1. Ania ti naespirituan a paraiso, ken ania ti masapul a determinasiontayo?

 ADDA paraiso ditoy daga ita a napno kadagiti tattao nga okupado nga agar-aramid iti naimbag a bambanag. Napno dayta iti minilion a tattao a mangtagtagiragsak iti pudpudno a talna. Dagidiay agbibiagen iti dayta a paraiso ket determinado a di pulos mangpanaw iti dayta. Kayatda met nga adu a tattao agingga a posible ti makikadua kadakuada iti dayta a naisangsangayan a kasasaad. Ania dayta? Ti naespirituan a paraiso! a

2. Ania ti nakaskasdaaw maipapan iti naespirituan a paraiso?

² Nakaskasdaaw ta nangaramid ni Jehova iti simboliko a nakataltalinaay a lugar iti tengnga ti napeggad a lubong ni Satanas a napno iti gura ken kinadakes. (1 Juan 5:19; Apoc. 12:12) Makitkita ti naayat a Diostayo dagiti makadadael nga epekto daytoy a sistema ti bambanag ken mangipapaay iti kinatalged a kasapulantayo tapno rumang-aytayo iti naespirituan. Iladawan ti Saona daytoy a naespirituan a paraiso kas natalged a “pagkamangan” ken “hardin a napadanuman a naimbag.” (Isa. 4:6; 58:11) Iti pamendision ni Jehova, dagiti agnanaed iti daytoy a paraiso ket naragsak ken natalged uray kadagitoy narigat a maudi nga al-aldaw.—Isa. 54:14; 2 Tim. 3:1.

3. Kasano a natungpal ti Isaias kapitulo 65 idi un-unana?

³ Babaen ken propeta Isaias, inladawan ni Jehova no anianto ti kasasaad dagiti agnaed iti naespirituan a paraiso. Mabasatayo dayta iti Isaias kapitulo 65, a ti damo a kaitungpalanna ket idi 537 B.C.E. Iti dayta a tiempo, nawayawayaan dagiti nagbabawi a  Judio iti pannakaadipenda iti Babilonia ket nakasublida iti dagada. Binendisionan ni Jehova ti ilina ken tinulonganna ida a mangpapintas manen iti nadadael a siudad ti Jerusalem. Tinulonganna met ida a mangibangon manen iti templo, ti sentro ti pudno a panagdaydayaw iti Israel.—Isa. 51:11; Zac. 8:3.

4. Ania ti kaitungpalan ita ti Isaias kapitulo 65?

⁴ Ti maikadua a kaitungpalan ti padto ni Isaias ket nangrugi idi 1919 C.E., idi nawayawayaan dagiti agdaydayaw ken Jehova iti panawentayo iti pannakaadipenda iti Babilonia a Dakkel. Kalpasanna, in-inut a limmawa ti naespirituan a paraiso iti intero a daga. Nakaipasdek dagiti naregta nga agibumbunannag iti Pagarian iti adu a kongregasion ken naipakitada dagiti Nakristianuan a kualidad. Dagiti dati a naranggas ken immoral ti biagda ‘insuotdan ti baro a personalidad a pinarsua ti Dios maitunos iti pagayatanna.’ (Efe. 4:24) Siempre, adu a bendision nga inladawan ni Isaias ti literalto pay laeng a matungpal iti baro a lubong. Ngem uray itan, nakaad-adu dagiti bendision a tagtagiragsakentayo. Kitaentayo no kasanotayo a magunggonaan iti naespirituan a paraiso ken no apay a masapul a ditay pulos pampanawan dayta.

TI MAPADASAN DAGITI ADDA ITI NAESPIRITUAN A PARAISO

5. Kas naikari iti Isaias 65:​13, ania dagiti matagiragsaktayo iti naespirituan a paraiso?

⁵ Kinasalun-at ken pannakabang-ar. Ipakita ti padto ni Isaias ti nagdakkel a nagdumaan ti biag dagiti adda iti uneg ti naespirituan a paraiso ken dagiti awan iti dayta. (Basaen ti Isaias 65:13.) Sipaparabur a pempenken ni Jehova ti naespirituan a kasapulan dagiti agdaydayaw kenkuana. Adda kadatayo ti nasantuan nga espirituna, ti naisurat a Saona, ken ti aglaplapusanan a naespirituan a taraon tapno ‘mangan, uminum, ken agrag-otayo.’ (Idilig ti Apocalipsis 22:17.) Ngem nagdakkel ti nakaidumaan ti kasasaad dagiti awan iti naespirituan a paraiso ta ‘mabisin, mawaw, ken maibabainda.’ Saan a mapempennek dagiti naespirituan a kasapulanda.—Amos 8:11.

