1. (1) ¿Kʼãrẽta jarakĩrãbʉ ẽjũã kĩrãwãreã jauredebemabara? (2) ¿Kʼãrẽta oita krĩchaibara?

 IDI ewadera bʉ ẽjũã kĩrãwãreãta naʉ̃ drʉadera, ¿saʉ̃ maʉ̃ ẽjũã kĩrãwãreãra? Maʉ̃ra ẽjũã kĩrãwãreã jauredebema. a Maʉ̃ ẽjũã kĩrãwãreã jauredebemanera ẽbẽrarã mejãchabʉ akʉza ãyira aduʼapanʉ. Adewara kãgapanʉ wuabema ẽbẽrasida maʉ̃ne eda panamarẽã. Krĩchapanʉ maʉ̃ ẽjũã kĩrãwãreã jauredebara ãĩ wã ẽ baita.

2. ¿Kʼãrẽa yibia ẽjũã kĩrãwãreã jauredebemara?

² Idi ewadera dayirãra panʉ ẽbẽra kayiruarabawara akʉza ẽbẽrarãbara opanʉ Diaruba zokʼabʉta. Maʉ̃ kʼarea Jeowabara parãsi ẽjũã kĩrãwãreã jauredebemata, dayirãta mama aduʼa akʉza ãba panamarẽã (1 Juan 5:19; Apoc. 12:12). Jeowabara akʉbʉ ẽbẽrarã naʉ̃ drʉade bʉra sãwũã mejãcha zʉbʉriabʉta, mamina Jeowabara iyi ode panʉrãra kʼarebabʉ aduʼa bamarẽã mawũã iya zokʼabʉta sobiade opanamarẽã. Daizeze Bedʼeabara jarabʉ naʉ̃ ẽjũã kĩrãwãreã jauredebemara dayi mĩrʉbari kĩrãkʼa bʉta (Is. 4:6; 58:11). Maʉ̃ba yi ẽbẽrarã maʉ̃ne eda panʉra sobia panʉ akʉza aduʼa panʉ (Is. 54:14; 2 Tim. 3:1).

3. ¿Isaías 65ba jarabʉra sãwũã aripe berabarisi nããra?

³ Propeta Isaíasdeba Jeowaba jara ũrĩbisi ẽbẽrarã maʉ̃ ẽjũã kĩrãwãreãne panairãra sãwũã baibasita. Bʉa maʉ̃ ʉ̃rʉ  jara ũrĩbibʉ ũduira jʉrʉseabʉ Isaías yi zroma 65de. Mama bedʼea jarabʉra nekʼãrẽ ũmene aripe berabaribasi. Yi nããrabemara aripe berabarisi poaga 537de. Naʉ̃ ewaridera judiora kayirua odapeadara jẽda krĩchadara Babilonianeba ẽdrʉbisida akʉza ãyira jẽda wãsi ãyi drʉaeda. Jeowabara nebiata diasi iyi pʉwʉrʉara akʉza kʼarebasi ãya Jerusalénʼnebema templota audre biʼia ara odamarẽã mawũã iyaʼa yiwidʼidaita mamaʉ̃ba (Is. 51:11; Zac. 8:3).

4. ¿Idi ewadera sãwũã aripe berabaribʉ Isaías yi zroma 65ba jarabʉra?

⁴ Isaíasba propesia jaradara akʉza aripe berabarisi poaga 1919de, dayirã ewaride. Naʉ̃ ewaridera Jeowa ode panʉrabara idubʉsida Babilonia zromane eda panʉta. Maʉ̃ tẽã naʉ̃ ẽjũã kĩrãwãreã jauredebemara audre eaba wãsi. Daizeze Nokʼo ʉ̃rʉ jaradiapanʉra kongregasionʼrata audre eaba wãsida akʉza ãya maʉ̃neba nebiata ũdusida. Ẽbẽrarã yõmiabadaraba, kĩrʉmiabadaraba maʉ̃ta idubʉ kʼãrãpe nebiata ũdubisida kristianone kĩrãkʼa (Efes. 4:24). Wãrĩnu baira Isaíasba nebia zei jarabʉra, wãrĩnu aripe berabarinʉmʉta ũdudayi ẽjũã kĩrãwãreã zebʉrʉdebʉrʉ. Mawũãsidu idi ewadebida dayirãba nebiata ũdupanʉ. Akʉdaya kʼãrẽa yibiata dayirã maʉ̃ ẽjũã kĩrãwãreã jauredebemane eda bʼaita akʉza kʼãrẽa jipade ãĩ wã ẽ baibarata maʉ̃neba.

