1. ¿Mbaʼépa hína pe paraíso espirituál, ha mbaʼépa ni mbaʼevéicharõ ndajajaposéi?

 KOʼAG̃AITE ningo oĩ hína hetaiterei persóna oikóva peteĩ paraisoitépe ko yvy ape ári. Haʼekuéra oiko pyʼaguapýpe ha ojapo heta mbaʼe ombovyʼaitereíva chupekuéra. Koʼã hénte ni mbaʼevéicharõ ndohejaséi ko paraíso porãite. Ha ndahaʼéi voi upévante, haʼekuéra oipota hetave persóna omoirũ chupekuéra. ¿Mbaʼeichagua paraíso piko hína kóva? Haʼe hína peteĩ paraíso espirituál. a

2. Emombeʼumína mbaʼérepa ndaijojahái pe paraíso espirituál.

² Ko ambiénte porãite ningo ndaijojahái. ¿Mbaʼérepa? Pórke ko múndope hetaiterei oĩ umi ndochaʼéiva ojuehe, iñañáva ha operhudikaséva hapichápe. Péro koʼã mbaʼe paʼũme jepe, Jehová omeʼẽ isiervokuérape la tekotevẽva oiko hag̃ua pyʼaguapýpe ha en unida (1 Juan 5:19; Apoc. 12:12). Ñande Ru ñanderayhuetéva ningo oikuaapaite umi provléma jahasáva, upévare ñanepytyvõ jasegi hag̃ua jaservi chupe vyʼápe, ijetuʼúrõ jepe la situasión. Iñeʼẽme oñemombeʼu ko paraíso espirituál ikatuha ‘ñandeprotehe’ ha ojoguaha voi “peteĩ hardín ojerrega porãvape” (Is. 4:6; 58:11). Jehová vendisión rupive, umi oikóva ko paraísope oñeñandu porã ha ovyʼa, oikóramo jepe koʼã ára pahápe (Is. 54:14; 2 Tim. 3:1).

3. ¿Mbaʼéichapa oñekumplíma rakaʼe primerorã la heʼíva Isaías 65-pe?

³ Proféta Isaías rupive, Jehová omombeʼúma vaʼekue voi mbaʼéichapa oikóta umi oĩva ko paraíso espirituálpe. Upéva ikatu jatopa Isaías kapítulo 65-pe. Primerorã, umi mbaʼe heʼíva ko kapítulope oñekumpli vaʼekue áño 537-pe a.C. Upe tiémpope, Babilonia opoi vaʼekue umi judíogui ha opermiti chupekuéra oho jey Jerusalénpe. Jehová ovendesi vaʼekue  koʼã judío oñarrepentívape. ¿Mbaʼéichapa? Haʼe oipytyvõ chupekuéra omoporã jey hag̃ua Jerusalén ha omopuʼã jey hag̃ua pe témplo, ikatu hag̃uáicha ojeadora jey Ñandejárape haʼe oipotaháicha (Is. 51:11; Zac. 8:3).

4. ¿Mbaʼéichapa oñekumpli jey ñane tiémpope la heʼíva Isaías 65-pe?

⁴ Áño 1919 guive oñekumpli jey vaʼekue la heʼíva ko profesía. Upe áñope Jehová siervokuéra osẽ vaʼekue Babilonia Guasu poguýgui. Upe tiémpo guive, ñande paraíso espirituál oñepyrũ okakuaa ko múndo tuichakuére. ¿Mbaʼéichapa? Kyreʼỹme hetaiterei ermáno oñepyrũ opredika ha upéicha rupi oĩma avei heta kongregasión ápe ha pépe. Ha umi oñepyrũva oservi Jehovápe katu ndoikovéima hekovai ni iviolénto, upéva rangue omonde “peteĩ aóicha pe kondúkta pyahu, ojejapo vaʼekue Ñandejára oipotahaichaite” (Efes. 4:24). Jaikuaaháicha, heta mbaʼe Isaías heʼi vaʼekue oñekumplipaitéta pe múndo pyahúpe ae. Upéicharõ jepe, koʼág̃ama voi ikatu jadisfruta ñaimévo ko paraíso espirituálpe. Upévare ko artíkulope jahecháta mbaʼe vendisiónpa jahupyty ko paraíso espirituálpe ha mbaʼérepa ñañehaʼã vaʼerã ani hag̃ua ñasẽ chugui.

