1. Paladisu ya kimpeve kele nki mpi nki lukanu beto fwete vanda ti yo?

 KELE ti paladisu ya kifwani bubu yai na ntoto ya me fuluka ti bantu yina me kudipesa na kusala mambu mingi ya mbote. Yo me fuluka ti bamilio ya bantu ya ke zinga na ngemba ya kieleka. Bantu yina kele dezia na paladisu ya kimpeve me bakaka lukanu ya kubasika ve ata fioti. Bo ke zola mpi nde bantu mingi kibeni kukota mpi na paladisu yango. Paladisu ya kimpeve a kele nki?

2. Inki ke yitukisa na paladisu ya kimpeve?

² Yo ke yitukisa kibeni na kumona nde Yehowa me salaka kisika mosi ya kifwani, kisika yina bantu na yandi ke zingaka na ngemba mpi na bumosi ata bo ke zinga na nsi-ntoto ya mbi mpi ya kigonsa ya Satana, kisika yina bantu ke kudimengaka. (1 Yoa. 5:19; Kus. 12:12) Nzambi na beto ya zola ke mona mutindu mambu ya nsi-ntoto yai ke bebisa bantu. Yo yina yandi ke sala nde bansadi na yandi kuvanda na lutaninu sambu bo landa kusadila yandi na kiese yonso. Ndinga na yandi ke monisa nde paladisu ya kimpeve kele kisika ya lutaninu ya “kutina” mpi “masamba yina ke butaka bima mbote.” (Yez. 4:6; 58:11) Yehowa ke sadisaka bantu yina ke zinga na paladisu ya kimpeve na kuzinga na kiese mpi na lutaninu na bilumbu yai ya nsuka ya kele mpasi mingi.​—Yez. 54:14; 2 Tim. 3:1.

3. Inki mutindu Yezaya kapu 65 lunganaka na ntangu ya ntama?

³ Yehowa sadilaka profete Yezaya na kutubila mutindu luzingu ya bantu yina ta zinga na paladisu ya kimpeve ta vanda. Nge lenda tala mambu yango na Yezaya kapu 65. Yo lunganaka ntete na mvu 537 na ntwala ya ntangu na beto. Na ntangu yina, Bayuda yina balulaka ntima katukaka na kimpika na Babilone mpi bo vutukaka na insi na bo. Yehowa sakumunaka bantu na yandi mpi yandi sadisaka bo na kukumisa diaka kitoko mbanza Yeruzalemi yina bebaka  mpi na kukumisa diaka tempelo na yo kisika ya ntete ya lusambu ya kieleka na Izraele.​—Yez. 51:11; Zek. 8:3.

4. Inki mutindu Yezaya 65 ke lungana bubu yai?

⁴ Kulungana ya zole ya profesi ya Yezaya yantikaka na 1919 ya ntangu na beto, ntangu bansadi ya Yehowa ya bilumbu na beto basikaka na kimpika na Babilone ya Nene. Na nima, paladisu ya kimpeve yantikaka kukuma nene malembe-malembe na ntoto ya mvimba. Bansamuni ya kikesa ya Kimfumu kangulaka mabundu mingi mpi bo butaka kibeni mbuma ya mbote na kimpeve. Babakala mpi bankento yina vandaka kusala ntete mubulu mpi mansoni ‘lwataka kimuntu ya mpa yina bo gangaka na kuwakana ti luzolo ya Nzambi.’ (Baef. 4:24) Ya kieleka, mambu mingi ya kitoko yina Yezaya tubilaka ta lungana mbote-mbote na nsi-ntoto ya mpa. Ata mpidina, bubu yai beto ke baka mambote mingi na paladisu ya kimpeve. Beto tala mutindu paladisu ya kimpeve ke natilaka beto mambote mpi sambu na nki beto fwete basika ve ata fioti na kati na yo.

INKI MUTINDU BANTU YINA KE ZINGAKA NA PALADISU YA KIMPEVE KE WAKA?