¿SÃWŨÃ PANɄ ẼBẼRARÃ ẼJŨÃ KĨRÃWÃREÃ JAUREDEBEMANE PANɄRÃRA?

5. ¿Isaías 65:13ba jarabʉdebara kʼãrẽ nebiata ũdupanʉ ẽjũã kĩrãwãreã jauredebemanera?

⁵ Bia nekopanʉ. Isaías propesia jaradaba jara ũrĩbibʉ kʼãrẽne awuara panʉta ẽbẽra ẽjũã kĩrãwãreã jauredebemane panʉrata akʉza yi ẽbẽrarã maʉ̃neba ãĩ panʉrata (akʉra Isaías 65:13). Jeowabara iyi ode panʉrãra diakĩrã diabʉ ãya nekʼãrẽ nesidabʉta mawũã iyi kʼawa panamarẽã. Dayirãbara erpanʉ Daizeze jaure zareata, iyi Bedʼeata akʉza yiko jauredebemata mejãcha. Mawũã audre Jeowa kʼawa panamarẽã akʉza sobia panamarẽã (akʉra naʉ̃ testoʉ̃me Apocalipsis 22:17). Mamina naʉ̃ra ẽbẽrarã ẽjũã kĩrãwãreã jauredebemaneba ãĩ panʉra jarrabade berabaribʉ akʉza sobiapanʉ ẽ ãyira yiko jauredebema neẽ baera, maʉ̃ba Daizeze kʼawa babe ẽ (Amós 8:11).

6. (1) ¿Joel 2:​21-24 bayeda sãwũã jara ũrĩbibʉ Jeowaba dayirãba nesidabʉ diabʉra? (2) ¿Kʼãrẽ nebiata ũduseapanʉ?

⁶ Joelba iya propesia bʉdade bedʼeasi nekʼãrẽ dayirãba ewari za zokʼabʉ ʉ̃rʉ. Bari jaraita netata, binota akʉza aseite olibadeta, mawũã ũdubita Jeowabara dayirãʼa ewariza diabʉta nekʼãrẽ dayirãba nesidabʉta, yiko jauredebemasida diabʉta (Joel 2:​21-24). Iya dayirãba nesidabʉra diabʉ Daizeze Bedʼeadeba, kartara Daizeze Bedʼeadebemaneba, ãba yi jʉrebarima wãbʉrʉdeba akʉza asambleaeda wãbʉrʉdeba, adewara dayirã pagina internetʼneba. Dayirãba maʉ̃ yiko jauredebemata ewariza erpanʉ baera, naʉ̃ba kʼarebabʉ dayirã zarea panaita.

7. ¿Kʼãrẽba wãrĩnu sobiabibʉ dayirãra? (Isaías 65:14).

⁷ Sobiapanʉ. Jeowa pʉwʉrʉra mejãcha sobiapanʉ ãya Jeowaʼa biga diapanʉ baera (akʉra Isaías 65:14). Dayirãba wãrĩnu kʼawuadaba, Daizeze Bedʼeade bedʼea bia ũdubʉba akʉza Jesu beidadeba nebia jʉ̃ãbʉba kʼarebabʉ dayirã so aduʼa bʼaita. Naʉ̃ ʉ̃rʉ mebẽrãbawara bedʼeabʉrʉba dayirãra wãrĩnu sobiabibʉ (Sal. 34:8; 133:​1-3).

8. ¿Kʼãrẽta ũdubipanʉ ẽjũã kĩrãwãreã jauredebemanera?

 ⁸ Ẽbẽrarã ẽjũã kĩrãwãreã jauredebemane eda panʉbara ũdubipanʉ kãgata akʉza ãba bakĩrãpanʉ. Idi ewade mawũã panʉba dayirãʼa krĩchabibʉ ẽjũã kĩrãwãreã zebʉrʉdera sãwũã audre yi kãga ũdubidaita akʉza ãba panaita (Col. 3:14). Mebẽã wẽrã abaʉba jara ũrĩbibʉ iyi sãwũã sentidata Jeowa ʉ̃rʉ Kʼawuabipanʉrã ũdu kʼawuaside: «Mʉ̃ra dedara sobia ba ẽ basi akʉza mʉ̃ mebẽrãbawarabida, mamina mʉ̃a kʼawuasi sãwũã wuabemara wãrĩnu kãga ũdubira Jeowa ʉ̃rʉ Kʼawuabipanʉrã ũdu kʼawuaside». Baduta wãrĩnu sobia bakĩrãbʉbʉrʉ eda wãibara ẽjũã kĩrãwãreã jauredebemane. Krĩcha ẽ baibara ẽbẽraba sãwũã krĩchabʉta Jeowa ʉ̃rʉ Kʼawuabipanʉrã ʉ̃rʉ, maʉ̃rãra Jeowaitara akʉza yi mebẽrãitara ẽbẽra bia baera (Is. 65:15).

