1. Anni i espiritual nga paraiso, anna anni nakuan i determinadu nga kuattam?

 TA MADDAGGUN, egga i paraiso taw ta davvun nga napappannu tu totolay nga mapia i kukukuadda. Magayayya yatun ira nga minillion nga totolay megafu ta kurug tu memammo ira. I totolay nga maddian ngana tatun nga paraiso ay determinadu nga ari vuluvuga manaw tatun. Kayà da gapa nga mas aru nakuan paga nga totolay i makikavulu nira tatun. Anni yatun? I espiritual nga paraiso! a

2. Anni i kappabbaw ta espiritual nga paraiso?

² Talaga kappabbaw si Jehova. Maski gare nu minallussaw, marake, anna delikadu i mundo ni Satanas, nakapadday lagapa si Jehova tu memammo nga lugar nga paddianan na totolena. (1 Juan 5:19; Nep. 12:12) Masingi-singan na minaggiddu nga Dios tam i marake ira nga efekto na mundo ni Satanas, yatutta protektan na ittam tapenu mapprogreso ittam lagapa ta espiritual. Ta Biblia, nadeskriba i espiritual nga paraiso bilang “pattaguan” ta peligro anna “hardin nga nabayatan tu mapia.” (Isa. 4:6; 58:11) Ta bendision ni Jehova, magayayya anna memammo danuri maddian tatun nga paraiso maski taw nga mariga ira nga pangurianan nga aggaw.—Isa. 54:14; 2 Tim. 3:1.

3. Anni i ollu nga ketuppalan na Isaias kapitulo 65?

³ Inusa ni Jehova si profeta Isaias tapenu ikagi nu anni saw i paddia-paddian na totolay ta espiritual nga paraiso. Mabibbig tam yatun ta Isaias kapitulo 65 nga ollu nga natuppal turi ta 537 B.C.E. Tatun nga tiempo, napalawan ta pakka-aripan ta Babilonia i mabbabbabawi ira nga Judio anna nanoli ira ta Jerusalem.  Binendisionan ni Jehova i totolena anna inuffunan na ira tapenu mapakasta da uli i nadara-daral nga siudad na Jerusalem. Pinakappiadda gapa i templo tapenu mabbalin uli yatun tu sentro na kurug nga paddayaw ta Israel.—Isa. 51:11; Zac. 8:3.

4. Anni i ketuppalan na Isaias kapitulo 65 ta tiempo tam?

⁴ Ta 1919 C.E., namegafu i mekadua nga ketuppalan na profesiya ni Isaias. Tatun gare nga tiempo, napalawan ta pakka-aripan ta Babilonia nga Dakal i maddayaw ira kani Jehova ta tiempo tam. Tapus kabalin natun, sisinu nga nawwara i espiritual nga paraiso ta interu mundo. Megafu ta matalikarag ira nga mangilayyagayya ta Pappatulan, nabuu i aru nga kongregasion anna nepasingan na lallaki anna babbay i kualidad ira na Cristiano. Dati bi, vayolente ira anna imoral, ngem ‘natalibagu i kata-katoleda nga naparo ta kasissinnan na Dios.’ (Efe. 4:24) Ngem siempre, i aru ta bendision ira nga nakagi ni Isaias ay mesimmu pagalaman saw ta napabagu nga mundo. Ngem maski sangawe, aru ngana i pammakapianattam tatun. Ammuattam nu anni i efekto ta nittam na espiritual nga paraiso anna nu ngatta ari tam nakuan nga panawan yatun.

I MATAGENO DANURI NA MADDIAN TA UNAG NA ESPIRITUAL NGA PARAISO

5. Base ta nepromesa ta Isaias 65:​13, anni i maekspiriensa tam ta unag na espiritual nga paraiso?

⁵ Magawa-gawayyan anna nabanna-bannayan. Ipasingan na profesiya ni Isaias i dakal nga nadduman na pattolay danuri na maddian ta unag na espiritual nga paraiso ta pattolay danuri na egga ta lawan natun. (Bibbigan i Isaias 65:13.) Pakanan tu mapia ta espiritual ni Jehova danuri maddayaw ta nisa. Egga ta nittam i masanto nga espiritu na, i Biblia, anna abundansia nga espiritual nga makan tapenu ‘kuman, minum, anna magayayya’ ittam. (Ikumpara i Nepakannammu 22:17.) Ngem dakal i nadduman natun tari ira ta egga ta lawan na espiritual nga paraiso. ‘Mabbisin gare ira, mapangal, anna mepasiranan.’ Ari meyawa i pakawagadda ta espiritual.—Amos 8:11.

