1. Ịyẹ a tị ri ịparadayịsị nya olegu? Ịyẹ ahị tị ka cheje nyọka họ?

 ỊPARADAYỊSỊ ọhẹ jam odehe alẹ ká angịnyị lụmẹ-lụmẹ ji kaa ja họ ụkụrwọ ọnyịịla. Ọ myị̀ la ụnọ uku-uku nya angịnyị ịlẹ kị la ọkpụnyị ọlam-ọlam. Angịlẹ kị ji ẹpwụ nya ịparadayịsị ọwẹ cheje nyori ịwa nyị́ ka kpehe bwụ ụwa ẹnẹnẹhẹ kaka. Ị tịtọ ịnyịnyị ká iru nya angịnyị ka yẹjụlaa ẹ-ẹpwụ nya iwe-ahụrụ ọnyịịla ọwẹ. Iwe-ahụrụ oyina tị́? Ịparadayịsị nya olegu ịnyị! a

2. Ịyẹ tị du ka ịparadayịsị nya olegu la ẹbyẹbyị?

² Ụ-ụgbẹyị ọ-la ẹbyẹbyị, iJihova họ iwe-ahụrụ ọnyịịla ọhẹ ọlẹ ká angịnyị nyamwụ hụ la okpụnyị bala ọ-yẹjụ lawụlẹ, nanana nyori ị jam odehe nya ọkwọ nya Olegu Onyobyi ọlẹ kọ la uhihi bala ọ-myị̀ la awụlẹ ọ-wụ́ ẹjẹ. (1 Jọn. 5:19; Ọwụ. 12:12) Ohe nyahị yẹ ang ịtịpyọ ịlẹ ká odehe ọlẹ wẹẹ họ angịnyị alẹ, ma ọ họ chajị ká anche nyamwụ ka yé ewu ọ-chị ke bala ọ-ka jẹ́-ẹ gbịgba họọ la ọkẹkẹnị lẹ. Omyi ẹla nya Ohe chabwọ nya ịparadayịsị nya olegu lala ẹga “ọchịkụ” bala “ọpyị nya ẹrụ ọlẹ kọ ju enyi lụmẹ yẹẹyẹẹ kọ kaa há ang.” (Ayị. 4:6; 58:11) Bwụla ahị ọwawa nya iJihova, angị ji ẹpwụ nya ịparadayịsị nya olegu ọwẹ jẹ́ wẹẹ yẹ́ ewu ọ-chị ke bala ọkẹkẹnị am odehe olujwo ọhyẹẹkpẹ ọlẹ.—Ayị. 54:14; 2 Tim. 3:1.

3. Ányị ẹla ọla Ayịsaya egbeju 65 à tị́ họ jịra ụka onyogo?

³ IJihova kpa ọlọmwụ Ayịsaya chabwọ nya abwọlẹ ká ọhịhị ka la ha angị ji ẹpwụ nya ịparadayịsị nya olegu. À ka yẹ abwọ ọchịchị nyamwụ ọwa e-egbeju 65 nya Ayịsaya, kọ la ọ-họ jịra  ọhọhẹ la ẹka 537 ene nya ọmama nya ịKịrayịsị. Ụka ọwẹ, ala iJuu ịlẹ kị yẹda bwụ ẹpwụ nya ịhọbịrị nyaa à la ọ-gba kpehe bwụ ọpyị nya ọ-yẹ dada nyà tịrẹkpẹ wẹ ẹpwa nyaa lẹ. IJihova wahị kụrụ angịnyị nyamwụ bala ọ-daa ụbwọ nwụ iJerusalem ọlẹ kọ tayịreji ịnọ wuu lẹ họ kpụ ọ hụ́hị myịmyị, bala ọ-jẹ́ nwụ ube ịgọgọ ọlẹ ká ala Isirẹlụ wuu kaa ka gbịgba họ.—Ayị. 51:11; Sẹk. 8:3.

4. Ányị ẹla ọla Ayịsaya 65 à tị́ wẹẹ họ jịra alẹ?

