1. Paraizu womuyani txini, vina txini enfwanyelihu ogana?

 MASAKA abano ohikalawo paraizu munkala attu matxikwi na matxikwi na murenddele vina anna dhilobo dhinji dhokosa. Attuya ankala mparaizuni mpo ahigana ohibudduwamo. Awene vina anfuna wi attu enji akale na awene mwenemo. Paraizuya oddo dduvi? Paraizu womuyani! a

2. Txini ennitikiniha nigalogaga mwaha wa paraizu womuyani?

² Jotikina mukalelo owodhile Yehova wita mburho wofwaseya vari va elabo esaddulile Satana bikala mburho mudhalile obure, widdana vina dhilobo dhawopiha. (1 Jo 5:19; Ovuh. 12:12) Mulugu wehu wokwela onoziwa wi kahiye elobo yovevuwa okala mwilaboni eji yabure, masiki dhawene iyene ononivaha nibarelo ninfunehu wi nidhowegevi nunuwaga mpaddi womuyani wi niwodhe odhowavi nimulabelaga iyene na wagalala. Bibilia onoladdaniha paraizu womuyani na “vothawela” vina na jardim oregariwe. (Iza. 4:6; 58:11) Na mareliho a Yehova, abale ankosa mpaddi wa paraizu womuyani anowagalala vina anobareleya masiki akalaga masiku aba omariha ali orutxa vaddiddi.—Iza. 54:14; 2 Tim. 3:1.

3. Mazu a Izaiya kapitulu 65 akwanihedheyile mudhidhi gani dila yoroma?

³ Yehova ohimulabihedha namavuhulela Izaiya, wi alebe mukalelo ogakalile egumi mparaizu womuyani. Enowodheya weyo wengesa mazu aba munivuruni na Izaiya kapitulu 65, nivuhulo ntti nihakwanihedheya vamaromo yaka ya 537 AEC. Mudhidhi ofuruliwe Ayuda o Babilónia beyelela elabo yawa. Yehova oruriha nlogo naye vina ohakamihedha Ayuda ovenyihedha  muttette wo Jezeruzalemi watolotxiwe. Ayuda agahikosa Jezeruzalemi wili okala mburo wokoddela wafwanyelela okaliwa, agahivenyihedha mparha wi okale mburo wowebedha mu Izrayel.—Iza. 51:11; Zak. 8:3.

4. Mazu a Izaiya kapitulu 65 anakwanihedheya dhavi masaka abano?

⁴ Wakwanihedheya wa nivuhulo mpaddi wanawili oromile yaka ya 1919 EC. Yakene ejile alabeli a Yehova ahifuruliwa mBabilonia Munddimuwa. Ovenyana wenewo paraizu womuyani ohiroma wunuwa vina dhihitiwa milogo dhowinjiva orugunuwa elabo yotene. Alobwana na ayana attukula mweddelo wohifwanyelela vina ali awali ahiroma alagiha mikalelo dhapama dh’Okristu vina ahiroma wabala omuttu muswa opaddutxiwe na efunelo ya Mulugu. (Ef. 4:24) Ebaribari wi, mareliho menji alebile Izaiya anakwanihedheye musogorho mwilaboni eswa. Mbwenyi masiki dhawene, ovanene abale ankosa mpaddi wa paraizu womuyani anokana dhopurelamo dhinjidhene. Ndoweni none ekalelani yamakamaka okosa mpaddi wa paraizu womuyani vina sabwa ehifwanyelihu ottiya okosa mpaddi wa paraizuya.

ONIVIWAMO DHAVI SABWA Y’OKOSA MPADDI WA PARAIZU WOMUYANI

5. Mowiwanana na Izaiya 65:​13, dhopurelamo gani dhinkana iyo sabwa ya okala mparaizu womuyani?

⁵ Ninokana egumi vina dhoja dhapama mpaddi womuyani. Nivuhulo na Izaiya ninolagiha ottiyana wa egumi ya attu ali mparaizu womuyani na wa abale ahili mparaizu womuyani. (Kengesa Izaiya 65:13.) Yehova onowavaha adhari aye dhotene dhinfunani wi adhowegevi amwebedhaga iyene. Iyene ononivaha muya waye wokoddela, Nzu naye Bibilia, vina dhoja dhinji dhomuyani wila iyo nije, nimwe, vina nagalale. (Kaladdaniha na Ovuhulela 22:17.) Mottiyana na iyo, abale otene ahinkosa mpaddi wa paraizu womuyani “anere wona dala . . . , nthona” vina anokana manyazo. Awene kana mandano ofiyedheya na Mulugu.—Amós 8:11.

