala.​—Yérémia 31:12.

12. Kii u nôgda i ngéda u nok mimbônga mi yé i kaat Yésaya 65:​20-24, inyuki?

 ¹² Di yé ki maséé inyu botñem ilam di gwé munu paradis i mbuu. Hégda le i mam di ga boñ, di tehe ki i mbok yondo! Bibel i mbôn le: “Nkéñéé man u u niñ ndik ndék dilo u ga ba ha bé nyoo . . . to mañ mut u u niñ bé dilo tjé tjodisôna.” Di ga ‘oñ mandap, di yééne ki mu, di ga bel nwom mi minkôô mi wai, di je ki matam map.’ Di ga “tumbba bé yañga” inyule ‘Yéhôva a ga sayap bés.’ A mbôn bés le di ga bana niñ i mbomboo, i i gwé ngim njômbi, ibabé i kon yom yo kiki yo woñi. “Ilole ba nlôndôl” nye, a ga yi kii hiki wada wap a gwé ngôñ, a “yônôs ki ngôñ i bihégél gwobisôna bi bi niñ.”​—Yésaya 65:​20-24; Tjémbi 145:16.

13. Lelaa kaat Yésaya 65:25 i ntoñol mahéñha bôt ba mboñ i ngéda ba mbôdôl gwélél Yéhôva?

¹³ Nsañ ni lisolbene. Mu i paradis i mbuu, ngandak bôt i i bééna maboñok ma binuga, i bi boñ mahéñha makeñi. (Añ Yésaya 65:25.) Ba bi jo sañ i ngui inyu tjôô bilem bibe. (Rôma 12:2; Éfésô 4:​22-24) Maliga ma yé le, bagwélél ba Nyambe ba ngi yii bikwéha, jon di ga ke ni bisu i boñ mahôha. Ndi Yéhôva a ñat “mintén mi bôt nwominsôna” mi mi ngwéhna, mi niñik ikété nsañ. (Titô 2:11) I nya hélha jam i, ndik Nyambe Nu ngui yosôna nyen a nla boñ yo!

14. Lelaa kaat Yésaya 65:25 i bi yônôl mankéé wada?

¹⁴ Baa bôt ba nla héñha toi mut wap kété? Di yoñ hihéga hini. Mañge wanda wada nu a bé jôbôk, a pamak i mok ibôdôl nu a bi pamna 20 ma nwii, a bé gwés bisañ ngandak, a ban-ga niñ i nyega. Ba bé ba gwel nye inyu wip u matôa, tole inyule a mbôk ndap inyu nip, ni mam mabe mape. A bé bebee i jo to ni njee. I ngéda a bi nok maliga inyu ngélé bisu, a bôdôl lo makoda ma Mbôgi Yéhôva, a nôgda le nano a nléba i yom a yéñék behee, paradis i mbuu. I mbus sôble yé, i bé i pam le a hoñol le kaat Yésaya 65:25 i bi yônôl toi nye. A bé mbondo njéé i ngéda bisu, ndi nano a nyila mut nsañ kiki man ntômba.

15. Inyuki di ngwés naña bôt bape i lo i jôp i paradis i mbuu, lelaa di nla boñ hala?

¹⁵ Yésaya 65:13 a mbôdôl ni bini bibuk le: “Hala nyen Nwet Bayemlikok le Yéhôva a nkal le.” Nlôñ 25 u mal ni bini bibuk le: “Hala nyen Yéhôva a mpot.” Hiki yom a mbôn, i nyon ndigi. (Yésaya 55:​10, 11) Ñ, i paradis i mbuu a bi bôn, i yé toi ha. A mbot ngim lihaa i tôbôtôbô i i yé ntjamak ni nkoñ ’isi wonsôna. I ngeñ u njôp mu i paradis i mbuu i, u nla léba ndék nsañ mut a yé le a bana munu nkoñ ’isi u njôô unu, w’a kon bé ki to yom yo ki yo woñi. (Tjémbi 72:7) Inyu hala nyen di mboñ kii yosôna di nla inyu hôla ngandak bôt i jôp lihaa jés li bilôk bikéé ntjamak ni nkoñ ’isi wonsôna. Di nla pam i boñ hala i ngéda di ntégbaha ngandak ngéda i nson i yilha bôt banigil.​—Matéô 28:​19, 20.