⁴ Ọmwụ ọlẹ ká Ayịsaya yẹ dọmwụ nya ọ-họ jịra ụka oheeye bwu ẹka nya 1919 C.E. ụka ọlẹ ká angị gbịgba ha iJihova la ọ-gba kpehe bwụ ẹpwụ nya ịBabịlọn Ọtụka. Ọọwa lẹ, ịparadayịsị nya olegu à dọmwụ nya ọ-nwà dụmwọ-dụmwọ odehe wuu lẹlẹ. Angịnyị nya Ohe kaa kpa ẹrụ ọnyịila pyẹ la ila ọchịchị, lẹ ị ya ọjịra-jịra lụmẹ-lụmẹ yeji bala ọ-la abwẹla nya angịnyị nya ịKịrayịsị. Alẹng bala anyang ịwẹ kị kaa gu ọkwọ bala ọ-la abwẹla ịtịpyọ ịkịla ene-ene jẹ “hu ọhịhị onyeewe nya Ohe Oluhye dakụrụ” ịlaa. (Efe. 4:24) Ahị ọwawa ịlẹ ká Ayịsaya chabwọ ja ka la ọ-họ jịra ọlam-ọlam odehe onyeewe. Ma lẹẹlẹẹ ahị wẹẹ yé apyobwuna yẹẹyẹẹ bwụ ẹpwụ nya ịparadayịsị nya olegu. Ahị ya ẹla u-uhye nya ang odudu ọlẹ ká ịparadayịsị nya olegu ọlẹ guhi bala ang odudu ọlẹ kahị ka kpehe bwụ ụwa ẹnẹnẹhẹ ka wẹẹ.

ABWỌLẸ KỌ KAA LA ANGỊ JI ỊPARADAYỊSỊ NYA OLEGU

5. Jaabwọ ká Ayịsaya 65:13 ya, ahị ọwawa iyina ahị tị́ ka yé ẹ-ẹpwụ nya ịparadayịsị nya olegu?

⁵ Ịị yé ang oriri nya olegu ri bala ọ-la ịnyọ ọmwụ́mwụ nya ọkịlẹtụ. Ọmwụ ọlẹ ká Ayisaya yẹ ya ọdatị nya ọhịhị nya angịlẹ kị ji ẹpwụ nya ịparadayịsị nya olegu bala angịlẹ kị ji odehe. (Wa Ayịsaya 65:13.) IJihova kaa ya ang oriri nya olegu ha angị gbịgba họọ ri wụ ẹpwụ yẹẹyẹẹ. Ahị la olegu ịgọgọ, Omyi Ẹla nyamwụ, bala apwụ ị-da ịBayịbụụ wụlẹ lụmẹ-lụmẹ, dudu kahị kaa “ye ang ri . . . ye nwa” bala ọ-kaa chị ọkẹkẹnị. (Kụ ẹhị yẹ Ọwụrụụ-wụrụ 22:17 ịnyịnyị.) Ịnya angịlẹ kị ji odehe nya ịparadayịsị nya olegu tị datị, ịwa lẹ ‘imyi kaa nwaa, imyi-enyi kaa nwaa’ bala oyoyi o-jwaa. Ịị yé ang nya olegu ri ka.—Emọ. 8:11.

6. Ányị ụpwụ nya iJuwẹlụ 2:21-24 à tị́ chabwọ nya āhị nya olegu ịlẹ ká iJihova kaa ya hahị? Apyobwuna oyina ahị tị́ kaa yé bwu ẹpwụ nyaa?

