1. Sobit otmik bag mhunnttlear kitem, ani ami kitem korunk nichov korunk zai?

 AIZ PRITHUMER ek sobit bag asa, zoim lakʼkhamnim lok sangata mellon xantin jietat. Tanche modem khoro mog asa ani borim kamam korunk tim soglim vavr korit asat. Ani hi bag kednanch soddun vochona zaunk tannim ghott nichov kela. Titlench nhoi, anikui zaito lok thoim ieun tanche sangata xantin jielʼlim tankam zai. Tor tumi ghoddie chintit: Hi khoinchi bag ani ti khoim asa? Hi khori bag nhoi, punn ek sobit otmik bag zaun asa, zoim lok Jehova Devachi bhokti kortat, ani bhav-bhoinnam sangata ani Jehova sangata tanchi ghott ixttagot asa.

2. Jehovan toiar kelʼli sobit otmik bag ojapachi kiteak asa?

² Aiz ami Soitanachea noxttea sonvsarant jietat, zoim lok eka-mekacho dves kortat ani matui surokxit nant. (1 Ju. 5:19; Prok. 12:12) Tori astana, Jehovachea lokam modem poristhiti veglli asa. Tim ekvottan ani xantin jietat. Hem kitlem ojapachem nhoi! Hea noxttea sonvsarak lagon amkam kosle dukh-tras sosunk poddttat tem Jehova bore bhaxen zannam. Hea pasot tannem aiz eka orthan ek osli sobit bag toiar kelea, zoim ami surokxit ani khuxal ravon tachi seva korit ravonk xoktat. Hea zagea vixim Bible sangta ki to amkam ek “asro” ani ‘eke ximplole bage sarko’ zaun asa. (Iz. 4:6; 58:11) Hanga aslolea lokancher Jehovachem besanv asa dekhun, hea kotthin nimannea disamnim pasun tim khuxal ani surokxit asat.—Iz. 54:14; 2 Tim. 3:1.

3. Izaias odheai 65-ant asloli bhasaunni poile pavtti koxi purnn zali?

 ³ Sobit otmik bagent jietolea lokanchi poristhiti koxi astoli tea vixim sangonk, Jehovan Izaias provadeak uzar kelo. Tea vixim amkam Izaias odheai 65-ant vachunk melltta. Hi bhasaunni poilea pavtti 537 K.X.A.-ant purnn zali. Tea vellar, poschatap kelʼlea Judevank Babilonantlean soddoile, ani tankam porot aplea ganv-ghora ieunk mellʼllem. Jehovan aplea lokancher axirvad ghatlo ani nisonntton zalʼlem Jeruzalem porot bandunk tankam modot keli. Toxench, Devmondir porot bandunk ani Izraelant khori bhokti novean suru korunk Jehovan tankam adar dilo.—Iz. 51:11; Zek. 8:3.

4. Izaias odheai 65-ant sangloli bhasaunni aiz koxi purnn zata?

⁴ Izaiasachi bhasaunni dusrea pavtti 1919 K.X.-ant purnn zaunk lagli. Tea vellar, Jehovachim sevokam Bollixtt Babilonantlean bhair sorlim ani uprant otmik bag sovkas-sovkas korun vaddonk lagli. Urbevont porgottnnaram sonvsarbhor porgottnni korunk laglim. Hea pasot zaiteo sobha suru zaleo ani sobhentlea bhav-bhoinnamnim Kristi gunn apnnaile. Eka vellar ekdom krur aslim ani onoitik jivit jietalim tannim “Devache khuxe pormonnem asa tosli novi vagnnuk” apnnaili. (Ef. 4:24) Hem khorem ki Izaiasan sanglolim zaitim besanvam amkam fuddarachea sobit bagent mellttolim. Punn atam pasun, hea sobit otmik bagent jietana amkam zaitea vattamnim faido zata. Tor amkam koso faido zata ani ami kiteak ti bag kednanch soddun voichi nhoi tem polloum-ia.

SOBIT OTMIK BAGENT ASLOLEANK KOXEM BHOGTA?

5. Izaias 65:13-nt sanglam toxem, sobit otmik bagent asat tankam koslo faido asa?

⁵ Tim khaun-pieun ghott-mutt asat. Sobit otmik bagent jietat ani tantunt jienant tanchea modem ek vhoddlo ontor asa mhunn Izaiasachea bhasaunnentlean amkam kolltta. (Izaias 65:13 vachat.) Hea bagent asat tankam aplea sangata ixttagot ghott dovrunk Jehova goroz tem soglem dita. Zoxem, to tankam apli povitr xokti, aplem Utor Bible ani Bible-acher adarit aslolim zaitim prokaxonam dita. Ani hea pasot tim ‘jevtat, pietat ani khuxal’ zatat. (Prok. 22:17 sor korat.) Punn hea bagent nant tim, “upaxim” asat ‘tanen suktat’ ani ‘lojen bhoron tondd dhamptat,’ karonn tankam Devachi vollokhuch na.—Am. 8:11.