6. Jowel 2:​21-24 ontapulela dhavi dhilobo dhinnivaha Yehova vina ninapurelemo dhavi dhetene dhinnivahiye?

⁶ Namavuhulela mwina Jowel ologa dhilobo dhinlabihedhihu siku na siku ninga sereyali, vinyu, na azeiti (makura) wi onihe otapuwa mada wa Yehova, nona iyene ohinivaha dhotene dhinfunihu mpaddi womuyani. (Jow. 2:​21-24) Yehova onkosa ejuwene alabihedhaga Bibilia, mapubilikasau ehu, site jw.org vina matugumano ehu a mulogoni, a murudda vina a ttattamwa. Nigapurelamo dhotene dhinnivaha Yehova, ninele okana egumi vina ninele ojihiwa pama mpaddi womuyani.

7. Txini ennivaha wagalala wa mmirimani? (Izaiya 65:14)

⁷ Wagalala vina ottugareya. Alabeli a Mulugu “anerege wiba n’ohagalala” sabwani mmurimani mwawa muhidhala omutamalela Yehova sabwa ya dhotene dhinkosiye. (Kengesa Izaiya 65:14.) Iyo nikana wagalala wammurimani, dhibaribari dha mBibiliani dhinnilibiha vina njedhelo nehu nebaribari nindela sabwa ya mukutto wa Yezu. Ottiya ejo ologa makani na abali na arogora mwaha wa njedhelo ntti enonagalaliha vaddiddi!—Masal. 34:8; 133:​1-3.

8. Mikalelo gani minli dhinoneya mparaizu womuyani?

⁸ Okwela vina wiwanana onfwanyeya mwari mwa nlogo na Yehova mikalelo minli dhamakamaka dhinoneya mparaizuni womuyani. “Wiwanana” oku ononiha mukalelo onakale egumi mwilaboni eswa, adhari a Yehova agakalagawo nowiwanana vina okwela opitta masaka abano. (Kol. 3:14) Murogora dhahi onologa yoniliye dila yoroma yaziwiliye anamoona a Yehova: “Miyo kaddaziwa yatapulela  okana wagalala, nne vina na anamudhi aga. Dila yoroma yonilimi wi attu txibarene anokwelana bu mudhidhi waziwilemi Anamoona a Yehova.” Muttu-muttuvi ofuna okana wagalala webaribari onofwanyelela oziwa paraizu wehu womuyani. Masiki attu alogaga dhetene dhinfunani mwaha wa anamoona a Yehova, iyo ninoziwa wi nikana nzina na pama, vina ninowoniwa deretu na abalihu na arogora orugunuwa elabo yotene.—Iza. 65:15.

9. Mowiwanana na Izaiya 65:​16, 17 txini enapadduwe na dhilobo dhotene dhinnitotela makattamiho?

⁹ Ofwasa. Va Izaiya 65:14 iyo ninowengesa enapadduwela attu ansakula ohikosa mpaddi wa paraizu womuyani, awene anokuwa sabwa ya wiwa opa wa mmurimani vina anowunla sabwa ya osegedheya wawa. Ebaribari wi nlogo na Mulugu vina ninogumana na makattamiho menjene. Mbwenyi, mohigonela “anere odduwaliwa; kanavire vina vamentoni [va Mulugu].” (Kengesa Izaiya 65:​16, 17.) Yehova onele ogomiha makattamiho otene, vina na mudhidhi dhubuwelo dhotene dhihinfwanyelela dhinnitotela goyi dhinele ogoma kakamwe.

10. Onlogela nni wi olaba vamodha na abali na arogora onodhana mareliho manddimuwa? (Koona vina foto.)

¹⁰ Masiki masaka abano, ninoviwamo pama nigakala mmatugumanoni, mwenemo iyo ninodduwala dhilobo dhinnizuzumiha esuwene dhinpadduwa mwilaboni eji yabure. Nigalagiha mikalelo dhinbala muya wa Mulugu ninga okwela, ottaba, murenddele, opama vina okurumuwa, ninokosa mpaddi wehu wi paraizu womuyani okale mburo wofwasa. (Gal. 5:​22, 23) Mwa iyo notene, mareliho manddimuwa okosa mpaddi wa nikuru na Mulugu! Abale andhowavi akalaga mparaizu womuyani mohigonela anele wona kakamwe wakwanihedheya wa nipikirhelo na Mulugu wa opaddutxa “erimu, [na] elabo eswa.”