9. ¿Kʼãrẽta berabariya abʉ Isaías 65:​16, 17 bayeda?

⁹ Aduʼapanʉ. Isaías 65:14de jara ũrĩbibʉ ẽbẽrarã ẽjũã kĩrãwãreã jauredebemane panʉ ẽãra sopʉapanaita akʉza jẽgadaita ãyita bia panʉ ẽ baera. Mamina, ¿kʼãrẽba sãwũãi Daizeze pʉwʉrʉ zʉbʉriabibʉra? Daizezebara jarabʉ: «Nãã zʉbʉria ũdubadara kĩrãduai baera akʉza mʉ̃ dabʉdeba merai baera» (akʉra Isaías 65:​16, 17). Jeowabara jipa jõbiyi bedʼea zroma dayirãba ũdubʉra, ewari berabari wãne mia kʼãrẽsi kĩrãbeda ẽ bayi nekʼãrẽ dayirã zʉbʉriabibadara.

10. Bʉmara ¿yibiaka mebẽrãbawara ãba bʼaita? (Akʉra potota).

¹⁰ Idi ewade dayirã ãba yi jʉrebarima wãira jipade yibia namara aduʼa panʉ baera akʉza krĩchada ẽ nekʼãrẽ dayirã zʉbʉriabibʉ ʉ̃rʉ. Adewara kʼarebapanʉ dayirã mebẽrãsida aduʼa panamarẽã ãyaʼa neta jauredebema ũdubibʉrʉde, kãgata, bʉzridata, neneẽãta, ibiadebʉta akʉza urumʉ̃rʉãbʉta (Gál. 5:​22, 23). Kʼãrẽ yibia dayirãra Jeowa organizasione eda panʉ baera. Yi ẽbẽrarã ẽjũã kĩrãwãreã jauredebemane eda panʉrabara ũdudayi Jeowaba nebia weya abʉra wãrĩnu aripe berabaribʉta.

11. Isaías 65:​18, 19ba jarabʉdebara ẽjũã kĩrãwãreã jauredebemanebʉba, ¿kʼãrẽta obibʉ akʉza kʼãrẽa?

¹¹ Biga diapanʉ. Isaíasba jara ũrĩbibʉ ẽjũã kĩrãwãreã jauredebemane panʉrãra kʼãrẽa sobiapanʉta. Naʉ̃ ẽjũã kĩrãwãreã jauredebemara Jeowaba parãsi (akʉra Isaías 65:​18, 19). Idi ewadera organizasionʼra  naʉ̃ drʉadebemarabara wãrĩnuta jaradia ẽ Daizeze ʉ̃rʉ. Mamina jipade yibia Jeowaba dayirãta zokʼabʉ baera kʼarebaita naʉ̃ra ẽbẽrarã ãĩ wãnamarẽã naʉ̃ organizasion zeri ẽãneba, ẽjũã kĩrãwãreã jauredebemane eda panamarẽã. Mejãcha sobiapanʉ Jeowa organizasione eda panʉ baera, maʉ̃ kʼarea jaradiakĩrãne jaradiapanʉ awuru ẽbẽrarãbida (Jer. 31:12).

12. Isaías 65:​20-24ba jarabʉbara, ¿sãwũã sentibibʉ bʉra akʉza kʼãrẽa?

¹² Adewara ẽjũã kĩrãwãreã jauredebemane panairãra mejãcha sobiapanʉ nebia zeita jʉ̃ãpanʉ baera. Krĩchadadrʉ Daizezeba ẽjũã kĩrãwãreã weya abʉde kʼãrẽta oi ʉ̃rʉ akʉza kʼãrẽta ũdui ʉ̃rʉ. Daizeze Bedʼeaba jarabʉ wũãwũã zakerata akʉza zõrãrãra wua bei ẽ baita. Adewara dera yi parãnanebaita akʉza ne ura yi udadebaita, bari trajada ẽ bayi Jeowaba nebiata diai baera. Jeowabara jarabʉ dayirãra aduʼa panaita akʉza wãrĩnu sobia panaita. Jeowabara jʉ̃ã ẽ bayi dayirãba iyaʼa sõbede widita kʼãrẽta kãgabʉta, iyara naena kʼawuabai baera dayirãba kʼãrẽta kãgabʉta, mõbe diayi dayirãba kãgabʉta mawũã sobia panamarẽã (Is. 65:​20-24; Sal. 145:16).