¿MBAʼÉICHAPA OÑEÑANDU UMI OĨVA PE PARAÍSO ESPIRITUÁLPE?

5. Heʼiháicha Isaías 65:​13-pe, ¿mbaʼe vendisiónpa ohupyty umi oĩva pe paraíso espirituálpe?

⁵ Oñeñandu porã ha ipiroʼy. Umi oĩva pe paraíso espirituálpe tuicha oiko porãve umi noĩrivagui upépe. Upéva Isaías omombeʼu vaʼekue Isaías 65:​13-pe (elee). Jehová omeʼẽ isiervokuérape entéro mbaʼe oikotevẽva oñemoag̃ui hag̃ua hese ha osegi hag̃ua ojerovia mbarete. Por ehémplo omeʼẽ ñandéve ijespíritu sánto, Iñeʼẽ ha atyraite puvlikasión omyesakãva ñandéve la Biblia heʼíva. Ndareíri upe profesía heʼi jarekotaha y, heta mbaʼe jaʼu vaʼerã ha javyʼataha (ekompara Apocalipsis 22:17 heʼívare). Péro umi noĩriva pe paraíso espirituálpe katu ndaupeichaiete. Haʼekuéra ‘iñembyahýi, ijuhéi ha oñemotĩ’, pórke ndorekói mbaʼeve oipytyvõva chupekuéra oñemoag̃ui hag̃ua Ñandejárare (Amós 8:11).

6. a) Emombeʼumína mbaʼe mbaʼépa Jehová omeʼẽ ñandéve ko paraíso espirituálpe (Joel 2:​21-24). b) ¿Mbaʼéichapa koʼã mbaʼe ou porã ñandéve?

⁶ Peteĩ profesíape, Joel omombeʼu vaʼekue Jehová omeʼẽtaha ipuévlope umi hiʼupy oikotevẽva, por ehémplo semílla iporãva, víno ha aséite. Koʼã mbaʼe ohechauka Jehová nombofaltamoʼãiha isiervokuérape mbaʼeve, umíva apytépe umi mbaʼe ñaikotevẽva imbarete hag̃ua ñande jerovia (Joel 2:​21-24). Haʼe ojevale hetaiterei mbaʼére ojapo hag̃ua upéva. Por ehémplo la Biblia, umi puvlikasionkuéra, ñane páhina jw.org, ñane rreunionkuéra ha umi aty guasukuéra. Siémpre jaaprovecha porãramo koʼã mbaʼe, tuicha ñañeñandu porãvéta ha ñandepiroʼýta.

7. ¿Mbaʼérepa ñañeñandu porãiterei? (Isaías 65:14).

⁷ Ovyʼa ha oñekontenta. Jehová siervokuéra ‘osapukái vyʼágui’ pórke omombaʼeterei la Jehová ojapóva hesehapekuéra (elee Isaías 65:14). ¿Mbaʼérepa Jehová siervokuéra ‘oñeñandu porãiterei’? Pórke umi enseñánsa ha umi promésa oĩva Ñandejára Ñeʼẽme ñanemokyreʼỹ ha ñanembopyʼaguapy. Upéva ári jey, jareko la esperánsa jahupytývo hetaiterei mbaʼe porã amo gotyove Jesús sakrifísio rupive. Ha ñañemongeta jave koʼã mbaʼére ñane ermanokuérandi, ¡ñanembovyʼaiterei voi! (Sal. 34:8; 133:​1-3).

8. ¿Mbaʼépa hína umi mokõi mbaʼe ojekuaa porãitereíva ñande paraíso espirituálpe?