6. Joel 2:21-24-a pormonnem, Devan amchea pasot kitem manddavoll kelea, ani hantuntlean amkam kitem faido zata?

⁶ Jehova Dev aplea lokank udarponnan bhorpur danno-gotto, drakxancho soro ani zoitunachea tela sarkeo gorjecheo vostu ditolo mhunn Joelan bhasaunni kelʼli. (Jo. 2:21-24) Hacho orth, to amkam amcho bhavarth ghott dovrunk goroz tem soglem ditolo. Jehova Dev aiz hem koxem korta? To amkam Bible, Bible-acher adarit prokaxonam, amchi website, toxench mittingo, zomati ani odhivexonam udexim zaiteo vostu xikoita. Ami dor disa hea manddavollicho faido ghetat zalear, ami pasun khaun-pieun dhadoxi aslolea sarkim zatolim.

7. Ami ‘anonbhorit kallzan kiteak ul’lastat’? (Izaias 65:14)

⁷ Tim khuxal ani dhadoxi asat. Ami Jehovak khub upkari asat dekhun ami khuxalkaien ‘ul’lastat.’ (Izaias 65:14 vachat.) Devachea Utrantlim urbevont sotam, bhuzvonn ditat tosleo bhasaunneo ani Jezuchea bolidanacher adarit aslolea amchea bhorvonxeak lagon amchem ‘kalliz anondan bhorta.’ Ani hea vostum vixim ami amchea bhav-bhoinnam sangata uloitat tednam amkam khub khuxalkai melltta!—St. 34:8; 133:1-3.

8. Sobit otmik bage vixim kitem khas asa?

⁸ Sobit otmik bage vixim kitem khas asa? Tantunt jietolea lokam modem mog ani ekvott asa. Ani ho mog tankam “sogleank ekvottan dovorta” mhunn Bible-ant sanglam. (Kol. 3:14) Atam amchea modem mog ani ekvott asa tem  khorem. Punn novea sonvsarant to anikui ghott zatolo. Ek bhoinn Jehovachea Sakxeank poilech pavtti mellʼlli tednam tika koxem bhoglem tea vixim ti oxem sangta: “Hanv mhojea jivitant toxench mhojea familint khuxal naslem. Punn hanv Jehovachea Sakxeank poilech pavtti mellʼllem tednam, khoro mog mhunnttlear kitem tem hanvem onnbhovlem.” Tor konnui khori khuxalkai ani dhadosponn onnbhovunk sodhta zalear tannem sobit otmik bagent aschi goroz asa. Sonvsarantle lok Jehovachea sevokam vixim kitem-i chintum, amkam Jehovachi maniotai asa. Itlench nhoi, Jehova ani tachea soglea sevokam modem amkam ek borem nanv asa. Tea pasot, Jehova “aplea chakrank . . . dusrem ek nanv ditolo” oxem tannem mhunnttlolem.—Iz. 65:15.

9. Izaias 65:16, 17-nt aiz Devachea lokank sosunk poddtta tea vostum vixim kitem sanglam?

⁹ Tim uske kaddinant ani xantin jietat. Izaias 65:14-nt bhasail’lem ki je lok sobit otmik bagent ieunk sodhinant te ‘kallzache khontin killonchi martole.’ Punn aiz oxeo zaiteo vostu asat, zankam lagon Devache lok pasun dukhi zatat ani niraxi zatat. Tor tea vostum vixim kitem? Tea vostunchi “anink iad aschi na, monxachea monant anink tacho ugddas ieuncho na,” oxem pasun Izaiasan bhasail’lem. (Izaias 65:16, 17 vachat.) Hoi, Jehova Dev amche sogle tras kaddun uddoitolo ani tea trasank lagon amkam koxem distalem tem amkam ugddas pasun aschem na.

10. Bhav-bhoinnam sangata mittingek hajir zavop ek besanv oxem tumkam kiteak dista? (Chitr pasun polloiat.)

¹⁰ Novea sonvsarant ami xantin jietolim tem khorem. Punn atam pasun amkam monachi xanti mellonk xokta. Koxi? Ami mittingek hajir zatat tednam amkam monachi xanti melltta ani thoddea vella khatir hea noxttea sonvsarache uske ami visortat. Toxench, ami mog, khuxalkai, xanti, doia, movallai he povitr xokteche gunn apnnaun bhav-bhoinnam sangata vagtat tednam, tankam-i monachi xanti mellonk ami modot korunk pavtat. (Gal. 5:22, 23) Khorench, Jehovachea songottnnecho bhag asop amkam ek vhoddlem besanv zaun asa! Ani sobit otmik bagek ami sodanch chittkon ravlear, Jehovan bhasail’lo “novo sorg ani novi prithum” pollounk amkam sondhi pasun mellttoli.