13. Isaías 65:25ba jarabʉdebara, ¿kʼãrẽta idubʉebʉ ẽbẽrarãbara Jeowa ode bʼaita?

¹³ Urumʉ̃rʉãpanʉ. Daizeze ode panʉra mejãchaʉta, nããrãra yõmia basi, kĩrʉmia basi mamina Daizeze jaure zareaba kʼarebasi ãya nãã obadata idubʉdamarẽã akʉza idi ewade awuara panamarẽã (akʉra Isaías 65:25). Ãyara mejãcha zarea ozebʉda ãya nekʼãrẽ aña obadata idubʉita (Rom. 12:2; Efes. 4:​22-24). Daizeze pʉwʉrʉdebemarãra kayirua omia baera edaʉde nekʼãrẽ aña opanʉ idi basidu. Mawũãsidu Jeowabara ẽbẽrarã badumaebemata iyi pʉwʉrʉeda webʉ naʉ̃ra ẽbẽrabara iyita kãgapanʉ baera akʉza wuabemarata. Naʉ̃ba kʼarebabʉ aduʼa panaita akʉza ãba panaita (Tito 2:11). Ẽbẽrarã naʉ̃ drʉa jõmaʉ̃maebemata kʼãwũã ãba bʼaira mia abaʉ ẽbẽrarã naʉ̃ drʉadebemaba oau ẽ, mamina Jeowabʉrʉ oseabʉ maʉ̃ra.

14. ¿Mebẽã abaʉde sãwũã aripe berabarisi Isaías 65:25ba jarabʉra?

¹⁴ Ẽbẽra abaʉba nekʼãrẽ kayiruata obasibʉrʉ iya maʉ̃ra idubʉseabʉ, akʉdaya naʉ̃ yizata. Kʉ̃ra aba 20 poaga bʉta karsel eda edepanʉta biobasi, iyira jipade yõmia basi akʉza nekayiruata mejãcha obasi, adewara nezrʉgamiabasi. Iya Daizeze Bedʼea ʉ̃rʉ kʼawuaside akʉza ẽjũã kĩrãwãreã jauredebema ũdu kʼawuaside mejãcha sobiasi. Iyi buru kʼoeda tẽã iya ũdusi Isaías 65:25ba jarabʉra sãwũã aripe berabarisita iyide, iyira nããra nedʉwʉrʉ mĩsia kĩrãkʼa basi, mamina atiara urumʉ̃rʉãbʉ.

15. ¿Kʼãrẽa trʉ̃panʉ ẽbẽrarãta ẽjũã kĩrãwãreã jauredebemama zemarẽã akʉza sãwũã opanʉ maʉ̃ra?

¹⁵ Isaías 65:13ba jara ũrĩbibʉ naʉ̃ta: «Naʉ̃ta jarabʉ Jeowa nejõma zokʼaseabʉbara». Yi wikakirʉ 25 de naʉ̃ta jarabʉ: «Mawũã jarabʉ Jeowaba». ¿Kʼãrẽa yibia nama bedʼea jarabʉra? Naʉ̃ bedʼeara Jeowaba jarasi baera akʉza Jeowara sewanebʉrʉ oẽ (Is. 55:​10, 11). Idi ewade ũdupanʉ maʉ̃ra aripe berabarinʉmʉta dayirã mebẽrã akʉbʉrʉde. Dayirã audu ẽbẽra kayiruarata mejãcha bʉmina Jeowa pʉwʉrʉde panʉrãra aduʼa sobia panʉ, naʉ̃ ẽjũã kĩrãwãreã jauredebemara Jeowaba parãsi baera (Sal. 72:7). Maʉ̃ kʼarea ẽbẽrarã jaradiapanʉ maʉ̃ ʉ̃rʉ ãyisida Daizeze ode panamarẽã (Mat. 28:​19, 20).

 WEDADRɄ WUABEMARASIDA ẼJŨÃ KĨRÃWÃREÃ JAUREDEBEMAMA

16. ¿Kʼãrẽta oibara ẽbẽrarã ẽjũã kĩrãwãreã jauredebemane eda bʼaira?