6. Kunnasi nga dineskriba na Joel 2:​21-24 i espiritual ira nga probisiottam, anna anni i pammakapiattam tatun?

⁶ Ta profesiya ni Joel, inusa na i importante ira nga gannug ta pattolay kagitta na vuku-vukal, binarayang, anna denu nga naggafu ta olibo. Ipasingan natun nga vuka-palag nga iyayawa ni Jehova i pakawagan na totolena, nelagum i espiritual ira nga makan. (Joel 2:​21-24) Kukukuan na yatun gukaban na Biblia anna na nebase-Biblia ira nga publikasiottam, website tam, kunne na gapa gukaban na study, asembli, anna kombension ira. Awayya tam i kuman tatun ira nga espiritual nga probision ta kadaggaw. Megafu tatun, mas magawa-gawayyan anna mas nabanna-bannayan ittam.

7. Anni i mangiyawa nittam tu “makasta nga kondision na futu”? (Isaias 65:14)

⁷ Magayayya anna kontentu. “Makkulle ta pagayayya” i totolay na Dios megafu ta fermi i pappabalo da kani Jehova. (Bibbigan i Isaias 65:14.) Mapeggan ittam tu “makasta nga kondision na futu” megafu ta makapagaram ira nga kinakurug anna makapabannay nga promesa ira ta Uvovug na Dios anna i kuru-kurug nga iddanama tam nga pinapposible na sakrifisio nga tavvu ni Cristo. Kuruga magayayya ittam nu pabbiridattam danatun kavulu i wawwaragi tam!—Sal. 34:8; 133:​1-3.

8. Anni i dua nga importante nga gannug nga egga ta espiritual nga paraiso?

⁸ Anni i dua nga importante nga gannug nga egga ta espiritual nga paraiso? I aya anna i pattaradday na totolay ni Jehova. Yatun nga ‘mamattaradday nittam ta meggo nga pavvurulun’ i mangipanono ta pattolay tam  saw ta napabagu nga mundo. Mas makka-aya-aya anna mas mattaradday saw i aripan ira ni Jehova. (Col. 3:14) Inistoria na tadday nga sister i napansin na turi ta ollollu na nga nakilala i totolay ni Jehova: “Ari ku ammu nu kunnasi mabbalin tu magayayya maski paga nu kavulu ku i familià. First time ku nga makasingan tu totolay nga kurug nga makka-aya-aya turi ta nakilalà i Saksi ira ni Jehova.” I sinni laman nga kayà na i mabbalin tu kurug nga magayayya anna kontentu ay mawag tu tullung ta espiritual nga paraiso tam. Maski anni gafu i anningan na totolay taw ta mundo ta aripan ira ni Jehova, egga i makakkasta nga ngagan onu reputasiodda kani Jehova anna ta ngamin nga maddayaw ta nisa.—Isa. 65:15.

9. Base ta Isaias 65:​16, 17, anni saw i mesimmu ta gannug ira nga namarraddam anna namazziga ta nittam sangawe?

⁹ Kalmadu anna ari nga mavvuru-vurung. Mabibbig ta Isaias 65:14 nga ‘makkulle megafu ta taki nga mataga-tageno na futu anna maddangngul megafu ta paddaddam’ danuri piliadda lagapa i mattalupaddian ta lawan na espiritual nga paraiso. Ngem kunnasi gapa saw i ngamin nga gannug nga mamarraddam anna mamazziga ta totolay na Dios? Duttal saw i tiempo nga ngamin danatun ay ‘ari ngana nga mepanono anna mawawwan ngana danatun ta paningan na Dios.’ (Bibbigan i Isaias 65:​16, 17.) Alsan noka ni Jehova i ngamin nga problema tam anna ari tam ngana gapa saw meraddamman maski i taki nga natageno tam turi ta nappasattam danatun.

10. Ngatta makagim nga bendision nga kavvulu mu i wawwaragi? (Innan gapa i letratu.)

¹⁰ Maski sangawe nu egga ittam ta study tam ira, kalmadu ittam anna ari ittam mavvuru-vurung. Ari tam gapa nga agga-nono i gannug ira nga maka-stress ta nittam taw nga marake nga mundo. Mabbalin tu mas kalmadu i espiritual nga paraiso tam nu ipasingattam i aya, pagayayya, imammo, kinasippo, anna kinalumamo nga parte na vunga na espiritu na Dios. (Gal. 5:​22, 23) Talaga bendision nga parte ittam na organisasion na Dios! Masingan noka danuri na mattalupaddian ta espiritual nga paraiso i kumpleto nga ketuppalan na promesa na Dios nga “bagu nga langi anna bagu nga davvun.”