5. Mutindu Yezaya 65:13 ke monisa yo, nki mambote beto ke bakaka na paladisu ya kimpeve?

⁵ Bo ke diaka mbote na mutindu ya kifwani mpi bo ke lembikaka bo. Profesi ya Yezaya ke monisa luswaswanu ya nene ya kele na kati ya bantu yina ke zingaka na paladisu ya kimpeve ti bayina ke zingaka na nganda na yo. (Tanga Yezaya 65:13.) Yehowa ke lungisaka mingi kibeni bampusa ya kimpeve ya bansadi na yandi. Beto kele ti mpeve santu na yandi, Ndinga na yandi mpi madia mingi ya kimpeve sambu beto “dia,” beto “nwa” mpi beto “vanda na kiese.” (Tala mpi Kusonga 22:17.) Kansi bantu yina kele ve na paladisu ya kimpeve ke ‘vandaka na nzala’ ya madia, “nzala ya masa” mpi bo ke ‘waka nsoni.’ Bo ke lungisaka ve banzala na bo ya kimpeve.​—Amo. 8:11.

6. Inki mutindu Yoele 2:21-24 ke tubila madia ya kimpeve yina Yehowa ke pesaka beto mpi nki mutindu yo ke natilaka beto mambote?

⁶ Na profesi ya Yoele, yandi sadilaka bima ya mfunu bonso mbuma, vinu mpi mafuta ya olive sambu na kumonisa nde Yehowa ke pesaka beto bima yonso yina beto kele ti yo mfunu, yo vanda mpi madia ya kimpeve. (Yoe. 2:21-24) Yandi ke pesaka beto yo na nzila ya Biblia, ya mikanda na beto yina ke tendulaka Biblia, ya site Internet na beto, ya balukutakanu ya dibundu, ya balukutakanu ya nene mpi ya balukutakanu ya distrike. Kana beto ke dia madia yina ya kimpeve konso kilumbu, beto ta vanda na sante ya mbote na kimpeve mpi beto ta baka kikesa.

7. Inki ke sadisaka beto na kuvanda ti ntima ya mbote? (Yezaya 65:14)

⁷ Bo ke vandaka na kiese mpi bo ke sepelaka. Bansadi ya Nzambi ke ‘tulaka milolo ya kiese’ sambu bo ke monisilaka Yehowa ntonda mingi. (Tanga Yezaya 65:14.) Bakieleka ya ke kumisaka lukwikilu na beto ngolo, balusilu ya ke pesaka beto kikesa yina kele na Ndinga ya Nzambi mpi kivuvu ya kieleka yina beto kele ti yo sambu na bilumbu ke kwisa sambu na kimenga ya Kristu ke sadisaka beto na ‘kuvanda ti ntima ya mbote.’ Ntangu beto ke solulaka mambu yina ti bampangi na beto Bakristu, yo ke salaka nde beto vanda kibeni na kiese.​—Nk. 34:8; 133:1-3.

8. Inki mambu zole ya mfunu ke vandaka na paladisu ya kimpeve?

⁸ Zola mpi bumosi ya bansadi ya Yehowa kele mambu zole ya nene ya ke vandaka na paladisu ya kimpeve. Zola mpi bumosi yina ke sadisaka beto na kumona na mabanza mutindu luzingu ta vanda na nsi-ntoto ya mpa, kisika yina bansadi ya Yehowa ta zolanaka diaka mingi mpi bo ta vanda na bumosi kuluta bubu yai. (Bakol. 3:14) Mpangi-nkento mosi ke tubila mambu yina yandi monaka na Bambangi ya Yehowa ntangu yandi kutanaka ti bo na mbala ya ntete. Yandi ke tuba nde: “Mono zabaka ve mutindu ya kuvanda na kiese ata nkutu na dibuta na mono. Mbala  ya ntete yina mono monaka bantu ke monisilana zola ya kieleka vandaka ntangu mono kutanaka ti Bambangi ya Yehowa.” Konso muntu yina ke zola kuvanda mpenza na kiese, fwete vanda na paladisu ya kimpeve. Ata bantu ya nsi-ntoto yai ke yindula mambu ya nki mutindu sambu na bansadi ya Yehowa, na meso na yandi mpi ya bantu yonso yina ke sambilaka yandi, bo kele ti zina ya lukumu mpi bikalulu ya mbote.​—Yez. 65:15.