11. Izaias 65:18, 19-a pormonnem, sobit otmik bagent aslolean amkam koxem dista?

¹¹ Tim upkari asat ani urben bhorlolim asat. Hi sobit otmik bag Jehovan toiar kelea dekhun ami ‘sontosbhorit zaunk ani anondan murgottonk’ xoktat mhunn Izaiasan sanglem. (Izaias 65:18, 19 vachat.) Ani dusreankui hacho bhag zaunk modot korunk Jehova amkam uzar korta. Karonn sonvsarachea songottonamnim, lokank Jehova vixim koslench sot mellona. Punn amkam sot mellʼllam ani sobit otmik bagent aslolean  zaitim besanvam mellʼlleant. Tea pasot, dusreankui hea vixim sangonk ami urben bhortat.—Jer. 31:12.

12. Izaias 65:20-24-ant jem bhasailam tea vixim tumkam koxem dista, ani kiteak?

¹² Toxench, sobit otmik bagent aslolean amkam bhorvonso melltta. Hea pasot ami upkari ani urben bhorlolim asat. Novea sonvsarant amchem jivit koxem astolem tea vixim ami chintunk zata. Bible-ant tea vixim oxem bhasailam: “Thoddech dis jielʼlem bhurgem anink aschem na, nhoi mhonn aple piraiechim vorsam bhorche adim khoinchinch mhatarim morchim nant . . . Tim ghoram bandtolim ani tantum ravtolim, dakanche molle roitolim ani tanchim follam khatolim . . . Tim nirfollim vavurchim nant.” Karonn ‘Jehovachem besanv tancher astolem.’ Jehova amkam ek ekdom boro fuddar ditolo mhunn bhasaita, zoim ami surokxit astolim ani amkam dhadosponn melltta toslem kam astolem. Toxench, Jehovak “ulo korche adinch” dor ekleak kiteachi goroz asa tem taka khobor astoli ani ‘sogle rochnnek to dhadoxi kortolo.’—Iz. 65:20-24; St. 145:16.

13. Izaias 65:25-a pormonnem, Jehovachi seva korunk suru kelea uprant thoddea zannamnim aplea jivitant kosle bodlav keleat?

¹³ Tim xantin jietat ani tankam koslich bhirant na. Sotant ieunchea poilim thoddea bhav-bhoinnancho sobhav ekdom vaitt aslo. Punn Devachea povitr xoktechea modotin zaiteamnim aplea jivitant vhoddle bodlav kele. (Izaias 65:25 vachat.) He vaitt gunn soddun diunk tannim zaito vavr kelo. (Rom. 12:2; Ef. 4:22-24) Torui, opurnn aslolean chuki ghoddttoleoch. Punn Jehovan ‘soglea torechea lokankʼ ektthaim haddleat, jim tacho ani eka-mekacho mog kortat. Hea vorvim amchea modem khori xanti ani ekvottkai asa. (Tit. 2:11) Khorench, hem fokot Jehovachea xokten zaunk pavta!

14. Izaias 65:25-antlim utram eka bhavak koxim lagu zalim?

¹⁴ Ek munis khorench aplo sobhav bodlunk xokta kai? Atam ami eka tornnatteachem udharonn polloum-ia. To 20 vorsancho zata mhunnosor, taka zaite pavtti jail-int ghatlolo. Karonn tannem gaddio chorloleo, ghoramnim vochon chori kelʼli, ani dusre vhoddle-vhoddle oprad kelʼle. To ragixtt sobhavacho aslo ani onoitik kamam kortalo. To sodanch dusream lagim zhogddonk toiar astalo. Punn to poilech pavtti Bible-antlem sot zannam zalo ani Jehovachea Sakxeanchea mittingek vochonk laglo tednam, Jehovachea lokam sangata mellon tachi bhokti korop hoch jivitacho udʼdhex mhunn taka kollon ailem. Ani Jehovachi bhokti keli ani tacheo adnea pallʼlleo zalearuch apunn khuxal ravonk xokta mhunn to somzolo. Izaias 65:25-ant boroilam tench aplea lagim ghoddlem mhunn bautizm zalea uprant zaite pavtti to chintʼtalo. Tacho sobhav poilim xinva sarko krur aslo, punn atam to menddrea bhaxen xant zalʼlo ani lokam sangata xantin vagtalo.

