1. Unsa ang espirituwal nga paraiso, ug unsay determinado natong himoon?

 NAAY paraiso karon dinhi sa yuta nga puno kaayog mga tawo. Ang minilyong tawo nga naa dinhi naghimog maayong mga buhat ug naay tinuod nga kalinaw. Kadtong nagpuyo niini nga paraiso determinado gyod nga dili mobiya niini. Gusto pod nilang tabangan ang daghang tawo kutob sa mahimo nga makapahimulos niining nindot kaayong kahimtang. Unsa kini? Ang espirituwal nga paraiso! a

2. Nganong talagsaon kaayo ang espirituwal nga paraiso?

² Makapahingangha kay si Jehova naghimog malinawon kaayong kahimtang niining kalibotan ni Satanas nga grabe ka peligroso, punog pagdumot, ug daotan kaayo. (1 Juan 5:19; Pin. 12:12) Nakita sa atong mahigugmaong Diyos nga kining sistemaha nakahatag gyod ug grabeng kadaot sa mga tawo, pero naghatag siyag kasegurohan sa iyang katawhan aron padayon silang makaalagad kaniya nga malipayon. Ang iyang Pulong nag-ingon nga ang espirituwal nga paraiso maoy luwas nga “dangpanan” ug “maayong pagkatubig nga tanaman.” (Isa. 4:6; 58:11) Tungod sa panalangin ni Jehova, kadtong nagpuyo niini nga paraiso malipayon ug mibating luwas bisan pa niining lisod kaayo nga kataposang mga adlaw.—Isa. 54:14; 2 Tim. 3:1.

3. Unsa ang unang katumanan sa Isaias kapitulo 65?

³ Pinaagi kang propetang Isaias, gipakita ni Jehova kon unsay kahimtang niadtong mopuyo sa espirituwal nga paraiso. Imo ning mabasa sa Isaias kapitulo 65, nga unang natuman niadtong 537 B.C.E. Niadtong panahona, ang mahinulsolong mga Hudiyo gipagawas gikan sa pagkabihag sa Babilonya ug mibalik sa ilang yutang natawhan. Gipanalanginan ni Jehova ang iyang katawhan  ug gitabangan sila nga mapanindot ang nagun-ob nga siyudad sa Jerusalem ug matukod pag-usab ang templo nga maoy sentro sa matuod nga pagsimba sa Israel.—Isa. 51:11; Zac. 8:3.

4. Sa unsang paagi ang Isaias kapitulo 65 natuman sa atong modernong panahon?

⁴ Ang ikaduhang katumanan sa tagna ni Isaias nagsugod niadtong 1919 C.E. dihang ang mga magsisimba ni Jehova sa modernong panahon nakagawas gikan sa pagkabihag sa Bantogang Babilonya. Dayon ang espirituwal nga paraiso naporma, anam-anam nga midako, ug nakaabot sa lainlaing bahin sa yuta. Ang madasigong mga magsasangyaw sa Gingharian nagpormag daghang kongregasyon ug nakaugmad ug Kristohanong mga hiyas. Ang mga tawo nga kaniadto bayolente ug imoral nagsul-ob na sa “bag-ong personalidad nga gihimo sumala sa kabubut-on sa Diyos.” (Efe. 4:24) Siyempre, daghan sa mga panalangin nga gihisgotan ni Isaias literal nga matuman sa umaabot pa nga bag-ong kalibotan. Pero bisan karon, nakabenepisyo na ta sa daghang mga panalangin. Hisgotan nato kon unsang mga panalangin ang atong natagamtam sa espirituwal nga paraiso ug kon nganong dili gyod ta angayng mobiya niini.

KON UNSAY KAHIMTANG NIADTONG NAA SA ESPIRITUWAL NGA PARAISO

5. Sumala sa gisaad sa Isaias 65:​13, unsay atong natagamtam sa espirituwal nga paraiso?

⁵ Himsog ug lagsik. Ang tagna ni Isaias klarong nagpakita kon unsay kalainan sa kinabuhi niadtong naa sa espirituwal nga paraiso ug niadtong wala. (Basaha ang Isaias 65:13.) Gitagbaw gyod ni Jehova ang espirituwal nga panginahanglan sa iyang mga magsisimba. Gihatag niya ang iyang balaang espiritu, ang iyang Pulong, ug ang dagayang espirituwal nga pagkaon aron kita “mangaon, . . . manginom, . . . [ug] magsadya.” (Itandi ang Pinadayag 22:17.) Pero lahi kaayo ang kahimtang niadtong naa sa gawas sa espirituwal nga paraiso kay sila ‘gigutom, giuhaw, ug nag-antos sa kaulawan.’ Ang ilang espirituwal nga panginahanglan wala gyod matagan-i.—Amos 8:11.