11. Segun ta Isaias 65:​18, 19, anni nakuan i efekto ta nittam na espiritual nga paraiso nga pinaratu ni Jehova?

¹¹ Mappappabalo anna excited. Kinagi paga ni Isaias nu ngatta “magayayya anna mappalupagia” ittam ta espiritual nga paraiso. Yatun gare nga simboliko nga paraiso ay pinaratu ni Jehova. (Bibbigan i Isaias 65:​18, 19.) Ari gafu ngana kakkadda-kaddag nga usu-usan ittam  ni Jehova tapenu meyarayyu tam i totolay ta organisasion ira taw nga mundo nga mangituttuddu tu kinaladdug meyannung ta Dios. Uuffunattam gapa ira nga makatallung ta makakkasta nga espiritual nga paraiso tam! Excited ittam ta bendision ira nga malawa tam megafu ta egga ittam ta kinakurug anna mapaguyu ittam nga ikagi gapa danatun ta tanakuan.—Jer. 31:12.

12. Anni i matageno mu ta promesa ira ta Isaias 65:​20-24, anna ngatta?

¹² Mappappabalo anna excited ittam gapa ta iddanama tam megafu ta maddian ittam ta espiritual nga paraiso. Nonopammu ngana laman i ngamin nga masingattam anna makua ta napabagu nga mundo na Dios! Ipromesa na Biblia: “Awan ngana saw tu abbing . . . nga piga aggaw laman nga matolay, ni tu lakay nga ari na nga makumpleto i aggaw na ira.” ‘Mangipataddag ittam tu babalay anna maddian ittam tatun, anna mammula ittam tu ubas anna kanattam i vunga na.’ “Ari [ittam] mabbannag nga awan tu sesserbi na” megafu ta ‘bendisionan ittam ni Jehova.’ Ipromesa na nga memammo anna kappagayaya i pattolay tam anna egga i kurug tu gakkag na. ‘Nige ittam paga nga magagal,’ ammu na ngana i kawagan na kada tadday ta nittam anna “ngamin i pinaratu ay battugan na.”—Isa. 65:​20-24; Sal. 145:16.

13. Kunnasi nga deskriban na Isaias 65:25 i panguli ira na totolay nu passerbiadda ngana si Jehova?

¹³ Memammo anna safe. Ta uffun na espiritu na Dios, daka-dakal i nangulian na totolay nga dati ay gitta na ayam i kata-katoleda. (Bibbigan i Isaias 65:25.) Nikagumadda nga alsan i marake nga ugu-ugali da. (Roma 12:2; Efe. 4:​22-24) Siempre, imperfekto lagapa ira yatutta magga makkamali ira. Ngem pinattaradday ni Jehova i “ngamin nga totolay” nga mangaya nisa, yatun ta egga i kurug nga imammo anna pattaraddeda. (Tito 2:11) Talaga milagro yatun nga i makapangngua-sa-ngamin nga Dios laman i makangngua!

14. Kunnasi nga nabbalin tu kuru-kurug i Isaias 65:25 ta tadday nga brother?

¹⁴ Makua kari talaga na totolay nga ulian i kata-katoleda? Pannonopan yaw nga ekspiriensa. Egga i kabataan nga lalaki nga manotoli ta affukutan tagga ta 20 pagalaman i dagun na. Imoral anna vayolente yayya. Nefuku yayya megafu ta pac-carnap, pakkoko, anna karuan paga nga madammo nga krimen. Kanayun gapa yayya nga magala-aleg tu gulu. Turi ta gafu nga naginna na i kinakurug anna nakistudy, nakumbinsi yayya nga nalegan na ngana i gakkag na pattolena—i passerbian si Jehova ta espiritual nga paraiso. Kabalin na na-baptize, manonono na nu kunnasi nga nabbalin tu kuru-kurug ta nisa i Isaias 65:25. Nanguli ngana gare yayya. Dati bi gitta na i leon nga mapoporay, ngem sangawe gitta na ngana i tadday nga karneru nga memammo.