⁶ Ẹ-ẹpwụ nya ọmwụ ọyẹyẹ nya iJuwẹlụ, ọ kpa ang ịlẹ ká ọngịnyị baba ẹ-ẹpwụ nya ọhịhị yẹẹyẹẹ lala ajẹ nya ang, ere, bala ida nya olivu, mẹjẹ nyori iJihova kaa pyẹ ụbwọ maa ya ang ịlẹ ká angịnyị nyamwụ baba haa, tụ́ ang oriri nya olegu. (Juw. 2:21-24) Ọ kaa họ ịnyị bwula ịBayịbụụ, apwụ ị-da ịBayịbụụ wụlẹ, ịwẹbsayịtị nyahị, ọjịra-jịra nya epwihi, ọjịra-jịra nya iSekuti, bala ọjịra-jịra ọtụka. Ahị ka jẹ́-ẹ yé apyobwuna bwu ang nya olegu ịwẹ ẹnụ myị́ ẹnụ, chajị nya ọọwa, ahị kaa yé ang oriri nya olegu ri bala ọ-la ọkpụnyị nya ọkịlẹtụ.

7. Ịyẹ à tị́ kaa ya “ọkẹkẹnị nya ọkịlẹtụ” hahị? (Ayịsaya 65:14)

⁷ Ị chị ọkẹkẹnị bala ọ-la ang ịlẹ kị baba. Angịnyị nya Ohe ka jẹ́-ẹ “mwu eje la ọkẹkẹnị” chajị ẹla nya iJihova myaa lẹhị yẹẹyẹẹ. (Wa Ayịsaya 65:14.) Ẹlịlẹhị i-ju ọngịnyị ọhụ bala ehe ị-kpụ́ ọngịnyị ẹjẹ ịlẹpwụ nya ịBayịbụụ bala ẹhị ọrịrịị-ịrịrị ọlẹ kahị la ọọlajị nya iya ọkịlaa-kịla nya iJisọsị du kahị “la ọkẹkẹnị nya ọkịlẹtụ ọ-kpụ ịpyọ.” Ẹla o-ya u-uhye nya ẹla ịwẹ bala aanahị kaa kpa ọkẹkẹnị wahị lụmẹ!—Eje. 34:8; 133:1-3.

8. Ang imiiye ịkpọnchị iyina à tị́ ji ẹpwụ nya ịparadayịsị nya olegu?

⁸ Ọháha bala ọ-yẹju lawụlẹ ọlẹ ká angịnyị nya iJihova la à ri abwẹla imiiye ịkpọnchị ịlẹ kị mẹjẹ nyori ahị ji ịparadayịsị nya olegu lẹ. Ọháha ọlẹpwarịrị nyahị, ko ri “ochiri ọlẹ kọ  kaa wu ang myị́ ang wuu kpa” wẹẹ dahị ụbwọ nyọka jẹ́ jaabwọ ká ọhịhị ka la ụ-ụwa odehe onyeewe, ẹga ọlẹ ká angịnyị nya iJihova ka la ọháha bala o-yẹju lawụlẹ gụ ọla ọlẹẹlẹẹ. (Kol. 3:14) Ọnaahị ọnyang ọhẹ ya ẹla ọlẹ kọ yẹ u-uhye nya angịnyị nya iJihova ụka kọ gba chaa bwaa: “Ḿ jẹ́ jaabwọ kam ka bwu yé ọkẹkẹnị ka, tụ́ ẹpwụ nya ugbiyegu nyam. Ụka nya ụgbanyẹ ọlẹ kam yẹ ká angịnyị mẹ ọháha ọlam-ọlam jẹ à ri ọlẹ kam yẹ ẹ-ẹpwarịrị nya Alibeenu nya iJihova lẹlẹ.” Ọngọnyị kọ tịtọ nyọka chị ọkẹkẹnị ọlam-ọlam bala ang ọ-ka nwọọ baba nyọka ji ẹpwụ nya ịparadayịsị nya olegu ọlẹ pyii. Irya ọnyị myị́ ọnyị ká alodehe á la u-uhye nya angị kaa gbịgba ha iJihova wẹwẹ, ị la ihi lee ẹnyị ọnyịịla ẹ-ẹga nya iJihova bala angịlẹ wuu kịị gbịgba họọ.—Ayị. 65:15.

9. Ẹlịyẹ Ayịsaya 65:16, 17 à tị́ chehe u-uhye nya ang ịlẹ kị kaa kpa ajụjụ bala akama wahị?