6. Kasano nga iladawan ti Joel 2:​21-24 dagiti naespirituan a probision a maaw-awattayo, ken kasano a magunggonaantayo kadagita?

⁶ Iti padto ni Joel, inusarna dagiti kangrunaan a kasapulan iti biag kas iti bukbukel, arak, ken lana a mangipakita iti aglaplapusanan a panangipaay ni Jehova iti kasapulan ti ilina, agraman ti naespirituan a taraon. (Joel 2:​21-24) Ar-aramidenna dayta babaen ti Biblia ken dagiti naibatay-Biblia a publikasion, ti website-tayo, kasta met dagiti gimong, asamblea, ken kombensiontayo. Mabalintayo a magunggonaan kadagitoy a naespirituan a probision iti inaldaw. Ket kas resultana, agbalintayo a nasalsalun-at ken ad-adda a mabang-arantayo.

7. Ania ti makaipaay kadatayo iti ‘nasayaat a puso’? (Isaias 65:14)

⁷ Kinaragsak ken kinakontento. “Agpukkawto a siraragsak” dagiti adipen ti Dios gapu ta agliplippias iti pusoda ti panagyaman. (Basaen ti Isaias 65:14.) Maaddaantayo iti ‘nasayaat a puso’ gapu kadagiti makapabileg-pammati a kinapudno, dagiti makaliwliwa a kari iti Sao ti Dios, ken ti sigurado a namnamatayo gapu iti daton a subbot ni Kristo. No pagiinnestoriaantayo dagitoy a banag kadagiti kapammatiantayo, talaga nga agbalintayo a naragsak!—Sal. 34:8; 133:​1-3.

8. Ania ti dua a kangrunaan a kualidad a makita iti naespirituan a paraiso?

⁸ Ti ayat ken panagkaykaysa dagiti adipen ni Jehova ti dua a kangrunaan a kualidad ti naespirituan a paraiso. Dayta a “singgalut ti panagkaykaysa” ket pangramanan laeng iti biagtayto iti baro a lubong, inton dagiti agserserbi ken Jehova tagiragsakenda ti nabilbileg nga ayat ken panagkaykaysa ngem iti  mapadpadasanda ita. (Col. 3:14) Inyestoria ti maysa a sister ti nadlawna maipapan kadagiti adipen ni Jehova idi damona a naam-ammo ida: “Awan ti raragsakak uray iti pamiliak. Ti damo a nakakitaak a maipakpakita ti pudno nga ayat ket kadagiti Saksi ni Jehova.” Asinoman a mayat nga agbalin a pudpudno a naragsak ken kontento ket masapul a mapadasanda ti agbiag iti naespirituan a paraiso. Aniaman ti panangmatmat ti lubong kadagiti Saksi ni Jehova, ti napateg ket addaanda iti nasayaat a nagan wenno reputasion iti imatang ni Jehova ken iti amin nga agdaydayaw kenkuana.—Isa. 65:15.

9. Ania ti ikarkari ti Isaias 65:​16, 17 maipapan kadagiti problematayo iti biag?

⁹ Kinakalmado ken kinatalna ti rikna. Ibagbaga ti Isaias 65:14 a dagidiay mangpili a saan nga agbalin a paset ti naespirituan a paraiso ket ‘agsangitto gapu ta nasaem ti pusoda ken agdung-awda gapu iti naladingit nga espiritu.’ Ngem kasano ngay ti amin a pakaigapuan ti saem ken problema a mangparparigat kadagiti adipen ti Dios? Inton agangay, ‘malipatanton ken saanton a makita dagita’ ti Dios. (Basaen ti Isaias 65:​16, 17.) Ikkatenton ni Jehova ti amin a problematayo, ken dumtengto ti tiempo a saantayton a malagip no kasano kasaem dagiti problema a napadasantayo.

10. Apay nga ibilangmo a bendision ti makikadua kadagiti kapammatiantayo? (Kitaen met ti ladawan.)

¹⁰ Uray itan, mabalintayo a maaddaan iti kalmado a rikna. No makigimongtayo, mabang-arantayo ken malipatantayo dagiti problematayo iti daytoy dakes a lubong. Makatulongtayo met kadagiti kakabsattayo tapno maaddaanda iti kalmado a rikna no ipakitatayo ti ayat, rag-o, talna, kinaimbag, ken kinaalumamay, a karaman kadagiti aspeto ti bunga ti espiritu ti Dios. (Gal. 5:​22, 23) Anian a bendision ti agbalin a paset ti organisasion ti Dios! Makitanto dagiti agtalinaed iti naespirituan a paraiso ti naan-anay a kaitungpalan ti kari ti Dios a “baro a langit ken baro a daga.”