6. Unsay giingon sa Joel 2:​21-24 bahin sa espirituwal nga mga tagana nga atong nadawat, ug sa unsang paagi nakabenepisyo ta niini?

⁶ Sa tagna ni Joel, gihisgotan niya ang pangunang mga panginahanglan sama sa lugas, bino, ug lana sa olibo aron ipakita nga dagayang gitagan-an ni Jehova ang Iyang katawhan sa ilang mga panginahanglan, apil na sa espirituwal nga pagkaon. (Joel 2:​21-24) Iya kanang gitagana pinaagi sa Bibliya ug sa atong binase sa Bibliya nga mga publikasyon, atong website, mga tigom, asembliya, ug kombensiyon. Mapahimuslan nato ang maong espirituwal nga mga tagana kada adlaw, ug pinaagi ana, mas mohimsog ta ug molagsik.

7. Unsay nakahatag natog “maayong kahimtang sa kasingkasing”? (Isaias 65:14)

⁷ Malipayon ug kontento. Ang katawhan sa Diyos “maninggit sa kalipay” kay ang ilang kasingkasing punog apresasyon. (Basaha ang Isaias 65:14.) Ang makapadasig nga mga kamatuoran ug makapahupayng mga saad sa Pulong sa Diyos ug ang atong lig-ong paglaom nga gibase sa halad lukat sa Kristo nakahatag natog “maayong kahimtang sa kasingkasing.” Ang pagpakig-estorya bahin niini uban sa atong mga igsoon makapalipay gyod nato!—Sal. 34:8; 133:​1-3.

8. Unsa ang duha ka pangunang butang nga makita gyod nato sa espirituwal nga paraiso?

⁸ Ang gugma ug panaghiusa sa katawhan ni Jehova mao ang duha ka pangunang butang nga makita gyod nato sa espirituwal nga paraiso. Kini nga “bugkos sa panaghiusa” naghatag natog ideya kon unsa unya ang kinabuhi didto sa bag-ong kalibotan, diin ang mga alagad sa Diyos makaeksperyensiyag labaw pa gyod nga gugma ug panaghiusa. (Col. 3:14) Gihisgotan  sa usa ka sister kon unsay iyang namatikdan sa katawhan ni Jehova dihang una niya silang nailhan. Siya miingon: “Dili ko malipayon, bisan diha sa akong pamilya. Pero sa unang higayon, nakita nako ang tinuod nga gugma diha sa mga Saksi ni Jehova.” Si bisan kinsa nga gusto gyong magmalipayon ug mahimong kontento kinahanglang makaeksperyensiya sa atong espirituwal nga paraiso. Bisag unsa pay hunahunaon niining kalibotana bahin sa mga alagad ni Jehova, nahibalo ta nga naa tay maayo kaayong ngalan, o reputasyon, atubangan kang Jehova ug sa tanan nga nagsimba kaniya.—Isa. 65:15.

9. Unsay gisaad sa Isaias 65:​16, 17 bahin sa atong mga kasakit ug pag-antos karon?

⁹ Relaks ug kalmado. Ang Isaias 65:14 nag-ingon nga kadtong modesisyon nga dili mosulod sa espirituwal nga paraiso “motuaw tungod sa kasakit sa kasingkasing [ug] motiyabaw tungod sa gun-ob nga espiritu.” Pero unsay himoon sa Diyos sa mga butang nga nakahatag ug kasakit ug pag-antos sa iyang katawhan? Sa ngadtongadto, kining mga butanga “makalimtan [ug] matago gikan sa . . . mga mata” sa Diyos. (Basaha ang Isaias 65:​16, 17.) Wad-on ni Jehova ang atong mga problema, ug sa ngadtongadto, ang kasakit nga resulta sa pait nga mga eksperyensiya mawala na sa bug-os.

10. Nganong gibati nimo nga panalangin gyod nga makauban ang atong mga igsoon? (Tan-awa sab ang hulagway.)

¹⁰ Bisan karon, makahatag natog kalinaw ang pagtambong sa mga tigom, kay dinhi mobati tang relaks ug malimtan nato ang atong mga problema niining daotang kalibotan. Makatabang pod ta sa atong mga igsoon nga mobating relaks ug kalmado kon ipakita nato ang gugma, kalipay, pakigdait, pagkabuotan, ug kalumo, nga apil sa bunga sa espiritu sa Diyos. (Gal. 5:​22, footnote, 23) Panalangin gyod nga mahimong bahin sa organisasyon sa Diyos! Kadtong magpabilin sa espirituwal nga paraiso makakita sa bug-os nga katumanan sa saad sa Diyos nga “bag-ong mga langit ug bag-ong yuta.”