⁹ Ị la ọhụ obeji. Ayịsaya 65:14 ya nyori angịlẹ wuu kị chụ nyọka ji odehe nya ịparadayịsị nya olegu nyị ka “chị eko bwu ẹpwụ nya ọkịlẹtụ ọjụjụ, [bala ọ-ka] bida la ang ọjụjụ ọlẹpwụ nya olegu” nyaa. Ma, ang ịlẹ kị kaa kpa akama bala ajụjụ wẹ ẹga nya angịnyị nya Ohe bẹẹ? Dụmwọ-dụmwọ, “akama inyogo wuu ka ri ang ịchịpwụrụ ịlẹ [kị ka] deeri hi ka ẹkpẹ, ịlẹ kị kpịbaa [hi Ohe lẹ].” (Wa Ayịsaya 65:16, 17.) IJihova ka hu akama nyahị wuu hiihi, ụka kọ ka nọ chẹẹ wẹẹ, ahị ka deeri hi ajụjụ ịlẹ ká akama ịwa kaa kpa wahị gbang-gbang lẹ.

10. Ịyẹ tị́ du ká iwe ọlẹ ká la nyọka yẹjula aanahị alẹng bala anyang myịng lẹhị? (Yẹ ifoto ịnyịnyị.)

¹⁰ Ọlẹẹlẹẹ, ọ dọmwụ kaa kpụhị ugbodu nyịị ụka kahị ka ọjịra-jịra. Ụ-ụwa, ahị jẹ́-ẹ hụ la okpunyi bala ọ-jẹ́-ẹ deeri hi akama ịlẹ ká odehe nya olegu onyobyi kpa wahị. Ahị ka jẹ́-ẹ họ ọkịlẹtụ nya aanahị ka pwọ kpuru ụka kahị nwụ́ ugbe nya olegu lala ọháha, ọkẹkẹnị, okpunyi, ọnahị, bala ọdụmwọ ọlala. (Gal. 5:22, 23) Ahị ọwawa ọtụka o ri hahị nyọka ri ọngọhẹ ẹ-ẹpwụ nya ogu nya iJihova lẹ! Angịlẹ kị kpehe bwụ ẹpwụ nya ịparadayịsị nya olegu ọlẹ ka, ka yẹ ọ-họ jịra nya “epwoohe onyeewe bala odehe onyeewe” ọlẹ ká Ohe myị ọnụ.

11. Jaabwọ ká Ayịsaya 65:18, 19 ya, ịyẹ ịparadayịsị nya olegu à tị́ guhi gbịla nyọka họ?

¹¹ Ọ myaa lẹhị bala ọ-kpaa ịpyọ. Ayịsaya wụlẹ ang odudu ọlẹ kahị ka “chị ọkẹkẹnị [bala ọ-ya] ụya gbe oyi myị oyi” ẹ-ẹpwụ nya ịparadayịsị nya olegu. IJihova à họ iwe-ahụrụ ọnyịịla ọwẹ lẹ. (Wa Ayịsaya 65:18, 19.) Ọ́ la ẹbyẹbyị ka, ọọwa à dudu kọ wẹẹ kpahị wụrụ angịnyị kpehe bwụ ẹpwụ nya ogu nya odehe ịlẹ kị kaa me ịnịịkịla ba Ohe, bala ọ-daa ụbwọ kị ka jụ wẹ ẹpwụ nya ịparadayịsị nya olegu  ọnyịịla ọlẹ lẹ! Ahị chị ọkẹkẹnị lụmẹ chajị nya ahị ọwawa ịlẹ kahị yé nyọlẹ kahị ji ẹpwụ nya ẹlịlẹhị, ọ tị kaa háahị nyọka ya ẹla je angịkịla u-uhye nya ahị ọwawa ịwa ịnyịnyị.—Jer. 31:12.

12. Ányị ehe ọchịchị ịla Ayịsaya 65:20-24 à tị́ lang? Ịyẹ tị́ du?