⁸ Oĩ ningo avei mokõi mbaʼe ojekuaa porãitereíva ko paraíso espirituálpe. ¿Mbaʼépa hína umíva? Pe mborayhu ha pe unida. Jahecha jave ermanokuéra oĩha “unído oñondivepa”  ikatúma ñañeimahina mbaʼéichapa jaikóta pe múndo pyahúpe (Col. 3:14). Ha koʼág̃ama voi jaikórõ péicha, koʼytevéntema jajoayhuvéta ha ñaneunidovéta pe múndo pyahúpe. Peteĩ ermána omombeʼu mbaʼépa ohechakuaa vaʼekue umi ermánore oikuaa ramóme chupekuéra. Haʼe heʼi: “Che ndavyʼakuaái vaʼekue, ni che hentekuéra apytépe. Umi testígo de Jehová apytépe la ahecha vaʼekue por primera ves mbaʼéichapa ojotrata umi ojoayhu añetéva”. Entéro oikuaaséva mbaʼépa heʼise la vyʼa otanteami vaʼerã oike ñande paraíso espirituálpe. Tahaʼe haʼéva la opensáva ñanderehe ko múndo, Jehová ñandeguerohory. Ñande ningo ñaime porãiterei Ñandejára ha entéro oadoráva chupe renondépe. Upévare Jehová heʼi voi omeʼẽha isiervokuérape “peteĩ téra pyahu” (Is. 65:15).

9. ¿Mbaʼépa oñepromete ñandéve Isaías 65:​16, 17-pe?

⁹ Oiko trankílo. ¿Mbaʼéichapa oiko umi noĩriva pe paraíso espirituálpe? Isaías 65:14 heʼi hesekuéra: “Peẽ katu peikóta penerasẽ pórke peñeñandu vaíta, peñelamentáta pórke pepytáta peñamarga”. ¿Mbaʼépa oikóta umi mbaʼe ombosufrívagui Jehová siervokuérape? Koʼẽrõitéma koʼã mbaʼe vai “opytáta tesaráipe” ha Jehová voi oipeʼaitéta ‘anivéma hag̃ua ohecha’ umíva (elee Isaías 65:​16, 17). Ñandejára oipeʼapaitéta ko múndogui entéro mbaʼe ñanembosufríva, ha kon el tiémpo ni nañanemanduʼamoʼãvéima umívare.

10. ¿Mbaʼérepa nde ere haʼeha tuichaite vendisión ñañembyaty ñane ermanokuérandi? (Ehecha pe taʼanga).

¹⁰ Jaha jave rreunionhápe tuicha ñandepyʼaguapyve. Upépe ningo ikatu ñaime trankílo ha ñañembyesarái ñane provlemakuéragui. Ha koʼytevéntema ñaipytyvõta ñane ermanokuérape oñeñandu porã hag̃ua jahechauka jave rreunionhápe umi mbaʼe porã oúva pe espíritu sántogui. Por ehémplo mborayhu, vyʼa, pyʼaguapy, pyʼaporã ha mbaʼeporã (Gál. 5:​22, 23). ¡Ajépa tuichaite vendisión ñañembyaty Jehová siervokuérandi! Umi osegíva oĩ ko paraíso espirituálpe ohecháta mbaʼéichapa Jehová ojapo peteĩ “yvága ha yvy pyahu”.

11. ¿Mbaʼéichapa ñañeñandu ñaime rupi ko paraíso espirituálpe? (Isaías 65:​18, 19).

¹¹ Ijagradesído ha ipyʼarory. Isaías omombeʼu avei mbaʼérepa ikatu javyʼaite ko paraíso espirituálpe. Ko ambiénte porãite jarekóva ermanokuéra apytépe Jehová voi okrea vaʼekue (elee Isaías 65:​18, 19). Haʼe ningo oipota umi hénte oike avei ñande paraíso espirituál iporãitévape. Upévare ojevale ñanderehe oipytyvõ hag̃ua la héntepe oheja hag̃ua umi organisasión nomboʼéiva chupekuéra pe añetegua.  Ñapensa jave umi mbaʼe porã jahupytývare jaikuaa rupi pe añetegua, ñandepyʼarory voi ha ñanemomýi japredikase hag̃ua ñande rapichakuérape (Jer. 31:12).

12. ¿Mbaʼéichapa reñeñandu releévo umi promésa oĩva Isaías 65:​20-24-pe, ha mbaʼérepa?