11. Sumala sa Isaias 65:​18, 19, unsay angayng epekto kanato sa espirituwal nga paraiso nga gihimo ni Jehova?

¹¹ Mapasalamaton ug eksayted. Gipakita ni Isaias kon nganong daghan tag rason nga ‘magsadya ug maglipay’ sa espirituwal nga paraiso. Si Jehova ang naghimo niini nga kahimtang. (Basaha ang Isaias 65:​18, 19.) Dili ikatingala nga gigamit ta niya aron tabangan ang mga tawo sa pagbiya sa relihiyosong mga organisasyon nga wala magtudlo sa kamatuoran ug sa pagsulod sa atong nindot kaayong espirituwal nga paraiso! Mapasalamaton kaayo ta sa mga panalangin nga atong nadawat kay naa ta sa kamatuoran,  ug napalihok ta nga sultihan ang uban bahin niini.—Jer. 31:12.

12. Unsay imong gibati sa mga saad nga gihisgotan sa Isaias 65:​20-24, ug ngano?

¹² Ingong mga residente sa espirituwal nga paraiso, mapasalamaton ug eksayted kaayo ta sa atong paglaom sa umaabot. Hunahunaa lang ang tanan natong makita ug puwedeng himoon sa bag-ong kalibotan sa Diyos! Ang Bibliya nagsaad: “Wala na unyay masuso . . . nga mabuhi lag pipila ka adlaw, ug tag-as na unya kaayog kinabuhi ang mga tigulang.” Kita “magtukod [ug] mga balay ug magpuyo niini, ug magtanom [ug] mga ubasan ug magkaon sa bunga niini.” “Dili [ta] maghago sa wala lamay kapuslanan” kay kita ‘panalanginan ni Jehova.’ Nagsaad siya nga hatagan ta niyag kinabuhi nga makapatagbaw, may kasegurohan, ug naay tinuod nga katuyoan. “Bisan sa dili pa sila motawag,” nahibalo na siya sa panginahanglan sa matag usa ug iyang “tagbawon ang tinguha sa tanang buhing linalang.”—Isa. 65:​20-24; Sal. 145:16.

13. Unsay giingon sa Isaias 65:25 bahin sa kausaban nga gihimo sa mga tawo dihang misugod sila sa pag-alagad kang Jehova?

¹³ Malinawon ug luwas. Sa tabang sa espiritu sa Diyos, daghan niadtong samag mananap ug kinaiya ang nakahimog dagkong kausaban sa ilang kinabuhi. (Basaha ang Isaias 65:25.) Nadaog nila ang ilang kanhing dili maayong mga kinaiya. (Roma 12:2; Efe. 4:​22-24) Siyempre, ang katawhan sa Diyos dili pa hingpit, busa masayop gihapon ta. Pero gipahinabo ni Jehova nga magkahiusa ang “tanang matang sa tawo” pinaagi sa dili mabugto nga bugkos sa gugma ug kalinaw. (Tito 2:11) Kini maoy milagro nga ang Labing Gamhanang Diyos ra ang makahimo!

14. Sa unsang paagi ang Isaias 65:25 tinuod gyod sa kahimtang sa usa ka brader?

¹⁴ Kaya ba gyong bag-ohon sa mga tawo ang ilang personalidad? Konsideraha ni nga eksperyensiya. Ang usa ka batan-ong lalaki nga imoral ug pagkinabuhi ug bayolente kaayo nagsige nag kapriso sa edad pa lang nga 20. Napriso na siya tungod sa pagpangawat ug sakyanan, pagpangransak, ug ubang seryosong krimen. Makig-away gyod siya kang bisan kinsa. Dihang nadunggan niya ang kamatuoran sa Bibliya sa unang higayon ug misugod pagtambong sa tigom sa mga Saksi ni Jehova, nakita niya ang katuyoan sa iyang kinabuhi—ang pagsimba kang Jehova sa espirituwal nga paraiso. Human siya mabawtismohi, pirme niyang mahunahunaan nga tinuod gyod sa iyang bahin ang Isaias 65:25. Kaniadto, bayolente siya sama sa leyon, pero nausab siya ug nahimong makigdaiton sama sa karnero.