¹² Ọ myịmyị myịhị lẹhị yẹẹyẹẹ, ahị tị chị ọkẹkẹnị chajị nya okpunyi ọlẹ kahị la bala iJihova. Kụ irya nya ang ịlẹ kahị ka ye bala ọ-họ ẹ-ẹpwụ nya odehe onyeewe wẹẹ! ỊBayịbụụ chịhị ehe nyori: “Anjwo ichiche ịlụbwọ-ọ́ ka gbu lonjwo kaka lee ọngọgbahị ọhẹ-lọhẹ ọ-ka juwa kọ ri ehe tata kaka lẹka.” Ahị ka “me [ube, ahị] tị ka nune [ụ-ụwa]. [Ahị] ka wu ẹrụ nya alakọnụ, [ahị tị] ka hya egbe nyaa nẹ.” Ịnyịnyị, “ụkụrwọ ọlẹ [kahị] nwụ [ịlọhị] họ-ọ́ ka ri ang ododu ka” chajị iJihova ka ‘wahị hahị.’ Ọ chịhị ehe nya ọhịhị ọlam-ọlam ọlẹ kahị ka yé ewu ọ-chị ke bala ọkẹkẹnị. “Ene ká abwọ ọrịrị-ị́ ka cheju ọ-ọnụ” nyahị, ọ jẹ́ ịbaba nya ọngọngọọng wuu lẹ, ọ tị myị ọnụ kọ ka pyẹ ụbwọ nyamwụ maa “ya ang ha ang ịdịhụ wuu ri wu ẹpwụ” lee ọ-họ ẹla olirya nyaa wuu.—Ayị. 65:20-24; Eje. 145:16.

13. Ányị Ayịsaya 65:25 à tị́ chabwọ nya ang ọlẹ ká angịnyị kaa yẹda ẹ-ẹpwụ nya ọhịhị nyaa ụka kị wẹ ka jẹ́ iJihova?

¹³ Ọkpunyị bala ewu ọ-chị ke. Bwụla ụbwọ ọdada nya olegu ịgọgọ nya Ohe, ịrụ nya angịlẹ kịị ju agbama bala ọ-họ abwẹga ene jẹ́ nwụ ọhịhị nyaa họ lẹẹlẹẹ lẹ. (Wa Ayịsaya 65:25.) Ị họ ụkụrwọ yẹẹyẹẹ nyọka gba abwẹla ịtịpyọ ịwẹ hi ịlaa. (Rom. 12:2; Efe. 4:22-24) Ịlẹhị lẹ, ahị angịnyị nya Ohe Oluhye-é la kpẹẹkpẹẹ ka, ahị ka chị ụchụụ ụka ọhẹ lee ụka ọkịla myị́. Ma, iJihova tụ́ ụma nya “angịnyị ehe” ịdatị-datị ịlẹ kị la ọháha ẹ-ẹga nya awụlẹ guru, chajị nya ọọwa ị la okpunyi bala ọ-kaa yẹju lawụlẹ. (Tay. 2:11) Ụkụrwọ ẹbyẹbyị ọlẹ ká Ohe kem ka jẹ́-ẹ họ myị́ à wẹ lẹ!

14. Ányị ẹla ọla Ayịsaya 65:25 à tị́ họ jịra ẹ-ẹga nya ọọnahị ọlẹng ọhẹ?

¹⁴ Ọ chịkpẹẹ ká angịnyị ka jẹ́-ẹ yẹ abwẹla nyaa da ịlẹhị? Kụ ẹhị yẹ oja ọlẹ wẹẹ. Ọnyị okolobya ọhẹ juwa ọlẹ kị wu ju agba ụka lụmẹ-lụmẹ ene kọọ gu ẹka 20. Ọ la abwẹla nya ụya ọhọhọ bala ọkwọ ogugu yẹẹyẹẹ. Ọ ka agba chajị nya imoto o-hu yoyi, ube nya angịnyị o-bene ka yoyi, bala ang ịtịpyọ ịkịla lụmẹ-lụmẹ lẹ. Ọ kaa nwụlanọ nyọka ma ụya ụka wuu. Ụka ọlẹ kọ wo ẹlịlẹhị ọla ịBayịbụụ nya ụgbanyẹ, kọ dọmwụ nyọka wẹ ọjịra-jịra, ọ jẹ́ myị̀myị̀ nyori ọwa nyị yé ịngịhyẹ ọnyịịla ọlẹ kọọwa nyị ka hịhị chajị nyamwụ lẹ, ọọwa ri ọ-ka gbịgba ha iJihova ẹ-ẹpwụ nya ịparadayịsị nya olegu. Nyọlẹ kọ hu enyi Ohe kpá, ọ kaa kụ irya ju abwọlẹ ká Ayịsaya 65:25 họ jịra u-ụhye nyamwụ. Ọ yẹda bwu abwẹla nya agbama ojuju lala ụgẹbẹ kaka la abwẹla nya okpunyị lala ọkpịlọ.