¹⁶ Dayirã aba abaka zarea odaibara ũdubidaita kʼãrẽa yibiata ẽjũã kĩrãwãreã jauredebemane eda baira. Mawũã odaira dayirãbara oseabʉ Jeowade kĩrãkʼa. Jeowabara ẽbẽrarã ajuerzade iyi ode babi ẽ (Jer. 31:3; Juan 6:44). Mamina ẽbẽra bia baibara akʉza iyi sãwũãbʉta ũdu kʼawuakĩrãbaibara. Adewara iyi sode kʼãrẽ nebia erbʉta ũdukʼawuakĩrãbaibara. Mawũã bʉ ẽbẽratrʉ iyi pʉwʉrʉde eda baseabʉ. Dayirãbara ¿kʼãrẽta oibara akʉza kʼãrẽ nebiata ũdubibara ẽbẽrarã Daizeze pʉwʉrʉde eda bamarẽã?

17. Dayirãbara ¿kʼãrẽta oseabʉ ẽbẽrata ẽjũã kĩrãwãreã jauredebemane eda bamarẽã?

¹⁷ Wuabema ẽbẽrarã dayirãbara Daizeze oeda zebisepanʉ dayirãi wãrĩnu kãgapanʉta ũdubipanʉbʉrʉ. Kãgapanʉ wuabemara ʉ̃rabʉrʉ ãba yi jʉrebarima zebʉrʉdera krĩchadamarẽã, dayirãra wãrĩnu yi kãgapanʉta. Mawũã berabarisi kongregasion Corintodebemane. Ẽbẽrarã jʉ̃ẽkata jʉ̃ẽsida ãba yi jʉrepanʉmae ãya ũdusida mebẽrãra ãyirai yi kãga ũdubipanʉta. Maʉ̃ kʼarea ãya naʉ̃ta jarasida: «Daizezera wãrĩnu marane eda bʉ» (1 Cor. 14:​24, 25; Zac. 8:23). Maʉ̃ kʼarea dayirãra mebẽrã kongregasionebemabawara aduʼa sobiapanaibara (1 Tes. 5:13).

18. ¿Kʼãrẽba kʼarebaseabʉ ẽbẽrarã Jeowa pʉwʉrʉeda zemarẽã?

¹⁸ Dayirãbara akʉda ẽ baibara mebẽrã kongregasionebemaba ãya kʼãrẽ aña obʉta akʉza kʼãrẽ nemitia obʉta. Awuarabʉrʉ akʉdaibara Jeowaba akʉbʉ kĩrãkʼa ãyi nebiata. Dayirãta mebẽrã kongregasionebemabawara bedʼea zromata erbʉbʉrʉ  naʉ̃ testoba jarabʉ kĩrãkʼa oseapanʉ: «Sobiabeidʉa wuabemarabawara, kãga akʉidʉa mara mitia odara kĩrãduaidʉa» (Efes. 4:32). Mawũã opanʉbʉrʉ wuabema ẽbẽrasida ẽjũã kĩrãwãreã jauredebemama zekĩrãnañi ãyisida abarika edadamarẽã. b

ẼJŨÃ KĨRÃWÃREÃ JAUREDEBEMANE EDA BARA

19. (1) ¿Kʼãrẽta jarapanʉ ʉ̃kʉrʉ ẽjũã kĩrãwãreã jauredebemaneba ãĩ wãnabara? Akʉra rekuadrota: « Ãĩ wãpe jẽda zesi». (2) ¿Kʼãrẽta odaita krĩchadaibara? (Akʉra potota).

¹⁹ Ẽjũã kĩrãwãreã jauredebemane eda bʼaira arigʉ yibia. Maʉ̃ba ẽbẽrarã mejãchaʉta mama eda panʉ. Maʉ̃ kʼarea dayirãbara Jeowaʼa ewari jõmaʉ̃nẽ biga diapanaibara. Yi ẽbẽrarã sobia akʉza aduʼa adewara neneẽã bakĩrãpanʉrabara jʉrʉibara ẽjũã kĩrãwãreã jauredebemata akʉza maʉ̃neba ãĩ wãita krĩcha ẽ baibara. Diarubara nekʼãrẽ jõma obʉ dayirãta maʉ̃neba ãĩ jʉretaita (1 Ped. 5:8; Apoc. 12:9). Maʉ̃ kʼarea dayirãra jʉra kʼawuapanaibara maʉ̃ʼa yi sewabi ẽ baita. Dayirãra zarea odaibara maʉ̃ ẽjũã kĩrãwãreã jauredebema bia akʉita mawũã aduʼa panaita.