¹² Heta mbaʼe porã ningo ñaneraʼarõ amo gotyove ñaime rupi ko paraíso espirituálpe. Ñapensávo koʼã mbaʼére katuete ñandepyʼarory ha jaagradeseterei avei Jehovápe. ¿Mbaʼérepa? Pórke pe múndo pyahúpe, jahecháta oñekumpliha heta promésa porãite oĩva la Bíbliape. Por ehémplo ndaiporimoʼãvéima “upépe ni peteĩ mitãraʼy omanóva”. Upe tiémpope “umi hénte ojogapóta ha oikóta hóga teépe, oñotỹta parrál ha hoʼúta hiʼa”. Ndaiporimoʼãi avei oikóva “reiete ombaʼapo pohýi” pórke Jehová ñanevendesíta. Ñandejára opromete isentidotaha ñande rekove ha jaiko porãtaha. Ha ñaikotevẽ mbaʼéramo álgo, jajerure mboyve jepe chupe, haʼe ‘omeʼẽtama ñandéve opa mbaʼe jaipotáva’ (Is. 65:​20-24; Sal. 145:16).

13. Heʼiháicha Isaías 65:​25, ¿mbaʼeichagua kámbiopa ojapo umi hénte oñepyrũ hag̃ua oservi Jehovápe?

¹³ Ipyʼaguapy ha ndokyhyjéi. Ñande apytépe oĩ umi ymave ijarhél, iviolénto ha oporombotavy vaʼekue. Péro Jehová espíritu rupive koʼág̃a okambiaite (elee Isaías 65:25). Koʼã ermáno ha ermána heta oñehaʼã vaʼekue ijehe oreko hag̃ua umi kualida porã (Rom. 12:2; Efes. 4:​22-24). Upéicharõ jepe, ñande ñaneimperfékto gueteri ha upévare jasegíta jajavy. Péro upéva ndojokói Jehovápe ombyaty hag̃ua iñorganisasiónpe “opaichagua héntepe”, ojoayhúva ha oikóva pyʼaguapýpe oñondive (Tito 2:11). ¡Ñandejára añoite ningo ikatu ojapo koʼãichagua milágro!

14. ¿Mbaʼéichapa oñekumpli peteĩ ermánore la heʼíva Isaías 65:25?

¹⁴ Jahechamína peteĩ ermáno experiénsia ohechaukáva peteĩ persóna ikatuha okambiaite. Haʼe orekópe 20 áñorupi hekovai ha iviolentoiterei vaʼekue. Oho voi kárselpe heta vése omonda haguére áuto, oike haguére óga ahénope omonda ha ojapo haguére hetave mbaʼe vai. Haʼe oĩ vaʼekue voi oñorairõ hag̃uáicha oimeraẽvandi. Péro ojepredika rire chupe ha oho rire rreunionhápe, oñepyrũ isentído chupe la hekove pórke oadora Jehovápe pe paraíso espirituálpe. Ojevautisa rire, pyʼỹi ojepyʼamongeta la heʼívare Isaías 65:​25-pe ha ohechakuaa oñekumpliha hese. Haʼe ningo ymave isalváhe vaʼekue umi leóncha, péro koʼág̃a itrankílo peteĩ ovecháicha.

15. ¿Mbaʼérepa ñaipytyvõse opa ikatúvape oĩ hag̃ua pe paraíso espirituálpe, ha mbaʼéichapa ikatu jajapo upéva?

¹⁵ Isaías 65:13 heʼi voi pe iñepyrũme: “Ñandejára Jehová ogovernáva opa mbaʼe, heʼi kóicha”. Ha upéi pe versíkulo 25 opakuévo heʼi jey: “Péicha heʼi Jehová”. Upéva ohechauka koʼã promésa katuete oñekumplitaha pórke Jehováma heʼi (Is. 55:​10, 11). Koʼág̃a ñaiméma hína peteĩ paraíso espirituálpe. Jehová ningo okrea peteĩ família guasu ndaijojaháiva oĩháme umi oadoráva chupe. Ko família guasúpe ñañeñandu trankílo ha segúro porã, jaikóramo jepe ko múndo iviolentoitévape (Sal. 72:7). Upévare ñañehaʼã vaʼerã ñaipytyvõ opa ikatúvape oike hag̃ua Jehová organisasiónpe. Ha upearã ñañehaʼã ñamboʼe umi héntepe oiko hag̃ua chuguikuéra Jesús disípulo (Mat. 28:​19, 20).

ÑAIPYTYVÕ ÓTROPE OIKE HAG̃UA PE PARAÍSO ESPIRITUÁLPE

16. ¿Mbaʼépa oipytyvõta la héntepe oĩse hag̃ua ñande paraíso espirituálpe?