11. Mowiwanana na Izaiya 65:​18, 19, oniviwamo dhavi sabwa ya oziwa wi Yehova ohipaddutxa paraizu womuyani?

¹¹ Otamalela vina oziveliwa. Izaiya ononivaha mwaha mwina onnittukulela wagalala vina ottaba mparaizu womuyani. Paraizu oddu ottanddiwe na Yehova. (Kengesa Izaiya 65:​18, 19.) Makuru ali mwilaboni kanasunziha attu mwaha wa Mulugu, nona jononeleyamo Yehova onilabihedha wi nakamihedhe attu ohikosa mpaddi wa makuru aba vina wakamihedha okosa mpaddi wa paraizu oddu womuyani wokoddela vaddiddi! Iyo ninowagalala venjene na mareliho otene anakelihu sabwa ya okala mwebaribari vina ninofuna wawaddela  attu otene mareliho aba apama vaddiddi.—Jer. 31:12.

12. Oniviwamo dhavi ogengesa nipikirelo ninfwanyeya va Izaiya 65:​20-24, vina sabwaya jani?

¹² Iyo ninowagalala vina ninotamalela na murima wehu wotene nigobuwela njedhelo ninehu sabwa ya okosa mpaddi wa paraizu womuyani. Kobuwela vang’onovi mukalelo onakale egumi mwilaboni eswa! Bibilia onologa: “Kamunakwege mwana wa mmadani, nne munddimuwa ahinathi wakwaniha nsaka naye.” Attu “anere omaga numba dhawa, akalegemo; anere otxeya mvidera dhawa, ajege anya.” “Kanalabelege yovi” sabwani anele orurihiwa na Yehova. Iyene onopikirela onivaha egumi yapama, na nibarelo vina wagalala. Nihinatti omwittana, Yehova onele oziwa enfuna muttu-muttu vina onele onivaha dhotene dhinunlelihu.—Iza. 65:​20-24; Masal. 145:16.

13. Izaiya 65:25 ononiha dhavi matxinjo ankosa attu agasunza ebaribari?

¹³ Nibarelo vina murenddele. Na nikamihedho na muya wokoddela attu enji ali awali, abure vina ohikuluveleya ahikosa matxinjo manddimuwa mwigumini mwawa. (Kengesa Izaiya 65:25.) Na ovilibihedha awene ahiwodha ottiya mikalelo dhawa dhabure. (Rom. 12:2; Ef. 4:​22-24) Ebaribari wi sabwa ya ohiligana wehu ninele odhowavi nikosaga dhovonya. Mbwenyi Yehova onowawiwananiha “athu etene” animukwela vina ankwelana muttu na mukwaye, yodhelavoya, iyo ninokana murenddele vina wiwanana webaribari. (Tito 2:11) Aba matikiniho agawodhile bahi Mulugu wowodha-wodha okosa!

14. Yotagiha ya mbali dhahi enoniha dhavi wi mazu anfwanyeya va Izaiya 65:25 bebaribari?

¹⁴ Enowodheya txibarene muttu otxinja mikalelo dhaye? Koona epadduwile na muzombwe dhahi. Masiki vaniyena vyaka 20 wahifugeliwa dila dhinjene mukambura, vina wahikana mweddelo wohifwanyelela, ottiya ejo wali muwali vaddiddi. Iyene wahifugeliwa sabwa ya wiya karo, mmatakuluni mwa attu na dhilobo dhina. Iyene wanziveliwa owana na attu ena. Musunziliye dhibaribari dha mBibiliani baroma wona matugumano na Anamoona a Yehova, iyene wahikana ebaribari yawi wahifwanya elobo yattukulela egumi yaye okana ttima—paraizu womuyani. Vabatiziwiye, dila dhinjene iyene wanubuwela mukalelo wakwanihedheya Izaiya 65:25 mwigumini mwaye. Iyene wahittiya okala muttu wa owali ninga poddogoma, bakala muttu wa murenddele ninga mwana-nibila.