15. Ịyẹ tị́ du kahị kaa tịtọ nyọka wụrụ angịkịla kị ka yẹju lahị ẹ-ẹpwụ nya ịparadayịsị nya olegu? Ányị ahị tị́ ka jẹ́-ẹ họ ịnyị?

¹⁵ Ayịsaya 65:13 dọmwụ bwula o-ya nyori: “Ọngọlahị [iJihova] Ohe Oluhye yẹkẹẹ.” Ẹla myị́ ẹla kọ ya tị kaa họ jịra pyii. (Ayị. 55:10, 11) Alẹ, ịparadayịsị nya olegu ji ịnyịlẹhị lẹ. IJihova họ ugbiyegu nya angị gbịgba họọ ọlẹ kọ datị hi ịkịla. Ẹ-ẹpwụ nya ugbiyegu ọwẹ, ahị la okpunyị yẹẹyẹẹ bala ọ-kaa yé ewu ọ-chị ke ám̀ odehe ojigi-jigi ọlẹ. (Eje. 72:7) Chajị nya ọọwa, ahị tịtọ nyọka da iru nya angịnyị ụbwọ jaabwọ kahị ka jụ họ myị́, wẹ ẹpwụ nya ọ-yẹju lawụlẹ nya Angịnyị nya ịKịrayịsị ọlẹ. Ahị ka jẹ́-ẹ họ ịnyị bwụla ọ-kpa ẹrụ ọnyịịla pyẹ.—Mat. 28:19, 20.

ABWỌLẸ KAHỊ KA JẸ́-Ẹ DA ANGỊKỊLA ỤBWỌ WẸ ẸPWỤ NYA ỊPARADAYỊSỊ NYA OLEGU

16. Ịyẹ à tị́ ka jẹ́-ẹ gbile angịnyị wẹ ịparadayịsị nya olegu?

¹⁶ Ahị wuu la ụkụrwọ ka họ chajị ká ịparadayịsị nya olegu ọlẹ ka ju angịnyị ẹhị la  ọwẹwẹ. Nyọka jẹ́-ẹ họ ịnyị, ahị baba nyọka gbịla iJihova. Ọ́ kaa gbile angịnyị lagbụrụ wẹ ogu nyamwụ ka. Ọkọkọ nya ọọwa, Ọ kaa kpa ọdụmwọ “mwụ” angịnyị chị ịlọmwụ ọgụ. (Jọn. 6:44; Jer. 31:3) Angị la ọkịlẹtụ ọnyịịla ịlẹ kị jẹ́ ang chajị nya ọháha bala abwụma ịnyịịla nyamwụ kaa tụ́ jwọọ chwẹẹ. Ányị ahị tị́ ka jẹ́-ẹ kpa abwẹla ịnyịịla nyahị gbile angịnyị wẹ ẹpwụ nya ịparadayịsị nya olegu?

17. Ányị ahị tị́ ka jẹ́-ẹ họ ká ịparadayịsị nya olegu ka ma angịnyị ma la ọwẹwẹ?