15. Nganong gusto natong dapiton ang uban nga mosulod pod sa espirituwal nga paraiso, ug unsaon nato na paghimo?

¹⁵ Ang Isaias 65:13 nagsugod niining mga pulonga: “Kini ang giingon sa Soberanong Ginoong Jehova.” Ang bersikulo 25 natapos sa mga pulong nga “miingon si Jehova.” Ang iyang giingon kanunay gyong matuman. (Isa. 55:​10, 11) Ang espirituwal nga paraiso tinuod ug naglungtad na karon. Si Jehova naghimog panag-igsoonay nga talagsaon kaayo. Uban sa iyang katawhan, naa tay kalinaw ug mibati tang luwas niining gubot nga kalibotan. (Sal. 72:7) Tungod ani, gusto natong tabangan ang daghan kutob sa atong maarangan nga mahimong bahin sa atong panag-igsoonay. Busa gusto natong magkugi sa buluhaton nga paghimog tinun-an.—Mat. 28:​19, 20.

SA UNSANG PAAGI MADANI ANG UBAN SA ESPIRITUWAL NGA PARAISO?

16. Sa unsang paagi ang mga tawo makabig sa espirituwal nga paraiso?

¹⁶ Ang matag usa nato dakog mahimo sa pagtabang sa uban nga madani sa espirituwal nga paraiso. Mahimo nato ni kon atong sundogon si Jehova. Wala niya pugsa ang mga tawo sa  pagsulod sa iyang organisasyon. Hinuon, anam-anam niyang “gikabig” ang mga tawo paingon kaniya. (Juan 6:44; Jer. 31:3) Dihang ang maayog kasingkasing nga mga tawo makakat-on bahin sa mahigugmaong mga hiyas ni Jehova ug sa iyang nindot nga personalidad, madani gyod sila kaniya. Pero sa unsang paagi ang atong nindot nga mga hiyas ug maayong panggawi makadani sa mga tawo sa pagsulod sa espirituwal nga paraiso?

17. Unsay atong mahimo aron madani ang uban sa espirituwal nga paraiso?

¹⁷ Ang usa ka paagi nga madani nato ang uban sa espirituwal nga paraiso mao ang pagpakitag gugma ug kaayo sa atong mga igsoon. Dihang ang mga bag-ohan motambong sa atong mga tigom, gusto nato nga masulti pod nila ang giingon sa mga dili magtutuo nga posibleng mitambong sa mga tigom sa karaang Corinto. Sila miingon: “Ang Diyos anaa gayod sa inyong taliwala.” (1 Cor. 14:​24, 25; Zac. 8:23) Busa kinahanglang maningkamot ta nga padayong sundon ang tambag nga ‘makigdait sa usag usa.’—1 Tes. 5:13.

18. Unsa tingali makadani sa mga tawo ngadto sa atong organisasyon?

¹⁸ Kinahanglang maningkamot ta kanunay nga isipon ang atong mga igsoon sama sa pag-isip ni Jehova kanila. Mahimo nato na pinaagi sa pagpokus sa ilang nindot nga mga hiyas ug dili sa ilang mga kahuyangan, nga sa ngadtongadto mawala ra. Masulbad nato ang mga dili pagsinabtanay sa mahigugmaong paagi kon ‘magpakita tag kaayo sa usag usa, magmabination, ug kinasingkasing nga magpinasayloay.’ (Efe. 4:32) Pinaagi ana, ang mga tawo nga nangandoy pod nga trataron sila sa mahigugmaong paagi madani sa espirituwal nga paraiso. b

 MAGPABILIN SULOD SA ESPIRITUWAL NGA PARAISO

19. (a) Sumala sa makita sa kahong “ Sila Mibiya ug Mibalik,” unsay giingon sa uban dihang nakabalik na sila sa espirituwal nga paraiso? (b) Unsay determinado natong himoon? (Tan-awa sab ang hulagway.)

¹⁹ Seguradong naapresyar gyod nato ang atong espirituwal nga paraiso! Mas minindot pa ni karon, ug daghan na kaayong magsisimba ni Jehova ang nagpuyo dinhi. Hinaot nga kanunay tang magmapasalamaton sa paraiso nga gihimo ni Jehova para nato. Si bisan kinsa nga gustong mahimong lagsik, kontento, kalmado, ug luwas kinahanglang mosulod sa espirituwal nga paraiso ug dili gyod mobiya niini! Pero kinahanglan tang mag-amping kay si Satanas naningkamot sa paglit-ag nato aron mobiya ta niini nga paraiso. (1 Ped. 5:8; Pin. 12:9) Dili nato tugotan nga molampos siya. Maningkamot gyod ta nga panalipdan ang kanindot, kahinlo, ug kalinaw sa espirituwal nga paraiso.