9. Inki Yezaya 65:16, 17 ke tuba sambu na mambu ya mpasi yina ke niokula beto bubu yai?

⁹ Bo ke kudiyangisaka ve mpi bo ke vandaka ntima-madidi. Yezaya 65:14 ke tuba nde bantu yina ke bakaka lukanu ya kuvanda ve na paladisu ya kimpeve ke ‘dilaka sambu na mpasi ya ntima mpi bo ke dilaka sambu na mabanza ya ke niokwama.’ Ebuna nki beto lenda tuba sambu na bampasi yonso yina bansadi ya Nzambi ke kutanaka ti yo? Nsuka-nsuka, bo “ta vila” bampasi yina yonso mpi “meso [ya Nzambi] ta mona yo diaka ve.” (Tanga Yezaya 65:16, 17.) Yehowa ta katula bampasi na beto yonso mpi nsuka-nsuka beto ta yibuka diaka ve mutindu beto vandaka kuwa ntangu beto vandaka kuniokwama.

10. Sambu na nki yo kele dibaku ya nene ya kuvanda na organizasio ya Yehowa? (Tala mpi kifwanisu ya ke wakana ti paragrafe yai.)

¹⁰ Kana beto kele na balukutakanu na beto, beto ke vandaka ntima-madidi mpi beto ke tulaka ve dikebi na bima yina ke salaka nde beto vanda ti basusi na nsi-ntoto yai ya mbi. Beto ke sadisaka mpi bampangi na beto na kuvanda ntima-madidi ntangu beto ke monisilaka bo zola, ntangu beto ke vandaka na kiese, na ngemba mpi ntangu beto ke vandaka ntima-mbote mpi mawete, disongidila ntangu beto ke monisilaka bo bikalulu ya mbuma ya mpeve ya Nzambi. (Bag. 5:22, 23) Yo kele kibeni dibaku ya nene ya kuvanda na organizasio ya Nzambi. Bantu yina ke landa kuvanda na paladisu ya kimpeve ta mona ntangu yina Nzambi ta lungisa mbote-mbote lusilu na yandi ya kusala “zulu ya mpa mpi ntoto ya mpa.”

11. Mutindu Yezaya 65:18, 19 ke monisa yo, nki mutindu paladisu ya kimpeve ke natilaka beto mambote?

¹¹ Bo ke monisaka ntonda mpi bo ke vandaka na kiese mingi. Yezaya tendulaka sambu na nki beto fwete ‘yangalala mpi kuvanda na kiese’ na paladisu ya kimpeve. Yehowa muntu salaka paladisu yina ya kimpeve. (Tanga Yezaya 65:18, 19.) Yo yina, yo ke yitukisaka beto ve na kumona mutindu Yehowa ke sadilaka beto na kusadisa bantu na kukatuka na ba-organizasio ya nsi-ntoto yai ya ke longaka bo ve kieleka ya me tala Nzambi mpi na kusadisa bo na kukota na paladisu ya kimpeve. Beto ke vandaka na kiese mingi sambu na mambote yina beto ke bakaka sambu beto kele na kieleka mpi beto ke vandaka ti nzala ya ngolo ya kusonga yo bantu ya nkaka.​—Yer. 31:12.

12. Mambu yina kele na Yezaya 65:20-24 ke pusa nge na kuwa nki mutindu mpi sambu na nki?

 ¹² Beto ke monisaka mpi ntonda mpi beto ke vandaka na kiese mingi sambu beto kele ti kivuvu yina bantu ya ke vandaka na paladisu ya kimpeve ke vandaka ti yo. Yindula mambu yonso yina beto ta mona mpi yina beto ta sala na nsi-ntoto ya mpa. Biblia ke tuba nde: “Mwana-fioti yina ke zinga kaka bilumbu fioti ta vanda diaka ve, mbuta-muntu yina me lungisa ve bilumbu na yandi ta vanda mpi diaka ve.” Beto ta “tunga banzo mpi ta zinga muna [mpi beto] ta kuna bilanga ya vinu mpi ta dia mbuma na yo.” Beto ta “sala ve kisalu ya ngolo sambu na mpamba” sambu ‘Yehowa ta sakumuna beto.’ Yandi ke sila beto nde beto ta zinga na lutaninu mpi beto ta vanda ti luzingu ya mbote. “Nkutu na ntwala nde [beto] binga,” yandi ta zaba bampusa ya konso muntu mpi yandi ta “lungisa nzala ya konso kima ya kele na luzingu.”​—Yez. 65:20-24; Nk. 145:16.