LELAA DI NLA ÔT BÔT BAPE I PARADIS I MBUU

16. Kii i ñôt bôt i paradis i mbuu?

¹⁶ Hiki wada wés a gwé ngim jam i boñ inyu i ti bôt bape ngôñ i lo  i paradis i mbuu. Di nla pam i boñ hala ibale di nkôna Yéhôva. A nyégsa bé bôt i jôp i ntôñ wé. Ndi “a ñôt” bôt i nyeni ni minyaô. (Yôhanes 6:44; Yérémia 31:3) I ngéda bôt ba miñem minlam ba nigil bilem gwé, tôbôtôbô gwéha yé, hala a ñôt bo i nyeni. Lelaa yak bés di nla ôt bôt i paradis i mbuu ni bilem gwés bilam, lôñni maboñok més?

17. Lelaa di nla ti bôt bape ngôñ i jôp i paradis i mbuu?

¹⁷ Njel yada inyu ôt bôt i paradis i mbuu i yé le di unda lôk kéé yés gwéha ni loñgeñem. Hala a mboñ le i ngéda bôt ba mbôdôl lo makoda més, ba nsôk nôgda kiki i bôt ba Korintô ba ba bé bé bikristen, ba bé nôgda i ngéda ba bé ke i makoda. I mam ba bi tehe ma bi tinde bo i kal le: “Nyambe a yé toi ipôla nan.” (1 Korintô 14:​24, 25; Sakaria 8:23) Jon, di nlama ke ni bisu i noñ maéba mana le: “Ni niñ ikété nsañ bé ni bé.”​—1 Tésalônika 5:13.

18. Kii i nla ôt bôt i ntôñ wés?

¹⁸ Di bana lem i tehe bilôk bikéé bi bôda ni bi bôlôm kiki Yéhôva a ntehe bo. Hala a nkobla le di bok mis bilem gwap bilam, he bé bibomb gwap, bi bi ga mal kel yada. Ibale ngimanôgla i mpam ipôla bés ni mankéé, di nla sañgal yo ikété gwéha, di ban-ga ‘loñgeñem bés ni bés, ni ñem konangoo, di nwéhlaga ki bés ni bés ni ñem wonsôna.’ (Éfésô 4:32) Ni i njel i nyen paradis i mbuu i ga ôt bôt ba ba ngwés le ba bôñôl bo hala. b

 DI YÉN MU I PARADIS I MBUU

19. (a) Kiki di ntehe i minkéñék mi matila mi mi gwé ño le “ Ba bi pam ba témb ba jôp,” kii bôt bahogi ba bi kal i ngéda ba bi témb i paradis i mbuu? (b) Mambe makidik di nlama yoñ? (Béñge yak titii.)

¹⁹ Di yé maséé ngandak ni paradis yés i mbuu! I nlôôha ba ilam masañ mana iloo i ngéda bisu, i yé ki nyonok ni bôt ba mbégés Yéhôva. Di kee ni bisu i ti mayéga inyu i paradis ini Yéhôva a nhek inyu yés. Di naña bôt bobasôna ba ba ngwés bana hogbe, i bet ba nyéñ ba nwee ni maséé, ni i bet ba nyéñ homa lisolbene i lo i jôp mu, ñ, ba nyodi ha bañ mu kekikel! Ndi di nlama yoñ yihe, inyule Satan a mboñ kii yosôna a nla inyu lop bés le di pam mu. (1 Pétrô 5:8; Masoola 12:9) Di tinak bañ nye pôla kekikel. Di sal ni ngui inyu sôñ bilama bi paradis i mbuu, mapubi mé ni nsañ wé.