15. Ninakonvidarela nni ena wi akose mpaddi wa paraizu womuyani, vina ninawodhe dhavi okosa ejuwene?

¹⁵ Izaiya 65:13 onoroma na mazu aba “Nabuya Mulugu [onologa] dhahi.” Oku versu 25 ongoma alogaga, “onloga ddi Nabuya.” Iyo ninoziwa wi mapikirhelo a Yehova dila dhotene anowakwanihedheya. (Iza. 55:​10, 11) Kuloga paraizu womuyani ohikalawo. Yehova ohawiwananiha anamudhi animulabela vina ahinladdanihiwa. Mwari mwa nlogo na Yehova enowodheya okana murenddele ekalaga ninga nili vawavene wa elabo eji yabure. (Masal. 72:7) Jijuwene ennittukulela wakamihedha attu enjene wi avitaganyihe na iyo mwari mwa anamudhi aba ali orugunuwa elabo yotene. Enowodheya okosa ejuwene sabwa ya ozuzumela mabasa a wakosa anamafwara.—Mt. 28:​19, 20.

NINAWODHE DHAVI WAKAMIHEDHA ENA OFUNA OKOSA MPADDI WA PARAIZU WOMUYANI?

16. Txini enakamihedhe ena ofuna okosa mpaddi wa paraizu womuyani?

¹⁶ Iyo notene ninowodha okosa elobo yamakamaka wi nakamihedhe ena ofuna  okosa mpaddi wa paraizu womuyani. Ninokosa ejuwene nigamutagiha Yehova. Iyene kanimudidela muttu okosa mpaddi wa nikuru naye. Ottiya ejo iyene onowakukusela attu na mukalelo wapama. (Jo. 6:44; Jer. 31:3) Nona kinwodheya muttu omalile osunza mikalelo dha Yehova vina omuttu waye ohifuna okala marho waye. Kito mikalelo dhehu dhapama vina mweddelo wehu dhinakamihedhe dhavi attu ena ofuna okosa mpaddi wa paraizu womuyani?

17. Ninawodhe dhavi wakukusela ena mparaizu womuyani?

¹⁷ Mukalelo mmodha wa wakamihedha attu ofuna okosa mpaddi wa paraizu womuyani bwa waweddiha abalihu na arogora na okwela vina opama. Muttu agadha wona matugumano dila yoroma, iyo ninfuna wi iyene aviwemo na mukalelo wakakene oviwilemo attu onile matugumano mmulogoni w’o Korinto a nsaka na wale. Awene ahiloga: “Txibarene Mulugu oli na nyuwo.” (1 Kor. 14:​24, 25; Zak. 8:23) Wi ejo epadduwe ninofwanyela odhowavi nifwaraga nlago na wedda na murenddele vari vehu.—1 Tes. 5:13.

18. Txini egadhile wakukusela attu mu nikuruni mwehu?

¹⁸ Iyo ninofwanyela wawona abalihu na arogora dhahene ninga munawonela Yehova. Ninkosa ejuwene nigazuzumela mikalelo dhawa dhapama ottiya dhovonya dhawa, sabwani mohigonela dhovonya esi kadhinakalewo vina. Enowodheya ogwadda makani anihu na abalihu na okwela modhela okala attu apama, anneddelana ttagaraga vina anlevelelana muttu na mukwaye. (Ef. 4:32) Dhahene paraizu womuyani onele wakukusela attu anfuna weddihiwa na mikalelo dhene esi. b

 OKALEGEVI MPARAIZU WOMUYANI

19. (a) Mowiwana na kasha “ Awene Ahibudduwa vina Ahiyela,” elobo gani elogile attu ena sabwa ya wiyelela mparaizu womuyani? (b) Txini enfwayelihu ogana? (Koona vina foto.)

¹⁹ Iyo ninowagalala venjene sabwa ya okosa mpaddi wa paraizu womuyani! Masaka abano paraizu oddu womuyani enodhowavi ekoddelaga, vina attu enjene anokosa mpaddi wa paraizu womuyani opitta wale. Nimutamalele Yehova namukalakala sabwa ya onipaddutxela paraizu oddu. Akala muttu onfuna akane wagalala, ofwasa vina nibarelo, enfwanyeliye okosa ja okala mparaizu womuyani vina ohibudduwamo! Mbwenyi nikaleni txenjewa, sabwani Satana onodhowavi akosaga muli-mwetemwene wi aninyengette vina aniburutxe mparaizu womuyani. (1 Ped. 5:8; Ovuh. 12:9) Txipo kaninamuttiye iyene owodha okosa ejuwene. Ninele okosa mpaka vanwodhelihu wi nibarele okoddela, otxena vina murenddele onihu mparaizu womuyani.