13. Inki mutindu Yezaya 65:25 ke tubila mutindu bantu ke sobaka kibeni kana bo me yantika kusambila Yehowa?

¹³ Bo ke vandaka na ngemba mpi na lutaninu. Mpeve ya Nzambi me sadisaka bantu mingi yina vandaka ntete ti bikalulu ya bambisi, disongidila bikalulu ya mbi, na kusoba kibeni bikalulu na bo. (Tanga Yezaya 65:25.) Bo me salaka ngolo kibeni sambu na kukatula bikalulu na bo ya mbi. (Bar. 12:2; Baef. 4:22-24) Ya kieleka, bansadi ya Nzambi kele kaka bantu ya kukonda kukuka, yo yina beto ta landa kusala bifu. Kansi Yehowa me vukisaka “bantu ya mitindu yonso” yina ke zolaka yandi mpi ke zolanaka, yo yina beto ke vandaka na ngemba mpi na bumosi. (Tito 2:11) Kaka Nzambi nkwa-ngolo yonso muntu lenda sala kima ya kuyituka mutindu yina.

14. Inki mutindu mbandu ya mpangi mosi monisaka nde mambu yina Yezaya 65:25 ke tubaka kele kieleka?

¹⁴ Keti bantu lenda soba kibeni? Beto tadila mbandu yai. Leke mosi ya bakala yina kotaka mbala mingi na boloko ntangu yandi vandaka ti bamvula 20, vandaka ti luzingu ya mansoni kibeni mpi yandi vandaka kusala mubulu. Bo tulaka yandi na boloko sambu yandi yibaka kamio, sambu yandi bukaka nzo mpi yandi yibaka bima mpi sambu na bima ya nkaka ya mbi kibeni yina yandi salaka. Yandi vandaka kunwana mpamba-mpamba. Ntangu yandi waka mbala ya ntete kieleka ya Biblia mpi yandi yantikaka kukwenda na balukutakanu ya Bambangi ya Yehowa, yandi ndimaka kibeni nde yandi zwaka kisika mosi ya mbote kibeni ya kuzinga, disongidila paladisu ya kimpeve. Ntangu yandi bakaka mbotika, yandi kumaka kuyindula mbala na mbala mutindu Yezaya 65:25 tadilaka yandi. Yandi sobaka kibeni sambu yandi vandaka ntete muntu ya nku bonso ntambu kansi yandi kumaka muntu ya ngemba bonso mwana-dimeme.

15. Sambu na nki beto ke zolaka kubinga bantu ya nkaka na kukota na paladisu ya kimpeve mpi nki mutindu beto ke salaka yo?

¹⁵ Yezaya 65:13 ke yantika ti bangogo yai: “Yehowa Mfumu ya Kuluta Nene me tuba nde.” Verse 25 ke sukisa nde “Yehowa muntu me tuba.” Mambu yonso yina yandi ke tubaka ke lunganaka kaka. (Yez. 55:10, 11) Paladisu ya kimpeve kele dezia bubu yai. Yehowa me salaka dibuta mosi ya bansadi na yandi yina beto lenda fwanisa ve ti ya nkaka. Sambu beto kele na kati ya dibuta yina, beto kele na ngemba mingi bubu yai mpi beto kele na lutaninu na nsi-ntoto yai ya mbi. (Nk. 72:7) Yo yina, beto ke zolaka kusadisa bantu mingi kibeni na kukota mpi na dibuta yango. Beto ke salaka yo ntangu beto ke kudipesaka na kukumisa bantu balongoki.​—Mat. 28:19, 20.

INKI MUTINDU BETO LENDA PESA BANTU YA NKAKA NZALA YA KUKOTA NA PALADISU YA KIMPEVE?