15. Ngatta kayà tam nga imbitan i tanakuan nga mevulu ta espiritual nga paraiso, anna kunnasi tam makua yatun?

¹⁵ Kunnaw i mabibbig ta gafu na Isaias 65:13: “Yaw i kinagi na Katannangan nga Yafu nga si Jehova.” Mabibbig ta ultimu na versikulo 25 i uvovug ira nga “kagian ni Jehova.” Kanayun nga matuppal nu anni i nipromesa na. (Isa. 55:​10, 11) Maddaggun tam ngana maekspiriensa yatun nga espiritual nga paraiso. Nabbuu si Jehova tu tadday nga familia na mawwaragi ta espiritual nga kuruga nerumu-ruma. Megafu ta parte ittam naw nga familia, memammo ittam anna awan tu manganni nittam taw nga marake nga mundo. (Sal. 72:7) Megafu tatun ira nga rason, kayà tam nga duffunan i mas aru adde ta posible tapenu mevulu ta familia tam. Makua tam yatun nu maffokus ittam ta pangngua tu disipulos.—Mat. 28:​19, 20.

 KUNNASI TAM MAENGGANYO I TANAKUAN TA ESPIRITUAL NGA PARAISO TAM?

16. Anni i kuan na kada tadday tapenu makaengganyo ta tanakuan i espiritual nga paraiso?

¹⁶ Anni i kuan na kada tadday tapenu makaengganyo ta tanakuan i espiritual nga paraiso? Parigattam si Jehova. Ari na nga fersan i totolay nga mabbalin tu parte na organisasion na. Imbes tu kunnatun, malumamo nga “iyaranni” na ta nisa i totolay. (Juan 6:44; Jer. 31:3) Danuri i mapia i giffutuan na nga totolay nga makagigiammu ta aya ni Jehova anna ta makakkasta nga personalidad na ay gagangay laman nga umaranni ta nisa. Kunnasi tam gafu nga maengganyo i totolay ta espiritual nga paraiso gukaban na makasta ira nga ugali anna ta mapia nga kondukta tam?

17. Kunnasi tam maengganyo i tanakuan ta espiritual nga paraiso?

¹⁷ I tadday nga makua tam tape maengganyo tam i tanakuan ta espiritual nga paraiso ay gukaban na pangaya anna pabbalin tu masippo ta kapangngurug tam ira. Nu egga ira i bagu laman nga magatende ta study ira na kongregasiottam, kayà tam nga makagi da gapa i nakagi danuri na ari nga mangurug nga awayya na tu nagatende ta paggarammammung ta Corinto tagga. Kunnaw i kinagi da: “Kurug nga egga nikamu i Dios!” (1 Cor. 14:​24, 25; Zac. 8:23) Mawag gafu tu itulu-tuloy tam nga tuttulan i tabarang nga ‘mapia nakuan i pavvurulu tam.’—1 Tes. 5:13.

18. Anni i awayya na nga makaengganyo ta totolay ta organisasiottam?

¹⁸ Ikagumattam nakuan nga kanayun nga innan i wawwaragi tam kagitta na anningan ni Jehova nira. Makua tam yatun nu maffokus ittam ta makasta ira nga kualidad da, ari tu ta pakkafiadda ira nga mawawwan gabbalaman saw. Ayusattam nakuan i ari ira nga pakkarantindian. Ngem kunnasi? ‘Makka-alla-allo  ittam, makka-iddu-iddu, anna makka-paka-pakoma.’ (Efe. 4:32) Nu kunnatun i kuattam, maengganyo tam ta espiritual nga paraiso i totolay nga kayà da nga kunnatun gapa i katratu da. b

ARI KA MANAW TA ESPIRITUAL NGA PARAISO

19. (a) Base ta kahon nga “ Nanaw Ira Ngem Nanoli Balaman,” anni i komento na karuan? (b) Anni nakuan i determinadu nga kuattam? (Innan gapa i letratu.)

¹⁹ Kuruga appresiattam i espiritual nga paraiso tam. Makkasta laman nga makkasta yatun anna umara-aru i maddayaw kani Jehova nga maddian tatun. Kanayuttam nakuan nga ipappabalo yatun nga paraiso nga pinaratu ni Jehova para ta nittam. I sinni laman nga maya nga mabanna-bannayan, mabbalin tu kontentu, kalmadu, anna safe ay mawag nga tullung tatun nga espiritual nga paraiso anna ari vuluvuga nga manaw tatun! Ngem magimmugug ittam nakuan ta kukukuan ni Satanas i adde na mawayya na nga ilogo ittam tapenu panawattam yatun nga paraiso. (1 Ped. 5:8; Nep. 12:9) Ari tam nakuan itulu nga makua na yatun nga plano na. Kuattam nakuan i adde na mawayya tam tapenu kanayun nga makasta, marenu, anna memammo i espiritual nga paraiso.