¹⁶ Umi hénte ñanemoirũse hag̃ua, káda uno ñañehaʼã vaʼerã ñamoporãve ñande paraíso espirituál. Upearã ikatu jasegi Jehová ehémplo. Haʼe ningo ndojopýi la héntepe oike hag̃ua iñorganisasiónpe, upéva rangue mborayhúpe  omoag̃ui umi héntepe ijehe (Juan 6:44; Jer. 31:3). Umi hénte ipyʼaporãva oikuaávo Jehová oporohayhu ha imbaʼeporãitereiha, ndaikatúi oñaguanta ha oñemoag̃ui katuete hese. Péro umi mbaʼe ñande jajapóva rupive ikatu avei ñaipytyvõ umi héntepe oĩse hag̃ua ñande paraíso espirituálpe. ¿Mbaʼe mbaʼépa por ehémplo ikatu jajapo?

17. ¿Mbaʼépa ikatu ñande jajapo umi hénte ñanemoirũse hag̃ua ñande paraíso espirituálpe?

¹⁷ Jahayhu ha jatrata porãramo ñane ermanokuérape, umi hénte ñanemoirũséta ko paraíso espirituálpe. Oĩ jave oho ramóva rreunionhápe, hiʼãiterei voi ñandéve heʼi hikuái: “Añetehápe Ñandejára oĩ penendive”. Péicha heʼi vaʼekue unos kuánto Corintogua posívlemente oho rire peteĩ rreunionhápe (1 Cor. 14:​24, 25; Zac. 8:23). Upévare iporãta jasegíramo jajapo la heʼíva 1 Tesalonicenses 5:​13-pe: “Peikókena pyʼaguapýpe oñondive”.

18. ¿Mbaʼépa ikatu avei oipytyvõ umi héntepe oĩse hag̃ua ñane organisasiónpe?

¹⁸ Siémpre ñañehaʼã vaʼerã jahecha ñane ermanokuérape Jehová ohechaháicha chupekuéra. ¿Mbaʼéichapa ikatu jajapo upéva? Upearã jajesareko vaʼerã umi mbaʼe porã ojapóvare ñane ermanokuéra ha ani jarahaiterei enkuénta mbaʼépepa ojavy hikuái, pórke upéva koʼẽrõite ndajahechamoʼãvéima. Ha oiméramo jajoavy mbaʼe raʼe, mborayhúpente ikatu ñasolusiona. Upearã ‘ñanembaʼeporã vaʼerã oñondive, jajoporiahuvereko ha ñañoperdona vaʼerã ñande pyʼaite guive’ (Efes. 4:32). Umi hénte ohecha jave koʼã mbaʼe, oipotáta avei ojetrata chupekuéra upéicha ha oĩséta avei ñande paraíso espirituálpe. b

 EPYTÁKENA PE PARAÍSO ESPIRITUÁLPE

19. a) Heʼiháicha pe rrekuádro “ Haʼekuéra osẽ péro upéi oike jey”, ¿mbaʼépa heʼi umi oike jey vaʼekue pe paraíso espirituálpe? b) ¿Mbaʼépa jajedesidi vaʼerã jajapo? (Ehecha pe taʼanga).

¹⁹ ¡Ajépa jaagradesete ñaime haguére peteĩ paraíso espirituálpe! Káda día ohasáva iporãve rei ohóvo, ha amás día hetave persóna oike pype omombaʼeguasu hag̃ua Jehovápe. Siémprekena jaagradese Jehovápe okrea haguére ñandéve g̃uarã ko paraíso espirituál iporãitéva. Enterove oñanduséva pyʼaguapy, vyʼa, piroʼy ha trankilida oike vaʼerã ko paraíso espirituálpe ha oñehaʼã vaʼerã ani hag̃ua osẽ chugui. Péro ñañatende vaʼerã, pórke Satanás oñehaʼãmbaitéta ñanemoñuhã ha ñaneguenohẽ pe paraíso espirituálgui (1 Ped. 5:8; Apoc. 12:9). ¡Aníkena jaheja chupe osẽ la ijidéape! Upévare, siémprekena ñañehaʼãmbaite taiporã, taipotĩ ha toñeñandu pe pyʼaguapy ñande paraíso espirituálpe.