¹⁷ Ụgbẹyị ọhẹ ọlẹ kahị ka jẹ́-ẹ họ ká ịparadayịsị nya olegu ọlẹ ka ju angịnyị ẹhị la ọwẹwẹ rị ọ-ka họ ẹla la ọháha bala ọnahị ẹ-ẹga nya aanahị ịla ọjịra-jịra. Ụka ká angị inyeewe á wẹ ọjịra-jịra, ahị tịtọ kọ ka laa jaabwọ kọ la angịlẹ kị ka ọjịra-jịra ụka onyogo ị-ịKọrịntị. Ị yẹkẹẹ: “Ohe Oluhye juwa ẹ-ẹpwarịrị nyanụ ịnyịlẹhị.” (1 Kọr. 14:24, 25; Sẹk. 8:23) Ahị ka maga pyii nyọka “juwa kpa awụlẹ la okpunyi” jaabwọ ká ịBayịbụụ juhi ọhụ nyọka họ.—1 Tẹs. 5:13.

18. Ịyẹ à tị́ ka jẹ́-ẹ gbile angịnyị wẹ ogu nyahị?

¹⁸ Ahị maga ụka wuu nyọka yẹ aanahị ịla ọjịra-jịra jaabwọ ká iJihova kaa yaa. Ahị ka jẹ́-ẹ họ ịnyị bwụla ọ-ya ẹhị rịrị a-abwẹla ọnyịịla nyaa kem ọkọkọ nya ọ-jẹ́ họ ka nyaa, ọlẹ kọ ka jụwa pyịyọọ ka. Ahị ka jẹ́-ẹ myị́ o-wo lawụlẹ-ka ọnyị ko ji ẹpwarịrị nyahị kori kahị la ọháha bala ọ-la “ọkịlẹtụ nya ọnahị bala ahyẹẹrwẹrwa ẹ-ẹga nya awụlẹ [bala o-juwa] hịnyọhi ọhọbịrị nya awụlẹ wuu ha awụlẹ.” (Efe. 4:32) Kori kahị họ ịnyị, angịlẹ kị tịtọ kị ka kpaa ụ-ụgbẹyị ọlịwịịwẹ ịnyịnyị à ka maga nyọka wẹ ẹpwụ nya ịparadayịsị nya olegu ọlẹ lẹlẹ. b

 A KPEHE HI ẸPWỤ NYA ỊPARADAYỊSỊ NYA OLEGU KA

19. (a) Jaabwọ kọ la ẹ-ẹpwụ nya akpa ọlẹ ko ri, “ Ị Kpehe, Ị tị Nyà Tịrẹkpẹ,” ẹlịyẹ angịhyẹ à tị́ ya nyọlẹ kị tịrẹkpẹ wẹ ẹpwụ nya ịparadayịsị nya olegu? (b) Ịyẹ à tị́ ka ri eje ọchịchị nyahị? (Yẹ ifoto ịnyịnyị.)

¹⁹ Ịparadayịsị nya olegu ọlẹ myịhị lẹhị yẹẹyẹẹ! Ọ wẹẹ hụ́hị gụ olene, angịlẹ kịị ya ogbo ha iJihova ụ-ụwa wẹẹ lụmẹ gụ olene. Ịparadayịsị ọlẹ ká iJihova họ hahị a myịhị lẹhị ụka wuu mẹ. Ọngọnyị kọ tịtọ nyọka yẹ́ ịnyọ ọmwụ́mwụ nya ọkịlẹtụ, ká ang ka nwọọ, kọ ka la okpunyi bala ewu ọ-chị ke aalẹ, ọngọlịnyị ka wẹ ẹpwụ nya ịparadayịsị nya olegu, ọ́ tị ka kpehe bwu ụwa ka ịnyịnyị! Ahị kpitiya ịnyịnyị nyori, Olegu onyobyi kaa maga nyọka pịrịịhị kpehe hi ụwa. (1 Pit. 5:8; Ọwụ. 12:9) Áhị ka myị ọ ka kụrụụhị ka. Ahị họ ụkụrwọ yẹẹyẹẹ nyọka chị ewu ke ụ́hị, ọcharị-charị, bala okpunyi ọlẹpwụ nya ịparadayịsị nya olegu ọlẹ mẹ.