16. Inki mutindu bantu ke kotaka na paladisu ya kimpeve?

¹⁶ Konso muntu lenda sala kima mosi ya mfunu sambu na kupesa bantu ya nkaka nzala ya kukota na paladisu ya kimpeve. Beto ta sala yo kana beto landa mbandu ya Yehowa. Yandi ke pusaka ve bantu na kingolo-ngolo na kukota na organizasio  na yandi, kansi yandi ke ‘bendaka’ bantu na mawete yonso. (Yoa. 6:44; Yer. 31:3) Bantu ya ntima-masonga yina ke longukaka zola ya Yehowa mpi bikalulu na yandi ya kitoko ke pusanaka kukonda mpasi pene-pene na yandi. Inki mutindu mambu ya mbote yina beto ke sala mpi bikalulu na beto ya mbote lenda pesa bantu ya nkaka nzala ya kukota na paladisu ya kimpeve?

17. Inki mutindu beto lenda pesa bantu ya nkaka nzala ya kukota na paladisu ya kimpeve?

¹⁷ Beto lenda pesa bantu ya nkaka nzala ya kukota na paladisu ya kimpeve kana beto ke sadila bampangi na beto Bakristu mambu na zola yonso mpi na mawete yonso. Ntangu bantu ya mpa ke kwisaka na balukutakanu ya dibundu, beto ke zolaka nde bo tuba mambu yina bantu yina vandaka ve Bakristu tubaka, bayina mbala ya nkaka kwendaka na balukutakanu ya Bakristu na Korinto ya ntama. Bo tubaka nde: “Ya kieleka, Nzambi kele na kati na beno.” (1 Bak. 14:24, 25; Zek. 8:23) Yo yina, beto fwete landa ndongisila ya ke tuba nde “beno vanda na ngemba beno na beno.”​—1 Bate. 5:13.

18. Inki lenda pesa bantu nzala ya kukota na organizasio ya Yehowa?

¹⁸ Beto fwete sala bikesa ya kutadila bampangi na beto mutindu Yehowa ke tadilaka bo. Beto ta sala yo kana beto ke tula dikebi na bikalulu na bo ya mbote, kansi ve na bifu na bo yina ta katuka nsuka-nsuka. Beto lenda yidika konso mavwanga yina lenda basika na kati na beto na zola yonso kana beto ke ‘monisilana ntima ya mbote,’ kana beto ke “wila bantu ya nkaka mawa” mpi kana beto ke “lolulana na ntima ya mvimba.” (Baef. 4:32) Kana beto sala mutindu yina, bantu yina ke zola mpi nde bo sadila bo mambu mutindu yina ta kuma mpi ti nzala ya kukota na paladisu ya kimpeve. b

 LANDA KUVANDA NA PALADISU YA KIMPEVE

19. (a) Mutindu lupangu “ Bo Basikaka mpi na Nima Bo Vutukaka” ke monisa yo, nki bantu ya nkaka tubaka na nima ya kuvutuka na paladisu ya kimpeve? (b) Inki beto fwete sala? (Tala mpi kifwanisu ya ke wakana ti paragrafe yai.)

¹⁹ Beto ke sepelaka mingi kibeni ti paladisu ya kimpeve. Yo ke landa kaka kukuma kitoko mpi bantu yina ke kumisa Yehowa kele mingi kuluta na paladisu yango. Beto fwete landa kupesa Yehowa mersi mingi mvula na mvula sambu na paladisu ya kimpeve yina yandi me salaka sambu na beto. Konso muntu yina ke zola kubaka kikesa, kuvanda na kiese, kuvanda ntima-madidi mpi kuvanda na lutaninu fwete kota na paladisu ya kimpeve mpi yandi fwete basika ve ata fioti. Beto fwete keba kibeni sambu Satana ke salaka yonso sambu na kupusa beto na kubasika na paladisu ya kimpeve. (1 Pie. 5:8; Kus. 12:9) Beto fwete pesa yandi ve nzila ya kusala yo. Yo yina, beto sala bikesa ya kutanina kitoko, bunkete mpi ngemba ya paladisu ya kimpeve.