11. Sigun iti Isaias 65:​18, 19, ania koma ti epekto kadatayo ti naespirituan a paraiso nga inaramid ni Jehova?

¹¹ Kinagagar ken panagyaman. Impakaammo ni Isaias dagiti panggapuantayo nga ‘agragsak ken agrag-o’ iti naespirituan a paraiso. Ni Jehova ti nangaramid iti dayta a simboliko a paraiso. (Basaen ti Isaias 65:​18, 19.) Isu a saantayo a pakasdaawan nga us-usarennatayo ni Jehova a tumulong kadagiti tattao a mangpanaw kadagiti organisasion daytoy daan a lubong ta saanda nga isursuro kadakuada ti kinapudno maipapan iti Dios. Kasta met, us-usarennatayo ni Jehova a tumulong kadakuada nga agbalin a paset ti simboliko a napintas a paraiso!  Maragragsakantayo kadagiti bendision a tagtagiragsakentayo gapu ta addatayo iti kinapudno, ken dayta ti mangtignay kadatayo a mangipakaammo maipapan kadagita.—Jer. 31:12.

12. Ania ti mariknam kadagiti kari a nadakamat iti Isaias 65:​20-24, ken apay?

¹² Agyamyaman ken magagarantayo met iti namnamatayo kas residente ti naespirituan a paraiso. Panunotem laengen ti amin a makitamto ken ti aramiden ti Dios iti baro a lubong! Ikarkari ti Biblia: ‘Awanton ti maladaga nga agbiag iti sumagmamano laeng nga aldaw, wenno lakay a saanna a makompleto dagiti aldawna. Mangbangontayto kadagiti balay ket agnaedtayo kadagita, ken agmulatayto kadagiti ubas ket kanentayo ti bungada. Ditayto agbannog iti awan serserbina ta bendisionannatayto ni Jehova.’ Ikarkarina ti natalged ken makapnek a biag nga addaan iti pudpudno a panggep. ‘Sakbay pay nga umawagtayo,’ ammonan ti kasapulan ti tunggal maysa kadatayo ken ‘penkenna ti tarigagay ti tunggal sibibiag a banag.’—Isa. 65:​20-24; Sal. 145:16.

13. Kasano nga ipakita ti Isaias 65:25 dagiti panagbalbaliw nga aramiden dagiti tattao no agserbidan ken Jehova?

¹³ Kinatalna ken kinatalged. Iti tulong ti espiritu ti Dios, adu a dati a naranggas, agresibo, ken dakes a tattao ti nakaaramid iti dakkel a panagbalbaliw iti biagda. (Basaen ti Isaias 65:25.) Inkagumaanda a balbaliwan dagiti saan a makaay-ayo a kualidadda. (Roma 12:2; Efe. 4:​22-24) Siempre, imperpekto pay laeng dagiti adipen ti Dios, isu a makaaramidtayo latta iti kamali. Ngem pinagkaykaysa ni Jehova ti “amin a kita ti tattao” iti saan a mapugsat a singgalut ti ayat ken talna. (Tito 2:11) Ti laeng mannakabalin-amin a Dios ti makaaramid iti daytoy a milagro!

14. Kasano a pimmudno ti Isaias 65:25 iti maysa a brother?

¹⁴ Talaga kadi a mabalbaliwan ti maysa ti personalidadna? Kitaem daytoy a kapadasan. Adda agtutubo a lalaki a namin-adun a naibalud idi agtawen pay laeng iti 20. Naranggas ken immoral ti panagbiagna. Naibalbalud gapu iti carnapping, panagtakaw, ken dadduma pay a serioso a krimen. Awan ti pilpilienna a kalaban. Idi damo a nangngegna ti kinapudno iti Biblia ken immatender kadagiti gimong dagiti Saksi ni Jehova, nakombinsir a nabirokannan ti mangted iti direksion iti biagna—ti naespirituan a paraiso. Idi nabautisaranen, masansan a pampanunotenna no kasano a nagaplikar kenkuana ti Isaias 65:25. Nagdakkel ti nagbalbaliwanna—ti dati a naranggas a tao a kas iti leon ket nagbalinen a nakaam-amo a kas iti karnero.

15. Apay a kayattayo nga awisen ti dadduma a kumadua kadatayo iti naespirituan a paraiso, ken kasanotayo nga aramiden dayta?