15. Amchea sangata dusrim sobit otmik bagent jielʼlim amkam kiteak zai, ani hem ami koxem korunk zata?

¹⁵ Izaias 65:13-chea survatek oxem sanglam: “Sorvespor Dev oxem sangta.” Ani vers 25-achea xevottak mhunnttlam, “uloita to Sorvespor!” Tor Jehova jem kitem sangta tem sodanch purnn zatach. (Iz. 55:10, 11) Khorench, aiz ami soglim sobit otmik bagent jietat. Jehovan amkam ek osli famil dilea, ji khub mogall asa. Aiz sonvsar khub vaittan bhorla, punn Jehovachi famil xantin ani ekvottan jieta. (St. 72:7) Tea pasot, zata titlea lokamnim hea sobit otmik bagent jieunk ami tankam modot korunk sodhtat. Ani hem ami xis korpachea kama udexim korunk zata.—Mt. 28:19, 20.

SOBIT OTMIK BAGENT JIEUNK AMI DUSREANK KOXI MODOT KORUNK ZATA?

16. Sobit otmik bagent jieunk ami dusreank koxi modot korunk zata?

¹⁶ Jehovachi dekh gheun amchea modlea dor eklean lokank sobit otmik bagent jieunk modot korunk zata. Jehova konnakuch fors korina,  punn to mogan lokank aplea lagim “voddun” haddtta. (Ju. 6:44; Jer. 31:3) Ani khalti kallzache lok, Jehovacho mog ani tachea her gunnam vixim xiktat tednam, tim ap-khuxen tachea songottnnecho bhag zaunk fuddem sortat. Tor ami amchea borea gunnam vorvim, dusreank sobit otmik bagent jieunk koxi modot korunk zata?

17. Ami khoinchea eke vatten dusreank sobit otmik bagent jieunk modot korunk zata?

¹⁷ Oxem korunk ek vatt mhunnttlear, ami amchea bhav-bhoinnancho mog korunk zai ani tanchea pasot borim kamam korunk zai. Tor konnui poilech pavtti amchea mittingek ieta tednam, amchea modem kitlo mog asa tem tim pollounk pavtolim. Adlea tempar poilech pavtt jim Korint sobhent ailolim tannim jem mhunnttlolem tench tim pasun mhunnonk pavtolim. Tannim mhunnttlolem: “Dev khorench tumchea modem asa.” (1 Kor. 14:24, 25; Zek. 8:23) Tor ami Bible-ant dilʼlo ho solʼlo apnnaum-ia: “Eka-meka sangata xantin ravat.” (1 Tes. 5:13) Oxem korun, ami lokank Devachea sobit otmik bagent jieunk modot korunk pavtolim.

18. Lok kitem polloun Jehovachea sobit otmik bagent jieunk sodhtolim?

¹⁸ Toxench, ami sodanch amchea bhav-bhoinnank Jehova lekhta toxem lekhunk zai. Ami tanchea chukincher nhoi, punn borea gunnancher dhean diunk zai. Karonn fuddarak ami soglim poripurnn astolim. Tea bhair, ami ‘eka-meka sangata doiallaien vagonk zai, doia-maia dakhounk zai ani kallzant thaun bhogsunk zai.’ (Ef. 4:32) Oxem kelear, ami eka-mekak somzonk chuktat tednam ami xanti korunk pavtolim. Ani amchi hi vagnnuk polloun lok Jehovachea sobit otmik bagent jieunk sodhtolim. Karonn tanchea-i sangata dusrim heach toren vaglolim tankam zai. a

 SOBIT OTMIK BAGEK CHITTKON RAVAT

19. (a) “ Tim Sobit Otmik Bagent Porot Ailim” hea boksant sanglam toxem, sobit otmik bagent porot ailea uprant thoddeamnim kitem mhunnttlem? (b) Ami koslo ghott nichov korunk zai? (Chitr pasun polloiat.)

¹⁹ Jehovan amkam sobit otmik bag dilea mhunn ami khub upkari asat. Hi otmik bag sobit zait asa ani disan-dis anikui chodd lok tacho bhag zait asa. Jehovan amche pasot toiar kelʼlea hea sobit otmik bage pasot ami sodankal tache upkar attoum-ia. Ani amkam khuxalkaien, dhadosponnan ani xantin jieunk zai zalear, ami Jehovachea familik chittkon ravonk ghott nichov korum-ia. Punn ami chotrai dovrunk zai. Karonn Jehovachea famili thaun amkam pois vhoronk Soitan apleachean zata tem soglem korunk proitn korta. (1 Ped. 5:8; Prok. 12:9) Taka ami zoitivont zaunk diunchem nhoi! Tor Jehovachea familichi sobitkai samballunk, ti nitoll dovrunk, ani tantunt xanti samballunk amchean zata titlo vavr korit ravom-ia.