¹⁵ Kastoy ti rugi ti Isaias 65:13: “Daytoy ti kinuna ti Kangatuan nga Apo Jehova.” Naingudo ti bersikulo 25 iti sasao a “kuna ni Jehova.” Kanayon a matungpal ti Saona. (Isa. 55:​10, 11) Addan ti naespirituan a paraiso! Naisangsangayan ti panangaramid ni Jehova iti sangalubongan a panagkakabsat. Gapu ta pasetnatayo dayta a pamilia, matagtagiragsaktayo ti kinatalged ken kinatalna uray iti daytoy naranggas a lubong. (Sal. 72:7) Dayta ti makagapu a kayattayo a tulongan ti adu agingga a posible a makikadua kadatayo iti Nakristianuan a panagkakabsattayo. Maaramidtayo dayta no agpokustayo iti panagaramid iti adalan.—Mat. 28:​19, 20.

NO KASANOTAYO A MAAWIS TI DADDUMA ITI NAESPIRITUAN A PARAISO

16. Kasano a mayasideg dagiti tattao iti naespirituan a paraiso?

¹⁶ Adda napateg a maaramidan ti tunggal maysa kadatayo tapno agbalin a makaawis ti naespirituan a paraiso iti dadduma. Maaramidtayo dayta no tuladentayo ni Jehova. Saanna a  piliten dagiti tattao a sumrek iti organisasionna no saanda a kayat. Imbes ketdi, siaayat nga ‘iyasidegna’ dagiti tattao kenkuana. (Juan 6:44; Jer. 31:3) No maammuan dagiti nasingpet a tattao dagiti naayat ken makaay-ayo a kualidad ni Jehova, matignayda nga umasideg kenkuana. Kasano a dagiti nasayaat a kualidad ken ugalitayo maawisna dagiti tattao iti naespirituan a paraiso?

17. Kasano a maawis ti dadduma nga agbalin a paset ti naespirituan a paraiso?

¹⁷ Ti maysa a pamay-an a maawistayo ti dadduma nga agbalin a paset ti naespirituan a paraiso ket ti panagbalintayo a naayat ken naimbag kadagiti kapammatiantayo. No umatender dagiti kabbaro kadagiti gimongtayo, kayattayo a mariknada ti kas iti narikna dagiti saan a manamati a posible nga immatender kadagiti gimong idiay Corinto idi un-unana. Kinunada: “Talaga nga adda kadakayo ti Dios.” (1 Cor. 14:​24, 25; Zac. 8:23) Isu a masapul nga itultuloytayo nga aramiden ti balakad nga, “agbalinkayo a mannakikappia iti sabsabali.”—1 Tes. 5:13.

18. Ania ti mabalin a mangallukoy kadagiti tattao nga agbalin a paset ti organisasiontayo?

¹⁸ Masapul a kanayon nga ikagumaantayo a tuladen ti panangmatmat ni Jehova kadagiti kakabsattayo. Maaramidtayo dayta no agpokustayo kadagiti positibo a kualidadda imbes a kadagiti pagkapuyanda, nga inton agangay ket mapukawton. Masolbartayo dagiti di pagkikinnaawatan iti naayat a pamay-an no kanayon a ‘naimbagtayo iti tunggal maysa, sidudungngo a makipagriknatayo, ken situtulok nga agpipinnakawantayo.’ (Efe. 4:32) Iti kasta, maallukoy dagiti tattao a mayat a matrato iti naayat a pamay-an nga agbalin a paset ti naespirituan a paraiso. b

 AGTALINAEDTAYO ITI UNEG TI NAESPIRITUAN A PARAISO

19. (a) Kas ipakita ti kahon a “ Pimmanawda Ngem Nagsublida,” ania ti imbaga ti dadduma kalpasan a nagsublida iti naespirituan a paraiso? (b) Ania ti masapul a determinasiontayo? (Kitaen met ti ladawan.)

¹⁹ Talaga nga agyamyamantayo gapu iti naespirituan a paraiso! Nakapimpintasen dayta ita, ken ad-adun nga agdaydayaw ken Jehova ti addan iti dayta. Kayattayo nga itultuloy nga apresiaren ti paraiso nga inaramid ni Jehova para kadatayo. Siasinoman a mayat a mabang-aran, agbalin a kontento, kalmado, ken natalged ket masapul nga agbalin a paset ti naespirituan a paraiso ken pulos a saanna a pampanawan dayta! Ngem masapul nga agannadtayo ta ar-aramiden ni Satanas ti amin a kabaelanna a mangallilaw kadatayo tapno panawantayo dayta. (1 Ped. 5:8; Apoc. 12:9) Saantayo koma nga ipalubos nga agballigi isuna. Ikagumaantayo a protektaran ti kinapintas, kinadalus, ken kinatalna ti naespirituan a paraiso.